Bɔfo Paulo ngma sɛ womi kɛ ya ha Timoteo nɛ́ lɛ hu e ji asafo mi nɔkɔtɔma a ke: “I kɛ hɛdɔ ngɛ mo fãe ngɛ Mawu kɛ Kristo Yesu kɛ hiɔwe bɔfohi nɛ a hla amɛ a hɛ mi kaa o ngɔ blɔ tsɔɔmi nɛ ɔmɛ kɛ tsu ní nɛ́ nɔ he juɛmi yayami nami aloo nɔ mi hlami kó hi mi.”—1 Tim. 5:21.

Bɔ nɛ pee nɛ waa le bɔfo nɛ ɔmɛ ɔ, wa ma susu bɔfohi nɛ a be nyɛe maa piɛɛ bɔfohi nɛ a hla a, a he ɔ he. Ngɛ anɔkuale mi ɔ, pi nihi 144,000 nɛ a pɔ mɛ nu ɔ he munyu nɛ a ngɛ tue. Benɛ Paulo ngma Timoteo sɛ womi ɔ, jamɛ a be ɔ, a tle we nihi nɛ a pɔ mɛ nu ɔ a kpɛti nɔ ko si kɛ yɛ hiɔwe lolo. Jehanɛ hu ɔ, Yesu kaseli ɔmɛ kɛ ni kpahi nɛ a pɔ mɛ nu ɔ ba pee we mumi mi adebɔ níhi lolo. Enɛ ɔ he ɔ, a be nyɛe maa pee “bɔfohi nɛ a hla” a.—1 Kor. 15:​50-54; 1 Tɛs. 4:​13-17; 1 Yoh. 3:2.

Jehanɛ hu ɔ, tsa pi bɔfo ɔmɛ nɛ a tsɔ atuã loko Nyu Kpekpemi ɔ ba a ji “bɔfohi nɛ a hla” a. Bɔfo nɛ ɔmɛ fĩ Satan se, nɛ a ba pee daimoniohi, nɛ a ji Yesu he nyɛli. (1 Mose 6:2; Luka 8:​30, 31; 2 Pet. 2:4) Hwɔɔ se ɔ, a ma sake mɛ kɛ wo muɔ voo ɔ mi jeha 1,000. Lɔ ɔ se ɔ, a ma kpata a kɛ Abosiami tsuo a hɛ mi.—Jud 6; Kpoj. 20:​1-3, 10.

Enɛ ɔ he ɔ, e ma nyɛ maa ba kaa “bɔfohi nɛ a hla” a nɛ Paulo tu a he munyu ɔ ngɛ hiɔwe, nɛ a yeɔ “Mawu kɛ Kristo Yesu” anɔkuale.

Bɔfohi akpehi abɔ nɛ a yeɔ anɔkuale ɔ ngɛ hiɔwe. (Heb. 12:​22, 23) Enɛ ɔ he ɔ, e sɛ nɛ wa susu kaa mɛ tsuo a tsuɔ ní tsumi kake ngɛ be kake mi. (Kpoj. 14:​17, 18) Mo kai kaa Yehowa ha nɛ bɔfo kake pɛ kpata Asiria tabuli 185,000 ɔ hɛ mi. (2 Ma. 19:35) E ma nyɛ maa ba kaa a ngɔ ní tsumi kɛ wo bɔfohi babauu a dɛ kaa a “ba je níhi tsuo nɛ tɔ̃tɔ̃ɔ nɔ nane, kɛ nihi tsuo nɛ a yi mlaa nɔ ɔ kɛ je [Yesu] Matsɛ Yemi ɔ mi.” (Mat. 13:​39-41) Eko ɔ, bɔfo komɛ hu “ma bua nihi nɛ [a] hla amɛ a nya” kɛ ho hiɔwe ya. (Mat. 24:31) Nɛ a fã ni kpahi hu kaa ‘a bu wa he ngɛ wa blɔ ɔmɛ tsuo a nɔ.’—La 91:11; Mat. 18:10; kɛ to Mateo 4:11 ɔ he; Luka 22:43.

Enɛ ɔ he ɔ, “bɔfohi nɛ a hla” a nɛ a tu a he munyu ngɛ 1 Timoteo 5:21 ɔ ji bɔfohi nɛ a ngɔ ní tsumi klɛdɛɛ ko kɛ wo a dɛ kaa a ye bua Mawu we bi ngɛ asafo ɔ mi. Ngɛ Paulo munyu ɔ mi ɔ, e ngɔ ga womi nɛ nile ngɛ mi kɛ ha asafo mi nikɔtɔmahi konɛ a le bɔ nɛ a ma plɛ kɛ tsu a blɔ nya ní tsumihi ha, nɛ e tsɔɔ hu kaa e sa nɛ asafo ɔ mi bimɛ ɔmɛ nɛ a je bumi kpo kɛ tsɔɔ nikɔtɔma amɛ. Paulo tsɔɔ kaa ke asafo mi nikɔtɔma amɛ ngɛ a blɔ nya ní tsumihi a he ní tsue ɔ, e sɛ nɛ a ná nɔ ko he ‘juɛmi yaya aloo a hla nihi a mi.’ Jehanɛ hu ɔ, e sa nɛ a susu níhi a he saminya loko a mwɔ yi mi kpɔhi. E he hia wawɛɛ kaa asafo mi nikɔtɔmahi nɛ a ngɔ Paulo ga womi ɔ kɛ tsu ní, ejakaa a daa si “ngɛ Mawu kɛ Kristo Yesu kɛ hiɔwe bɔfohi nɛ a hla amɛ a hɛ mi,” nɛ tsɔɔ kaa Yehowa kɛ Yesu kɛ bɔfo ɔmɛ nɛ a hla a ngɛ mɛ hyɛe. Enɛ ɔ tsɔɔ heii kaa a hla bɔfo komɛ kaa a ye bua asafo ɔ. Jehanɛ hu ɔ, a poɔ Mawu we bi a he piɛ, nɛ a yeɔ buaa mɛ ngɛ fiɛɛmi mi, nɛ a ya deɔ Yehowa níhi nɛ a na a.—Mat. 18:10; Kpoj. 14:6.