1. Mɛni wa ma nyɛ maa pee konɛ Yehowa bua nɛ jɔ?

 NGƆƆ lɛ kaa o ngɔ nike ní ko nɛ he jua wa wawɛɛ kɛ ha nɔ ko nɛ o suɔ lɛ. Ke nɔ ɔ ngɔ nike ní ɔ kɛ ya fɔ he ko, nɛ e je e juɛmi ngɛ nɔ ɔ, kɛ o maa nu he ha kɛɛ? Ngɛ anɔkuale mi ɔ, e maa dɔ mo wawɛɛ. Se ke nɔ ɔ ngɔ nike ní ɔ kɛ tsu ní, nɛ e ba na mo si kɛ tsɔɔ kaa e bua jɔ he ɔ, o bua maa jɔ saminya. Mɛni ji oti nɛ ngɛ nɔ́ he tomi nɔ́ nɛ ɔ mi? Yehowa ngɔ e Bi ɔ kɛ ha ngɛ wa he. Enɛ ɔ he ɔ, ke wa je hɛsa kpo ngɛ nike ní nɛ se be nɛ ji kpɔmi nɔ́ ɔ, kɛ suɔmi nɛ Yehowa je kpo kɛ tsɔɔ wɔ ɔ he ɔ, e bua maa jɔ wawɛɛ!—Yoh. 3:16; Rom. 5:​7, 8.

2. Mɛni he wa ma susu ngɛ ní kasemi nɛ ɔ mi?

² Ke be ngɛ mi puee ɔ, eko ɔ, wa be kpɔmi nɔ́ ɔ nae hu kaa nike ní ko nɛ he jua wa loo se nami ngɛ he. Ke e ba jã a, e maa pee kaa nɔ́ nɛ wa ngɔ nike ní nɛ Mawu kɛ ha wɔ ɔ kɛ ya fɔ he ko, nɛ wa je wa juɛmi ngɛ nɔ. Bɔ nɛ pee nɛ nɔ́ ko kaa jã nɛ ko ba a, e sa nɛ waa ya nɔ nɛ wa susu nɔ́ nɛ Mawu kɛ Kristo pee ha wɔ ɔ he. Ní kasemi nɛ ɔ maa ye bua wɔ konɛ wa nyɛ nɛ waa pee jã. Wa ma susu bɔ nɛ wa náa kpɔmi nɔ́ ɔ he se ha amlɔ nɛ ɔ, kɛ bɔ nɛ wa ma ná he se ha hwɔɔ se ɔ he. Jehanɛ hu ɔ, wa ma susu nɔ́ nɛ wa maa pee kɛ tsɔɔ kaa wa bua jɔ suɔmi nɛ Yehowa je kpo kɛ tsɔɔ wɔ ɔ he, titli ngɛ Kaimi be ɔ mi.

BƆ NƐ WA NÁA KPƆMI NƆ́ Ɔ HE SE HA AMLƆ NƐ Ɔ

3. Mɛni ji blɔ kake nɔ nɛ wa náa kpɔmi nɔ́ ɔ he se mwɔnɛ ɔ?

³ Ngɛ anɔkuale mi ɔ, wa ngɛ Yesu kpɔmi afɔle sami ɔ he se náe amlɔ nɛ ɔ. Kaa nɔ hyɛmi nɔ́ ɔ, kɛ gu kpɔmi nɔ́ ɔ nɔ ɔ, Yehowa ngɔɔ wa tɔmihi kɛ keɔ wɔ. Ngɛ anɔkuale mi ɔ, pi doo kaa Yehowa nɛ pee jã, mohu ɔ, lɛ nitsɛ nɛ e suɔ kaa e maa pee jã. La polɔ ɔ tsɔɔ kaa e hɛ sa bɔ nɛ Yehowa kɛ tɔmi keɔ ha a. E de ke: “Oo Yehowa, o hi, nɛ o pee klaalo kaa o kɛ yayami maa ke.”—La 86:5; 103:​3, 10-13.

4. Mɛnɔmɛ a he je nɛ Yehowa ngɔ kpɔmi nɔ́ ɔ kɛ ha? (Luka 5:32; 1 Timoteo 1:15)

 ⁴ Eko ɔ, ni komɛ ma susu kaa Yehowa kɛ a yayamihi be mɛ kee ejakaa a sɛ. Ngɛ anɔkuale mi ɔ, wɔ tsuo wa sɛ. Bɔfo Paulo tsɔɔ kaa ‘e sɛ kaa a tsɛɔ lɛ bɔfo.’ Se kɛ̃ ɔ, e de hu ke: “Mawu dloomi ɔ lɛ ha nɛ i ngɛ kaa bɔ nɛ i ngɛ nɛ ɔ nɛ.” (1 Kor. 15:​9, 10) Ke wa tsake wa tsui ngɛ yayamihi nɛ wa pee ɔ a he ɔ, Yehowa kɛ maa ke wɔ. Mɛni he je? Pi kaa wa sa, se mohu ɔ, akɛnɛ e suɔ wɔ ɔ he je. Ke o ngɛ he nue kaa o ji nɔ ko nɛ e sɛ, nɛ Yehowa be o tɔmihi ngɔe kɛ ke mo ɔ, mo kai kaa Yehowa ngɔ kpɔmi nɔ́ ɔ kɛ ha ngɛ yayami peeli nɛ a tsake a tsui ɔ a he, se pi nihi nɛ a ye mluku ɔ a he.—Kane Luka 5:32; 1 Timoteo 1:15.

5. Anɛ e sa nɛ wa ti nɔ ko nɛ nu he kaa doo ɔ, Yehowa nɛ ngɔ e yayamihi kɛ ke lɛ lo? Moo tsɔɔ nya.

⁵ E sɛ nɛ wa ti nɔ ko nɔ ko nɛ susu kaa akɛnɛ e kɛ jehahi babauu ngɛ Yehowa sɔmɔe he je ɔ, e sa nɛ Yehowa nɛ ngɔ e tɔmihi kɛ ke lɛ. E ji anɔkuale kaa Yehowa hɛ ji níhi tsuo nɛ wa pee ngɛ e sɔmɔmi mi ɔ nɔ. (Heb. 6:10) E ha wɔ kpɔmi nɔ́ ɔ kaa nike ní, se pi kaa e kɛ maa wo wɔ hiɔ ngɛ sɔmɔmi nɛ wa ngɛ lɛ sɔmɔe ɔ he. Enɛ ɔ he ɔ, e sɛ nɛ wa susu kaa akɛnɛ wa pee níhi fuu ha Yehowa he je ɔ, e sa nɛ e na wɔ mɔbɔ loo e ngɔ wa yayamihi kɛ ke wɔ. Ke wa susuɔ jã a, lɛɛ wa ngɛ tsɔɔe kaa wa hia we Kristo gbenɔ ɔ.—Kɛ to Galatia Bi 2:21 ɔ he.

6. Mɛni he je nɛ Paulo tsu ní wawɛɛ ngɛ Yehowa sɔmɔmi mi ɔ?

⁶ Paulo le kaa pi ní tsumi abɔ nɛ e ma tsu ngɛ Yehowa sɔmɔmi mi ɔ nɔ nɛ Yehowa maa da kɛ na lɛ mɔbɔ. Ke jã a, lɛɛ mɛni he je nɛ e tsu ní wawɛɛ ngɛ Yehowa sɔmɔmi mi ɔ? Pi nɛ Paulo pee jã konɛ Yehowa nɛ na lɛ mɔbɔ, mohu ɔ, e pee jã konɛ e kɛ tsɔɔ kaa e bua jɔ kaa Yehowa je mi mi jɔmi kɛ mɔbɔ nami kpo kɛ tsɔɔ lɛ. (Efe. 3:7) Kaa bɔ nɛ Paulo pee ɔ, pi nɛ wa suɔ kaa Yehowa nɛ na wɔ mɔbɔ he je nɛ waa kɛ kã sɔmɔɔ lɛ, mohu ɔ, wa peeɔ jã kɛ tsɔɔ kaa wa bua jɔ nɔ́ nɛ e pee kɛ ha wɔ ɔ he.

7. Mɛni ji blɔ kpa nɔ nɛ wa náa kpɔmi nɔ́ ɔ he se mwɔnɛ ɔ? (Roma Bi 5:1; Yakobo 2:23)

⁷ Wa náa kpɔmi nɔ́ ɔ he se ngɛ blɔ kpa ko hu nɔ. E ma nyɛ ma ha nɛ huɛ bɔmi kpakpa nɛ hi waa kɛ Yehowa wa kpɛti. a Kaa bɔ nɛ wa na ngɛ ní kasemi nɛ sɛ hlami ɔ mi ɔ, benɛ a fɔ wɔ pɛ ɔ, huɛ bɔmi ko be waa kɛ Yehowa wa kpɛti. Se kɛ gu kpɔmi nɔ́ ɔ nɔ ɔ, waa kɛ ‘Mawu ma nyɛ maa hi si ngɛ tue mi jɔmi mi,’ nɛ wa ma nyɛ maa hɛ kɛ su e he.—Kane Roma Bi 5:1; Yakobo 2:23.

8. Mɛni he je nɛ e sa kaa wa bua nɛ jɔ he blɔ nɛ wa ná kaa wa maa sɔle ha Yehowa a he ɔ?

⁸ Mo susu nɔ́ kake nɛ wa peeɔ akɛnɛ huɛ bɔmi kpakpa ngɛ waa kɛ Yehowa wa kpɛti ɔ he nɛ o hyɛ. Lɔ ɔ ji sɔlemi. Yehowa buɔ sɔlemi nɛ e sɔmɔli sɔleɔ ngɛ kpehi a sisi loo ngɛ he nya buami kpahi a sisi ɔ tue. Se pi lɔ ɔ pɛ, e buɔ sɔlemi nɛ wa kpɛti nɔ fɛɛ nɔ sɔleɔ ngɛ e dɛ he ɔ hu tue. Sɔlemi haa nɛ wa tsui nɔɔ wa mi. Se nɔ́ nɛ pe kulaa a, e haa nɛ huɛ bɔmi nɛ ngɛ waa kɛ Yehowa wa kpɛti ɔ mi waa. (La 65:2; Yak. 4:8; 1 Yoh. 5:14) Benɛ Yesu ngɛ zugba a nɔ ɔ, e sɔleɔ be fɛɛ be, ejakaa e le kaa Yehowa buɔ e sɔlemi ɔ tue, nɛ jã nɛ e pee ɔ hu ha nɛ huɛ bɔmi gbagbanii hi e kɛ e Tsɛ ɔ a kpɛti. (Luka 5:16) Wa bua jɔ wawɛɛ kaa kɛ gu Yesu afɔle sami ɔ nɔ ɔ, waa kɛ Yehowa ma nyɛ maa pee huɛ, nɛ waa kɛ lɛ ma nyɛ maa sɛɛ ní hulɔ!

BƆ NƐ WA MA NÁ KPƆMI NƆ́ Ɔ HE SE HA HWƆƆ SE

9. Kɛ Yehowa sɔmɔli anɔkualetsɛmɛ ma ná kpɔmi nɔ́ ɔ he se ha kɛɛ hwɔɔ se?

⁹ Kɛ Yehowa sɔmɔli anɔkualetsɛmɛ ma ná kpɔmi nɔ́ ɔ he se ha kɛɛ hwɔɔ se? Yehowa ma  ha mɛ neneene wami. Nihi fuu susuɔ kaa enɛ ɔ be nyɛe maa ba mi ejakaa pi mwɔnɛ ɔ nɛ adesahi bɔni gbomi. Se sisije ɔ, yi mi nɛ Yehowa to ji kaa adesahi nɛ a hi si kɛ ya neneene. Kaa Adam pee we yayami ɔ, jinɛ adesahi maa hi si kɛ ya neneene, nɛ nɔ ko be susue kaa wa be nyɛe maa hi wami mi daa. Ke e he wa ha wɔ amlɔ nɛ ɔ kaa wa maa po neneene wami nɛ wa ma ná a he foni po ɔ, wa ma nyɛ ma he ye kaa wa maa hi si kɛ ya neneene, ejakaa Yehowa ngɔ nɔ́ ko nɛ he jua wa wawɛɛ, nɛ ji e Bi nɛ e suɔ lɛ ɔ kɛ sã afɔle konɛ enɛ ɔ nɛ ba mi.—Rom. 8:32.

10. Mɛni jɔɔmi nɛ nihi nɛ a pɔ mɛ nu ɔ kɛ jijɔ kpa amɛ ngɛ blɔ hyɛe?

¹⁰ E ngɛ mi kaa neneene wami ji jɔɔmi nɛ maa ba hwɔɔ se mohu lɛɛ, se Yehowa suɔ nɛ wa pue wa yi mi tɛ ngɛ he amlɔ nɛ ɔ. Nihi nɛ a pɔ mɛ nu ɔ ngɛ blɔ hyɛe kaa a ma ná wami kɛ ya neneene ngɛ hiɔwe, nɛ a kɛ Kristo maa ye matsɛ. (Kpoj. 20:6) Jijɔ kpa amɛ hu ngɛ blɔ hyɛe kaa a ma ná neneene wami ngɛ Paradeiso zugba a nɔ, nɛ a be nɔ́ nae nɛ a be haoe hulɔ. (Kpoj. 21:​3, 4) Anɛ o piɛɛ jijɔ kpa amɛ a he, nɛ o ngɛ blɔ hyɛe kaa o maa hi si kɛ ya neneene ngɛ zugba a nɔ lo? Enɛ ɔ pi jɔɔmi nyafii kulaa! Yehowa bɔ wɔ kaa waa hi zugba a nɔ, enɛ ɔ he ɔ, neneene wami nɛ wa ma ná ngɛ zugba a nɔ ɔ ma ha nɛ wa ma ná bua jɔmi wawɛɛ nitsɛ.

11-12. Mɛni ji jɔɔmi komɛ nɛ wa ma nyɛ maa hyɛ blɔ ngɛ Paradeiso ɔ mi? (Hyɛ foni ɔ hulɔ.)

¹¹ Moo po bɔ nɛ o si himi ma ji ha ngɛ Paradeiso zugba a nɔ ɔ he foni nɛ o hyɛ. O be haoe ngɛ hiɔ kɛ gbenɔ he hu. (Yes. 25:8; 33:24) Yehowa ma ha mo ní kpakpahi tsuo nɛ o tsui suɔ. Mɛni o suɔ kaa o maa pee ngɛ je ehe ɔ mi? Anɛ o maa suɔ kaa o maa kase lohwehi a he ní lo? O maa kase la fiami lo? Aloo o maa kase ní tɛnimi? E ngɛ heii kaa ngɛ paradeiso ɔ mi ɔ, a maa hia nihi nɛ a ma tɛni tsuhi nɛ a maa ma a, nihi nɛ a maa ma tsuhi, kɛ ngmɔ huli. Jehanɛ hu ɔ, a maa hia nihi nɛ a maa hoo ní, nihi nɛ a maa pee ní tsumi ga dadehi,  kɛ nihi nɛ a maa pee abɔɔhi nɛ a maa hyɛ nɔ. (Yes. 35:1; 65:21) Akɛnɛ wa maa hi si kɛ ya neneene he je ɔ, wa ma ná be kɛ tsu ní nɛ ɔmɛ tsuo kɛ ní kpahi.

¹² E maa pee bua jɔmi wawɛɛ kaa wa ma nya nihi nɛ a ma tle mɛ si kɛ ba wami mi ɔ a he! (Níts. 24:15) Moo po he foni nɛ o hyɛ: Ke o kase Yehowa he ní fuu kɛ gu adebɔ níhi nɛ o ma pue o yi mi tɛ ngɛ he ɔ nɔ ɔ, o bua maa jɔ saminya. (La 104:24; Yes. 11:9) Nɛ nɔ́ nɛ pe kulaa a, waa kɛ bua jɔmi ma sɔmɔ Yehowa, nɛ wa he nile be wɔ fɔ bue hu! Anɛ o ma ha nɛ “yayami mi ngɔɔmi nɛ se kɛ we ɔ” nɛ tsi mo blɔ nɛ o nine nɛ ko su jɔɔmihi nɛ se be nɛ o ma ná hwɔɔ se ɔ nɔ lo? (Heb. 11:25) E ngɛ heii kaa o be jã pee! Jɔɔmi nɛ ɔmɛ nɛ wa ma ná a he jua wa kulaa pe níhi tsuo nɛ waa kɛ maa sã afɔle mwɔnɛ ɔ. Mo kai kaa Paradeiso ɔ nɛ wa ngɛ he munyu tue ɔ pi nɔ́ nɛ wa maa hi blɔ hyɛe kɛ ya daa. E maa ba mi kokooko. Ní nɛ ɔmɛ tsuo maa ba mi, ejakaa Yehowa je suɔmi mi nɛ e ha wɔ nike ní nɛ ji kpɔmi nɔ́ ɔ!

MOO TSƆƆ KAA O BUA JƆ SUƆMI NƐ YEHOWA JE KPO Ɔ HE

13. Mɛni wa ma nyɛ maa pee kɛ tsɔɔ kaa wa bua jɔ suɔmi nɛ Yehowa je kpo kɛ tsɔɔ wɔ ɔ he? (2 Korinto Bi 6:1)

¹³ Mɛni wa ma nyɛ maa pee kɛ tsɔɔ kaa wa bua jɔ kaa Yehowa ha wɔ kpɔmi nɔ́ ɔ? E sa nɛ waa ngɔ Yehowa sɔmɔmi kɛ pee nɔ́ titli ngɛ wa si himi mi. (Mat. 6:33) Enɛ ɔ he hia ejakaa Yesu gbo “konɛ nihi nɛ a ngɛ wami mi ɔ nɛ a ko hi wami mi kɛ ha mɛ nitsɛmɛ a he hu, se mohu kɛ ha nɔ nɛ e gbo kɛ ha mɛ nɛ a tle lɛ si ɔ.” (2 Kor. 5:15) Yehowa je mi mi jɔmi mi nɛ e ngɔ wa yayami ɔmɛ kɛ ke wɔ. Ke wa je wa tsui mi kɛ sɔmɔ lɛ ɔ, lɔ ɔ tsɔɔ kaa wa le nɔ́ nɛ e pee kɛ ha wɔ ɔ, nɛ wa bua jɔ he.—Kane 2 Korinto Bi 6:1.

14. Mɛni wa ma nyɛ maa pee kɛ tsɔɔ kaa wa ngɛ hemi kɛ yemi ngɛ blɔ tsɔɔmi nɛ Yehowa kɛ haa wɔ ɔ mi?

¹⁴ Jehanɛ hu ɔ, ke waa kɛ wa hɛ fɔ Yehowa nɔ, nɛ waa kɛ blɔ tsɔɔmihi nɛ e kɛ haa wɔ ɔ tsu ní ɔ, lɔ ɔ tsɔɔ kaa wa bua jɔ suɔmi nɛ Yehowa je kpo kɛ tsɔɔ wɔ ɔ he. Ngɛ mɛni blɔ nɔ? Ke e ma bi nɛ waa mwɔ yi mi kpɔ ngɛ ní komɛ kaa he nɛ wa maa ya sukuu kɛ ya ta, loo ní tsumi nɛ wa ma tsu ɔ he ɔ, e sa nɛ wa susu nɔ́ nɛ Yehowa suɔ nɛ waa pee ɔ he. (1 Kor. 10:31; 2 Kor. 5:7) Ke wa mwɔ yi mi kpɔhi nɛ maa sa Yehowa hɛ mi ɔ, lɔ ɔ ma ha nɛ hemi kɛ yemi nɛ wa ngɛ ngɛ e mi ɔ mi maa wa, nɛ huɛ bɔmi gbagbanii maa hi waa kɛ lɛ wa kpɛti. Kɛkɛ ɔ, hɛnɔkami nɛ wa ngɛ kaa wa maa hi si kɛ ya neneene ɔ mi maa wa wawɛɛ.—Rom. 5:​3-5; Yak. 2:​21, 22.

15. Mɛni wa maa pee kɛ tsɔɔ kaa wa bua jɔ Yehowa suɔmi ɔ he ngɛ Kaimi be ɔ mi?

¹⁵ Blɔ kpa ko hu ngɛ nɛ wa ma nyɛ maa gu nɔ kɛ tsɔɔ kaa wa bua jɔ suɔmi nɛ Yehowa je kpo ɔ he. Lɔ ɔ ji kaa wa maa pee nɔ́ fɛɛ nɔ́ nɛ wa ma nyɛ ngɛ Kaimi be ɔ mi kɛ ha nɛ Yehowa nɛ na kaa wa bua jɔ kpɔmi nɔ́ ɔ he. Ngɛ wa he nɛ wa ma dla kɛ ha Kaimi ɔ se ɔ, wa ma nyɛ maa fɔ ní kpahi nine konɛ a ba eko. (1 Tim. 2:4) Moo  tsɔɔ nihi nɛ o maa fɔ mɛ nine ɔ níhi nɛ maa ya nɔ ngɛ Kaimi ɔ sisi. O ma nyɛ ma je videohi nɛ ji Mɛni He Je Nɛ Yesu Gbo? kɛ Kai Yesu Gbenɔ ɔ nɛ ngɛ jw.org ɔ nɔ ɔ kɛ tsɔɔ mɛ. E sa nɛ asafo mi nikɔtɔmahi nɛ a bɔ mɔde kaa a maa fɔ nihi nɛ a kpa fiɛɛmi kɛ asafo mi kpehi yami ɔ nine. Ke Yehowa jijɔhi nɛ a laa a kpɛti ni komɛ kpale ba piɛɛ e to kuu ɔ he ɔ, hyɛ bɔ nɛ bua jɔmi maa ba hiɔwe kɛ zugba a nɔ ha! (Luka 15:​4-7) Ke wa ya Kaimi ɔ, nyɛ ha nɛ wa kɛ pee oti kaa wa ma nya nɔ fɛɛ nɔ he, titli ni hehi kɛ nihi nɛ a ba Kaimi ɔ kɛ ɔ. Wa suɔ nɛ a hɛ nɛ mwɔ si!—Rom. 12:13.

16. Mɛni he je nɛ e hi wawɛɛ kaa wa ma bli wa sɔmɔmi ní tsumi ɔ mi ngɛ Kaimi be ɔ mi ɔ?

¹⁶ Anɛ o ma nyɛ ma bli o sɔmɔmi ní tsumi ɔ mi ngɛ Kaimi be ɔ mi lo? Ke o pee jã a, lɔ ɔ tsɔɔ kaa o bua jɔ níhi tsuo nɛ Mawu kɛ Kristo pee kɛ ha wɔ ɔ he. Ke o pee babauu ngɛ Yehowa sɔmɔmi mi ɔ, o maa na bɔ nɛ Yehowa maa ye bua mo ha, nɛ enɛ ɔ ma ha nɛ hɛ kɛ nɔ fɔmi nɛ o ngɛ ngɛ e mi ɔ mi maa wa. (1 Kor. 3:9) Jehanɛ se hu ɔ, moo bɔ mɔde kaa o maa nyɛɛ Kaimi ɔ he Baiblo kanemi blɔ nya tomi ɔ se. O maa na Baiblo kanemi blɔ nya tomi ɔ ngɛ Mo Susu Ngmami ɔ He Daa Ligbi​ womiyo ɔ mi, aloo ngɛ daka nɛ ngɛ otsi kpɛti kpe ní kasemi womi ɔ mi ɔ mi. O ma nyɛ maa to blɔ nya konɛ o ngɔ ngmami nɛ ɔmɛ kɛ pee o dɛ he ní kasemi.

17. Mɛni haa nɛ Yehowa bua jɔɔ? (Hyɛ daka nɛ ji, “ Ní Komɛ Nɛ O Ma Nyɛ Maa Pee Kɛ Tsɔɔ Kaa O Bua Jɔ Suɔmi Nɛ Yehowa Je Kpo Ha Mo ɔ He” ɔ hulɔ.)

¹⁷ Ke eko ɔ, o si fɔfɔɛ be mo blɔ ngmɛe nɛ o pee níhi tsuo nɛ a wo ta ngɛ ní kasemi nɛ ɔ mi ɔ hu nɛɛ? Mo kai kaa Yehowa ngɔɛ nɔ́ nɛ o nyɛɔ peeɔ ɔ kɛ to nɔ́ nɛ ni kpahi nyɛɔ peeɔ ɔ he. E le nɔ́ nɛ ngɛ o tsui mi. Ke e na bɔ nɛ o jeɔ o tsui mi nɛ o jeɔ hɛsa kpo ngɛ nike ní nɛ se be nɛ ji kpɔmi nɔ́ ɔ he ɔ, e bua jɔɔ wawɛɛ.—1 Sam. 16:7; Maak. 12:​41-44.

18. Mɛni he je nɛ wa jeɔ hɛsa kpo ngɛ nɔ́ nɛ Yehowa Mawu kɛ Yesu Kristo pee kɛ ha wɔ ɔ he ɔ?

¹⁸ Kpɔmi nɔ́ ɔ he je ɔ, Yehowa ngɔɔ wa yayami ɔmɛ kɛ keɔ wɔ, huɛ bɔmi kpakpa hiɔ waa kɛ lɛ wa kpɛti, nɛ wa ngɛ hɛnɔkami kaa wa maa hi si kɛ ya neneene. Nyɛ ha nɛ wɔ tsuo waa ngɔ wa ní peepee kɛ tsɔɔ kaa wa hɛ sa suɔmi nɛ Yehowa je kpo kɛ tsɔɔ wɔ ɔ. Suɔmi nɛ ɔ ji nɔ́ nɛ wo lɛ he wami nɛ e to jɔɔmi nɛ ɔmɛ a he blɔ nya kɛ ha wɔ ɔ nɛ. (1 Yoh. 4:19) Jehanɛ hu ɔ, nyɛ ha nɛ waa tsɔɔ kaa wa bua jɔ Yesu he, ejakaa e suɔ wɔ, nɛ e ngɔ e wami kɛ ha ngɛ wa he je!—Yoh. 15:13.