NIBWƆHI nɛ a piɛɛ David ta buli ɔmɛ a he ɔ a kpɛti ni komɛ ji, Zelek, Ammon no ɔ, Uria, Hit no ɔ, kɛ Itma, Moab no ɔ. a (1 Kron. 11:​39, 41, 46) Ni kpahi hu nɛ a piɛɛ David ta buli ɔmɛ a he ji, “Keret bi ɔmɛ, Pelet bi ɔmɛ, kɛ Gat bi ɔmɛ.” (2 Sam. 15:18) E ma nyɛ maa ba kaa Keret bi ɔmɛ kɛ Pelet bi ɔmɛ kɛ Filisti bi ɔmɛ ji weku li. (Eze. 25:16) Gat bi ɔmɛ je Filisti ma nɛ ji Gat ɔ mi.—Yosh. 13:​2, 3; 1 Sam. 6:​17, 18.

Mɛni he je nɛ David ngmɛ nyumu nɛ ɔmɛ blɔ nɛ a ba piɛɛ e ta buli ɔmɛ a he ɔ? Akɛnɛ nyumu nɛ ɔmɛ ye lɛ anɔkuale, nɛ a ye Yehowa hu anɔkuale he je ɔ, David ngɛ nɔ mi mami ngɛ a mi. Kaa nɔ hyɛmi nɔ́ ɔ, womi ko nɛ tsɔɔ Baiblo ɔ mi ɔ de ngɛ Keret bi ɔmɛ kɛ Pelet bi ɔmɛ a he ke: “A ya nɔ nɛ a fĩ David se benɛ e kɛ si fɔfɔɛhi nɛ a mi wa ngɛ kpee ngɛ e nɔ yemi ɔ mi ɔ.” Ngɛ mɛni blɔ nɔ? Benɛ “Israel nyumu ɔmɛ tsuo” kua Matsɛ David nɛ a ya nyɛɛ ‘sanetsɛ ko nɛ a tsɛɛ lɛ ke Sheba’ a se ɔ, Keret bi ɔmɛ kɛ Pelet bi ɔmɛ ya nɔ nɛ a ye David anɔkuale, nɛ a ye bua lɛ konɛ e tsi Sheba atuã tsɔmi ɔ nya. (2 Sam. 20:​1, 2, 7) Jehanɛ hu ɔ, benɛ Matsɛ David binyumu Adoniya bɔ mɔde kaa e ma kpɔ̃ tsɛ yemi ɔ ngɛ e dɛ ɔ, Keret bi ɔmɛ kɛ Pelet bi ɔmɛ ya nɔ nɛ a fĩ David se, nɛ a wo Salomo matsɛ, ejakaa lɛ ji nɔ nɛ Yehowa hla kaa e ye e tsɛ ɔ se.—1 Ma. 1:​24-27, 38, 39.

Nɔ kpa ko nɛ e ye David anɔkuale wawɛɛ ji Itai, nɛ ji Gat no ɔ. Benɛ Matsɛ David binyumu Absalom te si kɛ wo lɛ, nɛ e sisi Israel nyumu ɔmɛ nɛ a fĩ e se ɔ, Itai kɛ e ta buli 600 ye bua David. Sisije ɔ, David de Itai kaa akɛnɛ tsa pi Israel no ji lɛ he je ɔ, e sɛ nɛ e hwu ta nɛ ɔ. Se Itai de lɛ ke: “Be abɔ nɛ Yehowa ngɛ, kɛ be abɔ nɛ ye nyɔmtsɛ matsɛ ɔ ngɛ nɛ ɔ, he fɛɛ he nɛ ye nyɔmtsɛ matsɛ ɔ maa hi ɔ, o sɔmɔlɔ ɔ maa hi lejɛ ɔ, gbenɔ mi jio, wami mi jio!”—2 Sam. 15:​6, 18-21.

E ngɛ mi kaa pi Israel bi ji Keret bi ɔmɛ, Pelet bi ɔmɛ kɛ Gat bi ɔmɛ mohu lɛɛ, se a yɔse kaa Yehowa ji anɔkuale Mawu, nɛ David ji nɔ nɛ Yehowa pɔ lɛ nu. Hyɛ bɔ nɛ David bua maa jɔ ha kaa nyumu nɛ ɔmɛ ye lɛ anɔkuale nɛ a fĩ e se!