1. Kɛ a to Yehowa we bi a he blɔ nya ha kɛɛ ngɛ kaseli ɔmɛ a be ɔ mi?

 BE FƐƐ BE nɛ Yehowa maa ngɔ ní tsumi ko kɛ wo e we bi a dɛ ɔ, e hyɛɛ blɔ kaa a ma tsu he ní pɛpɛɛpɛ ngɛ blɔ nya tomi nya. (1 Kor. 14:33) Kaa nɔ hyɛmi nɔ́ ɔ, Mawu suɔ kaa a fiɛɛ sane kpakpa a ngɛ je ɔ mi tsuo. (Mat. 24:14) Yehowa hla Yesu kaa e nyɛɛ ní tsumi nɛ ɔ hɛ mi. Ngɛ anɔkuale mi ɔ, Yesu to níhi a he blɔ nya saminya konɛ ní tsumi nɛ ɔ nɛ ya nɔ. Kaa hyɛmi nɔ́ ɔ, a hla asafo mi nikɔtɔmahi konɛ a nyɛɛ asafo ehehi nɛ a to sisi ngɛ kaseli ɔmɛ a be ɔ mi ɔ hɛ mi, nɛ a kɛ blɔ tsɔɔmihi ha Kristofo ɔmɛ. (Níts. 14:23) Ngɛ Yerusalem hu ɔ, bɔfo ɔmɛ kɛ nyumu nikɔtɔma amɛ nɛ a ngɛ asafo ɔ hɛ mi nyɛɛe ɔ mwɔ yi mi kpɔ komɛ nɛ e sa kaa asafo ɔ tsuo nɛ a kɛ tsu ní. (Níts. 15:2; 16:4) Akɛnɛ asafo ɔmɛ kɛ blɔ tsɔɔmi ɔmɛ nɛ a kɛ ha mɛ ɔ tsu ní he je ɔ, ‘asafo ɔmɛ ya nɔ nɛ a he wa ngɛ hemi kɛ yemi ɔ mi, nɛ a he hiɛ’ babauu.—Níts. 16:5.

2. Kɛ je jeha 1919 ɔ, mɛni blɔ nɔ nɛ Yehowa guɔ kɛ haa e we bi blɔ tsɔɔmi kɛ mumi mi niye ní?

² Mwɔnɛ hu ɔ, Yehowa to e we bi a he blɔ nya. Kɛ je jeha 1919 ɔ, Yesu guɔ nyumuhi bɔɔ komɛ nɛ a pɔ mɛ nu ɔ a nɔ kɛ toɔ fiɛɛmi ní tsumi ɔ he blɔ nya, nɛ a haa Mawu we bi mumi mi niye ní. a (Luka 12:42) E ngɛ heii kaa Yehowa ngɛ ní tsumi nɛ nyumu nɛ ɔmɛ ngɛ tsue ɔ nɔ jɔɔe.—Yes. 60:22; 65:​13, 14.

3-4. (a) Mo ha nɔ hyɛmi nɔ́ ko nɛ tsɔɔ bɔ nɛ wa náa wa ní tsumi ɔ nɛ a to he blɔ nya a he se ha. (b) Mɛni he wa ma susu ngɛ ní kasemi nɛ ɔ mi?

 ³ Ngɛ anɔkuale mi ɔ, kaa a to we Yehowa we bi a he blɔ nya a, jinɛ wa be nyɛe ma tsu ní tsumi nɛ Yesu kɛ wo wa dɛ ɔ. (Mat. 28:​19, 20) Kaa nɔ hyɛmi nɔ́ ɔ, ke pi nɛ a gba zugba kpɔ ɔmɛ kɛ ha asafo ɔmɛ ɔ, jinɛ nɔ fɛɛ nɔ ko fiɛɛ ngɛ he fɛɛ he nɛ e suɔ. Eko ɔ, lɔ ɔ ma ha nɛ waa fiɛɛ wawɛɛ ngɛ he pɔtɛɛ komɛ, nɛ wa ma si zugba kpɔ kpahi kɛ fɔ si. Mo susu blɔ kpahi a nɔ nɛ wa náa Kristofohi a he blɔ nya nɛ a to ɔ he se.

⁴ Benɛ Yesu ngɛ zugba a nɔ ɔ, e to e se nyɛɛli ɔmɛ a he blɔ nya saminya, nɛ jã nɔuu nɛ e ngɛ pee mwɔnɛ ɔ. Ngɛ ní kasemi nɛ ɔ mi ɔ, wa maa hyɛ nɔ hyɛmi nɔ́ nɛ Yesu pee, kɛ bɔ nɛ Yehowa asafo ɔ hu kaseɔ e nɔ hyɛmi nɔ́ ɔ ha. Jehanɛ hu ɔ, wa ma susu ní komɛ nɛ wa ma nyɛ maa pee kɛ tsɔɔ kaa wa ngɛ hɛ kɛ nɔ fɔmi ngɛ Yehowa asafo ɔ mi ɔ he.

ASAFO Ɔ KASEƆ YESU NƆ HYƐMI NƆ́ Ɔ

5. Mɛni ji nɔ́ ko nɛ asafo ɔ peeɔ kɛ kaseɔ Yesu nɔ hyɛmi nɔ́ ɔ? (Yohane 8:28)

⁵ Yesu kase níhi nɛ e de kɛ níhi nɛ e pee ɔ kɛ je e hiɔwe Tsɛ ɔ ngɔ. Yehowa asafo ɔ hu kaseɔ Yesu nɔ hyɛmi nɔ́ ɔ, nɛ a ngɔɔ níhi nɛ a tsɔɔ wɔ kɛ kɔɔ je mi bami he kɛ blɔ tsɔɔmihi nɛ a kɛ haa wɔ ɔ kɛ daa Baiblo ɔ nɔ. (Kane Yohane 8:28; 2 Tim. 3:​16, 17) Be fɛɛ be ɔ, a woɔ wɔ he wami kaa waa kane Mawu Munyu ɔ nɛ waa kɛ nɔ́ nɛ wa kane ɔ nɛ tsu ní. Ke waa kɛ ga womi nɛ ɔ tsu ní ɔ, kɛ wa ma ná he se ha kɛɛ?

6. Mɛni ji se nami kake ko nɛ se be nɛ wa náa ke wa kase Baiblo ɔ?

⁶ Ke wa ngɔ wa womi ɔmɛ kɛ kase Baiblo ɔ, wa ma ná he se saminya. Kaa nɔ hyɛmi nɔ́ ɔ, ke asafo ɔ ngɔ blɔ tsɔɔmi ko kɛ ha wɔ ɔ, wa ma nyɛ maa ngɔ nɔ́ nɛ Baiblo ɔ de ɔ kɛ to blɔ tsɔɔmi ɔ he. Ke wa na kaa blɔ tsɔɔmi ɔ nɛ wa nine su nɔ ɔ je Ngmami ɔ mi ɔ, lɔ ɔ haa nɛ wa náa hɛ kɛ nɔ fɔmi nɛ mi wa ngɛ Yehowa asafo ɔ mi.—Rom. 12:2.

7. Mɛni sɛ gbi nɛ Yesu fiɛɛ, nɛ kɛ Yehowa asafo ɔ kaseɔ e nɔ hyɛmi nɔ́ ɔ ha kɛɛ?

⁷ Yesu fiɛɛ “Mawu Matsɛ Yemi ɔ he sane kpakpa a.” (Luka 4:​43, 44) Jehanɛ hu ɔ, Yesu fã e kaseli ɔmɛ kaa a fiɛɛ Matsɛ Yemi ɔ he sane kpakpa a. (Luka 9:​1, 2; 10:​8, 9) Mwɔnɛ ɔ, e slo hehi nɛ Yehowa we bi tsuo ngɛ, nɛ e slo nɔ fɛɛ nɔ blɔ nya ní tsumi ngɛ asafo ɔ mi hulɔ. Se kɛ̃ ɔ, wɔ tsuo wa fiɛɛɔ Matsɛ Yemi ɔ he sane kpakpa a.

8. Mɛni he blɔ nɛ wa ngɛ?

⁸ E ji he blɔ ngua nɛ wa ná kaa wa maa fiɛɛ anɔkualehi nɛ kɔɔ Mawu Matsɛ Yemi ɔ he ɔ kɛ ha ni kpahi! Pi nɔ fɛɛ nɔ nɛ ma ná he blɔ nɛ ɔ. Kaa nɔ hyɛmi nɔ́ ɔ, benɛ Yesu ngɛ zugba a nɔ ɔ, e ngmɛ́ blɔ konɛ mumi yayamihi nɛ a ye e he odase. (Luka 4:41) Mwɔnɛ ɔ hu ɔ, loko nɔ ko he maa su nɛ e ma ba piɛɛ Yehowa we bi a he kɛ tsu fiɛɛmi ní tsumi ɔ, e sa nɛ e ba e je mi ngɛ Yehowa mlaahi a nya. Ke wa bɔ mɔde nɛ wa fiɛɛ sane kpakpa a ngɛ he fɛɛ he nɛ wa ngɛ ɔ, lɔ ɔ tsɔɔ kaa wa bua jɔ he blɔ nɛ wa ngɛ ɔ he. Kaa bɔ nɛ Yesu pee ɔ, wa suɔ nɛ waa pee nɔ́ fɛɛ nɔ́ nɛ wa ma nyɛ nɛ waa fiɛɛ ha ni kpahi nɛ waa tsɔɔ mɛ Matsɛ Yemi ɔ he anɔkuale ɔ.—Mat. 13:​3, 23; 1 Kor. 3:6.

9. Mɛni blɔ nɔ nɛ asafo ɔ haa nɛ nihi leɔ Mawu biɛ ɔ?

⁹ Yesu ha nɛ nihi le Mawu biɛ ɔ. Yesu sɔle nɛ e de e hiɔwe Tsɛ ɔ ke: “I ha nɛ a le o biɛ ɔ.” (Yoh. 17:26) Kaa bɔ nɛ Yesu pee ɔ, Yehowa asafo ɔ hu peeɔ nɔ́ fɛɛ nɔ́ nɛ e ma nyɛ konɛ e ye bua nihi nɛ a le Mawu biɛ ɔ. Blɔ kake nɛ asafo ɔ gu nɔ kɛ pee enɛ ɔ ji New World Translation of the Holy Scriptures ɔ nɛ a pee ɔ. Baiblo nɛ ɔ ngɔ Mawu biɛ ɔ kɛ wo he fɛɛ he nɛ e sa kaa e je kpo ngɛ ɔ. Amlɔ nɛ ɔ, a tsɔɔ New World Translation ɔ tsuo loo e fã ko sisi kɛ ya gbihi nɛ hiɛ pe 270 ɔ mi. Ke o hyɛ Appendix A4 kɛ A5 ngɛ  New World Translation ɔ mi ɔ, o maa na níhi fuu kɛ kɔ nɔ́ he je nɛ a ngɔ Mawu biɛ ɔ kɛ wo hehi nɛ e sa kaa e hi ngɛ Baiblo ɔ mi, kɛ blɔ nɔ nɛ a gu kɛ pee jã. Appendix C nɛ ngɛ Study Bible ɔ mi ɔ haa nɛ wa naa yi mi tomihi fuu a he je nɛ e sa kaa Mawu biɛ ɔ nɛ je kpo ngɛ Kristofohi A Hela Ngmami ɔ mi si 237 ɔ.

10. Mɛni o kase ngɛ nɔ́ nɛ yo nɔkɔtɔma ko nɛ ngɛ Myanmar a de ɔ mi?

¹⁰ Kaa bɔ nɛ Yesu pee ɔ, wa suɔ nɛ waa ye bua nihi babauu nɛ a ba le Mawu biɛ ɔ. Benɛ yo nɔkɔtɔma ko nɛ ngɛ Myanmar nɛ e ye jeha 67 ɔ ba le kaa Mawu ngɛ biɛ ɔ, e fo ya nɛ e de ke: “Enɛ ɔ ji kekleekle be nɛ i ba le kaa Mawu biɛ ji Yehowa. . . . I ba kase nɔ́ ko nɛ he hia wawɛɛ ngɛ ye si himi mi.” Níhi a si kpami nɛ ɔ ha nɛ wa na kaa ke tsui kpakpatsɛmɛ ba le Mawu biɛ ɔ, e ma nyɛ ma tsake a si himi.

YAA NƆ NƐ O NÁ HƐ KƐ NƆ FƆMI NGƐ YEHOWA ASAFO Ɔ MI

11. Mɛni nɛ asafo mi nikɔtɔmahi ma nyɛ maa pee kɛ tsɔɔ kaa a ngɛ hɛ kɛ nɔ fɔmi ngɛ Yehowa asafo ɔ mi? (Hyɛ foni ɔ hulɔ.)

¹¹ Mɛni ji nɔ́ kake nɛ asafo mi nikɔtɔmahi ma nyɛ maa pee kɛ tsɔɔ kaa a ngɛ hɛ kɛ nɔ fɔmi ngɛ Mawu asafo ɔ mi? Ke asafo mi nikɔtɔma amɛ nine su blɔ tsɔɔmi ko nɔ ɔ, e sa nɛ a kane lɛ saminya nɛ a kɛ tsu ní kɛ pi si. Kaa nɔ hyɛmi nɔ́ ɔ, a haa mɛ blɔ tsɔɔmihi ngɛ bɔ nɛ a ma plɛ kɛ tsu ní peemi slɔɔto ɔmɛ a he ní ha ngɛ asafo mi kpehi a sisi, bɔ nɛ a maa sɔle kɛ ha asafo ɔ ha, kɛ bɔ nɛ a maa hyɛ Kristo jijɔ ɔmɛ a nɔ ha. Ke asafo mi nikɔtɔmahi kɛ blɔ tsɔɔmihi tsuo nɛ asafo ɔ kɛ haa a tsuɔ ní ɔ, nyɛmimɛ ɔmɛ maa nu he kaa Yehowa suɔ mɛ nɛ a ngɛ slɔkee.

12. (a) Mɛni he je nɛ e sa kaa waa kɛ nihi nɛ a nyɛɛɔ hɛ mi ngɛ asafo ɔ mi ɔ nɛ pee kake? (Hebri Bi 13:​7, 17) (b) Mɛni he je nɛ e sa nɛ waa ngɔ wa juɛmi kɛ ma su kpakpahi nɛ nihi nɛ a nyɛɛɔ hɛ mi ɔ ngɛ ɔ nɔ ɔ?

¹² Ke asafo mi nikɔtɔma amɛ kɛ blɔ tsɔɔmi ko ha wɔ ɔ, e sa nɛ waa je wa tsui mi nɛ wa kɛ tsu ní. Ke wa pee jã a, e he be wae ha asafo mi nikɔtɔma amɛ kaa a ma tsu a ní tsumi ɔmɛ saminya. Baiblo ɔ woɔ wɔ he wami kaa waa bu nihi nɛ a ngɛ hɛ mi nyɛɛe ɔ tue nɛ waa ba wa he si kɛ ha mɛ. (Kane Hebri Bi 13:​7, 17.) Se be komɛ ɔ, enɛ ɔ peemi he ma nyɛ maa wa. Mɛni he je? Ejakaa nyumu nɛ ɔmɛ yi mluku. Anɔkuale sane ji kaa ke wa ngɔ wa juɛmi kɛ ma a gbɔjɔmihi a nɔ mohu pe su kpakpahi nɛ a ngɛ ɔ, lɔ ɔ ma ha nɛ wa ya fĩ wa he nyɛli ɔmɛ a se. Ngɛ mɛni blɔ nɔ? Wa he nyɛli ɔmɛ ngɛ hlae nɛ hɛ kɛ nɔ fɔmi nɛ wa ngɛ ngɛ Yehowa asafo ɔ mi ɔ mi nɛ gbɔjɔ. Enɛ ɔ he ɔ, ke wa ná asafo mi nikɔtɔma amɛ a he juɛmi yaya a, lɔ ɔ ma ha nɛ wa ná juɛmi nɛ dɛ ngɛ Yehowa asafo ɔ hu he. Mɛni maa ye bua wɔ nɛ wa yɔse lakpa munyuhi nɛ wa he nyɛli ɔmɛ tuɔ ɔ konɛ waa yu wa he ngɛ he?

KOO NGMƐ BLƆ NƐ NI KPAHI NƐ A HA NƐ HƐ KƐ NƆ FƆMI NƐ O NGƐ NGƐ YEHOWA ASAFO Ɔ MI Ɔ MI NƐ GBƆJƆ

13. Mɛni nɛ Mawu he nyɛli bɔɔ mɔde kaa a maa pee kɛ gbe e we asafo ɔ he guɛ?

¹³ Mawu he nyɛli bɔɔ mɔde kaa a ma ha nɛ waa na ní kpakpahi nɛ yaa nɔ ngɛ Yehowa asafo ɔ mi ɔ kaa ní yayahi. Kaa nɔ hyɛmi nɔ́ ɔ, wa kase ngɛ Ngmami ɔ mi kaa Yehowa suɔ kaa e sɔmɔli tsuo a he nɛ tsɔ ngɛ nɔmlɔ tso mi, ngɛ je mi bami mi, kɛ mumi mi. Yehowa fã kaa a fiee nihi tsuo nɛ a kɛ a he woɔ je mi bami yaya mi, nɛ a tsakee we a tsui ɔ kɛ je asafo ɔ mi. (1 Kor. 5:​11-13; 6:​9, 10) Waa kɛ fami nɛ ɔ nɛ je Ngmami ɔ mi ɔ tsuɔ ní. Se kɛ̃ ɔ, wa he nyɛli ɔmɛ deɔ ke wa sume nihi, wa buɔ nihi fɔ, nɛ wa kojoɔ mɛ.

14. Mɛnɔ lɛ hɔɔ si ngɛ lakpa munyuhi nɛ nihi tuɔ ngɛ asafo ɔ he ɔ se?

¹⁴ Moo le nɔ tutuutu nɛ hɔ wo tuami ɔ se. Satan Abosiami lɛ hɔɔ si ngɛ lakpa munyuhi  nɛ nihi tuɔ ngɛ asafo ɔ he ɔ se. “Lɛ ji lakpa a e tsɛ.” (Yoh. 8:44; 1 Mose 3:​1-5) Enɛ ɔ he ɔ, e sa nɛ waa hyɛ blɔ kaa Satan maa gu ni komɛ a nɔ kɛ gbɛ Yehowa asafo ɔ he lakpa munyuhi kɛ fĩa. Jã pɛpɛɛpɛ nɛ níhi ya nɔ ngɛ kaseli ɔmɛ a be ɔ mi.

15. Mɛni jami hɛ mi nyɛɛli ɔmɛ pee Yesu kɛ e se nyɛɛli ɔmɛ?

¹⁵ E ngɛ mi kaa Yesu nɛ ji Mawu Bi ɔ ye mluku nɛ e pee nyakpɛ níhi mohu lɛɛ, se Satan gu ni komɛ a nɔ kɛ gbɛ e he lakpa munyuhi fuu kɛ fĩa. Kaa nɔ hyɛmi nɔ́ ɔ, jami hɛ mi nyɛɛli ɔmɛ tsɔɔ kaa he wami nɛ Yesu kɛ pee nyakpɛ níhi ɔ je “daimonio ɔmɛ a nɔ yelɔ ɔ” ngɔ. (Maak. 3:22) Benɛ a ngɛ Yesu sane yee konɛ a gbe lɛ ɔ, jami hɛ mi nyɛɛli ɔmɛ po e nya kaa e gbe Mawu biɛ ɔ he guɛ, nɛ a plɛ ni ɔmɛ a yi mi kaa a ha nɛ a gbe Yesu. (Mat. 27:20) Pee se ɔ, benɛ Kristo se nyɛɛli ɔmɛ ngɛ sane kpakpa a fiɛɛe ɔ, a he nyɛli ɔmɛ “wo nihi . . . a yi mi, nɛ a su mɛ ngɔ wo” a he konɛ a wa Kristofo ɔmɛ yi mi. (Níts. 14:​2, 19) December 1, 1998 Hwɔɔmi Mɔ ɔ de ngɛ Ní Tsumi 14:2 ɔ he ke: “Pi nɛ Yuda bi ɔmɛ a he nyɛli ɔmɛ kua sɛ gbi nɛ a fiɛɛ kɛ ha mɛ ɔ pɛ kɛkɛ, mohu ɔ, a tu munyu yayahi ngɛ Kristofo ɔmɛ a he bɔ nɛ pee nɛ nihi nɛ a ko bu mɛ tue nɛ a nyɛ mɛ hulɔ.”

16. Ke wa nu lakpa munyu ko ɔ, mɛni e sa nɛ wa kai?

¹⁶ Loloolo ɔ, Satan yeɔ lakpa. “E ngɛ nihi nɛ a ngɛ zugba a nɔ hehi tsuo nɛ nimli ngɛ ɔ sisie.” (Kpoj. 12:9) Ke o nu lakpa munyu ko kɛ kɔ asafo ɔ loo nyɛmimɛ nɛ a ngɛ asafo ɔ hɛ mi nyɛɛe ɔ a he ɔ, mo kai kaa Mawu he nyɛli gbɛ Yesu kɛ e kaseli ɔmɛ a he lakpa munyuhi kɛ fĩa. Mwɔnɛ ɔ hu ɔ, a ngɛ Yehowa we bi yi mi wae, nɛ a ngɛ a he lakpa munyuhi gbɛe kɛ ngɛ  fĩae kaa bɔ nɛ Baiblo ɔ gba kɛ fɔ si ɔ. (Mat. 5:​11, 12) Ke wa yɔse nɔ tutuutu nɛ e hɔɔ si ngɛ lakpa munyu nɛ ɔmɛ a se, nɛ wa pee nɔ́ ko kɛ po wa he piɛ oya nɔuu ɔ, munyu nɛ ɔmɛ be nyɛe maa sisi wɔ. Ke jã a, lɛɛ mɛni e sa kaa waa pee kɛ po wa he piɛ?

17. Mɛni wa ma nyɛ maa pee konɛ sisimi munyuhi nɛ a ko ye wɔ awi? (2 Timoteo 1:13) (Hyɛ daka nɛ ji, “ Nɔ́ Nɛ E Sa Nɛ O Pee Ke O Nu Lakpa Munyuhi” ɔ hulɔ.)

¹⁷ Mo kua sisimi munyuhi. Bɔfo Paulo tsɔɔ wɔ nɔ́ nɛ e sa kaa waa pee ke wa nu lakpa munyu ko. E de Timoteo konɛ e “fã ni komɛ kaa a ko . . . ngɔ a juɛmi kɛ ma nyaziahi” a nɔ, nɛ a “kua nyaziahi nɛ wui Mawu hɛ mi nyami ɔ” hulɔ. (1 Tim. 1:​3, 4; 4:7) Mo susu he nɛ o hyɛ: Bimwɔyo ma nyɛ ma wo nɔ́ ko ngɛ zugba kɛ wo e nya mi, se nɔkɔtɔma lɛɛ e be jã pee, ejakaa e le kaa e ma nyɛ maa wo lɛ hiɔ. Wa kuaa lakpa munyuhi ejakaa wa le he nɛ a je, nɛ wa buɔ “munyu kpakpahi” nɛ a ji anɔkuale ɔ tue.—Kane 2 Timoteo 1:13.

18. Mɛni o ma nyɛ maa pee kɛ tsɔɔ kaa o ngɛ hɛ kɛ nɔ fɔmi nɛ mi wa ngɛ Yehowa asafo ɔ mi?

¹⁸ Blɔhi fuu ngɛ nɛ asafo ɔ guɔ nɔ kɛ kaseɔ Yesu, se wa susu a kpɛti etɛ pɛ he ngɛ ní kasemi nɛ ɔ mi. Ke o ngɛ Baiblo ɔ kasee ɔ, moo hyɛ kaa o maa na blɔ kpahi a nɔ nɛ asafo ɔ guɔ kɛ kaseɔ Yesu nɔ hyɛmi nɔ́ ɔ lo. Moo ye bua ni kpahi ngɛ o we asafo ɔ mi konɛ a ná hɛ kɛ nɔ fɔmi nɛ mi wa ngɛ Yehowa asafo ɔ mi. Jehanɛ hu ɔ, moo ya nɔ nɛ o kɛ anɔkuale yemi nɛ mɛtɛ Yehowa asafo ɔ nɛ e guɔ nɔ kɛ tsuɔ e yi mi tomi he ní ɔ he. Ke o pee jã a, lɔ ɔ tsɔɔ kaa o ngɛ hɛ kɛ nɔ fɔmi nɛ mi wa ngɛ e mi. (La 37:28) Nyɛ ha nɛ waa ya nɔ nɛ wa bua nɛ jɔ he blɔ nɛ wa ná kaa wa piɛɛ Yehowa asafo nɛ e mi bimɛ ɔmɛ yeɔ anɔkuale nɛ a suɔ a sibi ɔ he.