A TSƐƐ ye papaa ke Arthur. E kɛ Mawu jami fiɛ we, nɛ e bɔ mɔde kaa e ma ba pee Mɛtɔdisi osɔfo. Se benɛ e kane Baiblo Kaseli ɔmɛ a womi ko nɛ e kɛ mɛ bɔni bɔmi ɔ, e juɛmi tsake. E ha nɛ a baptisi lɛ ngɛ jeha 1914 ɔ mi benɛ e ye jeha 17. Jamɛ a be ɔ mi ɔ, a ngɛ kekleekle je mi ta a hwue, nɛ a fɔ lɛ nine kaa e ba pee ta bulɔ. Akɛnɛ e sume nɛ e kɛ e he nɛ wo ta hwumi mi he je ɔ, a wo lɛ tsu nyɔhiɔ nyɔngma ngɛ Kingston Tsu Womi He nɛ ngɛ Ontario, ngɛ Canada. Benɛ a je ye papaa ngɛ tsu ɔ mi pɛ nɛ e je blɔ gbami ní tsumi ɔ sisi.

Ngɛ jeha 1926 mi ɔ, Arthur Guest kɛ Hazel Wilkinson sɛ gba si himi mi. Hazel Wilkinson yayo kase anɔkuale ɔ ngɛ jeha 1908 ɔ mi. A fɔ mi April 24, 1931. A fɔ wɔ ni eywiɛ, nɛ imi ji nɔ nɛ to nɔ enyɔ. Wa weku ɔ tsuo suɔ Yehowa jami, nɛ bɔ nɛ wa papaa suɔ Baiblo ɔ ha a ha nɛ wɔ hu wa bua jɔ Mawu Munyu ɔ he. Weku ɔ tsuo peeɔ kake kɛ ya fiɛɛɔ ngɛ wehi a mi daa.—Níts. 20:20.

Je mi ta enyɔne ɔ fɛ ngɛ jeha 1939 ɔ mi, nɛ jeha kake se ɔ, a tsi Yehowa Odasefohi a ní tsumi ɔ nya ngɛ Canada. A haa nɛ nihi nɛ a ngɛ amlaalo sukuuhi a mi ɔ kɛ a he woɔ ma he suɔmi kusumihi a mi. Kusumi nɛ ɔmɛ ekomɛ ji aflangaa ngmami, kɛ ma la lami. Ke a ma kusumi nɛ ɔmɛ peemi ɔ, kɛkɛ a je i kɛ ye nyɛmiyo nɔkɔtɔma Dorothy kpo kɛ je sukuu tsu ɔ mi. Nyakpɛ sane ji kaa, ligbi ko ɔ, akɛnɛ ye tsɔɔlɔ ɔ suɔ kaa e maa gbe mi zo he je ɔ, e tsɔɔ kaa fɔ̃lɔ ji mi. Benɛ wa kpa sukuu ɔ, ye sukuu bi ɔmɛ a kpɛti nihi fuu ye ye he fɛu, nɛ a tsitsɛɛ mi kɛ fɔ zugba. Se nɔ́ nɛ a pee ɔ mohu wo mi he wami kaa ma “bu Mawu tue kaa nɔ yelɔ mohu pe adesa.”—Níts. 5:29.

Ngɛ July 1942 ɔ mi ɔ, i ha nɛ a baptisi mi ngɛ ama tɔ ko mi ngɛ ngmɔ ko mi. Jamɛ a be ɔ, i ye jeha 11. Ke a ha sukuu blɔ ɔ, i tsuɔ blɔ gbali a wali ní tsumi ɔ eko. Ngɛ jeha ko mi ɔ, i kɛ nyɛmimɛ nyumuhi etɛ  komɛ ya fiɛɛ ha tso hɛli komɛ ngɛ zugba kpɔ nɛ a kɛ wui asafo ko dɛ ɔ mi ngɛ Ontario yiti je.

Ngɛ May 1, 1949 ɔ mi ɔ, i bɔni sɔmɔmi kaa daa blɔ gbalɔ. Akɛnɛ asafo ɔ ní tsumi kɔni ɔ ngɛ tsuhi mae jamɛ a be ɔ mi he je ɔ, ngɛ December kekleekle ligbi ɔ nɔ ɔ, a fɔ̃ mi nine kaa ma ba sɔmɔ ngɛ Canada Betel ɔ. A ha nɛ i ya tsu ní ngɛ he nɛ a fiaa womi ngɛ ɔ, nɛ i kase bɔ nɛ a kɛ womi fiaami klama a tsuɔ ní ha. I tsu ní nyɔnyɔɔnyɔ otsi komɛ kɛ fia dɛ womi ko nɛ tsɔɔ bɔ nɛ a ngɛ Yehowa we bi yi mi wae ngɛ Canada ha a.

Pee se ɔ, a ha nɛ i ya tsu ní ngɛ Ní Tsumi He Nɛ Hyɛɛ Sɔmɔmi Ní Tsumi ɔ Nɔ ɔ. A ha mi ní tsumi kaa ma bi blɔ gbali nɛ a yaa sɔmɔ ngɛ Quebec ɔ sane. Jamɛ a be ɔ, a ngɛ nyɛmimɛ ɔmɛ a yi mi wae wawɛɛ ngɛ Quebec. Nyɛmimɛ nɛ ɔmɛ a kpɛti nɔ kake ji Mary Zazula nɛ e je Edmonton, ngɛ Alberta. Akɛnɛ e kɛ e nyɛminyumu Joe kua kaa a be Baiblo ɔ kasemi kpae he je ɔ, a fɔli nɛ a ji Ortodɔksbi nɛ a kɛ a jami ɔ fiɛ we ɔ fie mɛ kɛ je we mi. Ngɛ June 1951 ɔ mi ɔ, a baptisi mɛ ni enyɔ ɔmɛ tsuo, nɛ nyɔhiɔ ekpa se ɔ, a je blɔ gbami ní tsumi ɔ sisi. Benɛ i kɛ Mary ngɛ ní sɛɛe ɔ, ye bua jɔ bɔ nɛ e suɔ Mawu jami ha a he. I de ye he ke, ‘Ke nɔ́ kpa ko pui mi matahu ɔ, lɛɛ yo nɛ i kɛ lɛ maa sɛ gba si himi mi ji nɛ ɔ nɛ.’ Ngɛ e we nyɔhiɔ nɛɛ se ɔ, wa sɛ gba si himi mi ngɛ January 30, 1954. E we otsi ɔ, a fɔ wɔ nine kaa waa ba nɛ a tsɔse wɔ kɛ ha kpɔ mi nɔ hyɛmi ní tsumi ɔ. I kɛ jeha enyɔ nɛ nyɛɛ se ɔ sɔmɔ kaa kpɔ mi nɔ hyɛlɔ ngɛ Ontario yiti je, be mi nɛ ye yoɔ piɛɛ ye he.

Benɛ je kɛ wɛ fiɛɛmi ní tsumi ɔ ngɛ yiblii woe ɔ, a fia adafi kaa a ngɛ ma se sane kpakpa fiɛɛli fuu hlae. Wa susu kaa ke wa ma nyɛ maa da fĩɛ kɛ pwɔmi nɛ a dooɔ nɔ nya nɛ a ngɛ Canada a nya a, lɛɛ wa ma nyɛ maa da si fɔfɔɛ fɛɛ si fɔfɔɛ nya ngɛ he fɛɛ he nɛ wa ma ya sɔmɔ ngɛ. Wa gbe Gilead Sukuu nɛ ji nyingmi enyɔ kɛ kpaagone ɔ nya ngɛ July 1956 mi, nɛ ngɛ November a mi ɔ, a ha nɛ wa ya sɔmɔ ngɛ Brazil.

Benɛ wa su asafo ɔ ní tsumi kɔni nɛ ngɛ Brazil ɔ, a ha nɛ wa le kaa Portugal gbi lɛ a tuɔ ɔ ngɛ lejɛ ɔ. A tsɔɔ wɔ nya blimi munyu kpitikpiti komɛ nɛ waa kɛ maa je ní sɛɛmi sisi, kɛ munyu kpiti ko nɛ wa ma nyɛ maa ngɔ kɛ ha womi tɛtlɛɛ ɔmɛ eko ngɛ hɛngmɛfia kake mi. Lɔ ɔ se ɔ, a ha nɛ wa piɛɛ a he kɛ ya fiɛɛmi. Ke wetsɛ ko ná munyu ɔ he bua jɔmi ɔ, a woɔ wɔ ga kaa wa ma nyɛ maa kane ngmami ko nɛ e tsɔɔ bɔ nɛ si himi ɔ maa hi ha ngɛ Mawu Matsɛ Yemi ɔ mi kɛ tsɔɔ lɛ. Kekle ligbi nɛ wa ya fiɛɛmi ɔ, yo ko bu munyu ɔ tue wawɛɛ, nɛ i kane Kpojemi yi 21:3, 4 ɔ kɛ ha lɛ, lɔ ɔ se pɛ nɛ i hɛli! Lejɛ ɔ dɔɔ la, nɛ i nyɛ we ma da la dɔmi ɔ nya. Nyagba nɛ ɔ ba pee nɔ́ ko nɛ e sa nɛ ma hwu kɛ si daa.

 Campos ma a ji wa zugba kpɔ nɛ a kɛ ha wɔ kaa wa tsu ní ngɛ mi. Amlɔ nɛ ɔ, asafohi 15 nɛ ngɛ lejɛ ɔ. Benɛ wa ya lejɛ ɔ, kuu ko nɛ e tsɔ e he pɛ lɛ ngɛ ma a mi, kɛ ma se sane kpakpa fiɛɛli a we nɛ nyɛmimɛ yihi eywiɛ nɛ a ngɛ mi. Nyɛmimɛ yi nɛ ɔmɛ ji Esther Tracy, Ramona Bauer, Luiza Schwarz, kɛ Lorraine Brookes (amlɔ nɛ ɔ a tsɛɛ lɛ Wallen). Ngɛ we ɔ mi ɔ, ye ní tsumi ji kaa ma fɔ níhi a he, nɛ ma hla lɛ́ nɛ a kɛ maa hoo ní. Hɔɛgbi gbɔkuɛ ko nɛ wa kase wa Hwɔɔmi Mɔ ɔ ta a, wa ná nubwɔ ko nɛ wa hyɛ we lɛ blɔ. Jamɛ a be ɔ mi ɔ, ye yo ɔ hwɔɔ si ngɛ sɛ ko nɔ nɛ e ngɛ e he jɔɔe, nɛ wa ngɛ níhi nɛ ya nɔ jamɛ a ligbi ɔ he ní sɛɛe. Benɛ e wo e yi nɔ ngɛ sɔnue ɔ nɔ ɔ, o ba nɛ sinɔ ko. We ɔ mi tsuo pee hoo kɛ ya si benɛ i gbe sinɔ ɔ!

I kɛ jeha kake kase Portugal gbi ɔ, lɔ ɔ se ɔ, a ha nɛ i sɔmɔ kaa kpɔ mi nɔ hyɛlɔ. Wa pee wa si himi kpokploo ngɛ kɔpehi nɛ wa ya sɔmɔ ngɛ ɔ. Oslabai he wami be lejɛ ɔ, wa hwɔɔ tsatsa nɔ, nɛ waa kɛ okpɔngɔ kɛ tlɔɔke lɛ hiaa blɔ. Ke wa yaa fiɛɛ ngɛ zugba kpɔhi nɛ a kɛ wui asafo ko dɛ ɔ mi ɔ, waa kɛ tlee lɛ yaa. Wa haiɔ tsu ngɛ lejɛ ɔ. Asafo ɔ ní tsumi kɔni ɔ ngɔ womi tɛtlɛɛhi 800 kɛ mane wɔ konɛ wa kɛ tsu fiɛɛmi ní tsumi ɔ. E he ba hia nɛ waa ya posɔfisi si abɔ konɛ wa ya muɔ womi nɛ ɔmɛ kɛ ba wa hi he ɔ.

Ngɛ jeha 1962 ɔ mi ɔ, a pee Matsɛ Yemi Sɔmɔmi Sukuu ngɛ Brazil ma a mi tsuo kɛ ha nyɛmimɛ nyumuhi, kɛ yihi nɛ a ji ma se sane kpakpa fiɛɛli. I kɛ nyɔhiɔ ekpa ya tsɔɔ ní ngɛ sukuu nɛ ɔmɛ a mi, se Mary piɛɛ we ye he. I ya tsɔɔ ní ngɛ Manaus, Belém, Fortaleza, Recife, kɛ Salvador. A ha nɛ i to kpokpa nɔ kpe ko he blɔ nya ngɛ kpehe ko nɛ he biɛ ngɛ Manaus. Hiɔmi ngua ko nɛ nɛ ɔ ha nɛ nyu nɛ wa maa nu ɔ puɛ, nɛ e puɛ he nɛ wa maa pee ní yemi he ngɛ ɔ hulɔ. (Jamɛ a be ɔ mi ɔ, a haa niye ní ngɛ kpe sisi.) I ya na ta buli nɛ a ngɛ lejɛ ɔ, nɛ ta buli a nɔkɔtɔma ko nɛ e mi mi jɔ ɔ to blɔ nya nɛ a ba ha wɔ nyu nunui nɛ maa su wɔ kɛ kpe ɔ peemi. E ha nɛ ta buli ɔmɛ a kpɛti ni komɛ ba ma gba agboagbohi enyɔ konɛ wa kɛ pee ní hoomi he, kɛ ní yemi he.

Benɛ i hia blɔ ɔ, Mary fiɛɛ ngɛ kpokpa ko nɛ a kɛ Portugal gbi yeɔ jua ngɛ ɔ nɔ. Sika he nihi nɛ a ngɛ kpokpa a nɔ ɔ a juɛmi wawɛɛ. Mary nyɛ we nɛ e kɛ a kpɛti nɔ ko nɛ sɛɛ Baiblo ɔ he ní, enɛ ɔ he ɔ, e de nyɛmimɛ komɛ nɛ a tsuɔ ní ngɛ Betel ɔ ke: “Ye nane be Portugal mae gblee.” Se nyakpɛ sane ji kaa, e kɛ we nɛ wa nine su sɛ womi nɔ kaa wa ya sɔmɔ ngɛ Portugal! Jamɛ a be ɔ, a tsi wa fiɛɛmi ní tsumi ɔ nya ngɛ lejɛ ɔ. E ngɛ mi kaa sisije ɔ, Mary he mi po mohu lɛɛ, se wa kplɛɛ nɔ, nɛ wa ya sɔmɔ ngɛ lejɛ ɔ.

Ngɛ August 1964 ɔ, wa ya hia si ngɛ Lisbon ngɛ Portugal. Jamɛ a be ɔ mi ɔ, polisihi nɛ a ngɛ Portugal nɛ a je we a he si ɔ (PIDE) kɛ a hɛ pi wa  nyɛmimɛ ɔmɛ, nɛ a ngɛ mɛ yi mi wae. Enɛ ɔ he ɔ, nile ngɛ mi kaa wa nyɛmimɛ ɔmɛ ba be wɔ kpee ngɛ blɔ ɔ nɔ, nɛ e sɛ nɛ waa kɛ Odasefohi nɛ ngɛ lejɛ ɔ nɛ bɔ amlɔ nɔuu. Wa ya hi si ngɛ nibwɔhi a to he, nɛ wa mlɛ kɛ ya si be nɛ a ha wɔ blɔ kaa wa ma nyɛ maa hi ma a mi. Benɛ a ha wɔ he blɔ kaa wa ma nyɛ maa hi ma a mi ɔ, wa hai tsu. Nyagbenyagbe ɔ, wa nyɛ nɛ waa kɛ asafo ɔ ní tsumi kɔni nɛ ngɛ lejɛ ɔ tu munyu ngɛ January 1965 ɔ mi. Benɛ wa ya asafo mi kpe nɛ ji kekleekle nɔ́ ngɛ lejɛ ɔ, wa bua jɔ wawɛɛ, ejakaa nyɔhiɔ enuɔ ba be nɛ wa yɛ asafo mi kpe hyɛ!

Akɛnɛ a tsi a nya kaa a ko pee asafo mi kpehi ngɛ Matsɛ Yemi Asahi a nɔ he je ɔ, a peeɔ asafo mi kpehi ngɛ nyɛmimɛ a wehi a mi. Enɛ ɔ he ɔ, polisi ɔmɛ ba hlaa nyɛmimɛ a wehi a mi daa ligbi. A nuu nyɛmimɛ lafahi abɔ kɛ ho polisi tesia ya konɛ a ya je a nya. A suɔ kaa nyɛmimɛ ɔmɛ nɛ a ha mɛ nyɛmimɛ nɛ a hyɛɛ asafo mi kpehi a nɔ ɔ a biɛ. Enɛ ɔ ji nɔ́ titli he je nɛ a waa mɛ yi mi ɔ nɛ. Enɛ ɔ he ɔ, nyɛmimɛ ɔmɛ ngɔɔ biɛ komɛ kaa José aloo Paulo kɛ tsɛɔ a sibi pe nɛ a kɛ a biɛ nitsɛ ma tsɛ a he. Lɔ ɔ he ɔ, wɔ hu wa pee jã.

Oti nɛ waa kɛ ma wa hɛ mi ji kaa wa ma ha nyɛmimɛ ɔmɛ mumi mi niye ní. Mary ní tsumi ji kaa e maa fia Hwɔɔmi Mɔ ɔ mi munyuhi nɛ wa kaseɔ ɔ, kɛ womi kpahi kɛ wo womi ko nɛ a tsɛɛ lɛ ke stencil ɔ nɔ, nɛ waa kɛ fiaa womi ɔ fuu.

Ngɛ June 1966 mi ɔ, a ye sane ko nɛ sa kadimi wawɛɛ ngɛ Lisbon. A sama Feijó asafo ɔ mi bimɛ nɛ a yibɔ ji 49 ɔ ngɛ kojomi he ɔ kaa a pee kpe ko nɛ a be he blɔ kaa a peeɔ ngɛ nɔ ko we mi. I pee ye he kaa kojolɔ nɛ i bi nyɛmimɛ ɔmɛ sane konɛ wa kɛ dla wa he kɛ ha kojomi he ɔ yami. Wa le kaa wa be kunimi yee, se wa le hu kaa enɛ ɔ ji he blɔ nɛ waa kɛ maa ye nihi fuu odase. Mlaa lelɔ nɛ tu munyu ha wɔ ɔ kɛ kã tsɛ Gamaliel nɛ hi si ngɛ kaseli ɔmɛ a be ɔ mi ɔ munyu ɔmɛ a se. (Níts. 5:33-39) Sane ɔ he si ngɛ ma a mi tsuo, nɛ a bu nyɛmimɛ nyumuhi kɛ yihi 49 ɔ fɔ, nɛ a wo mɛ tsu. Nɔ nɛ se kɛ ngɛ tsu womi ɔ mi ɔ ye nyɔhiɔ enuɔ kɛ fã, nɛ nɔ nɛ se kɛ we kulaa a ye ligbi 45 ngɛ tsu ɔ mi. Wa bua jɔ kaa mlaa lelɔ nɛ tu munyu ha wɔ ɔ kplɛɛ nɔ nɛ a kɛ lɛ kase Baiblo ɔ, nɛ e bɔni asafo mi kpehi yami loko e gbo.

Ngɛ December 1966 mi ɔ, a hla mi kaa ma hyɛ asafo ní tsumi kɔni ɔ nɔ, nɛ behi fuu ɔ, mlaa sanehi a he ní nɛ i tsuɔ. Wa ha nɛ a yɔse kaa ngɛ mlaa nya a, Yehowa Odasefohi ngɛ he blɔ kaa a jaa Mawu, nɛ e sɛ nɛ nɔ ko nɛ tsi a nya. (Filip. 1:7) Nyagbenyagbe ɔ, ngɛ December 18, 1974 ɔ, a kɛ wa sɔmɔmi ní tsumi ɔ wo mlaa sisi ngɛ Portugal. Nyɛminyumu Nathan Knorr kɛ Nyɛminyumu Frederick Franz nɛ a je asafo ɔ ní tsumi yi ɔ ba slaa wɔ ngɛ Portugal. A ba piɛɛ wa he kɛ pee kpe ko nɛ sa kadimi wawɛɛ ngɛ Oporto kɛ Lisbon. Nihi nɛ a ba kpe nɛ ɔ a yibɔ ji 46,870.

 Yehowa bli blɔ nɛ fiɛɛmi ní tsumi ɔ ngɛ nɔ yae ngɛ wo kpɔ slɔɔtohi nɛ a tuɔ Portugal gbi ɔ ngɛ ɔ a nɔ. Wo kpɔ nɛ ɔmɛ eko ji Azores, Cape Verde, Madeira, kɛ São Tomé kɛ Príncipe. Ngɛ jeha 1988 ɔ mi ɔ, a ha wɔ he blɔ kaa wa bli asafo ɔ ní tsumi kɔni ɔ mi. Ngɛ April 23, 1988 ɔ, Nyɛminyumu Milton Henschel ba nyɛɛ hɛ mi nɛ a jɔɔ tsu ehe ɔmɛ a nɔ kɛ ha Yehowa. Nihi nɛ a ba kpe nɛ ɔ sisi ɔ yibɔ ji 45,522. Nyɛmimɛ nyumuhi kɛ yihi 20 nɛ be ko nɛ be ɔ, a sɔmɔ kaa ma se sane kpakpa fiɛɛli ngɛ Portugal ɔ ba kpe klɛdɛɛ nɛ ɔ. Benɛ wa na mɛ ɔ, wa bua jɔ wawɛɛ.

Nyɛmimɛ nɛ a yeɔ anɔkuale nɛ waa kɛ mɛ bɔ jehahi fuu ɔ ha nɛ wa ná jɔɔmihi fuu. I piɛɛ Nyɛminyumu Theodore Jaracz he kɛ ya slaa asafo ɔ ní tsumi kɔni ko. I kase nɔ́ ko nɛ he hia wawɛɛ ngɛ slaami nɛ ɔ mi. Asafo ɔ ní tsumi he kɔni ɔ nɛ wa ya slaa a kɛ haomi ko nɛ nya wa ngɛ kpee, nɛ Asafo ɔ Ní Tsumi Kɔni ɔ Ajla Toli ɔmɛ pee nɔ́ tsuaa nɔ́ nɛ a ma nyɛ konɛ a tsu sane ɔ he ní. Bɔ nɛ pee nɛ a ko ye tsui tsɔ ɔ, Nyɛminyumu Jaracz de ke: “Amlɔ nɛ ɔ ji be nɛ e sa kaa a ngmɛ mumi klɔuklɔu ɔ blɔ nɛ e tsu ní.” Jeha komɛ nɛ be ɔ, i kɛ ye yo Mary ya slaa Brooklyn. Ngɛ jamɛ a blɔ hiami ɔ mi ɔ, i kɛ ye yo ɔ kɛ Nyɛminyumu Franz kɛ ni bɔɔ komɛ bua wa he nya gbɔkuɛ nya si ko. Benɛ wa de Nyɛminyumu Franz kaa e de wɔ nɔ́ ko nɛ e yɔse ngɛ jehahi fuu nɛ e kɛ sɔmɔ Yehowa a mi ɔ, e de ke: “Nɔ́ nɛ ma wo nyɛ he wami kaa nyɛɛ pee ji: Níhi a mi hi jio, níhi a mi wa jio, nyɛɛ ya nɔ nɛ nyɛɛ kɛ Yehowa asafo ɔ nɛ bɔ. Asafo nɛ ɔ pɛ nɛ ngɛ sane kpakpa a nɛ kɔɔ Mawu Matsɛ Yemi ɔ he ɔ fiɛɛe kaa bɔ nɛ Yesu fã e kaseli ɔmɛ kaa a pee ɔ!”

I kɛ ye yo ɔ wa pee jã nɛ wa bua jɔ wawɛɛ. Ke wa kai slaami nɛ wa ya slaa asafo ɔ ní tsumi kɔni ɔmɛ ɔ, wa bua jɔɔ. Slaami nɛ ɔmɛ ha nɛ wa ná he blɔ kɛ je nihewi kɛ yihewi, kɛ nihi nɛ a wa ngɛ jeha mi nɛ a kɛ anɔkuale yemi ngɛ Yehowa sɔmɔe ɔ a yi, nɛ wa wo mɛ he wami konɛ a ya nɔ nɛ a gu blɔ klɛdɛɛ nɛ ɔ nɔ kɛ sɔmɔ Yehowa.

Amlɔ nɛ ɔ, jehahi fuu be, nɛ i kɛ ye yo ɔ tsuo wa ye jeha 80 kɛ se. Hiɔhi fuu ngɛ Mary nya gbae. (2 Kor. 12:9) Kahi nɛ waa kɛ kpe ɔ ha nɛ wa hemi kɛ yemi ɔ mi wa wawɛɛ, nɛ e wo wɔ he wami konɛ waa ya nɔ nɛ waa ye Yehowa anɔkuale. Ke wa kai jehahi fuu nɛ waa kɛ sɔmɔ Yehowa a, wa naa kaa niinɛ, Yehowa dloo wɔ ngɛ blɔhi fuu a nɔ. *