1. Kɛ ni komɛ nuɔ he ha kɛɛ ngɛ ni kpahi nɛ a kɛ mɛ maa sɛɛ ní ngɛ fiɛɛmi mi ɔ he? (Hyɛ foni ɔ hulɔ.)

 YEHOWA we bi fiɛɛɔ kɛ haa ni kpahi, ejakaa a suɔ a hiɔwe Tsɛ ɔ, nɛ a suɔ nɛ nihi nɛ a ba le lɛ. Fiɛɛli fuu bua jɔ fiɛɛmi ní tsumi ɔ he wawɛɛ. Se fiɛɛli komɛ hu ngɛ nɛ e he waa ha mɛ kaa a kɛ bua jɔmi ma tsu fiɛɛmi ní tsumi ɔ. Mɛni he je? Eko ɔ, ni komɛ gboɔ zo wawɛɛ, nɛ a nuɔ he kaa a li ní tsɔɔmi kulaa. Ni komɛ hu nuɔ he kaa a be nyɛe maa ya nɔ ko we mi be mi nɛ a fɔ we mɛ nine. Ni kpahi hu yeɔ gbeye kaa nihi ma kua mɛ. Ni komɛ hu ngɛ nɛ bɔ nɛ a tsɔse mɛ ha he je ɔ, a sume nɛ a pee nɔ́ ko kɛ wo ni kpahi a mi mi la. E ngɛ mi kaa nyɛmimɛ nɛ ɔmɛ suɔ Yehowa wawɛɛ mohu lɛɛ, se e he waa ha mɛ kaa a kɛ nihi nɛ a li mɛ ɔ maa sɛɛ sane kpakpa a he ní. Se kɛ̃ ɔ, a le kaa e he hia nɛ a tsu fiɛɛmi ní tsumi ɔ, lɔ ɔ he ɔ, a kɛ a he woɔ mi be fɛɛ be. Hyɛ bɔ nɛ Yehowa bua maa jɔ nyɛmimɛ nɛ ɔmɛ a he ha!

2. Ke e he wa ha mo kaa o ma ná bua jɔmi ngɛ fiɛɛmi mi ɔ, mɛni he je nɛ e sɛ nɛ o kɔni mi nɛ jɔ̃ ɔ?

² Anɛ be komɛ ɔ, e he waa ha mo kaa o ma ná bua jɔmi ngɛ fiɛɛmi mi ngɛ níhi nɛ wa tu a he munyu kɛ sɛ hlami ɔ he je lo? Ke jã a, lɛɛ o kɔni mi nɛ ko jɔ̃. Eko ɔ, o susuɔ kaa o be kã, se lɔ ɔ mohu tsɔɔ kaa o baa o he si, nɛ o sume nɛ o gbla ni kpahi a juɛmi kɛ ba o nɔ. E tsɔɔ hu kaa o sume nɛ o kɛ nihi nɛ sã nya. Nɔ ko nɔ ko be nɛ e suɔ nɛ nihi nɛ a kua lɛ, titli ke e suɔ nɛ e pee nihi kpakpa. O hiɔwe Tsɛ ɔ le nyagbahi nɛ o kɛ ngɛ kpee ɔ saminya, nɛ e suɔ nɛ e ye bua mo. (Yes. 41:13) Ngɛ ní  kasemi nɛ ɔ mi ɔ, wa ma susu ga womi enuɔ komɛ a he. Ga womi nɛ ɔmɛ maa ye bua wɔ konɛ waa da nyagba nɛ ɔmɛ a nya, nɛ wa ná bua jɔmi ngɛ fiɛɛmi ní tsumi ɔ mi.

HA NƐ MAWU MUNYU Ɔ NƐ WO MO HE WAMI

3. Mɛni ye bua gbalɔ Yeremia nɛ e nyɛ nɛ e fiɛɛ kɛ ha ni kpahi?

³ Kɛ je blema tɔɔ ɔ, ke Mawu ngɔ ní tsumi ko nɛ he wa kɛ wo e sɔmɔli a dɛ ɔ, e Munyu ɔ woɔ mɛ he wami. Kaa nɔ hyɛmi nɔ́ ɔ, mo susu gbalɔ Yeremia he nɛ o hyɛ. Benɛ Yehowa de lɛ ke e ya fiɛɛ ɔ, sisije ɔ, e gbla e nane si. Yeremia de ke: “I li munyu tumi; niheyo kɛkɛ ji mi.” (Yer. 1:6) Mɛni ye bua lɛ nɛ e pee kã? Ngɛ anɔkuale mi ɔ, sɛ gbi nɛ Mawu kɛ ha lɛ ɔ lɛ wo lɛ he wami. Yeremia de ke: “O sɛ gbi ɔ peeɔ kaa la nɛ ngɛ tsoe ngɛ ye tsui mi, kɛ ye wuhi a mi. I bɔɔ mɔde saminya kaa ma tsi nya, se jehanɛ lɛɛ, i pa nyɛ we hu.” (Yer. 20:​8, 9) E ngɛ mi kaa nihi fuu nɛ Yeremia fiɛɛ kɛ ha mɛ ɔ bui lɛ tue mohu lɛɛ, se sɛ gbi nɛ a de lɛ kaa e fiɛɛ ɔ wo lɛ he wami nɛ e nyɛ nɛ e tsu ní ɔ.

4. Ke wa kane Mawu Munyu ɔ nɛ wa pue wa yi mi tɛ ngɛ he ɔ, kɛ wa ma ná he se ha kɛɛ? (Kolose Bi 1:​9, 10)

⁴ Mwɔnɛ ɔ hu ɔ, Mawu Munyu ɔ woɔ Kristofohi he wami. Benɛ bɔfo Paulo ngma sɛ womi kɛ ha asafo nɛ ngɛ Kolose ɔ, e tsɔɔ kaa ke e nyɛmimɛ ɔmɛ kase anɔkuale nile nɛ ngɛ Mawu Munyu ɔ mi ɔ, e maa wo mɛ he wami konɛ a “nyɛɛ bɔ nɛ sa Yehowa” be mi nɛ a ngɛ nɔ yae nɛ a ngɛ “yiblii woe ngɛ ní tsumi kpakpa fɛɛ ní tsumi kpakpa mi” ɔ. (Kane Kolose Bi 1:​9, 10.) Sane kpakpa a nɛ wa maa fiɛɛ ɔ hu piɛɛ ní tsumi kpakpa nɛ ɔmɛ a he. Enɛ ɔ he ɔ, ke wa kane Mawu Munyu ɔ nɛ wa pue wa yi mi tɛ ngɛ he ɔ, hemi kɛ yemi nɛ wa ngɛ ngɛ Yehowa mi ɔ mi maa wa, nɛ wa maa le nɔ́ he je nɛ e sa kaa waa fiɛɛ Matsɛ Yemi ɔ he sɛ gbi ɔ.

5. Kɛ wa ma plɛ kɛ ná Baiblo kanemi kɛ e kasemi he se ha kɛɛ?

⁵ Loko wa ma ná Mawu Munyu ɔ he se wawɛɛ ɔ, e sɛ nɛ waa kane lɛ kɛfokɛfo, mohu ɔ, e sa nɛ waa to wa tsui si nɛ waa kase lɛ saminya, nɛ wa pue wa yi mi tɛ ngɛ he. Ke o na ngmami ko nɛ o nui sisi ɔ, koo je jamɛ a ngmami ɔ he. Mohu ɔ, moo ngɔ Watch Tower Publications Index ɔ loo Research Guide for Jehovah’s Witnesses ɔ kɛ hla níhi a mi ngɛ jamɛ a ngmami ɔ he. Ke o to o tsui si kɛ kase ní ɔ, o ma ná nɔ mi mami nɛ mi wa kaa Mawu Munyu ɔ ji anɔkuale. (1 Tɛs. 5:21) Ke o ná nɔ mi mami nɛ mi wa kaa Mawu Munyu ɔ ji  anɔkuale ɔ, lɔ ɔ ma ha nɛ o bua maa jɔ kaa o kɛ ni kpahi maa sɛɛ níhi nɛ o kase ɔ he ní.

MO DLA O HE SAMINYA KƐ HA FIƐƐMI NÍ TSUMI Ɔ

6. Mɛni he je nɛ e sa kaa wa dla wa he saminya loko waa ya fiɛɛmi ɔ?

⁶ Ke o dla o he saminya kɛ ha fiɛɛmi ɔ, e be hae nɛ o ye gbeye tsɔ ke o kɛ nihi ngɛ ní sɛɛe. Yesu ye bua e kaseli ɔmɛ kɛ dla a he loko e tsɔ mɛ kaa a ya fiɛɛ. (Luka 10:​1-11) Akɛnɛ kaseli ɔmɛ kɛ nɔ́ nɛ Yesu tsɔɔ mɛ ɔ tsu ní he je ɔ, a nyɛ nɛ a tsu fiɛɛmi ní tsumi ɔ kɛ pi si nɛ a bua jɔ.—Luka 10:17.

7. Kɛ wa ma plɛ kɛ dla wa he kɛ ha fiɛɛmi ní tsumi ɔ ha kɛɛ? (Hyɛ foni ɔ hulɔ.)

⁷ Kɛ wa ma plɛ kɛ dla wa he kɛ ha fiɛɛmi ní tsumi ɔ ha kɛɛ? E sa nɛ wa susu nɔ́ nɛ wa suɔ nɛ wa de ɔ he saminya, nɛ waa ngɔ wɔ nitsɛmɛ wa munyuhi kɛ tsu ní ke wa ngɛ munyu tue. Jehanɛ hu ɔ, wa ma nyɛ ma susu bɔ nɛ nihi nɛ a ngɛ wa kpɔ ɔ mi ɔ ma nyɛ maa pee a ní ha, nɛ waa kase bɔ nɛ wa ma ha mɛ heto ha. Kɛkɛ ɔ, ke waa kɛ nihi ngɛ ní sɛɛe ɔ, wa maa bɔ mɔde kaa wa maa to wa tsui si, wa ma je huɛ bɔmi su kpo, nɛ muɔ maa hi wa nya he.

8. Ngɛ mɛni blɔ nɔ nɛ Kristofohi ngɛ kaa zu buɛhi nɛ bɔfo Paulo tu he munyu ɔ?

⁸ Bɔfo Paulo de e nyɛmimɛ Kristofo ɔmɛ kaa “wa ngɛ juetli nɛ ɔ ngɛ zu buɛhi a mi.” (2 Kor. 4:7) Mɛni ji juetli nɛ ɔ? Lɔ ɔ ji Matsɛ Yemi ɔ sɛ gbi nɛ heɔ nɔ yi wami nɛ wa ngɛ fiɛɛe ɔ nɛ. (2 Kor. 4:1) Mɛni ji zu buɛ ɔmɛ ɔ? A daa si kɛ ha Mawu sɔmɔli nɛ a fiɛɛɔ sane kpakpa a kɛ haa nihi ɔ. Ngɛ Paulo be ɔ mi ɔ, jua yeli ngɔɔ ní komɛ nɛ a he hia kaa niye ní, wai, kɛ sika kɛ woɔ zu buɛhi a mi kɛ hiaa blɔ. Jã nɔuu kɛ̃ nɛ Yehowa ngɔ sɛ gbi ko nɛ he hia nɛ ji sane kpakpa a kɛ wo wa dɛ kaa waa fiɛɛ. Ngɛ Yehowa yemi buami nya a, wa ma nyɛ ma tsu ní tsumi nɛ ɔ kɛ pi si.

MOO SƆLE KONƐ O NÁ KÃ

9. Mɛni maa ye bua wɔ konɛ wa ko ye adesa gbeye? (Hyɛ foni ɔ hulɔ.)

⁹ Be komɛ ɔ, wa yeɔ adesa hɛ mi gbeye. Mɛni maa ye bua wɔ konɛ waa da nyagba nɛ ɔ nya? Mo susu sɔlemi ko nɛ bɔfo ɔmɛ sɔle benɛ a fã mɛ kaa a kpa fiɛɛmi ɔ he nɛ o hyɛ. A ha we nɛ sawale nɛ nu mɛ nɛ a kpa fiɛɛmi, mohu ɔ, a sɔle konɛ Yehowa nɛ ye bua mɛ nɛ a “ya nɔ nɛ [a] kɛ kã nɛ tu [e] munyu ɔ.” Yehowa ha a sɔlemi ɔ heto oya nɔuu. (Níts. 4:​18, 29, 31) Ke  wɔ hu wa yeɔ adesa hɛ mi gbeye be komɛ ɔ, e sa nɛ waa sɔle kɛ ha Yehowa nɛ e ye bua wɔ. Mo bi Yehowa nɛ e ye bua mo nɛ o ná suɔmi nɛ mi wa kɛ ha nihi konɛ o ko ye gbeye kaa o maa fiɛɛ sane kpakpa a kɛ ha mɛ.

10. Mɛni Yehowa peeɔ kɛ yeɔ buaa wɔ konɛ wa nyɛ nɛ waa ye e he odase? (Yesaya 43:​10-12)

¹⁰ Yehowa hla wɔ kaa e we Odasefohi, nɛ e wo si kaa e maa ye bua wɔ nɛ waa pee kã. (Kane Yesaya 43:​10-12.) Mo susu blɔ eywiɛ komɛ a nɔ nɛ e guɔ kɛ peeɔ jã a he nɛ o hyɛ. Kekleekle ɔ, be fɛɛ be nɛ wa maa fiɛɛ sane kpakpa a, Yesu piɛɛɔ wa he. (Mat. 28:​18-20) Enyɔne, Yehowa haa nɛ bɔfohi yeɔ buaa wɔ. (Kpoj. 14:6) Etɛne, Yehowa haa wɔ e mumi klɔuklɔu ɔ konɛ e kai wɔ níhi nɛ wa kase ɔ. (Yoh. 14:​25, 26) Eywiɛne, Yehowa ha wɔ nyɛmimɛ nyumuhi kɛ yihi nɛ a ye bua wɔ ngɛ fiɛɛmi mi. Akɛnɛ Yehowa kɛ wa nyɛmimɛ ɔmɛ suɔ wɔ nɛ a yeɔ buaa wɔ he je ɔ, wa ma nyɛ maa pee kã nɛ waa ya nɔ nɛ waa fiɛɛ.

KOO PEE KPƐII, MO NÁ JUƐMI NƐ DA

11. Ke o ngɛ fiɛɛmi mi ɔ, mɛni o ma nyɛ maa pee konɛ o na nihi babauu? (Hyɛ foni ɔ hulɔ.)

¹¹ Ke o ya fiɛɛmi nɛ o ya nɛ nihi fuu ɔ, anɛ o kɔni mi jɔ̃ɔ lo? Ke e ba jã a, mo bi o he ke: ‘Jije nihi nɛ a ngɛ ye zugba kpɔ ɔ mi ɔ ho?’ (Níts. 16:13) ‘Anɛ a ho ní tsumi ya aloo a ho jua ya?’ Ke jã ji sane ɔ, anɛ o ma nyɛ ma ya fiɛɛ ngɛ gbɛjegbɛ ɔmɛ a he kaa o maa na nihi fuu lo? Nyɛminyumu ko nɛ a tsɛɛ lɛ ke Joshua a de ke, “Ke i ngɛ nyɛɛe ngɛ hehi nɛ a juaa ní ngɛ, kɛ hehi nɛ nihi babauu ngɛ ɔ, i náa he blɔ kɛ fiɛɛɔ.” Joshua kɛ e yo Bridget ba na kaa ke a ya fiɛɛmi gbɔkuɛ kɛ Hɔgba piani ɔ, a pɔɔ nihi fuu nami ngɛ we mi.—Efe. 5:​15, 16.

12. Mɛni blɔ nɔ wa ma nyɛ maa gu kɛ le níhi nɛ nihi heɔ yeɔ loo níhi nɛ a bua jɔ he?

¹² Ke o na nɔ ko kekleekle be nɛ e bua jɔɛ sane kpakpa a he po ɔ, moo bɔ mɔde kaa o maa le nɔ́ nɛ nɔ ɔ heɔ yeɔ loo nɔ́ nɛ e bua jɔ he. Joshua kɛ Bridget ngɔɔ sane bimihi nɛ ngɛ wa dɛ womi ɔmɛ a hɛ mi ɔ kɛ jeɔ ní sɛɛmi sisi. Kaa nɔ hyɛmi nɔ́ ɔ, ke a ngɔ dɛ womi nɛ ji, Kɛ O Buu Baiblo ɔ Ha Kɛɛ? ɔ kɛ ngɛ ní tsue ɔ, a deɔ ke: “Nihi babauu susuɔ kaa Baiblo ɔ ji womi nɛ je Mawu ngɔ, se ni komɛ hu he we yi. Kɛ o susu kɛɛ?” Behi fuu ɔ, ke wa gu blɔ nɛ ɔ nɔ ɔ, e yeɔ buaa wɔ nɛ waa kɛ nihi jeɔ ní sɛɛmi sisi.

13. Ke wa fiɛɛ kɛ ha nihi se a bui wɔ tue po ɔ, mɛni he je nɛ wa ma nyɛ ma de ke wa ye manye ɔ? (Abɛ 27:11)

 ¹³ Ke nihi bui wɔ tue ngɛ fiɛɛmi mi po ɔ, loloolo ɔ, wa su oti nɛ ngɛ wa hɛ mi ɔ he. Mɛni he je? Ejakaa wa nyɛ nɛ wa ye nihi odase. Lɔ ɔ ji nɔ́ nɛ Yehowa kɛ e Bi ɔ suɔ kaa waa pee. (Níts. 10:42) Ke wa nɛ nɔ ko nɛ waa kɛ lɛ maa sɛɛ ní ngɛ fiɛɛmi mi, loo nihi bui wɔ tue po ɔ, wa bua jɔɔ, ejakaa wa le kaa wa pee wa hiɔwe Tsɛ ɔ suɔmi nya ní.—Kane Abɛ 27:11.

14. Ke fiɛɛlɔ ko ya na nɔ ko nɛ́ e bua jɔ sɛ gbi ɔ he ɔ, mɛni he je nɛ wa bua jɔɔ ɔ?

¹⁴ Jehanɛ hu ɔ, ke fiɛɛlɔ ko ya na nɔ ko nɛ́ e bua jɔ sɛ gbi ɔ he ɔ, wɔ hu wa bua jɔɔ. Hwɔɔmi Mɔ ɔ ngɔ fiɛɛmi ní tsumi ɔ kɛ to bɔ nɛ a hlaa jokuɛ ko nɛ laa a he. Nihi fuu sɛɛ ma a mi nɛ a hlaa jokuɛ ɔ ngɛ kpɔ fɛɛ kpɔ mi. Ke a na jokuɛ ɔ, pi nɔ nɛ na jokuɛ ɔ pɛ nɛ e bua jɔɔ, nɔ fɛɛ nɔ bua jɔɔ. Jã nɔuu kɛ̃ nɛ e ji ngɛ kaselɔ peemi ní tsumi ɔ blɔ fa mi. Nihi tsuo nɛ a ngɛ asafo ɔ mi ɔ yeɔ buaa kɛ peeɔ ni hehi Yesu kaseli. E ma bi nɛ nɔ fɛɛ nɔ ngɛ asafo ɔ mi ɔ nɛ ye bua konɛ wa nyɛ nɛ waa fiɛɛ kɛ ha nihi tsuo nɛ a ngɛ zugba kpɔ ɔ mi ɔ. Ke nɔ he ko bɔni asafo mi kpe bami ɔ, wɔ tsuo wa bua jɔɔ.

NGƆƆ O JUƐMI KƐ MA SUƆMI NƐ O NGƐ KƐ HA YEHOWA KƐ NI KPAHI Ɔ NƆ

15. Mɛni blɔ nɔ nɛ ke wa ngɔ Mateo 22:​37-39 ɔ kɛ tsu ní ɔ, e maa ye bua wɔ konɛ waa ya nɔ nɛ wa tsu fiɛɛmi ní tsumi ɔ kɛ bua jɔmi? (Hyɛ foni ɔ hulɔ.)

¹⁵ Ke wa ngɔ wa juɛmi kɛ ma suɔmi nɛ wa ngɛ kɛ ha Yehowa kɛ ni kpahi ɔ nɔ ɔ, lɔ ɔ ma ha nɛ waa kɛ bua jɔmi ma tsu fiɛɛmi ní tsumi ɔ. (Kane Mateo 22:​37-39.) Hyɛ bɔ nɛ Yehowa bua maa jɔ ha ke e na kaa wa ngɛ ní tsumi nɛ e kɛ wo wa dɛ ɔ tsue ɔ. Jehanɛ hu ɔ, ke waa kɛ nihi bɔni Baiblo ɔ kasemi ɔ, a bua maa jɔ wawɛɛ! Mo kai nihi nɛ a buɔ wa sɛ gbi ɔ tue, nɛ a suɔ kaa a ma sɔmɔ Yehowa a ma nyɛ ma ná neneene wami.—Yoh. 6:40; 1 Tim. 4:16.

16. Mɛni ma nyɛ maa ye bua wɔ konɛ waa kɛ bua jɔmi nɛ tsu fiɛɛmi ní tsumi ɔ ke wa tlɔ we mi? Mo ha enɛ ɔ he nɔ hyɛmi nɔ́.

¹⁶ Anɛ o tlɔ we mi ngɛ yi mi tomi komɛ a he je nɛ o nyɛ we kpo jemi lo? Ke jã a, moo ngɔ o juɛmi kɛ ma níhi nɛ o ma nyɛ maa pee kɛ tsɔɔ kaa o suɔ Yehowa kɛ ni kpahi ɔ nɔ. Ngɛ COVID-19 be ɔ mi ɔ, Samuel kɛ Dania tlɔ we mi nɛ a nyɛ we kpo jemi. Ngɛ behi nɛ a mi wa kaa jã a mi ɔ, a ya nɔ nɛ a ye odase kɛ gu tɛlifoo kɛ sɛ womi ngmami nɔ, nɛ a kɛ nihi kase Baiblo ɔ ngɛ Zoom nɔ. Samuel ná kansa, nɛ be  fɛɛ be nɛ e maa ya hiɔ tsami he ɔ, e yeɔ nihi nɛ e maa na mɛ ɔ odase. E de ke: “Ke waa kɛ haomihi ngɛ kpee ɔ, wa yeɔ tsui nɛ pɔ tɔɔ wa he, nɛ enɛ ɔ ma nyɛ maa ka wa hemi kɛ yemi ɔ. Se wa ma nyɛ ma ná bua jɔmi ngɛ Yehowa sɔmɔmi mi.” Be mi nɛ Samuel kɛ haomi nɛ ɔ ngɛ kpee ɔ, Dania hu nɔ si. Enɛ ɔ ha nɛ e tlɔ tsu mi nyɔhiɔ etɛ. Lɔ ɔ se ɔ, e he ba hia nɛ e hi wheelchair mi nyɔhiɔ ekpa sɔuu. Dania de ke: “I bɔ mɔde kaa ma pee nɔ́ nɛ ye si fɔfɔɛ maa ngmɛ mi blɔ kaa ma pee ɔ. I nyɛ nɛ i ye nɛɛsi ko nɛ ba slaa mi ɔ odase, nɛ i fiɛɛɔ kɛ haa nihi nɛ a ngɔɔ níhi kɛ ba haa wɔ ngɛ we ɔ mi ɔ. I kɛ yo ko nɛ e tsuɔ ní kɛ haa ní tsumi he ko nɛ a peeɔ tsopa a sɛɛɔ ní ngɛ tɛlifoo nɔ.” Samuel kɛ Dania si fɔfɔɛ ɔ he je ɔ, a nyɛ we nɛ a pee babauu ngɛ Yehowa sɔmɔmi mi, se a pee nɔ́ fɛɛ nɔ́ nɛ a ma nyɛ, nɛ lɔ ɔ ha nɛ a bua jɔ wawɛɛ.

17. Mɛni maa ye bua mo konɛ o ná ga womi slɔɔtohi nɛ wa susu he ngɛ ní kasemi nɛ ɔ mi ɔ he se kɛ pi si?

¹⁷ Ngɛ anɔkuale mi ɔ, loko wa ma nyɛ ma ná ga womihi nɛ wa kase ngɛ ní kasemi nɛ ɔ mi ɔ he se ɔ, ja wa ngɔ tsuo kɛ tsu ní. Ga womi nɛ ɔmɛ eko fɛɛ eko ngɛ kaa níhi nɛ a kɛ hooɔ ní. Ke a bla ní nɛ ɔmɛ saminya kɛ hoo ní ɔ, e maa ngɔ wawɛɛ. Jã kɛ̃ nɛ ke waa kɛ ga womihi tsuo nɛ wa kase ɔ tsu ní ɔ, e maa ye bua wɔ nɛ waa ye susumi nɛ dɛ nɔ kunimi konɛ wa bua nɛ jɔ wawɛɛ ngɛ fiɛɛmi mi.