NÍ KASEMI 31
LA 12 Yehowa Mawu Ope
Nɔ́ Nɛ Yehowa Pee Konɛ E Kɛ Kpɔ̃ Adesahi Kɛ Je Yayami Kɛ Gbenɔ Dɛ Mi
“Mawu suɔ je ɔ saminya, nɛ lɔ ɔ he ɔ, e ngɔ e Bi kake too ɔ kɛ ha.”—YOH. 3:16.
OTI NƐ NGƐ NÍ KASEMI Ɔ MI
Wa maa hyɛ nɔ́ nɛ Yehowa pee ha wɔ konɛ wa nyɛ nɛ waa hwu kɛ si yayami, nɛ waa ya nɔ nɛ wa sɔmɔ lɛ. Jehanɛ hu ɔ, wa ma susu nɔ́ nɛ e pee konɛ wa nyɛ nɛ waa hi si kɛ ya neneene nɛ waa ye wa he ngɛ yayami he.
1-2. (a) Mɛni ji yayami, nɛ mɛni maa ye bua wɔ konɛ waa hwu kɛ si yayami? (Hyɛ “Munyu Nɛ A Tsɔɔ Sisi” ɔ hulɔ.) (b) Mɛni he wa ma susu ngɛ ní kasemi nɛ ɔ kɛ ní kasemi kpahi nɛ ngɛ Hwɔɔmi Mɔ nɛ ɔ mi ɔ mi? (Hyɛ munyu nɛ ji, “Ní Komɛ Nɛ E Sa Kaa O Kadi” ɔ hulɔ.)
ANƐ o maa suɔ nɛ o le bɔ nɛ Yehowa Mawu suɔ mo wawɛɛ ha lo? Ke o kase nɔ́ nɛ Yehowa pee kɛ kpɔ̃ mo kɛ je yayami kɛ gbenɔ dɛ mi ɔ he ní ɔ, e maa ye bua mo konɛ o na heto ɔ. Yayami a ji he nyɛlɔ nɛ e he ngɛ gbeye, nɛ mo nɔ kake pɛ o be nyɛe maa ye e nɔ kunimi. Wɔ tsuo wa peeɔ yayami daa ligbi nɛ wa gboɔ ngɛ yayami he je. (Rom. 5:12) Se sane kpakpa ko ngɛ! Yehowa ma nyɛ maa ye bua wɔ konɛ waa ye yayami nɔ kunimi. Ngɛ anɔkuale mi ɔ, Yehowa ma kpɔ̃ wɔ kɛ je yayami kɛ gbenɔ dɛ mi!
2 Maa pee jeha 6,000 ji nɛ ɔ, Yehowa Mawu ngɛ adesahi ye buae konɛ a nyɛ nɛ a hwu kɛ si yayami. Mɛni he je? Ejakaa e suɔ wɔ. Yehowa suɔ adesahi kɛ je be nɛ e bɔ mɛ tɔɔ. Akɛnɛ e suɔ wɔ he je ɔ, e pee níhi fuu nɛ maa ye bua wɔ ke wa pee yayami. Mawu le kaa yayami lɛ ngɔɔ gbenɔ kɛ baa. Se e sume nɛ wa gbo, mohu ɔ, e suɔ nɛ adesahi nɛ a hi si kɛ ya neneene. (Rom. 6:23) Enɛ ɔ tsɔɔ kaa e suɔ nɛ o hi si kɛ ya neneene. Ngɛ ní kasemi nɛ ɔ mi ɔ, wa ma susu sane bimi etɛ nɛ ɔmɛ a he: (1) Mɛni hɛnɔkami nɛ Yehowa kɛ ha wɔ adesahi nɛ wa ji yayami peeli ɔ? (2) Mɛni nɛ adesahi nɛ a ji yayami peeli nɛ a hi si blema a pee kɛ sa Yehowa hɛ mi? (3) Mɛni Yesu pee kɛ kpɔ̃ adesahi kɛ je yayami kɛ gbenɔ dɛ mi?
MƐNI HƐNƆKAMI NƐ YEHOWA KƐ HA ADESAHI NƐ A JI YAYAMI PEELI Ɔ?
3. Mɛni lɛ ha nɛ Adam kɛ Hawa pee yayami ɔ?
3 Benɛ Yehowa bɔ Adam kɛ Hawa a, e suɔ nɛ a bua nɛ jɔ. Enɛ ɔ he ɔ, e ha mɛ he ko nɛ ngɛ fɛu kaa a hi, e ha mɛ nike ní nɛ ji gba si himi, nɛ e ha mɛ ní tsumi nɛ ngɛ bua jɔmi. E de mɛ kaa a fɔ nɛ a hyi zugba a nɔ tɔ, nɛ́ a ha nɛ zugba a nɔ tsuo nɛ pee paradeiso kaa Eden abɔɔ ɔ. Se mlaa kake ko pɛ nɛ Yehowa wo mɛ. E bɔ mɛ kɔkɔ kaa ke a je blɔ nɛ a gbo e mlaa a nɔ tue ɔ, a ma gbo. Wa le nɔ́ nɛ ya nɔ pee se. Bɔfo yiwutsotsɛ ko nɛ e sume Mawu kɛ adesahi ɔ ya ka Adam kɛ Hawa konɛ a gbo Mawu mlaa a nɔ tue. Adam kɛ Hawa bu bɔfo yiwutsotsɛ nɛ ɔ tue. A ná we hemi kɛ yemi ngɛ a Tsɛ nɛ e suɔ mɛ wawɛɛ ɔ mi, nɛ a ya pee yayami. Kaa bɔ nɛ wa le ɔ, nɔ́ nɛ Yehowa de ɔ ba mi pɛpɛɛpɛ. Kɛ je jamɛ a ligbi ɔ kɛ yaa a, Adam kɛ Hawa kɛ nyagbahi fuu kpe, a bwɔ, nɛ nyagbenyagbe ɔ, a gbo.—1 Mose 1:28, 29; 2:8, 9, 16-18; 3:1-6, 17-19, 24; 5:5.
4. Mɛni he je nɛ Yehowa hie yayami ɔ, nɛ mɛni he je nɛ e yeɔ buaa wɔ konɛ waa hwu kɛ si yayami ɔ? (Roma Bi 8:20, 21)
4 Yehowa ha nɛ a ngma nɔ́ nɛ Adam kɛ Hawa pee ɔ ngɛ Baiblo ɔ mi bɔ nɛ pee nɛ wa nyɛ nɛ waa nu nɔ́ ko nɛ he hia a sisi saminya. Sane nɛ ɔ ha nɛ wa le nɔ́ he je nɛ Yehowa hiɔ yayami wawɛɛ ɔ. Ke wa pee yayami ɔ, e jeɔ wɔ kɛ jeɔ wa Tsɛ ɔ he, nɛ e kɛ wɔ yaa gbenɔ mi. (Yes. 59:2) Satan sume Yehowa kɛ adesahi kulaa. Enɛ ɔ he je nɛ e ka Adam kɛ Hawa nɛ a pee yayami ɔ nɛ, nɛ e yaa nɔ nɛ e peeɔ jã mwɔnɛ ɔ hulɔ. Eko ɔ, benɛ Adam kɛ Hawa pee yayami ɔ, Satan nu he kaa e puɛ Yehowa yi mi tomi nɛ e ngɛ kɛ ha adesahi ɔ kulaa. Se e li bɔ nɛ Yehowa suɔ wɔ wawɛɛ ha. Mawu tsakee we yi mi tomi nɛ e ngɛ kɛ ha Adam kɛ Hawa a sisi bimɛ ɔ. Ngɛ anɔkuale mi ɔ, e suɔ adesahi wawɛɛ. Enɛ ɔ he ɔ, e ha wɔ hɛnɔkami oya nɔuu. (Kane Roma Bi 8:20, 21.) Yehowa le kaa Adam kɛ Hawa a sisi bimɛ ɔmɛ a kpɛti ni komɛ ma ná suɔmi kɛ ha lɛ, nɛ a maa hla kaa a maa bu lɛ tue nɛ a hwu kɛ si yayami. Akɛnɛ Yehowa ji a Tsɛ kɛ a Bɔlɔ he je ɔ, e maa ye bua mɛ konɛ a hɛ kɛ su e he, nɛ a ye yayami kɛ gbenɔ nɔ kunimi. Mɛni Yehowa maa pee kɛ tsu ní nɛ ɔmɛ tsuo a he ní?
5. Mɛni be nɛ Yehowa ha nɛ adesahi nɛ a ji yayami peeli ɔ ná hɛnɔkami ɔ? Moo tsɔɔ nya. (1 Mose 3:15)
5 Kane 1 Mose 3:15. Benɛ Adam kɛ Hawa gbo Yehowa nɔ tue se ɔ, e kɛ we kulaa nɛ Yehowa ha adesahi tsuo hɛnɔkami. E tsɔɔ kaa e ma kpata Satan hɛ mi. Mawu de kaa e ma ha nɛ “nina” ko ma ba kpɔ̃ adesahi tsuo. Nyagbenyagbe ɔ, nina nɛ ɔ ma ba kpata Satan hɛ mi, nɛ e ma je nyagbahi tsuo nɛ Satan kɛ ba a kɛ je. (1 Yoh. 3:8) Se kɛ̃ ɔ, loko nina a ma tsu yi mi tomi nɛ ɔ he ní ɔ, e maa na nɔ́. Satan maa fia nina a nɔ́, nɛ lɔ ɔ ma ha nɛ e ma gbo. Enɛ ɔ maa dɔ Yehowa wawɛɛ nitsɛ. Se kɛ̃ ɔ, Yehowa pee klaalo kaa e maa ngɔ nina a kɛ ha, nɛ́ e ba na nɔ́ konɛ e kɛ kpɔ̃ adesahi kɛ je yayami kɛ gbenɔ dɛ mi.
MƐNI NƐ ADESAHI NƐ A JI YAYAMI PEELI NƐ A HI SI BLEMA A PEE KƐ SA YEHOWA HƐ MI?
6. Mɛni nɛ nyumu komɛ nɛ a ngɛ hemi kɛ yemi kaa Habel kɛ Noa pee nɛ ha nɛ a hɛ kɛ su Yehowa he?
6 Bɔɔbɔɔbɔɔ ɔ, Yehowa tsɔɔ nɔ́ nɛ adesahi nɛ a ji yayami peeli ɔ ma nyɛ maa pee konɛ a hɛ kɛ su e he. Adam kɛ Hawa a binyumu enyɔne nɛ ji Habel ɔ ji nɔ kekleekle nɛ e ná hemi kɛ yemi ngɛ Yehowa mi ngɛ atuã tsɔmi nɛ ya nɔ ngɛ Eden abɔɔ ɔ mi ɔ se. Akɛnɛ Habel suɔ Yehowa nɛ e suɔ nɛ e sa e hɛ mi nɛ e hɛ kɛ su e he he je ɔ, e sã afɔle ha Yehowa. Habel ji to hyɛlɔ, enɛ ɔ he ɔ, e ngɔ e jijɔ ɔmɛ ekomɛ kɛ sã afɔle ha Yehowa. Kɛ Yehowa nu he ha kɛɛ? E “bua jɔ Habel kɛ e we afɔle ɔ he.” (1 Mose 4:4) Ngɛ anɔkuale mi ɔ, Yehowa bua jɔ afɔlehi nɛ ni kpahi nɛ a suɔ lɛ nɛ a heɔ lɛ yeɔ ɔ sã kɛ ha lɛ ɔ he. Nimli nɛ ɔmɛ a kpɛti nɔ kake ji Noa. (1 Mose 8:20, 21) Akɛnɛ Yehowa kplɛɛ a we afɔle sami ɔmɛ a nɔ he je ɔ, e ha nɛ wa na kaa adesahi nɛ a ji yayami peeli ɔ ma nyɛ maa hɛ kɛ su Yehowa he. b
7. Mɛni wa kaseɔ ngɛ bɔ nɛ Abraham pee klaalo kaa e maa ngɔ e binyumu ɔ kɛ sã afɔle ha a mi?
7 Yehowa de Abraham nɛ e ngɛ hemi kɛ yemi nɛ mi wa a kaa e pee nɔ́ ko nɛ he wa. E de lɛ kaa e ngɔ lɛ nitsɛ e binyumu nɛ ji Isak ɔ kɛ sã afɔle ha lɛ. Atsinyɛ jemi ko be he kaa enɛ ɔ ha nɛ Abraham hao wawɛɛ. Se kɛ̃ ɔ, e bu Yehowa tue. Benɛ Abraham ka kaa e maa gbe e binyumu ɔ, Mawu tsi lɛ blɔ. Ngɛ anɔkuale mi ɔ, Abraham nɔ hyɛmi nɔ́ ɔ ha nɛ wa na nɔ́ nɛ Yehowa maa pee hwɔɔ se. Yehowa maa ngɔ lɛ nitsɛ e Binyumu nɛ e suɔ lɛ ɔ kɛ sã afɔle ngɛ wa he. Ngɛ anɔkuale mi ɔ, Yehowa suɔ adesahi wawɛɛ nitsɛ.—1 Mose 22:1-18.
8. Mɛni wa kaseɔ ngɛ lohwehi nɛ a kɛ sã afɔlehi ngɛ Mlaa a nya a mi? (3 Mose 4:27-29; 17:11)
8 Jeha lafa komɛ a se benɛ Yehowa ngɔ Mlaa a kɛ ha Israelbi ɔmɛ ɔ, e de mɛ kaa a ngɔ lohwehi kɛ sã afɔle kɛ ha lɛ konɛ e ngɔ a yayami ɔmɛ kɛ ke mɛ. (Kane 3 Mose 4:27-29; 17:11.) Jamɛ a afɔle sami ɔmɛ daa si kɛ ha afɔle ngua ko nɛ Mawu maa sã konɛ e kɛ kpɔ̃ adesahi kɛ je yayami dɛ mi ɔ. Mawu ngɔ e mumi klɔuklɔu ɔ kɛ wo e gbali ɔmɛ he wami nɛ a gba kɛ kɔ nina a nɛ a wo e he si ɔ he. A tsɔɔ kaa Mawu Binyumu ɔ ma ba na nɔ́, nɛ a maa gbe lɛ. A maa gbe lɛ kaa bɔ nɛ a gbeɔ jijɔ kɛ sãa afɔle blema a. (Yes. 53:1-12) Mo susu he nɛ o hyɛ: Yehowa maa to blɔ nya nɛ e maa ngɔ lɛ nitsɛ e Bi nɛ e suɔ lɛ ɔ kɛ sã afɔle konɛ e kɛ kpɔ̃ adesahi tsuo nɛ mo hu o piɛɛ he ɔ kɛ je yayami kɛ gbenɔ dɛ mi!
MƐNI YESU PEE KƐ KPƆ̃ ADESAHI KƐ JE YAYAMI DƐ MI?
9. Mɛni nɛ Yohane Nɔ Baptisilɔ ɔ de ngɛ Yesu he? (Hebri Bi 9:22; 10:1-4, 12)
9 Ngɛ jeha 29 ɔ mi ɔ, Yohane Nɔ Baptisilɔ ɔ na Yesu nɛ je Nazarɛt ɔ nɛ e de ke: “Nyɛɛ hyɛ, Mawu Jijɔ Bi ɔ nɛ e ngɔɔ je ɔ he yayami ɔ kɛ yaa a ji nɛ ɔ nɛ!” (Yoh. 1:29) Munyu nɛ ɔ tsɔɔ kaa Yesu ji nina nɛ Mawu wo si kaa e maa ba a nɛ. E maa ngɔ e wami kɛ sã afɔle ngɛ wa he. Nyagbenyagbe ɔ, nina a nɛ Yehowa wo si ɔ ba su si, nɛ e ma kpɔ̃ adesahi kɛ je yayami dɛ mi kulaa.—Kane Hebri Bi 9:22; 10:1-4, 12.
10. Mɛni Yesu pee kɛ tsɔɔ kaa e ‘ba konɛ e ba tsɛ’ yayami peeli?
10 Ngɛ anɔkuale mi ɔ, Yesu ngɔ e juɛmi kɛ ma nihi nɛ a kɔni mi jɔ̃ akɛnɛ a ji yayami peeli ɔ nɔ titli, nɛ e de mɛ kaa a ba nyɛɛ e se. Yesu le kaa yayami ji nɔ́ titli nɛ ha nɛ adesahi ngɛ nɔ́ nae. Enɛ ɔ he ɔ, e ye bua nihi nɛ nihi le mɛ wawɛɛ kaa a ji yayami peeli ɔ. Yesu ngɔ nɔ́ he tomi nɔ́ ko kɛ tsu ní, nɛ e de ke: “Nihi nɛ a ngɛ he wami ɔ hia we tsopatsɛ, se ni nɛmɛ nɛ a be he wami lɛɛ a hiaa.” E de hu ke: “I ba konɛ ma ba tsɛ yayami peeli, se pi dali.” (Mat. 9:12, 13) Ngɛ anɔkuale mi ɔ, Yesu ye nɔ́ nɛ e de ɔ nɔ pɛpɛɛpɛ. Benɛ yo ko ngɔ vo nyu kɛ fɔ Yesu nane he ɔ, Yesu je mi mi jɔmi mi nɛ e kɛ lɛ tu munyu nɛ e ngɔ e yayami ɔmɛ kɛ ke lɛ. (Luka 7:37-50) E ngɛ mi kaa Yesu le kaa Samaria yo ɔ kɛ nyumu ko nɛ tsa pi e huno ji lɛ ɔ ngɛ mohu lɛɛ, se e tsɔɔ yo ɔ anɔkuale komɛ nɛ a he hia. (Yoh. 4:7, 17-19, 25, 26) E ngɛ mi kaa adesahi gboɔ akɛnɛ a ji yayami peeli ɔ he je mohu lɛɛ, se Mawu ha Yesu he wami nɛ e kɛ tle nyumuhi, yihi kɛ jokuɛwi kɛ nikɔtɔmahi nɛ a gbo ɔ si.—Mat. 11:5.
11. Mɛni he je nɛ yayami peeli nyɛ nɛ a hɛ kɛ su Yesu he ɔ?
11 E be nyakpɛ kaa nihi nɛ a ji yayami peeli kpanakuhi po suɔ Yesu sane. E je mi mi jɔmi kpo kɛ tsɔɔ mɛ, nɛ e mi mi sã lɛ ngɛ a he. Enɛ ɔ ha nɛ a yi gbeye kulaa kaa a kɛ Yesu maa tu munyu. (Luka 15:1, 2) Yesu je nimli nɛ ɔmɛ a yi, nɛ e ye bua mɛ akɛnɛ a ná hemi kɛ yemi ngɛ e mi ɔ he je. (Luka 19:1-10) Yesu na nihi mɔbɔ kaa bɔ nɛ Yehowa hu naa nɔ mɔbɔ ɔ. (Yoh. 14:9) Bɔ nɛ Yesu kɛ nihi tu munyu nɛ e kɛ mɛ hi si ha a ha nɛ wa na kaa Yehowa naa nɔ mɔbɔ, nɛ e suɔ adesahi nɛ a ji yayami peeli ɔ, nɛ e suɔ nɛ e ye bua mɛ. Yesu ye bua yayami peeli konɛ a ná suɔmi ɔ kaa a ma tsake a je mi bami nɛ a ba nyɛɛ e se.—Luka 5:27, 28.
12. Mɛni Yesu de ngɛ lɛ nitsɛ e gbenɔ ɔ he?
12 Yesu le kaa e be kɛe nɛ e maa ngɔ e wami kɛ sã afɔle. E de e kaseli ɔmɛ si abɔ kaa nɔ ko maa tsɔɔ e se blɔ, nɛ a maa gbe lɛ ngɛ sɛumi tso nɔ. (Mat. 17:22; 20:18, 19) E le kaa e gbenɔ ɔ ma je adesahi tsuo a yayami kɛ je kaa bɔ nɛ Yohane kɛ gbali kpa amɛ gba kɛ fɔ si ɔ. Jehanɛ hu ɔ, Yesu tsɔɔ kaa ngɛ e gbenɔ se ɔ, e maa “gbla nimli slɔɔtoslɔɔtohi” kɛ ba e ngɔ. (Yoh. 12:32) Enɛ ɔ he ɔ, adesahi tsuo nɛ a ma ná hemi kɛ yemi ngɛ Yesu mi nɛ a maa bu e fami ɔmɛ tue ɔ ma nyɛ maa sa Yehowa hɛ mi. Ke a pee jã a, a maa ‘ye a he kɛ je yayami he’ kulaa. (Rom. 6:14, 18, 22; Yoh. 8:32) Enɛ ɔ he ɔ, Yesu pee kã nɛ e je suɔmi mi nɛ e ngɔ e wami kɛ ha ngɛ wa he nɛ e gbo gbenɔ yeyee.—Yoh. 10:17, 18.
13. Kɛ Yesu plɛ kɛ gbo ha kɛɛ, nɛ mɛni nɛ e gbenɔ ɔ tsɔɔ wɔ ngɛ Yehowa Mawu he? (Hyɛ foni ɔ hulɔ.)
13 A tsɔɔ Yesu se blɔ, a nu lɛ, a tsuaa lɛ ní, a gbe e he guɛ, a bu lɛ fɔ, nɛ a wa lɛ yi mi po. Jehanɛ hu ɔ, tabuli nyɛɛ e hɛ mi kɛ ya he nɛ a maa sɛu lɛ ngɛ ɔ, nɛ a sɛu lɛ ngɛ tso nɔ. Be mi nɛ e ngɛ nɔ́ nae tsuo ɔ, Nɔ ko ngɛ nɛ e ngɛ haoe wawɛɛ. Lɛ ji Yehowa Mawu. Yehowa ngɛ he wami nɛ e kɛ maa ye bua e Bi ɔ nɛ́ e ngɛ nɔ́ nae ɔ mohu lɛɛ, se e pee we jã. Ke jã a, lɛɛ mɛni he je nɛ Yehowa ha nɛ e Bi nɛ e suɔ lɛ wawɛɛ nitsɛ ɔ na nɔ́ nɛ e gbo ɔ? Yehowa pee jã ejakaa e suɔ wɔ. Yesu de ke: “Mawu suɔ je ɔ saminya, nɛ lɔ ɔ he ɔ, e ngɔ e Bi kake too ɔ kɛ ha, konɛ nɔ fɛɛ nɔ nɛ e heɔ lɛ yeɔ ɔ, a ko kpata e hɛ mi, mohu ɔ, e ná neneene wami.”—Yoh. 3:16.
Yehowa hao wawɛɛ benɛ e ngmɛ blɔ nɛ a gbe Bi ɔ. E pee jã konɛ e kɛ kpɔ̃ wɔ kɛ je yayami kɛ gbenɔ dɛ mi (Hyɛ kuku 13)
14. Mɛni Yesu afɔle sami ɔ tsɔɔ mo ngɛ Yehowa he?
14 Yesu afɔle sami ɔ ji odase nɛ pe kulaa nɛ haa nɛ wa naa bɔ nɛ Yehowa suɔ Adam kɛ Hawa a sisi bimɛ ha. Enɛ ɔ tsɔɔ kaa Yehowa suɔ mo wawɛɛ nitsɛ. Ngɛ yeyee nɛ Yehowa maa nu he ɔ tsuo se ɔ, e ngɔ e Bi nɛ e suɔ lɛ wawɛɛ ɔ kɛ ha kaa kpɔmi nɔ́ konɛ e kɛ kpɔ̃ mo kɛ je yayami kɛ gbenɔ dɛ mi. (1 Yoh. 4:9, 10) Niinɛ, e suɔ nɛ e ye bua wa kpɛti nɔ fɛɛ nɔ nɛ e hwu kɛ si yayami konɛ e ye nɔ kunimi!
15. Mɛni e sa nɛ waa pee konɛ wa ná Yesu kpɔmi afɔle sami ɔ he se?
15 Yesu kpɔmi afɔle sami ɔ nɛ ji nike ní nɛ Mawu kɛ ha wɔ ɔ he je ɔ, e ma nyɛ maa ngɔ wa yayami ɔmɛ kɛ ke wɔ. Se loko Mawu ma nyɛ maa ngɔ wa he yayamihi kɛ ke wɔ ɔ, e he hia nɛ waa pee nɔ́ ko. Mɛni ji lɔ ɔ? Yohane Nɔ Baptisilɔ ɔ kɛ Yesu Kristo nitsɛ ha nɛ wa na heto ɔ. A de ke: “Nyɛ tsake nyɛ tsui, ejakaa hiɔwe Matsɛ Yemi ɔ su si ta.” (Mat. 3:1, 2; 4:17) Enɛ ɔ he ɔ, e he hia nɛ wa tsake wa tsui ngɛ wa he yayami ɔmɛ a he loko wa ma nyɛ maa hɛ kɛ su Yehowa he. Se ke a ke wa tsake wa tsui ɔ, mɛni e tsɔɔ, nɛ kɛ lɔ ɔ maa ye bua wɔ nɛ waa sa Yehowa hɛ mi ngɛ yayami peeli nɛ wa ji ɔ tsuo se ha kɛɛ? Wa maa na heto ɔ ngɛ ní kasemi nɛ nyɛɛ se ɔ mi.
LA 18 Wa Bua Jɔ Kpɔmi Nɔ́ ɔ He
a MUNYU NƐ A TSƆƆ SISI: Ngɛ Baiblo ɔ mi ɔ, nɔ́ nɛ munyu nɛ ji “yayami” ɔ ma nyɛ maa tsɔɔ ji nɛ nɔ ko maa pee nɔ́ nɛ Yehowa sume loo e be níhi nɛ Yehowa suɔ ɔ pee. Jehanɛ hu ɔ, “yayami” ma nyɛ maa da si kɛ ha mluku nɛ wa yi, loo yayami nɛ Adam kɛ sã wɔ ɔ. Akɛnɛ wa ná yayami nɛ ɔ kɛ je Adam ngɔ ɔ he je nɛ wa gboɔ ɔ nɛ.
