1, 2. (a) Ngɛ mɛni blɔ nɔ nɛ o ma nyɛ maa ngɔ je nɛ ɔ kɛ to awi yelɔ ko nɛ a bu lɛ gbenɔ fɔ ɔ he? (Moo hyɛ foni nɛ ngɛ ní kasemi ɔ sisije ɔ.) (b) Ke a kpata je yaya nɛ ɔ hɛ mi ɔ, kɛ bɔfo ɔmɛ kɛ adesahi tsuo maa pee a ní ha kɛɛ?

“E GBO NƐ E NGƐ NYƐƐE!” A nu ngmlaa nɛ ɔ benɛ a je awi yelɔ kpanaa ko kɛ je tsu womi he kɛ yaa a. Mɛni he je nɛ nihi nɛ a ngɛ nyumu nɛ ɔ he bue ɔ kpã ngmlaa nɛ ɔ? Nyumu nɛ ɔ ngɛ nɔmlɔ tso mi he wami bɔ nɛ sa. Hiɔ ko hu be e he nɛ ma nyɛ maa gbe lɛ. Se a bu awi yelɔ nɛ ɔ gbenɔ fɔ, nɛ a kɛ lɛ yaa nɛ a ya gbe lɛ. Enɛ ɔ he ɔ, awi yelɔ nɛ ɔ ngɛ kaa gbogboe. *

² Ngɛ blɔ ko nɔ ɔ, je nɛ wa ngɛ mi mwɔnɛ ɔ ngɛ kaa nyumu ɔ nɛ a yaa gbe lɛ ɔ. A bu je yaya nɛ ɔ fɔ kɛ je blema, nɛ e be kɛe nɛ a ma kpata je ɔ hɛ mi. Baiblo ɔ de ke: ‘Je ɔ bee kɛ yaa.’ (1 Yoh. 2:17) A ma kpata je nɛ ɔ hɛ mi kokooko. Se kɛ̃ ɔ, slɔɔto agbo ko ngɛ je yaya nɛ ɔ hɛ mi kpatami ɔ, kɛ awi yelɔ ɔ gbenɔ ɔ a kpɛti. Ke a ma awi yelɔ ko gbemi ɔ, ni komɛ ma nyɛ ma de ke e dɛ blɔ kaa a gbeɔ lɛ, kɛ susumi kaa nyagbenyagbe ɔ, eko ɔ, a maa ngmɛɛ awi yelɔ ɔ he. Se ngɛ je nɛ ɔ blɔ fa mi lɛɛ, Je Mluku ɔ Matsɛ nɛ yeɔ dami sane ɔ lɛ e mwɔ e yi mi kpɔ kaa  e ma kpata hɛ mi. (5 Mose 32:4) Nɔ ko be nyɛe ma de ke a ko kpata je nɛ ɔ hɛ mi, nɛ nɔ ko yi mi be lɛ enyɔɔnyɔ pee kaa a ye dami sane aloo a yi dami sane. Ke a kpata je nɛ ɔ hɛ mi ɔ, bɔfo ɔmɛ kɛ adesahi tsuo maa kplɛɛ nɔ kaa a ye dami sane. Enɛ ɔ ma ha nɛ wa he maa jɔ wɔ wawɛɛ!

3. Ke Mawu Matsɛ yemi ɔ ba a, mɛni níhi eywiɛ maa je?

³ Mɛni ‘je ɔ nɛ bee kɛ yaa’ a tsɔɔ? E tsɔɔ kaa níhi nɛ nihi fuu susuɔ kaa a ji níhi nɛ maa hi si ngɛ je nɛ ɔ mi daa a maa be. Anɛ e sa nɛ e dɔ mo lo? Ohoo! Ngɛ anɔkuale mi ɔ, enɛ ɔ piɛɛ ‘sane kpakpa nɛ kɔɔ Matsɛ Yemi ɔ he’ ɔ he. (Mat. 24:14) Lɔ ɔ he ɔ ha nɛ waa hyɛ níhi nɛ ke Mawu Matsɛ Yemi ɔ ba a, a maa je. Wa ma susu níhi eywiɛ nɛ nyɛɛ se nɛ ɔmɛ a he: yiwutsotsɛmɛ, blɔ nya tomihi nɛ a yi anɔkuale, ní peepee yayahi, kɛ pɔtɔ kɛ dengme. Ngɛ eko tsuaa eko mi ɔ, wa ma susu (1) bɔ nɛ ní nɛ ɔmɛ ha nɛ wa ngɛ nɔ́ nae mwɔnɛ ɔ ha, (2) nɔ́ nɛ Yehowa maa pee ngɛ he, kɛ (3) ní kpakpahi nɛ e kɛ maa to nane mi ɔ he.

4. Ngɛ mɛni blɔ nɔ nɛ yiwutsotsɛmɛ ha nɛ wa ngɛ nɔ́ nae mwɔnɛ ɔ?

⁴ Ngɛ mɛni blɔ nɔ nɛ yiwutsotsɛmɛ ha nɛ wa ngɛ nɔ́ nae mwɔnɛ ɔ? Bɔfo Paulo tsɔɔ kaa ngɛ nyagbe ligbi ɔmɛ a mi ɔ, “je mi maa wa.” Lɔ ɔ se ɔ, Mawu mumi ɔ ha nɛ e ngma ke: “Nimli yayamihi, kɛ nɔ sisili maa ya nɔ maa pee yayami kɛ be nɔ.” (2 Tim. 3:1-5, 13) Anɛ o yɔse kaa gbami nɛ ɔ ngɛ mi bae lo? Wa ti nihi fuu ngɛ nɛ yiwutsotsɛmɛ wa wɔ yi mi, a hyɛ wa hɛ mi, aloo a ye wɔ awi. A kpɛti ni komɛ ba tuaa wɔ tɛ̃ɛ, nɛ ni komɛ hu peeɔ a he kaa a ji nimli kpakpahi, se ngɛ anɔkuale mi ɔ, a yi mi wa pe. Ke a wɛ wɔ yi mi tɛ̃ɛ po ɔ, a yi wu tso ní peepee ɔmɛ saa wa he ngɛ blɔ ko nɔ kɛ̃. Ke wa nu yi wu tso ní nɛ a peeɔ jokuɛwi, nihi nɛ a wa ngɛ jeha mi, kɛ nihi nɛ a be nɔ ko nɛ maa po a he piɛ ɔ, e haoɔ wɔ wawɛɛ. Yiwutsotsɛmɛ peeɔ a ní kaa nɔ́ nɛ pi adesahi ji mɛ, aloo kaa lohwehi, loo mumi yayamihi po. (Yak. 3:15) Se bua jɔmi sane ji kaa Yehowa Munyu ɔ haa nɛ wa náa hɛ nɔ kami kpakpa.

5. (a) Loloolo ɔ, mɛni he blɔ nɛ yiwutsotsɛmɛ ngɛ? (b) Nyagbenyagbe ɔ, mɛni maa ba yiwutsotsɛmɛ nɛ a tsakee we ɔ a nɔ?

⁵ Mɛni Yehowa maa pee? Amlɔ nɛ ɔ, Yehowa ngmɛ yiwutsotsɛmɛ blɔ konɛ a tsake. (Yes. 55:7) Yiwutsotsɛmɛ a nine sui a nyagbe kojomi ɔ nɔ kaa ni kakaakahi lolo. Je yaya nɛ ɔ mohu nɛ a bu lɛ fɔ kɛ ha hɛ mi kpatami. Se nihi nɛ a tsakee we a tsui, nɛ́ a maa ya nɔ nɛ a fĩ je nɛ ɔ se kɛ ya si benɛ haomi ngua a maa ba a hu nɛɛ? Yehowa wo si kaa e ma je yayami peeli kɛ je zugba a nɔ kulaa. (Kane La 37:10.) Eko ɔ, yiwutsotsɛmɛ ma susu kaa a maa ye a he ngɛ kojomi nɛ ɔ he. Nihi fuu bɔɔ mɔde kaa a maa laa ní yayahi nɛ a peeɔ ɔ nɔ, nɛ behi fuu ɔ, je yaya nɛ ɔ haa nɛ a yeɔ a he. (Hiob 21:7, 9) Se kɛ̃ ɔ, Baiblo ɔ de ke: ‘Mawu hɛ ngɛ nɔmlɔ he be tsuaa be. E naa e ní peemi níhi tsuo. Diblii ko be nɛ nya tsa bɔ nɛ yayami peeli maa laa a he ngɛ mi.’ (Hiob 34:21, 22) Nɔ ko be nyɛe maa tu Yehowa Mawu nya fo. Nɔ ko be nyɛe maa sisi lɛ. Mawu naa nɔ́ tsuaa nɔ́, enɛ ɔ he ɔ, diblii ko be nɛ nya tsa hluu nɛ be hae nɛ Mawu nɛ na níhi nɛ ngɛ nɔ ko tsui mi. Ngɛ Harmagedon se ɔ, wa ma hla yiwutsotsɛmɛ ngɛ a hi he, se wa be mɛ nae. A ma kpata a hɛ mi kulaa!—La 37:12-15.

6. Ke a kpata yiwutsotsɛmɛ a hɛ mi ɔ, mɛnɔmɛ nɛ a maa hi si, nɛ mɛni he je nɛ enɛ ɔ ji sane kpakpa?

⁶ Ke a kpata yiwutsotsɛmɛ a hɛ mi ɔ,  mɛnɔmɛ nɛ a maa hi si? Yehowa wo si ke: “Nihi nɛ a he jɔ ɔ, mɛɛ a maa hi zugba a nɔ ngɛ kplɔkɔtɔ, kɛ tue mi jɔmi mi.” Lɔ ɔ se ɔ, wa kaneɔ ngɛ la nɛ ɔ nɔuu mi ke: “Nihi nɛ peeɔ nɔ́ nɛ da a, zugba a maa pee a nɔ́ nɛ a maa hi nɔ daa.” (La 37:11, 29) Mɛnɔmɛ ji “nihi nɛ a he jɔ” kɛ “nihi nɛ a peeɔ nɔ́ nɛ da” a? Nihi nɛ a he jɔ ɔ ji nihi nɛ a baa a he si kɛ haa Yehowa blɔ tsɔɔmi, nɛ a kplɛɛ e tsɔɔmi ɔmɛ a nɔ. Nihi nɛ a peeɔ nɔ́ nɛ da a hu ji nihi nɛ a peeɔ Yehowa Mawu suɔmi nya ní. Mwɔnɛ ɔ, yiwutsotsɛmɛ a he hiɛ kulaa pe dali. Se ngɛ je he nɛ maa ba a mi ɔ, wa be dee ke dali a he hiɛ aloo a he pi, ejakaa mɛ pɛ nɛ a maa hi je ɔ mi. Niinɛ, dali sɔuu nɛ a maa hi si ngɛ paradeiso ɔ mi!

7. Ngɛ mɛni blɔ nɔ nɛ blɔ nya tomihi nɛ a yi anɔkuale ɔ ha nɛ wa ngɛ nɔ nae?

⁷ Ngɛ mɛni blɔ nɔ nɛ blɔ nya tomihi nɛ a yi anɔkuale ɔ ha nɛ wa ngɛ nɔ́ nae? Ní yayahi fuu nɛ ngɛ nɔ yae ngɛ je nɛ ɔ mi ɔ, pi ni kakaakahi nɛ a ngɛ pee, mohu ɔ, blɔ nya tomihi lɛ a ngɛ pee. Kaa nɔ hyɛmi nɔ́ ɔ, mo susu bɔ nɛ jami blɔ nya tomi ɔmɛ sisi nimli ayɔhi abɔ ha a he nɛ o hyɛ. A yeɔ Mawu he lakpa, a tsɔɔ kaa nihi be nyɛe nɛ a he Baiblo ɔ ye, a sisi ɔ nihi ngɛ bɔ nɛ zugba a kɛ adesahi a nyagbe ma ji ha a he, nɛ a yeɔ lakpa kpahi hulɔ. Nɛ ma kudɔmi blɔ nya tomi ɔmɛ hu nɛɛ? A haa nɛ ma teɔ si kɛ woɔ ma, nɛ wɛtsohi teɔ si kɛ woɔ wɛtsohi, nɛ a kɛ a sibi hwuɔ ta. A haa nɛ ohiatsɛmɛ kɛ nihi nɛ a be nɔ ko ɔ a ní peeɔ mɔbɔ, a heɔ nyɔ mi ní, nɛ a hyɛɛ nihi a hɛ mi. Jehanɛ hu ɔ, mo susu ní tsumi nguahi nɛ a hɛ tsuɔ ɔ a he nɛ o hyɛ. A woɔ kɔɔhiɔ ɔ mi mu, a puɛɔ adebɔ níhi, nɛ a sisiɔ nihi nɛ a kɛ mɛ yeɔ jua a konɛ a ha nɛ nihi bɔɔ ko nɛ a ná ní kpɔtɔɔ. Ngɛ anɔkuale mi ɔ, blɔ nya tomi nɛ ɔmɛ sisiɔ nɔ, nɛ lɔ ɔ hu piɛɛ he nɛ nɔ́ nami pɔ he wawɛɛ ngɛ je ɔ mi mwɔnɛ ɔ nɛ.

8. Kaa bɔ nɛ Baiblo ɔ tsɔɔ ɔ, mɛni maa ba blɔ nya tomihi nɛ a ngɛ mwɔnɛ ɔ nɛ nihi fuu susuɔ kaa a he wa a nɔ?

⁸ Mɛni Yehowa maa pee? Haomi ngua a maa je sisi benɛ ma kudɔmi blɔ nya tomi ɔmɛ ma ya tua lakpa jamihi nɛ ji yo ajuama nɛ Baiblo ɔ tsɛɛ lɛ ke Babilon Ngua a. (Kpoj. 17:1, 2, 16; 18:1-4) A ma kpata lakpa jamihi a hɛ mi pɛsɛpɛsɛ. Blɔ nya tomi kpahi nɛ a yi anɔkuale ɔ hu nɛɛ? Baiblo ɔ ngɔɔ yokuhi kɛ wo kpɔhi kɛ daa si haa blɔ nya tomihi kɛ ní tsumi nguahi nɛ adesahi buɔ mɛ kaa a he wa a. (Kane Kpojemi 6:14.) Mawu Munyu ɔ gba kɛ fɔ si kaa nɔ yemi ɔmɛ kɛ blɔ nya tomihi tsuo nɛ nihi ngɔɔ a hɛ kɛ fɔɔ a nɔ ɔ maa hia kɛ je a blɔ hehi. Ngɛ haomi ngua a nyagbe ɔ, a ma kpata nɔ yemihi tsuo nɛ a ngɛ je momo nɛ ɔ mi, kɛ nihi nɛ a teɔ si kɛ woɔ Mawu Matsɛ Yemi ɔ a hɛ mi. (Yer. 25:31-33) Lɔ ɔ se ɔ, blɔ nya tomihi nɛ a yi anɔkuale be si hie hu!

9. Mɛni he je nɛ wa ma nyɛ ma ná nɔ mi mami kaa a maa to níhi a he blɔ nya saminya ngɛ zugba he ɔ nɔ ɔ?

⁹ Ke a je blɔ nya tomihi nɛ a yi anɔkuale ɔ kɛ je ɔ, mɛni a kɛ maa to nane mi? Ngɛ Harmagedon ta a se ɔ, anɛ blɔ nya tomi ko maa hi zugba a nɔ lo? Baiblo ɔ de ke: “Se wa ngɛ hiɔwe he, kɛ zugba he blɔ hyɛe kaa bɔ nɛ Mawu wo si ɔ. Lejɛ ɔ ji he nɛ a yeɔ dami sane ngɛ.” (2 Pet. 3:13) A ma je hiɔwe momo kɛ zugba momo ɔ, blɔ nya tomihi nɛ a yi anɔkuale, kɛ nihi nɛ a ngɛ a sisi ɔ tsuo kɛ je. Mɛni a kɛ maa to a nane mi? A maa ngɔ “hiɔwe he kɛ zugba he” kɛ to nane mi. Hiɔwe he ɔ daa si kɛ ha nɔ yemi ehe nɛ ji Mawu Matsɛ Yemi ɔ, nɛ zugba he ɔ hu daa si kɛ ha nihi nɛ a peeɔ Mawu suɔmi nya ní. Yesu Kristo kɛ nihi nɛ e kɛ mɛ maa ye matsɛ ngɛ  e Matsɛ Yemi ɔ mi ɔ ma je Yehowa Mawu nɛ ji Mawu nɛ toɔ níhi a he blɔ nya a su kpakpa amɛ kpo. (1 Kor. 14:33) Lɔ ɔ he ɔ, a maa to níhi a he blɔ nya saminya ngɛ “zugba he” ɔ nɔ. Nyumuhi anɔkualetsɛmɛ lɛ a maa nyɛɛ wa hɛ mi. (La 45:16) Yesu kɛ nihi 144,000 ɔ nɛ a maa tsɔɔ nyumu nɛ ɔmɛ blɔ. Mo susu he nɛ o hyɛ. Be ko maa su nɛ a ma je blɔ nya tomihi nɛ a yi anɔkuale ɔ kɛ je, nɛ a maa ngɔ blɔ nya tomi kake nɛ nɔ ko be nyɛe ma kpata hɛ mi, nɛ kake peemi ngɛ a kpɛti ɔ kɛ to nane mi!

10. Mɛni ní yayahi lɛ he si ngɛ o kpɔ ɔ mi, nɛ kɛ a saa o kɛ o weku ɔ he ha kɛɛ?

¹⁰ Ngɛ mɛni blɔ nɔ nɛ ní peepee yayahi ha nɛ wa ngɛ nɔ́ nae mwɔnɛ ɔ? Wa ngɛ je ko nɛ yayami peemi hyi lɛ tɔ mi. Je mi bami yaya, anɔkuale nɛ a yi, kɛ basabasa peemi he si wawɛɛ ngɛ je nɛ ɔ mi. Fɔli ji nihi titli nɛ e sa nɛ a mia a hɛ mi wawɛɛ konɛ a bu a bimɛ ɔmɛ a he kɛ je ní yaya nɛ ɔmɛ a he. Hɛja jemi níhi nɛ pɔ he ngɛ je ɔ mi mwɔnɛ ɔ haa nɛ ní yaya nɛ ɔmɛ peeɔ nihi akɔnɔ wawɛɛ, nɛ enɛ ɔ gbeɔ Yehowa sisi tomi mlaahi nɛ da a he guɛ. (Yes. 5:20) Se anɔkuale Kristofohi bɔɔ mɔde kaa a maa yu a he ngɛ ní nɛ ɔmɛ a he. A bɔɔ mɔde kaa a maa ya nɔ maa ye Yehowa anɔkuale ngɛ je nɛ nihi kɛ Yehowa sisi tomi mlaahi tsu we ní ngɛ mi nɛ ɔ mi.

11. Mɛni wa kaseɔ ngɛ hɛ mi kpatami nɛ Yehowa kɛ ba Sodom kɛ Gomora ma a nɔ ɔ mi?

¹¹ Mɛni Yehowa maa pee ngɛ ní peepee yaya nɛ ɔmɛ a he? Mo susu nɔ́ nɛ Yehowa pee benɛ ní peepee yayahi he si ngɛ Sodom kɛ Gomora a he nɛ o hyɛ. (Kane 2 Petro 2:6-8.) Ní yayahi nɛ bɔle Lot kɛ e weku ɔ kɛ kpe ɔ ha nɛ a na nɔ́ wawɛɛ. Benɛ Yehowa kpata ma a tsuo hɛ mi ɔ, e kɛ lɔ ɔ peemi po yayami se kulaa ngɛ lejɛ ɔ. Se pi lɔ ɔ kɛkɛ, e ‘ngɔ kɛ to okadi kɛ tsɔɔ nɔ́ nɛ maa ba yayami peeli a nɔ’ hwɔɔ se. Kaa bɔ nɛ Yehowa po ní yayahi nɛ ya nɔ ngɛ Lot be ɔ mi ɔ se ɔ, jã nɔuu nɛ e maa po ní yayahi nɛ ngɛ nɔ yae mwɔnɛ ɔ se ke e ba kpata je nɛ ɔ hɛ mi ɔ.

12. Mɛni ní komɛ nɛ o ngɛ blɔ hyɛe kaa o maa pee ke a je je yaya nɛ ɔ kɛ je?

¹² Ke a je ní peepee yayahi kɛ je ɔ, mɛni a kɛ maa to nane mi? Níhi nɛ maa ya nɔ ngɛ Paradeiso ɔ mi ɔ maa pee bua jɔmi. Mo susu bɔ nɛ waa kɛ bua jɔmi ma tsu ní kɛ plɛ zugba a Paradeiso, nɛ waa ma tsuhi kɛ ha waa kɛ wa suɔli ha a he nɛ o hyɛ. Waa kɛ bua jɔmi ma nya nimli ayɔhi abɔ nɛ a ma tle mɛ si ɔ a he, nɛ wa maa tsɔɔ mɛ Yehowa he ní, kɛ bɔ nɛ e kɛ adesahi hi si ha a. (Yes. 65:21, 22; Níts. 24:15) Níhi nɛ maa ya nɔ jamɛ a be ɔ mi ɔ maa pee bua jɔmi sɔuu, nɛ lɔ ɔ maa ngɔ yi jemi kɛ ha Yehowa!

13. Mɛni blɔ nɔ nɛ Satan, Adam kɛ Hawa a we atua tsɔmi ɔ ha nɛ wa ngɛ dengme gboe ngɛ?

¹³ Ngɛ mɛni blɔ nɔ nɛ wa ngɛ dengme gboe mwɔnɛ ɔ? Yiwutsotsɛmɛ, blɔ nya tomihi nɛ a yi anɔkuale, kɛ ní peepee yayahi ha nɛ si himi ngɛ zugba nɛ ɔ nɔ ɔ puɛ kulaa. Wa ti mɛnɔ ma nyɛ ma de ke ta hwumi, ohia, aloo nyagba nɛ je ɔ nɔ hɛ mi hyɛmi mi kɛ ba a sɛ́ e he? Nɛ hiɔ kɛ gbenɔ hu nɛɛ? Ní nɛ ɔmɛ saa wɔ tsuo wa he. Yiwutsotsɛmɛ etɛ nɛ ji Satan, Adam, kɛ Hawa lɛ a tsɔ Yehowa hɛ mi atua, nɛ lɔ ɔ nɛ ha nɛ wa ya je si himi nɛ ɔ mi ɔ nɛ. Wa ti nɔ ko nɔ ko be nyɛe nɛ e tu haomi nɛ je a we atua tsɔmi ɔ mi kɛ ba a nya fo.

14. Mɛni Yehowa maa pee ngɛ wa pɔtɔtɔɛ kɛ wa dengme gbomi ɔ he? Mo ha enɛ ɔ he nɔ hyɛmi nɔ́.

¹⁴ Mɛni Yehowa maa pee ngɛ wa pɔtɔtɔɛ  kɛ dengme nɛ wa ngɛ gboe ɔ he? Mo susu tahi a he nɛ o hyɛ. Yehowa wo si kaa e ma ha nɛ ta se maa po kulaa. (Kane La 46:8, 9.) Hiɔ hu nɛɛ? Nɔ ko be hiɔ nue hu. (Yes. 33:24) Gbenɔ hu nɛɛ? Yehowa maa ye gbenɔ nɔ kunimi kɛ ya neneene! (Yes. 25:8) E ma ha nɛ ohia se maa po. (La 72:12-16) E ma je si himi yaya kpahi nɛ ha nɛ wa ngɛ dengme gboe ɔ tsuo kɛ je. E ma je “kɔɔhiɔ” yaya nɛ ngɛ je nɛ ɔ mi ɔ kɛ je, ejakaa Satan kɛ e daimonio ɔmɛ be si hie hu nɛ a maa doo wa nya.—Efe. 2:2.

15. Ngɛ Harmagedon ta a se ɔ, mɛni níhi nɛ a be si hie hu?

¹⁵ Moo po he foni nɛ o hyɛ bɔ nɛ e maa pee bua jɔmi ha ke ta, hiɔ, aloo gbenɔ be si himi ɔ mi hu! Moo lɛɛ mo susu he nɛ o hyɛ, ta buli, ta hwumi níhi, aloo yɔkɔ nguahi nɛ a kɛ maa pu nihi nɛ a gbo ngɛ ta mi ɔ be si hie hu. Hiɔ tsami he, dɔkitahi, kɛ nɛɛsihi be si hie hu, nɛ nɔ ko be insiɔlansi pee hu. Gbogboehi a to he be, gbogboe dlali be, nɛ gɔ hu be! Jehanɛ hu ɔ, akɛnɛ yayami peeli be hu he je ɔ, wa hia we ma he buli, klamahi nɛ a kɛ hwɔɔ, kɛ polisihi, nɛ eko ɔ, sinyahi kɛ a he safehi be si hie hu! Si himi yaya nɛ ɔmɛ nɛ haa nɛ wa peeɔ yeyeeye, aloo wa yeɔ tsui ɔ se maa po kulaa.

16, 17. (a) Kɛ nihi nɛ a maa po Harmagedon ɔ maa nu he ha kɛɛ? Mo ha enɛ ɔ he nɔ́ he tomi nɔ́. (b) Mɛni ma nyɛ ma ha nɛ wa ná nɔ mi mami kaa ke a kpata je yaya nɛ ɔ hɛ mi ɔ, a maa baa wa yi?

¹⁶ Ke a je si himi yaya nɛ ɔmɛ kɛ je ɔ, kɛ si himi ɔ maa pee kɛɛ? Wa be nyɛe maa kale po. Akɛnɛ wa hi si himi yaya nɛ ɔ mi be kɛkɛɛ he je ɔ, eko ɔ, e pee wa he nɔ́, nɛ enɛ ɔ ha we nɛ wa yɔse bɔ nɛ si himi ɔ haa nɛ wa peeɔ yeyeeye ha a. Wa ma nyɛ maa ngɔ kɛ to nihi nɛ a we kɛ tlee tesia he kɛ we ɔ a he. Ke be ngɛ mi pue ɔ, a nyɛ we nɛ a yɔseɔ bɔ nɛ ngmlaa a nya wa ha a hu. Jã kɛ̃ nɛ nihi nɛ a hi si ngɛ dwɔmi he be kɛkɛɛ ɔ hu nyɛ we nɛ a yɔseɔ bɔ nɛ dwɔmi ɔ he fu ha a hu. Ke a je ní yaya nɛ ɔmɛ tsuo kɛ je ɔ, wa bua maa jɔ kɛkɛ!

¹⁷ Mɛni a kɛ maa to níhi nɛ haa nɛ wa peeɔ yeyeeye ɔ nane mi? La 37:11 ɔ ha heto ke: “Nihi nɛ a he jɔ ɔ, mɛɛ a maa hi zugba a nɔ ngɛ kplɔkɔtɔ, kɛ tue mi jɔmi mi.” Anɛ munyu nɛ ɔ wui o bua lo? Enɛ ɔ ji nɔ́ nɛ Yehowa suɔ nɛ o ná. Lɔ ɔ he ɔ, moo pee nɔ́ tsuaa nɔ́ nɛ o ma nyɛ konɛ o ya nɔ nɛ o kɛ Yehowa Mawu kɛ e we asafo ɔ nɛ nyɛɛ, titli ɔ, ngɛ nyagbe ligbi nɛ ɔmɛ a mi! O bua nɛ jɔ hɛ nɔ kami nɛ o ngɛ ɔ he, mo pue o yi mi tɛ ngɛ he, ha nɛ e pee nɔ́ nitsɛ ngɛ o tsui kɛ o juɛmi mi, nɛ o ha nɛ ni kpahi hu nɛ a le! (1 Tim. 4:15, 16; 1 Pet. 3:15) Ke o pee jã a, lɔ ɔ ma nyɛ ma ha nɛ o ná nɔ mi mami kaa ke a kpata je yaya nɛ ɔ hɛ mi ɔ, a maa baa o yi. O maa hi wami mi, nɛ o bua maa jɔ kɛ ya neneene!