Nyɛmimɛ nɛ a ngɛ Betel ɔ bɔ mɔde wawɛɛ nɛ a ngɔ jeha kake kɛ se kɛ ma hleedio tesia ko nɛ a tsɛɛ ke WBBR ɔ ngɛ Staten Island ngɛ New York City. Sisije ɔ, a poo tsohi ngɛ zugba a nɔ, nɛ a ma tsu ngua ko kɛ ha ní tsuli ɔmɛ, nɛ a ma ekpa hu kɛ ha klamahi nɛ a kɛ ma tsu ní ɔ. Benɛ a gbe ní tsumi nɛ ɔ nya a, nyɛmimɛ ɔmɛ bɔ mɔde nɛ a hla klamahi nɛ maa hia mɛ ɔ, konɛ a nyɛ nɛ a kɛ hleedio tesia ɔ nɛ tsu ní. Se kɛ̃ ɔ, a kɛ nyagbahi fuu kpe.

Nyɛmimɛ ɔmɛ na kaa e he maa wa ha mɛ wawɛɛ kaa a maa ma hleedio tesia ɔ he antenna a. Antenna a nɛ a maa ma a, e kami maa su nanewɛɛ 300. Nɛ tsohi enyɔ nɛ a maa ngɔ antenna a kɛ kpla he ɔ, e sa nɛ eko fɛɛ eko kami nɛ su nanewɛɛ 200. Kekleekle nɔ́ ɔ, nɛ a bɔ mɔde kaa a maa pee ɔ yi manye. Se akɛnɛ a ngɔ a hɛ kɛ fɔ Yehowa nɔ he je ɔ, nyagbenyagbe ɔ, a nyɛ nɛ a tsu he ní. Nyɛminyumu Calvin Prosser nɛ e piɛɛ he kɛ tsu ní tsumi nɛ ɔ de ke, “Kaa wa ye manye ngɛ kekleekle nɔ́ ɔ mi ɔ, jinɛ wa bua ko jɔ nɛ wa ko de ke, ‘Wa nyɛ nɛ wa pee!’ Nɛ wa ko je we Yehowa yi.” Ngɛ anɔkuale mi ɔ, nyɛmimɛ ɔmɛ je Yehowa yi kaa e ye bua mɛ nɛ a ye manye. Se kɛ̃ ɔ, a nyagba amɛ a se pui.

Ngɛ jamɛ a be ɔ mi ɔ, hleedio kɛ ní tsumi pɔɛ he. Enɛ ɔ he ɔ, e he wa ha nyɛmimɛ ɔmɛ kaa a ma he klamahi nɛ a he hia nɛ a kɛ ma tsu ní tsumi nɛ ɔ. Enɛ ɔ he ɔ, a ya he klama ko nɛ nɔ ko kɛ tsu ní momo. Jinɛ e sa nɛ a ya he microphone, se a ngɔ microphone nɛ ngɛ tɛlifoo he ɔ kɛ tsu ní. Gbɔkuɛ ko ngɛ February nyɔhiɔ ɔ mi ɔ, nyɛmimɛ ɔmɛ bɔ mɔde kaa a maa hyɛ kaa klama amɛ ngɛ ní tsue lo. Enɛ ɔ ma bi nɛ a pee ní peemi ko ngɛ radio ɔ nɔ. Enɛ ɔ he ɔ, nyɛmimɛ ɔmɛ la Matsɛ Yemi lahi. Nyɛmimɛ ɔmɛ a kpɛti nɔ kake nɛ a tsɛɛ lɛ ke Ernest Lowe ɔ tsɔɔ nɔ́ ko nɛ ya nɔ nɛ ha nɛ a muɔ  ngɛ jamɛ a ligbi ɔ mi. E tsɔɔ kaa benɛ a ngɛ lae ɔ, Nyɛminyumu Rutherford nu a he nɛ e tsɛ mɛ ngɛ tɛlifoo nɔ. Kɛ je he nɛ a ngɛ lae ngɛ ɔ kɛ yaa Brooklyn ɔ mi kɛmi maa su si tomi 15.

Nyɛminyumu Rutherford de mɛ ke, “Nyɛ kpa ngmlaa kpami kɛ wo wa tue mi. Nyɛ gbi pee kaa atihi loo anɔhi nɛ hwɔ ngɛ mɛ yee!” Ngɛ anɔkuale mi ɔ, nɔ́ nɛ e de ɔ gba nyɛmimɛ ɔmɛ a nya bɔɔ, enɛ ɔ he ɔ, a kpa la a lami nɛ a gbe klama amɛ. Se enɛ ɔ ha nɛ a na kaa klama amɛ ngɛ ní tsue, nɛ a pee klaalo kaa a maa je ní tsumi sisi.

Ngɛ February 24, 1924 ɔ, Nyɛminyumu Rutherford jɔɔ hleedio tesia nɛ ɔ nɔ benɛ waa kɛ tsu ní kekleekle be ɔ, nɛ e tsɔɔ kaa waa kɛ hleedio tesia nɛ ɔ ma tsu ní tsumi nɛ Kristo nɛ ji wa Matsɛ ɔ kɛ wo wa dɛ ɔ. Jehanɛ hu ɔ, e tsɔɔ kaa yi mi tomi he je nɛ a to hleedio tesia nɛ ɔ he blɔ nya ji kaa “e maa ye bua nihi tsuo nɛ a nu anɔkualehi nɛ ngɛ Baiblo ɔ mi ɔ sisi, nɛ a na kaa be nɛ wa ngɛ mi amlɔ nɛ ɔ he hia wawɛɛ.”

Ngɛ anɔkuale mi ɔ, ní peemi nɛ ya nɔ ngɛ hleedio ɔ nɔ jamɛ a ligbi ɔ ye manye saminya. Wa ngɔ WBBR ɔ kɛ tsu asafo ɔ ní tsumi jeha 33 sɔuu kɛ ye bua ní kpahi.

Ngɛ July 1924 ɔ mi ɔ, Baiblo Kaseli ɔmɛ pee kpokpa nɔ kpe ko ngɛ Columbus ngɛ Ohio. Nihi babauu je he slɔɔtoslɔɔtohi kɛ ba kpe nɛ ɔ. Enɛ ɔ he ɔ, a tu magbɛ nɔ munyu ɔmɛ ngɛ Arabic, Blɛfo gbi, French, German, Greek, Hungary gbi, Italy gbi, Lithuania gbi, Poland gbi, Russia gbi, Ukraine gbi kɛ Scandinavia gbihi a mi. Ni komɛ hu nyɛ nɛ a bu magbɛ nɔ munyu ɔmɛ tue ngɛ hleedio ɔ nɔ. Jehanɛ hu ɔ, nyɛmimɛ ɔmɛ to blɔ nya konɛ a fia kpe ɔ he blɔ nya tomi ɔ he adafi daa ligbi ngɛ adafi fiami womihi a mi ngɛ ma a mi.

Ngɛ So July 24 ɔ nɔ ɔ, nyɛmimɛ 5,000 kɛ se nɛ a ba kpe ɔ kɛ a he wo fiɛɛmi ní tsumi ɔ mi ngɛ ma a mi. A ha womihi maa pee 30,000, nɛ a je Baiblo mi ní kasemi akpehi abɔ sisi. Hwɔɔmi Mɔ ɔ tsɔɔ kaa blɔ nya tomi nɛ ɔ ha nɛ jamɛ a ligbi ɔ kpe ɔ pee bua jɔmi wawɛɛ.

Ngɛ Soha July 25 ɔ nɔ benɛ Nyɛminyumu Rutherford ngɛ magbɛ nɔ munyu ko tue ɔ, e kɛ kã kane womi ko kɛ kpa lakpa jami hɛ mi nyɛɛli ɔmɛ a he bo. E tsɔɔ kaa ma kudɔmi hɛ mi nyɛɛli, jami hɛ mi nyɛɛli, kɛ jua yemi hɛ mi nyɛɛli ɔmɛ “ngɛ nihi a nya tsie konɛ a ko kase anɔkualehi nɛ kɔɔ Mawu Matsɛ Yemi nɛ maa ngɔ jɔɔmihi kɛ ba ha adesahi tsuo ɔ he ní.” Jehanɛ hu ɔ, e tsɔɔ kaa nɔ́ nɛ hɛ mi nyɛɛli nɛ ɔmɛ ngɛ pee ɔ dɛ, ejakaa “a fĩ Je Ma Amɛ A Somi ɔ se, nɛ a tsɔɔ kaa Mawu lɛ ngɛ a nɔ gue kɛ ngɛ nɔ yee  ngɛ zugba a nɔ.” Ngɛ anɔkuale mi ɔ, e ma bi nɛ Baiblo Kaseli ɔmɛ nɛ a pee kã wawɛɛ loko a ma nyɛ maa fiɛɛ sɛ gbi nɛ ɔ kɛ ha nihi.

Pee se ɔ, munyu ko nɛ a to he blɔ nya ngɛ Hwɔɔmi Mɔ ko mi ɔ de ke: “Kpe nɛ ɔ nɛ a to he blɔ nya ngɛ Columbus ɔ ha nɛ nyɛmimɛ nɛ a ngɛ kã a ná hemi kɛ yemi nɛ mi wa wawɛɛ. E ha nɛ a pee kã nɛ a fiɛɛ ngɛ si temi kɛ womi nɛ a kɛ kpe ɔ tsuo se.” Nyɛminyumu ko nɛ a tsɛɛ lɛ ke Leo Claus nɛ e ya jamɛ a kpe ɔ de ke: “Benɛ a gbe kpe ɔ nya a, wa bua jɔ wawɛɛ kaa wa maa fiɛɛ sɛ gbi ɔ kɛ ha nihi nɛ a ngɛ wa zugba kpɔ ɔ mi ɔ.”

Ngɛ October nyɔhiɔ ɔ mi ɔ, Baiblo Kaseli ɔmɛ gba dɛ womi nɛ ji Ecclesiastics Indicted ɔ ayɔhi abɔ kɛ ha nihi. A ngma munyu nɛ Nyɛminyumu Rutherford tu kɛ kpa lakpa jami hɛ mi nyɛɛli ɔmɛ a he bo ɔ ngɛ dɛ womi nɛ ɔ mi. Ngɛ ma nyafii ko nɛ ngɛ Cleveland ngɛ Oklahoma a mi ɔ, Frank Johnson gba e dɛ womi ɔ ngɛ e zugba kpɔ ɔ mi, nɛ e ma bi nɛ e mlɛ hɛngmɛfia 20 loko nyɛmimɛ kpa amɛ nɛ a ngɛ fiɛɛe ngɛ e kasa nya a nɛ a ba ná lɛ. Se e sɛ nɛ e da si ngɛ he nɛ nihi maa na lɛ, ejakaa nyumuhi nɛ a ngɛ he nɛ e gba womi ɔ ngɛ ɔ mi mi fu, nɛ a ngɛ lɛ hlae. Nyɛminyumu Johnson bɔ mɔde kaa e maa laa e he ngɛ sɔlemi tsu ko nɛ ngɛ e kasa nya a mi. Benɛ e sɛ sɔlemi tsu ɔ mi ɔ, e nɛ nɔ ko, lɔ ɔ he ɔ, e ngɔ dɛ womi ɔ eko kɛ wo osɔfo ɔ Baiblo ɔ mi, nɛ e ngɔ kakaaka kɛ fɔ he nɛ nɔ fɛɛ nɔ maa hi si ngɛ ɔ. Se e pee jã kɛfokɛfo konɛ sɔlemibi ɔmɛ nɛ a ko ba ti e nɔ. Se loloolo ɔ, nyɛmimɛ nɛ e ngɛ mɛ mlɛe ɔ bɛ, lɔ ɔ he ɔ, e ya sɔlemi tsuhi enyɔ a mi nɛ e ya gba dɛ womi ɔ kaa bɔ nɛ e pee ngɛ kekleekle sɔlemi tsu ɔ mi ɔ.

Frank kɛ oya yemi ba he nɛ nyɛmimɛ ɔmɛ ma ba ngɔ lɛ ngɛ ɔ, nɛ e ya laa e he ngɛ filling station ko, nɛ e ngɛ nyumu ɔmɛ nɛ a ngɛ e se blɔ hlae ɔ hyɛe. Nyumu ɔmɛ ngɔ lɔle kɛ ba be ngɛ e kasa nya, se a nɛ lɛ. Benɛ a be pɛ kɛkɛ nɛ nyɛmimɛ ɔmɛ nɛ Frank ngɛ mɛ mlɛe ɔ ba nɛ a ba ngɔ Frank nɛ a je.

Nyɛmimɛ ɔmɛ a kpɛti nɔ kake de ke, “Benɛ wa ngɛ kpɔ ɔ mi jee ɔ, wa be sɔlemi tsuhi etɛ a he. Nihi maa pee 50 daa si ngɛ sɔlemi tsu ɔ eko fɛɛ eko nya. A kpɛti ni komɛ ngɛ dɛ womi ɔ kanee, nɛ ni komɛ hu wo nɔ kɛ ngɛ osɔfo ɔ tsɔɔe konɛ e hyɛ. Ngɛ anɔkuale mi ɔ, e piɛ bɔɔ nɛ a nine ko su wa nɔ! Wa naa Yehowa wa Mawu ɔ si kaa e po wa he piɛ nɛ e ye bua wɔ nɛ wa le nɔ́ nɛ e sa nɛ waa pee konɛ waa fiɛɛ sɛ gbi ɔ nɛ wa ko ya sɛ oslaa mi.”

Baiblo Kaseli ɔmɛ fiɛɛ kɛ kã ngɛ ma kpahi a nɔ hulɔ. Ngɛ France yiti je ɔ, Nyɛminyumu Józef Krett fiɛɛ kɛ ha Polandbi nɛ a hia kɛ ba ma a mi nɛ a tsuɔ ní ngɛ he nɛ a tsuaa tɛhi ngɛ ɔ. A to blɔ nya konɛ e tu magbɛ nɔ munyu ko nɛ e yi ji, “The Resurrection of the Dead Soon (E Be Kɛe Nɛ Gbogboehi A Si Tlemi ɔ Maa Ba).” Benɛ nyɛmimɛ ɔmɛ fɔ nihi nine kɛ ha magbɛ nɔ munyu nɛ ɔ, osɔfo ko nɛ ngɛ ma a mi ɔ bɔ e sɔlemibi ɔmɛ kɔkɔ kaa a ko ya. Se e sɔlemibi ɔmɛ bui lɛ tue fɛɛ. Nihi nɛ a he hiɛ pe 5,000 ɔ ya bu munyu ɔ tue, nɛ osɔfo ɔ nitsɛ hu piɛɛ he! Nyɛminyumu Krett ha osɔfo ɔ he blɔ konɛ e tsɔɔ nɔ́ nɛ e heɔ yeɔ ɔ, se e kua. Benɛ Nyɛminyumu Krett tu munyu ɔ ta a, e ngɔ womihi nɛ ngɛ e dɛ ɔ kɛ ha tue buli ɔmɛ, ejakaa a suɔ nɛ a le babauu kɛ kɔ Mawu Munyu ɔ he.—Amos 8:11.

Ngɛ Afrika a, Claude Brown ngɔ sane kpakpa a kɛ ba Gold Coast, nɛ amlɔ nɛ ɔ, a tsɛɔ ke Ghana a. Magbɛ nɔ munyuhi nɛ e tu, kɛ womihi nɛ e gba a ye bua nɛ anɔkuale ɔ gbɛ fĩa mlamlaamla ngɛ ma nɛ ɔ mi. John Blankson nɛ ngɛ jamɛ a be ɔ mi ɔ, e ngɛ sukuu yae konɛ e ba tsu ní ngɛ pharmacy ɔ hu ya bu Nyɛminyumu Brown magbɛ nɔ munyu ɔ eko tue. Oya nɔuu nɛ e yɔse kaa e na anɔkuale ɔ. John de ke, “anɔkuale ɔ nɛ i ba na a ha nɛ ye bua jɔ wawɛɛ, nɛ i kɛ ni kpahi sɛɛ he ní faa ngɛ sukuu ɔ.”

 John ba kase ngɛ Baiblo ɔ mi kaa Mawu ɔ pi Triniti ji lɛ. Lɔ ɔ he ɔ, ligbi ko ɔ, John ya Anglican sɔlemi tsu ko mi, konɛ e ya bi osɔfo ɔ sane kɛ kɔ Triniti tsɔɔmi ɔ he. Osɔfo ɔ mi mi fu, nɛ e fiee lɛ kɛ je sɔlemi tsu ɔ mi nɛ e kpa ngmlaa ke: “Tsa pi Kristofono ji mo, Abosiami bi ji mo, jee hiɛ ɔ kɛ ho!”

Benɛ John ya su we mi ɔ, e ngma sɛ womi kɛ ya ha osɔfo ɔ nɛ e fɔ lɛ nine kaa e ba fã e he ngɛ Triniti tsɔɔmi ɔ he ngɛ ma bi ɔmɛ a hɛ mi. Osɔfo ɔ hu de John kaa sukuu nɔkɔtɔma a ngɛ lɛ hlae, lɔ ɔ, e ya na lɛ. Benɛ John ya na sukuu nɔkɔtɔma a, e bi lɛ kaa e ngɛ mi niinɛ kaa e ngma osɔfo ɔ sɛ womi ko lo.

John de ke, “Ee. I pee jã.”

Sukuu nɔkɔtɔma a de John kaa e ngma sɛ womi kɛ ya ha osɔfo ɔ, nɛ e kpa lɛ pɛɛ. Lɔ ɔ he ɔ, John ngma ke:

“Wa nɔmo, Ye sukuu nɔkɔtɔma a de mi kaa ma ngma mo sɛ womi nɛ ma kpa mo pɛɛ, nɛ i kplɛɛ nɔ kaa ma pee jã, se ja mo hu o kplɛɛ nɔ kaa níhi nɛ o ngɛ ni ɔmɛ tsɔɔe ɔ ji lakpa.”

Sukuu nɔkɔtɔma a he mi po wawɛɛ, nɛ e bi lɛ ke, “Blankson, nɔ́ nɛ o ngma ji nɛ ɔ?”

John de ke, “Ee, nɔ́ nɛ ma nyɛ ma ngma pɛ ji lɔ ɔ nɛ, ejakaa i pee we yayami ko nɛ ma kpa pɛɛ ngɛ he.”

Tsɔɔlɔ ɔ de ke, “Wa maa fiee mo kɛ je sukuu nɛ ɔ mi. O bui nɔ ma ji, kɛ ba lɛ kɛɛ nɛ o kɛ osɔfo ɔ tu munyu jã a?”

John de ke, “Se Tsɔɔlɔ, . . . ke o ngɛ wɔ ní tsɔɔe nɛ wa nui nɔ́ ko sisi ɔ, tse wa nyɛɔ nɛ wa biɔ mo sane, aloo?”

Tsɔɔlɔ ɔ de ke, “Ee. Nyɛ ngɛ he blɔ nɛ nyɛ biɔ sane.”

John de ke, “Lɛɛ jã pɛ i pee ɔ nɛ. Nɔmo ɔ ngɛ wɔ nɔ́ ko tsɔɔe ngɛ Baiblo ɔ mi, nɛ i bi lɛ sane ngɛ he. Ke e nyɛ we nɛ e ma ha ye sane bimi ɔ heto ɔ, lɛɛ mɛni he je nɛ e sa nɛ ma ngma sɛ womi kɛ ya kpa lɛ pɛɛ ɔ?”

Blankson ngmɛ́ sɛ womi ko kɛ ya kpa osɔfo ɔ pɛɛ, nɛ a fiee we lɛ hulɔ.

Benɛ Hwɔɔmi Mɔ ɔ ngɛ níhi nɛ ya nɔ ngɛ jeha a mi ɔ he munyu tue ɔ, e de ke: “Kaa bɔ nɛ David de ɔ, waa kɛ nɔ mi mami ma nyɛ ma de ke: ‘O ma ha mi he wami nɛ ma kɛ hwu ta a.’ (La 18:39) Ngɛ anɔkuale mi ɔ, wa ná he wami womi ngɛ jeha nɛ ɔ mi wawɛɛ, ejakaa wa na bɔ nɛ Yehowa ye bua wɔ ngɛ e sɔmɔmi mi ha . . . E sɔmɔli anɔkualetsɛmɛ ɔmɛ kɛ bua jɔmi fiɛɛ sane kpakpa a.”

Kɛ yaa jeha a nyagbe ɔ, nyɛmimɛ ɔmɛ to blɔ nya konɛ a ná hleedio tesia kpa kɛ piɛɛ kekleekle nɔ́ ɔ he. Enɛ ɔ he ɔ, nyɛmimɛ ɔmɛ bɔ mɔde wawɛɛ nɛ a ma hleedio tesia kpa ngɛ Chicago ngɛ U.S.A. A tsɛɛ hleedio tesia nɛ ɔ ke WORD, nɛ e sisi ji munyu, ejakaa a maa fiɛɛ Mawu Munyu ɔ ngɛ hleedio tesia nɛ ɔ nɔ. Amlɔ nɛ ɔ lɛɛ a kɛ klamahi nɛ tsuɔ ní saminya a lɛ to hleedio tesia nɛ ɔ he blɔ nya. Enɛ ɔ he ɔ, nihi nɛ a ngɛ he tsitsaa kaa Canada yiti je ɔ po ma nyɛ maa nu Matsɛ Yemi ɔ he sɛ gbi ɔ.

Ngɛ jeha 1925 ɔ mi ɔ, Yehowa ye bua nyɛmimɛ ɔmɛ nɛ a ná sisi numi ehe kɛ kɔ Kpo Jemi yi 12 ɔ he. Sisi numi ehe nɛ ɔ ha nɛ ni komɛ a nane tɔ̃tɔ̃, nɛ a kpa Yehowa sɔmɔmi. Se nihi fuu a bua jɔ, ejakaa a ba nu níhi nɛ ngɛ nɔ yae ngɛ hiɔwe kɛ bɔ nɛ e kɔɔ Yehowa we bi nɛ a ngɛ zugba a nɔ he ɔ sisi saminya.