1. Mɛni nɛ e be kɛe nɛ Yesu maa pee?

 E BE kɛe nɛ tsakemi nguahi maa ba ngɛ be nɛ wa ngɛ mi nɛ ɔ mi! E piɛ bɔɔ nɛ Yesu maa kojo adesahi tsuo. Yesu ha nɛ wa le kaa kojomi nɛ ɔ su si ta. Enɛ ɔ he ɔ, e ha e kaseli ɔmɛ “okadi” nɛ maa tsɔɔ kaa e ba, kɛ nihi nɛ ma kadi “níhi a blɔ nya tomi ɔ nyagbe be ɔ” hulɔ. (Mat. 24:3) A tu gbami nɛ ɔ he munyu ngɛ Mateo yi 24 kɛ 25 ɔ. Jehanɛ hu ɔ, a tu he munyu ngɛ Maako yi 13 kɛ Luka yi 21 ɔ.

2. Mɛni he wa ma susu ngɛ ní kasemi nɛ ɔ mi, nɛ kɛ enɛ ɔ maa ye bua wɔ ha kɛɛ?

² Yesu ngɔ nɔ́ he tomi ní etɛ komɛ kɛ tsu ní konɛ a ye bua wɔ nɛ wa dla wa he kɛ to, nɛ a ji kɔkɔ bɔmi kɛ ha wɔ hulɔ. Kekleekle nɔ́ ɔ kɔɔ jijɔ ɔmɛ kɛ apletsi ɔmɛ a he. Enyɔne ɔ kɔɔ yihewi juɛmitsɛmɛ kɛ yihewi kuasiahi nɛ a li nyumu ɔ a he, nɛ etɛne ɔ kɔɔ talɛnt ɔmɛ a he. Nɔ́ he tomi ní nɛ ɔmɛ eko fɛɛ eko ha nɛ wa na kaa Yesu maa da nihi a ní peepee nɔ kɛ kojo mɛ. Ngɛ ní kasemi nɛ ɔ mi ɔ, wa ma susu nɔ́ he tomi ní nɛ ɔmɛ a he, nɛ wa maa hyɛ nɔ́ nɛ wa ma nyɛ maa kase kɛ je mi. Kekleekle ɔ, wa ma susu nɔ́ he tomi nɔ́ nɛ kɔɔ jijɔ ɔmɛ kɛ apletsi ɔmɛ a he ɔ he.

JIJƆ ƆMƐ KƐ APLETSI ƆMƐ

3. Mɛni be nɛ Yesu maa kojo nihi?

³ Yesu tsɔɔ kaa e maa da bɔ nɛ nihi peeɔ a ní ngɛ sane kpakpa a he, kɛ bɔ nɛ nihi kɛ e nyɛmimɛ nɛ a pɔ mɛ nu ɔ hiɔ si ha a  nɔ kɛ kojo mɛ. (Mat. 25:31-46) Kojomi nɛ ɔ maa ya nɔ ngɛ “amanehlu ngua” a mi. Lɔ ɔ se ɔ, Harmagedon ta a maa je sisi. (Mat. 24:21) Kaa bɔ nɛ to hyɛlɔ gbaa jijɔhi kɛ apletsihi a mi ɔ, jã kɛ̃ nɛ Yesu hu ma gba e sɔmɔli anɔkualetsɛmɛ nɛ a fĩ nihi nɛ a pɔ mɛ nu ɔ a se kɛ nihi nɛ a pee we jã a, a mi.

4. Ngɛ Yesaya 11:3, 4 ɔ nya a, mɛni he je nɛ wa ma nyɛ ma ná nɔ mi mami kaa Yesu maa kojo nihi ngɛ dami mi ɔ? (Hyɛ foni ɔ hulɔ.)

⁴ Baiblo ɔ tsɔɔ kaa ke Yesu da Yehowa nane mi kɛ ngɛ nihi kojoe ɔ, e maa ye dami sane. (Kane Yesaya 11:3, 4.) E maa to nihi a ní peepee, a susumi kɛ a munyu tutui he hɛ saminya, kɛ bɔ nɛ a kɛ nihi nɛ a pɔ mɛ nu ɔ hi si ha. (Mat. 12:36, 37; 25:40) Yesu maa le nihi nɛ a fĩ e nyɛmimɛ nɛ a pɔ mɛ nu ɔ a se, kɛ nihi nɛ a ye bua mɛ kɛ tsu a ní tsumi ɔ. a Nɔ́ titli nɛ nɔ ko ma nyɛ maa pee kɛ tsɔɔ kaa e fĩɔ nihi nɛ a pɔ mɛ nu ɔ a se ji kaa e maa ngɔ e he kɛ wo fiɛɛmi ní tsumi ɔ mi. A maa kojo nihi nɛ a yeɔ buaa Kristo nyɛmimɛ ɔmɛ kaa a ji “dali,” nɛ a ma ná he blɔ kaa a maa hi si ngɛ zugba a nɔ kɛ ya “neneene.” (Mat. 25:46; Kpoj. 7:16, 17) Enɛ ɔ ji jɔɔmi nɛ se be nɛ nihi nɛ a maa ye anɔkuale kɛ ya si nyagbe ɔ ma ná. Ke a ya nɔ nɛ a ye anɔkuale ngɛ amanehlu ngua a mi, nɛ a ya nɔ nɛ a pee jã ngɛ amanehlu ngua a se hu ɔ, a biɛ maa hi “wami womi ɔ mi” kɛ ya neneene.—Kpoj. 20:15.

5. Mɛni wa kase ngɛ nɔ́ he tomi nɔ́ nɛ kɔɔ jijɔ ɔmɛ kɛ apletsi ɔmɛ a he ɔ mi, nɛ mɛnɔmɛ nɛ a ma nyɛ ma ná he se?

⁵ Ngɔɔ o ní peepee kɛ tsɔɔ kaa o yeɔ anɔkuale. Nɔ́ he tomi nɔ́ nɛ Yesu kɛ tsu ní kɛ kɔ jijɔ ɔmɛ kɛ apletsi ɔmɛ a he ɔ kɔɔ nihi nɛ a ngɛ hɛnɔkami kaa a maa hi zugba a nɔ ɔ a he titli. Nimli nɛ ɔmɛ yeɔ buaa Kristo nyɛmimɛ ɔmɛ kɛ tsuɔ fiɛɛmi ní tsumi ɔ, nɛ a kɛ anɔkuale yemi fĩɔ blɔ tsɔɔmihi nɛ tsɔlɔ anɔkualetsɛ kɛ ní lelɔ ɔ kɛ haa a hu se kɛ tsɔɔ kaa a ngɛ hemi kɛ yemi. (Mat. 24:45) Se e he hia nɛ nihi nɛ a ngɛ hɛnɔkami kaa maa ya hiɔwe ɔ hu nɛ a bu kɔkɔ bɔmi nɛ ngɛ nɔ́ he tomi nɔ́ nɛ ɔ mi ɔ tue. Mɛni he je? Ejakaa Yesu toɔ a ní peepee, a susumi kɛ a munyu tutui he hɛ. Enɛ ɔ he ɔ, e he hia nɛ mɛ hu a ye anɔkuale. Ngɛ anɔkuale mi ɔ, Yesu tu nɔ́ he tomi ní enyɔ komɛ hu he munyu. Jamɛ a nɔ́ he tomi ní ɔmɛ ji kɔkɔ bɔmi kɛ ha nihi nɛ a pɔ mɛ nu ɔ. Jehanɛ hu ɔ, wa maa na nɔ́ he tomi ní nɛ ɔmɛ ngɛ Mateo yi 25 ɔ. Amlɔ nɛ ɔ, nyɛ ha nɛ wa susu nɔ́ he tomi nɔ́ nɛ kɔɔ yihewi juɛmitsɛmɛ kɛ yihewi kuasiahi nɛ a li nyumu ɔ a he ɔ he.

YIHEWI JUƐMITSƐMƐ KƐ YIHEWI KUASIAHI NƐ A LI NYUMU Ɔ

6. Mɛni nɛ yihewi nɛ a li nyumu ɔ a kpɛti nihi enuɔ pee kɛ tsɔɔ kaa a ji juɛmitsɛmɛ? (Mateo 25:6-10)

⁶ Ngɛ nɔ́ he tomi nɔ́ nɛ kɔɔ yihewi nɛ a li nyumu ɔ he ɔ mi ɔ, Yesu tu yihewi nyɔngma nɛ a ho konɛ a kɛ ayɛflo huno ko nɛ ya kpe ɔ he munyu. (Mat. 25:1-4) Mɛ tsuo a suɔ nɛ a piɛɛ ayɛflo huno ɔ he kɛ ya yo kpeemi okplɔɔ ngmɛmi ɔ sisi. Yesu tsɔɔ kaa a kpɛti nihi enuɔ ji “juɛmitsɛmɛ” nɛ nihi enuɔ nɛ piɛ ɔ ji “kuasiahi.” Yihewi nɛ a ji juɛmitsɛmɛ ɔ dla a he kɛ to nɛ a pee klaalo, nɛ a suɔ kaa a mlɛ ayɛflo huno ɔ kɛ ya si be nɛ e maa ba, ke e maa ba nyɔ mi po. Enɛ ɔ he ɔ, a he nu kɛ wo a kane ɔmɛ a mi konɛ ke je jɔ ɔ, a kɛ hyɛ nɔ́. Jehanɛ hu ɔ, a hɛɛ nu kpahi kɛ piɛɛ he konɛ ke alini nɛ ayɛflo huno ɔ bɛ mla a, a kɛ wo kane ɔmɛ a mi. Enɛ ɔ tsɔɔ kaa a sume nɛ a kane ɔmɛ nɛ gbo. (Kane Mateo 25:6-10.) Benɛ Ayɛflo Huno ɔ ba su si ɔ, yihewi juɛmitsɛmɛ ɔmɛ kɛ lɛ ya yo kpeemi okplɔɔ ngmɛmi ɔ sisi. Jã nɔuu kɛ̃ nɛ e ji ngɛ Kristofohi nɛ a pɔ mɛ nu ɔ a blɔ fa mi. Ke a hɛ ngɛ a he nɔ be fɛɛ be, nɛ a ye anɔkuale kɛ ya si benɛ Kristo maa ba a, a nine maa su a hiɔwo ɔ nɔ, nɛ a maa piɛɛ Ayɛflo Huno nɛ ji  Yesu ɔ he kɛ ye Matsɛ ngɛ hiɔwe. b (Kpoj. 7:1-3) Nɛ yihewi kuasiahi nɛ a li nyumu ɔ hu nɛɛ?

7. Mɛni ba yihewi kuasia enuɔ ɔmɛ a nɔ, nɛ mɛni he je?

⁷ Benɛ ayɛflo huno ɔ ba su si ɔ, yihewi juɛmitsɛmɛ enuɔ ɔmɛ pee klaalo, se yihewi kuasiahi enuɔ ɔmɛ lɛɛ a pee we klaalo. A kane ɔmɛ bɔni gbomi nɛ a hɛɛ we nu nɛ a kɛ maa wo mi. Benɛ a ná le kaa e piɛ bɔɔ nɛ ayɛflo huno ɔ ma ba su ɔ, a ho konɛ a ya he nu nɛ́ a kɛ wo a kane ɔmɛ a mi. Lɔ ɔ he ɔ, benɛ ayɛflo huno ɔ ba su si ɔ, a be lejɛ ɔ. Jamɛ a be ɔ mi ɔ, “yihewi ɔmɛ nɛ a li nyumu ɔ, a kpɛti ni nɛmɛ nɛ a pee klaalo ɔ kɛ lɛ ho yo kpeemi okplɔɔ ngmɛmi ɔ ya, nɛ a nga sinya a.” (Mat. 25:10) Benɛ yihewi kuasia amɛ kpale kɛ ba nɛ a ngɛ hlae nɛ a sɛ mi ɔ, ayɛflo huno ɔ de mɛ ke: “I li nyɛ.” (Mat. 25:11, 12) Yihewi kuasia amɛ dla we a he kaa a maa mlɛ kɛ ya si be nɛ ayɛflo huno ɔ maa ba. Mɛni lɛ nihi nɛ a pɔ mɛ nu ɔ ma nyɛ maa kase ngɛ nɔ́ he tomi nɔ́ nɛ ɔ mi?

8-9. Mɛni nɛ nihi nɛ a pɔ mɛ nu ɔ ma nyɛ maa kase kɛ je nɔ́ he tomi nɔ́ nɛ kɔɔ yihewi nɛ a li nyumu ɔ he ɔ mi? (Hyɛ foni ɔ hulɔ.)

⁸ Mo dla o he kɛ to nɛ o hɛ nɛ hi o he nɔ. Pi nɛ Yesu ngɛ tsɔɔe kaa nihi nɛ a pɔ mɛ nu ɔ a kpɛti ni komɛ maa pee klaalo kɛ ya si be nɛ je nɛ ɔ maa ba nyagbe, nɛ a kpɛti ni komɛ lɛɛ a be jã pee. Mohu ɔ, nɔ́ nɛ e ngɛ tsɔɔe ji kaa ke nihi nɛ a pɔ mɛ nu ɔ dla we a he kɛ to konɛ a ye anɔkuale kɛ ya si nyagbe ɔ, nɔ́ nɛ maa ba a nɔ ji lɔ ɔ nɛ. Ke e ba jã a, a nine be a hiɔwo ɔ nɔ sue. (Yoh. 14:3, 4) Enɛ ɔ ji hɛdɔ sane! Ke wa ngɛ hɛnɔkami kaa wa maa ya hiɔwe jio, wa maa hi zugba a nɔ jio, e sa nɛ wɔ tsuo wa kai kaa nɔ́ he tomi nɔ́ nɛ kɔɔ yihewi nɛ a li nyumu ɔ he ɔ ji kɔkɔ bɔmi kɛ ha wɔ. E sa nɛ wa ti nɔ fɛɛ nɔ nɛ ya nɔ nɛ e hwɔɔ, nɛ e pee klaalo be fɛɛ be kaa e ma fĩ si kɛ ya si nyagbe.—Mat. 24:13.

⁹ Benɛ Yesu ngɔ nɔ́ he tomi nɔ́ nɛ kɔɔ yihewi nɛ a li nyumu ɔ he ɔ kɛ tsu ní kɛ tsɔɔ nɔ́ he je nɛ e he hia nɛ wa dla wa he kɛ to nɛ wa hɛ nɛ hi wa he nɔ ɔ se ɔ, e kpale ngɔ nɔ́ he tomi nɔ́ kpa ko nɛ kɔɔ talɛnt he ɔ kɛ tsu ní. Nɔ́ he  tomi nɔ́ nɛ ɔ ha nɛ wa na kaa e he hia nɛ waa kɛ hɛdɔ nɛ tsu ní.

TALƐNT Ɔ

10. Mɛni nɛ nyɔguɛ enyɔ ɔmɛ pee kɛ tsɔɔ kaa a yeɔ anɔkuale? (Mateo 25:19-23)

¹⁰ Ngɛ nɔ́ he tomi nɔ́ nɛ kɔɔ talɛnt ɔ he ɔ mi ɔ, Yesu tu nyɔguɛ enyɔ komɛ nɛ a ye a nyɔmtsɛ ɔ anɔkuale, kɛ nyɔguɛ ko nɛ e yi anɔkuale ɔ a he munyu. (Mat. 25:14-18) Nyɔguɛ enyɔ ɔmɛ nɛ a ye anɔkuale ɔ tsu ní wawɛɛ nɛ a ná sika babauu kɛ ha a nyɔmtsɛ ɔ. Loko a nyɔmtsɛ ɔ maa hia blɔ kɛ ho ma se ya a, e ngɔ talɛnt nɛ ji sika babauu kɛ ha mɛ. Nyɔguɛ enyɔ ɔmɛ nɛ a yeɔ anɔkuale ɔ ngɔ sika a kɛ tsu ní wawɛɛ. Mɛni je mi kɛ ba? Benɛ a nyɔmtsɛ ɔ kpale kɛ ba a, a ná sika nɛ e ha mɛ ɔ kɛ bɔ he si enyɔ. Enɛ ɔ he ɔ, a nyɔmtsɛ ɔ je a yi nɛ ‘a sɛ a nyɔmtsɛ ɔ bua jɔmi ɔ mi.’ (Kane Mateo 25:19-23.) Se nyɔguɛ etɛne ɔ hu nɛɛ? Mɛni e ngɔ sika nɛ e nyɔmtsɛ ɔ kɛ ha lɛ ɔ kɛ pee?

11. Mɛni ba nyɔguɛ “hejɔtsɛ” ɔ nɔ, nɛ mɛni he je?

¹¹ A ha nyɔguɛ etɛne ɔ talɛnt kake, se e pee ‘hejɔ.’ E nyɔmtsɛ ɔ hyɛ blɔ kaa e maa ngɔ talɛnt ɔ kɛ tsu ní ngɛ nile mi, se e pee we jã. Mohu ɔ, e ya tsua si nɛ e ngɔ talɛnt ɔ kɛ to. Benɛ e nyɔmtsɛ ɔ kpale kɛ ba a, jamɛ a nyɔguɛ ɔ ná we talɛnt kpa ko kɛ piɛɛ nɔ́ nɛ e nyɔmtsɛ ɔ ha lɛ ɔ he. Nyɔguɛ nɛ ɔ je we su kpakpa kpo. Jinɛ e sa nɛ e ko kpa e nyɔmtsɛ ɔ pɛɛ kaa e kɛ talɛnt ɔ tsu we ní, nɛ lɔ ɔ he ɔ, e ná we eko kɛ piɛɛ he. Se e pee we jã, mohu ɔ, e de e nyɔmtsɛ ɔ ke: “I le mo kaa o sane he wa.” Nyɔmtsɛ ɔ bua jɔɛ nɔ́ nɛ nyɔguɛ nɛ ɔ pee ɔ he. Enɛ ɔ he ɔ, e ngɔ talɛnt ɔ ngɛ e dɛ, nɛ e ha nɛ a fiee lɛ kɛ je e we ɔ mi.—Mat. 25:24, 26-30.

12. Mɛnɔmɛ nɛ nyɔguɛ enyɔ ɔmɛ nɛ a yeɔ anɔkuale ɔ daa si kɛ ha mwɔnɛ ɔ?

¹² Nyɔguɛ enyɔ ɔmɛ nɛ a ye anɔkuale ɔ daa si kɛ ha Kristofohi anɔkualetsɛmɛ nɛ a pɔ mɛ nu ɔ. Nyɔmtsɛ ɔ nɛ ji Yesu ɔ fɔ mɛ nine kaa a ba “sɛ [a] nyɔmtsɛ ɔ bua jɔmi ɔ mi.” A nine suɔ a hiɔwo ɔ nɔ ngɛ hiɔwe, nɛ lɔ ɔ ji kekleekle gbogboehi a si tlemi ɔ nɛ. (Mat. 25:21, 23; Kpoj. 20:5b) Jehanɛ hu ɔ, nɔ́ nɛ nyɔguɛ hejɔtsɛ ɔ pee ɔ ji kɔkɔ bɔmi kɛ ha nihi nɛ a pɔ mɛ nu ɔ. Ngɛ mɛni blɔ nɔ?

13-14. Mɛni nɛ nihi nɛ a pɔ mɛ nu ɔ ma nyɛ maa kase ngɛ nɔ́ he tomi nɔ́ nɛ kɔɔ talɛnt ɔ he ɔ mi? (Hyɛ foni ɔ hulɔ.)

 ¹³ O kɛ hɛdɔ nɛ tsu ní wawɛɛ. Ngɛ nɔ́ he tomi nɔ́ nɛ kɔɔ talɛnt ɔ kɛ yihewi nɛ a li nyumu ɔ he ɔ mi ɔ, pi nɛ Yesu ngɛ tsɔɔe kaa nihi nɛ a pɔ mɛ nu ɔ ma ba pee hejɔtsɛmɛ. Mohu ɔ, e ngɛ tsɔɔe kaa ke a ngmɛ blɔ nɛ kã nɛ a kɛ ngɛ ní tsue ɔ nya ba si ɔ, nɔ́ nɛ e maa ba a nɔ ji lɔ ɔ nɛ. Ke e ba jã a, a be nyɛe ma ná a ‘tsɛmi ɔ kɛ a hlami ɔ nɔ mi mami kɛ pi si,’ nɛ a be nyɛe maa sɛ hiɔwe Matsɛ Yemi ɔ mi hulɔ.—2 Pet. 1:10.

¹⁴ Yesu nɔ́ he tomi nɔ́ nɛ kɔɔ talɛnt ɔ kɛ yihewi nɛ a li nyumu ɔ he ɔ ha nɛ e pee heii kaa e sa nɛ Kristofohi tsuo nɛ a pɔ mɛ nu ɔ nɛ a dla a he, a hɛ nɛ hi a he nɔ, nɛ a kɛ hɛdɔ nɛ tsu ní wawɛɛ. Se anɛ Yesu de nɔ́ kpa ko kɛ bɔ nihi nɛ a pɔ mɛ nu ɔ kɔkɔ lo? Ee, e pee jã! Wa naa kɔkɔ bɔmi nɛ ɔ ngɛ nɔ́ nɛ Yesu de ngɛ Mateo 24:40, 41 ɔ mi.

MƐNƆ LƐ A MAA ‘NGƆ KƐ HO’?

15-16. Mɛni blɔ nɔ nɛ Mateo 24:40, 41 ɔ ha nɛ wa na kaa e sa nɛ nihi nɛ a pɔ mɛ nu ɔ nɛ a ya nɔ nɛ a hwɔɔ?

¹⁵ Loko Yesu maa tu nɔ́ he tomi ní etɛ nɛ ɔmɛ a he munyu ɔ, e tu nyagbe kojomi ko nɛ kɔɔ nihi nɛ a pɔ mɛ nu ɔ a he ɔ he munyu. Yesu tsɔɔ kaa kojomi nɛ ɔ lɛ maa tsɔɔ a ti ni nɛmɛ nɛ a kplɛɛ a nɔ. Yesu tu nyumu enyɔ komɛ nɛ a ngɛ ngmɔ mi kɛ yihi enyɔ nɛ a ngɛ nɔ́ wɛɛe ngɛ wɛ tɛ nɔ ɔ he munyu. Ngɛ si fɔfɔɛ enyɔ nɛ ɔmɛ tsuo a mi ɔ, e ngɛ kaa nɔ́ nɛ nyumu enyɔ ɔmɛ ngɛ ní tsumi kake tsue, nɛ jã nɔuu kɛ̃ nɛ e ji ngɛ yi ɔmɛ hu a blɔ fa mi. Se Yesu de ke “a maa ngɔ nɔ kake kɛ ho nɛ a ma kua nɔ kake.” (Kane Mateo 24:40, 41.) Lɔ ɔ se ɔ, e de e kaseli ɔmɛ ke: “Nyɛɛ ya nɔ nɛ nyɛɛ hwɔɔ, ejakaa nyɛ li ligbi nɔ nɛ nyɛ Nyɔmtsɛ ɔ ma.” (Mat. 24:42) Benɛ Yesu tu nɔ́ he tomi nɔ́ nɛ kɔɔ yihewi nɛ a li nyumu ɔ he munyu se ɔ, e de nɔ́ ko kaa jã nɔuu. (Mat. 25:13) Anɛ munyu nɛ ɔmɛ nɛ e tu ɔ kɛ a sibi ngɛ tsakpa lo? Nɔ́ ko kaa jã. Ngɛ anɔkuale mi ɔ, Kristofohi anɔkualetsɛmɛ nɛ a pɔ mɛ nu ɔ pɛ lɛ Yesu maa ngɔ ‘kɛ ho’ hiɔwe Matsɛ Yemi ɔ mi ya.—Yoh. 14:3.

¹⁶ Yaa nɔ nɛ o hwɔɔ. Ke nɔ ko nɛ a pɔ lɛ nu ɔ yɛ nɔ nɛ e hwɔɔ ɔ, a be lɛ ngɔe kɛ piɛɛ “nihi nɛ [a] hla amɛ” a he. (Mat. 24:31) Ngɛ anɔkuale mi ɔ, e sa nɛ nihi tsuo nɛ a ngɛ hɛnɔkami kaa a maa hi zugba a nɔ kɛ ya neneene ɔ hu nɛ a ya nɔ nɛ a hwɔɔ nɛ a ye anɔkuale.

17. Ke Yehowa mwɔ e yi mi kpɔ kaa e maa pɔ ni komɛ nu mwɔnɛ ɔ, mɛni he je nɛ e sɛ nɛ waa ye tsui ngɛ he ɔ?

¹⁷ Akɛnɛ wa ba le Yehowa saminya he je ɔ, wa le kaa e maa kojo ngɛ dami mi. Enɛ ɔ he ɔ, ke Yehowa mwɔ e yi mi kpɔ kaa e maa pɔ ni komɛ nu mwɔnɛ ɔ, e sɛ nɛ wa ha nɛ e gba wa nya kulaa. c E sa nɛ wa kai nɔ́ nɛ Yesu de ngɛ apaatsɛmɛ nɛ a ya tsu ní ngɛ wai ngmɔ ko mi ngɛ ngmlɛfia 11 ɔ mi ɔ he. (Mat. 20:1-16) Apaatsɛmɛ nɛ a kpɛ se kɛ ba tsu ní ngɛ wai ngmɔ ɔ mi, kɛ nihi nɛ a ba mla a tsuo ná hiɔwo kake. Jã nɔuu kɛ̃ nɛ e ji ngɛ nihi nɛ a pɔ mɛ nu ɔ hu a blɔ fa mi. Ke a pɔ mɛ nu kɛ jio, lingmi nɛ ɔ pɛ lɛ a pɔ mɛ nu jio, ke a ya nɔ nɛ a ye anɔkuale ɔ, mɛ tsuo a nine maa su a hiɔwo ɔ nɔ ngɛ hiɔwe.

MOO BU KƆKƆ BƆMI ƆMƐ TUE

18-19. Mɛni wa kase ngɛ nɔ́ he tomi níhi nɛ wa susu he ɔ mi?

¹⁸ Mɛni he wa susu ngɛ ní kasemi nɛ ɔ mi? Nɔ́ he tomi nɔ́ nɛ kɔɔ apletsi ɔmɛ kɛ jijɔ ɔmɛ a he ɔ ha nɛ wa na kaa e sa nɛ nihi nɛ a ngɛ hɛnɔkami kaa a maa hi zugba a nɔ kɛ ya neneene ɔ nɛ a ya nɔ nɛ a ye Yehowa anɔkuale amlɔ nɛ ɔ, nɛ a pee jã ngɛ amanehlu ngua a mi hulɔ. Ngɛ jamɛ a be ɔ mi ɔ, Yesu maa kojo nihi nɛ a maa ye anɔkuale ɔ kaa a sa kɛ ha “neneene wami.”—Mat. 25:46.

¹⁹ Jehanɛ hu ɔ, wa susu nɔ́ he tomi ní enyɔ komɛ nɛ a ji kɔkɔ bɔmi kɛ ha nihi nɛ a pɔ mɛ  nu ɔ he. Ngɛ nɔ́ he tomi nɔ́ nɛ Yesu kɛ tsu ní nɛ kɔɔ yihewi juɛmitsɛmɛ kɛ yihewi kuasiahi nɛ a li nyumu ɔ he ɔ mi ɔ, Yesu tsɔɔ kaa a kpɛti nihi enuɔ ngɔ a ní peepee kɛ tsɔɔ kaa a ji ní leli. A dla a he kɛ to nɛ a hɛ ngɛ a he nɔ, nɛ a pee klaalo kaa a maa mlɛ ayɛflo huno ɔ kɛ ya si be nɛ e maa ba. Se yihewi kuasia amɛ lɛɛ a dla we a he, enɛ ɔ he ɔ, ayɛflo huno ɔ kɛ mɛ yɛ yo kpeemi okplɔɔ ngmɛmi ɔ sisi. Ngɛ anɔkuale mi ɔ, e sa nɛ wɔ hu wa dla wa he kɛ to nɛ waa mlɛ kɛ ya si be nɛ Yesu ma kpata je yaya nɛ ɔ hɛ mi. Jehanɛ hu ɔ, ngɛ nɔ́ he tomi nɔ́ nɛ kɔɔ talɛnt ɔ he nɛ Yesu kɛ tsu ní ɔ mi ɔ, wa susu nyɔguɛ enyɔ nɛ a ji anɔkualetsɛmɛ nɛ a kɛ hɛdɔ tsu ní wawɛɛ ɔ he. A tsu ní wawɛɛ kɛ ha a nyɔmtsɛ ɔ, nɛ enɛ ɔ ha nɛ e bua jɔ a he. Se kɛ̃ ɔ, nyɔguɛ hejɔtsɛ ɔ lɛɛ e kua lɛ. Mɛni wa kaseɔ ngɛ mi? E sa nɛ waa kɛ hɛdɔ nɛ tsu ní wawɛɛ ngɛ Yehowa sɔmɔmi mi kɛ ya si nyagbe. Jehanɛ hu ɔ, wa susu bɔ nɛ nihi nɛ a pɔ mɛ nu ɔ ma plɛ kɛ ya nɔ nɛ a hwɔɔ konɛ Yesu nɛ ngɔ mɛ “kɛ ho” hiɔwe ya a he. A pee klaalo kɛ ngɛ be nɛ a ‘ma bua a nya kɛ ya Yesu ngɔ’ ngɛ hiɔwe ɔ blɔ hyɛe wawɛɛ. Ngɛ Harmagedon ta a se ɔ, a ma ba pee Yesu ayɛflo ngɛ Jijɔ Bi ɔ yo kpeemi ɔ mi.—2 Tɛs. 2:1; Kpoj. 19:9.

20. Mɛni nɛ Yehowa maa pee ha nihi nɛ a buɔ e kɔkɔ bɔmi ɔmɛ tue ɔ?

²⁰ Be nɛ Yesu kɛ maa kojo nihi ɔ ma kɛ fo, se kɛ̃ ɔ, e sɛ nɛ waa ye gbeye. Ke wa ya nɔ nɛ wa ye anɔkuale ɔ, wa hiɔwe Tsɛ nɛ ngɛ suɔmi ɔ ma ha wɔ “he wami nɛ pe adesahi a nɔ́ ɔ” konɛ wa ‘nyɛ nɛ waa da si ngɛ nɔmlɔ Bi ɔ hɛ mi.’ (2 Kor. 4:7; Luka 21:36) Ke wa ngɛ hɛnɔkami kaa wa maa hi zugba a nɔ jio, wa maa ya hiɔwe jio, ke wa bu kɔkɔ bɔmi nɛ ngɛ Yesu nɔ́ he tomi ní ɔmɛ a mi ɔ tue nɛ waa kɛ tsu ní ɔ, wa hiɔwe Tsɛ ɔ bua maa jɔ wa he wawɛɛ. Akɛnɛ Yehowa mi mi jɔ he je ɔ, a maa ngma wa biɛ “ngɛ wami womi ɔ mi.”—Dan. 12:1; Kpoj. 3:5.