NÍ KASEMI 39
LA 125 “Nihi Nɛ A Naa Nɔ Mɔbɔ ɔ Ngɛ Bua Jɔmi!”
Nɔ́ Hami Haa Nɔ Bua Jɔmi Wawɛɛ
“Bua jɔmi babauu ngɛ nɔ́ hami mi pe nɔ́ ngɔmi.”—NÍTS. 20:35.
OTI NƐ NGƐ NÍ KASEMI Ɔ MI
Wa maa hyɛ blɔ slɔɔtohi a nɔ nɛ wa maa gu kɛ ha nɔ nɔ́, kɛ nɔ́ he je nɛ lɔ ɔ haa nɛ wa bua jɔɔ.
1-2. Mɛni he je nɛ Yehowa bɔ wɔ konɛ wa bua nɛ jɔ ke wa ke nɔ ko nɔ́?
KE NƆ ko ke wɔ nɔ́ ɔ, wa bua jɔɔ, se ke wa ke nɔ ko nɔ́ ɔ, wa bua jɔɔ kulaa pe jã. Mɛni he je? Ejakaa jã nɛ Yehowa bɔ wɔ. (Níts. 20:35) Se anɛ enɛ ɔ tsɔɔ kaa ke nɔ ko ke wɔ nɔ́ ɔ, wa bua jɔɛ kulaa lo? Dɛbi. Wɔ tsuo wa bua jɔɔ ke a ke wɔ nɔ́ ko. Se wa bua jɔɔ pe jã ke wa ke nɔ ko nɔ́. E hi wawɛɛ kaa Yehowa bɔ wɔ jã. Mɛni he je?
2 Akɛnɛ Yehowa bɔ wɔ jã he je ɔ, wa ma nyɛ maa pee níhi nɛ ma ha wɔ bua jɔmi wawɛɛ. Ke wa hla blɔ kpahi nɛ wa ma nyɛ maa gu nɔ kɛ ke nɔ nɔ́ ɔ, wa bua maa jɔ wawɛɛ. Ke wa susu bɔ nɛ Yehowa bɔ wɔ ha a he ɔ, e ngɛ nyakpɛ wawɛɛ!—La 139:14.
3. Mɛni he je nɛ a tsɛɛ Yehowa ke “bua jɔmi Mawu” ɔ?
3 Akɛnɛ Baiblo ɔ tsɔɔ kaa nihi nɛ a haa nɔ nɔ́ ɔ ngɛ bua jɔmi he je ɔ, e be nyakpɛ kaa Baiblo ɔ tsɛ Yehowa ke “bua jɔmi Mawu.” (1 Tim. 1:11) Kɛ je blema tɔɔ ɔ, Yehowa ji nɔ nɛ haa nɔ nɔ́ pe kulaa. Bɔfo Paulo tsɔɔ kaa kɛ gu Yehowa nɔ ɔ, “wa ngɛ wami, nɛ wa yaa nɛ wa baa, nɛ wa ngɛ.” (Níts. 17:28) Ngɛ anɔkuale mi ɔ, “nike ní kpakpa fɛɛ nike ní kpakpa, kɛ nike ní nɛ hi kɛ pi si fɛɛ nike ní nɛ hi kɛ pi si ɔ” je Yehowa ngɔ.—Yak. 1:17.
4. Mɛni maa ye bua wɔ konɛ wa ná bua jɔmi wawɛɛ?
4 Wɔ tsuo wa suɔ nɛ waa ke nɔ nɔ́ konɛ wa ná bua jɔmi wawɛɛ. Wa ma nyɛ maa pee jã ke wa kase bɔ nɛ Yehowa haa nɔ nɔ́ faa ha a. (Efe. 5:1) Ngɛ ní kasemi nɛ ɔ mi ɔ, wa ma susu nɔ hyɛmi nɔ́ kpakpa nɛ Yehowa pee kɛ kɔ nɔ́ hami he ɔ he. Jehanɛ hu ɔ, wa maa hyɛ nɔ́ nɛ wa ma nyɛ maa pee ke wa susu kaa nihi je we hɛsa kpo ngɛ kpakpa nɛ wa pee mɛ ɔ he po. Enɛ ɔ maa ye bua wɔ konɛ waa ya nɔ nɛ waa pee nihi kpakpa nɛ wa ná bua jɔmi wawɛɛ.
MOO KASE YEHOWA MI MI JƆMI Ɔ
5. Mɛni ji ní komɛ nɛ Yehowa haa wɔ?
5 Ngɛ mɛni blɔhi a nɔ nɛ Yehowa jeɔ mi mi jɔmi kpo? Mo susu nɔ hyɛmi ní komɛ a he nɛ o hyɛ. Yehowa haa wɔ wa he lo nya hiami níhi. Eko ɔ, wa be he lo nya níhi fuu, se Yehowa yeɔ buaa wɔ nɛ wa nine suɔ wa hiami níhi a nɔ be fɛɛ be. Kaa nɔ hyɛmi nɔ́ ɔ, e yeɔ buaa wɔ nɛ wa náa niye ní, heha nɔ́ kɛ hwɔ he. (La 4:8; Mat. 6:31-33; 1 Tim. 6:6-8) Anɛ Yehowa haa wɔ wa hiami níhi akɛnɛ e sa kaa e pee jã kɛkɛ he je lo? Pi jã kulaa! Ke jã a, lɛɛ mɛni he je nɛ Yehowa haa wɔ wa hiami níhi ɔ?
6. Mɛni wa kaseɔ ngɛ Mateo 6:25, 26 mi?
6 Yehowa haa wɔ wa hiami níhi ejakaa e suɔ wɔ. Mo susu Yesu munyu nɛ ngɛ Mateo 6:25, 26 he nɛ o hyɛ. (Kane.) Yesu ngɔ adebɔ níhi kɛ pee nɔ hyɛmi níhi. E de ngɛ lohwe pɛlitsɛmɛ a he ke: “A du we ní, nɛ a kpa we ní, nɛ a bua we níhi a nya kɛ wui nito hehi.” Se mo kadi nɔ́ nɛ Yesu de kɛ tsa nɔ ɔ. E de ke: “Nyɛ Tsɛ nɛ e ngɛ hiɔwe ɔ haa mɛ niye ní.” Kɛkɛ nɛ Yesu bi ke: “Anɛ nyɛ he jua wɛ hluu pi mɛ lo?” Mɛni wa kaseɔ ngɛ mi? Yehowa sɔmɔli anɔkualetsɛmɛ a he jua wa kɛ ha lɛ kulaa pe lohwehi. Ke Yehowa hyɛɛ lohwehi a nɔ ɔ, lɛɛ wa ma nyɛ ma ná nɔ mi mami kaa e maa hyɛ wa nɔ kokooko! Kaa bɔ nɛ tsɛ nɛ e susuɔ e weku mi bimɛ ɔmɛ a he ɔ peeɔ ɔ, Yehowa hu jeɔ suɔmi mi nɛ e haa e sɔmɔli a hiami níhi.—La 145:16; Mat. 6:32.
7. Mɛni ji blɔ kake nɔ nɛ wa ma nyɛ maa gu kɛ kase Yehowa mi mi jɔmi ɔ? (Hyɛ foni ɔ hulɔ.)
7 Wɔ hu wa ma nyɛ maa kase Yehowa konɛ waa je suɔmi mi kɛ ha nihi a hiami níhi. Kaa nɔ hyɛmi nɔ́ ɔ, anɛ o le nyɛmi ko nɛ e hia niye ní loo tade lo? Yehowa kɛ mo ma nyɛ ma tsu ní kɛ ye bua nɔ ko kaa jã. A le Yehowa we bi kaa ke oslaa ko ba a, a jeɔ mi mi jɔmi kpo wawɛɛ. Kaa nɔ hyɛmi nɔ́ ɔ, benɛ COVID-19 hiɔ ɔ ba a, nyɛmimɛ ngɔ niye ní, tadehi kɛ ní kpahi nɛ a ngɛ ɔ kɛ ye bua ni kpahi. Nyɛmimɛ fuu hu je a tsui mi nɛ a ngɔ sika kɛ fĩ je kɛ wɛ ní tsumi ɔ se. A ngɔ sika nɛ ɔ kɛ ye bua nyɛmimɛ nɛ oslaa ba a nɔ ngɛ je kɛ wɛ ɔ. A ngɔ ngmami nɛ ngɛ Hebri Bi 13:16 kɛ tsu ní. Lejɛ ɔ de ke: “Nyɛ hɛ nɛ ko je kpakpa peemi kɛ níhi nɛ nyɛ ngɛ nɛ nyɛɛ kɛ ni kpahi maa dla a nɔ, ejakaa jamɛ a afɔle sami ɔmɛ saa Mawu hɛ mi saminya.”
Wɔ tsuo wa ma nyɛ maa kase bɔ nɛ Yehowa haa nɔ nɔ́ faa a (Hyɛ kuku 7)
8. Mɛni blɔhi a nɔ nɛ Yehowa ngɔɔ e he wami ɔ kɛ yeɔ buaa wɔ? (Filipi Bi 2:13)
8 Yehowa lɛ haa nɔ he wami. Huzu be Yehowa he wami ɔ he, nɛ e suɔ kaa e kɛ maa ye bua e sɔmɔli anɔkualetsɛmɛ ɔmɛ. (Kane Filipi Bi 2:13.) Anɛ o sɔle kɛ ha Yehowa hyɛ konɛ e wo mo he wami nɛ o nyɛ nɛ o da ka ko nya lo? Aloo o sɔle ha Yehowa hyɛ konɛ e wo mo he wami nɛ o fĩ si ngɛ haomi ko mi lo? Jehanɛ hu ɔ, eko ɔ, o sɔle ha Yehowa hyɛ nɛ o bi lɛ kaa e ha mo he wami konɛ o nyɛ nɛ o pee níhi nɛ e sa nɛ o pee ngɛ ligbi ɔ mi ɔ. Eko ɔ, benɛ Yehowa ha o sɔlemi nɛ ɔmɛ a heto ɔ, lɔ ɔ ha nɛ o kɛ bɔfo Paulo kpa gbi ngɛ nɔ́ nɛ e de ɔ he. E de ke: “I nyɛɔ peeɔ níhi tsuo kɛ gu nɔ nɛ e woɔ mi he wami ɔ nɔ.”—Filip. 4:13.
9. Mɛni blɔ nɔ wa maa gu kɛ kase bɔ nɛ Yehowa jeɔ mi mi jɔmi mi nɛ e kɛ e he wami ɔ tsuɔ ní ɔ? (Hyɛ foni ɔ hulɔ.)
9 E ngɛ mi kaa wa yi mluku mohu lɛɛ, se wa ma nyɛ maa kase bɔ nɛ Yehowa jeɔ mi mi jɔmi mi nɛ e kɛ e he wami tsuɔ ní ɔ. Wa be nyɛe ma ha nɔ ko he wami nɛ e kɛ pee nɔ́ ko kaa bɔ nɛ Yehowa peeɔ ɔ, se wa ma nyɛ maa ngɔ he wami nɛ wa ngɛ ɔ kɛ ye bua ni kpahi. Kaa nɔ hyɛmi nɔ́ ɔ, wa ma nyɛ maa ye bua nyɛmimɛ nɛ a wa ngɛ jeha mi loo a be he wami ɔ kɛ tsu a we mi ní tsumi komɛ aloo wa ya ye jua ba ha mɛ. Ke o si fɔfɔɛ maa ngmɛ mo blɔ ɔ, o ma nyɛ maa ye bua kɛ dla Matsɛ Yemi Asa a nɔ. Ke wa ngɔ wa he wami kɛ tsu ní ngɛ blɔ nɛ ɔmɛ a nɔ ɔ, e haa nɛ ni kpahi nɛ a ngɛ Yehowa sɔmɔe ɔ náa he se.
Wa ma nyɛ maa ngɔ he wami nɛ wa ngɛ ɔ kɛ ye bua ni kpahi (Hyɛ kuku 9)
10. Kɛ waa kɛ wa munyu tutui ma nyɛ maa wo ni kpahi he wami ha kɛɛ?
10 Mo kai hu kaa o ma nyɛ maa ngɔ o munyu tutui kɛ wo nihi he wami. Anɛ o le nɔ ko nɛ ke o je e yi ɔ, lɔ ɔ maa wo lɛ he wami lo? Anɛ o le nɔ ko nɛ e hia bua womi lo? Ke jã a, ha nɛ jamɛatsɛ ɔ nɛ le kaa o susuɔ e he. O ma nyɛ ma ya slaa lɛ, o tsɛ lɛ ngɛ tɛlifoo nɔ, loo o mane lɛ sɛ gbi. Koo ye tsui ngɛ nɔ́ nɛ o ma de ɔ he. Munyu bɔɔ nɛ o maa tu kɛ je o tsui mi ɔ ma nyɛ maa pee nɔ́ tutuutu nɛ maa ye bua o nyɛmi ɔ konɛ e ya nɔ nɛ e ye anɔkuale loo e nyɛ nɛ e da si fɔfɔɛ ɔ nya.—Abɛ 12:25; Efe. 4:29.
11. Mɛni blɔ nɔ Yehowa guɔ kɛ haa wɔ e juɛmi ɔ eko?
11 Yehowa haa wɔ juɛmi. Kaselɔ Yakobo ngma ke: “Ke nyɛ ti nɔ ko hia juɛmi ɔ, ha nɛ e ya nɔ nɛ e hi Mawu bie, ejakaa e haa nihi tsuo nɔ́ faa nɛ e hla we tɔmi ngɛ nɔ he.” (Yak. 1:5; sisi ningma.) Enɛ ɔ tsɔɔ kaa Yehowa suɔ nɛ wa ná e nile ɔ eko. E jeɔ e tsui mi faa nɛ e haa nihi e nile ɔ eko. Jehanɛ hu ɔ, mo kadi kaa ke Yehowa ha wɔ juɛmi nɛ je e ngɔ ɔ eko ɔ, e ‘kã we wa hɛ mi,’ aloo e ‘hla we tɔmi ngɛ wa he.’ Ke wa bi Yehowa blɔ tsɔɔmi ko ɔ, e sume nɛ waa hao. Ngɛ anɔkuale mi ɔ, e suɔ kaa wa bi lɛ yemi kɛ buami.—Abɛ 2:1-6.
12. Mɛni wa ma nyɛ maa pee konɛ ni kpahi nɛ a ná nile nɛ wa ngɛ ɔ he se?
12 Mɛni blɔ nɔ wa maa gu kɛ kase Yehowa konɛ wa ha nɛ nihi nɛ a ná nile nɛ wa ngɛ ɔ he se? (La 32:8) Yehowa we bi guɔ blɔhi fuu a nɔ kɛ haa nɛ nihi náa níhi nɛ a kaseɔ ɔ he se. Kaa nɔ hyɛmi nɔ́ ɔ, a tsɔseɔ ni hehi ngɛ fiɛɛmi mi. Asafo mi nikɔtɔmahi toɔ a tsui si kɛ yeɔ buaa asafo mi sɔmɔli kɛ nyɛmimɛ nyumuhi kpahi nɛ a baptisi mɛ ɔ konɛ a nyɛ nɛ a tsu ní tsumi slɔɔtohi nɛ a kɛ woɔ a dɛ ngɛ asafo ɔ mi ɔ. Jehanɛ hu ɔ, nyɛmimɛ nɛ a he be ngɛ asafo ɔ tsuhi a mami kɛ a dlami mi ɔ yeɔ buaa kɛ tsɔseɔ ni hehi konɛ a nyɛ nɛ a tsu ní tsumihi kaa jã.
13. Ke wa ngɛ nihi tsɔsee ɔ, mɛni blɔ nɔ wa maa gu kɛ kase Yehowa?
13 Moo bɔ mɔde kaa o maa kase Yehowa ke o ngɛ nihi tsɔsee. Mo kai kaa Yehowa jeɔ mi mi jɔmi mi nɛ e haa wɔ e juɛmi ɔ eko. Enɛ ɔ he ɔ, e sa nɛ wɔ hu waa je wa tsui mi nɛ wa ha nɛ nihi nɛ wa ngɛ mɛ tsɔsee ɔ nɛ a ná nile kɛ níhi a si kpami nɛ wa ngɛ ɔ he se. E sɛ nɛ waa ye tsui kaa ke wa tsɔse nɔ ko saminya a, e ma nyɛ ma ba da wa nane mi, lɔ ɔ he ɔ, wa be wa tsui mi jee kɛ tsɔse lɛ. Loo wa susu kaa akɛnɛ nɔ ko tsɔse we wɔ he je ɔ, wɔ hu wa be nɔ ko tsɔsee. E sɛ nɛ Yehowa sɔmɔlɔ ko nɛ ná susumi nɛ ɔ kɔkɔɔkɔ. Mohu ɔ, e sa nɛ waa je wa tsui mi nɛ waa tsɔɔ mɛ nɔ́ fɛɛ nɔ́ nɛ wa le, nɛ waa pee jã kɛ wa nyɛmi tsuo. (1 Tɛs. 2:8) Wa ngɛ nɔ mi mami kaa “mɛ hu a he maa su bɔ nɛ sa, nɛ a maa tsɔɔ ni kpahi.” (2 Tim. 2:1, 2) Ke wɔ tsuo wa je mi mi jɔmi mi nɛ wa ha nɛ nihi ná nile nɛ wa ngɛ ɔ he se ɔ, waa kɛ mɛ tsuo wa bua maa jɔ be fɛɛ be.
KE NIHI JE WE HƐSA KPO
14. Ke wa je mi mi jɔmi kpo kɛ tsɔɔ nihi ɔ, kɛ a ti nihi fuu peeɔ a ní ha kɛɛ?
14 Behi fuu ɔ, ke wa je mi mi jɔmi kpo kɛ tsɔɔ nihi, titli wa nyɛmimɛ ɔmɛ ɔ, a bua jɔɔ nɛ a naa wɔ si. Eko ɔ, a maa ngma sɛ gbi kɛ mane wɔ, aloo a maa gu blɔ kpa ko nɔ kɛ na wɔ si. (Kol. 3:15) Ke a na wɔ si ɔ, wa bua jɔɔ wawɛɛ ejakaa wa nuɔ he kaa wɔ hu wa pee nɔ́ ko kɛ ha wa nyɛmimɛ ɔmɛ.
15. Mɛni e sa nɛ wa kai ke wa je mi mi jɔmi kpo kɛ tsɔɔ nihi nɛ a je we hɛsa kpo?
15 Se pi be fɛɛ be nɛ ke wa ke nihi ní ɔ, a naa wɔ si. Be komɛ ɔ, wa ngɔɔ wa be, wa he wami kɛ níhi nɛ wa ngɛ ɔ kɛ yeɔ buaa nihi, se a ti ni komɛ pee we nɔ́ ko kɛ tsɔɔ kaa a bua jɔ nɔ́ nɛ wa pee ha mɛ ɔ he. Ke e ba jã a, mɛni wa ma nyɛ maa pee konɛ wa mi mi nɛ ko fu? Mo kai munyu nɛ ngɛ Ní Tsumi 20:35 ɔ, nɛ ji ngmami nɛ a ngɔ wa ní kasemi ɔ kɛ da nɔ ɔ. Ngɛ anɔkuale mi ɔ, pi bɔ nɛ nihi peeɔ a ní ha ke wa ke mɛ ní ɔ nɛ haa nɛ wa náa bua jɔmi. Ke wa ke nihi ní nɛ a je we hɛsa kpo po ɔ, wa ma nyɛ maa ma wa juɛmi nya si kaa wa maa ya nɔ maa je wa tsui mi kɛ ke mɛ ní. Mɛni maa ye bua wɔ konɛ wa nyɛ nɛ waa pee jã? Nyɛ ha nɛ waa hyɛ.
16. Mɛni maa ye bua wɔ konɛ waa ya nɔ nɛ waa kɛ bua jɔmi nɛ ke nihi ní?
16 Moo kase bɔ nɛ Yehowa keɔ nɔ nɔ́ ha a. Yehowa yaa nɔ nɛ e haa nihi ní kpakpahi ke a je we hɛsa kpo po. (Mat. 5:43-48) Yehowa wo si kaa ke wa ke nihi ní, nɛ wa ‘hyɛ we blɔ kaa a ba ha wɔ nɔ́ ko ɔ, wa hiɔwo maa kle.’ (Luka 6:35) Enɛ ɔ he ɔ, ke o ke nihi ní nɛ a je we hɛsa kpo ɔ, o kɔni mi nɛ ko jɔ̃. Mo kai kaa Yehowa maa jɔɔ mo akɛnɛ o “haa nɔ́ kɛ bua jɔmi” nɛ o peeɔ nihi kpakpa a he je.—Abɛ 19:17; 2 Kor. 9:7.
17. Mɛni yi mi tomi titli he je nɛ wa suɔ nɛ waa ke nihi ní ɔ? (Luka 14:12-14)
17 Ke wa ngɛ nihi ní kee ɔ, Yesu ga womi nɛ ngɛ Luka 14:12-14 ɔ hu maa ye bua wɔ nɛ waa kase Yehowa. (Kane.) Ngɛ anɔkuale mi ɔ, tɔmi ko be he kaa wa maa pee nihi nibwɔ loo wa ma je mi mi jɔmi kpo kɛ tsɔɔ nihi nɛ́ mɛ hu a ma nyɛ maa pee jã kɛ ha wɔ. Se ke wa yɔse kaa be fɛɛ be ɔ, wa suɔ nɛ waa ke nihi ní bɔ nɛ pee nɛ mɛ hu a ke wɔ nɔ́ ko ɔ hu nɛɛ? Ke e ba jã a, e sa nɛ waa kɛ Yesu ga womi ɔ nɛ tsu ní. Wa ma nyɛ maa pee nihi nɛ a be nɔ́ ko nɛ a kɛ maa to wɔ nane mi ɔ nibwɔ. Ke wa pee jã a, lɔ ɔ tsɔɔ kaa wa ngɛ Yehowa kasee nɛ wa bua maa jɔ. Jehanɛ se hu ɔ, e maa ye bua wɔ nɛ ke wa ke nihi ní nɛ a je we hɛsa kpo po ɔ, wa maa ya nɔ ma ná bua jɔmi.
18. Mɛni susumi nɛ e sɛ nɛ wa ná ngɛ wa nyɛmimɛ ɔmɛ a he, nɛ mɛni he je?
18 Ko susu kaa nihi li sina. (1 Kor. 13:7) Ke wa ke nihi ní nɛ a nɛ wɔ si ɔ, wa ma nyɛ ma bi wa he ke: ‘Anɛ a li sina niinɛ lo, aloo a hɛ lɛ je nɔ kaa a maa na wɔ si?’ Eko ɔ, yi mi tomi kpa komɛ a he je nɛ a nɛ wɔ si kaa bɔ nɛ wa ngɛ blɔ hyɛe ɔ nɛ. Eko ɔ, ni komɛ suɔ kaa a maa na wɔ si, se e yeɔ ha mɛ kaa a maa pee jã. Aloo eko ɔ, e maa pee mɛ zo kaa wa ke mɛ ní, ejakaa be ko nɛ be ɔ, mɛ hu a nyɛɔ keɔ nihi ní. Bɔ fɛɛ bɔ nɛ ji ɔ, ke wa suɔ wa nyɛmimɛ ɔmɛ niinɛ ɔ, wa be susumi nɛ dɛ náe ngɛ a he ke wa ke mɛ ní nɛ a nɛ wɔ si. Mohu ɔ, wa maa ya nɔ maa ke mɛ ní kɛ bua jɔmi.—Efe. 4:2.
19-20. Mɛni he je nɛ e he hia nɛ waa to wa tsui si ke wa ke nihi ní ɔ? (Hyɛ foni ɔ hulɔ.)
19 Moo to o tsui si. Matsɛ Salomo ngma ke: “Mo sake o abolo ɔ kɛ fɔ nyu hɛ, ejakaa ligbihi babauu se ɔ, o maa na ekohu.” (Fiɛɛ. 11:1) Munyu nɛ ɔ ha nɛ wa na kaa ke wa ke nihi ní ɔ, eko ɔ, “ligbihi babauu” maa be loko a kpɛti ni komɛ ma ba na wɔ si ngɛ he. Nɔ́ nɛ ɔ ba mi ngɛ nyɛmiyo ko blɔ fa mi.
20 Jeha komɛ nɛ be ɔ, kpɔmi nɔ hyɛlɔ ko yo ngma sɛ womi nɛ woɔ nɔ he wami kɛ ha nyɛmiyo ko nɛ a baptisi lɛ kɛ we ɔ. Ngɛ sɛ womi ɔ mi ɔ, e de lɛ kaa e he hia wawɛɛ nɛ e ya nɔ nɛ e ye anɔkuale. Jeha kpaanyɔ se ɔ, nyɛmiyo ɔ ha sɛ womi nɛ kpɔ mi nɔ hyɛlɔ yo ɔ ngma lɛ ɔ heto. Nyɛmiyo ɔ de ke: “I nu he kaa e sa nɛ ma ngma mo sɛ womi nɛ ɔ konɛ ma de mo bɔ nɛ sɛ womi nɛ o ngma mi ɔ ye bua mi ha. Eko ɔ, mo po o li. Sɛ womi nɛ o ngma mi ɔ wo mi he wami, nɛ ngmami nɛ o kɛ tsu ní ɔ ta ye tsui he wawɛɛ nɛ ye hɛ be nɔ jee gblegbleegble.” a Nyɛmiyo ɔ tsɔɔ nyagba komɛ nɛ e kɛ kpe. E de ke: “Be komɛ ɔ, i nuɔ he kaa ma je asafo ɔ mi. Se i kaiɔ ngmami nɛ ngɛ sɛ womi ɔ mi ɔ be fɛɛ be, nɛ lɔ ɔ ye bua mi nɛ i ya nɔ nɛ i ngɛ . . . Yehowa anɔkuale yee.” E de hu ke: “Ngɛ jeha kpaanyɔ nɛ be ɔ mi ɔ, nɔ́ ko nɔ́ ko wui mi he wami wawɛɛ kaa ngmami nɛ ngɛ jamɛ a sɛ womi ɔ mi ɔ.” Hyɛ bɔ nɛ kpɔ mi nɔ hyɛlɔ ɔ yo ɔ bua maa jɔ ha kaa “ligbihi babauu se” ɔ, e nine su sɛ womi nɛ ɔ nɔ kɛ je nyɛmiyo nɛ ɔ ngɔ! Eko ɔ, wɔ hu be ma pue mi loko nɔ ko ma je hɛsa kpo ngɛ kpakpa ko nɛ wa pee lɛ ɔ he.
Eko ɔ, wa maa pee nɔ ko kpakpa, se jeha babauu maa be loko e ma ba na wɔ si (Hyɛ kuku 20) b
21. Mɛni he je nɛ o fia o pɛɛ si kaa o maa ya nɔ maa kase bɔ nɛ Yehowa haa nɔ nɔ́ faa a?
21 Kaa bɔ nɛ wa de kɛ sɛ hlami ɔ, Yehowa dloo wɔ nyɛmi ko nɛ se be. E ngɛ mi kaa wa bua jɔɔ ke nihi ke wɔ ní mohu lɛɛ, se wa náa bua jɔmi wawɛɛ ke wa ke ni kpahi ní. Ke wa ye bua wa nyɛmimɛ ɔmɛ ɔ, e haa nɛ wa tsui nɔɔ wa mi, nɛ wa bua jɔɔ ke a je hɛsa kpo. Ke wa ke nihi ní ɔ, a na wɔ si jio, a nɛ wɔ si jio, e sa nɛ wa bua nɛ jɔ kaa wa pee nɔ́ nɛ da. Mo kai kaa nɔ́ fɛɛ nɔ́ nɛ o kɛ ma ha a, “Yehowa ma nyɛ ma ha mo nɔ́ nɛ pe jã.” (2 Kron. 25:9) Bɔ fɛɛ bɔ nɛ ji ɔ, nɔ́ nɛ Yehowa ma ha wɔ ɔ, maa hiɛ kulaa pe nɔ́ nɛ waa kɛ maa ke ɔ! Jɔɔmi ko be nɛ wa ma ná nɛ e maa pe nɔ́ nɛ Yehowa ma ha wɔ ɔ. Enɛ ɔ he ɔ, nyɛ ha nɛ waa fia wa pɛɛ si kaa wa maa ya nɔ maa kase wa hiɔwe Tsɛ nɛ e haa nɔ nɔ́ faa a.
LA 17 “I Suɔ”
a Ngmami nɛ kpɔ mi nɔ hyɛlɔ yo ɔ kɛ wo nyɛmiyo ɔ he wami ji 2 Yohane 8. Lejɛ ɔ de ke: “Nyɛɛ hyɛ nyɛ nitsɛmɛ nyɛ he nɔ saminya, konɛ nɔ́ nɛ wa gbo dengme kɛ ná a nɛ ko bɔ nyɛ, mohu ɔ, nyɛ nine nɛ su hiɔwo ɔ tsuo nɔ.”
b FONI Ɔ MI TSƆƆMI: Foni nɛ ɔmɛ tsɔɔ nɔ́ nɛ kpɔ mi nɔ hyɛlɔ ko yo pee nɛ a tu he munyu ngɛ kuku 20 ɔ mi ɔ. E ngma sɛ womi kɛ wo nyɛmiyo ko he wami, nɛ jeha komɛ a se ɔ, nyɛmiyo ɔ ngma kpɔ mi nɔ hyɛlɔ ɔ yo ɔ sɛ womi kɛ na lɛ si.
