Anɛ o to o tsui si kɛ kane Hwɔɔmi Mɔ slɔɔtohi nɛ ba lingmi nɛ ɔ lo? Ke jã a, lɛɛ moo hyɛ kaa o ma nyɛ ma ha sane bimihi nɛ nyɛɛ se nɛ ɔ a heto:

Mɛni yayami nɛ Yesu tu he munyu ngɛ ga womi nɛ e kɛ ha wɔ ngɛ Mateo 18:15-17 ɔ mi ɔ?

E ngɛ yayami nɛ ke nɔ ko pee kɛ si e nyɛmi ɔ, mɛ ni enyɔ ɔmɛ a ma nyɛ ma dla a he munyu tue. Se yayami nɛ ɔ ji yayami nɛ hɛdɔ ngɛ he nɛ ke a nyɛ we nɛ a dla a, a ma nyɛ maa da nɔ kɛ fie nɔ ko kɛ je asafo ɔ mi. Kaa nɔ hyɛmi nɔ́ ɔ, yayami ɔ ma nyɛ maa pee ojo fiami aloo nɔ he guɛ gbemi.​—w16.05, bf. 7.

Mɛni o ma nyɛ maa pee konɛ o ná Baiblo kanemi he se kɛ pi si?

O ma nyɛ maa pee níhi nɛ nyɛɛ se nɛ ɔ: Moo ngɔ juɛmi nɛ da kɛ kane Baiblo ɔ, mo hla níhi nɛ o ma nyɛ maa ngɔ kɛ tsu ní ngɛ si himi mi; mo bi o he sanehi kaa ‘Kɛ ma plɛ kɛ ngɔ munyu nɛ ɔ kɛ ye bua ni kpahi ha kɛɛ?’; nɛ o ngɔ níhi nɛ waa kɛ peeɔ níhi a mi hlami ɔ kɛ tsu ní konɛ o le níhi fuu nɛ kɔɔ nɔ́ nɛ o kane ɔ he.​—w16.05, bf. 28-30.

Ke Kristofo no ko he ye kaa a ma tle gbogboehi a si nɛ e suɔlɔ ko gbo ɔ, anɛ tɔmi ngɛ he kaa e maa ye aywilɛho lo?

Ke Kristofo no ko ngɛ hemi kɛ yemi kaa a ma tle gbogboehi a si ɔ, lɔ ɔ tsɔɔ we kaa ke e suɔlɔ ko gbo ɔ, e be aywilɛho yee. Benɛ Abraham yo Sara gbo ɔ, e ye kɔmɔ, nɛ e nyɛ ya ha lɛ. (1 Mose 23:2) Bɔɔbɔɔbɔɔ ɔ, aywilɛho ɔ nya maa ba si.​—wp16.3, bf. 4.

Nyumu nɛ e kpla womi ngmami nɔ́ ko ngɛ e kasa nya nɛ a tu e he munyu ngɛ Ezekiel yi 9 ɔ mi ɔ daa si kɛ ha mɛnɔ, nɛ mɛnɔmɛ nyumuhi ekpa amɛ nɛ a hɛɛ awi yemi dadehi ɔ hu daa si kɛ ha?

Wa le kaa a daa si kɛ ha hiɔwe tabo ɔ nɛ kpata Yerusalem hɛ mi ɔ, nɛ mɛ nɔuu lɛ a ma kpata Satan je yaya nɛ ɔ hɛ mi ngɛ Harmagedon ta a mi. Mwɔnɛ ɔ, nyumu nɛ kpla womi ngmami nɔ́ ɔ daa si kɛ ha Yesu Kristo nɛ e ngɛ nihi nɛ a ma he a yi wami ɔ kadie.​—w16.06, bf. 16-17.

Mɛni si fɔfɔɛhi a mi nɛ Baiblo ɔ gblee?

Baiblo ɔ nyɛ nɛ e gblee si fɔfɔɛhi nɛ nyɛɛ se nɛ ɔmɛ a mi. (1) Blema a, a ngma Baiblo ɔ ngɛ níhi nɛ a kɛ lohwe he womi kɛ ngɔwu pee ɔ nɔ, nɛ jinɛ a ma nyɛ ma puɛ; (2) Ma nɔ yeli kɛ osɔfohi bɔ mɔde kaa a ma kpata Baiblo ɔ hɛ mi; nɛ (3) ni komɛ hu ka kaa a ma tsake e mi munyu ɔmɛ.​—wp16.4-E, bf. 4-7.

Mɛni Kristofo no ko ma nyɛ maa pee konɛ e pee e si himi kpokploo?

Moo le níhi tutuutu nɛ o hia, nɛ o ko puɛ sika ngɛ níhi nɛ a he hia we tsɔ ɔ a he. Moo to o sika he blɔ nya saminya. Ke o ngɛ ní komɛ nɛ a he hia we ɔ, moo jua, aloo ngɔɔ kɛ ke nihi, aloo moo ngɔ kɛ fɔ he, nɛ ke o ye nɔ ko hiɔ ɔ, yaa wo. Mo gbɔ be nɛ o kɛ tsuɔ he lo nya ní tsumi ɔ nɔ, nɛ o susu bɔ nɛ o ma plɛ kɛ bli o sɔmɔmi ní tsumi ɔ mi ha a he.​—w16.07, bf. 10.

Mɛni lɛ Baiblo ɔ tsɔɔ kaa e he jua wa pe sika tsu aloo sika hiɔ ɔ?

Hiob 28:12, 15 tsɔɔ kaa nile nɛ je hiɔwe ɔ he jua wa pe sika tsu aloo sika hiɔ. Bemi nɛ o ngɛ nile nɛ ɔ hlae ɔ, moo bɔ mɔde nɛ o ba o he si, nɛ o ha nɛ o hemi kɛ yemi ɔ mi nɛ wa.​—w16.08, bf. 18-19.

Mwɔnɛ ɔ, e da blɔ kaa nyɛminyumu ko maa to kpɛni lo?

Ngɛ ni komɛ a kusumi nya a, ke nɔ ko dla e kpɛni nɛ e he tsɔ ɔ, e saa nihi a hɛmi nɛ a buɔ lɛ, nɛ e ha we nɛ nihi nɛ a kua Matsɛ Yemi sɛ gbi ɔ. Se kɛ̃ ɔ, nyɛmimɛ nyumu komɛ ma nyɛ maa ma a juɛmi nya si kaa a be kpɛni toe. (1 Kor. 8:9) Ngɛ ni komɛ hu a kusumi nya a, a tui kpɛni, nɛ e dɛ blɔ kaa Kristofohi maa to kpɛni.​—w16.09, bf. 21.

Mɛni he je nɛ wa ma nyɛ ma he David kɛ Goliat a sane ɔ nɛ Baiblo ɔ tu he munyu ɔ nɛ waa ye ɔ?

Goliat kami maa pee nine blimi nyɔngma kɛ etɛ (mita 2.9). E ka pe nɔmlɔ nɛ a le lɛ kaa e ka pe nɔ tsuaa nɔ mwɔnɛ ɔ. Nihi nɛ a tsuaa si kɛ hlaa blema níhi a mi ɔ ya na blema ningma ko nɛ tu David we ɔ he munyu, nɛ níhi nɛ Yesu de ngɛ David he ɔ tsɔɔ kaa David ji nɔ ko nɛ e hi si hyɛ. Hehi nɛ David kɛ Goliat hi nɛ a tsɔɔ mi fitsofitso ɔ hu tsɔɔ kaa sane nɛ ɔ ya nɔ niinɛ.​—wp16.4, bf. 13.

Mɛni blɔ nɔ nɛ e slo juɛmi nitsɛnitsɛ ngɛ nile kɛ nɔ́ sisi numi he?

Ke nɔ ko kase níhi fuu, aloo e le níhi fuu nɛ ji anɔkuale ɔ, a deɔ ke jamɛatsɛ ɔ ngɛ nile. Ke nɔ ko nyɛɔ yɔseɔ bɔ nɛ nɔ́ ko kɛ nɔ́ ko kpaa gbi ha a, a deɔ ke jamɛatsɛ ɔ nuɔ nɔ́ sisi. Se nɔ nɛ ngɛ juɛmi ɔ ngɔɔ nile kɛ piɛɔ nɔ́ sisi numi he nɛ e kɛ tsuɔ ní.​—w16.10, bf. 18.