A fɔ mi ngɛ jeha 1955 ɔ mi. A fɔ wɔ nyumuhi etɛ, nɛ imi ji nɔ nɛ wɛ ngɛ a kpɛti. I wa ngɛ Finland woyi je ngɛ ma nɛ amlɔ nɛ ɔ, a tsɛɛ ke Vantaa a mi.

Benɛ a baptisi ye mami nɛ e ba pee Yehowa Odasefo no ɔ, jeha bɔɔ pɛ se nɛ a fɔ mi. Se kɛ̃ ɔ, ye papaa te si kɛ wo anɔkuale ɔ, nɛ e ngmɛ́ ye mami blɔ nɛ e kɛ wɔ nɛ kase Baiblo ɔ loo e kɛ wɔ nɛ ya asafo mi kpehi. Enɛ ɔ he ɔ, ke ye papaa be we ɔ mi ɔ, e tsɔɔ wɔ Baiblo ɔ mi sisije tsɔɔmi ɔmɛ.

Kɛ je ye jokuɛwi a si tɔɔ nɛ i ma ye juɛmi nya si kaa ma bu Yehowa tue. Kaa nɔ hyɛmi nɔ́ ɔ, benɛ i ye jeha kpaago ɔ, ye tsɔɔlɔ ɔ mi mi fu wawɛɛ benɛ i de lɛ kaa i be niye ní ko nɛ a tsɛɛ lɛ ke verilättyjä a yee ɔ (E ji Finland bi a pancake ko nɛ a kɛ muɔ pee). E ngɔ e nine kake kɛ mia ye tsitsa konɛ ma pã ye nya mi bɔ nɛ pee nɛ e ngɔ pancake ɔ eko kɛ wo ye nya mi. Se imi hu i bɔ mɔde nɛ i gba niye ní ɔ ngɛ e dɛ mi kɛ fɔ he.

Benɛ i ye jeha 12 ɔ, ye papaa gbo. Kɛ je lɔ ɔ se ɔ, i yaa asafo mi kpehi faa. Nyɛmimɛ nɛ a ngɛ asafo ɔ mi ɔ je suɔmi kpo kɛ tsɔɔ mi, nɛ lɔ ɔ ye bua mi nɛ i hɛ kɛ su Yehowa he wawɛɛ. I kaneɔ Baiblo ɔ daa ligbi, nɛ i kaseɔ asafo ɔ womi ɔmɛ hu saminya. Enɛ ɔ nɛ i pee ɔ ye bua mi wawɛɛ. Lɔ ɔ he ɔ, i ha nɛ a baptisi mi ngɛ August 8, 1969 benɛ i ye jeha 14 ɔ.

Benɛ i gbe sukuu nya be bɔɔ se ɔ, i ba pee daa blɔ gbalɔ. Ngɛ otsi bɔɔ komɛ a se ɔ, i hia kɛ  ho Pielavesi ya, e ji he ko nɛ fiɛɛli fuu a he hia ngɛ. Lejɛ ɔ kɛ Finland he kɛ we.

I kɛ Sirkka nɛ i suɔ lɛ saminya a kpe ngɛ Pielavesi. I suɔ lɛ wawɛɛ ejakaa e baa e he si nɛ e suɔ Yehowa wawɛɛ. E ji nɔ ko nɛ e dí he lo nya níhi a se. I kɛ lɛ tsuo wa suɔ nɛ waa ngɔ wa be tsuo kɛ sɔmɔ Yehowa kɛ pi si, nɛ wa pee klaalo kaa wa ma tsu ní tsumi fɛɛ ko nɛ a kɛ maa wo wa dɛ ɔ. Benɛ wa sɛ gba si himi mi ngɛ March 23, 1974 ɔ mi ɔ, wa yɛ honeymoon, mohu ɔ, wa ya sɔmɔ ngɛ Karttula he nɛ fiɛɛli fuu a he hia ngɛ ɔ.

Kɛ je benɛ wa sɛ gba si himi mi ɔ, Yehowa pee níhi fuu kɛ tsɔɔ kaa ke wa hla Matsɛ Yemi ɔ kekle ɔ, e ma ha wɔ wa he lo nya hiami níhi. (Mat. 6:33) Kaa nɔ hyɛmi nɔ́ ɔ, benɛ wa ngɛ Karttula a wa be lɔle. Lɔ ɔ he ɔ, sisije ɔ, waa kɛ baisikle lɛ hiaa blɔ. Se ke e su fĩɛ be ɔ, je ɔ mi jɔɔ wawɛɛ nitsɛ. Lɔ ɔ he ɔ, ke wa ngɛ hlae nɛ wa ya fiɛɛ ngɛ asafo ɔ zugba kpɔ nɛ ngɛ tsitsaa a mi ɔ, wa maa hia lɔle. Se wa be sika nɛ waa kɛ ma he eko.

Ligbi ko ɔ, ye nyɛminyumu nɔkɔtɔma a ba slaa wɔ be mi nɛ wa hyɛ we blɔ. E je mi mi jɔmi mi nɛ e ngɔ e lɔle ɔ kɛ ha wɔ. A wo lɔle ɔ he insurance momo. Nɔ́ nɛ e sa nɛ wa he pɛ ji petrol. Amlɔ nɛ ɔ lɛɛ wa ná lɔle.

Enɛ ɔ nɛ Yehowa pee ɔ ha nɛ wa na kaa e ma ha wɔ wa he lo nya hiami níhi. Nɔ́ nɛ e sa kaa waa pee pɛ ji kaa wa maa ngɔ Matsɛ Yemi ɔ kɛ ye kekle blɔ he.

Benɛ wa ya Blɔ Gbali A Tsɔsemi Sukuu ngɛ jeha 1978 ɔ, Raimo Kuokkanen a nɛ ji wa tsɔɔli ɔmɛ a kpɛti nɔ kake ɔ wo wɔ he wami kaa waa ngma blɔ bimi womi kɛ ha Gilead Sukuu ɔ nɔ ní. Enɛ ɔ he ɔ, wa bɔni Blɛfo gbi kasemi konɛ wa nyɛ nɛ waa ya. Loko wa maa ngma Gilead Sukuu ɔ blɔ bimi womi nɔ ní ngɛ jeha 1980 ɔ mi ɔ, a fɔ wɔ nine kaa wa ba sɔmɔ ngɛ asafo ɔ ní tsumi kɔni ɔ ngɛ Finland. Jamɛ a be ɔ, a ngmɛ́ blɔ kaa nihi nɛ a ngɛ Betel ɔ nɛ a ya Gilead. Se wa suɔ nɛ wa sɔmɔ ngɛ he nɛ Yehowa suɔ, se pi he nɛ wɔɔ wa suɔ. Enɛ ɔ he ɔ, wa kplɛɛ nɔ kaa wa ma ya sɔmɔ ngɛ Betel. Se ngɛ lɛ tsuo se ɔ, wa ya nɔ nɛ wa kase Blɛfo gbi ɔ, konɛ ke alini nɛ wa ná he blɔ ɔ, waa ya Gilead.

Jeha bɔɔ komɛ a se ɔ, Blɔ Tsɔɔmi Ajla Toli ɔmɛ ngmɛ blɔ kaa Betel bi hu ma nyɛ maa ngma womi nɔ ní konɛ a ya Gilead. Amlɔ nɔuu nɛ wa  ngma Gilead blɔ bimi womi ɔ nɔ ní. Anɛ jã nɛ wa pee ɔ tsɔɔ kaa wa bua jɔɛ ngɛ Betel lo? Pi jã kulaa ji sane ɔ. Mohu ɔ, wa suɔ nɛ waa ngɔ wa he kɛ ha konɛ ke yemi kɛ buami he hia ngɛ he ko ɔ, wa nyɛ nɛ wa ya sɔmɔ ngɛ lejɛ ɔ. A fɔ wɔ nine kaa waa ya Gilead. Ngɛ September 1985 ɔ mi ɔ, wa piɛɛ nihi nɛ a gbe Gilead Sukuu nɛ to nɔ 79 ɔ nya a he, nɛ a ha nɛ wa ya sɔmɔ ngɛ Colombia.

Benɛ wa ya su Colombia pɛ ɔ, a ha nɛ wa ya sɔmɔ ngɛ asafo ɔ ní tsumi kɔni ɔ. I bɔ ye he mɔde ngɛ ní tsumi nɛ a kɛ wo ye dɛ ɔ mi. Se ngɛ jeha kake se ɔ, i nu he kaa e sa nɛ a tsake wa ní tsumi ɔ. Ngɛ ye si himi mi tsuo ɔ, be nɛ ɔ mi pɛ nɛ i bi kaa a tsake ye ní tsumi. Enɛ ɔ he ɔ, a ha nɛ wa ya sɔmɔ kaa ma se sane kpakpa fiɛɛli ngɛ Neiva ngɛ Huila kpokpa a nɔ.

Ye bua jɔ fiɛɛmi ní tsumi ɔ he wawɛɛ. Benɛ i ngɛ sɔmɔe ngɛ Finland kaa blɔ gbalɔ nɛ i ngɔɛ yo lolo ɔ, ke i ya fiɛɛmi mɔtu ɔ, ja du bu loko ma kpa. Benɛ wa sɛ gba si himi mi pɛ ɔ, i kɛ ye yo ɔ hu fiɛɛɔ kɛ jeɔ mɔtu kɛ ya siɔ gbɔkuɛ. Ke wa ya fiɛɛ ngɛ he tsitsaa a, be komɛ ɔ, wa hwɔɔ wa lɔle ɔ mi. Enɛ ɔ gbɔɔ be nɛ waa kɛ hiaa blɔ ɔ nɔ, nɛ wa nyɛɔ nɛ wa jeɔ fiɛɛmi sisi mla ke je na.

Kaa bɔ nɛ waa kɛ kã tsu fiɛɛmi ní tsumi ɔ be ko nɛ be ɔ, jã nɔuu nɛ wa ngɛ pee amlɔ nɛ ɔ kaa ma se sane kpakpa fiɛɛli. Asafo nɛ wa ngɛ mi ɔ yi ba bli, nɛ wa na kaa nyɛmimɛ nɛ a ngɛ Colombia a jeɔ bumi, suɔmi kɛ hɛsa kpo.

Ma enyɔ komɛ ngɛ nɛ a kɛ Neiva nɛ ji he nɛ wa ngɛ sɔmɔe ngɛ ɔ he kɛ we, nɛ Odasefo no ko be lejɛ ɔ. I hao ngɛ bɔ nɛ nihi nɛ a ngɛ lejɛ ɔ ma plɛ kɛ nu sane kpakpa a he. Se akɛnɛ ta ngɛ nɔ yae ngɛ ma nɛ ɔmɛ a mi he je ɔ, e ngɛ oslaa kaa wa ma ya fiɛɛ ngɛ lejɛ ɔ, ejakaa tsa pi jamɛ a ma a mi nɛ wa je. Enɛ ɔ he ɔ, i sɔle kaa nɔ ko nɛ ba pee Odasefo no ngɛ ma nɛ ɔmɛ a mi. I susu kaa ja nɔ ɔ ba hi Neiva kɛ kase anɔkuale ɔ. Enɛ ɔ he ɔ, i sɔle hu kaa ke a baptisi nɔ ɔ se ɔ, e ba pee nɔ ko nɛ e nane pi si konɛ e kpale kɛ ho e ma a mi ya konɛ e ya tsu fiɛɛmi ní tsumi ɔ. Ngɛ anɔkuale mi ɔ, Yehowa le bɔ nɛ e ma tsu sane nɛ ɔ he ní ha saminya pe bɔ nɛ i susu ɔ.

Be bɔɔ se ɔ, i kɛ niheyo ko nɛ a tsɛɛ lɛ ke Fernando González je Baiblo ɔ kasemi sisi. E ngɛ ma ko nɛ a tsɛɛ lɛ ke Algeciras ɔ mi. Ma nɛ ɔ ji ma enyɔ ɔmɛ nɛ Odasefo no ko be mi ɔ a kpɛti kake. Fernando hiaa blɔ si tomi 30 kɛ ya tsuɔ ní ngɛ ma nɛ ji Neiva a mi. Be fɛɛ be ɔ, e dlaa e he saminya loko wa kaseɔ ní, nɛ e kɛ we nɛ e bɔni wa kpe ɔmɛ tsuo yami. Benɛ wa kase Baiblo ɔ otsi pɛ ɔ, Fernando bua e ma mi bi ɔmɛ a nya nɛ e tsɔɔ mɛ níhi nɛ e kase ngɛ Baiblo ɔ mi.

Benɛ Fernando kɛ nyɔhiɔ ekpa kase Baiblo ɔ se ɔ, e ha nɛ a baptisi lɛ ngɛ January 1990 ɔ mi. Lɔ ɔ se ɔ, e je blɔ gbami ní tsumi ɔ sisi. Amlɔ nɛ ɔ nɛ a ná Odasefo no kake ngɛ ma a mi he je ɔ, asafo ɔ ní tsumi kɔni ɔ ma nyɛ ma ha nɛ blɔ gbali klɛdɛɛ ma ya sɔmɔ ngɛ lejɛ ɔ nɛ a kɛ nyagba ko be kpee. Ngɛ February 1992 ɔ mi ɔ, a to asafo sisi ngɛ jamɛ a ma a mi.

Anɛ Fernando fiɛɛ ngɛ e ma a mi pɛ lo? Dɛbi! Benɛ e sɛ gba si himi mi se ɔ, e kɛ e yo ɔ hia kɛ ho San Vicente del Caguán ya. Odasefo no ko be ma nɛ ɔ mi hulɔ. Lɔ ɔ he ɔ, a ye bua kɛ to asafo sisi ngɛ lejɛ ɔ. Ngɛ jeha 2002 ɔ mi ɔ, a ha nɛ Fernando sɔmɔ kaa kpɔ mi nɔ hyɛlɔ, nɛ loloolo ɔ,  e kɛ e yo Olga ngɛ kpɔ mi nɔ hyɛmi ní tsumi ɔ tsue kɛ ba si mwɔnɛ ɔ.

Níhi a si kpami nɛ ɔ ha nɛ i kase kaa e he hia nɛ ma sɔle ngɛ ní pɔtɛɛ komɛ nɛ kɔɔ wa teokrase ní tsumi ɔ he ɔ he. Yehowa peeɔ nɔ́ nɛ wa be nyɛe maa pee. Ngɛ anɔkuale mi ɔ, e nɔ́ ji ní kpami ní tsumi ɔ nɛ, se pi wa nɔ́.—Mat. 9:38.

Ngɛ jeha 1990 ɔ mi ɔ, a ha nɛ wa ya tsu kpɔ mi nɔ hyɛmi ní tsumi ɔ. Bogotá nɛ ji ma ngua a ji he nɛ wa ya sɔmɔ ngɛ kekleekle. Wa ye gbeye kaa wa be nyɛe ma tsu ní tsumi nɛ ɔ, ejakaa i kɛ ye yo ɔ nimli guhi ji wɔ, nɛ wa be nyɛmi klɛdɛɛ ko. Jehanɛ hu ɔ, ma ngua mi si himi pee we wa he nɔ́. Se Yehowa ye si womi nɛ ngɛ Filipi Bi 2:13 ɔ nɔ. Lejɛ ɔ de ke: “Ejakaa Mawu ji nɔ nɛ woɔ nyɛ he wami ngɛ lɛ nitsɛ e suɔmi nya, nɛ e ngɛ nyɛ suɔmi ɔ kɛ he wami ɔ hae konɛ nyɛ kɛ pee.”

Pee se ɔ, a ha nɛ wa ya sɔmɔ ngɛ Medellín nɛ ji ma nɛ i tu he munyu kɛ je ye munyu ɔ sisi ɔ mi. Basabasa peemi pɔ he ngɛ lejɛ ɔ, nɛ lɔ ɔ si we ma a mi bi ɔmɛ kpu. Kaa nɔ hyɛmi nɔ́ ɔ, ligbi ko nɛ i kɛ nɔ ko ngɛ Baiblo ɔ kasee ɔ, wa nu kaa tu ngɛ pɛe ngɛ kpo ɔ nɔ. Ye tsui po nɛ jinɛ i yaa hwɔ si ngɛ zugba, se nɔ nɛ i kɛ lɛ ngɛ Baiblo ɔ kasee ɔ lɛɛ e tsa e ní kanemi ɔ nɔ nɛ e tsui pui kulaa. Benɛ e kane ní ɔ ta a, e de mi kaa e ma bɔɔ, nɛ e je kpo. Be bɔɔ se ɔ, e kɛ jokuɛwi enyɔ ba nɛ e kɛ gbi blɛuu de mi ke, “Enɛ ɔ lɛɛ i kpa mo pɛɛ, ye bimɛ ɔmɛ lɛ a fia tu ɔ nɛ.”

Be komɛ hu ngɛ nɛ wa wami ya jeɔ oslaa mi. Ligbi ko benɛ wa ngɛ fiɛɛe ngɛ wehi a mi ɔ, ye yo ɔ tsui po wawɛɛ nɛ e ma fo kɛ ba ye ngɔ. E de mi kaa nɔ ko ka lɛ tu fiami. Enɛ ɔ ha nɛ ye tsui po wawɛɛ. Se wa ba na kaa mamoo tsa pi Sirkka nɔ po nɛ a ngɔ tu ɔ kɛ ma, mohu ɔ, nyumu ko nɛ e bee ngɛ Sirkka kasa nya a lɛ a fia tu ɔ nɛ.

Benɛ be ngɛ mi puee ɔ, basabasa peemi nɛ ɔ gba we wa nya hu. Nyɛmimɛ ɔmɛ nɛ a ngɛ ma a mi nɛ a kɛ si fɔfɔɛhi nɛ a mi wa pe enɛ ɔ kpe ɔ, a nɔ hyɛmi nɔ́ ɔ wo wɔ he wami. Wa ba na kaa Yehowa ngɛ nyɛmimɛ nɛ ɔmɛ ye buae, nɛ e maa ye bua wɔ hulɔ. Be fɛɛ be ɔ, waa kɛ ga womihi nɛ asafo mi nikɔtɔma amɛ kɛ haa wɔ ɔ tsuɔ ní. Wa bɔɔ mɔde kaa wa maa pee ní komɛ kɛ po wa he piɛ nɛ wa si nɔ́ nɛ piɛ ɔ kɛ ha Yehowa.

Ngɛ anɔkuale mi ɔ, si fɔfɔɛ komɛ ba nɛ wa susu kaa a ngɛ oslaa, se pi jã nɛ e ji. Ligbi ko ɔ, i ya slaa nɔ ko ngɛ we ko mi, nɛ i nu nɛ ngmlaa ko ngɛ pɛe ngɛ kpo ɔ nɔ, e pee kaa nɔ́ nɛ yihi enyɔ lɛ a ngɛ pɛe. Ke nihi ngɛ nya sãe loo a ngɛ pɛe ɔ, i sume nɛ i yaa lejɛ ɔ. Se wetsɛ ɔ de mi kaa ma ba yale ɔ mi nɛ ma ba hyɛ nɔ́ ko. Benɛ i ke ma hyɛ ɔ, akohi enyɔ lɛ a ngɛ bɔ nɛ kpɔ mi bimɛ ɔmɛ hii pɛe ha a kasee.

Ngɛ jeha 1997 ɔ mi ɔ, a hla mi kaa ma tsɔɔ ní ngɛ Sɔmɔli A Tsɔsemi Sukuu ɔ sisi. b Be fɛɛ be ɔ, ye bua jɔɔ kaa ma ya teokrase sukuuhi, se i hyɛ we blɔ kaa ma ná he blɔ kaa ma ya tsɔɔ ní ngɛ sukuu nɛ ɔmɛ eko sisi.

 Pee se ɔ, i sɔmɔ kaa kpokpa nɔ hyɛlɔ. Se benɛ a po jamɛ a blɔ nya tomi ɔ mi ɔ, i kpale ya sɔmɔ kaa kpɔ mi nɔ hyɛlɔ ekohu. Enɛ ɔ he ɔ, i kɛ jeha 30 kɛ se sɔmɔ kaa tsɔɔlɔ, kpokpa nɔ hyɛlɔ, kɛ kpɔ mi nɔ hyɛlɔ. He blɔ nɛ ɔmɛ ha nɛ wa ná jɔɔmihi babauu, se kɛ̃ ɔ, e be gbɔjɔɔ kaa wa ma tsu ní tsumi nɛ ɔmɛ. Ha nɛ ma tsɔɔ mo nɔ́ he je.

I ji nɔ ko nɛ i ngɛ kã wawɛɛ. Enɛ ɔ ye bua mi nɛ i nyɛ nɛ i da si fɔfɔɛhi nɛ a mi wa a nya. Se kɛ̃ ɔ, be komɛ ɔ, i peeɔ kpɛii ngɛ bɔ nɛ e sa nɛ a tsu si fɔfɔɛ komɛ a he ní ngɛ asafo ɔ mi ɔ he. Ligbi ko ɔ, i kɛ kã de ni komɛ kaa a je suɔmi kpo kɛ tsɔɔ ni kpahi nɛ a nu mɛ sisi. Se ngɛ anɔkuale mi ɔ, suhi nɛ i de nyɛmimɛ ɔmɛ kaa a je kpo ɔ, jamɛ a su ɔmɛ nɔuu nɛ imi hu i hia.—Rom. 7:​21-23.

Akɛnɛ be komɛ ɔ, i nyɛ we nɛ ma tsu ní komɛ a he ní saminya he je ɔ, e haa nɛ ye kɔni mi jɔ̃ɔ wawɛɛ. (Rom. 7:24) Be ko ɔ, i sɔle nɛ i de Yehowa kaa e maa hi wawɛɛ kaa ma ngmɛɛ ma se sane kpakpa fiɛɛmi ní tsumi ɔ he nɛ ma kpale kɛ ho Finland ya. Jamɛ a gbɔkuɛ ɔ, i ya asafo mi kpe. Nɔ́ nɛ i nu ngɛ jamɛ a kpe ɔ sisi ɔ wo mi he wami nɛ i yɔse kaa e sa nɛ ma ya nɔ nɛ ma tsu ye ní tsumi ɔ, nɛ ngɛ jamɛ a be ɔ mi nɔuu ɔ, ma ya nɔ nɛ ma bɔ ye gbɔjɔmi ɔmɛ a he mɔde. Kɛ ba si mwɔnɛ ɔ, ye bua jɔ bɔ nɛ Yehowa ha jamɛ a sɔlemi ɔ heto ha a he wawɛɛ. Jehanɛ hu ɔ, ye bua jɔ kaa Yehowa je mi mi jɔmi mi kɛ ye bua mi kɛ ye ye gbɔjɔmi ɔmɛ a nɔ.

I kɛ ye yo Sirkka wa bua jɔ wawɛɛ kaa Yehowa ha wɔ he blɔ nɛ waa kɛ wa be tsuo tsu ní ngɛ be tsuo sɔmɔmi ní tsumi ɔ mi. Jehanɛ hu ɔ, ye bua jɔ saminya kaa Yehowa ha mi yo kpakpa nɛ e suɔ mi nɛ e kɛ anɔkuale yemi fĩ ye se jehahi babauu ji nɛ ɔ.

E be kɛe nɛ ma ye jeha 70, nɛ ma ngmɛɛ ní tsumi nɛ i ngɛ tsue kaa tsɔɔlɔ kɛ kpɔ mi nɔ hyɛlɔ ɔ he. Se kɛ̃ ɔ, enɛ ɔ ha we nɛ ye kɔni mi nɛ jɔ̃. Mɛni he je? Ejakaa i le kaa ke waa kɛ he si bami sɔmɔ Yehowa nɛ wa je wa tsui mi kɛ je e yi, nɛ wa bua jɔ níhi nɛ e pee kɛ ha wɔ ɔ he ɔ, lɔ ɔ woɔ Yehowa hɛ mi nyami wawɛɛ. (Mika 6:8; Maak. 12:​32-34) E he hia we nɛ wa tsu ní tsumi klɛdɛɛ ko ngɛ asafo ɔ mi loko wa ma nyɛ maa wo Yehowa hɛ mi nyami.

Ke i hyɛ ní tsumihi nɛ i tsu ngɛ Yehowa sɔmɔmi mi ɔ, i naa kaa pi nɛ ye he hia pe ni kpahi loo i ngɛ nyɛmi pɔtɛɛ komɛ a he je nɛ a ngɔ jamɛ a ní tsumi ɔmɛ kɛ wo ye dɛ. Mohu ɔ, Yehowa kɛ he blɔ nɛ ɔmɛ wo ye dɛ ngɛ e dloomi kɛ e mɔbɔ nami ɔ he je. E ngɛ mi kaa i ngɛ gbɔjɔmi komɛ mohu lɛɛ, se Yehowa ngɔ ní tsumi nɛ ɔmɛ kɛ wo ye dɛ. Ngɛ anɔkuale mi ɔ, i nyɛ nɛ i tsu ní tsumi nɛ ɔmɛ akɛnɛ Yehowa ye bua mi ɔ he je. Enɛ ɔ he ɔ, ma nyɛ ma de ke, ye gbɔjɔmi ɔmɛ ha nɛ i na kaa Mawu ngɛ he wami niinɛ.—2 Kor. 12:9.