1. Mɛni ji mumi mi paradeiso ɔ, nɛ mɛni e sa nɛ waa fia wa pɛɛ si kaa wa maa pee?

 PARADEISO ko ngɛ zugba a nɔ amlɔ nɛ ɔ, nɛ nihi nɛ a ngɛ mi ɔ kɛ hɛdɔ ngɛ ní kpakpahi tsue. Nimli ayɔhi abɔ nɛ a ngɛ paradeiso nɛ ɔ mi ɔ ngɛ tue mi jɔmi nitsɛnitsɛ. Nihi nɛ a ngɛ paradeiso nɛ ɔ mi ɔ fia a pɛɛ si kaa a be mi jee gblegbleegble. Jehanɛ hu ɔ, a suɔ nɛ nihi babauu nɛ a ba piɛɛ a he ngɛ si himi nɛ se be nɛ ɔ mi. Mɛni paradeiso he munyu lɛ wa ngɛ tue ɔ? Lɔ ɔ ji mumi mi paradeiso a ɔ nɛ!

2. Mɛni lɛ sa kadimi ngɛ mumi mi paradeiso ɔ he?

² E ngɛ mi kaa wa ngɛ Satan je yaya nɛ ninyɛ hyi lɛ tɔ ɔ mi mohu lɛɛ, se Yehowa ha nɛ tue mi jɔmi kɛ kake peemi ngɛ e we bi a kpɛti. Enɛ ɔ sa kadimi wawɛɛ! (1 Yoh. 5:19; Kpoj. 12:12) Wa Mawu nɛ e ngɛ suɔmi ɔ naa ní yayahi nɛ ngɛ nɔ yae ngɛ je ɔ mi ɔ, enɛ ɔ he ɔ, e poɔ e sɔmɔli a he piɛ konɛ a ya nɔ nɛ a sɔmɔ lɛ kɛ bua jɔmi. Mawu Munyu ɔ tsɔɔ kaa mumi mi paradeiso ɔ ngɛ kaa “wesa he,” loo “abɔɔ kɛ e mi nyu babauu.” (Yes. 4:6; 58:11) Yehowa jɔɔ nihi nɛ a ngɛ mumi mi paradeiso ɔ mi ɔ wawɛɛ. Enɛ ɔ he ɔ, e ngɛ mi kaa wa ngɛ nyagbe ligbi ɔmɛ a mi mohu lɛɛ, se wa ngɛ slɔkee nɛ wa bua jɔɔ wa he.—Yes. 54:14; 2 Tim. 3:1.

3. Ngɛ mɛni blɔ nɔ nɛ Yesaya 65 ɔ ba mi blema?

 ³ Yehowa gu gbalɔ Yesaya nɔ nɛ e ha nɛ wa le bɔ nɛ si himi maa hi ha ngɛ mumi mi paradeiso ɔ mi. Wa maa na bɔ nɛ a tu si himi nɛ ɔ he munyu ha ngɛ Yesaya yi 65 ɔ mi. Gbami nɛ ɔ fã ko ba mi ngɛ jeha 537 loko a fɔ Kristo. Ngɛ jamɛ a be ɔ mi ɔ, a ngmɛɛ Yuda bi nɛ a ngɛ nyɔguɛ tso mi ngɛ Babilon nɛ a tsake a tsui ɔ a he, nɛ a kpale kɛ ho Yerusalem ya. Yehowa jɔɔ e we bi nɛ e ye bua mɛ nɛ a dla Yerusalem ma nɛ hɛ mi kpata a, nɛ a ma sɔlemi we ɔ ekohu konɛ Israel bi ɔmɛ nɛ a nyɛ nɛ a ja lɛ ngɛ lejɛ ɔ.—Yes. 51:11; Zak. 8:3.

4. Mɛni blɔ nɔ nɛ Yesaya 65 ɔ ngɛ mi bae ngɛ wa be nɛ ɔ mi?

⁴ Yesaya gbami ɔ mi bami enyɔne ɔ je sisi kɛ je jeha 1919. Ngɛ jamɛ a jeha a mi ɔ, Yehowa we bi nɛ a ngɛ mwɔnɛ ɔ ye a he ngɛ Babilon Ngua a he. Kɛ je lɔ ɔ se ɔ, mumi mi paradeiso ɔ mi bɔni blimi bɔɔbɔɔbɔɔ. Fiɛɛli nɛ a ngɛ kã a to asafohi fuu sisi, nɛ a je su kpakpahi kpo. Nyumuhi kɛ yihi nɛ be ko nɛ be ɔ, a peeɔ yi wu tsu ní nɛ a kɛ a he wo je mi bami yaya mi ɔ “wo su ehe ɔ nɛ a bɔ ngɛ Mawu suɔmi nya” a. (Efe. 4:24) Ngɛ anɔkuale mi ɔ, jɔɔmihi fuu nɛ Yesaya tu he munyu ɔ maa ba mi nitsɛnitsɛ ngɛ je ehe ɔ mi. Amlɔ nɛ ɔ po ɔ, wa náa jɔɔmihi babauu ngɛ mumi mi paradeiso ɔ mi. Nyɛ ha nɛ wa susu bɔ nɛ wa náa mumi mi paradeiso ɔ he se ha a he, kɛ nɔ́ he je nɛ e sa nɛ waa ya nɔ nɛ waa hi mi.

NÍHI NƐ KADIƆ NIHI NƐ A NGƐ MUMI MI PARADEISO Ɔ MI

5. Ngɛ Yesaya 65:13 ɔ nya a, mɛni jɔɔmihi wa náa ngɛ mumi mi paradeiso ɔ mi?

⁵ Wa nine suɔ mumi mi niye ní kpakpa nɔ. Yesaya gbami ɔ ha nɛ wa na kaa slɔɔto agbo ngɛ nihi nɛ a ngɛ mumi mi paradeiso ɔ mi kɛ nihi nɛ a be mi ɔ a kpɛti. (Kane Yesaya 65:13.) Yehowa haa e sɔmɔli níhi nɛ a hia konɛ huɛ bɔmi kpakpa nɛ hi a kɛ lɛ a kpɛti daa. E ha wɔ e mumi klɔuklɔu ɔ, e Munyu nɛ ji Baiblo ɔ kɛ asafo ɔ womihi babauu. E pee jã konɛ ‘wa ná ní nɛ waa ye, wa ná nyu nɛ waa nu, nɛ wa nya.’ (Kɛ to Kpo Jemi 22:17 ɔ he.) Se nihi nɛ a be mumi mi paradeiso ɔ mi ɔ lɛɛ ‘hwɔ maa gbe mɛ, kuma maa gbe mɛ nɛ zo maa gbe mɛ’ ejakaa a li Mawu.—Amos 8:11.

6. Mɛni Yoel 2:​21-24 ɔ de ngɛ nike níhi nɛ Yehowa haa wɔ ɔ he, nɛ kɛ a maa ye bua wɔ ha kɛɛ?

⁶ Ngɛ Yoel gbami ɔ mi ɔ, e ngɔ niye ní komɛ kaa ngma, wai kɛ oliv nu kɛ tsu ní kɛ tsɔɔ kaa Yehowa jeɔ mi mi jɔmi mi nɛ e haa e we bi níhi tsuo nɛ a hia konɛ a hemi kɛ yemi ɔ mi nɛ wa. (Yoel 2:​21-24) E peeɔ jã kɛ guɔ Baiblo ɔ, asafo ɔ womi ɔmɛ, wa wɛbsaiti ɔ, asafo mi kpehi, kpɔ mi kpehi kɛ kpokpa nɔ kpehi a nɔ. Wa ma nyɛ ma ná ní nɛ ɔmɛ a he se be fɛɛ be konɛ waa wa ngɛ mumi mi nɛ wa he nɛ jɔ wɔ wawɛɛ.

7. Mɛni lɛ haa nɛ wa ‘tsui nɔɔ wa mi’? (Yesaya 65:14)

⁷ Wa ngɛ bua jɔmi nɛ wa tsui hu nɔ wa mi. Mawu we bi “ma la kɛ bua jɔmi” ejakaa a bua jɔ níhi nɛ Yehowa peeɔ kɛ haa mɛ ɔ a he. Baiblo ɔ de ke: “Hyɛ! Ye sɔmɔli ɔmɛ ma la kɛ bua jɔmi ejakaa a tsui nɔ a mi, se nyɛɛ lɛɛ nyɛ ma fo ya akɛnɛ nyɛ tsui ngɛ nyɛ yee ɔ he je, nɛ nyɛ maa ye kɔmɔ akɛnɛ nyɛ hao ɔ he je.” (Yesaya 65:​14, NW) Baiblo ɔ mi anɔkualehi nɛ woɔ nɔ he wami kɛ Baiblo ɔ mi si womihi nɛ woɔ nɔ bua, kɛ hwɔɔ se he hɛ kɛ nɔ fɔmi nɛ wa ngɛ ngɛ Kristo kpɔmi afɔle sami ɔ mi ɔ haa nɛ wa ‘tsui nɔɔ wa mi.’ Ke waa kɛ wa nyɛmimɛ Kristofohi sɛɛ ní nɛ ɔmɛ a he ní ɔ, e ma ha nɛ wa bua maa jɔ wawɛɛ!—La 34:8; 133:​1-3.

8. Mɛni níhi titli enyɔ lɛ kadiɔ Yehowa we bi nɛ a ngɛ mumi mi paradeiso ɔ mi ɔ?

⁸ Níhi titli enyɔ nɛ́ kadiɔ Yehowa we bi nɛ a  ngɛ mumi mi paradeiso ɔ mi ɔ ji suɔmi kɛ kake peemi nɛ ngɛ a kpɛti ɔ. “Kake peemi nɛ ye mluku” nɛ ɔ haa nɛ wa naa bɔ nɛ si himi ɔ maa hi ha ngɛ je ehe ɔ mi. Ngɛ je ehe ɔ mi ɔ, suɔmi kɛ kake peemi nɛ maa hi Mawu we bi a kpɛti ɔ mi maa wa wawɛɛ pe bɔ nɛ e ngɛ ha mwɔnɛ ɔ. (Kol. 3:14) Kekleekle be nɛ nyɛmiyo ko kɛ Yehowa we bi kpe ɔ, e tsɔɔ nɔ́ ko nɛ e yɔse ngɛ a he. E de ke: “Imi nitsɛ i be bua jɔmi, nɛ ye weku ɔ mi hu ɔ, bua jɔmi be mi. Kekleekle be nɛ i na kaa nihi ngɛ suɔmi nitsɛnitsɛ kpo jee kɛ tsɔɔ a sibi ji benɛ i kɛ Yehowa Odasefo ɔmɛ kpe.” Nɔ fɛɛ nɔ nɛ e suɔ kaa e ná bua jɔmi nitsɛnitsɛ, nɛ́ e bua nɛ jɔ níhi nɛ e ngɛ ɔ he ɔ, e sa nɛ e ba piɛɛ wa he ngɛ mumi mi paradeiso ɔ mi. Ngɛ bɔ nɛ nihi nɛ a ngɛ je ɔ mi ɔ naa wɔ ha a tsuo se ɔ, wa ngɛ biɛ kpakpa ngɛ Yehowa kɛ wa nyɛmimɛ ɔmɛ tsuo a hɛ mi.—Yes. 65:15.

9. Mɛni Yesaya 65:​16, 17 ɔ wo si kaa Yehowa maa pee ngɛ níhi nɛ haa nɛ wa haoɔ ɔ he?

⁹ Wa ngɛ he jɔmi. Yesaya 65:14 ɔ tsɔɔ kaa nihi nɛ a be mumi mi paradeiso ɔ mi ɔ ‘ma fo ya, akɛnɛ a tsui ngɛ mɛ yee ɔ he je, nɛ a maa ye kɔmɔ, akɛnɛ a hao ɔ he je.’ Se níhi tsuo nɛ haa nɛ Mawu we bi haoɔ nɛ a yeɔ tsui ɔ hu nɛɛ? E be kɛe nɛ jamɛ a ní ɔmɛ ‘maa be kɛ ho, nɛ a be kaie hu, nɛ Mawu hɛ maa je a nɔ pɛsɛpɛsɛ.’ (Kane Yesaya 65:​16, 17.) Yehowa ma je wa nyagba amɛ tsuo kɛ je, nɛ bɔɔbɔɔbɔɔ ɔ, wa be nyagba nɛ ɔmɛ kaie hu.

10. Mɛni he je nɛ e ji he blɔ ngua nɛ o ná kaa o piɛɛ o nyɛmimɛ ɔmɛ a he kɛ ngɛ Yehowa sɔmɔe ɔ? (Hyɛ foni ɔ hulɔ.)

¹⁰ Amlɔ nɛ ɔ po ɔ, asafo mi kpehi nɛ wa yaa a haa nɛ wa tsui nɔɔ wa mi. Ke wa ya asafo mi kpe ɔ, e yeɔ bua wɔ nɛ wa susuu we níhi nɛ haa nɛ wa haoɔ ngɛ je yaya nɛ ɔ mi ɔ a he. Ke wa wo Mawu mumi ɔ yiblii ɔ nɛ ji suɔmi, bua jɔmi, tue mi jɔmi, mi mi jɔmi kɛ he jɔmi ɔ, lɔ ɔ maa ye bua wa nyɛmimɛ ɔmɛ konɛ a tsui nɛ nɔ a mi. (Gal. 5:​22, 23) E ji he blɔ ngua nɛ wa ná kaa wa piɛɛ Mawu we bi a he! Mawu wo si kaa e maa pee “hiɔwe he kɛ zugba he.” Nihi nɛ a maa ya nɔ maa hi mumi mi paradeiso ɔ mi ɔ maa na si womi nɛ ɔ mi bami.

11. Ngɛ Yesaya 65:​18, 19 ɔ nya a, mɛni nɛ e sa kaa mumi mi paradeiso ɔ nɛ Yehowa to he blɔ nya a nɛ wo wɔ he wami nɛ waa pee?

¹¹ Wa ngɛ bua jɔmi wawɛɛ. Yesaya ya nɔ nɛ e tsɔɔ nɔ́ he je nɛ e sa nɛ wa ‘nya, nɛ wa bua nɛ jɔ’ ngɛ mumi mi paradeiso ɔ mi ɔ. Yehowa lɛ to mumi mi paradeiso ɔ he blɔ nya. (Kane Yesaya 65:​18, 19.) Enɛ ɔ he ɔ, e be nyakpɛ kaa Yehowa ngɛ wa nɔ gue kɛ ngɛ nihi nɛ a ngɛ je yaya nɛ ɔ mi ɔ ye buae konɛ a ba piɛɛ  wa he ngɛ mumi mi paradeiso nɛ e mi ngɛ fɛu ɔ mi! Wa bua jɔ wawɛɛ kaa Yehowa ngɛ wɔ jɔɔe akɛnɛ wa ngɛ anɔkuale ɔ mi ɔ he je. Enɛ ɔ he ɔ, waa kɛ kã tuɔ jɔɔmi nɛ ɔmɛ a he munyu kɛ tsɔɔ ni kpahi.—Yer. 31:12.

12. Kɛ si womihi nɛ ngɛ Yesaya 65:​20-24 ɔ haa nɛ o nuɔ he ha kɛɛ, nɛ mɛni he je?

¹² Jehanɛ hu ɔ, wa bua jɔ wawɛɛ kaa huɛ bɔmi kpakpa nɛ ngɛ waa kɛ Yehowa wa kpɛti ɔ ha nɛ wa ba ná hɛ nɔ kami. Mo susu níhi nɛ o maa na kɛ níhi nɛ o maa pee ngɛ Mawu je ehe ɔ mi ɔ he nɛ o hyɛ! Baiblo ɔ wo si ke: “Bimwɔyo be gboe hu; nɔmoyo hu be gboe loko e be maa su.” Wa ‘maa po wehi, nɛ wɔ nitsɛmɛ wa maa hi mi; wa maa pee wai ngmɔhi, nɛ wɔ nitsɛmɛ wa maa ye a mi yiblii.’ Wa “be yaka dengme gboe” ejakaa ‘Yehowa maa jɔɔ wɔ.’ Yehowa wo si kaa e ma ha nɛ waa hi si slɔkee, nɛ e ma ha wɔ wa hiami níhi tsuo. ‘Loko wa ma tsɛ lɛ ɔ,’ e le wa hiami níhi momo, e ma ha ‘nɔ́ fɛɛ nɔ́ nɛ ngɛ wami mi ɔ maa tɔ, nɛ a ma ná nɔ́ nɛ a suɔ.’—Yes. 65:​20-24; La 145:16.

13. Kɛ Yesaya 65:25 ɔ kale tsakemihi nɛ ni komɛ pee ngɛ a si himi mi benɛ a bɔni Yehowa sɔmɔmi ɔ ha kɛɛ?

¹³ Wa ngɛ slɔkee nɛ wa ngɛ tue mi jɔmi. Mawu mumi ɔ ye bua nihi babauu nɛ́ jinɛ be ko nɛ be ɔ, a ji yiwutsotsɛmɛ nɛ a yi anɔkuale ɔ nɛ a nyɛ nɛ a pee tsakemi nguahi ngɛ a si himi mi. (Kane Yesaya 65:25.) A bɔ mɔde wawɛɛ nɛ a ngmɛɛ su yayahi nɛ a ngɛ ɔ he. (Rom. 12:2; Efe. 4:​22-24) Akɛnɛ Mawu we bi yi mluku he je ɔ, a tɔ̃ɔ be komɛ. Se ngɛ enɛ ɔ tsuo se ɔ, Yehowa ha nɛ “nimli slɔɔtohi tsuo” pee kake, nɛ tue mi jɔmi kɛ suɔmi nitsɛnitsɛ ngɛ a kpɛti. (Tito 2:11) Mawu ope ɔ pɛ lɛ ma nyɛ maa pee nyakpɛ nɔ́ nɛ ɔ!

14. Kɛ Yesaya 65:25 ɔ ba mi ngɛ nyɛminyumu ko blɔ fa mi ha kɛɛ?

¹⁴ Anɛ nihi ma nyɛ ma tsake a subai niinɛ lo? Mo susu níhi a si kpami nɛ ɔ he nɛ o hyɛ. A wo niheyo ko tsu si abɔ loko e ye jeha 20. E kɛ e he wo je mi bami yaya kɛ yi wu tso ní peepeehi a mi. Akɛnɛ e ju lɔle kɛ ní kpahi, nɛ e pee yi wu tso níhi hu he je nɛ a wo lɛ tsu si abɔ ɔ nɛ. Be fɛɛ be ɔ, e pee klaalo kaa e kɛ nihi maa nɔ kunɔ. Se benɛ e bɔni anɔkualehi nɛ ngɛ Baiblo ɔ mi ɔ kasemi, nɛ e bɔni asafo mi kpehi nɛ Yehowa Odasefo ɔmɛ peeɔ ɔ yami pɛ, kɛkɛ nɛ e ná nɔ mi mami kaa e na nɔ́ ko nɛ he hia ngɛ si himi mi, nɛ ji kaa e ma sɔmɔ Yehowa ngɛ mumi mi paradeiso ɔ mi. Benɛ a baptisi lɛ se ɔ, e susuɔ bɔ nɛ Yesaya 65:25 ɔ ba mi ngɛ e blɔ fa mi ha a he. Jinɛ be ko nɛ be ɔ, e peeɔ e ní kaa jata, se amlɔ nɛ ɔ, e tsake nɛ e peeɔ ní kaa jijɔ nɛ he jɔ.

15. Mɛni he je nɛ wa suɔ nɛ waa ye bua nihi babauu nɛ a ba piɛɛ wa he ngɛ mumi mi paradeiso ɔ mi, nɛ mɛni blɔ nɔ wa ma nyɛ maa gu kɛ pee jã?

¹⁵ Yesaya 65:13 ɔ je sisi ke: ‘Imi Nyɔmtsɛ Yehowa, i ngɛ dee ke.’ Kuku 25 ɔ mwɔ nya ke, ‘Imi Yehowa lɛ i de.’ Ngɛ anɔkuale mi ɔ, Yehowa munyu baa mi be fɛɛ be. (Yes. 55:​10, 11) Mumi mi paradeiso ɔ ji nɔ́ nitsɛ nɛ ngɛ momo. Yehowa ha nɛ wa pee kaa weku ko nɛ ngɛ slɔɔto. Wa ma nyɛ ma ná tue mi jɔmi ngɛ Yehowa we bi a kpɛti nɛ waa nu he kaa wa ngɛ slɔkee ngɛ je nɛ basabasa peemi yi lɛ tɔ nɛ ɔ mi. (La 72:7) Enɛ ɔ he ɔ, wa suɔ nɛ waa ye bua nihi babauu konɛ a ba piɛɛ wa he ngɛ mumi mi paradeiso ɔ mi. Wa ma nyɛ maa pee jã ke wa ngɔ wa juɛmi kɛ ma kaselɔ peemi ní tsumi ɔ nɔ.—Mat. 28:​19, 20.

BƆ NƐ WA MA PLƐ KƐ YE BUA NIHI KONƐ A BA MUMI MI PARADEISO Ɔ MI

16. Mɛni ma nyɛ maa ye bua nihi konɛ a ba piɛɛ wa he ngɛ mumi mi paradeiso ɔ mi?

¹⁶ Wa kpɛti nɔ fɛɛ nɔ ngɛ blɔ nya ní tsumi ko nɛ e sa kaa e tsu kɛ ye bua nihi konɛ a ba piɛɛ  wa he ngɛ mumi mi paradeiso ɔ mi. Wa ma nyɛ ma tsu blɔ nya ní tsumi nɛ ɔ ke wa kase Yehowa. Yehowa nyɛ we nihi a nɔ kaa a ba e we asafo ɔ mi. Mohu ɔ, e ‘gblaa’ nihi bɔɔbɔɔbɔɔ kɛ baa e ngɔ. (Yoh. 6:44; Yer. 31:3) Tsui kpakpatsɛmɛ nɛ a kaseɔ Yehowa suɔmi ɔ kɛ su kpakpahi nɛ e ngɛ ɔ he ní ɔ hɛɔ kɛ suɔ e he. Mɛni blɔ nɔ nɛ wa su, kɛ wa je mi bami kpakpa a gblaa nihi kɛ baa mumi mi paradeiso ɔ mi?

17. Mɛni wa ma nyɛ maa pee konɛ ni kpahi nɛ a ba piɛɛ wa he ngɛ mumi mi paradeiso ɔ mi?

¹⁷ Nɔ́ kake nɛ ma nyɛ maa gbla nihi kɛ ba mumi mi paradeiso ɔ mi ji kaa wa ma je suɔmi kɛ mi mi jɔmi kpo kɛ tsɔɔ wa nyɛmimɛ ɔmɛ. Ke ni hehi ba wa asafo mi kpe ɔmɛ ɔ, wa suɔ nɛ a nu he kaa bɔ nɛ eko ɔ, nihi nɛ a he we yi nɛ a ya kpehi nɛ a pee ngɛ blema Korinto ɔ nu he ɔ. A de ke: “Mawu ngɛ nyɛ kpɛti niinɛ.” (1 Kor. 14:​24, 25; Zak. 8:23) Enɛ ɔ he ɔ, e sa nɛ waa kɛ ga womi nɛ ji “nyɛɛ kɛ nyɛ sibi nɛ hi si ngɛ tue mi jɔmi mi” ɔ nɛ tsu ní.—1 Tɛs. 5:13.

18. Mɛni ma nyɛ maa gbla nihi kɛ ba mumi mi paradeiso ɔ mi?

¹⁸ E sa nɛ waa bɔ mɔde nɛ waa na wa nyɛmimɛ ɔmɛ kaa bɔ nɛ Yehowa naa mɛ ɔ be fɛɛ be. Wa ma nyɛ maa pee jã ke wa ngɔ wa juɛmi kɛ ma a su kpakpahi a nɔ, se pi a gbɔjɔmihi nɛ be si hie daa a nɔ. Ke wa jeɔ ‘mi mi jɔmi kpo kɛ tsɔɔ wa sibi, nɛ wa mi mi sãa wɔ ngɛ wa sibi a he, nɛ wa ngɔɔ wa sibi a tɔmi kɛ paa mɛ faa a,’ lɔ ɔ maa ye bua wɔ nɛ ke pɛ ko ba waa kɛ wa nyɛmimɛ ɔmɛ wa kpɛti ɔ, wa maa je suɔmi mi kɛ dla. (Efe. 4:32) Ke wa pee jã a, wa mumi mi paradeiso ɔ ma jlo nihi nɛ a suɔ kaa a je suɔmi kpo kɛ tsɔɔ mɛ ɔ. b

 YAA NƆ NƐ O HI MUMI MI PARADEISO Ɔ MI

19. (a) Kaa bɔ nɛ daka nɛ ji, “ A Je Nɛ A Kpale Kɛ Ba” a tsɔɔ ɔ, mɛni ni komɛ de benɛ a kpale kɛ ba mumi mi paradeiso ɔ mi ɔ? (b) Mɛni nɛ e sa kaa waa fia wa pɛɛ si kaa wa maa pee? (Hyɛ foni ɔ hulɔ.)

¹⁹ Ngɛ anɔkuale mi ɔ, wa bua jɔ mumi mi paradeiso ɔ he saminya! E mi ngɛ fɛu saminya pe be ko nɛ be ɔ, nɛ nihi babauu hu ngɛ mi bae pe be ko nɛ be ɔ. Nyɛ ha nɛ wɔ tsuo waa ya nɔ nɛ wa bua nɛ jɔ mumi mi paradeiso nɛ Yehowa to he blɔ nya kɛ ha wɔ ɔ he. Ke nɔ ko suɔ nɛ e ye mumi mi niye ní kpakpa, e bua nɛ jɔ, e he nɛ jɔ lɛ, nɛ e hi slɔkee ɔ, lɛɛ e sa nɛ e ba mumi mi paradeiso ɔ mi, nɛ e ko je mi kɔkɔɔkɔ! O hɛ mi nɛ kã si wawɛɛ, ejakaa Satan ngɛ mɔde bɔe kaa e maa sisi wɔ nɛ waa je mi. (1 Pet. 5:8; Kpoj. 12:9) E sɛ nɛ wa ha nɛ e ye manye gblee. Nyɛ ha nɛ wɔ tsuo waa ya nɔ nɛ wa ha nɛ wa mumi mi paradeiso ɔ mi nɛ pee fɛu nɛ e mi nɛ tsɔ, nɛ waa po tue mi jɔmi nɛ ngɛ mi ɔ he piɛ.