KE O ya Bible Lands Museum nɛ ngɛ Yerusalem ɔ, o maa na tɛ ko nɛ a ngma nɔ ní maa pee jeha 700 kɛ ya si jeha 600 mi loko a fɔ Kristo. A na tɛ nɛ ɔ ngɛ tɛ puɔ ko nɛ a puɔ nihi ngɛ mi ɔ mi, nɛ tɛ puɔ nɛ ɔ kɛ Hebron nɛ ngɛ Israel ɔ he kɛ we. A ngma ngɛ tɛ ɔ nɔ ke: “Yahweh Sabaot nɛ gbiɛ Hagav binyumu Hagaf.” Kɛ ningma nɛ ɔ fĩɔ Baiblo ɔ se ha kɛɛ? Enɛ ɔ tsɔɔ kaa blema a, nihi le Mawu biɛ Yehowa nɛ a ngma ngɛ Hebri gbi mi ke YHWH ɔ saminya, nɛ a kɛ tsuɔ ní ngɛ a si himi mi daa ligbi. Ngɛ anɔkuale mi ɔ, a na ningma kpahi ngɛ tɛ puɔ ɔ mi nɛ nihi nɛ a ya kpeɔ loo a ya laa a he ngɛ lejɛ ɔ lɛ ngma. A pɔɔ Mawu biɛ ɔ kɛ biɛ kpahi nɛ Mawu biɛ ɔ ngɛ mi ɔ ngmami ngɛ gbogbo ɔmɛ a he.

Dr. Rachel Nabulsi nɛ e ná yi jemi womi ngɛ gbi kasemi mi ɔ de ke: “Biɛ YHWH nɛ a ti mi si abɔ ɔ he hia wawɛɛ. . . . Baiblo mi munyuhi kɛ ningma amɛ tsɔɔ bɔ nɛ YHWH ɔ he hia Israel bi kɛ Yuda bi ɔmɛ ha.” Ngɛ anɔkuale mi ɔ, Mawu biɛ nɛ ji YHWH ngɛ Hebri ningma okadihi a mi ɔ je kpo si akpehi abɔ ngɛ Baiblo ɔ mi. Behi fuu ɔ, Mawu biɛ ɔ jeɔ kpo ngɛ adesahi a biɛhi po a mi.

Munyuhi nɛ ji “Yahweh Sabaot,” nɛ a ngma ngɛ tɛ ɔ nɔ ɔ sisi ji “Yehowa tabohiatsɛ.” Enɛ ɔ ma nyɛ maa tsɔɔ kaa tsa pi Mawu biɛ ɔ pɛ nɛ nihi nɛ a hi si blema a kɛ tsu ní, mohu ɔ, a kɛ munyuhi nɛ ji “Yehowa tabohiatsɛ” ɔ hu pɔɔ ní tsumi. Enɛ ɔ hu tsɔɔ kaa munyuhi nɛ ji “Yehowa tabohiatsɛ” ɔ nɛ je kpo ngɛ Hebri Ngmami ɔ mi ɔ da. Munyu nɛ ɔmɛ je kpo si 250 kɛ se ngɛ Hebri Ngmami ɔ mi titli ɔ, ngɛ Yesaya, Yeremia, kɛ Zakaria womi ɔmɛ a mi.