1. Kɛ o nuɔ he ha kɛɛ ngɛ anɔkuale ɔ he?

 YEHOWA sɔmɔli bua jɔ anɔkualehi nɛ a kaseɔ ngɛ Mawu Munyu ɔ mi ɔ he, ejakaa lɔ ɔ nɔ nɛ a hemi kɛ yemi ɔ daa si ngɛ. (Rom. 10:17) Wa ngɛ nɔ mi mami kaa Yehowa lɛ to Kristofohi asafo ɔ sisi kaa “anɔkuale ɔ titima kɛ e se pimi nɔ́ ɔ nɛ.” (1 Tim. 3:15) Enɛ ɔ he ɔ, e sa nɛ waa ba wa he si kɛ ha “ni nɛmɛ nɛ a ngɛ hɛ mi nyɛɛe” ngɛ asafo ɔ mi ɔ. Nimli nɛ ɔmɛ lɛ a tsɔɔ wɔ anɔkualehi nɛ ngɛ Baiblo ɔ mi, nɛ a daa Mawu Munyu ɔ nɔ kɛ tsɔɔ wɔ blɔ.—Heb. 13:17.

2. Ngɛ Yakobo 5:19 ɔ nya a, ke wa ba le anɔkuale ɔ, mɛni ma nyɛ maa ba?

² E ngɛ mi kaa wa le anɔkuale ɔ, nɛ wa le hu kaa e sa nɛ waa kɛ Yehowa asafo ɔ blɔ tsɔɔmi nɛ tsu ní mohu lɛɛ, se kɛ̃ ɔ, wa ma nyɛ maa tla blɔ. (Kane Yakobo 5:19.) Satan maa suɔ kaa wa yi mi nɛ pee wɔ enyɔɔnyɔ ngɛ Baiblo ɔ loo blɔ tsɔɔmihi nɛ wa nine suɔ nɔ kɛ jeɔ Yehowa asafo ɔ ngɔ ɔ he.—Efe. 4:14.

3. Mɛni he je nɛ e he hia nɛ waa nyɛɛ ngɛ anɔkuale ɔ nya a? (Efeso Bi 6:​13, 14)

³ Kane Efeso Bi 6:​13, 14. E be kɛe nɛ Abosiami maa ngɔ sisimi munyuhi kɛ mlɔɔ je ma amɛ tsuo konɛ a te si kɛ wo Yehowa. (Kpoj. 16:​13, 14) Wa ma nyɛ maa hyɛ blɔ kaa Satan maa bɔ mɔde fɛɛ mɔde nɛ e ma nyɛ konɛ e sisi Yehowa we bi hulɔ. (Kpoj. 12:9) Enɛ ɔ he ɔ, e he hia nɛ wa tsɔse wa he konɛ wa nyɛ nɛ waa le slɔɔto nɛ ngɛ anɔkuale kɛ lakpa a kpɛti, nɛ waa nyɛɛ ngɛ anɔkuale ɔ nya. (Rom. 6:17; 1 Pet. 1:22) Enɛ ɔ maa ye bua wɔ konɛ wa nyɛ nɛ waa gblee amanehlu ngua a mi!

4. Mɛni he wa ma susu ngɛ ní kasemi nɛ ɔ mi?

 ⁴ Ngɛ ní kasemi nɛ ɔ mi ɔ, wa ma susu su enyɔ komɛ nɛ maa ye bua wɔ konɛ waa le anɔkualehi nɛ ngɛ Baiblo ɔ mi nɛ waa kɛ blɔ tsɔɔmihi nɛ je Yehowa asafo ɔ ngɔ ɔ nɛ tsu ní. Lɔ ɔ se ɔ, wa maa hyɛ ní etɛ komɛ nɛ e sa nɛ waa pee konɛ waa ya nɔ nɛ waa nyɛɛ ngɛ anɔkuale ɔ nya.

NƆ́ NƐ MAA YE BUA MO KONƐ O LE ANƆKUALE Ɔ

5. Mɛni blɔ nɔ nɛ Yehowa gbeye yemi ma nyɛ maa ye bua wɔ konɛ waa le anɔkuale ɔ?

⁵ Moo ye Yehowa gbeye. Ke a ke waa ye Yehowa gbeye ɔ, nɔ́ nɛ e tsɔɔ ji kaa wa maa suɔ lɛ wawɛɛ, nɛ waa pee níhi nɛ maa sa e hɛ mi. Wa suɔ nɛ waa le slɔɔto nɛ ngɛ nɔ́ nɛ da kɛ nɔ́ nɛ dɛ a kpɛti, kɛ slɔɔto nɛ ngɛ anɔkuale kɛ lakpa a kpɛti. Ke wa pee jã a, e ma ha nɛ Yehowa maa kplɛɛ wa nɔ. (Abɛ 2:​3-6; Heb. 5:14) E sɛ nɛ waa ye adesa hɛ mi gbeye, ke pi jã a, lɔ ɔ ma ha nɛ suɔmi nɛ wa ngɛ ha Yehowa a nya maa ba si, ejakaa behi fuu ɔ, nɔ́ nɛ adesahi suɔ ɔ, pi lɔ ɔ nɛ Yehowa suɔ.

6. Mɛni blɔ nɔ nɛ adesa hɛ mi gbeye yemi ha nɛ Israel ma nikɔtɔma amɛ plɛ anɔkuale ɔ hɛ mi kɛ bu si?

⁶ Ke wa yeɔ adesa hɛ mi gbeye pe Mawu ɔ, e ma nyɛ ma ha nɛ waa je anɔkuale ɔ mi. Mo susu Israel ma nikɔtɔmahi 12 ɔ nɛ a ya slaa si ngɛ Si Womi Zugba a nɔ ɔ a he nɛ o hyɛ. A kpɛti nihi nyɔngma ye Kanaanbi ɔmɛ gbeye wawɛɛ, nɛ lɔ ɔ ha nɛ suɔmi nɛ a ngɛ kɛ ha Yehowa a nya ba si. A de a nyɛmimɛ Israelbi ɔmɛ ke: “Wa be nyɛe maa kuɔ kɛ ya nɛ waa kɛ nimli nɛ ɔmɛ nɛ ya hwu, ejakaa a he wa pe wɔ.” (4 Mose 13:​27-31) Ngɛ adesa susumi nya a, e ngɛ kaa nɔ́ nɛ Kanaanbi ɔmɛ a he wa pe Israelbi ɔmɛ. Se ke nɔ ko susu jã a, lɔ ɔ tsɔɔ kaa e he we Yehowa yi. Jinɛ e sa nɛ slaali nyɔngma amɛ nɛ a ngɔ a juɛmi kɛ ma nɔ́ nɛ Yehowa suɔ kaa Israelbi ɔmɛ nɛ a pee ɔ nɔ. Jehanɛ hu ɔ, jinɛ e sa nɛ a ko pue a yi mi tɛ ngɛ nɔ́ nɛ Yehowa pee ha mɛ be ko nɛ be ɔ he. Kaa a pee  jã a, jinɛ a ko na kaa Yehowa ngɛ he wami kulaa pe Kanaanbi ɔmɛ. Se Kaleb kɛ Yoshua lɛɛ a pee we a ní kaa slaali kpa amɛ nɛ a be hemi kɛ yemi ɔ, ejakaa a suɔ nɛ Yehowa nɛ kplɛɛ a nɔ. A de ni ɔmɛ ke: ‘Ke Yehowa kplɛɛ wa nɔ ɔ, e maa ngɔ wɔ kɛ ya zugba nɛ ɔ nɔ kokooko, nɛ e kɛ ma ha wɔ.’—4 Mose 14:​6-9.

7. Mɛni maa ye bua wɔ konɛ waa ye Yehowa gbeye wawɛɛ? (Hyɛ foni ɔ hulɔ.)

⁷ Ke wa suɔ nɛ waa mwɔ yi mi kpɔ ko ɔ, e sa nɛ waa ngɔ wa juɛmi kɛ ma níhi nɛ Yehowa bua jɔ he ɔ nɔ. Enɛ ɔ maa ye bua wɔ nɛ waa ya nɔ nɛ waa ye Yehowa gbeye wawɛɛ. (La 16:8) Ke o ngɛ Baiblo mi sane ko kanee ɔ, mo bi o he ke, ‘Kaa imi lɛ i ya je jamɛ a si fɔfɔɛ ɔ mi ɔ, jinɛ mɛni yi mi kpɔ i ko mwɔ?’ Kaa nɔ hyɛmi nɔ́ ɔ, moo po he foni kaa o ngɛ Israel slaali nyɔngma amɛ tue bue benɛ a ngɛ dee ke Israelbi ɔmɛ be nyɛe maa ye Kanaanbi ɔmɛ a nɔ ɔ. Anɛ jamɛ a munyu ɔ ko wo o he gbeye lo? Aloo o ma ha nɛ suɔmi nɛ o ngɛ kɛ ha Yehowa, kɛ e suɔmi nya ní nɛ o suɔ nɛ o pee ɔ nɛ wo mo he wami nɛ o kɔni mi nɛ ko jɔ̃ lo? Israelbi nɛ a hi si ngɛ jamɛ a be ɔ mi ɔ he we yi kaa nɔ́ nɛ Yoshua kɛ Kaleb de ɔ ji anɔkuale. Enɛ ɔ he ɔ, Yehowa ngmɛ́ mɛ blɔ nɛ́ a ya su Si Womi Zugba a nɔ.—4 Mose 14:​10, 22, 23.

8. Mɛni su nɛ e sa kaa waa bɔ mɔde nɛ wa ná, nɛ mɛni he je?

⁸ Moo ba o he si. Yehowa haa nɛ nihi nɛ a baa a he si ɔ leɔ anɔkuale ɔ. (Mat. 11:25) Wa je he si bami mi nɛ wa kplɛɛ nɔ nɛ a kɛ wɔ kase anɔkuale ɔ. (Níts. 8:​30, 31) Se kɛ̃ ɔ, e sa nɛ waa hyɛ saminya nɛ wa ko wo wa he nɔ. Ke wa wo wa he nɔ ɔ, lɔ ɔ ma ha nɛ wa ná juɛmi ɔ kaa wa susumi da pe Baiblo sisi tomi mlaahi kɛ blɔ tsɔɔmi nɛ jeɔ Yehowa asafo ɔ ngɔ ɔ.

9. Mɛni wa ma nyɛ maa pee konɛ waa ya nɔ nɛ waa ba he si?

⁹ Loko wa ma nyɛ maa ya nɔ maa ba wa he si ɔ, e sa nɛ wa kai kaa ke a kɛ wɔ to Yehowa he ɔ, wa ngɛ kaa tatu. (La 8:​3, 4) Jehanɛ hu ɔ, wa ma nyɛ maa sɔle kɛ ha Yehowa konɛ waa ba wa he si wawɛɛ nɛ waa kplɛɛ nɛ a tsɔɔ wɔ ní. Ke wa pee jã a, Yehowa maa ye bua wɔ nɛ wa maa na kaa níhi nɛ wa kaseɔ ngɛ Baiblo ɔ mi, kɛ blɔ tsɔɔmi kpahi nɛ asafo ɔ kɛ haa wɔ ɔ nɔ kuɔ kulaa pe wa susumi. Ke o ngɛ Baiblo ɔ kanee ɔ, mo hla níhi nɛ tsɔɔ kaa Yehowa suɔ he si bali, se e bua jɔɛ nihi nɛ a woɔ a he nɔ, nɛ a peeɔ pupuupu ɔ a he. Ke o nine su he blɔ ko nɔ ngɛ asafo ɔ mi nɛ ha nɛ nihi jeɔ o yi wawɛɛ po ɔ, moo hyɛ nɛ hi nɛ o ko wo o he nɔ.

NƆ́ NƐ MAA YE BUA WƆ KONƐ WAA PƐTƐ ANƆKUALE Ɔ HE DAA

10. Mɛnɔmɛ a nɔ nɛ Yehowa gu nɛ e kɛ ga womi kɛ blɔ tsɔɔmi ha e we bi?

¹⁰ Mo ná nɔ mi mami ngɛ Yehowa asafo ɔ mi. Ngɛ blema Israel ɔ, Yehowa gu Mose kɛ Yoshua nɔ nɛ e kɛ blɔ tsɔɔmi ha e we bi. (Yosh. 1:​16, 17) Akɛnɛ Israelbi ɔmɛ na nyumu nɛ ɔmɛ kaa Yehowa Mawu nane mi dali, nɛ a kɛ a blɔ tsɔɔmi tsu ní he je ɔ, níhi ya nɔ ha mɛ saminya. Jeha lafa komɛ a se benɛ a to Kristofohi asafo ɔ sisi pɛ ɔ, bɔfo 12 ɔmɛ hu kɛ blɔ tsɔɔmi ha mɛ. (Níts. 8:​14, 15) Pee se ɔ, asafo mi nikɔtɔma kpahi nɛ a ngɛ Yerusalem ɔ ba piɛɛ bɔfo ɔmɛ a he. Akɛnɛ asafo ɔ kɛ blɔ tsɔɔmi nɛ a nine su nɔ kɛ je nyumuhi anɔkualetsɛmɛ nɛ ɔmɛ a ngɔ ɔ tsu ní he je ɔ, “asafo ɔmɛ ya nɔ nɛ a he wa ngɛ hemi kɛ yemi ɔ mi, nɛ daa ligbi ɔ, a he ngɛ hiɛe.” (Níts. 16:​4, 5) Mwɔnɛ ɔ, ke wɔ hu waa kɛ blɔ tsɔɔmi nɛ je Yehowa asafo ɔ ngɔ ɔ tsu ní ɔ, Yehowa maa jɔɔ wɔ. Se ke wa bui nihi nɛ Yehowa hla mɛ kɛ da asafo ɔ nya a tue ɔ, kɛ e maa nu he ha kɛɛ? Loko wa ma nyɛ ma ha sane bimi nɛ ɔ heto ɔ, nyɛ ha nɛ wa susu nɔ́ nɛ ba Israelbi ɔmɛ a nɔ benɛ a yaa Si Womi Zugba a nɔ ɔ he nɛ waa hyɛ.

11. Mɛni ba blema Israelbi nɛ a te si kɛ wo Mose nɛ Yehowa hla lɛ kaa e nyɛɛ e we bi a hɛ mi ɔ a nɔ? (Hyɛ foni ɔ hulɔ.)

 ¹¹ Benɛ Israelbi ɔmɛ ngɛ blɔ nɔ kɛ yaa Si Womi Zugba a nɔ ɔ, nyumu komɛ nɛ a buɔ mɛ saminya a te si kɛ wo Mose ngɛ he blɔ nɛ Yehowa kɛ ha lɛ ɔ he je. A de ke: “Ma nɛ ɔ tsuo ngɛ klɔuklɔu [pi Mose pɛ,] ni ɔmɛ tsuo ngɛ klɔuklɔu, nɛ Yehowa ngɛ a kpɛti.” (4 Mose 16:​1-3) E ji anɔkuale kaa ngɛ Yehowa hɛ mi ɔ, ‘ma a tsuo ngɛ klɔuklɔu’ mohu lɛɛ, se Yehowa hla Mose kaa e nyɛɛ e we bi a hɛ mi. (4 Mose 16:28) Akɛnɛ a te si kɛ wo Mose he je ɔ, lɔ ɔ tsɔɔ kaa a te si kɛ wo Yehowa. A ngɔɛ a juɛmi kɛ ma nɔ́ nɛ Yehowa suɔ kaa a pee ɔ nɔ. Mohu ɔ, a ngɔ a juɛmi kɛ ma he blɔ kɛ hɛ mi nyami nɛ a ma ná a nɔ. Mawu ha nɛ nihi nɛ a nyɛɛ atuã tsɔmi ɔ hɛ mi kɛ nimli lafahi abɔ nɛ a fĩ a se ɔ tsuo a hɛ mi kpata. (4 Mose 16:​30-35, 41, 49) Mwɔnɛ ɔ hu ɔ, wa ma nyɛ ma ná nɔ mi mami kaa ke nɔ ko kɛ blɔ tsɔɔmi nɛ Yehowa asafo ɔ kɛ haa a tsu we ní ɔ, Yehowa bua be e he jɔe.

12. Mɛni he je nɛ wa ma nyɛ maa ya nɔ ma ná hɛ kɛ nɔ fɔmi ngɛ Yehowa asafo ɔ mi ɔ?

¹² Wa ma nyɛ maa ya nɔ ma ná hɛ kɛ nɔ fɔmi nɛ mi wa ngɛ Yehowa asafo ɔ mi. Ke e he ba hia kaa Yehowa asafo ɔ nɛ pee tsakemi ko ngɛ bɔ nɛ wa nu Baiblo ɔ mi anɔkuale komɛ a sisi ha, aloo ngɛ bɔ nɛ e sa nɛ wa sɔmɔ Yehowa ha a he ɔ, nihi nɛ a nyɛɛɔ hɛ mi ɔ kɛ oya yemi peeɔ jã. (Abɛ 4:18) A peeɔ jã ejakaa Yehowa suɔmi nya ní peemi ji nɔ́ titli nɛ he hia mɛ. Jehanɛ hu ɔ, akɛnɛ e sa nɛ Yehowa we bi tsuo nɛ a ngɔ Yehowa mlaa amɛ kɛ tsu ní he je ɔ, a bɔɔ mɔde kaa a maa da Mawu Munyu ɔ nɔ kɛ mwɔ yi mi kpɔhi.

13. Mɛni ji ‘munyu kpakpahi a he nɔ hyɛmi nɔ́’ ɔ, nɛ mɛni e sa nɛ wa kɛ pee?

¹³ ‘Yaa nɔ nɛ o hɛɛ munyu kpakpahi a he nɔ hyɛmi nɔ́ ɔ mi.’ (2 Tim. 1:13) ‘Munyu kpakpahi a he nɔ hyɛmi nɔ́’ ɔ daa si kɛ ha Kristofohi a tsɔɔmihi nɛ ngɛ Baiblo ɔ mi ɔ. (Yoh. 17:17) Níhi tsuo nɛ wa heɔ yeɔ ɔ daa si ngɛ tsɔɔmi nɛ ɔmɛ a nɔ. Yehowa asafo ɔ tsɔɔ wɔ kaa e sa  nɛ waa mɛtɛ tsɔɔmi nɛ ɔmɛ a he, nɛ wa kɛ tsu ní. Ke wa pee jã a, Yehowa maa jɔɔ wɔ.

14. Mɛni blɔ nɛ Kristofohi komɛ ngmɛɛ ‘munyu kpakpahi a he nɔ hyɛmi nɔ́’ ɔ he?

¹⁴ Ke wa ngmɛɛ ‘munyu kpakpahi a he nɔ hyɛmi nɔ́’ ɔ he ɔ, mɛni ma nyɛ maa je mi kɛ ba? Mo susu nɔ hyɛmi nɔ́ nɛ ɔ he nɛ o hyɛ. Ngɛ Kristofohi nɛ a hi si ngɛ kaseli ɔmɛ a be ɔ mi ɔ blɔ fa mi ɔ, a kpɛti ni komɛ gbɛ lakpa munyu kɛ fĩa kaa Yehowa ligbi ɔ ba. Eko ɔ, a nine su sɛ womi ko nɔ kɛ kɔ sane nɛ ɔ he, nɛ a susu kaa bɔfo Paulo lɛ ngma. Kristofohi komɛ nɛ a hi si ngɛ Tɛsalonika a he jamɛ a lakpa munyu ɔ ye, nɛ mɛ hu a gbɛ sane ɔ kɛ fĩa be mi nɛ a li anɔkuale nɛ ngɛ mi. Kaa a kai níhi nɛ Paulo tsɔɔ mɛ benɛ e kɛ mɛ ngɛ ɔ, jinɛ jamɛ a munyu ɔ ko sisi we mɛ. (2 Tɛs. 2:​1-5) Paulo wo e nyɛmimɛ ɔmɛ ga kaa tsa pi munyu fɛɛ munyu nɛ a maa nu ɔ nɛ e sa nɛ a he ye. Bɔ nɛ pee nɛ Paulo nɛ ye bua Tɛsalonikabi ɔmɛ konɛ a ko he lakpa munyu ko nɛ a ye hwɔɔ se ɔ, e mwɔ e sɛ womi enyɔne ɔ nɛ e ngma kɛ ya ha Tɛsalonikabi ɔmɛ ɔ nya ke: “Imi Paulo nɛ́ i kɛ imi nitsɛ ye nine ngma sɛ womi nɛ ɔ ke i biɔ nyɛ, nɛ e ji okadi ngɛ sɛ womi fɛɛ sɛ womi mi; kikɛ nɛ ɔ ji bɔ nɛ i ngmaa ní.”—2 Tɛs. 3:17.

15. Kɛ wa ma plɛ kɛ po wa he piɛ kɛ je lakpa munyuhi a he ha kɛɛ? Mo ha enɛ ɔ he nɔ hyɛmi nɔ́. (Hyɛ foni ɔmɛ hulɔ.)

¹⁵ Mɛni wa ma nyɛ maa kase ngɛ munyuhi nɛ Paulo ngma kɛ ya ha Tɛsalonikabi ɔmɛ ɔ mi? Ke wa nu nɔ́ ko nɛ e kɛ nɔ́ nɛ wa kase ngɛ Baiblo ɔ mi ɔ kɔ we, aloo wa nu munyu ko nɛ e pee wɔ nyakpɛ ɔ, e sa nɛ waa kɛ hɛ si kami nɛ tsu ní. Ngɛ blema Soviet Union ɔ, ni komɛ nɛ a sume Yehowa we bi ɔ gbɛ sɛ womi ko kɛ fĩa. E ngɛ kaa nɔ́ nɛ jamɛ a sɛ womi ɔ je asafo ɔ ní tsumi yi ɔ. Sɛ womi ɔ wo nyɛmimɛ ɔmɛ he wami kaa a ma nyɛ ma tsɔ mɛ nitsɛmɛ a kuuhi. E ngɛ kaa nɔ́ nɛ munyuhi nɛ ngɛ sɛ womi ɔ mi ɔ ji anɔkuale. Se nyɛmimɛ nɛ a yeɔ anɔkuale ɔ he we munyu nɛ ɔmɛ yi. A yɔse kaa munyuhi nɛ ngɛ sɛ womi ɔ mi ɔ kɛ nɔ́ nɛ a asafo ɔ tsɔɔ mɛ ɔ kpa we gbi. Mwɔnɛ ɔ, ni komɛ nɛ a sume Yehowa a bɔɔ mɔde kaa a maa gu Intanɛti ɔ nɔ kɛ mlɔɔ wɔ konɛ wa mi nɛ gba. E sɛ nɛ waa ngmɛ blɔ nɛ ‘munyu ko nɛ e tsake wa  juɛmi amlɔ nɔuu,’ mohu ɔ, e sa nɛ waa hyɛ kaa níhi nɛ wa nuɔ kɛ níhi nɛ wa kaneɔ ɔ kɛ anɔkualehi nɛ wa kase ngɛ Baiblo ɔ mi ɔ kpaa gbi lo. Ke wa pee jã a, e maa po wa he piɛ.—2 Tɛs. 2:2; 1 Yoh. 4:1.

16. Ngɛ Roma Bi 16:​17, 18 ɔ nya a, mɛni e sa nɛ waa pee ke nɔ ko gba kɛ je anɔkuale ɔ he?

¹⁶ Yaa nɔ nɛ o kɛ nihi nɛ a yeɔ Yehowa anɔkuale ɔ nɛ pee kake. Mawu suɔ nɛ waa kɛ wa nyɛmimɛ ɔmɛ nɛ pee kake kɛ ja lɛ. Ke wa ya nɔ nɛ wa pɛtɛ anɔkuale ɔ he ɔ, wa ma nyɛ maa pee kake be fɛɛ be. Ke nɔ ko gbɛɔ lakpa munyuhi kɛ fĩaa a, lɔ ɔ ma nyɛ maa ngɔ mi gbami kɛ ba Kristofohi asafo ɔ mi. Enɛ ɔ he je nɛ Mawu bɔ wɔ kɔkɔ kaa waa ‘yu wa he ngɛ a he’ ɔ nɛ. Ke wa pee we jã a, wɔ nitsɛmɛ po wa ma gba kɛ je anɔkuale ɔ he.—Kane Roma Bi 16:​17, 18.

17. Ke wa yɔse anɔkuale ɔ nɛ wa pɛtɛ he saminya a, kɛ wa ma ná he se ha kɛɛ?

¹⁷ Ke wa yɔse anɔkuale ɔ nɛ wa pɛtɛ he saminya a, wa maa hɛ kɛ su Yehowa he wawɛɛ, nɛ wa hemi kɛ yemi ɔ hu mi maa wa. (Efe. 4:​15, 16) Jehanɛ hu ɔ, Satan lakpa tsɔɔmihi nɛ a gbɛ kɛ fĩa a be nyɛe maa sisi wɔ, nɛ Yehowa maa ya nɔ maa po wa he piɛ amlɔ nɛ ɔ, nɛ ngɛ amanehlu ngua a mi hu ɔ, e maa pee jã. Yaa nɔ nɛ o pɛtɛ anɔkuale ɔ he saminya, nɛ “tue mi jɔmi Mawu ɔ kɛ [mo] maa hi si.”—Filip. 4:​8, 9.