1. Ngɛ La 18:​46, mɛni he nɛ David ngɔ Yehowa kɛ to?

 BE KOMƐ Ɔ, waa kɛ nyagba komɛ ma nyɛ maa kpe nɛ ma ha nɛ si himi ɔ mi nɛ wa ha wɔ. Enɛ ɔ ma nyɛ ma tsake wa si himi kulaa. Se bua jɔmi sane ji kaa wa ma nyɛ maa sɔle kɛ ha Yehowa konɛ e ye bua wɔ. Ngɛ ní kasemi nɛ sɛ hlami ɔ mi ɔ, wa kase kaa Yehowa ji Mawu hɛ kalɔ, nɛ be fɛɛ be ɔ, e pee klaalo kaa e maa ye bua wɔ. Ke Yehowa ye bua wɔ ɔ, wa náa nɔ mi mami kaa “Yehowa hɛ ngɛ!” (Kane La 18:46.) Se benɛ David tu munyu nɛ ɔ se ɔ, e tsɛ Mawu ke “ye Tɛsa.” Mɛni he je nɛ David ngɔ Mawu hɛ kalɔ ɔ kɛ to tɛsa nɛ ji adebɔ nɔ́ nɛ wami be mi ɔ he ɔ?

2. Mɛni he wa ma susu ngɛ kasemi nɛ ɔ mi?

² Ngɛ ní kasemi nɛ ɔ mi ɔ, wa ma susu nɔ́ he je nɛ a ngɔ Yehowa kɛ to tɛsa he ɔ he, kɛ nɔ́ nɛ lɔ ɔ tsɔɔ wɔ ngɛ Yehowa he. Jehanɛ hu ɔ, wa maa na nɔ́ nɛ maa ye bua wɔ konɛ waa na Yehowa kaa wa Tɛsa. Kɛkɛ nyagbe ɔ, wa maa na bɔ nɛ wa ma plɛ kɛ kase Yehowa su ɔmɛ ha.

MƐNI HE JE NƐ A TSƐƆ YEHOWA KE TƐSA A?

3. Behi fuu ɔ, kɛ Baiblo ɔ ngɔɔ munyungu nɛ ji “tɛsa” a kɛ tsuɔ ní ha kɛɛ? (Hyɛ foni ɔ.)

³ Baiblo ɔ ngɔ munyungu nɛ ji “tɛsa” a kɛ tsu ní konɛ wa nyɛ nɛ waa le suhi nɛ Yehowa ngɛ ɔ saminya. Ngɛ Baiblo ɔ mi ɔ, behi fuu ɔ, ke Yehowa sɔmɔli ngɛ e yi jee ngɛ e suhi nɛ a ngɛ nyakpɛ ɔ he ɔ, a kaleɔ lɛ kaa e ji tɛsa. Kekleekle be nɛ a tsɛ Yehowa ke “Tɛsa a” ji benɛ a tu e he munyu ngɛ 5 Mose 32:4 ɔ nɛ. Hana sɔle nɛ e de ke: “Tɛsa ko be nɛ ngɛ kaa wa Mawu ɔ.” (1 Sam. 2:2) Habakuk tsɛ Yehowa ke “ye Tɛsa.” (Hab. 1:​12, NW) Nɔ nɛ ngma La 73 ɔ tsɛ Mawu ke: “Tɛsa kɛ ha ye tsui.” (La 73:26) Nɛ Yehowa nitsɛ hu tsɛ e he ke tɛsa. (Yes. 44:8) Nyɛ ha wa susu su etɛ komɛ nɛ Yehowa ngɛ nɛ haa nɛ a tsɛɔ lɛ ke tɛsa a he. Jehanɛ hu ɔ, wa  maa hyɛ nɔ́ nɛ wa ma nyɛ maa pee konɛ waa ngɔ Yehowa kɛ pee “wa Tɛsa.”—5 Mose 32:31.

4. Ngɛ mɛni blɔ nɔ nɛ Yehowa ji wesa he? (La 94:22)

⁴ Yehowa ji wesa he. Kaa bɔ nɛ ke ahumi nɛ nya wa ngɛ fiae ɔ, nɔ ko ma nyɛ ma ya laa e he ngɛ tɛ puɔ mi konɛ e ná he piɛ pomi ɔ, jã nɔuu kɛ̃ nɛ Yehowa hu poɔ wa he piɛ ngɛ haomi behi a mi. (Kane La 94:22.) Yehowa buɔ wa he konɛ huɛ bɔmi nɛ ngɛ waa kɛ lɛ wa kpɛti ɔ nɛ ko puɛ. Jehanɛ hu ɔ, e wo wɔ si kaa hwɔɔ se ɔ, e ma je níhi tsuo nɛ haa nɛ wa naa nɔ́ ɔ kɛ je.—Eze. 34:​25, 26.

5. Ngɛ mɛni blɔ nɔ nɛ Yehowa ma nyɛ maa pee wa Wesa He?

⁵ Nɔ́ kake nɛ wa ma nyɛ maa pee konɛ Yehowa nɛ pee wa Wesa He ji kaa wa maa sɔle kɛ ha lɛ. Ke wa sɔle ɔ, Yehowa haa wɔ “Mawu tue mi jɔmi ɔ” konɛ e po wa tsui kɛ wa juɛmi he piɛ. (Filip. 4:​6, 7) Mo susu nyɛminyumu ko nɛ a tsɛɛ lɛ ke Artem nɛ a wo lɛ tsu ngɛ e hemi kɛ yemi ɔ he je ɔ he nɛ o hyɛ. Benɛ a wo lɛ tsu ɔ, a bi lɛ sanehi si abɔ, a pee lɛ yi wu tso ní, nɛ a wo e he gbeye. Artem de ke: “Be fɛɛ be nɛ a ma ba bi mi sane ɔ, i yeɔ tsui wawɛɛ. . . . I sɔleɔ kɛ haa Yehowa be fɛɛ be. I deɔ lɛ kaa e ye bua mi nɛ ma pee kpoo, nɛ e ha mi nile. E ngɛ mi kaa a wa mi yi mi mohu lɛɛ, se i ya nɔ nɛ i pee kpoo. . . . Yehowa ye bua mi nɛ i nu he kaa i daa si ngɛ gbogbo ko se.”

6. Mɛni he je nɛ wa ma nyɛ maa ngɔ wa hɛ kɛ fɔ Yehowa nɔ be fɛɛ be ɔ? (Yesaya 26:​3, 4)

⁶ Wa ma nyɛ maa ngɔ wa hɛ kɛ fɔ Yehowa nɔ. Kaa bɔ nɛ tɛsa mimiɛɛ we ɔ, jã kɛ̃ nɛ Yehowa hu ngɛ kɛ ha wɔ be fɛɛ be. Wa ma nyɛ maa ngɔ wa hɛ kɛ fɔ e nɔ, ejakaa e ji “tɛsa ko nɛ ngɛ daa.” (Kane Yesaya 26:​3, 4.) E maa ye e si womi ɔmɛ a nɔ, e maa bu wa sɔlemi tue, nɛ e maa ye bua wɔ ejakaa e ngɛ kɛ yaa neneene. Jehanɛ hu ɔ, wa ma nyɛ maa ngɔ wa hɛ kɛ fɔ Yehowa nɔ ejakaa e yeɔ nihi nɛ a sɔmɔɔ lɛ ɔ anɔkuale. (2 Sam. 22:26) Yehowa hɛ be nɔ́ nɛ wa peeɔ ha lɛ ɔ nɔ jee gblee, nɛ e maa jɔɔ wɔ be fɛɛ be.—Heb. 6:10; 11:6.

7. Ke wa ngɔ wa hɛ kɛ fɔ Yehowa nɔ ɔ, kɛ wa ma ná he se ha kɛɛ? (Hyɛ foni ɔ hulɔ.)

⁷ Ke wa ngɔ wa hɛ kɛ fɔ Yehowa nɔ kulaa a, lɔ ɔ tsɔɔ kaa waa kɛ lɛ pee wa Tɛsa. Wa ngɛ hemi kɛ yemi kaa ke wa bu Yehowa tue ngɛ haomi behi a mi ɔ, wa ma ná he se. (Yes. 48:​17, 18) Be fɛɛ be nɛ wa maa na kaa Yehowa ye bua wɔ ɔ, lɔ ɔ ma ha nɛ hɛ kɛ nɔ fɔmi nɛ wa ngɛ ngɛ́ e mi ɔ mi maa wa. Enɛ ɔ ma ha nɛ wa ma ná nɔ mi mami kaa Yehowa pɛ lɛ ma nyɛ maa ye bua wɔ konɛ wa fĩ si ngɛ ka fɛɛ ka nɛ waa kɛ maa kpe ɔ mi. Behi fuu ɔ, ke wa ya je si fɔfɔɛ ko mi, nɛ wa yɔse kaa nɔ ko be nɛ maa ye bua wɔ ɔ, jamɛ a be ɔ mi nɛ wa naa kaa Yehowa ngɛ wa kasa nya be fɛɛ be. Nyɛminyumu ko nɛ a tsɛɛ lɛ ke Vladimir de ke: “Benɛ a wo mi tsu ɔ ji be nɛ i nu he kaa i hɛ kɛ su Yehowa he wawɛɛ. I kase kaa e sa nɛ ma ngɔ ye hɛ kɛ fɔ Yehowa nɔ wawɛɛ, ejakaa i nu he kaa e piɛ imi nɔ  kake pɛ, nɛ Yehowa pɛ lɛ ma nyɛ maa ye bua mi nɛ ma fĩ si.”

8. (a) Mɛni he je nɛ wa ma nyɛ ma de ke Yehowa mimiɛɛ we ɔ? (b) Ke wa ngɔ Yehowa kɛ pee wa Tɛsa a, kɛ wa ma ná he se ha kɛɛ? (La 62:​6, 7)

⁸ Yehowa tsakee we. Kaa bɔ nɛ tɛsa mimiɛɛ we ɔ, jã kɛ̃ nɛ Yehowa hu mimiɛɛ we. E suhi nɛ e ngɛ ɔ tsakee we, nɛ jã kɛ̃ nɛ e yi mi tomi hu tsakee we. (Mal. 3:6) Benɛ Adam kɛ Hawa tsɔ Yehowa hɛ mi atuã ngɛ Eden Abɔɔ ɔ mi ɔ, Yehowa tsakee we yi mi tomi nɛ e ngɛ kɛ ha adesahi ɔ. Kaa bɔ nɛ bɔfo Paulo ngma a, Yehowa “be nyɛe maa ye lakpa kɛ si lɛ nitsɛ e he.” (2 Tim. 2:13) Enɛ ɔ tsɔɔ kaa nɔ́ ko nɔ́ ko be nyɛe ma tsake Yehowa suhi, e yi mi tomihi, kɛ e mlaa amɛ. Akɛnɛ Yehowa tsakee we gblegbleegble he je ɔ, wa le kaa e maa ye bua wɔ ngɛ haomi behi a mi nɛ e maa ye e si womi ɔmɛ a nɔ.—Kane La 62:​6, 7.

9. Mɛni o kase ngɛ Tatyana níhi a si kpami ɔ mi?

⁹ Jehanɛ hu ɔ, ke wa pue wa yi mi tɛ ngɛ Yehowa su ɔmɛ kɛ e yi mi tomi kɛ ha zugba a kɛ adesahi a he ɔ, e ma ha nɛ wa ma ná hɛ kɛ nɔ fɔmi ngɛ e mi, nɛ waa kɛ lɛ maa pee wa Tɛsa. Ke wa pee jã a, e maa ye bua wɔ konɛ waa pee kpoo nɛ waa ye lɛ anɔkuale ke waa kɛ kahi ngɛ kpee. (La 16:8) Jã nɛ e ji ngɛ nyɛmiyo ko nɛ a tsɛɛ lɛ ke Tatyana a blɔ fa mi. A tsi e nya ngɛ lɛ nitsɛ e we mi ngɛ e hemi kɛ yemi ɔ he je. E de ke: “I nu he kaa e piɛ imi nɔ kake pɛ. Sisije ɔ, níhi a mi wa ha mi wawɛɛ nɛ ye kɔni mi jɔ̃.” Se benɛ Tatyana na kaa ka nɛ e kɛ ngɛ kpee ɔ kɛ Yehowa kɛ e yi mi tomi ɔ ngɛ tsakpa a, lɔ ɔ wo lɛ he wami nɛ e nyɛ nɛ e da nya. E de ke: “I le nɔ́ he je nɛ i kɛ ka nɛ ɔmɛ ngɛ kpee ɔ. I le kaa Yehowa he je nɛ i kɛ si fɔfɔɛ nɛ ɔmɛ ngɛ kpee ɔ nɛ. Enɛ ɔ ye bua mi nɛ i ngɔɛ ye juɛmi kɛ ma imi nitsɛ ye nɔ.”

10. Kɛ wa ma plɛ kɛ ha nɛ Yehowa nɛ pee wa Tɛsa ha kɛɛ amlɔ nɛ ɔ?

¹⁰ E be kɛe nɛ waa kɛ haomihi maa kpe, nɛ e ma bi nɛ waa ngɔ wa hɛ kɛ fɔ Yehowa nɔ wawɛɛ. Enɛ ɔ he ɔ, e he hia wawɛɛ kaa wa ma ha nɛ hɛ kɛ nɔ fɔmi nɛ wa ngɛ ngɛ́ Yehowa mi ɔ mi nɛ wa, nɛ wa ná nɔ mi mami kaa Yehowa maa ye bua wɔ konɛ waa ye lɛ anɔkuale be fɛɛ be. Mɛni maa ye bua wɔ konɛ wa nyɛ nɛ waa pee jã? Moo kane nihi a he sane ngɛ Baiblo ɔ mi, kɛ Odasefohi nɛ a ngɛ wa be nɛ ɔ mi ɔ a níhi a si kpamihi. Mo pue o yi mi tɛ ngɛ bɔ nɛ Yehowa ye bua nimli nɛ ɔmɛ ha a he. Mo susu jamɛ a sane ɔmɛ a he saminya. Ke o pee jã a, e maa ye bua mo konɛ o ngɔ Yehowa kɛ pee o Tɛsa.

MOO KASE YEHOWA SU ƆMƐ

11. Mɛni he je nɛ wa suɔ nɛ waa kase Yehowa suhi nɛ kadiɔ lɛ kaa tɛsa a? (Hyɛ daka nɛ ji, “ Oti Nɛ Nihewi Kɛ Ma Nyɛ Maa Ma A Hɛ Mi” ɔ hulɔ.)

¹¹ Wa ba na suhi nɛ Yehowa ngɛ nɛ ha nɛ a ngɔ lɛ kɛ to tɛsa he ɔ. Amlɔ nɛ ɔ, nyɛ ha nɛ waa hyɛ bɔ nɛ wa ma plɛ kɛ kase Yehowa su nɛ ɔmɛ ha. Ke wa bɔ mɔde nɛ wa  kase Yehowa su nɛ ɔmɛ amlɔ nɛ ɔ, wa ma nyɛ maa wo wa nyɛmimɛ ɔmɛ he wami. Kaa nɔ hyɛmi nɔ́ ɔ, Yesu tsɛ Simon ke Kefa (nɛ a tsɔɔ sisi ke “Petro”), nɛ e sisi ji “Tɛsa.” (Yoh. 1:42) Enɛ ɔ tsɔɔ kaa e maa wo nihi nɛ a ngɛ asafo ɔ mi ɔ a bua, nɛ e maa fia a hemi kɛ yemi ɔ kɛ ma si. A kale asafo mi nikɔtɔmahi “kaa zugba kplanaa nɔ tɛsa sisi hɔ̃.” (Yes. 32:2) E ngɛ heii kaa nyɛmimɛ tsuo nɛ a ngɛ asafo ɔ mi ɔ ma nyɛ maa kase Yehowa su nɛ ɔmɛ.—Efe. 5:1.

12. Mɛni blɔ nɔ wa ma nyɛ maa gu kɛ ye bua ni kpahi ngɛ haomi behi a mi?

¹² Moo pee o he wesa he. Be komɛ ɔ, ke wa nyɛmimɛ ɔmɛ kɛ adebɔ mi oslaa, basabasa peemi loo ta kpe ɔ, wa ma nyɛ ma ha nɛ a ba hi wa we ɔmɛ mi. Be mi nɛ níhi a mi ngɛ wae ‘ngɛ nyagbe ligbi nɛ ɔmɛ a mi ɔ,’ wa ma ná he blɔhi fuu kɛ ye bua wa nyɛmimɛ ɔmɛ nɛ wa ha mɛ a hiami níhi. (2 Tim. 3:1) Jehanɛ hu ɔ, wa ma nyɛ maa wo a bua nɛ wa je suɔmi kpo kɛ tsɔɔ mɛ. Blɔ kake nɛ wa ma nyɛ maa gu nɔ kɛ pee jã ji kaa wa ma nya a he ke a ba Matsɛ Yemi Asa a nɔ, nɛ wa ha nɛ suɔmi kɛ bua jɔmi nɛ hi asafo ɔ mi. Mwɔnɛ ɔ, nihi fuu je we suɔmi kpo kɛ tsɔɔ nihi. Enɛ ɔ ma nyɛ ma ha nɛ wa nyɛmimɛ ɔmɛ nɛ a hao wawɛɛ. Enɛ ɔ he ɔ, ke wa nyɛmimɛ ɔmɛ ba asafo mi kpe ɔ, e sa nɛ waa pee nɔ́ fɛɛ nɔ́ nɛ wa ma nyɛ nɛ wa je suɔmi kpo kɛ tsɔɔ mɛ, nɛ waa wo mɛ he wami.

13. Mɛni nɛ asafo mi nikɔtɔmahi ma nyɛ maa pee kɛ ye bua ni kpahi ngɛ haomi behi a mi? (Hyɛ foni ɔ hulɔ.)

¹³ Asafo mi nikɔtɔmahi ma nyɛ maa pee wesa he kɛ ha nyɛmimɛ ɔmɛ ngɛ asafo ɔ mi ngɛ haomi behi a mi. Ke oslaa ko ba loo hiɔ ko fia nɔ ko tlukaa a, asafo mi nikɔtɔma amɛ kɛ oya yemi toɔ blɔ nya nɛ a yeɔ buaa nɔ ɔ. Jehanɛ hu ɔ, a daa Baiblo ɔ nɔ  kɛ woɔ asafo mi bimɛ ɔmɛ he wami. Ke asafo mi nɔkɔtɔma ko he jɔ, e buɔ nihi tue, nɛ e bɔɔ mɔde kaa e maa nu nihi sisi ɔ, nyɛmimɛ ɔmɛ maa hɛ kɛ su e he wawɛɛ. Su nɛ ɔmɛ haa nɛ nyɛmimɛ ɔmɛ nuɔ he kaa asafo ɔ suɔ mɛ, nɛ ke asafo mi nɔkɔtɔma ko da Baiblo ɔ nɔ kɛ wo mɛ ga a, e yi kulaa kaa a kɛ ma tsu ní.—1 Tɛs. 2:​7, 8, 11.

14. Mɛni wa ma nyɛ maa pee konɛ ni kpahi nɛ a ngɔ a hɛ kɛ fɔ wa nɔ?

¹⁴ Mo ha nɛ ni kpahi nɛ a ná hɛ kɛ nɔ fɔmi ngɛ o mi. Wa suɔ nɛ nihi nɛ a ngɔ a hɛ kɛ fɔ wa nɔ, titli ngɛ haomi behi a mi. (Abɛ 17:17) Mɛni maa ye bua wɔ konɛ wa nyɛ nɛ waa pee jã? E sa kaa waa bɔ mɔde nɛ wa je su kpakpahi kpo be fɛɛ be. Kaa nɔ hyɛmi nɔ́ ɔ, ke wa wo si ɔ, e sa nɛ waa ye nɔ, nɛ waa ye wa be nɔ hulɔ. (Mat. 5:37) Ke nɔ ko hia yemi kɛ buami hu ɔ, wa ma nyɛ maa pee ní komɛ kɛ ha lɛ. Jehanɛ hu ɔ, ke a ha wɔ ní tsumi ko ngɛ asafo ɔ mi ɔ, e sa nɛ wa tsu lɛ saminya nɛ waa kɛ blɔ tsɔɔmihi tsuo nɛ ngɛ he ɔ nɛ tsu ní.

15. Ke nyɛmimɛ ɔmɛ heɔ asafo mi nikɔtɔma amɛ yeɔ ɔ, kɛ e yeɔ buaa asafo ɔ ha kɛɛ?

¹⁵ Asafo mi nikɔtɔmahi nɛ a ma nyɛ maa ngɔ hɛ kɛ fɔ a nɔ ɔ, yeɔ buaa asafo ɔ wawɛɛ. Ngɛ mɛni blɔ nɔ? Ke nihi nɛ a ngɛ asafo ɔ mi ɔ nyɛɔ nɛ a nine suɔ asafo mi nikɔtɔma amɛ a nɔ be fɛɛ be ɔ, e yeɔ buaa mɛ nɛ a hɛwi tsɔ. Ke nihi nɛ a ngɛ asafo ɔ mi ɔ ná le kaa nikɔtɔma amɛ pee klaalo kaa a maa ye bua mɛ ɔ, e haa nɛ a nuɔ he kaa a suɔ mɛ. Ke asafo mi nikɔtɔma amɛ da Baiblo ɔ kɛ womihi nɛ tsɔlɔ anɔkualetsɛ ɔ pee ɔ nɔ kɛ wo nyɛmimɛ ɔmɛ ga,  mohu pe mɛ nitsɛmɛ a susumi nɔ ɔ, e ma ha nɛ nyɛmimɛ ɔmɛ ma he mɛ maa ye wawɛɛ. Ke asafo mi nɔkɔtɔma ko je we nyɛmimɛ a laami sane kpo, nɛ e yeɔ e si womi nɔ ɔ, e ma ha nɛ nyɛmimɛ ɔmɛ ma he lɛ maa ye wawɛɛ.

16. Ke wa peeɔ nɔ́ nɛ da be fɛɛ be ɔ, kɛ wɔ nitsɛmɛ kɛ ni kpahi náa he se ha kɛɛ?

¹⁶ Moo pee nɔ́ nɛ da be fɛɛ be. Ke wa peeɔ nɔ́ nɛ da be fɛɛ be, nɛ wa daa Baiblo sisi tomi mlaahi a nɔ kɛ mwɔɔ yi mi kpɔ ɔ, wa maa pee nɔ hyɛmi nɔ́ kpakpa kɛ ha ni kpahi. Ke wa kase Mawu Munyu ɔ, nɛ wa ná hemi kɛ yemi nɛ mi wa ngɛ Yehowa mi ɔ, wa maa ye lɛ anɔkuale be fɛɛ be. Ke e ba jã a, wa ma nyɛ ma yɔse lakpa tsɔɔmihi kɛ je ɔ susumihi nɛ a kɛ Yehowa nɔ ɔ kɔ we ɔ. (Efe. 4:14; Yak. 1:​6-8) Hemi kɛ yemi nɛ wa ngɛ ngɛ Yehowa kɛ e si womi ɔmɛ a mi ɔ haa nɛ wa hɛwi tsɔ ke wa nu sane yaya ko. (La 112:​7, 8) Jehanɛ hu ɔ, wa nyɛɔ nɛ wa yeɔ buaa nihi nɛ a kɛ nyagbahi ngɛ kpee ɔ.—1 Tɛs. 3:​2, 3.

17. Mɛni asafo mi nikɔtɔma amɛ peeɔ kɛ yeɔ buaa nyɛmimɛ ɔmɛ?

¹⁷ E sa kaa asafo mi nikɔtɔmahi nɛ a ba a je mi saminya, a pee a he nihi nɛ a juɛmi mi tsɔ, nɛ a toɔ níhi a he blɔ nya saminya, nɛ a nuɔ nɔ́ sisi hulɔ. Ejakaa a yeɔ buaa ni kpahi konɛ a he nɛ wa ngɛ asafo ɔ mi, nɛ a woɔ asafo ɔ he wami kɛ guɔ ‘anɔkuale munyu ɔ nɛ a hɛɛɔ mi wawɛɛ ɔ nɔ.’ (Tito 1:9; 1 Tim. 3:​1-3) Ke asafo mi nikɔtɔmahi peeɔ nɔ hyɛmi nɔ́ kpakpa nɛ a slaa nyɛmimɛ ɔmɛ konɛ a wo mɛ he wami ɔ, lɔ ɔ maa wo nyɛmimɛ ɔmɛ he wami konɛ a ba asafo mi kpe, a ya fiɛɛmi, nɛ a pee dɛ he ní kasemi be fɛɛ be hulɔ. Ke nyɛmimɛ ɔmɛ ngɛ asafo ɔ mi ɔ kɛ nyagbahi nɛ a mi wa ngɛ kpee ɔ, asafo mi nikɔtɔma amɛ bɔɔ mɔde nɛ a woɔ mɛ he wami bɔ nɛ pee nɛ a ya nɔ nɛ a ngɔ a hɛ kɛ fɔ Yehowa kɛ e si womi ɔmɛ a nɔ.

18. Mɛni he je nɛ wa suɔ nɛ wa je Yehowa yi nɛ waa hɛ kɛ su e he wawɛɛ ɔ? (Hyɛ daka nɛ ji “ Nɔ́ Nɛ Maa Ye Bua Mo Konɛ O Hɛ Kɛ Su Yehowa He Wawɛɛ” ɔ hulɔ.)

¹⁸ Amlɔ nɛ ɔ nɛ wa susu Yehowa suhi nɛ a ngɛ nyakpɛ ɔ he ɔ, wa ma nyɛ ma de nɔ́ nɛ Matsɛ David de ɔ eko. E de ke: “A je Yehowa, ye Tɛsa a yi.” (La 144:1) Wa ma nyɛ maa ngɔ wa hɛ kɛ fɔ Yehowa nɔ be fɛɛ be, ejakaa e be hae nɛ wa nine nɛ nyɛ si kɔkɔɔkɔ. Ke wa wa ngɛ jeha mi po ɔ, wa ma nyɛ ma ná nɔ mi mami kaa Yehowa maa ya nɔ maa ye bua wɔ konɛ waa hɛ kɛ su e he, nɛ wa ma de ke: “Lɛ ji ye Tɛsa.”—La 92:​14, 15.