Bɔfo Paulo ngma sɛ womi kɛ ya ha Tɛsalonikabi nɛ a ji Kristofohi ɔ, nɛ e de mɛ ke: “Ke nɔ ko bui wa munyu ɔ nɛ ngɛ sɛ womi nɛ ɔ mi ɔ tue ɔ, nyɛɛ to jamɛ a nɔ ɔ he so.” (2 Tɛs. 3:14) Be ko nɛ be ɔ, wa de kaa ngmami nɛ ɔ ji blɔ tsɔɔmi nɛ a kɛ ha asafo mi nikɔtɔmahi. Be ko nɛ be ɔ, ke asafo mi nikɔtɔmahi bɔ nɔ ko kɔkɔ si abɔ, se loloolo ɔ, nɔ ɔ kɛ Baiblo sisi tomi mlaahi tsu we ní ɔ, a ma nyɛ maa tu munyu ko kɛ bɔ asafo ɔ kɔkɔ. Lɔ ɔ se ɔ, fiɛɛli ɔmɛ kɛ jamɛ a nɔ ɔ nɛ a kadi lɛ ɔ be bɔe hu.

Se amlɔ nɛ ɔ, e he hia nɛ waa pee tsakemi. Ngɛ anɔkuale mi ɔ, ga womi nɛ Paulo kɛ ha a kɔɔ yi mi kpɔ nɛ Kristofono fɛɛ Kristofono maa mwɔ ngɛ si fɔfɔɛ komɛ a he ɔ he. Enɛ ɔ he ɔ, e he hia we nɛ asafo mi nikɔtɔma amɛ nɛ a tu munyu ko bɔ asafo ɔ kɔkɔ. Mɛni he je nɛ wa pee tsakemi nɛ ɔ? Mo susu nɔ́ nɛ Paulo ngɛ he munyu tue benɛ e ngɔ ga womi nɛ ɔ kɛ ha a he nɛ o hyɛ.

Paulo yɔse kaa ni komɛ ngɛ “nyɛɛe basabasa” ngɛ jamɛ a asafo ɔ mi. Nɛ tsɔɔ kaa a kɛ ga womi nɛ e kɛ ha mɛ ngɛ Mawu Munyu ɔ mi ɔ tsu we ní. Benɛ e ya slaa mɛ be ko nɛ be ɔ, e de mɛ ke: “Ke nɔ ko sume kaa e ma tsu ní ɔ, lɛɛ eko ye ní.” Se kɛ̃ ɔ, ni komɛ kua kaa a ma tsu ní kɛ hyɛ mɛ nitsɛmɛ a he, be mi nɛ a ngɛ nyɛmi nɛ a kɛ maa pee jã po. Jehanɛ hu ɔ, a ngɔɔ a nya kɛ woɔ ni kpahi a sanehi a mi. Kɛ e sa kaa Kristofo ɔmɛ kɛ nihi nɛ nyɛɛɔ basabasa nɛ ɔmɛ nɛ hi si ha kɛɛ?—2 Tɛs. 3:​6, 10-12.

Paulo de ke: “Nyɛɛ to jamɛ a nɔ ɔ he so.” Hela munyungu nɛ a kɛ tsu ní ɔ tsɔɔ kaa e sa nɛ a kadi nɔ ɔ saminya, nɛ a hɛ nɛ hi nɔ kaa nɔ ɔ je mi bami yaya a ma nyɛ ma ná a nɔ he wami. Paulo ngɔ ga womi nɛ ɔ kɛ ha asafo ɔ tsuo, se pi asafo mi nikɔtɔma amɛ pɛ. (2 Tɛs. 1:1; 3:6) Enɛ ɔ he ɔ, ke Kristofono ko yɔse kaa e nyɛmi Kristofono ko kɛ ga womi nɛ ngɛ Baiblo ɔ mi ɔ tsu we ní, nɛ e nyɛɛɔ basabasa a, e maa hla kaa e kɛ jamɛ a nɔ ɔ ‘be bɔe hu.’

Anɛ enɛ ɔ tsɔɔ kaa a kɛ nɔ ɔ maa hi si kaa bɔ nɛ a kɛ nɔ ko nɛ a je lɛ ngɛ asafo ɔ mi ɔ hiɔ si ha a lo? Dɛbi. Paulo de ke: “Nyɛɛ ya nɔ nɛ nyɛɛ hi lɛ ga woe kaa nyɛmi.” Enɛ ɔ he ɔ, Kristofono fɛɛ Kristofono kɛ nɔ nɛ e to e he so ɔ maa bɔ ngɛ asafo mi kpe sisi kɛ fiɛɛmi mi, se e kɛ lɛ be blae kɛ pee ní kpahi loo a je a hɛja. Mɛni he je? Paulo tsa nɔ ke: “Bɔ nɛ pee nɛ zo nɛ gbe lɛ.” Ke waa kɛ Kristofono nɛ e baa e je mi basabasa a kpa bɔmi ngɛ blɔ nɛ ɔ nɔ ɔ, lɔ ɔ ma ha nɛ zo maa gbe lɛ, nɛ e maa pee tsakemihi.—2 Tɛs. 3:​14, 15.

Mɛni blɔ nɔ nɛ Kristofohi ma nyɛ maa ngɔ ga womi nɛ ɔ kɛ tsu ní mwɔnɛ ɔ? Loko wa maa ma wa juɛmi nya si kaa waa kɛ nɔ ko ma kpa bɔmi ɔ, kekleekle ɔ, e sa nɛ wa ná nɔ mi mami kaa nɔ ɔ baa e je mi “basabasa” kaa bɔ nɛ Paulo tsɔɔ. Tsa pi nihi nɛ eko ɔ, a daa a he nile nɔ kɛ peeɔ níhi nɛ wa bua jɔɛ he se e ti si kɛ wui Baiblo sisi tomi mlaahi a he munyu nɛ Paulo ngɛ tue. Nɛ tsa pi nihi nɛ a pee nɔ́ ko nɛ e dɔ wɔ ɔ he munyu nɛ e ngɛ tue hulɔ. Mohu ɔ, Paulo ngɛ ni pɔtɛɛ komɛ nɛ a je blɔ kaa a kɛ ga womi nɛ ngɛ Mawu Munyu ɔ mi ɔ be ní tsue ɔ a he munyu tue.

Mwɔnɛ ɔ, ke wa yɔse kaa wa nyɛmi Kristofono ko ya nɔ nɛ e kɛ ga womi nɛ ngɛ Mawu Munyu ɔ mi ɔ tsu we ní ɔ, a wa ma nyɛ maa mwɔ wa yi mi kpɔ kaa waa kɛ lɛ be bɔe loo waa kɛ lɛ be blae kɛ je wa hɛja hu. Akɛnɛ e ji yi mi kpɔ nɛ nɔ fɛɛ nɔ maa mwɔ ngɛ e dɛ he he je ɔ, wa be ni kpahi loo wa wekuli nɛ waa kɛ mɛ be we mi ɔ dee. Se loloolo ɔ, waa kɛ jamɛ a nɔ ɔ ma nyɛ maa bɔ ngɛ asafo mi kpe sisi loo ngɛ fiɛɛmi mi. Ke nɔ ɔ pee tsakemi ɔ, waa kɛ lɛ ma nyɛ maa bɔ ekohu kaa bɔ nɛ wa peeɔ sa a.