Eko ɔ, e he waa ha wa ti nihi fuu kaa wa ma kai níhi nɛ wa kase ɔ. Se kɛ̃ ɔ, e yi kulaa kaa wa ma kai níhi nɛ Yesu tsɔɔ ɔ, ejakaa e ngɔ nɔ́ he tomi níhi kɛ tsu ní. Enɛ ɔ he ɔ, ke o po níhi nɛ Yesu tsɔɔ ɔ he foni ɔ, e maa ye bua mo konɛ o kai níhi nɛ e tsɔɔ ɔ. Jã nɔuu kɛ̃ nɛ ke o ngɛ ní kasee nɛ o po níhi a he foni ɔ, e maa ye bua mo konɛ o kai níhi nɛ o kase ɔ. Mɛni blɔ nɔ o maa gu kɛ po níhi a he foni? O ma nyɛ maa pee jã kɛ gu ní tɛnimi nɔ.

Nihi nɛ a tɛniɔ ní ehehi nɛ a kase ɔ nyɛɔ nɛ a kaiɔ nɔ́ nɛ a kase ɔ saminya. A naa kaa ke a tɛni ní ɔ, pi munyunguhi nɛ a ngɛ kanee ɔ sisi pɛ nɛ a nuɔ, a nuɔ otihi nɛ ngɛ nɔ́ nɛ a ngɛ kanee ɔ mi ɔ hu sisi. Tsa pi ní nguahi nɛ a tɛniɔ, mohu ɔ, a tɛniɔ ní nyafinyafihi nɛ a mi wɛ. Níhi a si kpami tsɔɔ kaa ke nihi nɛ a wa ngɛ jeha mi titli tɛni ní ɔ, e yeɔ buaa nɛ a kaiɔ níhi nɛ a kase ɔ.

Lɔ ɔ he ɔ, be kpa mi nɛ o maa kase ní ɔ, moo bɔ mɔde kaa o ma tɛni níhi kɛ kɔ nɔ́ nɛ o ngɛ kasee ɔ he. E maa pee mo nyakpɛ kaa o ma kai níhi fuu nɛ o kase ɔ!