1. Kɛ magbɛ nɔ munyu ko nɛ a tu ngɛ kpokpa nɔ kpe ko sisi ngɛ jeha 1935 ɔ mi ɔ ná nyɛminyumu wayoo ko nɔ he wami ha kɛɛ?

A BAPTISI niheyo wayoo ko ngɛ jeha 1926 mi benɛ e ye jeha 18. E fɔli ɔmɛ ji Baiblo Kaseli nɛ amlɔ nɛ ɔ, a tsɛɛ mɛ ke Yehowa Odasefohi ɔ. A fɔ mɛ nyumu etɛ kɛ yihi enyɔ, nɛ a tsɔse mɛ ngɛ asafo ɔ mi konɛ a sɔmɔ Yehowa Mawu nɛ a kase Yesu Kristo. Ngɛ jamɛ a be ɔ mi ɔ, be fɛɛ be nɛ Baiblo Kaseli ɔmɛ maa ya Nyɔmtsɛ ɔ Gbɔkuɛ Niye Ní ɔ sisi ɔ, nyɛminyumu wayoo ɔ nɛ e kɛ anɔkuale yemi ngɛ Yehowa sɔmɔe ɔ yeɔ abolo ɔ nɛ e nuɔ wai ɔ eko. Se hɛ kɛ nɔ fɔmi nɛ e ngɛ ɔ tsake benɛ e bu magbɛ nɔ munyu ko nɛ yi ji, “Nimli Asafo” ɔ tue ɔ. Nyɛminyumu J. F.  Rutherford lɛ tu munyu nɛ ɔ ngɛ kpokpa nɔ kpe ko sisi ngɛ Washington, D.C. ngɛ U.S.A ngɛ jeha 1935 ɔ mi. Mɛni nɛ Baiblo Kaseli ɔmɛ kase ngɛ kpe nɛ ɔ sisi?

2. Mɛni Baiblo mi anɔkuale nɛ Nyɛminyumu Rutherford tu he munyu ngɛ e magbɛ nɔ munyu ko mi?

² Ngɛ munyu nɛ Nyɛminyumu Rutherford tu ɔ mi ɔ, e tsɔɔ nihi nɛ a ji “nimli asafo” (King James Version) loo “asafo kuu ngua” a nɛ a tu a he munyu ngɛ Kpo Jemi 7:9 ɔ. Kɛ ba si jamɛ a be ɔ mi ɔ, Baiblo Kaseli ɔmɛ susu kaa asafo kuu ngua nɛ ɔ ji nihi nɛ a ma tle mɛ si kɛ ya hiɔwe, se a ji nihi nɛ a yi anɔkuale kɛ pi si kaa bɔ nɛ nihi nɛ a pɔ mɛ nu ɔ peeɔ ɔ. Nyɛminyumu  Rutherford da Ngmami ɔ nɔ kɛ tsɔɔ kaa asafo kuu ngua a be hiɔwe yae, mohu ɔ, a ji Kristo jijɔ kpahi * nɛ a ma he a yi wami ngɛ “amanehlu ngua” a mi konɛ a hi zugba a nɔ kɛ ya neneene. (Kpoj. 7:14) Yesu de ke: “I ngɛ jijɔ kpahi, mɛɛ lɛɛ a be piɛ nɛ ɔ mi; mɛ hu e sa nɛ ma ngɔ mɛ kɛ ba mi, nɛ a maa nu ye gbi, nɛ a ma ba pee to kuu kake ngɛ to nɔ hyɛlɔ kake sisi.” (Yoh. 10:16) Jijɔ kpa amɛ ji Yehowa Odasefohi nɛ a yeɔ anɔkuale nɛ a ngɛ hɛ nɔ kami kaa a maa hi Paradeiso zugba a nɔ kɛ ya neneene. (Mat. 25:31-33, 46) Ha nɛ waa hyɛ bɔ nɛ sisi numi ehe nɛ ɔ ná nyɛminyumu ɔ nɛ a baptisi lɛ benɛ e ye jeha 18 ɔ, kɛ Yehowa we bi kpahi a nɔ he wami ha a he nɛ waa hyɛ.​—La 97:11; Abɛ 4:18.

3-4. Mɛni nɛ nihi akpehi abɔ ba yɔse ngɛ a hɛ kɛ nɔ fɔmi ɔ he ngɛ kpe nɛ a pee ngɛ jeha 1935 ɔ sisi, nɛ mɛni he je?

³ Baiblo Kaseli ɔmɛ ná bua jɔmi wawɛɛ ngɛ kpokpa nɔ kpe ko sisi benɛ munyu tulɔ ɔ de ke: “Anɛ nihi tsuo nɛ a ngɛ hɛ nɔ kami kaa a maa hi zugba a nɔ kɛ ya neneene ɔ ma nyɛ maa te si kɛ da si lo?” Nyɛminyumu ko nɛ e ya kpokpa nɔ kpe ɔ eko ɔ tsɔɔ kaa nihi nɛ a ba kpe ɔ a kpɛti nihi babauu te si kɛ da si. Kɛkɛ nɛ Nyɛminyumu Rutherford de ke: “Hyɛ! Nimli asafo ɔ ji nɛ ɔ nɛ!” Lɔ ɔ se ɔ, nihi tsuo nɛ a ya kpe ɔ gbɔ a dɛ mi wawɛɛ. Nihi nɛ a te si kɛ da si ɔ yɔse kaa a hlɛ mɛ kaa a ya hiɔwe. A ba na kaa Mawu ngɔɛ e mumi klɔuklɔu ɔ kɛ pɔ mɛ nu. E nɔ jena a, a baptisi nihi 840 ngɛ kpokpa nɔ kpe ɔ sisi. Nimli nɛ ɔmɛ a kpɛti nihi fuu piɛɛ jijɔ kpa amɛ a he.

⁴ Ngɛ jamɛ a magbɛ nɔ munyu ɔ nɛ a tu ɔ se ɔ, nyɛminyumu wayoo ɔ nɛ wa tu e he munyu kɛ sɛ hlami kɛ nihi akpehi abɔ kpa abolo ɔ yemi nɛ a kpa wai ɔ hu numi ngɛ Nyɔmtsɛ ɔ Gbɔkuɛ Niye Ní ɔ sisi. Nyɛminyumu ko kɛ he si bami de ke: “Kɛ je Kaimi ɔ nɛ wa ya ngɛ jeha 1935 ɔ se ɔ, i kpa abolo ɔ yemi nɛ i kpa wai ɔ hu numi. I ba na kaa Yehowa ngɔɛ e mumi klɔuklɔu ɔ kɛ pɔ mi nu kaa ma ya hiɔwe, mohu ɔ, i ngɛ hɛ nɔ kami kaa ma hi si ngɛ zugba a nɔ nɛ ma ye bua kɛ pee zugba nɔ paradeiso.” (Rom. 8:16, 17; 2 Kor. 1:21, 22) Kɛ je lɔ ɔ se ɔ, asafo kuu ngua a yibɔ ɔ ngɛ hɛ mi yae nɛ a piɛɛ nihi nɛ a pɔ mɛ nu nɛ a piɛ ngɛ zugba a nɔ ɔ a he kɛ ngɛ ní tsue.

5. Kɛ Yehowa naa nihi nɛ a kpa abolo ɔ yemi nɛ a kpa wai ɔ numi ngɛ Kaimi ɔ sisi ɔ ha kɛɛ?

⁵ Kɛ Yehowa naa nihi nɛ a kpa abolo ɔ yemi nɛ a kpa wai ɔ hu numi ngɛ Kaimi ɔ sisi kɛ je jeha 1935 ɔ se ɔ ha kɛɛ? Nɛ ke Odasefo no ko yeɔ abolo ɔ nɛ e nuɔ wai ɔ ngɛ Kaimi ɔ sisi, nɛ pee se ɔ, e ba na kaa a kɛ mumi klɔuklɔu ɔ pɔɛ lɛ nu nɛ e kpa abolo ɔ yemi nɛ e kpa wai ɔ hu numi ɔ, kɛ Yehowa naa lɛ ha kɛɛ? (1 Kor. 11:28) Ni komɛ yeɔ abolo ɔ nɛ a nuɔ wai ɔ ejakaa a li hɛ kɛ nɔ fɔmi tutuutu nɛ a ngɛ. Se ke a je a tsui mi nɛ a kplɛɛ a tɔmi ɔ nɔ, nɛ a kpa, nɛ a ya nɔ nɛ a kɛ anɔkuale yemi sɔmɔ Yehowa a, e maa bu mɛ ngɔ piɛɛ jijɔ kpa amɛ a he. E ngɛ mi kaa a kpa abolo ɔ yemi nɛ a kpa wai ɔ hu numi mohu lɛɛ, se loloolo ɔ, a yaa Kaimi ɔ, ejakaa a hɛ sa nɔ́ nɛ Yehowa kɛ Yesu pee ha mɛ ɔ.

6. Mɛni Yesu fã bɔfo ɔmɛ kaa a pee?

⁶ Akɛnɛ e be kɛe nɛ amanehlu ngua a maa  je sisi he je ɔ, e he maa hia nɛ wa susu nɔ́ nɛ a de ngɛ Kpo Jemi yi 7 kɛ kɔ Kristofohi nɛ a pɔ mɛ nu kɛ asafo kuu ngua nɛ a piɛɛ jijɔ kpa amɛ a he ɔ he. Yesu fã bɔfo ɔmɛ kaa a ya nɔ nɛ a hɛɛ kɔɔhiɔ eywiɛ ɔmɛ nɛ a kɛ ma kpata je ɔ hɛ mi ɔ mi. E sɛ nɛ a ngmɛɛ kɔɔhiɔ nɛ ɔmɛ a he kɛ ya si be nɛ a maa sɔu Kristofohi nɛ a pɔ mɛ nuɔ a nya, nɛ tsɔɔ kaa Yehowa kplɛɛ a nɔ. (Kpoj. 7:1-4) Akɛnɛ a ye anɔkuale he je ɔ, a maa piɛɛ Kristo he kɛ ye nɔ kaa matsɛmɛ kɛ osɔfohi ngɛ hiɔwe. (Kpoj. 20:6) Yehowa, Yesu kɛ bɔfo ɔmɛ a bua maa jɔ wawɛɛ ke a na nɛ nihi 144,000 ɔ a nine su a hiɔwo ɔ nɔ ngɛ hiɔwe.

7. Ngɛ Kpo Jemi 7:9, 10 nya a, mɛnɔmɛ nɛ Yohane na ngɛ nina mi, nɛ mɛni a ngɛ pee? (Hyɛ foni nɛ ngɛ womi ɔ hɛ mi ɔ.)

⁷ Benɛ Yohane tu nihi 144,000 nɛ a ji matsɛmɛ kɛ osɔfohi a he munyu ngɛ nina mi se ɔ, e na “asafo kuu ngua” ko nɛ a baa a yi ngɛ Hamagedɔn ta a mi hulɔ. Slɔɔto ngɛ kuu enyɔ nɛ ɔmɛ a kpɛti. Asafo kuu ngua a he hiɛ pe nihi 144,000 ɔ, nɛ a li a yibɔ hulɔ. (Kane Kpo Jemi 7:9, 10.) “A wo tade hiɔ klɔiihi” kɛ tsɔɔ kaa a ha we nɛ Satan je ɔ nɛ wo a “he mu,” nɛ a ya nɔ nɛ a ye Mawu kɛ Kristo anɔkuale. (Yak. 1:27) A kɛ ngmlaa de kaa a he a yi wami ngɛ nɔ́ nɛ Yehowa kɛ Yesu nɛ ji Mawu Jijɔ Bi ɔ pee kɛ ha mɛ ɔ he je. Jehanɛ hu ɔ, a hɛɛ tã kũɔmihi ngɛ a dɛ kɛ tsɔɔ kaa a kplɛɛ Yesu nɔ kaa Matsɛ nɛ Yehowa hla lɛ.​—Kɛ to Yohane 12:12, 13 ɔ he.

8. Mɛni nɛ Kpo Jemi 7:11, 12 ɔ de kɛ kɔ Yehowa, Yesu, bɔfo ɔmɛ kɛ nihi nɛ a pɔ mɛ nu nɛ a tle mɛ si kɛ ho hiɔwe ya a he?

⁸ Kane Kpo Jemi 7:11, 12. Kɛ nihi nɛ a ngɛ hiɔwe ɔ pee a ní ha kɛɛ benɛ a na asafo kuu ngua a? Yohane na nɛ nihi tsuo nɛ a ngɛ hiɔwe ɔ nya nɛ a je Mawu yi benɛ a na asafo kuu ngua a. Yehowa kɛ e bimɛ ɔmɛ a bua maa jɔ ke nina nɛ ɔ ba mi be mi nɛ a ma he asafo kuu ngua a yi wami ngɛ amanehlu ngua a mi ɔ.

9. Ngɛ Kpo Jemi 7:13-15 ɔ nya a, mɛni nɛ asafo kuu ngua a ngɛ pee amlɔ nɛ ɔ?

⁹ Kane Kpo Jemi 7:13-15. Yohane ngma kɛ kɔ asafo kuu ngua a he kaa “a fɔ a tade klɔii ɔmɛ a he nɛ a pee mɛ futaa ngɛ Jijɔ Bi ɔ muɔ ɔ mi.” Enɛ ɔ tsɔɔ kaa a ngɛ he nile kpakpa nɛ a ji dali ngɛ Yehowa hɛ mi. (Yes. 1:18) Nimli nɛ ɔmɛ ji Kristofohi nɛ a jɔɔ a he nɔ kɛ ha Yehowa nɛ a ha nɛ a baptisi mɛ. Nɛ jehanɛ hu ɔ, a ngɛ hemi kɛ yemi nɛ mi wa ngɛ Yesu kpɔmi afɔle sami ɔ mi, nɛ huɛ bɔmi kpakpa ngɛ a kɛ Yehowa a kpɛti. (Yoh. 3:36; 1 Pet. 3:21) Enɛ ɔ he je nɛ a he su kaa a maa da si ngɛ Mawu matsɛ sɛ ɔ hɛ mi nɛ a sɔmɔ lɛ ngɛ “blɔ nɛ ngɛ klɔuu nɔ nyɔ kɛ pia” ngɛ zugba a nɔ ɔ nɛ. Amlɔ nɛ ɔ po ɔ, a kɛ kã tsuɔ Matsɛ Yemi ɔ kɛ kaselɔ peemi ní tsumi ɔ hiɛhiɛɛ kɛ tsɔɔ kaa a kɛ Mawu Matsɛ Yemi ɔ yeɔ kekle blɔ he ngɛ a si himi mi pe nɔ́ fɛɛ nɔ́.​—Mat. 6:33; 24:14; 28:19, 20.

10. Mɛni nɔ mi mami nɛ asafo kuu ngua a ngɛ, nɛ mɛni si womi nɛ a maa na e mi bami?

¹⁰ Asafo kuu ngua a nɛ a ma he a yi wami ngɛ amanehlu ngua a mi ɔ ngɛ nɔ mi mami kaa Mawu maa ya nɔ maa hyɛ a nɔ, ejakaa “Nɔ nɛ e hii si ngɛ matsɛ sɛ ɔ nɔ ɔ ma bli e bo tsu ɔ mi ngɛ a nɔ.” Jamɛ a be ɔ, si womi nɛ jijɔ kpa amɛ ngɛ blɔ hyɛe ɔ maa ba mi. “[Mawu] ma tsu vo nyu fɛɛ vo nyu ngɛ a hɛ mi, nɛ gbenɔ be si hie hu, jã kɛ̃ nɛ kɔmɔ yemi aloo ya fomi aloo nɔ́ yeyee ko hu be si hie hu.”​—Kpoj. 21:3, 4.

11-12. (a) Kaa bɔ nɛ Kpo Jemi 7:16, 17 ɔ tsɔɔ ɔ, mɛni jɔɔmihi nɛ asafo kuu ngua a ma ná? (b) Mɛni jijɔ kpa amɛ ma nyɛ maa pee ngɛ Kaimi ligbi ɔ nɔ, nɛ mɛni he je?

¹¹ Kane Kpo Jemi 7:16, 17. Amlɔ nɛ ɔ, Yehowa  sɔmɔli a kpɛti ni komɛ ngɛ nɔ́ nae akɛnɛ a be sika nɛ a kɛ ma he niye ní aloo akɛnɛ tahi ngɛ nɔ yae ngɛ he nɛ a ngɛ ɔ he je. A woɔ a kpɛti ni komɛ hu tsu ngɛ a hemi kɛ yemi ɔ he je. Se kɛ̃ ɔ, asafo kuu ngua a ngɛ bua jɔmi ejakaa a le kaa ke a kpata Satan je nɛ ɔ hɛ mi nɛ a he a yi wami ɔ, a ma ná niye ní kpakpahi fuu be fɛɛ be, nɛ Yehowa kɛ blɔ tsɔɔmi hu ma ha mɛ. Ke Yehowa kpata Satan blɔ nya tomi ɔ hɛ mi ɔ, e maa po asafo kuu ngua a he piɛ ngɛ e we abofu nɛ ngɛ kaa “la nɛ nya wa” a nya. Ngɛ amanehlu ngua a se ɔ, Yesu ma kudɔ nihi nɛ a ma he a yi wami ngɛ zugba a nɔ ɔ kɛ ya neneene “wami nyu” ɔ he. Mo susu he nɛ o hyɛ: Hɛ nɔ kami nɛ asafo kuu ngua a ngɛ ɔ se be. Nihi ayɔ akpehi abɔ nɛ a maa hi zugba a nɔ ɔ be gboe hu!​—Yoh. 11:26.

¹² Jijɔ kpa amɛ naa Yehowa kɛ Yesu si ngɛ hɛ kɛ nɔ fɔmi nɛ se be nɛ a ngɛ ɔ he! E ngɛ mi kaa Yehowa hlɛ mɛ kaa a ya hiɔwe mohu lɛɛ, se e suɔ mɛ kaa bɔ nɛ e suɔ nihi nɛ a pɔ mɛ nu ɔ. Nihi nɛ a pɔ mɛ nu kɛ jijɔ kpa amɛ tsuo ma nyɛ ma je Mawu kɛ Kristo yi. Blɔ kake nɛ a guɔ nɔ kɛ peeɔ jã ji Nyɔmtsɛ ɔ Gbɔkuɛ Niye Ní ɔ sisi nɛ a yaa a.

13-14. Mɛni he je nɛ e sa nɛ nɔ fɛɛ nɔ nɛ ya Kristo gbenɔ ɔ Kaimi ɔ?

¹³ Ngɛ jehahi bɔɔ nɛ be nɛ ɔ mi ɔ, ke a hla nihi 1,000 ɔ, maa pee a kpɛti nɔ kake pɛ lɛ yeɔ abolo ɔ nɛ e nuɔ wai ɔ ngɛ Kaimi ɔ sisi. Asafohi fuu ngɛ nɛ nɔ ko be mi nɛ e yeɔ abolo ɔ nɛ e nuɔ wai ɔ ngɛ Kaimi ɔ sisi. Nihi nɛ a yaa Kaimi ɔ a kpɛti nihi babauu ji nihi nɛ a ngɛ hɛ nɔ kami kaa a maa hi zugba a nɔ. Ke jã a, lɛɛ mɛni he je nɛ a yaa Nyɔmtsɛ ɔ Gbɔkuɛ Niye Ní ɔ sisi mɔ? Wa ma nyɛ maa ngɔ yi mi tomi he je nɛ ni komɛ yaa yo kpeemi ko sisi ɔ kɛ to yi mi tomi he je nɛ wa yaa Kaimi ɔ sisi ɔ he. Nihi yaa yo kpeemi ko sisi kɛ tsɔɔ kaa a suɔ ayɛflo ɔ kɛ e huno ɔ, nɛ a suɔ nɛ a fĩ a se. Jã nɔuu kɛ̃ nɛ jijɔ kpa amɛ hu yaa Kaimi ɔ konɛ a kɛ tsɔɔ kaa a suɔ Kristo kɛ nihi nɛ a pɔ mɛ nu ɔ, nɛ a suɔ nɛ a fĩ a se. Jehanɛ hu ɔ, jijɔ kpa amɛ yaa Kaimi ɔ ejakaa a hɛ sa Yesu kpɔmi afɔle sami ɔ nɛ ha nɛ a ná hɛ nɔ kami kaa a maa hi zugba a nɔ kɛ ya neneene ɔ.

¹⁴ Yi mi tomi kpa he je nɛ jijɔ kpa amɛ yaa Kaimi ɔ ji kaa a suɔ nɛ a bu Yesu fami ɔ tue. Benɛ Yesu kɛ e bɔfo anɔkualetsɛmɛ ɔmɛ ye  kekleekle Nyɔmtsɛ Gbɔkuɛ Niye Ní ɔ, e de mɛ ke: “Nyɛɛ ya nɔ nɛ nyɛɛ pee enɛ ɔ, [nɛ] nyɛ kɛ kai mi.” (1 Kor. 11:23-26) Enɛ ɔ he ɔ, jijɔ kpa amɛ maa ya nɔ maa ya Nyɔmtsɛ ɔ Gbɔkuɛ Niye Ní ɔ sisi kɛ ya si be nɛ a maa ngɔ nihi nɛ a pɔ mɛ nu ɔ tsuo kɛ ho hiɔwe ya. Ngɛ anɔkuale mi ɔ, jijɔ kpa amɛ fɔɔ nɔ fɛɛ nɔ nine kɛ yaa Kaimi ɔ sisi.

15. Mɛni wa kpɛti nɔ fɛɛ nɔ ma nyɛ maa pee kɛ je Mawu kɛ Kristo yi ngɛ Kaimi ɔ sisi?

¹⁵ Ngɛ Kaimi ɔ sisi ɔ, wa náa he blɔ kɛ jeɔ Mawu kɛ Kristo yi kɛ guɔ la nɛ wa laa kɛ sɔlemi nɔ. Magbɛ nɔ munyu nɛ a maa tu jeha nɛ ɔ ngɛ Kaimi ɔ sisi ɔ yi ji, “O Bua Nɛ Jɔ Nɔ́ Nɛ Mawu Kɛ Kristo Pee Ha Mo ɔ He!” Munyu nɛ ɔ maa wo wɔ he wami nɛ wa bua nɛ jɔ nɔ́ nɛ Yehowa kɛ Kristo pee ha wɔ ɔ he. Ke a kɛ abolo ɔ kɛ wai ɔ ngɛ bee ngɛ wa hɛ mi ɔ, e ma ha nɛ wa kai kaa a daa si kɛ ha Yesu he lo kɛ e muɔ ɔ. Jehanɛ hu ɔ, e ma ha nɛ wa susu suɔmi nɛ Yehowa ngɛ kɛ ha wɔ nɛ lɔ ɔ he je ɔ, e ha nɛ e Bi ɔ ba gbo kɛ ha wɔ ɔ he. (Mat. 20:28) Nɔ fɛɛ nɔ nɛ e suɔ wa hiɔwe Tsɛ ɔ kɛ e Bi ɔ maa suɔ nɛ e ya Kaimi ɔ.

16. Ngɛ mɛni blɔhi a nɔ nɛ nihi nɛ a pɔ mɛ nu ɔ kɛ jijɔ kpa amɛ sɔ?

¹⁶ Nihi nɛ a pɔ mɛ nu ɔ kɛ jijɔ kpa amɛ sɔ ngɛ blɔ komɛ a nɔ. Yehowa suɔ jijɔ kpa amɛ kaa bɔ e suɔ nihi nɛ a pɔ mɛ nu ɔ. Kuu enyɔ nɛ ɔmɛ tsuo a he jua wa ha Yehowa. Wa ma nyɛ ma de jã ejakaa Yehowa gu e Bi ɔ kpɔmi afɔle sami ɔ nɔ kɛ he nihi nɛ a pɔ mɛ nu ɔ kɛ jijɔ kpa amɛ tsuo. Slɔɔto nɛ ngɛ kuu enyɔ nɛ ɔmɛ a kpɛti ji kaa a ngɛ hɛ kɛ nɔ fɔmi ekpaekpa. Se loko a nine maa su a hiɔwo ɔ nɔ ɔ, jã mɛ tsuo a ya nɔ nɛ a ye Mawu kɛ Kristo anɔkuale. (La 31:23) Jehanɛ hu ɔ, Yehowa haa nihi nɛ a pɔ mɛ nu ɔ kɛ jijɔ kpa amɛ tsuo e mumi klɔuklɔu ɔ nɛ a kɛ tsuɔ níhi nɛ e sa nɛ a tsu ngɛ e sɔmɔmi mi.

17. Mɛni nɛ nihi nɛ a pɔ mɛ nu nɛ a piɛ ngɛ zugba a nɔ ɔ ngɛ blɔ hyɛe?

¹⁷ A kɛ hiɔwe yami he hɛ kɛ nɔ fɔmi ɔ fɔ we Kristofohi nɛ a pɔ mɛ nu ɔ. Mawu nɛ e kɛ wo a tsui mi. A susuɔ a hɛ kɛ nɔ fɔmi ɔ he, a sɔleɔ ngɛ he, nɛ a suɔ nɛ a nine nɛ su a hiɔwo nɛ ɔ nɔ. A li bɔ nɛ a nɔmlɔ tso ɔ maa hi ha ngɛ hiɔwe. (Filip. 3:20, 21; 1 Yoh. 3:2) Se kɛ̃ ɔ, a hyɛɛ blɔ kaa a kɛ Yehowa, Yesu, bɔfo ɔmɛ kɛ nihi nɛ a pɔ mɛ nu nɛ a tle mɛ si kɛ ho hiɔwe ya momo ɔ ma ya kpe. A suɔ nɛ a piɛɛ a he ngɛ hiɔwe Matsɛ Yemi ɔ mi.

18. Mɛni nɛ jijɔ kpa amɛ ngɛ blɔ hyɛe?

¹⁸ Jijɔ kpa amɛ bua jɔ hɛ kɛ nɔ fɔmi nɛ a ngɛ kaa a maa hi si ngɛ zugba a nɔ kɛ ya neneene ɔ he. (Fiɛlɔ 3:11, NW) A ngɛ be nɛ a maa ye bua kɛ ha nɛ zugba a tsuo nɛ pee paradeiso ɔ blɔ hyɛe. A ngɛ be nɛ mɛ nitsɛmɛ a  maa po a wehi, a maa pee abɔɔhi, nɛ a kɛ a bimɛ ma ná nɔmlɔ tso mi he wami kpakpa a blɔ hyɛe. (Yes. 65:21-23) Jehanɛ hu ɔ, a ngɛ be nɛ a maa hia blɔ kɛ kpa zugba a nɔ tsuo nɛ a maa na yokuhi, hue tsohi kɛ wo ɔ, konɛ a kɛ kase adebɔ níhi a he ní ɔ blɔ hyɛe. Se nɔ́ nɛ pe kulaa a, a bua maa jɔ wawɛɛ ke huɛ bɔmi kpakpa nɛ ngɛ a kɛ Yehowa a kpɛti ɔ ya nɔ nɛ e mi wa.

19. Mɛni he blɔ nɛ Kaimi ɔ haa nɛ wa náa, nɛ mɛni be a maa pee Kaimi ɔ jeha nɛ ɔ?

¹⁹ Yehowa ha e sɔmɔli nɛ a jɔɔ a he nɔ kɛ ha lɛ ɔ a kpɛti nɔ fɛɛ nɔ hɛ kɛ nɔ fɔmi ko nɛ se be. (Yer. 29:11) Kristo gbenɔ ɔ Kaimi ɔ ji he blɔ nɛ se be nɛ wɔ tsuo wa náa kɛ jeɔ Mawu kɛ Kristo yi ngɛ nɔ́ nɛ a pee kɛ ha wɔ konɛ wa ná neneene wami ɔ he. Kaimi ɔ nɛ a peeɔ daa jeha a ji ní peemi ko nɛ e he hia Kristofohi tsuo. Jeha nɛ ɔ, a maa pee Kaimi ɔ Hɔ, March 27, 2021 ke pu nɔ si. Nihi fuu nɛ a ngɛ hehi nɛ a ngɛ he blɔ kaa a ma sɔmɔ Yehowa faa ma ná he blɔ kɛ ya ní peemi klɛdɛɛ nɛ ɔ. Nihi nɛ a kɛ si temi kɛ womi ngɛ kpee ɔ po ma nyɛ maa ya Kaimi ɔ. Nihi nɛ a wo mɛ tsu ɔ hu maa pee Kaimi ɔ ngɛ tsu womi he ɔ. Yehowa, Yesu, bɔfo ɔmɛ kɛ nihi nɛ a pɔ mɛ nu nɛ a gbo nɛ a tle mɛ si ɔ bua maa jɔ wawɛɛ ke a na nɛ asafohi, kuuhi, kɛ ni kakaakahi ngɛ Yesu gbenɔ ɔ kaie!