1. Kɛ nihi babauu peeɔ a ní ha kɛɛ mwɔnɛ ɔ?

 ANƐ o yɔse kaa mwɔnɛ ɔ, nihi babauu susuɔ mɛ pɛ a he lo? Kaa nɔ hyɛmi nɔ́ ɔ, ni komɛ guɔ Intanɛti ɔ nɔ kɛ gblaa nihi a juɛmi kɛ baa a nɔ, nɛ a fĩaa ngɛ níhi nɛ a nyɛ nɛ a pee ɔ he. Se kɛ̃ ɔ, nihi bɔɔ ngɛ nɛ a woɔ Yehowa Mawu hɛ mi nyami mwɔnɛ ɔ. Ngɛ ní kasemi nɛ ɔ mi ɔ, wa ma susu nɔ́ nɛ Yehowa hɛ mi nyami nɛ wa maa wo ɔ tsɔɔ, kɛ nɔ́ he je nɛ e sa nɛ waa pee jã a he. Jehanɛ hu ɔ, wa maa hyɛ blɔ nɔ nɛ wa maa gu kɛ ngɔ hɛ mi nyami nɛ sa Mawu ɔ kɛ ha lɛ, kɛ bɔ nɛ lɛ nitsɛ e maa wo e biɛ ɔ hɛ mi nyami hwɔɔ se ha.

MƐNI NƐ HƐ MI NYAMI NƐ WAA KƐ MA HA YEHOWA A TSƆƆ?

2. Mɛni blɔ nɔ Yehowa gu kɛ je e hɛ mi nyami ɔ kpo ngɛ Sinai Yoku ɔ nɔ? (Hyɛ foni ɔ hulɔ.)

² Mɛni ji hɛ mi nyami? Ngɛ Baiblo ɔ mi ɔ, munyu nɛ ji “hɛ mi nyami” ɔ ma nyɛ maa tsɔɔ nɔ́ fɛɛ nɔ́ nɛ haa nɛ a naa nɔ ko kaa e je agbo. Benɛ Yehowa kpɔ̃ Israelbi ɔmɛ kɛ je nyɔguɛ tso mi ngɛ Egipt be bɔɔ se ɔ, e je e hɛ mi nyami ɔ kpo ngɛ blɔ nɛ se be nɔ. Moo po he foni nɛ o hyɛ: Israelbi ayɔhi abɔ bua a he nya ngɛ Sinai Yoku ɔ kasa nya konɛ a bu nɔ́ nɛ a Mawu ɔ ma de mɛ ɔ tue. Kɛkɛ nɛ bɔku kpii ko ba ha yoku ɔ nɔ. Tlukaa a, yoku ɔ tsuo bɔni lasuku jemi, nɛ he nɛ a daa si ngɛ ɔ mimiɛɛ, nɛ oslabai gba, nɛ hiɔwe si, nɛ titimati ko pɛ wawɛɛ. (2 Mose 19:​16-18; 24:17; La 68:8) Benɛ Yehowa je e hɛ mi nyami ɔ kpo kɛ gu nyakpɛ ní nɛ ɔmɛ nɛ e pee ɔ nɔ ɔ, atsinyɛ jemi ko be he kaa Israelbi ɔmɛ a nya kpɛ a he wawɛɛ.

3. Mɛni blɔ nɔ wa ma nyɛ maa gu kɛ wo Yehowa hɛ mi nyami?

³ Anɛ adesahi hu ma nyɛ maa wo Yehowa hɛ mi nyami lo? Ee, a ma nyɛ. Blɔ kake nɛ wa ma nyɛ maa gu nɔ kɛ wo Yehowa hɛ mi nyami ji kaa wa maa tu e he wami nɛ se be kɛ su kpakpahi nɛ e ngɛ ɔ a he munyu kɛ tsɔɔ nihi. Jehanɛ hu ɔ, wa ma nyɛ ma  je Yehowa yi ngɛ níhi nɛ e yeɔ buaa wɔ nɛ wa nyɛɔ peeɔ ɔ he. (Yes. 26:12) Matsɛ David ji nɔ ko nɛ e wo Yehowa hɛ mi nyami wawɛɛ, nɛ wa ma nyɛ maa kase lɛ. David sɔle ngɛ Israel ma a tsuo hɛ mi, nɛ e de ke: “O kle, nɛ o nɔ́ ji he wami ɔ, kɛ afɛu ɔ, kɛ hɛ mi nyami ɔ, kɛ agboje ɔ, ejakaa nɔ́ fɛɛ nɔ́ nɛ ngɛ hiɔwe kɛ zugba a nɔ ɔ, o nɔ́.” Benɛ David gbe e sɔlemi ɔ nya a, ‘ma a tsuo je Yehowa yi.’—1 Kron. 29:​11, 20.

4. Mɛni blɔ nɔ nɛ Yesu gu kɛ wo Yehowa hɛ mi nyami?

⁴ Benɛ Yesu ngɛ zugba a nɔ ɔ, e wo Yehowa hɛ mi nyami. Ngɛ mɛni blɔ nɔ? E ha nɛ nihi le kaa he wami nɛ e kɛ pee nyakpɛ níhi ɔ je e Tsɛ ɔ ngɔ. (Maak. 5:​18-20) Jehanɛ hu ɔ, e kɛ nihi hi si saminya, nɛ e tu e Tsɛ ɔ he munyu kpakpa kɛ tsɔɔ nihi. Ligbi ko ɔ, Yesu ngɛ ní tsɔɔe ngɛ kpe he ko, nɛ yo ko nɛ mumi yayami ngɛ lɛ haoe jeha 18 sɔuu ɔ ngɛ lejɛ ɔ. Mumi yayami ɔ ha nɛ e kpɛ̃, nɛ e nyɛ we nɛ e kpã e mi kulaa. Ngɛ anɔkuale mi ɔ, yo nɛ ɔ na nɔ́ wawɛɛ! Yesu mi mi sã lɛ ngɛ yo ɔ he, nɛ e hɛ kɛ su e he, nɛ e je mi mi jɔmi mi nɛ e de lɛ ke: “Yo, a je o gbɔjɔmi ɔ ngɛ o nɔ.” Kɛkɛ nɛ e ngɔ e nine kɛ pue yo ɔ nɔ, nɛ oya nɔuu nɛ yo ɔ nyɛ nɛ e da si saminya, nɛ e “bɔni Mawu hɛ mi nyami womi.” Yo ɔ bua jɔ kaa Yehowa ha nɛ e ná nɔmlɔ tso mi he wami ekohu! (Luka 13:​10-13) E da blɔ kaa yo nɛ ɔ je Yehowa yi, nɛ e sa nɛ wɔ hu waa pee jã.

MƐNI HE JE NƐ WA WOƆ YEHOWA HƐ MI NYAMI?

5. Mɛni he je nɛ wa buɔ Yehowa?

⁵ Wa woɔ Yehowa hɛ mi nyami ejakaa wa ngɛ bumi nɛ mi kuɔ kɛ ha lɛ. Wa ngɛ yi mi tomihi fuu a he je nɛ e sa kaa wa je bumi kpo kɛ tsɔɔ Yehowa. Yehowa ji ope, nɛ e ngɛ he wami. E he wami ɔ huzu be he. (La 96:​4-7) Bɔ nɛ e juɛmi mi kuɔ ha a jeɔ kpo heii ngɛ e nibɔ ní ɔmɛ a mi. Lɛ nɛ e ha wɔ wami, nɛ lɛ nɛ e baa wa yi. (Kpoj. 4:11) E yeɔ anɔkuale. (Kpoj. 15:4) Nɔ́ fɛɛ nɔ́ nɛ e peeɔ ɔ yeɔ manye, nɛ e yeɔ e si womihi a nɔ be fɛɛ be. (Yosh. 23:14) Enɛ ɔ he je nɛ gbalɔ Yeremia de ngɛ Yehowa he ke: “Je ma amɛ tsuo a kpɛti ɔ, nɔ ko be nɛ kɛ mo sɔ, a ní leli ɔmɛ jio, a matsɛmɛ ɔmɛ jio”! (Yer. 10:​6, 7) Niinɛ, e da blɔ kaa wa maa bu wa hiɔwe Tsɛ ɔ. Se pi bumi pɛ nɛ e sa kaa waa bu Yehowa, e sa nɛ waa suɔ lɛ hulɔ.

6. Mɛni he je nɛ wa suɔ Yehowa?

⁶ Wa woɔ Yehowa hɛ mi nyami ejakaa wa suɔ lɛ wawɛɛ. Mo susu su kpakpahi fuu nɛ Yehowa ngɛ nɛ́ lɔ ɔ ha nɛ wa suɔ lɛ ɔ he nɛ o hyɛ. E naa nɔ mɔbɔ, nɛ e mi mi sãa lɛ ngɛ wa he. (La 103:13; Yes. 49:15) E nuɔ nɔ́ he ha nɔ; ke wa hao ɔ, lɛ hu e haoɔ. (Zak. 2:8) E yeɔ buaa wɔ konɛ waa hɛ kɛ su e he, nɛ́ wa ba pee e huɛmɛ. (La 25:14; Níts. 17:27) Jehanɛ hu ɔ, Yehowa baa e he si. Baiblo ɔ de ke: “E baa e yi si nɛ e hyɛɔ hiɔwe kɛ zugba, e woɔ nɔ nɛ e ní ngɛ mɔbɔ ɔ nɔ kɛ jeɔ zu mi.” (La 113:​6, 7) Ngɛ yi mi tomi nɛ ɔmɛ a he je ɔ, wa suɔ kaa wa maa wo wa Mawu nɛ e nɔ kuɔ pe kulaa a hɛ mi nyami.—La 86:12.

7. Mɛni he blɔ titli lɛ wa ná?

⁷ Wa woɔ Yehowa hɛ mi nyami ejakaa wa suɔ nɛ ni kpahi nɛ a ba le lɛ. Nihi babauu li anɔkuale nɛ kɔɔ Yehowa he ɔ. Mɛni he je? Ejakaa Satan yu a juɛmi kɛ gu Mawu he lakpa munyuhi nɛ e ha nɛ e gbɛ fĩa, nɛ́ nihi he ye ɔ nɔ. (2 Kor. 4:4) Satan ha nɛ nihi he ye kaa Yehowa kɛ yayami ki, nɛ e ji Mawu nɛ e susuu we nɔ he, nɛ lɛ nɛ e ha nɛ nɔ́ nami hiɛ babauu ngɛ je ɔ mi ɔ nɛ. Se wɔɔ lɛɛ wa le anɔkuale ɔ! Wa ná he blɔ nɛ waa kɛ ma ha nɛ nihi nɛ a le nɔ tutuutu nɛ Mawu ji, nɛ waa ye bua mɛ konɛ mɛ hu a wo e hɛ mi nyami. (Yes. 43:10) La 96 tu Yehowa hɛ mi nyami nɛ wa maa wo ɔ he munyu titli. Ke wa ngɛ munyu komɛ nɛ ngɛ la nɛ ɔ mi ɔ a he susue ɔ, moo hyɛ blɔhi a nɔ nɛ o ma nyɛ maa gu nɛ o kɛ hɛ mi nyami nɛ sa Yehowa a nɛ ha lɛ.

 MƐNI BLƆ NƆ WA MAA GU NƐ WAA KƐ HƐ MI NYAMI NƐ SA YEHOWA A NƐ HA LƐ?

8. Mɛni ji blɔ kake nɔ nɛ wa ma nyɛ maa gu kɛ wo Yehowa hɛ mi nyami? (La 96:​1-3)

⁸ Kane La 96:​1-3. Wa ma nyɛ maa ngɔ wa munyu tutui kɛ wo Yehowa hɛ mi nyami. Ngmami nɛ ɔ woɔ Yehowa we bi he wami konɛ a “la ha Yehowa,” a “je e biɛ ɔ yi,” a “jaje e yi wami hemi ɔ he sane kpakpa a,” nɛ́ a “jaje e hɛ mi nyami ɔ ngɛ je ma amɛ a kpɛti.” Wa ma nyɛ maa gu blɔ nɛ ɔmɛ tsuo a nɔ kɛ wo wa hiɔwe Tsɛ ɔ hɛ mi nyami. Yudabi anɔkualetsɛmɛ kɛ Kristofohi nɛ a hi si ngɛ kaseli ɔmɛ a be ɔ mi ɔ de nihi ní kpakpahi tsuo nɛ Yehowa pee kɛ ha mɛ ɔ, nɛ a fã Yehowa biɛ ɔ he hulɔ. (Dan. 3:​16-18; Níts. 4:29) Mɛni blɔ nɔ wɔ hu wa maa gu kɛ pee jã?

9-10. Mɛni o kase ngɛ Angelena níhi a si kpami ɔ mi? (Hyɛ foni ɔ hulɔ.)

⁹ Mo susu nyɛmiyo ko nɛ e ngɛ United States nɛ a tsɛɛ lɛ ke Angelena a a níhi a si kpami ɔ he nɛ o hyɛ. E pee kã nɛ e tu munyu kɛ fã Yehowa he ngɛ e ní tsumi he ɔ. Akɛnɛ Angelena ji nɔ he ngɛ ní tsumi ɔ mi he je ɔ, a fɔ e kɛ ni kpahi nɛ a ba ní tsumi ɔ mi kɛ we ɔ nine konɛ a ba je a he si kɛ tsɔɔ ní tsuli kpa amɛ. Angelena to kaa e maa tsɔɔ mɛ foni komɛ konɛ e kɛ ha nɛ a le nɔ́ nɛ haa nɛ e bua jɔɔ ngɛ si himi mi kaa Yehowa Odasefono. Se benɛ e piɛ bɔɔ nɛ e maa su Angelena nɔ nɛ e maa tu munyu ɔ, ní tsuli ɔmɛ a kpɛti nɔ kake je e he si kɛ tsɔɔ ni kpa amɛ kaa e fɔli ji Yehowa Odasefohi. Kɛkɛ nɛ e bɔni Odasefo ɔmɛ kɛ a hemi kɛ yemi ɔ he munyu yaya tumi. Angelena de ke: “E ngɛ mi kaa i ye gbeye wawɛɛ mohu lɛɛ, se i de ye he ke: ‘I be nyɛe nɛ ma ma ye nya be mi nɛ a ngɛ Yehowa he lakpa munyu tue. E sa nɛ ma fã Yehowa he.’”

¹⁰ Benɛ ní tsulɔ ɔ tu munyu ta a, Angelena sɔle kpiti ngɛ e yi mi. Kɛkɛ nɛ e je mi mi jɔmi mi nɛ e de lɛ ke: “Ye si fɔfɔɛ ɔ ngɛ kaa o nɔ́ ɔ. Imi hu a tsɔse mi kaa Yehowa Odasefono, nɛ loloolo ɔ, i ji Yehowa Odasefono.” E ngɛ mi kaa si fɔfɔɛ nɛ ɔ be gbɔjɔɔ mohu lɛɛ, se Angelena pee kpoo. E ngɔ fotohi nɛ tsɔɔ bɔ nɛ e kɛ huɛmɛ ɔmɛ a bua jɔɔ ha ngɛ Yehowa sɔmɔmi mi ɔ kɛ tsɔɔ ní tsuli kpa amɛ, nɛ e je bumi mi kɛ tsɔɔ mɛ níhi nɛ e heɔ yeɔ ɔ. (1 Pet. 3:15) Mɛni je mi kɛ ba? Benɛ Angelena gbe e munyu ɔ nya a, nyumu ɔ he jɔ. Enɛ ɔ ha nɛ nyumu ɔ tu níhi a si kpami komɛ nɛ sa kadimi nɛ e ná benɛ e ji niheyo nɛ e kɛ Odasefo ɔmɛ bɔ ɔ he munyu. Angelena de ke: “E sa nɛ ma fã  Yehowa he, nɛ e ji he blɔ nɛ se be nɛ i ná kaa ma pee jã.” E ji he blɔ nɛ se be kaa wɔ hu wa ma je Yehowa yi, nɛ waa wo e hɛ mi nyami ke ni kpahi pee we jã po.

11. Kɛ anɔkuale Kristofohi nɛ a hi si blema kɛ Kristofohi nɛ a ngɛ mwɔnɛ ɔ ngɔ sisi tomi mlaa nɛ ngɛ La 96:8 ɔ kɛ tsu ní ha kɛɛ?

¹¹ Kane La 96:8. Wa ma nyɛ maa ngɔ wa níhi nɛ a he jua wa a kɛ wo Yehowa hɛ mi nyami. Kɛ je blema tɔɔ nɛ anɔkuale Kristofohi ngɔɔ a níhi nɛ a he jua wa a kɛ woɔ Yehowa hɛ mi nyami. (Abɛ 3:9) Kaa nɔ hyɛmi nɔ́ ɔ, Israelbi ɔmɛ ngɔ a sika kɛ ní kpahi nɛ a he jua wa a kɛ ha konɛ a kɛ ma sɔlemi we ɔ, nɛ a kɛ hyɛ sɔlemi we ɔ nɔ hulɔ. (2 Ma. 12:​4, 5; 1 Kron. 29:​3-9) Yesu kaseli nɛ a susuɔ nɔ he ɔ ngɔ “mɛ nitsɛmɛ a níhi” kɛ hyɛ Yesu kɛ e bɔfo ɔmɛ a nɔ. (Luka 8:​1-3) Benɛ hwɔ ngua ko ba ngɛ kaseli ɔmɛ a be ɔ mi ɔ, Kristofo ɔmɛ hu ngɔ yemi kɛ buami kɛ ya ha a nyɛmimɛ nɛ a ngɛ hehi nɛ hwɔ ɔ ba ngɛ ɔ. (Níts. 11:​27-29) Mwɔnɛ ɔ, wɔ hu wa ma nyɛ maa wo Yehowa hɛ mi nyami kɛ gu yemi kɛ buami nɛ wa jeɔ wa tsui mi kɛ haa a nɔ.

12. Kɛ yemi kɛ buami nɛ wa haa a woɔ Yehowa hɛ mi nyami ha kɛɛ? (Hyɛ foni ɔ hulɔ.)

¹² Níhi a si kpami nɛ nyɛɛ se ɔ tsɔɔ bɔ nɛ yemi kɛ buami nɛ wa haa a woɔ Yehowa hɛ mi nyami ha. Ngɛ jeha 2020 ɔ mi ɔ, sapu ba ngɛ Zimbabwe be kɛkɛɛ. Enɛ ɔ ha nɛ hwɔ nɛ nya wa wawɛɛ ba, nɛ nihi ayɔhi abɔ a wami ya je oslaa mi. E ngɛ mi kaa nyɛmiyo ko nɛ a tsɛɛ lɛ Prisca a hu ya je si fɔfɔɛ nɛ mi wa nɛ ɔ mi mohu lɛɛ, se e ya nɔ nɛ e kɛ e he wo fiɛɛmi ní tsumi ɔ mi daa Sɔ kɛ Soha, nɛ e ya nɔ nɛ e pee jã ngɛ ngmɔ humi be mi po. Akɛnɛ e ngɔ be babauu kɛ ngɛ fiɛɛe nɛ e pɔɛ ní tsumi ngɛ e ngmɔ ɔ nɔ he je ɔ, e kpɔ mi bi ɔmɛ yeɔ e he fɛu nɛ a deɔ ke, “O ngɛ nɔ nɛ hwɔ maa gbe mo.” Ke a de jã a, Prisca kɛ nɔ mi mami haa mɛ heto ke, “Yehowa kua we e sɔmɔli kɔkɔɔkɔ.” E kɛ we nɛ asafo ɔ to blɔ nya konɛ a ngɔ níhi kɛ ya ha nyɛmimɛ nɛ a ngɛ lejɛ ɔ. Kɛ gu yemi kɛ buami nɛ wa haa a nɔ ɔ, wa nyɛmimɛ nɛ ɔmɛ nɛ Prisca hu piɛɛ he ɔ nine su a hiami níhi a nɔ. Enɛ ɔ ta Prisca kpɔ mi bi ɔmɛ a tsui he nɛ a de lɛ ke, “Mawu kua we mo niinɛ, lɔ ɔ wa suɔ nɛ waa le babauu kɛ kɔ e he.” E kpɔ mi bi ɔmɛ a kpɛti nihi kpaago bɔni asafo mi kpehi yami.

13. Kɛ wa je mi bami ma nyɛ maa wo Yehowa hɛ mi nyami ha kɛɛ? (La 96:9)

¹³ Kane La 96:9. Wa ma nyɛ maa wo Yehowa hɛ mi nyami kɛ gu wa je mi bami nɔ. E sa nɛ  osɔfo ɔmɛ nɛ a sɔmɔɔ ngɛ Yehowa sɔlemi we ɔ a he nɛ tsɔ ngɛ nɔmlɔ tso mi. (2 Mose 40:​30-32) Wɔ hu e sa nɛ wa he nɛ tsɔ ngɛ nɔmlɔ tso mi, se nɔ́ nɛ pe kulaa a, e sa nɛ wa ha nɛ wa je mi bami hu he nɛ tsɔ. (La 24:​3, 4; 1 Pet. 1:​15, 16) Baiblo ɔ tsɔɔ kaa e sa nɛ wa je “su momo ɔ” kɛ fɔ he, nɛ waa wo “su ehe ɔ.” Enɛ ɔ tsɔɔ kaa e sa nɛ wa kua susumi nɛ dɛ, kɛ ní peepeehi nɛ Yehowa bua jɔɛ he ɔ. Jehanɛ hu ɔ, e sa nɛ wa ha nɛ wa susumi kɛ wa ní peepee nɛ tsɔɔ kaa wa ngɛ Yehowa su kpakpa amɛ kasee. (Kol. 3:​9, 10) Ngɛ anɔkuale mi ɔ, Yehowa ma nyɛ maa ye bua nihi nɛ a kɛ a he woɔ je mi bami yayami kɛ yiwutso ní peepeehi a mi ɔ konɛ a tsake, nɛ a wo su ehe ɔ.

14. Mɛni o kase ngɛ Jack níhi a si kpami ɔ mi? (Hyɛ foni ɔ hulɔ.)

¹⁴ Mo susu Jack nɛ e ji yiwutsotsɛ nɛ e he ngɛ gbeye ɔ níhi a si kpami ɔ he nɛ o hyɛ. E ní peepee he je ɔ, a paleɔ lɛ ke Abosiami Bi. Ngɛ yiwutso níhi nɛ e pee ɔ he je ɔ, a bu lɛ gbenɔ fɔ. Se benɛ Jack ngɛ mlɛe ngɛ tsu womi he ɔ kɛ yaa si be nɛ a maa gbe lɛ ɔ, nyɛminyumu ko nɛ e ya fiɛɛɔ ngɛ tsu womi he ɔ kɛ lɛ ya kpe. E de Jack kaa e suɔ nɛ e kɛ lɛ nɛ kase Baiblo ɔ, nɛ e kplɛɛ nɔ. E ngɛ mi kaa Jack ji yiwutsotsɛ kpanaku mohu lɛɛ, se e pee tsakemi, nɛ pee se ɔ, e he su nɛ a baptisi lɛ. Jack pee tsakemi agbo ngɛ e si himi mi. Enɛ ɔ he ɔ, benɛ be su nɛ a maa gbe lɛ ɔ, nihi nɛ a hyɛɛ nihi nɛ a wo mɛ tsu ɔ a nɔ ɔ a ti ni komɛ bɔni ya fomi benɛ a kɛ Jack ngɛ sɛ yee ɔ. Nyumu ko nɛ e tsuɔ ní ngɛ tsu womi he ɔ de ke: “Be ko nɛ be ɔ, Jack ji yiwutsotsɛ kpanaku ngɛ tsu womi he nɛ ɔ. Se amlɔ nɛ ɔ, e piɛɛ nihi nɛ a baa a je mi saminya a he.” Benɛ a gbe Jack otsi se ɔ, nyɛmimɛ nɛ a ya peeɔ asafo mi kpe daa otsi ngɛ tsu womi he ɔ kpale kɛ ya lejɛ ɔ ekohu. Jamɛ a ligbi ɔ, nihi nɛ a wo mɛ tsu ɔ a ti nɔ kake nɛ e bɛ asafo mi kpe hyɛ ɔ ba eko. Mɛni lɛ wo lɛ he wami nɛ e ba asafo mi kpe ɔ? Tsakemi nguahi nɛ Jack pee ɔ ta e tsui he, nɛ e suɔ kaa e le nɔ́ nɛ e maa pee konɛ e nyɛ nɛ e sɔmɔ Yehowa. Ngɛ anɔkuale mi ɔ, wa je mi bami ma nyɛ maa wo wa hiɔwe Tsɛ ɔ hɛ mi nyami!—1 Pet. 2:12.

MƐNI BLƆ NƆ YEHOWA MAA GU KƐ WO E BIƐ Ɔ HƐ MI NYAMI HWƆƆ SE?

15. Mɛni blɔ nɔ nɛ Yehowa maa gu kɛ wo e biɛ ɔ hɛ mi nyami kɛ pi si hwɔɔ se? (La 96:​10-13)

¹⁵ Kane La 96:​10-13. La 96 nyagbe kuku ɔmɛ kale Yehowa kaa e ji Kojolɔ kɛ Matsɛ  nɛ e peeɔ nɔ́ nɛ da. Mɛni blɔ nɔ Yehowa maa gu kɛ wo e biɛ ɔ hɛ mi nyami hwɔɔ se? E maa pee jã kɛ gu dami sane nɛ e maa ye ɔ nɔ. E be kɛe kulaa nɛ Yehowa ma kpata Babilon Ngua a hɛ mi akɛnɛ e gbe e biɛ klɔuklɔu ɔ he guɛ ɔ he je. (Kpoj. 17:​5, 16; 19:​1, 2) Eko ɔ, nihi nɛ a maa na Babilon Ngua a hɛ mi kpatami ɔ a kpɛti ni komɛ ma ba piɛɛ wa he kɛ sɔmɔ Yehowa. Nyagbenyagbe ɔ, Yehowa ma kpata Satan blɔ nya tomihi tsuo a hɛ mi ngɛ Harmagedon ta a mi, nɛ e ma kpata nihi nɛ a teɔ si kɛ woɔ lɛ nɛ a tuɔ musu bɔmi munyu kɛ siɔ e biɛ ɔ a hɛ mi. Se nihi tsuo nɛ a suɔ lɛ nɛ a buɔ lɛ, nɛ a suɔ kaa a maa wo e hɛ mi nyami ɔ lɛɛ e maa baa a yi. (Maak. 8:38; 2 Tɛs. 1:​6-10) Ngɛ nyagbe ka nɛ maa nyɛɛ Kristo Jeha Akpe Nɔ Yemi ɔ se ɔ, Yehowa ma tsɔ e biɛ ɔ he kɛ pi si. (Kpoj. 20:​7-10) Ngɛ jamɛ a be ɔ mi ɔ, “zugba a nɔ tsuo ma hyi kɛ Yehowa hɛ mi nyami ɔ he nile.”—Hab. 2:14.

16. Mɛni o fia o pɛɛ si kaa o maa pee? (Hyɛ foni ɔ hulɔ.)

¹⁶ E ngɛ heii kaa nɔ fɛɛ nɔ nɛ e maa hi wami mi ɔ kɛ hɛ mi nyami nɛ sa Yehowa biɛ ɔ ma ha lɛ. Hyɛ bɔ nɛ enɛ ɔ maa pee bua jɔmi wawɛɛ ha! Se amlɔ nɛ ɔ po ɔ, wa ma nyɛ maa gu fiɛɛmi ní tsumi ɔ kɛ wa ní peepee nɔ kɛ wo Mawu hɛ mi nyami be fɛɛ be. Bɔ nɛ pee nɛ waa kɛ wa juɛmi nɛ ma sane nɛ e he hia nɛ ɔ nɔ ɔ, Blɔ Tsɔɔmi Ajla Toli ɔmɛ hla La 96:8 ɔ kaa jeha 2025 jeha ngmami ɔ. Lejɛ ɔ de ke: “Nyɛɛ kɛ hɛ mi nyami nɛ sa Yehowa biɛ ɔ nɛ ha lɛ.”