1, 2. (a) Mɛni susumi ekpaekpa nɛ nihi hɛɛ ngɛ he blɔ nɛ wa ngɛ kaa wa maa pee nɔ́ nɛ wa suɔ ɔ he? (b) Mɛni Baiblo ɔ de ngɛ he blɔ nɛ wa ngɛ kaa wa maa mwɔ wa yi mi kpɔ ɔ he, nɛ mɛni sane bimihi a he wa ma susu?

BENƐ e he ba hia kaa yo ko nɛ e mwɔ e yi mi kpɔ ngɛ lɛ nitsɛ e sane ko he ɔ, e de e huɛ ko ke: “Ko ha nɛ ma susu he; moo tsɔɔ mi nɔ́ nɛ ma pee. Lɔ ɔ peemi yi.” Yo ɔ ngɔɛ nike ní nɛ e Bɔlɔ ɔ kɛ ha lɛ ɔ kɛ tsu we ní, mohu ɔ, e suɔ kaa a tsɔɔ lɛ nɔ́ nɛ e pee. Mo hu nɛɛ? Anɛ ke pee ɔ, o suɔ kaa mo nitsɛ o maa pee juɛmi ngɛ o sanehi a he, aloo o suɔ kaa nihi nɛ a tsɔɔ mo nɔ́ nɛ o pee? Kɛ o naa he blɔ nɛ a kɛ peeɔ nɔ́ nɛ nɔ suɔ ɔ ha kɛɛ?

² Jeha lafahi abɔ ji nɛ ɔ nɛ nihi fuu ngɛ a juɛmi tsɔɔe ngɛ sane nɛ ɔ he. Ni komɛ he we yi kaa Mawu ha wɔ he blɔ kaa waa pee nɔ́ nɛ wa suɔ, ejakaa a susu kaa Mawu to nɔ́ nɛ wa maa pee ɔ kɛ fɔ si momo. Ni kpahi hu susuɔ kaa ja wa ná he yemi kulaa loko wa ma nyɛ maa pee nɔ́ nɛ wɔ nitsɛmɛ wa suɔ. Se loko wa ma nyɛ maa nu sane nɛ ɔ sisi saminya a, ja wa ha nɛ Mawu Munyu nɛ ji Baiblo ɔ ye bua wɔ. Mɛni he je? Baiblo ɔ ha nɛ wa le kaa Yehowa ha adesahi nike ní ko nɛ se be. Nike ní nɛ ɔ ji nyɛmi kɛ he blɔ nɛ wa ngɛ kaa wa maa pee juɛmi nɛ da ngɛ wɔ nitsɛmɛ wa sanehi a he. (Kane Yoshua 24:15.) Baiblo ɔ haa sane bimihi nɛ nyɛɛ se nɛ ɔ a heto: Kɛ e sa kaa waa ngɔ he blɔ nɛ wa ngɛ kaa wa maa mwɔ wa yi mi kpɔ ngɛ níhi a he ɔ kɛ tsu ní ha kɛɛ? Anɛ huzu ngɛ he blɔ  nɛ ɔ he lo? Ngɛ mɛni blɔ nɔ nɛ bɔ nɛ waa kɛ he blɔ nɛ ɔ tsuɔ ní ha a maa tsɔɔ bɔ nɛ wa suɔ Yehowa ha? Ke nihi mwɔ a yi mi kpɔ ngɛ nɔ́ ko he ɔ, mɛni wa ma nyɛ maa pee kɛ tsɔɔ kaa wa ngɛ bumi kɛ ha mɛ?

3. Kɛ Yehowa ngɔɔ he yemi nɛ e ngɛ ɔ kɛ tsuɔ ní ha kɛɛ?

³ Yehowa pɛ ji nɔ nɛ ngɛ he yemi nɛ huzu be he, nɛ wa ma nyɛ maa kase bɔ nɛ e kɛ he blɔ nɛ ɔ tsuɔ ní ha a. Kaa nɔ hyɛmi nɔ́ ɔ, e hla Israel ma a kaa “lɛ nitsɛ e ma pɔtɛɛ,” nɛ e kɛ e biɛ fɔ a nɔ. (5 Mose 7:6-8) Yehowa ti si gu kɛkɛ nɛ e pee juɛmi nɛ ɔ. E suɔ nɛ e ye si nɛ e wo Abraham jeha lafa komɛ nɛ be ɔ nɔ. (1 Mose 22:15-18) Jehanɛ hu ɔ, bɔ nɛ Yehowa kɛ he blɔ nɛ ɔ tsuɔ ní ha a kɛ e suhi nɛ ji suɔmi kɛ dami sane yemi ɔ kpaa gbi. Bɔ nɛ Yehowa plɛ kɛ tsɔse e ma nɛ ji Israel nɛ a kua anɔkuale jami behi fuu ha a maa enɛ ɔ nɔ mi. Ke a pia a he kɛ je a tsui mi ɔ, Yehowa jeɔ suɔmi kpo kɛ tsɔɔ ɔ mɛ, nɛ e naa mɛ mɔbɔ. Yehowa de ke: ‘Ma ha ye ma a maa kpale kɛ ba ye ngɔ, nɛ ma suɔ mɛ kɛ ye tsui tsuo.’ (Hos. 14:4, NW) Yehowa ngɔɔ he yemi nɛ e ngɛ ɔ kɛ tsuɔ ní konɛ ni kpahi nɛ a ná he se. Enɛ ɔ ji nɔ hyɛmi nɔ́ kpakpa nɛ wa ma nyɛ maa kase!

4, 5. (a) Mɛnɔ ji kekleekle nɔ nɛ Mawu ha lɛ he blɔ kaa e hla nɔ́ nɛ e suɔ, nɛ kɛ e kɛ nike ní nɛ ɔ tsu ní ha kɛɛ? (b) Mɛni sane bimi nɛ e sa kaa wa ti nɔ fɛɛ nɔ nɛ bi e he?

⁴ Benɛ Yehowa je adebɔ sisi ɔ, e ha bɔfohi kɛ adesahi he blɔ kaa a hla nɔ́ nɛ a suɔ. Mawu Bi tɛte ɔ ji kekleekle nɔ nɛ a ha lɛ he blɔ nɛ ɔ. Lɛ ji “Mawu nɛ a nɛ́ lɛ ɔ subai nɛ a naa.” (Kol. 1:15) Loko Yesu maa ba zugba a nɔ po ɔ, e hla kaa e maa ye e Tsɛ ɔ anɔkuale kɛ ya si nyagbe, nɛ e piɛɛ we Satan he kɛ tsɔ atua. Pee se benɛ Yesu ba zugba a nɔ ɔ, e hla kaa e be hae nɛ Mawu He Nyɛlɔ ngua a nɛ sisi lɛ. (Mat. 4:10) Gbɔkuɛ nɛ e nɔ jena Yesu ma gbo ɔ, e je e tsui mi kɛ sɔle ha Mawu. Munyu nɛ Yesu tu ɔ ma nɔ mi kaa e fia e pɛɛ si kaa e maa pee Mawu suɔmi nya ní. E de ke: “Tsaatsɛ, ke o suɔ ɔ, je nɔ́ nami kplu nɛ ɔ kɛ je ye blɔ mi. Se kɛ̃ ɔ, a ko pee nɔ́ nɛ imi i suɔ; se mohu a pee nɔ́ nɛ mo o suɔ.” (Luka 22:42) Nyɛ ha nɛ waa kase Yesu, nɛ waa ngɔ he blɔ nɛ wa ngɛ kaa wa maa hla nɔ́ nɛ wa suɔ ɔ kɛ wo Yehowa hɛ mi nyami, nɛ waa pee e suɔmi nya ní! Anɛ wa ma nyɛ maa pee jã lo?

⁵ Ee, wa ma nyɛ maa kase Yesu, ejakaa wɔ hu a bɔ wɔ ngɛ Mawu subai nɔ, nɛ wa je lɛ. (1 Mose 1:26) Se kɛ̃ ɔ, huzu ngɛ he yemi nɛ wa ngɛ ɔ he. Wa be nyɛe maa ye wa he kulaa kaa Yehowa. Mawu Munyu ɔ tsɔɔ kaa Mawu to huzu kɛ ha he yemi nɛ wa ngɛ ɔ, nɛ e sɛ nɛ waa be huzu nɛ sa nɛ Yehowa to kɛ ha wɔ nɛ ɔ he. Kaa nɔ hyɛmi nɔ́ ɔ, e sa nɛ yigbayihi nɛ a ba a he si kɛ ha a hunomɛ, konɛ bimɛ hu nɛ a ba a he si kɛ ha a fɔli. (Efe. 5:22; 6:1) Ngɛ mɛni blɔ nɔ nɛ huzu nɛ ɔ saa he blɔ nɛ wa ngɛ kaa wa maa hla nɔ́ nɛ wa suɔ ɔ he? Sane bimi nɛ ɔ heto ɔ ma nyɛ maa tsɔɔ kaa wa ma ná neneene wami loo wa be náe.

6. Mo ha nɔ́ hetomi nɔ́ kɛ tsɔɔ nɔ́ he je nɛ e hi kaa huzu ngɛ he yemi nɛ wa ngɛ ɔ he ɔ.

⁶ Anɛ he blɔ nɛ a kɛ peeɔ nɔ́ nɛ nɔ suɔ nɛ huzu ngɛ he ɔ ji he yemi nitsɛnitsɛ lo? Ee, e ji he yemi nitsɛnitsɛ! Mɛni he je? Huzu nɛ ngɛ he yemi nɛ wa ngɛ ɔ he ɔ ma nyɛ maa po wa he piɛ. Kaa nɔ hyɛmi nɔ́ ɔ, eko ɔ, akɛnɛ wa ngɛ he yemi he je ɔ, wa ma nyɛ maa hɛɛ lɔle kɛ ya he ko tsitsaa. Se ke o hɛɛ lɔle ngɛ gbɛjegbɛ ko nɛ a kɛ lɔle kudɔmi he mlaa tsu we ní ngɛ nɔ, nɔ fɛɛ nɔ nyɛɔ tuɔ fo bɔ nɛ e suɔ, aloo nɔ fɛɛ nɔ nyɛɔ guɔ he nɛ e suɔ ɔ, anɛ o be tsui yee lo? Ngɛ anɔkuale mi ɔ, o maa ye tsui. Jã kɛ̃ nɛ huzu nɛ Mawu to kɛ  ha wɔ ɔ ma ha nɛ wa ná he yemi nitsɛnitsɛ nɛ wa ngɛ ɔ he se. Bɔ nɛ pee nɛ wa yɔse nɔ́ he je nɛ nile ngɛ mi kaa wa be huzu nɛ Yehowa to kɛ ha wɔ ɔ he bee ɔ, ha nɛ wa susu Baiblo mi nɔ hyɛmi ní komɛ a he nɛ waa hyɛ.

7. (a) Ngɛ mɛni blɔ nɔ nɛ he blɔ nɛ Adam ngɛ kaa e maa hla nɔ́ nɛ e suɔ ɔ ha nɛ e je ekpa ngɛ lohwe ɔmɛ a he? (b) Moo tsɔɔ blɔ kake nɛ Adam gu nɔ nɛ e kɛ he blɔ nɛ e ngɛ ɔ tsu ní saminya.

⁷ Benɛ Mawu bɔ Adam ɔ, Mawu ha lɛ he blɔ kaa e hla nɔ́ nɛ e suɔ kaa bɔ nɛ e ha hiɔwe bɔfo ɔmɛ he blɔ ɔ. Enɛ ɔ ha nɛ Adam je kpa ngɛ lohwe ɔmɛ a he, ejakaa lohwe ɔmɛ lɛɛ, he numi lɛ kudɔɔ mɛ. Kaa nɔ hyɛmi nɔ́ ɔ, mo susu bɔ nɛ Adam kɛ he blɔ nɛ a ha lɛ ɔ tsu ní ngɛ blɔ kpakpa ko nɔ ha a he nɛ o hyɛ. A bɔ lohwe ɔmɛ loko a bɔ Adam. Se Yehowa ha Adam he blɔ kaa e wo lohwe ɔmɛ biɛ konɛ e bua nɛ jɔ. Mawu ngɔ lohwe ɔmɛ kɛ ba ha Adam, nɛ ‘Adam wo lohwe ɔmɛ tsuo biɛ.’ Benɛ Adam wo lohwe ɔmɛ biɛ nɛ sa a, Yehowa de we ke e bua jɔɛ biɛ ko he, lɔ ɔ he ɔ Adam nɛ tsake biɛ ɔ. Mohu ɔ, ‘bɔ tsuaa bɔ nɛ e tsɛ lohwe ko ɔ, jã pee e biɛ.’—1 Mose 2:19.

8. Ngɛ mɛni blɔ nɔ nɛ Adam kɛ he blɔ nɛ Yehowa ha lɛ ɔ tsu we ní saminya, nɛ mɛni je mi kɛ ba?

⁸ Aywilɛho sane ji kaa Adam bua jɔɛ ní tsumi nɛ Mawu ha lɛ kaa e hyɛ paradeiso zugba a nɔ ɔ he. Mawu de ke: “Nyɛ fɔ babauu nɛ nyɛɛ hiɛ; nyɛ hyi zugba a nɔ tsuo, nɛ nyɛɛ ye zugba a tsuo nɔ. Nyɛɛ ye lo ɔmɛ, lohwe pɛlitsɛmɛ ɔmɛ, kɛ zugba a nɔ lohwe ɔmɛ tsuo a nɔ.” (1 Mose 1:28) Adam bua jɔɛ he blɔ nɛ ɔ he, mohu ɔ, e be huzu nɛ a ha lɛ ɔ he, nɛ e ye tso yiblii nɛ Mawu fã lɛ ke e ko ye ɔ. He blɔ nɛ ɔ nɛ Adam kɛ tsu we ní saminya a ha nɛ e tɔ̃ tɔmi agbo. Enɛ ɔ ha nɛ e sisi bimɛ ngɛ nɔ́ nae jehahi babauu ji nɛ ɔ. (Rom. 5:12) E sa nɛ waa kase nɔ́ ko ngɛ nɔ́ nɛ je Adam tue gbomi ɔ mi kɛ ba a mi, konɛ waa ngɔ he yemi nɛ Yehowa kɛ ha wɔ ɔ kɛ tsu ní saminya, nɛ wa ko be huzu nɛ e to ha wɔ ɔ he.

9. Mɛni he blɔ Mawu ha Israel ma a, nɛ kɛ a kɛ he blɔ nɛ ɔ tsu ní ha kɛɛ?

⁹ Akɛnɛ Adam kɛ Hawa gbo tue he je ɔ, wɔ nɛ wa ji a sisi bimɛ ɔ yi mluku, nɛ wa gboɔ. Se kɛ̃ ɔ, wa ngɛ he blɔ kaa wa maa hla nɔ́ nɛ wa suɔ. Bɔ nɛ Mawu kɛ Israel bi ɔmɛ hi si ha a ma enɛ ɔ nɔ mi. Yehowa gu e sɔmɔlɔ Mose nɔ, nɛ e ha Israel bi ɔmɛ he blɔ kaa a hla ke ji a maa pee lɛ nitsɛ e ma, aloo a be pee. (2 Mose 19:3-6) Kɛ a pee a ní ha kɛɛ? A je a suɔmi mi nɛ a hla kaa a maa pee nɔ́ fɛɛ nɔ́ nɛ Mawu de mɛ ke a pee ɔ, konɛ a pee nihi nɛ Mawu biɛ ngɛ a nɔ. Ma a tsuo he nɔ nɛ a de ke: ‘Nɔ́ tsuaa nɔ́ nɛ Yehowa de ɔ, wa maa pee.’ (2 Mose 19:8) Aywilɛho sane ji kaa, be komɛ a se ɔ, Israel ma a ngɔɛ he blɔ nɛ a ngɛ kaa a maa hla nɔ́ nɛ a suɔ ɔ kɛ tsu ní saminya, nɛ a yi si nɛ a wo Mawu ɔ nɔ. Nyɛ ha nɛ sane nɛ ɔ nɛ pee kɔkɔ bɔmi kɛ ha wɔ, nɛ waa hɛ wɔ kɛ su Yehowa he, nɛ waa pee níhi nɛ e suɔ kaa waa pee ɔ. Ke wa pee jã a, lɔ ɔ maa tsɔɔ kaa wa buɔ he blɔ nɛ a kɛ peeɔ nɔ́ nɛ nɔ suɔ ɔ kaa e he jua wa.—1 Kor. 10:11.

10. Mɛni nɔ hyɛmi níhi nɛ tsɔɔ kaa adesahi nɛ a yi mluku ɔ ma nyɛ maa ngɔ he blɔ nɛ a kɛ peeɔ nɔ́ nɛ nɔ suɔ ɔ kɛ tsu ní saminya? (Moo hyɛ foni nɛ ngɛ ní kasemi ɔ sisije ɔ.)

¹⁰ A wo Mawu sɔmɔli 16 nɛ a kɛ he blɔ nɛ a kɛ peeɔ nɔ́ nɛ nɔ suɔ ɔ tsu ní saminya a a tã ngɛ Hebri Bi yi 11. Nimli nɛ ɔmɛ bi huzu nɛ Yehowa to kɛ ha mɛ ɔ he. Enɛ ɔ he ɔ, Yehowa jɔɔ mɛ wawɛɛ, nɛ a ngɛ hwɔɔ se he hɛ nɔ kami. Kaa nɔ hyɛmi nɔ́ ɔ, Noa tsɔɔ kaa e ngɛ hemi kɛ yemi nɛ mi wa, nɛ e kpɛ daka a kaa bɔ nɛ Mawu fã lɛ ɔ. Enɛ ɔ ha nɛ a baa e kɛ e weku ɔ kɛ yi nɔhi nɛ a ba ngɛ e se ɔ a yi. (Heb. 11:7) Abraham kɛ Sara je a tsui mi nɛ a nyɛɛ Mawu se kɛ ya zugba nɛ e wo mɛ he si ɔ nɔ. Benɛ a ngɛ blɔ hiami nɛ ɔ mi po ɔ, a ‘ná he blɔ kaa a maa kpale kɛ ho’ sika ma nɛ ji Ur ɔ mi ya. Se akɛnɛ a ngɛ hemi kɛ yemi he je ɔ, a kɛ a juɛmi ma ‘nɔ́ nɛ Mawu  wo mɛ he si ɔ’ nɔ, nɛ a bɔ mɔde kaa a nine maa su “ma ko nɛ hi kulaa pe lɔ ɔ” nɔ. (Heb. 11:8, 13, 15, 16) Mose kua weto ní nɛ e ma ná ngɛ Egipt ɔ, “e suɔ mohu kaa e kɛ Mawu ma a nɛ na amanehlu pe nɔ́ nɛ e maa ye ngɔɔmi ngɛ yayami peemi mi be bɔɔ ko.” (Heb. 11:24-26) Nyɛ ha nɛ waa kase blematsɛmɛ nɛ ɔmɛ a hemi kɛ yemi ɔ, nɛ waa ngɔ he blɔ nɛ a kɛ peeɔ nɔ́ nɛ nɔ suɔ ɔ kɛ tsu ní saminya.

11. (a) Mɛni ji blɔ nɛ hi pe kulaa nɛ wa maa gu nɔ kɛ ngɔ he blɔ nɛ wa ngɛ kaa wa maa hla nɔ́ nɛ wa suɔ ɔ kɛ tsu ní saminya? (b) Mɛni woɔ mo he wami konɛ o ngɔ nike ní nɛ ɔ kɛ tsu ní saminya?

¹¹ Eko ɔ, ke ni kpahi tsɔɔ wɔ nɔ́ nɛ waa pee ɔ, e he be wae ha wɔ kaa wa maa le nɔ́ nɛ e sa kaa waa pee. Se ke wa peeɔ jã a, jɔɔmi ko ma bɔ wɔ. Mɛni ji jamɛ a jɔɔmi ɔ? Baiblo ɔ ha heto ngɛ 5 Mose 30:19, 20. (Kane.) Kuku 19 ɔ tsɔɔ níhi nɛ Mawu kɛ fɔ Israel bi ɔmɛ a hɛ mi konɛ a hla nɔ́ nɛ a suɔ. Ngɛ kuku 20 ɔ mi ɔ, wa na kaa Yehowa ha mɛ he blɔ ngua ko nɛ a kɛ maa tsɔɔ nɔ́ nɛ ngɛ a tsui mi. Wɔ hu wa ma nyɛ maa hla kaa wa ma sɔmɔ Yehowa. Blɔ nɛ hi pe kulaa nɛ wa maa gu nɔ kɛ ngɔ nike ní nɛ ɔ kɛ tsu ní saminya ji kaa wa maa suɔ Yehowa nɛ wa je e yi, nɛ waa wo e hɛ mi nyami!

12. Mɛni e sɛ kaa waa ngɔ he blɔ nɛ wa ngɛ ɔ kɛ pee kɔkɔɔkɔ?

¹² Ngɔɔ lɛ kaa o ha o huɛ ko nike ní ko nɛ he jua wa. Se benɛ o maa hyɛ ɔ, e ya sake ngɔ fɔ kuku nɔ, aloo e kɛ plaa nɔ ko po! Anɛ o bua maa jɔ he lo? Ke jã a, lɛɛ mo susu he nɛ o hyɛ. Ke nihi kɛ he blɔ nɛ Yehowa ha mɛ ɔ tsu we ní saminya, aloo a kɛ ye nihi awi ɔ, anɛ e be Yehowa haoe lo? Ngɛ anɔkuale mi ɔ, kaa bɔ nɛ Baiblo ɔ gba kɛ fɔ si ɔ, ngɛ “nyagbe ligbi ɔmɛ” a mi ɔ, nihi maa pee a he “nihi nɛ li sina.” (2 Tim. 3:1, 2) Nyɛ ko ha nɛ waa ngɔ nike ní nɛ he jua wa nɛ ɔ nɛ Yehowa ha wɔ ɔ kɛ tsu ní ngɛ blɔ yaya nɔ kɔkɔɔkɔ. Mɛni wa ma nyɛ maa pee kɛ tsɔɔ kaa waa kɛ he blɔ nɛ ɔ tsu we ní ngɛ blɔ yaya nɔ?

13. Kaa Kristofohi ɔ, mɛni e sɛ kaa waa ngɔ he yemi nɛ wa ngɛ ɔ kɛ pee?

¹³ Wɔ tsuo wa ngɛ he blɔ kaa wa maa hla huɛmɛ, tade, he dlami, kɛ hɛja jemi nɛ wa suɔ. Se ke wa ha nɛ wa suɔmi nya ní peemi ngɔ wɔ nyɔguɛ, nɛ wa kaseɔ je ɔ, lɔ ɔ maa tsɔɔ kaa wa ngɔ he yemi nɛ ɔ kɛ ‘ngɛ yayami pee, nɛ wa ngɛ nɔ lae.’ (Kane 1 Petro 2:16.) Nyɛ ko ha nɛ waa ngɔ he yemi nɛ wa ngɛ ɔ kaa ‘blɔ nya nɛ wa ná nɛ waa kɛ maa  pee níhi nɛ wa nɔmlɔ tso ɔ suɔ.’ Mohu ɔ, nyɛ ha nɛ waa fia wa pɛɛ si kaa wa maa ‘pee nɔ́ tsuaa nɔ́ kɛ wo Mawu hɛ mi nyami.’—Gal. 5:13; 1 Kor. 10:31.

14. Ke waa kɛ wa hɛ fɔɔ Yehowa nɔ ɔ, kɛ wa maa ngɔ he blɔ nɛ wa ngɛ kaa wa maa hla nɔ́ nɛ wa suɔ ɔ kɛ tsu ní ha kɛɛ?

¹⁴ Blɔ kpa nɛ wa ma nyɛ maa gu nɔ kɛ po he blɔ nɛ wa ngɛ ɔ he piɛ ji kaa waa kɛ wa hɛ maa fɔ Yehowa nɔ konɛ e ye bua wɔ nɛ wa ko be huzu nɛ e to ha wɔ ɔ he. Lɛ pɛ ji nɔ ‘nɛ maa tsɔɔ wɔ bɔ nɛ waa ba wa je mi ha, konɛ e hi ha wɔ nitsɛmɛ.’ (Yes. 48:17) E sa nɛ waa je he si bami mi nɛ waa kplɛɛ Baiblo ɔ mi anɔkuale munyu nɛ nyɛɛ se nɛ ɔ nɔ: “Nɔmlɔ adesa ko be he wami ngɛ lɛ nitsɛ e wami nɔ. Pi nɔmlɔ adesa nitsɛ he wami nya ji kaa e maa pee kikɛ nɛ ɔ, loo kikɛ nɛ ɔ.” (Yer. 10:23) Nyɛ ko ha nɛ waa ngɔ wa hɛ kɛ fɔ wɔ nitsɛmɛ wa nɔ kaa bɔ nɛ Adam kɛ Israel bi atua tsɔli ɔmɛ pee ɔ. Mohu ɔ, nyɛ ha nɛ waa ‘ngɔ wa hɛ kɛ fɔ Yehowa nɔ kulaa.’—Abɛ 3:5.

15. Mɛni wa kaseɔ ngɛ sisi tomi mlaa nɛ ngɛ Galatia Bi 6:5 ɔ mi?

¹⁵ Huzu nɛ ngɛ he yemi nɛ wa ngɛ ɔ he ɔ eko ji yɔsemi nɛ wa ma yɔse kaa ni kpahi hu ngɛ he blɔ kaa mɛ nitsɛmɛ a maa mwɔ a yi mi kpɔ. Mɛni he je? Akɛnɛ wɔ tsuo wa ngɛ he blɔ kaa wa maa hla nɔ́ nɛ wa suɔ he je ɔ, tsa pi be fɛɛ be nɛ Kristofohi enyɔ maa pee juɛmi kake. Ngɛ wa je mi bami kɛ wa jami mi hu ɔ, jã nɛ e ji. Mo kai sisi tomi mlaa nɛ ngɛ Galatia Bi 6:5. (Kane.) Ke wa yɔse kaa Kristofo no fɛɛ Kristofo no “maa tloo lɛ nitsɛ e tlomi” ɔ, wa maa kplɛɛ kaa ni kpahi hu ngɛ he blɔ kaa a maa hla nɔ́ nɛ mɛ nitsɛmɛ a suɔ.

16, 17. (a) Ngɛ mɛni blɔ nɔ nɛ he blɔ nɛ a kɛ peeɔ nɔ́ nɛ nɔ suɔ ba pee nyagba ngɛ Korinto? (b) Mɛni blɔ nɔ Paulo gu kɛ tsu sane ɔ he ní, nɛ mɛni wa kaseɔ ngɛ enɛ ɔ mi?

¹⁶ Ha nɛ wa susu Baiblo mi nɔ hyɛmi nɔ́ ko nɛ tsɔɔ kaa e sa nɛ wa je bumi kpo kɛ tsɔɔ ni kpahi ke ji a mwɔ a yi mi kpɔ ngɛ sane ko he ɔ he nɛ waa hyɛ. Ngɛ Korinto ɔ, a juaa lo nɛ eko ɔ a gbe kɛ ha amagahi ngɛ jua nɔ. Kristofohi nɛ a ngɛ Korinto ɔ hɛɛ juɛmi ekpaekpa ngɛ lo nɛ ɔ yemi he. A ti ni komɛ deɔ ke: ‘Akɛnɛ amagahi be he wami he je ɔ, waa kɛ he nile kpakpa ma nyɛ maa ye lo ɔ.’ Se ni komɛ nɛ be ko nɛ be ɔ, a jaa amagahi ɔ susuɔ kaa ke a ye lo nɛ ɔ, a ngɛ amaga jae. (1 Kor. 8:4, 7) Enɛ ɔ ji sane ko nɛ hɛdɔ ngɛ he, nɛ jinɛ e ko nyɛ ngɔ mi gbami kɛ ba asafo ɔ mi. Mɛni blɔ nɔ Paulo gu kɛ ye bua Kristofohi nɛ a ngɛ Korinto ɔ konɛ a le Mawu susumi ngɛ sane nɛ ɔ he?

¹⁷ Kekleekle ɔ, Paulo ha nɛ a ti nɔ tsuaa nɔ le kaa ngma be hae nɛ a hɛ mɛ kɛ su Mawu he. (1 Kor. 8:8) Lɔ ɔ se ɔ, Paulo bɔ mɛ kɔkɔ kaa a ko ngɔ ‘he blɔ nɛ a ngɛ’ kaa a maa hla nɔ́ nɛ a suɔ ɔ kɛ tsu ní ngɛ blɔ ko nɔ nɛ ma ha nɛ a ‘nyɛmimɛ nɛ a hemi kɛ yemi mi wɛ ɔ nɛ pee yayami.’ (1 Kor. 8:9) Pee se ɔ, e fã nihi nɛ a he nile tsɔɔ mɛ kaa a ko ye lo ɔ hu kaa ke nɔ ko ye lo ɔ, a ko kojo lɛ. (1 Kor. 10:25, 29, 30) Enɛ ɔ he ɔ, e sa nɛ Kristofo no fɛɛ Kristofo no nɛ da e he nile nɔ kɛ mwɔ e yi mi kpɔ ngɛ sane nɛ he hia nɛ kɔɔ jami he nɛ ɔ he. Ke jã a, lɛɛ ke wa nyɛmi ko mwɔ e yi mi kpɔ ngɛ lɛ nitsɛ e sane nɛ e he hia we tsɔ he ɔ, anɛ e sa kaa waa kojo lɛ lo?—1 Kor. 10:32, 33.

18. Mɛni blɔ nɔ o maa gu kɛ tsɔɔ kaa o bua jɔ he blɔ nɛ o ngɛ kaa o maa hla nɔ́ nɛ o suɔ ɔ he?

¹⁸ Yehowa ha wɔ he blɔ kaa waa hla nɔ́ nɛ wa suɔ, konɛ wa ná he yemi nitsɛnitsɛ. (2 Kor. 3:17) Wa bua jɔ nike ní nɛ ɔ he wawɛɛ, ejakaa e haa nɛ wa náa he blɔ kɛ peeɔ juɛmi kɛ tsɔɔ ɔ bɔ nɛ wa suɔ Yehowa ha. Nyɛ ha nɛ waa ya nɔ nɛ waa tsɔɔ kaa wa bua jɔ nike ní nɛ he jua wa nɛ ɔ he. Wa ma nyɛ maa pee jã ke ji waa kɛ nike ní nɛ ɔ tsuɔ ní kɛ woɔ Mawu hɛ mi nyami, nɛ wa yɔseɔ kaa ni kpahi hu ngɛ he blɔ kaa a maa hla nɔ́ nɛ a suɔ.