1. Mɛni nɛ Yehowa suɔ nɛ waa pee?

 NÍHI fuu haa nɛ huno kɛ yo náa bua jɔmi. Ní nɛ ɔmɛ a kpɛti kake ji ke a fɔ bi nɛ e ngɛ nɔmlɔ tso mi he wami kpakpa. E ngɛ mi kaa fɔli suɔ a bi ɔ mohu lɛɛ, se a be suɔe nɛ e hi bimwɔyo mi daa. Ngɛ anɔkuale mi ɔ, ke jokuɛ ɔ tlɔ jã nɛ e wɛ gblee ɔ, a maa hao wawɛɛ. Jã nɔuu kɛ̃ nɛ ke wa bɔni Yehowa he ní kasemi pɛ ɔ, e bua jɔɔ, se e sume nɛ waa tlɔ he kake. (1 Kor. 3:1) Mohu ɔ, e suɔ nɛ waa pee Kristofohi “nɛ a wa saminya.”—1 Kor. 14:20.

2. Mɛni he wa ma susu ngɛ ní kasemi nɛ ɔ mi?

² Ke a ke waa pee Kristofohi nɛ a wa saminya a, mɛni e tsɔɔ? Mɛni wa ma nyɛ maa pee konɛ waa pee Kristofohi nɛ a nane pi si? Mɛni blɔ nɔ nɛ Baiblo ɔ mi anɔkualehi nɛ a mi kuɔ nɛ wa maa kase ɔ maa ye bua wɔ nɛ waa wa ngɛ mumi mi? Mɛni he je nɛ e sɛ nɛ wa he wa he nɛ waa ye tsɔ ɔ? Wa maa na sane bimi nɛ ɔmɛ a heto ngɛ ní kasemi nɛ ɔ mi.

KE A KE WAA PEE KRISTOFOHI NƐ A WA SAMINYA A, MƐNI E TSƆƆ?

3. Ke a ke waa pee Kristofohi nɛ a wa saminya a, mɛni e tsɔɔ?

³ Ngɛ Baiblo ɔ mi ɔ, Hela munyu nɛ a tsɔɔ sisi ke “wa saminya” a hu ma nyɛ maa tsɔɔ “nɔkɔtɔma.” (1 Kor. 2:6) Enɛ ɔ he ɔ, kaa bɔ nɛ bimwɔyo waa bɔɔbɔɔbɔɔ nɛ e ba peeɔ nɔkɔtɔma a, jã nɔuu kɛ̃ nɛ e sa nɛ wɔ hu waa ya nɔ nɛ waa wa ngɛ mumi mi. Ngɛ anɔkuale mi ɔ, ke wa su oti nɛ ɔ he po ɔ, e sɛ nɛ wa susu kaa wa gbe nya, mohu ɔ, e sa nɛ waa hi wa he mɔde bɔe. (1 Tim. 4:15) Wa wa jio, wa wɛ jio, wɔ tsuo wa ma nyɛ maa pee Kristofohi nɛ a nane pi si. Se kɛ wa ma plɛ kɛ le kaa nɔ ko wa ngɛ Mawu jami mi ha kɛɛ?

4. Mɛni tsɔɔ kaa Kristofo no ko nane pi si ngɛ Mawu jami mi?

⁴ Kristofo no nɛ e nane pi si ngɛ Mawu jami mi ɔ peeɔ nɔ́ fɛɛ nɔ́ nɛ Yehowa suɔ kaa e pee ke e bua jɔɛ he po. Ngɛ anɔkuale mi ɔ, akɛnɛ wa yi mluku he je ɔ, e ma tɔ̃ be komɛ. Se kɛ̃ ɔ, be  fɛɛ be ɔ, e bɔɔ mɔde kaa e ma ha nɛ e susumi kɛ e ní peepee kɛ Mawu suɔmi nya ní nɛ kɔ. E woɔ su ehe ɔ, nɛ be fɛɛ be ɔ, e bɔɔ mɔde kaa e ma susu níhi a he kaa bɔ nɛ Mawu peeɔ ɔ. (Efe. 4:​22-24) Jehanɛ hu ɔ, e bɔɔ mɔde kaa e ma susu Yehowa mlaa amɛ kɛ e sisi tomi mlaa amɛ a he konɛ e mwɔ yi mi kpɔhi nɛ da. Enɛ ɔ he ɔ, e he hia we nɛ a wo lɛ mlaahi fuu ngɛ nɔ́ nɛ e sa kaa e pee ɔ he. Ke e mwɔ yi mi kpɔ ko ɔ, e peeɔ nɔ́ fɛɛ nɔ́ nɛ e ma nyɛ konɛ e nyɛ nɛ e tsu he ní.—1 Kor. 9:​26, 27.

5. Ke Kristofo no ko yɛ e hɛ mi ngɛ Mawu jami mi ɔ, mɛni ma nyɛ maa ba e nɔ? (Efeso Bi 4:​14, 15)

⁵ Se Kristofo no nɛ e yɛ e hɛ mi ngɛ Mawu jami mi ɔ lɛɛ, nihi nɛ a toɔ ‘ga yaya kɛ guɔ sisimi ga tsɔmihi a nɔ’ ɔ ma nyɛ maa mlɔɔ lɛ. Eko ɔ, e ma he lakpa munyuhi nɛ gbɛ fĩa tiivi, radio loo Intanɛti ɔ nɔ ɔ maa ye. Aloo eko ɔ, hemi kɛ yemi kuali ma nyɛ maa sisi lɛ. a (Kane Efeso Bi 4:​14, 15.) Jehanɛ hu ɔ, ke Kristofo no ko yɛ e hɛ mi ngɛ Mawu jami mi ɔ, e hɛ ma nyɛ maa kɔ̃ nihi a nɔ, e kɛ nihi ma nyɛ maa pɛ loo e mi mi ma fu mlamlaamla. Ke e kɛ ka ko kpe hu ɔ, e he be wae kaa e maa pee yayami.—1 Kor. 3:3.

6. Mɛni nɔ hyɛmi nɔ́ nɛ waa kɛ ma nyɛ maa tsɔɔ bɔ nɛ Kristofohi waa ngɛ mumi mi ha a mi? (Hyɛ foni ɔ hulɔ.)

⁶ Kaa bɔ nɛ wa na kɛ sɛ hlami ɔ, Ngmami ɔ ngɔ wa hɛ mi nɛ wa maa ya ngɛ Mawu jami mi ɔ kɛ to bɔ nɛ bimwɔyo waa nɛ e ba peeɔ nɔkɔtɔma a he. Jokuɛwi be níhi a si kpami, enɛ ɔ he ɔ, e he hia nɛ nɔkɔtɔma ko nɛ po a he piɛ nɛ e kudɔ mɛ. Kaa nɔ hyɛmi nɔ́ ɔ, binyɛ ko ma nyɛ ma ha nɛ e biyo nɛ pɛtɛ e nine si konɛ a po lɔle blɔ mi. Eko ɔ, ke jokuɛ ɔ ngɛ wae ɔ, e nyɛ ɔ maa ngmɛ lɛ blɔ konɛ lɛ nɔ kake e po lɔle blɔ mi, se kɛ̃ ɔ, binyɛ ɔ ma kai e bi ɔ kaa e sa nɛ e hyɛ e muɔ nɔ kɛ e hiɔ nɔ loko e po lɔle blɔ mi. Jehanɛ ɔ, ke jokuɛ ɔ wa a, lɛ nitsɛ e ma nyɛ maa po lɔle blɔ mi ngɛ e dɛ he. Kaa bɔ nɛ e he hia nɛ nikɔtɔmahi nɛ a ye bua jokuɛwi nɛ a ko ya sɛ oslaa mi ɔ, jã kɛ̃ nɛ e he hia nɛ Kristofohi nɛ a ya a hɛ mi ngɛ Mawu jami mi ɔ hu nɛ a ye bua Kristofohi nɛ a wɛ ngɛ mumi mi ɔ be fɛɛ be konɛ a nyɛ nɛ a mwɔ yi mi kpɔhi nɛ da. Ke Kristofo no nɛ e wa ngɛ mumi mi ɔ maa mwɔ yi mi kpɔ ko ɔ, e susuɔ Baiblo sisi tomi mlaahi a he, bɔ nɛ pee nɛ e le Yehowa susumi ngɛ he. Lɔ ɔ se ɔ, e mwɔɔ yi mi kpɔ nɛ da.

7. Anɛ Kristofohi nɛ a wa ngɛ mumi mi ɔ hu hia ni kpahi a yemi kɛ buami lo?

 ⁷ Anɛ enɛ ɔ tsɔɔ kaa Kristofo no nɛ e wa ngɛ Mawu jami mi ɔ hia we yemi kɛ buami gblegbleegble lo? Dɛbi. Be komɛ ɔ, mɛ hu a hia yemi kɛ buami. Se nɔ nɛ e wɛ ngɛ mumi mi lɛɛ, e maa suɔ kaa ni kpahi nɛ a de lɛ nɔ́ nɛ e sa kaa e pee loo a mwɔ yi mi kpɔ kɛ ha lɛ. Se Kristofo no nɛ e nane pi si ngɛ Mawu jami mi ɔ le kaa ke e bi ga womi ngɛ nihi nɛ a ngɛ níhi a si kpami ɔ a ngɔ po ɔ, e sa nɛ lɛ nitsɛ e mwɔ e yi mi kpɔ, ejakaa nɔ fɛɛ nɔ “maa tloo lɛ nitsɛ e tlomi.”—Gal. 6:5.

8. Ngɛ mɛni blɔ nɔ nɛ Kristofohi nɛ a nane pi si ɔ je ekpa ngɛ a sibi a he?

⁸ Nihi nɛ a wa a, e slo a kpɛti nɔ fɛɛ nɔ nɔmlɔ tso kɛ bɔ nɛ e ngɛ ha. Jã kɛ̃ nɛ e ji ngɛ Kristofohi nɛ a wa ngɛ Mawu jami mi ɔ hu a blɔ fa mi. A kpɛti ni komɛ ngɛ nile kɛ kã, nɛ ni komɛ hu a mi mi jɔ nɛ a náa nɔ mɔbɔ. Jehanɛ hu ɔ, ke Kristofohi enyɔ nɛ a wa ngɛ Mawu jami mi ɔ maa mwɔ yi mi kpɔ ngɛ si fɔfɔɛ kake ko he ɔ, eko ɔ, mɛ tsuo a maa mwɔ yi mi kpɔ ekpaekpahi mohu lɛɛ, se e kɛ Baiblo sisi tomi mlaahi ma kɔ. Ngɛ anɔkuale mi ɔ, e ma nyɛ maa ba jã, titli ke e ma bi nɛ a da a he nile nɔ kɛ mwɔ yi mi kpɔ ɔ. Enɛ ɔ he ɔ, a be a sibi kojoe ngɛ yi mi kpɔ slɔɔtohi nɛ a maa mwɔ ɔ he. Mohu ɔ, a yaa nɔ nɛ a peeɔ kake.—Rom. 14:10; 1 Kor. 1:10.

MƐNI WA MA NYƐ MAA PEE KONƐ WAA PEE KRISTOFOHI NƐ A NANE PI SI?

9. Ke wa bɔɛ wa he mɔde ɔ, anɛ wa ma nyɛ maa pee Kristofohi nɛ a nane pi si lo? Moo tsɔɔ nya.

⁹ Ke a fɔ bimwɔyo ɔ, bɔ fɛɛ bɔ nɛ ji ɔ, e maa wa nɛ e ma ba pee nɔkɔtɔma, se loko nɔ ko nane maa pi si ngɛ Mawu jami mi ɔ, e biɔ nɛ e bɔ e he mɔde wawɛɛ. Kaa nɔ hyɛmi nɔ́ ɔ, Kristofohi nɛ a hi Korinto ɔ kplɛɛ anɔkuale ɔ nɔ nɛ a baptisi mɛ. A ná mumi klɔuklɔu ɔ, nɛ a kase níhi fuu kɛ je nɔ́ bɔfo Paulo tsɔɔ mɛ ɔ mi. (Níts. 18:​8-11) Se benɛ a baptisi mɛ jeha komɛ a se ɔ, a kpɛti nihi fuu yɛ a hɛ mi ngɛ Mawu jami mi. (1 Kor. 3:2) Mɛni wa ma nyɛ maa pee konɛ nɔ́ ko kaa jã nɛ ko ba wa nɔ?

10. Mɛni e sa nɛ waa pee konɛ waa wa ngɛ mumi mi? (Jud 20)

¹⁰ Ja wa suɔ kaa wa maa pee Kristofohi nɛ a nane pi si ngɛ Mawu jami mi loko wa ma nyɛ maa pee jã? ‘Nihi nɛ a be níhi a si kpami’ nɛ a suɔ kaa a pee a ní kaa jokuɛwi ɔ, be a hɛ mi yae gblee. (Abɛ 1:22) Wa sume nɛ waa pee wa ní kaa nihi nɛ a wa, se loloolo ɔ, a ngɔɔ a hɛ kɛ fɔɔ a fɔli a nɔ kaa a mwɔ yi mi kpɔhi kɛ ha mɛ ɔ. Mohu ɔ, wa suɔ nɛ wɔ nitsɛmɛ waa pee níhi nɛ ma ha nɛ waa ya wa hɛ mi ngɛ mumi mi. (Kane Jud 20.) Ke o ji nɔ ko nɛ o ngɛ bɔ mɔde bɔe wawɛɛ kaa o maa ya o hɛ mi ɔ, moo sɔle konɛ Yehowa nɛ ha mo ‘suɔmi ɔ kɛ he wami ɔ konɛ o kɛ pee’ jã.—Filip. 2:13.

11. Mɛni yemi kɛ buami Yehowa kɛ ha wɔ konɛ wa nyɛ nɛ waa pee Kristofohi nɛ a nane pi si? (Efeso Bi 4:​11-13)

¹¹ Ngɛ anɔkuale mi ɔ, Yehowa ngmɛɛ we wa he nɛ wɔ nitsɛmɛ waa wa ngɛ mumi mi. E ha wɔ nɔ hyɛli kɛ tsɔɔli nɛ a he su ngɛ Kristofohi asafo ɔ mi nɛ a ye bua wɔ konɛ waa ‘wa saminya’ ngɛ mumi mi, “nɛ waa hi Kristo ɔ kami kɛ e blimi ɔ tsuo he sue.” (Kane Efeso Bi 4:​11-13.) Yehowa yeɔ bua wɔ kɛ e mumi klɔuklɔu ɔ hulɔ konɛ wa ná “Kristo juɛmi ɔ.” (1 Kor. 2:​14-16) Jehanɛ hu ɔ, Mawu ha wɔ Sane Kpakpa womi eywiɛ ɔmɛ konɛ e ye bua wɔ nɛ waa na bɔ nɛ Yesu susu níhi a he ha, bɔ nɛ e tu munyu ha, kɛ bɔ nɛ e pee e ní ha ngɛ e sɔmɔmi ní tsumi ɔ mi. Ke o kase bɔ nɛ Yesu susuɔ níhi a he ha, kɛ bɔ nɛ e pee e ní ha a he ní ɔ, o ma nyɛ maa pee Kristofo no nɛ e nane pi si.

BƆ NƐ BAIBLO MI ANƆKUALEHI NƐ A MI KUƆ Ɔ YEƆ BUAA WƆ HA

12. Mɛni ji “Kristo ɔ he sisije tsɔɔmi ɔ”?

¹² Loko wa maa pee Kristofohi nɛ a nane pi si ɔ, e biɔ babauu pe “Kristo ɔ he sisije  tsɔɔmi ɔ” pɛ nɛ wa maa kase. Sisije tsɔɔmi nɛ ɔmɛ ekomɛ ji tsui tsakemi, hemi kɛ yemi, baptisimi, kɛ gbogboehi a si tlemi ɔ. (Heb. 6:​1, 2) Tsɔɔmi nɛ ɔmɛ ji sisije tsɔɔmi nɛ e sa kaa Kristofohi tsuo nɛ a le nɛ a he ye. Enɛ ɔ he ɔ, benɛ bɔfo Petro ngɛ fiɛɛe ngɛ Pentekoste ligbi ɔ nɔ ɔ, e tu ní nɛ ɔmɛ a he munyu kɛ tsɔɔ e tue buli ɔmɛ. (Níts. 2:​32-35, 38) Ja wa kplɛɛ tsɔɔmi nɛ ɔmɛ a nɔ loko wa ma nyɛ maa pee Kristo kaseli. Kaa nɔ hyɛmi nɔ́ ɔ, Paulo tsɔɔ kaa ke wa be hemi kɛ yemi ngɛ gbogboehi a si tlemi ɔ mi ɔ, wa be nyɛe maa pee Kristo kaseli. (1 Kor. 15:​12-14) Se kɛ̃ ɔ, pi sisije tsɔɔmi nɛ ɔmɛ pɛ nɛ e sa nɛ waa le.

13. Mɛni e sa kaa waa pee konɛ wa ná mumi mi niye ní nɛ he wa nɛ a tu he munyu ngɛ Hebri Bi 5:14 ɔ mi ɔ he se? (Hyɛ foni ɔ hulɔ.)

¹³ Se Baiblo mi anɔkualehi nɛ a mi kuɔ ɔ be kaa sisije tsɔɔmi ɔmɛ. Mumi mi niye ní nɛ he wa a ekomɛ ji Yehowa mlaahi kɛ e sisi tomi mlaahi nɛ yeɔ buaa wɔ nɛ wa naa Yehowa susumi ngɛ níhi a he. Bɔ nɛ pee nɛ wa ná Baiblo mi anɔkualehi nɛ a mi kuɔ ɔ he se ɔ, e sa nɛ waa kase Mawu Munyu ɔ nɛ wa pue wa yi mi tɛ ngɛ he, nɛ waa kɛ nɔ́ nɛ wa kase ɔ nɛ tsu ní saminya. Ke wa pee jã a, e maa ye bua wɔ nɛ waa mwɔ yi mi kpɔhi nɛ maa sa Yehowa hɛ mi. b—Kane Hebri Bi 5:14.

14. Mɛni blɔ nɔ nɛ Paulo ye bua Korinto bi ɔmɛ konɛ a wa ngɛ mumi mi?

¹⁴ Behi fuu ɔ, e he waa ha Kristofohi nɛ a wɛ ngɛ Mawu jami mi ɔ kaa a maa mwɔ yi mi kpɔhi nɛ da ngɛ si fɔfɔɛhi nɛ Baiblo ɔ wui mlaa pɔtɛɛ ko ngɛ he ɔ he. Ke Baiblo ɔ wui mlaa pɔtɛɛ ko ngɛ nɔ́ ko he ɔ, ni komɛ susuɔ kaa a ma nyɛ maa pee nɔ́ nɛ a suɔ. Ni kpahi hu suɔ kaa a wo mɛ mlaa ngɛ nɔ́ ko nɛ he hia we nɛ a wo mlaa ngɛ he ɔ he. Kaa nɔ hyɛmi nɔ́ ɔ, eko ɔ, Kristofohi nɛ a ngɛ Korinto ɔ bi Paulo ke ji a ma nyɛ maa ye niye ní nɛ a kɛ sã afɔle ha amagahi ɔ lo. Paulo wui mɛ mlaa ngɛ nɔ́ nɛ e sa nɛ a pee ɔ he, mohu ɔ, e ye bua mɛ nɛ a na kaa nɔ fɛɛ nɔ ngɛ ‘he blɔ nɛ e mwɔɔ e yi mi kpɔ’ ngɛ nɔ́ nɛ e suɔ kaa e maa pee ɔ he ke e he nile maa ngmɛ lɛ blɔ. Paulo tsɔɔ mɛ Baiblo sisi tomi mlaa komɛ nɛ maa ye bua mɛ konɛ a mwɔ yi mi kpɔhi nɛ be hae nɛ a he nile nɛ bu mɛ fɔ, nɛ a ko tɔ̃tɔ̃ ni kpahi a nane hulɔ. (1 Kor. 8:​4, 7-9) Ngɛ  anɔkuale mi ɔ, Paulo ye bua Korinto bi ɔmɛ konɛ a wa ngɛ mumi mi, nɛ a ná juɛmi nɛ a kɛ kɔɔ nɔ́ se bɔ nɛ pee nɛ a ko ngɔ a hɛ kɛ fɔ ni kpahi a nɔ loo a ha nɛ ni kpahi nɛ wo mɛ mlaahi.

15. Mɛni blɔ nɔ nɛ Paulo ye bua Hebri bi nɛ a ji Kristofohi ɔ nɛ a ya a hɛ mi ngɛ Mawu jami mi?

¹⁵ Wa ma nyɛ maa kase nɔ́ ko nɛ he hia ngɛ sɛ womi nɛ Paulo ngma kɛ ya ha Hebri bi nɛ a ji Kristofohi ɔ mi. Hebri bi nɛ ɔmɛ a kpɛti ni komɛ yɛ a hɛ mi konɛ a he nɛ wa ngɛ Mawu jami mi, mohu ɔ, a “kpale ba pee nihi nɛ a hia nyɔ nyu, se pi [mumi mi] niye ní nɛ he wa.” (Heb. 5:12) A kplɛɛ we ní hehi nɛ Yehowa ngɛ mɛ tsɔɔe ngɛ asafo ɔ mi ɔ nɔ. (Abɛ 4:18) Kaa nɔ hyɛmi nɔ́ ɔ, e ngɛ mi kaa jeha 30 nɛ be ɔ, Yesu kpɔmi afɔle sami ɔ ha nɛ Mose Mlaa a ba nyagbe mohu lɛɛ, se Yuda bi fuu nɛ a ba pee Kristofohi ɔ kplɛɛ Mose Mlaa a nɔ loloolo. (Rom. 10:4; Tito 1:10) Ngɛ anɔkuale mi ɔ, jinɛ e sɛ nɛ e he nɛ wa ha Kristofohi nɛ ɔmɛ kaa a kɛ jeha 30 maa pee tsakemi! Enɛ ɔ he ɔ, Paulo bɔ mɔde kaa e maa ye bua mɛ konɛ a kplɛɛ anɔkualehi nɛ a mi kuɔ nɛ e ngɛ mɛ tsɔɔe ɔ nɔ. Paulo sɛ womi ɔ ye bua mɛ nɛ a na kaa kɛ gu Yesu kpɔmi afɔle sami ɔ nɔ ɔ, Yehowa to blɔ nya konɛ a ja lɛ ngɛ blɔ ehe ko nɛ hi pe kulaa a nɔ. Jehanɛ hu ɔ, e ngɛ mi kaa Yuda bi nɛ a pi Kristofohi ɔ te si kɛ wo mɛ mohu lɛɛ, se Paulo sɛ womi ɔ ye bua mɛ nɛ a kɛ kã fiɛɛ.—Heb. 10:​19-23.

MO KO HE O HE NƐ O YE TSƆ

16. Ke wa ba pee Kristofohi nɛ a nane pi si po ɔ, mɛni ji nɔ́ kpa ko nɛ e sa nɛ waa pee?

¹⁶ Ke wa bɔ mɔde wawɛɛ nɛ wa ba pee Kristofohi nɛ a nane pi si ɔ, lɔ ɔ tsɔɔ we kaa wa gbe nya. E sa nɛ waa ya nɔ nɛ wa ha nɛ wa he nɛ wa. Enɛ ɔ tsɔɔ kaa e sɛ nɛ wa he wa he nɛ waa ye tsɔ. (1 Kor. 10:12) E sa nɛ waa ‘ya nɔ nɛ waa ka wa he’ be fɛɛ be kaa wa ngɛ wa hɛ mi yae lo.—2 Kor. 13:5.

17. Mɛni blɔ nɔ nɛ sɛ womi nɛ Paulo ngma kɛ ya ha Kolose bi ɔmɛ ɔ tsɔɔ kaa e he hia nɛ waa ya nɔ nɛ waa wa ngɛ Mawu jami mi?

¹⁷ Ngɛ sɛ womi nɛ Paulo ngma kɛ ya ha Kolose bi ɔmɛ ɔ mi ɔ, e tsɔɔ hu kaa e he hia nɛ a ya nɔ nɛ a he nɛ wa ngɛ Mawu jami mi. E ngɛ mi kaa Kolose bi ɔmɛ ji Kristofohi nɛ a nane pi si ngɛ Mawu jami mi momo mohu lɛɛ, se Paulo bɔ mɛ kɔkɔ kaa e sa nɛ a hyɛ nɛ hi ngɛ je ɔ susumi he. (Kol. 2:​6-10) Epafra nɛ e ma nyɛ maa ba kaa e le nihi nɛ a ngɛ asafo ɔ mi saminya a  sɔle wawɛɛ kɛ ha mɛ “konɛ nyagbenyagbe ɔ, [a] da si kaa nihi nɛ a ye mluku” loo a wa. (Kol. 4:12) Mɛni wa kaseɔ ngɛ mi? Paulo kɛ Epafra tsuo le kaa loko nɔ ko maa ya nɔ maa pee nɔ nɛ e wa ngɛ Mawu jami mi ɔ, e biɔ mɔde bɔmi wawɛɛ, nɛ jehanɛ hu ɔ, e hia Mawu yemi kɛ buami. E ngɛ mi kaa Kolose bi ɔmɛ kɛ nyagbahi ngɛ kpee mohu lɛɛ, se Paulo kɛ Epafra suɔ nɛ a ya nɔ nɛ a wa ngɛ mumi mi nɛ a pee Kristofohi nɛ a nane pi si.

18. Mɛni ma nyɛ maa ba Kristofo no ko nɛ e nane pi si ɔ nɔ? (Hyɛ foni ɔ hulɔ.)

¹⁸ Paulo bɔ Hebri bi ɔmɛ kɔkɔ kaa ke Kristofo no ko wa ngɛ mumi mi po ɔ, huɛ bɔmi nɛ ngɛ e kɛ Yehowa a kpɛti ɔ ma nyɛ ma puɛ kɛ ya neneene ke e hyɛ we e he nɔ saminya. Kristofo no ko ma nyɛ maa kplii e tsui ngɛ yayami ko nɛ e pee ɔ he. Ke e ba jã a, e he maa wa kaa e maa pee tsakemi konɛ Mawu nɛ ngɔ e tɔmi ɔ kɛ ke lɛ. Se bua jɔmi sane ji kaa Hebri bi ɔmɛ a kpɛti nɔ ko nɔ ko pee we e ní jã. (Heb. 6:​4-9) Se nihi nɛ a kpa asafo mi kpe kɛ fiɛɛmi yami mwɔnɛ ɔ loo a fiee mɛ kɛ je asafo ɔ mi nɛ a tsake a tsui pee se ɔ hu nɛɛ? Ke a ba a he si nɛ a tsake a tsui niinɛ ɔ, lɛɛ sɛ womi nɛ Paulo ngma nɛ tsɔɔ kaa Yehowa ma nyɛ ma kua ni komɛ kɛ ya neneene ɔ kɔ we a he. Ngɛ anɔkuale mi ɔ, ke nihi kaa jã kpale kɛ ba Yehowa ngɔ po ɔ, a maa hia yemi kɛ buami. (Eze. 34:​15, 16) Asafo mi nikɔtɔma amɛ ma nyɛ maa to blɔ nya konɛ nyɛmi ko nɛ e nane pi si ngɛ asafo ɔ mi ɔ nɛ e ye bua mɛ konɛ a ha nɛ huɛ bɔmi kpakpa nɛ hi a kɛ Yehowa a kpɛti ekohu.

19. Mɛni oti nɛ e sa nɛ wa kɛ ma wa hɛ mi?

¹⁹ Ke o ngɛ mɔde bɔe kaa o maa pee Kristofo no nɛ e nane pi si ɔ, o ma nyɛ maa pee jã! Yaa nɔ nɛ o kase Baiblo mi anɔkualehi nɛ a mi kuɔ ɔ, nɛ o ha nɛ o susumihi kɛ Yehowa nɔ́ ɔ nɛ kɔ. Jehanɛ hu ɔ, ke o ji Kristofo no nɛ e wa ngɛ mumi mi po ɔ, yaa nɔ nɛ o fĩ si nɛ o he nɛ wa daa.