NÍ KASEMI 38
“Nyɛɛ Ba Ye Ngɔ, . . . Nɛ Ma Ha Nɛ Nyɛ He Mi Maa Jɔ Nyɛ”
“Nyɛɛ ba ye ngɔ, nyɛ nihi tsuo nɛ nyɛ tloo tlomi nɛ e ngɛ nyɛ gbee ɔ, nɛ ma ha nɛ nyɛ he mi maa jɔ nyɛ.”—MAT. 11:28.
LA 17 “I Suɔ”
NƆ́ NƐ WA MAA KASE *
1. Ngɛ Mateo 11:28-30 ɔ nya a, mɛni si nɛ Yesu wo?
YESU wo nihi nɛ a ngɛ lɛ tue bue ɔ si ke, “Nyɛɛ ba ye ngɔ, . . . nɛ ma ha nɛ nyɛ he mi maa jɔ nyɛ.” (Kane Mateo 11:28-30.) Munyu nɛ ɔmɛ pi si womi gu ko kɛkɛ. Kaa nɔ hyɛmi nɔ́ ɔ, mo susu nɔ́ nɛ Yesu pee ha yo ko nɛ hiɔ yaya ko ngɛ e nya gbae ɔ he nɛ o hyɛ.
2. Mɛni nɛ Yesu pee ha yo ko nɛ e be he wami?
2 Yo nɛ ɔ hia yemi kɛ buami wawɛɛ. E kpa tsopatsɛmɛ fuu a nɔ konɛ e ná tsami. E gbo dengme jeha 12 sɔuu, se kɛ̃ ɔ, e ná we tsami. Ngɛ Mose Mlaa a nya a, e he tsɔ we. (3 Mose 15:25) E nu kaa Yesu nyɛɔ tsaa nihi nɛ a ngɛ nɔ́ nae ngɛ hiɔ dɛ mi ɔ, enɛ ɔ he ɔ, e ya konɛ e ya hla e se blɔ. Benɛ e na Yesu ɔ, e ta deke nɛ ngɛ tade nɛ e wo ngɛ e tade ɔ nɔ ɔ nya a he, nɛ amlɔ nɔuu ɔ, e ná tsami! Se tsa pi e nɔmlɔ tso ɔ pɛ nɛ Yesu tsa, e ha nɛ bu ba e he ekohu. Kaa nɔ hyɛmi nɔ́ ɔ, benɛ Yesu kɛ lɛ ngɛ munyu tue ɔ, e kɛ munyu nɛ ji “biyo” ɔ tsu ní. Munyu nɛ ɔ nɛ Yesu kɛ tsu ní ɔ tsɔɔ kaa e ngɛ bumi kɛ ha yo ɔ. Hyɛ bɔ nɛ enɛ ɔ ma ha nɛ yo ɔ bua maa jɔ ha!—Luka 8:43-48.
3. Mɛni sane bimihi a he wa ma susu?
3 Mo kadi kaa yo ɔ lɛ ya Yesu ngɔ. E sɛ hlami nɛ e pee nɔ́ ko ngɛ sane ɔ he. Mwɔnɛ ɔ hu ɔ, e sa nɛ wɔ hu waa bɔ mɔde nɛ waa “ba” Yesu ngɔ. Yesu be nyakpɛ blɔ nɔ gue kɛ tsa nihi nɛ a ‘baa’ e ngɔ ngɛ wa be nɛ ɔ mi ɔ. Se loloolo ɔ, e ngɛ adesahi tsuo nine fɔe, nɛ e ngɛ mɛ dee ke: “Nyɛɛ ba ye ngɔ, . . . nɛ ma ha nɛ nyɛ he mi maa jɔ nyɛ.” Ngɛ munyu nɛ ɔ mi ɔ, wa ma ha
sane bimi enuɔ nɛ ɔmɛ a heto: Kɛ wa maa pee kɛɛ kɛ “ba” Yesu ngɔ? Mɛni Yesu ngɛ tsɔɔe benɛ e de ke: “Nyɛɛ ngɔ ye kuɛpã tso ɔ kɛ fɔ nyɛ nɔ” ɔ? Mɛni wa ma nyɛ maa kase ngɛ Yesu he? Mɛni he je nɛ ní tsumi nɛ Yesu kɛ wo wa dɛ ɔ haa nɛ wa he mi jɔɔ wɔ ɔ? Nɛ mɛni maa ye bua wɔ konɛ waa ya nɔ nɛ wa ná he jɔmi ngɛ Yesu kuɛpã tso ɔ sisi?“NYƐƐ BA YE NGƆ”
4-5. Mɛni ji blɔ komɛ nɛ wa ma nyɛ maa gu nɔ kɛ “ba” Yesu ngɔ?
4 Blɔ kake nɛ wa maa gu nɔ kɛ “ba” Yesu ngɔ ji kaa wa maa kase níhi nɛ e de, kɛ níhi nɛ e pee ɔ he ní bɔ nɛ wa ma nyɛ. (Luka 1:1-4) Nɔ ko be nyɛe maa kase ní nɛ ɔmɛ ha wɔ, e sa nɛ wɔ nitsɛmɛ waa pee jã. Ke wa mwɔ wa yi mi kpɔ kaa wa ma ha nɛ a baptisi wɔ nɛ waa pee Kristo kaseli ɔ, lɔ ɔ hu tsɔɔ kaa wa “ba” Yesu ngɔ.
5 Blɔ kpa ko hu nɛ wa guɔ nɔ kɛ ‘baa’ Yesu ngɔ ji kaa wa maa ya asafo mi nikɔtɔma amɛ a ngɔ ke wa hia yemi kɛ buami ko. Yesu guɔ ‘nike níhi nɛ e kɛ ha ngɛ adesahi a mi’ nɛ ɔ nɔ kɛ hyɛɛ e jijɔ ɔmɛ a nɔ. (Efe. 4:7, 8, 11; Yoh. 21:16; 1 Pet. 5:1-3) E sa nɛ waa sɛ hlami nɛ waa ya a ngɔ nɛ wa ya bi a yemi kɛ buami. E sɛ nɛ waa hyɛ blɔ kaa asafo mi nikɔtɔma amɛ maa le nɔ́ nɛ ngɛ wa juɛmi mi, nɛ́ a le níhi nɛ hia wɔ. Nyɛminyumu ko nɛ a tsɛɛ lɛ ke Julian de ke: “E he ba hia nɛ ma je Betel akɛnɛ i be nɔmlɔ tso mi he wami kpakpa a he je. Benɛ e ba jã a, ye huɛ ko wo mi ga kaa ma ya de nikɔtɔma amɛ nɛ a ba slaa mi konɛ a wo mi he wami. Sisije ɔ, i susu kaa i hia we he wami womi. Se pee se ɔ, i ya de mɛ nɛ a ba slaa mi. Jamɛ a slaami ɔ ba pee nike ní ko nɛ se be nɛ i ná.” Asafo mi nikɔtɔma anɔkualetsɛmɛ kaa nikɔtɔmahi enyɔ nɛ a ya slaa Julian ɔ ma nyɛ maa ye bua wɔ konɛ waa le “Kristo juɛmi ɔ.” Kristo juɛmi ɔ nɛ wa maa le ɔ biɔ nɛ waa le e susumi kɛ e ní peepee, nɛ waa kase lɛ. (1 Kor. 2:16; 1 Pet. 2:21) Yemi kɛ buami nɛ ɔ ji nike ní nɛ se be nɛ a ma nyɛ ma ha wɔ.
“NYƐƐ NGƆ YE KUƐPÃ TSO Ɔ KƐ FƆ NYƐ NƆ”
6. Mɛni Yesu ngɛ tsɔɔe benɛ e de ke, “Nyɛɛ ngɔ ye kuɛpã tso ɔ kɛ fɔ nyɛ nɔ” ɔ?
6 Benɛ Yesu de ke: “Nyɛɛ ngɔ ye kuɛpã tso ɔ kɛ fɔ nyɛ nɔ” ɔ, eko ɔ, nɔ́ nɛ e ngɛ tsɔɔe ji, “Nyɛɛ kplɛɛ he blɔ nɛ i ngɛ ɔ nɔ.” E ma nyɛ maa ba hu kaa nɔ́ nɛ e ngɛ tsɔɔe ji, “Nyɛɛ piɛɛ ye he ngɛ kuɛpã tso ɔ sisi konɛ wɔ tsuo wa tsu ní ha Yehowa.” Bɔ nɛ Yesu ngɛ tsɔɔe ha fɛɛ ko ɔ, kuɛpã tso ɔ nɛ wa maa ngɔ kɛ fɔ wa nɔ ɔ biɔ ní tsumi.
7. Ngɛ Mateo 28:18-20 ɔ nya a, mɛni ní tsumi nɛ a kɛ wo wa dɛ, nɛ mɛni nɔ mi mami wa ma nyɛ ma ná?
7 Ke wa jɔɔ wa wami nɔ kɛ ha Yehowa, nɛ wa ha nɛ a baptisi wɔ ɔ, lɔ ɔ tsɔɔ kaa wa kplɛɛ Yesu nine fɔmi ɔ nɔ. Nine fɔmi nɛ ɔ ngɛ kɛ ha nɔ fɛɛ nɔ. Yesu be nɔ ko nɛ e suɔ nɛ e sɔmɔ Yehowa a kuae kɔkɔɔkɔ. (Yoh. 6:37, 38) Kristo se nyɛɛli tsuo ná he blɔ kaa a ma tsu ní tsumi nɛ Yehowa kɛ wo Yesu dɛ ɔ eko. Wa ma nyɛ ma ná nɔ mi mami kaa Yesu maa ye bua wɔ kɛ tsu ní tsumi nɛ ɔ be fɛɛ be.—Kane Mateo 28:18-20.
“NYƐƐ KASE MI”
Mo ha nɛ ni kpahi a he mi nɛ jɔ mɛ kaa bɔ nɛ Yesu pee ɔ (Hyɛ kuku 8-11) *
8-9. Mɛni he je nɛ nihi nɛ a baa a he si ɔ nyɛ nɛ a hɛ kɛ su Yesu he, nɛ mɛni sane bimihi nɛ e sa nɛ wa bi wa he?
8 Nihi nɛ a baa a he si ɔ nyɛ nɛ a hɛ kɛ su Yesu he. (Mat. 19:13, 14; Luka 7:37, 38) Mɛni he je? Waa hyɛ slɔɔto nɛ ngɛ Yesu kɛ Farisi bi ɔmɛ a kpɛti. Jami hɛ mi nyɛɛli nɛ ɔmɛ woɔ a he nɔ, nɛ a be suɔmi. (Mat. 12:9-14) Se Yesu baa e he si nɛ e suɔ nimli. Farisi bi ɔmɛ hlaa hɛ mi nyami, nɛ a kɛ he blɔ nɛ a ngɛ ɔ woɔ a he nɔ. Se Yesu bɔ e kaseli ɔmɛ kɔkɔ ngɛ hɛ mi nyami hlami he, nɛ e tsɔɔ mɛ kaa a bu a he kaa nihi nɛ a ba si. (Mat. 23:2, 6-11) Farisi bi ɔmɛ kɛ he blɔ nɛ a ngɛ ɔ nyɛɔ nihi a nɔ, nɛ a woɔ a he gbeye. (Yoh. 9:13, 22) Se Yesu je mi mi jɔmi kɛ suɔmi mi nɛ e kɛ ni kpahi hi si saminya.
9 Anɛ o kase Yesu su nɛ ɔmɛ lo? Mo bi o he ke: ‘Anɛ a le mi kaa i ji nɔ ko nɛ e he jɔ, nɛ i baa ye he si lo? Anɛ i jeɔ ye tsui mi kɛ tsuɔ ní tsumi nɛ ba si kɛ yeɔ bua ni kpahi lo? Anɛ i jeɔ mi mi jɔmi kpo kɛ tsɔɔ ni kpahi lo?’
10. Kɛ Yesu kɛ nihi nɛ e kɛ mɛ tsu ní ɔ hi si ha kɛɛ?
10 Yesu kɛ nihi nɛ a piɛɛ e he kɛ ngɛ ní tsue ɔ hi si ngɛ tue mi jɔmi mi, nɛ e bua jɔ he kaa e ma tsɔse mɛ. (Luka 10:1, 19-21) E wo e kaseli ɔmɛ he wami kaa a bi sanehi fuu, nɛ e suɔ nɛ e le a susumihi. (Mat. 16:13-16) Kaa bɔ nɛ tsohi nɛ a ngɛ abɔɔ ko mi ɔ waa flɔflɔɔflɔ ɔ, Yesu kaseli ɔmɛ hu wa flɔflɔɔflɔ. A bu níhi nɛ Yesu tsɔɔ mɛ ɔ tue, nɛ a tsu ní tsumi kpakpahi kɛ tsɔɔ kaa a wo yiblii.
Mo je huɛ bɔmi su kpo; mo ha nɛ nihi nɛ a nyɛ nɛ a su o he
O hɛ nɛ dɔ; o kɛ kã nɛ tsu ní
Moo ba o he si; tsu ní wawɛɛ *
11. Mɛni sanehi nɛ e sa nɛ wa bi wa he?
11 Anɛ a ngɔ he blɔ ko kɛ wo o dɛ lo? Ke jã a, lɛɛ mo bi o he ke: ‘Kɛ i kɛ nihi nɛ i kɛ mɛ tsuɔ ní ngɛ we mi loo ye ní tsumi he ɔ hiɔ si ha kɛɛ? Anɛ i diɔ tue mi jɔmi se lo? Anɛ i woɔ ni kpahi he wami konɛ a bi sanehi lo? Ke a ngɛ a juɛmi tsɔɔe ɔ, i buɔ mɛ tue lo?’ Wa sume nɛ waa pee kaa Farisi bi ɔmɛ. A náa nihi nɛ biɔ mɛ sanehi ɔ a he abofu, nɛ ke nɔ ko kɛ mɛ kpa we gbi ɔ, a teɔ si kɛ woɔ lɛ.—Maak. 3:1-6; Yoh. 9:29-34.
“NYƐ HE MI MAA JƆ NYƐ”
12-14. Mɛni he je nɛ ní tsumi nɛ Yesu kɛ wo wa dɛ ɔ haa nɛ wa he mi jɔɔ wɔ ɔ?
12 Mɛni he je nɛ ke wa tsu ní tsumi nɛ Yesu kɛ ha wɔ ɔ, wa he mi jɔɔ wɔ ɔ? Nyɛ ha nɛ waa hyɛ yi mi tomi komɛ a he je.
13 Wa ngɛ nɔ hyɛli nɛ pe kulaa. Yehowa nɛ ji wa Nɔ Hyɛlɔ Nɛ Nɔ Kuɔ Pe Kulaa a pi nyɔmtsɛ nɛ e yi mi wa, nɛ́ nɔ muɛ e hɛ. E hɛ saa ní tsumi nɛ wa tsuɔ ɔ. (Heb. 6:10) Nɛ e haa wɔ he wami kɛ nyɛmi nɛ waa kɛ ma tsu ní tsumi nɛ e kɛ wo wa dɛ ɔ. (2 Kor. 4:7; Gal. 6:5) Yesu nɛ ji wa Matsɛ ɔ pee nɔ hyɛmi nɔ́ kpakpa kɛ ha wɔ. (Yoh. 13:15) Asafo mi nikɔtɔmahi nɛ a hyɛɛ wa nɔ ɔ hu bɔɔ mɔde kaa a maa kase Yesu nɛ ji “nɔ hyɛlɔ ngua a.” (Heb. 13:20; 1 Pet. 5:2) A bɔɔ mɔde nɛ a jeɔ mi mi jɔmi kpo, a woɔ nihi he wami, a kɛ kã tsɔseɔ wɔ, nɛ a poɔ wa he piɛ.
14 Wa ngɛ huɛmɛ kpakpahi. Nɔ ko be nɛ e ngɛ huɛmɛ kpakpahi nɛ a ngɛ suɔmi kaa wɔ. Moo lɛɛ mo susu he nɛ o hyɛ: Wa ná he blɔ nɛ waa kɛ nihi nɛ a je mi bami he tsɔ nɛ a bui a he dali ɔ tsuɔ ní. A ngɛ nyɛmi slɔɔtohi, se kɛ̃ ɔ, a baa a he si, nɛ a buɔ ni kpahi kaa a nɔ kuɔ pe mɛ. A naa wɔ kaa a huɛmɛ, se pi nihi nɛ a kɛ mɛ ngɛ ní tsue kɛkɛ. Huɛ bɔmi nɛ ngɛ waa kɛ mɛ wa kpɛti ɔ mi wa wawɛɛ nitsɛ, nɛ a pee klaalo po kaa a kɛ a wami maa sã afɔle ngɛ wa he!
15. Kɛ e sa nɛ waa na ní tsumi nɛ wa ngɛ tsue ɔ ha kɛɛ?
15 Wa ngɛ ní tsumi nɛ hi pe kulaa tsue. Wa tsɔɔ nihi Yehowa he anɔkuale ɔ, nɛ wa kpaa Abosiami lakpa tsɔɔmi ɔmɛ a he bo. (Yoh. 8:44) Satan tsɔɔ nihi lakpa tsɔɔmihi, nɛ lɔ ɔ haa nɛ a nuɔ he kaa a be hɛ nɔ kami ko. Kaa nɔ hyɛmi nɔ́ ɔ, e suɔ nɛ wa susu kaa Yehowa kɛ wa yayamihi be wɔ pae, nɛ e sume wɔ. Enɛ ɔ ji lakpa munyu nitsɛnitsɛ nɛ pee kaa tlomi nɛ mi jiɔ wawɛɛ! Ke wa “ba” Kristo ngɔ ɔ, a kɛ wa he yayami ɔmɛ maa pa wɔ. Se anɔkuale ɔ ji kaa Yehowa suɔ wɔ tsuo saminya. (Rom. 8:32, 38, 39) Ke wa ye bua nihi nɛ a ngɔ a hɛ kɛ fɔ Yehowa nɔ, nɛ a si himi pee kpakpa a, hyɛ bɔ nɛ wa bua jɔɔ ha!
YAA NƆ NƐ O NÁ HE JƆMI NGƐ YESU KUƐPÃ TSO Ɔ SISI
16. Mɛni blɔ nɔ nɛ tlomi nɛ Yesu ke waa tloo ɔ je ekpa kulaa ngɛ tlomi kpahi nɛ ngɛ wa kuɛ nɔ ɔ a he?
16 Tlomi nɛ Yesu ke waa tloo ɔ je ekpa kulaa ngɛ tlomi kpahi nɛ ngɛ wa kuɛ nɔ ɔ a he. Kaa nɔ hyɛmi nɔ́ ɔ, ke ligbi ɔ ba nyagbe ɔ, wa nuɔ he kaa pɔ tɔ wɔ ngɛ ní tsumi nɛ wa tsu ɔ he, nɛ wa bua hu jɔɛ. Se wa náa bua jɔmi wawɛɛ ke ligbi ɔ ba nyagbe nɛ wa na kaa waa kɛ wa be sɔmɔ Yehowa kɛ Kristo. Eko ɔ, ke wa kpa ní tsumi ɔ, wa nuɔ he kaa pɔ tɔ wa he. Se kɛ̃ ɔ, wa wluaa wɔ nɛ wa yaa asafo mi kpe jamɛ a gbɔkuɛ ɔ. Behi fuu ɔ, ke wa kpale kɛ ba we mi ɔ, wa bua jɔɔ, nɛ wa náa he wami he. Jã kɛ̃ nɛ ke wa tsu fiɛɛmi ní tsumi ɔ, nɛ wa he be kɛ kase Baiblo ɔ ngɛ wa dɛ he ɔ, se nɛ wa náa a hiɛɛ pe he wami nɛ wa puɛɔ ɔ!
17. Mɛni he je nɛ e sa nɛ waa le wa nyɛmi, nɛ mɛni e sa nɛ waa hyɛ nɛ hi ngɛ he?
17 Ngɛ anɔkuale mi ɔ, e sa nɛ waa nu sisi kaa e slo wa ti nɔ fɛɛ nɔ kɛ e nyɛmi. Enɛ ɔ he ɔ, e sa nɛ waa le nɔ́ nɛ wa ma nyɛ ma tsu. Kaa nɔ hyɛmi nɔ́ ɔ, wa ma nyɛ ma puɛ wa he wami tsuo kɛ bua he lo nya níhi a nya. Niheyo niatsɛ ko ba bi Yesu ke: “Mɛni nɛ e sa kaa ma pee konɛ ma ná neneene wami?” Niheyo nɛ ɔ ngɛ Mlaa a nɔ yee momo. E ma nyɛ maa ba kaa e ji nɔmlɔ kpakpa, ejakaa Maako Sane Kpakpa a tsɔɔ kaa Yesu “ná suɔmi ha lɛ.” Yesu fɔ niheyo ɔ nine, nɛ e de lɛ ke, “Yaa nɛ o ya jua níhi nɛ o ngɛ ɔ . . . konɛ o ba pee ye se nyɛɛlɔ.” Niheyo ɔ juɛmi gbɛ, nɛ e nyɛ we nɛ e ngmɛɛ e “ní babauu” ɔ he. (Maak. 10:17-22) Nɔ́ nɛ je mi kɛ ba ji kaa niheyo ɔ kua kuɛpã tso ɔ nɛ Yesu ngɔ kɛ fɔ e nɔ ɔ, nɛ e ya nɔ nɛ e pee nyɔguɛ kɛ ha “Ní Nami.” (Mat. 6:24) Ke mo ɔ, jinɛ mɛni o ko pee?
18. Mɛni e sa nɛ waa pee be komɛ, nɛ mɛni he je?
18 E maa hi kaa wa ma susu otihi nɛ waa kɛ ma wa hɛ mi ɔ a he be komɛ. Mɛni he je? Konɛ waa le ke ji kaa waa kɛ wa he wami ngɛ ní tsue saminya aloo waa kɛ tsu we ní saminya. Mo susu nɔ́ nɛ niheyo ko nɛ a tsɛɛ lɛ ke Mark de ɔ he nɛ o hyɛ. E de ke: “Jehahi babauu ji nɛ ɔ nɛ i susu kaa i pee ye si himi kpokploo. I ngɛ sɔmɔe kaa daa blɔ gbalɔ, se be fɛɛ be ɔ, i ngɛ sika kɛ bɔ nɛ ma plɛ kɛ ná si himi gbɔjɔɔ ha a he susue. I nuɔ he kaa tlomi ko nɛ jiɔ ngɛ ye kuɛ nɔ, se i li nɔ́ he je. Kɛkɛ nɛ i ba yɔse kaa i ngɔ imi nitsɛ ye níhi kɛ ngɛ kekle blɔ he yee ngɛ ye si himi mi, nɛ i kɛ ye be kɛ he wami bɔɔ pɛ ngɛ ní tsue ha Yehowa.” Mark pee tsakemi ngɛ e si himi kɛ bɔ nɛ e susuɔ níhi a he ha a mi, nɛ lɔ ɔ ha nɛ e nyɛ tsu babauu ngɛ Yehowa sɔmɔmi mi. E de ke: “Be komɛ ɔ, i peeɔ yeyeeye ngɛ sika he, se akɛnɛ Yehowa yeɔ bua mi, nɛ Yesu hu fĩ ye se he je ɔ, i nyɛ ye nyagba nɛ ɔmɛ a nɔ.”
19. Mɛni he je nɛ e he hia nɛ wa ná juɛmi nɛ da a?
19 Ke wa pee níhi etɛ nɛ nyɛɛ se nɛ ɔmɛ ɔ, wa he mi maa jɔ wɔ ngɛ Yesu kuɛpã tso ɔ sisi. Kekleekle ɔ, e sa nɛ wa ná juɛmi nɛ da. Wa ngɛ ní tsue ha Yehowa, lɔ ɔ he ɔ, e sa nɛ wa tsu ní tsumi ɔ kaa bɔ nɛ e ngɛ hlae ɔ. Wɔ ji ní tsuli ɔmɛ, nɛ Yehowa ji wa Nyɔmtsɛ. (Luka 17:10) Ke wa ka kaa wa ma tsu ní tsumi ɔ bɔ nɛ wɔɔ wa suɔ ɔ, ní tsumi ɔ he maa wa ha wɔ. Ke na ku ko ngɛ he wami kaa mɛni po, nɛ e kplɛɛ we nɛ e nyɔmtsɛ ɔ nɛ e kudɔ lɛ ngɛ kuɛpã tso ɔ sisi ɔ, pɔ maa tɔ na ku ɔ he, nɛ e ma nyɛ maa plaa hulɔ. Se ke waa kɛ Yehowa blɔ tsɔɔmi tsu ní ɔ, wa ma nyɛ maa da nyagba fɛɛ nyagba nya. O hɛ ko je nɔ kaa nɔ ko be nyɛe maa pee nɔ́ ko kɛ tsi Yehowa yi mi tomi nya!—Rom. 8:31; 1 Yoh. 4:4.
20. Mɛni yi mi tomi nɛ e sa nɛ wa kɛ tloo Yesu kuɛpã tso ɔ?
20 Nɔ́ nɛ ji enyɔ ɔ, o kɛ yi mi tomi kpakpa nɛ Yoh. 6:25-27, 51, 60, 66; Filip. 3:18, 19) Se nihi nɛ a kɛ a tsui tsuo suɔ Mawu kɛ a nyɛmi nɔmlɔ ɔ kɛ bua jɔmi tloo Yesu kuɛpã tso ɔ a wami be tsuo ngɛ zugba a nɔ, nɛ a ngɛ hɛ kɛ nɔ fɔmi kaa a maa piɛɛ Yesu he kɛ ye matsɛ ngɛ hiɔwe. Ke wɔ hu waa kɛ yi mi tomi kpakpa tloo Yesu kuɛpã tso ɔ, wa bua maa jɔ daa.
tsu ní. Oti nɛ waa kɛ ma wa hɛ mi ji kaa wa maa wo Yehowa, wa Tsɛ nɛ ngɛ suɔmi ɔ hɛ mi nyami. Ngɛ kaseli ɔmɛ a be ɔ mi ɔ, nihi nɛ hɛkɔ ha nɛ a fo mɛ pɛ a nɔ́ mi ɔ ná we bua jɔmi hu, nɛ a kua Yesu kuɛpã tso ɔ. (21. Ngɛ Mateo 6:31-33 ɔ nya a, mɛni wa ma nyɛ maa hyɛ blɔ kaa Yehowa maa pee?
21 Nɔ́ nɛ ji etɛ ɔ, moo hyɛ Yehowa blɔ. Wa mwɔ wa yi mi kpɔ kaa wa ma tsu ní wawɛɛ, nɛ waa kɛ níhi maa sã afɔle ngɛ wa si himi mi. Yesu bɔ wɔ kɔkɔ kaa nihi maa te si kɛ wo wɔ. Se wa ma nyɛ maa hyɛ blɔ kaa Yehowa maa wo wɔ he wami, nɛ wa ma nyɛ ma fĩ si ngɛ nyagba fɛɛ nyagba mi. Ke wa wlua wɔ nɛ wa fĩ si ɔ, wa he maa wa wawɛɛ. (Yak. 1:2-4) Wa ma nyɛ maa hyɛ blɔ kaa Yehowa ma ha wɔ wa hiami níhi, Yesu maa hyɛ wa nɔ, nɛ wa nyɛmimɛ nyumuhi kɛ yihi maa wo wɔ he wami. (Kane Mateo 6:31-33; Yoh. 10:14; 1 Tɛs. 5:11) Ní nɛ ɔmɛ ji níhi nɛ maa ye bua wɔ konɛ wa nyɛ nɛ waa da nyagba fɛɛ nyagba nya.
22. Mɛni he nɛ wa bua ma nyɛ maa jɔ ngɛ?
22 Yo ɔ nɛ Yesu tsa lɛ ɔ he mi jɔ lɛ jamɛ a ligbi ɔ nɔuu. Se ja e ba pee Kristo kaselɔ nɛ yeɔ anɔkuale loko e he mi maa jɔ lɛ kɛ ya neneene. Ke o hyɛ ɔ, mɛni yo ɔ pee? Ke e hla kaa e maa hi Yesu kuɛpã tso ɔ sisi ɔ, mɛni jɔɔmi e ma ná? E maa piɛɛ Yesu he ngɛ hiɔwe! Jɔɔmi nɛ ɔ kle kulaa pe níhi nɛ eko ɔ, e kɛ sã afɔle ɔ. Wa ngɛ hɛ kɛ nɔ fɔmi kaa wa maa ya hiɔwe jio, wa maa hi zugba a nɔ jio, wa bua ma nyɛ maa jɔ kaa wa kplɛɛ Yesu nine fɔmi nɛ nyɛɛ se nɛ ɔ nɔ: “Nyɛɛ ba ye ngɔ!”
LA 13 Nyɛ Ha Nɛ Waa Kase Kristo
^ kk. 5 Yesu fɔ wɔ nine kaa waa ba e ngɔ. Mɛni e sa nɛ waa pee konɛ wa nyɛ nɛ waa kplɛɛ nine fɔmi nɛ ɔ nɔ? A ma ha sane bimi nɛ ɔ heto ngɛ ní kasemi nɛ ɔ mi, nɛ e ma kai wɔ bua jɔmi nɛ wa ma ná ke waa kɛ Kristo tsu ní.