1. Ke nɔ ko pee yayami nɛ hɛdɔ ngɛ he po ɔ, mɛni hɛnɔkami lɛ ngɛ kɛ ha lɛ?

 NGƐ ní kasemi nɛ be ɔ mi ɔ, wa na bɔ nɛ Paulo tsu sane ko nɛ hɛdɔ ngɛ he ngɛ Korinto asafo ɔ mi ɔ he ní ha. Akɛnɛ yayami peelɔ ɔ tsakee we e tsui he je ɔ, a je lɛ kɛ je asafo ɔ mi. Se kɛ̃ ɔ, kaa bɔ nɛ ngmami nɛ a ngɔ wa ní kasemi nɛ ɔ kɛ da nɔ ɔ tsɔɔ ɔ, Mawu ma nyɛ maa ye bua nihi nɛ a pee yayami nɛ hɛdɔ ngɛ he ɔ konɛ a tsake a tsui. (Rom. 2:4) Mɛni asafo mi nikɔtɔma amɛ ma nyɛ maa pee kɛ ye bua yayami peelɔ ko nɛ́ e tsake e tsui?

2-3. Ke wa ná le kaa nyɛmi ko pee yayami nɛ hɛdɔ ngɛ he ɔ, mɛni e sa nɛ waa pee, nɛ mɛni he je?

² Loko asafo mi nikɔtɔma amɛ ma nyɛ maa ye bua nɔ ko nɛ e pee yayami nɛ hɛdɔ ngɛ he ɔ, e sa nɛ a le nɔ́ nɛ nɔ ɔ pee ɔ. Enɛ ɔ he ɔ, ke wa ná le kaa nyɛmi ko pee yayami nɛ hɛdɔ ngɛ he, nɛ e ma nyɛ ma ha nɛ a je lɛ ngɛ asafo ɔ mi ɔ, mɛni e sa nɛ waa pee? Ke e ba jã a, e sa nɛ waa wo nyɛmi ɔ nɛ e pee yayami ɔ he wami konɛ e ya de asafo mi nikɔtɔma amɛ nɛ a ye bua lɛ.—Yes. 1:18; Níts. 20:28; 1 Pet. 5:2.

³ Se ke yayami peelɔ ɔ sume kaa e ma ya de asafo mi nikɔtɔma amɛ hu nɛɛ? Ke e ba lɛ jã a, e sa nɛ wɔ nitsɛmɛ wa ya de asafo mi nikɔtɔma amɛ konɛ a ye bua lɛ. Jã nɛ wa maa pee ɔ maa tsɔɔ kaa wa suɔ lɛ, ejakaa wa sume nɛ wa nyɛmi ɔ nɛ je wa dɛ. Ke yayami peelɔ ɔ tsakee we e tsui ɔ, huɛ bɔmi nɛ ngɛ e kɛ Yehowa a kpɛti ɔ ma puɛ kulaa. Jehanɛ hu ɔ, lɔ ɔ ma nyɛ maa gbe asafo ɔ he guɛ. Enɛ ɔ he ɔ, akɛnɛ wa suɔ Yehowa kɛ wa  nyɛmi ɔ he je ɔ, e sa nɛ waa pee kã wawɛɛ nɛ wa ya bɔ asafo mi nikɔtɔma amɛ amaniɛ.—La 27:14.

BƆ NƐ ASAFO MI NIKƆTƆMA AMƐ YEƆ BUAA NIHI NƐ A PEE YAYAMI NƐ HƐDƆ NGƐ HE Ɔ HA

 4. Mɛni oti nɛ asafo mi nikɔtɔma amɛ kɛ maa a hɛ mi ke a ngɛ nɔ ko nɛ e pee yayami nɛ hɛdɔ ngɛ he ɔ ye buae?

⁴ Ke nɔ ko nɛ ngɛ asafo ɔ mi ɔ pee yayami nɛ hɛdɔ ngɛ he ɔ, nikɔtɔmahi a kuu ɔ hlaa a kpɛti nihi etɛ nɛ́ a sɔmɔ kaa ajla toli konɛ a tsu sane ɔ he ní. a E sa nɛ nyumu nɛ ɔmɛ nɛ a pee nihi nɛ a baa a he si nɛ a peeɔ a he humi. E ngɛ mi kaa a le kaa e sa nɛ a ye bua yayami peelɔ ɔ konɛ e tsake e tsui mohu lɛɛ, se kɛ̃ ɔ, a nyɛ we yayami peelɔ ɔ nɔ kaa e tsake e tsui. (5 Mose 30:19) Asafo mi nikɔtɔma amɛ le kaa pi yayami peelɔ fɛɛ yayami peelɔ nɛ e maa kplɛɛ tsɔsemi nɔ, nɛ e ma tsake e tsui kaa bɔ nɛ Matsɛ David pee ɔ. (2 Sam. 12:13) Eko ɔ, nihi nɛ a pee yayami nɛ hɛdɔ ngɛ he ɔ a kpɛti ni komɛ ma nyɛ maa hla kaa a ma kua ga womi nɛ Yehowa kɛ ma ha mɛ ɔ. (1 Mose 4:​6-8) Se kɛ̃ ɔ, oti nɛ nikɔtɔma amɛ kɛ maa a hɛ mi ji kaa a maa pee nɔ́ fɛɛ nɔ́ nɛ a ma nyɛ kɛ ye bua yayami peelɔ ɔ konɛ e tsake e tsui. Mɛni sisi tomi mlaahi lɛ e sa nɛ e kudɔ asafo mi nikɔtɔma amɛ ke a kɛ y ɔ kpe?

 5. Mɛni suhi nɛ e sa kaa asafo mi nikɔtɔmahi nɛ a je kpo ke a ngɛ nɔ ko nɛ e pee yayami ɔ ye buae? (2 Timoteo 2:​24-26) (Hyɛ foni ɔ hulɔ.)

⁵ Asafo mi nikɔtɔma amɛ naa nɔ nɛ e pee yayami nɛ hɛdɔ ngɛ he ɔ kaa jijɔ nɛ e he jua wa kɛ ha Yehowa, nɛ e laa. (Luka 15:​4, 6) Enɛ ɔ he ɔ, ke a kɛ yayami peelɔ ɔ kpe ɔ, a kɛ lɛ tui munyu basabasa, nɛ a pee we lɛ hãihãi, mohu ɔ, a jeɔ mi mi jɔmi kpo kɛ tsɔɔ lɛ. Jehanɛ hu ɔ, a kɛ pee we oti kaa a ma bi lɛ sanehi pɛ konɛ a kɛ le anɔkuale ɔ, mohu ɔ, e sa nɛ a je suhi nɛ a tu he munyu ngɛ 2 Timoteo 2:​24-26 kpo. (Kane.) Akɛnɛ asafo mi nikɔtɔma amɛ suɔ nɛ a su yayami peelɔ ɔ tsui he he je ɔ, a jeɔ su komɛ kaa he jɔmi, kpoo peemi, kɛ mi mi jɔmi kpo kɛ tsɔɔ lɛ.

 6. Mɛni asafo mi nikɔtɔma amɛ peeɔ kɛ dlaa a tsui kekle loko a kɛ nɔ nɛ e pee yayami ɔ ya kpeɔ? (Roma Bi 2:4)

⁶ Asafo mi nikɔtɔma amɛ dlaa mɛ nitsɛmɛ a tsui. A bɔɔ mɔde kaa a maa kase bɔ nɛ Yehowa naa yayami peeli ha a, nɛ a kaiɔ munyu nɛ Paulo tu ɔ. E de ke: “Mawu je e mi mi himi ɔ mi nɛ e ngɛ mɔde bɔe kaa e maa ye bua mo nɛ o tsake o tsui.” (Kane Roma Bi 2:4.) E sa nɛ asafo mi nikɔtɔma amɛ nɛ a kai kaa a ji to hyɛli ngɛ Kristo blɔ tsɔɔmi sisi. (Yes. 11:​3, 4; Mat. 18:​18-20) Loko ajla toli ɔmɛ nɛ a hla a kɛ yayami peelɔ ɔ maa kpe ɔ, a sɔleɔ kɛ biɔ  Yehowa yemi kɛ buami konɛ a nyɛ nɛ a ye bua yayami peelɔ ɔ konɛ e nyɛ nɛ e tsake e tsui. A hlaa níhi a mi ngɛ Ngmami ɔ kɛ asafo ɔ womi ɔmɛ a mi, nɛ a sɔleɔ konɛ Yehowa nɛ ha mɛ nɔ́ se kɔmi. Jehanɛ hu ɔ, a susuɔ ní komɛ nɛ e sa nɛ a le ngɛ nɔ ɔ he, nɛ́ eko ɔ, lɔ ɔ lɛ ná e susumi, e su, kɛ e ní peepee nɔ he wami ɔ he.—Abɛ 20:5.

7-8. Mɛni blɔ nɔ asafo mi nikɔtɔmahi maa gu kɛ kase Yehowa tsui si tomi ɔ ke a ngɛ nɔ ko nɛ e pee yayami ɔ ye buae?

⁷ Asafo mi nikɔtɔma amɛ kaseɔ Yehowa tsui si tomi ɔ. Asafo mi nikɔtɔma amɛ haa nɛ bɔ nɛ Yehowa kɛ nihi nɛ a pee yayami blema a hi si ha a hiɔ a juɛmi mi. Kaa nɔ hyɛmi nɔ́ ɔ, Yehowa to e tsui si kɛ ha Kain, nɛ e bɔ lɛ kɔkɔ ngɛ nɔ́ nɛ ma nyɛ maa ba e nɔ ɔ he ke ji kaa e tsakee we e tsui konɛ Mawu bua nɛ jɔ e he ɔ. (1 Mose 4:​6, 7) Yehowa gu gbalɔ Natan nɔ nɛ e kɛ ga womi ha David kɛ gu nɔ́ he tomi nɔ́ nɛ taa nɔ tsui he nɛ e kɛ tsu ní ɔ nɔ. (2 Sam. 12:​1-7) Jehanɛ hu ɔ, Yehowa ‘ya nɔ nɛ e tsɔ e gbali ɔmɛ si abɔ’ kɛ ya Israelbi ɔmɛ nɛ a tsɔ atuã kɛ si lɛ ɔ a ngɔ. (Yer. 7:​24, 25) E ngɛ heii kaa Yehowa mlɛ we nɛ e sɔmɔli nɛ ɔmɛ nɛ a tsake a tsui kekle loko ji e ye bua mɛ. Benɛ a ngɛ yayami pee loloolo po ɔ, Yehowa bɔ mɔde nɛ e ye bua mɛ konɛ a tsake a tsui.

⁸ Asafo mi nikɔtɔma amɛ bɔɔ mɔde kaa a maa kase Yehowa nɔ hyɛmi nɔ́ ɔ ke a ngɛ nɔ ko nɛ e pee yayami nɛ hɛdɔ ngɛ he ɔ ye buae. Kaa bɔ nɛ 2 Timoteo 4:2 ɔ tsɔɔ ɔ, a kɛ a nyɛmi ɔ nɛ e hao ɔ susuɔ níhi a he ngɛ “tsui si tomi nitsɛnitsɛ mi.” Enɛ ɔ he ɔ, be fɛɛ be ɔ, e ma bi nɛ asafo mi nɔkɔtɔma nɛ e bɔ mɔde kaa e maa to e tsui si nɛ e pee kpoo konɛ e nyɛ nɛ e ye bua yayami peelɔ ɔ nɛ e ná suɔmi ɔ kaa e maa pee nɔ́ nɛ da. Ke asafo mi nikɔtɔma a mi mi fu ɔ, lɔ ɔ ma ha nɛ eko ɔ, yayami peelɔ ɔ be ga womi nɛ a kɛ ma ha lɛ ɔ tue bue, nɛ e be tsakemi pee.

9-10. Mɛni asafo mi nikɔtɔma amɛ ma nyɛ maa pee kɛ ye bua yayami peelɔ ɔ konɛ e susu nɔ́ nɛ ha nɛ e pee yayami nɛ hɛdɔ ngɛ he ɔ he?

⁹ Asafo mi nikɔtɔmahi bɔɔ mɔde kaa a maa le níhi nɛ ya nɔ loko ji nɔ ɔ pee yayami ɔ. Kaa nɔ hyɛmi nɔ́ ɔ, a ma nyɛ ma bi a he sane nɛ ɔmɛ: Mɛni lɛ ha nɛ huɛ bɔmi nɛ ngɛ yayami peelɔ ɔ kɛ Yehowa a kpɛti ɔ gbɔjɔ ɔ? Anɛ e pɔɛ Baiblo ɔ kasemi ngɛ e dɛ he, aloo e pɔɛ fiɛɛmi yami lo? Anɛ e pɔɛ sɔlemi ha Yehowa lo? Anɛ e ngmɛ blɔ nɛ akɔnɔ yaya ngɛ lɛ kudɔe lo? Mɛnɔmɛ ji e huɛmɛ? Mɛni e kɛ jeɔ e hɛja? Kɛ enɛ ɔ ná e nɔ he wami ha kɛɛ? Anɛ e le bɔ nɛ ní nɛ ɔmɛ nɛ e pee ɔ dɔ Yehowa nɛ ji e Tsɛ ɔ ha lo?

¹⁰ Asafo mi nikɔtɔma amɛ ma nyɛ ma bi yayami peelɔ ɔ sanehi nɛ ma ha nɛ e susu níhi nɛ puɛ huɛ bɔmi nɛ ngɛ e kɛ Yehowa a kpɛti, nɛ lɔ ɔ ha nɛ e ya pee yayami ɔ he. Se kɛ̃ ɔ, e sa nɛ asafo mi nikɔtɔma amɛ nɛ a je mi mi jɔmi mi nɛ a bi lɛ sane nɛ ɔmɛ, se e sa nɛ a hyɛ nɛ hi nɛ a ko ya bi lɛ sane nɛ maa pee kaa a ngɛ hlae nɛ a le e laami mi sanehi nɛ e he hia we kaa asafo mi nikɔtɔma amɛ nɛ a le ɔ. (Abɛ 20:5) Jehanɛ hu ɔ, kaa bɔ nɛ Natan ngɔ nɔ́ he tomi nɔ́ kɛ tsu ní kɛ ye bua David ɔ, asafo mi nikɔtɔma amɛ ma nyɛ maa ngɔ nɔ́ he tomi níhi kɛ ye bua yayami peelɔ ɔ konɛ e susu nɔ́ nɛ e pee ɔ he, nɛ e na nɔ́ he je nɛ nɔ́ nɛ e pee ɔ ji yayami nɛ hɛdɔ ngɛ he ɔ. Eko ɔ, kekle be nɛ nikɔtɔma amɛ kɛ nɔ nɛ pee yayami ɔ maa kpe ɔ, e maa hao wawɛɛ ngɛ nɔ́ nɛ e pee ɔ he. E ma nyɛ maa ba kaa e ma pia e he ngɛ nɔ́ nɛ e pee ɔ he.

11. Kɛ Yesu kɛ yayami peeli hi si ha kɛɛ?

¹¹ Asafo mi nikɔtɔma amɛ bɔɔ mɔde kaa a maa kase Yesu. Yesu ye bua Paulo kɛ gu sane nɛ nile ngɛ mi nɛ e bi lɛ ɔ nɔ. E bi lɛ ke: “Saulo, Saulo, mɛni he je nɛ o ngɛ mi yi mi wae ɔ?” Sane nɛ ɔ nɛ Yesu bi Paulo ɔ ye bua Paulo nɛ e na kaa nɔ́ nɛ e ngɛ pee ɔ hí. (Níts. 9:​3-6)  Ngɛ “yo Jezebɛl ɔ” blɔ fa mi hu ɔ, Yesu de ke: “I ha lɛ be konɛ e kɛ tsake e tsui.”—Kpoj. 2:​20, 2.

12-13. Mɛni asafo mi nikɔtɔma amɛ ma nyɛ maa pee konɛ yayami peelɔ ɔ nɛ e ná be kɛ tsake e tsui? (Hyɛ foni ɔ hulɔ.)

¹² Asafo mi nikɔtɔma amɛ kaseɔ Yesu. Enɛ ɔ he ɔ, a kɛ oya yemi mɛ nya si kaa yayami peelɔ ko be e tsui tsakee. Eko ɔ, kekleekle be nɛ ajla toli ɔmɛ kɛ yayami peelɔ ko maa kpe ɔ, e ma tsake e tsui. Se ngɛ ni kpahi a blɔ fa mi ɔ, eko ɔ, e ma he be saii. Enɛ ɔ he ɔ, eko ɔ, e he maa hia nɛ asafo mi nikɔtɔma amɛ nɛ a to blɔ nya konɛ a kɛ yayami peelɔ ɔ nɛ kpe si abɔ. Kekleekle be nɛ nikɔtɔma amɛ kɛ yayami peelɔ ɔ maa kpe ɔ, eko ɔ, lɔ ɔ se ɔ, yayami peelɔ ɔ ma susu ga nɛ nikɔtɔma amɛ wo lɛ ɔ he. Eko ɔ, lɔ ɔ ma ha nɛ e maa je he si bami mi nɛ e maa sɔle ha Yehowa konɛ e ngɔ e yayami ɔ kɛ ke lɛ. (La 32:5; 38:18) Enɛ ɔ ma ha nɛ ke a kɛ lɛ kpe ekohu ɔ, eko ɔ, e maa pee tsakemi, nɛ e be e ní pee kaa bɔ nɛ e pee kekleekle be nɛ a kɛ lɛ kpe ɔ.

¹³ Bɔ nɛ pee nɛ asafo mi nikɔtɔma amɛ nɛ a ye bua yayami peelɔ ɔ konɛ e tsake e tsui ɔ, a bɔɔ mɔde kaa a maa nu he kɛ ha lɛ, nɛ a je mi mi jɔmi kpo kɛ tsɔɔ lɛ. Jehanɛ hu ɔ, a sɔleɔ kɛ haa Yehowa kaa e jɔɔ a mɔde bɔmi ɔ nɔ, konɛ e ye bua yayami peelɔ ɔ nɛ e hɛ nɛ ba e he nɔ, nɛ e tsake e tsui.—2 Tim. 2:​25, 26.

14. Mɛnɔ lɛ wa ngɔɔ yi jemi ɔ kɛ haa ke yayami peelɔ ko tsake e tsui, nɛ mɛni he je?

¹⁴ Ke yayami peelɔ ɔ tsake e tsui ɔ, wa bua jɔɔ saminya! (Luka 15:​7, 10) Se ke e ba jã a, mɛnɔ lɛ wa ngɔɔ yi jemi ɔ kɛ haa? Asafo mi nikɔtɔma amɛ lo? Mo kai nɔ́ nɛ Paulo ngma kɛ kɔ yayami peeli a he ɔ, e de ke: “Eko ɔ, Mawu ma ha nɛ a tsake a tsui.” (2 Tim. 2:25) Enɛ ɔ he ɔ, wa ngɔɔ yi jemi ɔ kɛ haa Yehowa, se pi adesa ko, ejakaa Yehowa ji nɔ nɛ ye bua Kristofono ɔ nɛ e tsake e susumi kɛ e ní peepee ɔ nɛ. Paulo tsɔɔ kaa ke yayami peelɔ ko tsake e tsui ɔ, ní kpakpahi jeɔ mi kɛ baa. E tsɔɔ kaa jamɛ a nɔ ɔ ma nyɛ ma ná anɔkuale ɔ he nile nitsɛnitsɛ, e hɛ ma nyɛ maa ba e he nɔ, nɛ e maa je Satan klama amɛ a mi.—2 Tim. 2:26.

15. Mɛni nɛ asafo mi nikɔtɔma amɛ ma nyɛ maa pee konɛ a ya nɔ nɛ a ye bua yayami peelɔ ko nɛ e tsake e tsui ɔ?

 ¹⁵ Ke yayami peelɔ ko tsake e tsui ɔ, ajla toli ɔmɛ maa to blɔ nya konɛ a ya slaa lɛ nɛ a fia e hemi kɛ yemi ɔ kɛ ma si, konɛ e hwu kɛ si Satan klama amɛ nɛ e pee nɔ́ nɛ da. (Heb. 12:​12, 13) Ngɛ anɔkuale mi ɔ, asafo mi nikɔtɔma amɛ be nɔ ko nɔ ko nɔ́ nɛ yayami peelɔ ɔ pee ɔ dee. Se eko ɔ, mɛni nɛ e ma bi nɛ a ha nɛ asafo ɔ nɛ le?

“KÃ A HƐ MI NGƐ NIHI TSUO A HƐ MI”

16. Ngɛ 1 Timoteo 5:20 ɔ nya a, mɛnɔmɛ ji “nihi tsuo” nɛ Paulo ngɛ tsɔɔe ɔ?

¹⁶ Kane 1 Timoteo 5:20. Paulo de Timoteo nɛ lɛ hu e ji asafo mi nɔkɔtɔma a kaa e kã yayami peeli a hɛ mi ngɛ “nihi tsuo a hɛ mi.” Anɛ Paulo ngɛ tsɔɔe kaa a kã yayami peelɔ ɔ hɛ mi ngɛ asafo ɔ tsuo hɛ mi lo? Pi doo. Mohu ɔ, e ngɛ nihi bɔɔ nɛ eko ɔ, a le kaa jamɛ a yayami ɔ ya nɔ ɔ a he munyu tue. E ma nyɛ maa ba kaa nimli nɛ ɔmɛ ji nihi nɛ a ye yayami ɔ he odase, loo nɔ nɛ yayami peelɔ ɔ ya bɔ lɛ amaniɛ benɛ e pee yayami ɔ. Ke e ba jã a, asafo mi nikɔtɔma amɛ ma nyɛ maa bɔ nimli nɛ ɔmɛ pɛ amaniɛ kaa a tsu sane ɔ he ní, nɛ a ye bua yayami peelɔ ɔ.

17. Ke nɔ ko pee yayami nɛ hɛdɔ ngɛ he nɛ nyɛmimɛ fuu nu he, loo eko ɔ, a maa nu he pee se ɔ, mɛni adafi nɛ a fiaa ngɛ asafo ɔ mi, nɛ mɛni he je?

¹⁷ Be komɛ ɔ, ke nɔ ko ya pee yayami nɛ hɛdɔ ngɛ he ɔ, nyɛmimɛ fuu nɛ a ngɛ asafo ɔ mi ɔ nuɔ he, loo a ma nyɛ maa nu he pee se. Ke e ba jã a, “nihi tsuo a hɛ mi” nɛ ngmami ɔ tu he munyu ɔ ma nyɛ maa pee asafo ɔ tsuo. Enɛ ɔ he ɔ, asafo mi nɔkɔtɔma ko maa fia adafi kɛ tsɔɔ asafo ɔ kaa a kã nyɛminyumu loo nyɛmiyo nɛ ɔ hɛ mi. Mɛni he je? Paulo ha heto ke: “Konɛ e pee kɔkɔ bɔmi kɛ ha ni nɛmɛ nɛ a  piɛ ɔ,” bɔ nɛ pee nɛ mɛ hu a ko ya pee yayami nɛ hɛdɔ ngɛ he.

18. Ke jokuɛ ko nɛ a baptisi lɛ nɛ e yi jeha 18 lolo ɔ pee yayami nɛ hɛdɔ ngɛ he ɔ, kɛ asafo mi nikɔtɔma amɛ ma tsu he ní ha kɛɛ? (Hyɛ foni ɔ hulɔ.)

¹⁸ Se ke nɔ ko nɛ a baptisi lɛ nɛ e yi jeha 18 lolo ɔ pee yayami nɛ hɛdɔ ngɛ he ɔ hu nɛɛ? Asafo mi nikɔtɔma amɛ maa hla nikɔtɔmahi enyɔ konɛ a kɛ jokuɛ ɔ kɛ e fɔli nɛ a ji Kristofohi ɔ nɛ kpe. b Nikɔtɔma amɛ ma bi fɔli ɔmɛ nɔ́ nɛ a pee momo kɛ ye bua a bi ɔ konɛ e tsake e tsui. Ke jokuɛ ɔ bu ga womi nɛ e fɔli ɔmɛ kɛ ha lɛ ɔ tue, nɛ e ngɛ mɔde bɔe kaa e maa pee tsakemi ɔ, lɛɛ asafo mi nikɔtɔmahi enyɔ ɔmɛ ma nyɛ maa ma nya si kaa fɔli ɔmɛ nɛ a tsa nɔ nɛ a ye bua jokuɛ ɔ. Ejakaa asafo mi nikɔtɔma amɛ le kaa Yehowa ngɔ he blɔ kɛ ha fɔli kaa a je suɔmi mi nɛ a tsɔse a bimɛ ɔmɛ. (5 Mose 6:​6, 7; Abɛ 6:20; 22:6; Efe. 6:​2-4) Lɔ ɔ se ɔ, nikɔtɔma amɛ maa hi hyɛe kaa fɔli ɔmɛ ngɛ mɔde bɔe kaa a ma ha a bi ɔ yemi kɛ buami nɛ e hia a lo. Se ke jokuɛ ɔ tsakee we e tsui nɛ e ya nɔ nɛ e ngɛ yayami ɔ pee hu nɛɛ? Ke e ba jã a, asafo mi nikɔtɔma amɛ maa hla ajla toli konɛ a kɛ jokuɛ ɔ kɛ e fɔli nɛ a ji Kristofohi ɔ nɛ kpe.

‘YEHOWA MI MI HI WAWƐƐ NƐ E NAA NƆ MƆBƆ’

19. Mɛni nɛ e sa kaa asafo mi nikɔtɔma amɛ nɛ a pee kɛ tsɔɔ kaa a ngɛ Yehowa kasee ke a ngɛ yayami peeli ye buae?

¹⁹ Yehowa hyɛɛ blɔ kaa nikɔtɔmahi nɛ a ma sɔmɔ kaa ajla toli ɔ nɛ a po asafo ɔ he piɛ kɛ je nihi nɛ a kɛ e mlaahi tsu we ní ɔ a he, konɛ asafo ɔ he nɛ tsɔ. (1 Kor. 5:7) Jehanɛ hu ɔ, nikɔtɔma amɛ bɔɔ mɔde kaa a maa pee nɔ́ fɛɛ nɔ́ nɛ a ma nyɛ kɛ ye bua yayami peelɔ ɔ konɛ e tsake e tsui. Enɛ ɔ he ɔ, ke a ngɛ nɔ nɛ e pee yayami ɔ ye buae ɔ, a náa juɛmi nɛ da, nɛ a hyɛɛ blɔ kaa nɔ ɔ maa pee tsakemi. Mɛni he je? Ejakaa “Yehowa mi mi hi wawɛɛ nɛ e ji mɔbɔ nalɔ,” nɛ nikɔtɔma amɛ suɔ nɛ a kase lɛ. (Yak. 5:11) Mo kadi bɔ nɛ bɔfo Yohane kɛ e nyɛmimɛ ɔmɛ hi si ngɛ suɔmi mi ha. E ngma ke: “Ye bimɛ tsɔwi, i ngɛ nyɛ ní nɛ ɔmɛ ngmae konɛ nyɛ ko pee yayami ko. Se kɛ̃ ɔ, ke nɔ ko pee yayami ko po ɔ, wa ngɛ yemi kɛ bualɔ ko ngɛ Tsɛ ɔ ngɔ, lɛ ji Yesu Kristo, dalɔ ɔ nɛ.”—1 Yoh. 2:1.

20. Mɛni he wa ma susu ngɛ nyagbe ní kasemi ɔ mi?

²⁰ Se dɔmi sane ji kaa be komɛ ɔ, ke Kristofono ko pee yayami nɛ hɛdɔ ngɛ he nɛ a ngɛ lɛ ye buae ɔ, e sume kaa e ma tsake e tsui. Ke e ba jã a, mɛni e sa nɛ a pee? E sa nɛ a je lɛ kɛ je asafo ɔ mi. Ke nɔ́ ko kaa jã a ba a, mɛni asafo mi nikɔtɔma amɛ peeɔ? Wa ma susu munyu nɛ ɔ he ngɛ nyagbe ní kasemi ɔ mi.