Sane Bimihi Nɛ Je Ní Kaneli A Ngɔ
Anɛ munyu nɛ ji “O maa bu a he” nɛ ngɛ La 12:7 ɔ kɔɔ “nihi nɛ a hao” nɛ kuku 5 ɔ tu a he munyu ɔ he aloo e kɔɔ “Yehowa munyu ɔmɛ” nɛ a tu he munyu ngɛ kuku 6 he?
Sane nɛ ngmami ɔ ngɛ he munyu tue ɔ ha nɛ e pee heii kaa e kɔɔ nimli a he.
La 12:1-4 ɔ kaneɔ ke: “Anɔkualetsɛmɛ ta adesahi a kpɛti.” Lɔ ɔ se ɔ, La 12:5-7 ɔ de ke:
“Yehowa de ke: ‘Akɛnɛ a waa nihi nɛ a hao ɔ yi mi,
Nɛ́ ohiatsɛmɛ ngɛ hmm hmm pee ɔ he je ɔ,
Ma te si nɛ ma pee he nɔ́ ko.’
‘Ma he a yi wami kɛ je nihi nɛ bui mɛ ɔ a dɛ mi.’
Yehowa munyu ɔmɛ a he tsɔ;
A ngɛ kaa sika hiɔ nɛ a tsu he si kpaago ngɛ zu flɔɔnɔɔ mi.
Oo Yehowa, o maa bu a he;
O maa po a ti nɔ fɛɛ nɔ he piɛ ngɛ yi nɔ bi nɛ ɔmɛ a he kɛ ya neneene.”
Kuku 5 ɔ tsɔɔ nɔ́ nɛ Mawu maa pee ha “nihi nɛ a hao” ɔ. E tsɔɔ kaa e ma kpɔ̃ mɛ.
Kuku 6 hu tsa nɔ ke: “Yehowa munyu ɔmɛ a he tsɔ; a ngɛ kaa sika hiɔ nɛ a tsu he.” Munyu nɛ ɔ tsɔɔ bɔ nɛ Kristofohi naa Yehowa munyu ɔ ha.—La 18:30; 119:140.
Amlɔ nɛ ɔ, mo susu ngmami nɛ nyɛɛ se nɛ ji, La 12:7 ɔ he nɛ o hyɛ. Lejɛ ɔ de ke: “Oo Yehowa, o maa bu a he; o maa po a ti nɔ fɛɛ nɔ he piɛ ngɛ yi nɔ bi nɛ ɔmɛ a he kɛ ya neneene.” Mɛni nɛ “a he” nɛ ngɛ ngmami nɛ ɔ mi ɔ tsɔɔ?
Akɛnɛ kuku 7 ɔ nyɛɛ kuku 6 nɛ wo “Yehowa munyu ɔmɛ” a nɔ ta a se he je ɔ, ni komɛ ma susu kaa munyu nɛ ji “a he” ɔ kɔɔ Mawu munyu ɔmɛ a he. Ngɛ anɔkuale mi ɔ, wa le kaa si temi kɛ woli bɔ mɔde kaa a maa tsi Baiblo ɔ nya nɛ a kpata Baiblo ɔ hɛ mi mohu lɛɛ, se Mawu po he piɛ.—Yes. 40:8; 1 Pet. 1:25.
Se kɛ̃ ɔ, nɔ́ nɛ a de ngɛ kuku 5 ɔ kaa Yehowa buɔ nihi nɛ a hao ɔ a he ɔ hu ji anɔkuale. Yehowa bu “nihi nɛ a hao” blema a he, nɛ mwɔnɛ ɔ hu ɔ, e maa ya nɔ maa pee jã.—Hiob 36:15; La 6:4; 31:1, 2; 54:7; 145:20.
Ke jã a, lɛɛ mɛni nɛ munyu nɛ ji “a he” nɛ je kpo ngɛ kuku 7 ɔ tsɔɔ?
Ke wa susu ngmami nɛ ɔ he saminya a, wa maa na heii kaa “a he” nɛ a kɛ tsu ní ngɛ ngmami nɛ ɔ mi ɔ daa si kɛ ha adesahi.
Ngɛ La 12:1 ɔ mi ɔ, David tu Yehowa sɔmɔli “anɔkualetsɛmɛ” nɛ nimli yayahi sisi mɛ ɔ a he munyu. Kuku nɛ nyɛɛ jamɛ a ngmami ɔ se ɔ ha nɛ wa na kaa Yehowa ma kpata nihi nɛ a tuɔ jamɛ a sisimi munyu ɔmɛ a hɛ mi. Ngmami nɛ ɔ ha nɛ wa ná nɔ mi mami kaa Mawu ma kpɔ̃ e we bi ejakaa e munyu ɔmɛ a he tsɔ.
Enɛ ɔ he ɔ, nɔ́ nɛ kuku 7 ɔ de kaa Yehowa maa bu “a he” ɔ kɔɔ nihi nɛ a hao ɔ a he.
A kɛ munyu nɛ ji “a he” ɔ tsu ní ngɛ Hebri Ngmami kpahi nɛ nihi heɔ yeɔ wawɛɛ ɔ mi. Ngɛ Hebri Ngmami ɔ nɛ a tsɔɔ sisi kekleekle kɛ ya Hela gbi ɔ mi, nɛ a tsɛɛ ke Septuagint ɔ mi ɔ, a kɛ munyu nɛ ji “wɔ” tsu ní si enyɔ sɔuu ngɛ kuku 7 ɔ mi. Enɛ ɔ ha nɛ e pee heii kaa anɔkualetsɛmɛ nɛ a wa mɛ yi mi ɔ a he munyu lɛ a ngɛ tue ɔ nɛ. Kuku 7 ɔ mwɔ nya kaa Yehowa maa po anɔkualetsɛmɛ ɔmɛ “a ti nɔ fɛɛ nɔ” he piɛ ngɛ “yi nɔ bi nɛ ɔmɛ a he,” nɛ ji nihi nɛ a woɔ yayami peemi mi he wami ɔ. (La 12:7, 8) Ngɛ Hebri Ngmami nɛ a tsɔɔ sisi kɛ ya Aram gbi ɔ mi ɔ mi ɔ, a kɛ munyu nɛ ji “a he” ɔ tsu ní ngɛ kuku 7 ɔ kekle fã a mi. E de ke: “Mo, OO NYƆMTSƐ, o maa bu dali a he, nɛ o maa po a he piɛ kɛ je yi nɔ bi nɛ ɔmɛ nɛ a ji yiwutsotsɛmɛ ɔ a he kɛ ya neneene.” Enɛ ɔ ji odase kpa ko nɛ tsɔɔ kaa pi Yehowa munyu ɔmɛ a he munyu nɛ a ngɛ tue ngɛ La 12:7 ɔ.
Enɛ ɔ ha nɛ “anɔkualetsɛmɛ” ngɛ hɛ kɛ nɔ fɔmi kaa Mawu ma he a yi wami.
