NÍ KASEMI 36
LA 89 Bu Tue, Ye Nɔ, Konɛ A Jɔɔ Mo
“Nyɛ Ba Pee Munyu ɔ Nɔ Yeli”
“Nyɛ ba pee munyu ɔ nɔ yeli, se pi e nuli pɛ kɛkɛ.”—YAK. 1:22.
OTI NƐ NGƐ NÍ KASEMI Ɔ MI
Ní kasemi nɛ ɔ maa wo wɔ he wami konɛ wa bua nɛ jɔ kaa wa maa kane Mawu Munyu ɔ daa ligbi, konɛ wa susu he nɛ wa kɛ tsu ní kɛ pi si.
1-2. Mɛni he je nɛ Yehowa sɔmɔli ngɛ bua jɔmi ɔ? (Yakobo 1:22-25)
YEHOWA kɛ e Bi nɛ e suɔ lɛ ɔ suɔ kaa wa bua nɛ jɔ. Nɔ nɛ ngma La 119:2 ɔ de ke: “Nihi nɛ a yeɔ e kaimi ɔmɛ a nɔ, nɛ́ a hlaa e se blɔ kɛ a tsui tsuo ɔ ngɛ bua jɔmi.” Yesu hu de ke: “Nihi nɛ a nuɔ Mawu munyu ɔ nɛ a yeɔ nɔ ɔ, mɛ lɛ a ngɛ bua jɔmi” ɔ nɛ.—Luka 11:28.
2 Yehowa sɔmɔli tsuo ngɛ bua jɔmi. Mɛni he je? Wa ngɛ yi mi tomihi fuu a he je nɛ wa ngɛ bua jɔmi. Se nɔ́ titli nɛ haa wɔ bua jɔmi ji kaa wa kaneɔ Mawu Munyu ɔ be fɛɛ be, nɛ wa bɔɔ mɔde kaa waa kɛ nɔ́ nɛ wa kase ɔ ma tsu ní.—Kane Yakobo 1:22-25.
3. Ke waa kɛ nɔ́ nɛ wa kaneɔ ngɛ Mawu Munyu ɔ mi ɔ tsuɔ ní ɔ, kɛ wa náa he se ha kɛɛ?
3 Ke wa “ba pee munyu ɔ nɔ yeli” ɔ, wa ma ná he se ngɛ blɔhi fuu a nɔ. Ngɛ anɔkuale mi ɔ, wa le kaa ke wa pee jã a, wa maa sa Yehowa hɛ mi, nɛ wa bua maa jɔ wawɛɛ. (Fiɛɛ. 12:13) Ke wa ya nɔ nɛ waa kɛ nɔ́ nɛ wa kase ngɛ Mawu Munyu ɔ mi ɔ tsu ní ɔ, lɔ ɔ ma ha nɛ huɛ bɔmi kpakpa maa hi waa kɛ wa wekuli kɛ nihi nɛ a ngɛ asafo ɔ mi ɔ wa kpɛti. Eko ɔ, enɛ ɔ ba mi ngɛ o blɔ fa mi. Jehanɛ hu ɔ, ke waa kɛ nɔ́ nɛ wa kaseɔ ɔ tsuɔ ní ɔ, e yeɔ buaa wɔ nɛ wa yuɔ wa he ngɛ nyagbahi nɛ nihi nɛ a bui Mawu tue ɔ kɛ kpeɔ ɔ a he. Niinɛ, nɔ́ nɛ Matsɛ David de ɔ ji anɔkuale. Benɛ David tu Yehowa Mlaa amɛ, e fami ɔmɛ, kɛ e kojomi ɔmɛ a he munyu ngɛ e la ko mi se ɔ, e de ke: “Nɔ nɛ e kɛ tsuɔ ní ɔ náa he se babauu.”—La 19:7-11.
4. Mɛni he je nɛ e he ma nyɛ maa wa ha wɔ kaa waa kɛ níhi nɛ wa kaneɔ ngɛ Mawu Munyu ɔ mi ɔ ma tsu ní ɔ?
4 Ngɛ anɔkuale mi ɔ, pi be fɛɛ be nɛ e ngɛ gbɔjɔɔ kaa waa kɛ níhi nɛ wa kaneɔ ngɛ Mawu Munyu ɔ mi ɔ ma tsu ní. E ngɛ mi kaa wa be deka mohu lɛɛ, se e sa nɛ wa he be kɛ kane Mawu Munyu ɔ bɔ nɛ pee nɛ waa le nɔ́ nɛ Yehowa ngɛ hlae nɛ waa pee. Enɛ ɔ he ɔ, nyɛ ha nɛ wa susu ní komɛ nɛ maa ye bua wɔ konɛ wa nyɛ nɛ waa kane Mawu Munyu ɔ be fɛɛ be ɔ he. Jehanɛ hu ɔ, wa maa hyɛ ní komɛ nɛ maa ye bua wɔ konɛ wa nyɛ nɛ wa susu níhi nɛ wa kaneɔ ɔ he saminya kɛ bɔ nɛ waa kɛ ma tsu ní ngɛ wa si himi mi ha.
MOO TO BE KƐ KANE MAWU MUNYU Ɔ
5. Mɛni ji ní komɛ nɛ a ngɔɔ wa be wawɛɛ?
5 Mwɔnɛ ɔ, Yehowa sɔmɔli babauu be deka kulaa. A ngɔɔ be babauu kɛ tsuɔ ní komɛ nɛ a he hia a he ní. Kaa nɔ hyɛmi nɔ́ ɔ, wa kpɛti nihi fuu tsuɔ ní konɛ wa nyɛ nɛ waa hyɛ wɔ nitsɛmɛ wa he kɛ wa weku ɔ nɔ. (1 Tim. 5:8) Wa kpɛti nihi fuu hyɛɔ wa wekuli nɛ a be he wami loo a wa ngɛ jeha mi ɔ a nɔ. Jehanɛ hu ɔ, e sa nɛ waa hyɛ wɔ nitsɛmɛ wa nɔmlɔ tso mi he wami nami nɔ saminya, nɛ enɛ ɔ heɔ be wawɛɛ. Wa ngɛ blɔ nya ní tsumi kpahi hu nɛ a he hia nɛ e sa nɛ wa tsu a he ní ngɛ asafo ɔ mi. Nɔ́ kpa ko hu nɛ e sa nɛ waa pee ji kaa wa maa fiɛɛ sane kpakpa a kɛ kã. Akɛnɛ e he hia nɛ o tsu ní nɛ ɔmɛ tsuo a he ní he je ɔ, mɛni maa ye bua mo konɛ o ná be kɛ kane Mawu Munyu ɔ daa ligbi, nɛ o pue o yi mi tɛ ngɛ nɔ́ nɛ o kaneɔ ɔ he nɛ o kɛ tsu ní?
6. Mɛni ma nyɛ maa ye bua mo konɛ o nyɛ nɛ o kane Baiblo ɔ be fɛɛ be? (Hyɛ foni ɔ hulɔ.)
6 Baiblo kanemi piɛɛ “níhi nɛ a he hia wawɛɛ” kɛ ha Kristofohi ɔ a he. Enɛ ɔ he ɔ, e sa nɛ waa kane. (Filip. 1:10) La womi ɔ sisije ɔ tsɔɔ kaa nɔ nɛ e ngɛ bua jɔmi ɔ “bua jɔɔ Yehowa mlaa a he, nɛ e kaneɔ Mawu mlaa a, nɛ e pueɔ e yi mi tɛ ngɛ he nyɔ kɛ pia.” (La 1:1, 2) Ngɛ anɔkuale mi ɔ, enɛ ɔ tsɔɔ kaa e sa nɛ wa he be kɛ kane Mawu Munyu ɔ. Mɛni be nɛ e sa nɛ waa kane Baiblo ɔ? Wa kpɛti nɔ fɛɛ nɔ ma nyɛ maa hla be nɛ maa da lɛ. Se ke wa ma de ɔ, e sa nɛ e pee be nɛ ma ha nɛ o nyɛ nɛ o kane Baiblo ɔ be fɛɛ be. Nyɛminyumu ko nɛ a tsɛɛ lɛ ke Victor ɔ de ke: “I kaneɔ Baiblo ɔ mɔtu. E ngɛ mi kaa i sume si temi mɔtu mla mohu lɛɛ, se jamɛ a be ɔ mi pɛ lɛ ma nyɛ ma kane Baiblo ɔ nɛ nɔ́ ko nɔ́ ko be ye juɛmi gblae. I nyɛɔ nɛ i peeɔ totooto nɛ i ngɔɔ ye juɛmi kɛ maa nɔ́ nɛ i ngɛ kanee ɔ nɔ.” Anɛ jã nɛ e ji ngɛ mo hu o blɔ fa mi lo? Ke jã a, lɛɛ mo bi o he ke, ‘Mɛni be e maa hi ha mi nɛ ma kɛ kane Baiblo ɔ?’
Mɛni be nɛ e sa kaa o kane Baiblo ɔ? Mɛni be nɛ ke o kane Baiblo ɔ, e maa ye bua mo konɛ o kane be fɛɛ be? (Hyɛ kuku 6)
MO SUSU NƆ́ NƐ O KANE Ɔ HE
7-8. Mɛni ma nyɛ ma ha nɛ e he nɛ wa ha wɔ kaa wa ma ná Baiblo kanemi he se kɛ pi si? Ngɔɔ nɔ́ he tomi nɔ́ ko kɛ tsɔɔ mi.
7 Ngɛ anɔkuale mi ɔ, behi fuu ɔ, wa kaneɔ níhi fuu, se wa nyɛ we nɛ wa kaiɔ lɛ tsuo. Anɛ o kane nɔ́ ko hyɛ, nɛ be bɔɔ se ɔ, o hɛ je nɔ́ nɛ o kane ɔ nɔ lo? E ba jã ngɛ wɔ tsuo wa blɔ fa mi hyɛ. Aywilɛho sane ji kaa e ma nyɛ maa ba jã ke wa ngɛ Baiblo ɔ kanee. Kaa nɔ hyɛmi nɔ́ ɔ, o ma nyɛ ma kɛ ma o hɛ mi kaa o maa kane yi abɔ komɛ daa ligbi. Ke o peeɔ jã a, o sa yi jemi saminya. Ngɛ anɔkuale mi ɔ, e sa nɛ waa ngɔ otihi kɛ ma wa hɛ mi nɛ waa bɔ mɔde kaa wa maa su he. (1 Kor. 9:26) Se ke wa suɔ nɛ wa ná Baiblo ɔ kanemi he se wawɛɛ ɔ, lɛɛ e sa nɛ waa pee babauu pe nɛ wa maa kane pɛ kɛkɛ.
8 Mo susu nɔ́ he tomi nɔ́ nɛ ɔ he nɛ o hyɛ: Ke a du ní ɔ, e maa hia nyu loko e ma nyɛ maa wa saminya. Se ke hiɔmi nɛ wawɛɛ kɛ tsa nɔ ɔ, e haa nɛ zugba a tɔɔ nyu. Ke e ba jã a, nyu ɔ be nyɛe maa sɛ zu ɔ mi, nɛ ngmɔ ní ɔmɛ be he se náe. Se ke hiɔmi ɔ nɛ bɔɔbɔɔbɔɔ ɔ, e maa ye bua ngmɔ ní ɔmɛ wawɛɛ, ejakaa nyu ɔ maa sɛ zu ɔ mi nɛ e ma ha nɛ ngmɔ ní ɔmɛ maa wa saminya. Jã nɔuu kɛ̃ nɛ e sɛ nɛ waa kane Baiblo ɔ kɛfokɛfo. Ke wa pee jã a, e be hae nɛ wa susu nɔ́ nɛ wa kane ɔ he, nɛ wa kai nɛ wa kɛ tsu ní.—Yak. 1:24.
Kaa bɔ nɛ ke hiɔmi nɛ ɔ, e heɔ be loko nyu ɔ sɛɛ zu mi konɛ zugba a nɛ ná he se ɔ, jã kɛ nɛ e sa nɛ wa he be kɛ pue wa yi mi tɛ ngɛ nɔ́ nɛ wa kaneɔ ngɛ Mawu Munyu ɔ mi ɔ he nɛ wa kɛ tsu ní (Hyɛ kuku 8)
9. Mɛni e sa nɛ o pee ke o yɔse kaa o kaneɔ Baiblo ɔ kɛfokɛfo?
9 Anɛ o to he hɛ kaa be komɛ ɔ, o kaneɔ Baiblo ɔ kɛfokɛfo lo? Ke e ba jã a, mɛni e sa kaa o pee? Mo ná tsui. Moo bɔ mɔde kaa o ma susu nɔ́ nɛ o ngɛ kanee ɔ loo nɔ́ nɛ o kane kɛ be ɔ he. E sɛ nɛ enɛ ɔ peemi he nɛ wa kulaa. Ke e he wa ha mo kaa o ma pue o yi mi tɛ ɔ, nɔ́ nɛ o ma nyɛ maa pee kɛkɛ pɛ ji kaa o ma susu nɔ́ nɛ o kane ɔ he. Ke o ngɛ ní kasee ɔ, o ma nyɛ ma he be babauu konɛ o kɛ pue o yi mi tɛ loo o susu nɔ́ nɛ o ngɛ kasee ɔ he. Aloo ke o suɔ ɔ, o ma nyɛ maa kane ngmami bɔɔ ko pɛ, nɛ o ngɔ be nɛ piɛ ɔ kɛ susu nɔ́ nɛ o kane ɔ he. Victor nɛ wa tu e he munyu kɛ sɛ hlami ɔ de ke: “I kaneɔ ngmami bɔɔ ko pɛ, eko ɔ, kaa yi kake. Se akɛnɛ i kaneɔ Baiblo ɔ mɔtu mla he je ɔ, i nyɛɔ nɛ i susuɔ nɔ́ nɛ i kane ɔ he ngɛ ligbi ɔ mi.” Ke o kaneɔ Baiblo ɔ mɔtu jio, piani jio, gbɔkuɛ jio, o kaneɔ yi bɔɔ ko jio, yihi fuu jio, bɔ fɛɛ bɔ nɛ ji ɔ, mo kai kaa e he hia nɛ o to o tsui si kɛ kane. Jã nɛ o maa pee ɔ, ma ha nɛ o susu nɔ́ nɛ o ngɛ kanee ɔ he saminya.—La 119:97; hyɛ daka nɛ ji, “ Sane Bimihi Nɛ E Sa Nɛ O Susu He.”
10. Mo ha nɔ hyɛmi nɔ́ ko kɛ tsɔɔ bɔ nɛ o ma plɛ kɛ ngɔ nɔ́ nɛ o ngɛ kasee ɔ kɛ tsu ní ha. (1 Tɛsalonika Bi 5:17, 18)
10 Ke o kane ngmami komɛ ɔ, mo susu bɔ nɛ o kɛ ma tsu ní ha a he. Ke o ngɛ ngmami ko kanee ɔ, mo bi o he ke, ‘Kɛ i kɛ ngmami nɛ ɔ ma nyɛ ma tsu ní ha kɛɛ amlɔ nɛ ɔ kɛ hwɔɔ se?’ Kaa nɔ hyɛmi nɔ́ ɔ, ngɔɔ lɛ kaa o kane 1 Tɛsalonika Bi 5:17, 18 ɔ. (Kane.) Ke o kane ngmami nɛ ɔ ta a, o ma nyɛ maa mlɛ, nɛ o susu si abɔ nɛ o sɔleɔ, kɛ bɔ nɛ o sɔleɔ ha a he. Jehanɛ hu ɔ, o ma nyɛ ma susu ní komɛ nɛ Yehowa pee ha mo nɛ o bua jɔ he ɔ he. Enɛ ɔ ma nyɛ ma ha nɛ o mwɔ o yi mi kpɔ kaa o maa na Yehowa si ngɛ ní etɛ komɛ a he. Ke o kɛ be bɔɔ susu nɔ́ nɛ o kane ngɛ Baiblo ɔ mi ɔ he ɔ, lɔ ɔ maa ye bua mo nɛ o nu Mawu Munyu ɔ sisi saminya, nɛ o kɛ tsu ní. Ke o pee jã be fɛɛ be nɛ o maa kane ngmami ko ɔ, o ma ná he se wawɛɛ! Ngɛ anɔkuale mi ɔ, bɔɔbɔɔbɔɔ ɔ, o ma ba pee Mawu Munyu ɔ nɔ yelɔ. Se ke o ba yɔse kaa e he hia nɛ o pee tsakemihi fuu hu nɛɛ?
NGƆƆ OTIHI NƐ O MA NYƐ MAA SU HE KƐ MA O HƐ MI
11. Mɛni he je nɛ o kɔni mi ma nyɛ ma jɔ̃ be komɛ ɔ? Mo ha enɛ ɔ he nɔ hyɛmi nɔ́.
11 Ke o ngɛ Baiblo ɔ kanee nɛ o yɔse kaa e he hia nɛ o pee tsakemihi fuu ngɛ ní komɛ a mi ɔ, be komɛ ɔ, o kɔni mi ma nyɛ ma jɔ̃. Kaa nɔ hyɛmi nɔ́ ɔ, moo ngɔ lɛ kaa ligbi ko ɔ, o kane ngmami ko nɛ tsɔɔ kaa e sɛ nɛ waa hyɛ nɔ hɛ mi. (Yak. 2:1-8) Kɛkɛ nɛ o na kaa o ma nyɛ maa pee tsakemi ngɛ bɔ nɛ o kɛ nihi yeɔ ha a he. Enɛ ɔ he ɔ, o ma nya si kaa o maa pee tsakemi. E hi wawɛɛ kaa o pee jã! Se e nɔ jena pɛ ɔ, o kpale kane ngmami ko nɛ tsɔɔ kaa e sa nɛ waa hyɛ wa munyu tutui saminya. (Yak. 3:1-12) Kɛkɛ nɛ o yɔse kaa be komɛ ɔ, o kɛ mi mi jɔmi tui munyu, nɛ o munyu tutui wui nihi he wami. Enɛ ɔ he ɔ, o fia o pɛɛ si kaa o maa ngɔ o munyu tutui kɛ wo ni kpahi he wami. E nɔ jena a, o kpale kane ngmami ko nɛ tsɔɔ kaa e sɛ nɛ waa kɛ je ɔ nɛ bɔ. (Yak. 4:4-12) Kɛkɛ nɛ o yɔse hu kaa e sa nɛ o hyɛ nɛ hi saminya ngɛ níhi nɛ o kɛ jeɔ o hɛja a he. E nɔ jena a, eko ɔ, o maa nu he kaa o be nyɛe maa pee tsakemi nɛ ɔmɛ tsuo.
12. Ke o ngɛ Baiblo ɔ kanee nɛ o ba yɔse kaa e he hia nɛ o pee tsakemi komɛ ɔ, mɛni he je nɛ e sɛ nɛ o kɔni mi nɛ jɔ̃ ɔ? (Hyɛ sisi ningma a hulɔ.)
12 Ke o na kaa e he hia nɛ o pee tsakemihi fuu po ɔ, ko ha nɛ o kɔni mi nɛ jɔ̃. Lemi nɛ o le kaa e sa nɛ o pee tsakemihi ɔ tsɔɔ kaa o baa o he si nɛ o hɛɛ juɛmi nɛ da. Ke wa baa wa he si ɔ, lɔ ɔ ma ha nɛ wa maa kane Baiblo ɔ, nɛ wa ma hla blɔhi a nɔ nɛ wa maa gu kɛ pee tsakemi. a Mo kai kaa “su ehe ɔ” nɛ wa maa wo ɔ ji nɔ́ ko nɛ e sa nɛ waa pee daa. (Kol. 3:10) Mɛni maa ye bua mo konɛ o pee Mawu Munyu ɔ nɔ yelɔ be fɛɛ be?
13. Mɛni ji blɔ nɛ hi pe kulaa nɛ o ma nyɛ maa gu nɔ kɛ ngɔ nɔ́ nɛ o ngɛ kasee ɔ kɛ tsu ní? (Hyɛ foni ɔ hulɔ.)
13 Koo bɔ mɔde kaa o maa ngɔ nɔ́ fɛɛ nɔ́ nɛ o kase ɔ kɛ tsu ní si kake. O ma nyɛ maa ngɔ kake loo enyɔ kɛ ma o hɛ mi nɛ o tsu he ní. (Abɛ 11:2) Moo ka enɛ ɔ nɛ o hyɛ: Moo ngma níhi tsuo nɛ e sa nɛ o tsu he ní ɔ kɛ fɔ si. Lɔ ɔ se ɔ, moo hla kake loo enyɔ ngɛ mi nɛ o tsu he ní kekle, konɛ o tsu ní nɛmɛ nɛ piɛ ɔ a he ní pee se. Mɛni nɛ e sa nɛ o tsu he ní kekle?
Ke o ngɛ Baiblo ɔ kanee ɔ, koo bɔ mɔde kaa o maa pee tsakemihi tsuo nɛ e he hia kaa o pee ɔ si kake, mohu ɔ, ngɔɔ otihi nɛ o ma nyɛ maa su he ɔ kɛ ma o hɛ mi. O ma nyɛ maa ngɔ oti kake loo enyɔ kɛ ma o hɛ mi nɛ o tsu he ní (Hyɛ kuku 13-14)
14. Mɛni tsakemihi nɛ o ma nyɛ maa pee kekle?
14 O ma nyɛ ma kɛ pee oti kaa o maa pee tsakemi nɛ e he be wae ha mo kaa o maa pee ɔ kekle. Aloo o ma nyɛ maa pee tsakemi ngɛ níhi nɛ o susu kaa a he hia wawɛɛ ɔ a he. Ke o hla nɔ́ nɛ o suɔ nɛ o tsu he ní ɔ, mo hla níhi a mi ngɛ wa womi ɔmɛ a mi. Kaa nɔ hyɛmi nɔ́ ɔ, o ma nyɛ maa ngɔ Watch Tower Publications Index loo Research Guide for Jehovah’s Witnesses ɔ kɛ hla níhi a mi. Lɔ ɔ se ɔ, moo sɔle ngɛ nɔ́ nɛ o suɔ nɛ o tsu he ní ɔ he, nɛ o bi Yehowa nɛ e ha mo “suɔmi ɔ kɛ he wami ɔ” konɛ o nyɛ nɛ o pee jã. (Filip. 2:13) Lɔ ɔ se ɔ, moo ngɔ nɔ́ nɛ o kase ɔ kɛ tsu ní. Ke o nyɛ nɛ o su kekleekle oti ɔ he ɔ, lɔ ɔ maa wo mo he wami konɛ o su ekpa amɛ a he. Ngɛ anɔkuale mi ɔ, ke o nyɛ nɛ o je Kristofohi a su ko kpo ɔ, e maa ye bua mo konɛ o nyɛ nɛ o pee tsakemi kpahi.
HA NƐ MAWU MUNYU Ɔ NƐ ‘TSU NÍ NGƐ O MI’
15. Mɛni slɔɔto lɛ ngɛ Yehowa we bi kɛ ni kpahi nɛ a kaneɔ Baiblo ɔ a kpɛti? (1 Tɛsalonika Bi 2:13)
15 Ni komɛ deɔ ke a kane Baiblo ɔ si abɔ. Se anɛ a heɔ Baiblo ɔ yeɔ niinɛ lo? Anɛ a kɛ nɔ́ nɛ a kase ngɛ Baiblo ɔ mi ɔ tsuɔ ní ngɛ a si himi mi lo? Aywilɛho sane ji kaa a pee we jã. Se Yehowa we bi lɛɛ, a naa Baiblo ɔ ngɛ blɔ kpa nɔ. Kaa bɔ nɛ e ji ngɛ Kristofohi nɛ a hi si ngɛ kaseli ɔmɛ a be ɔ mi ɔ blɔ fa mi ɔ, wɔ hu wa naa Baiblo ɔ kaa e ji “Mawu munyu, kaa bɔ nɛ e ji ngɛ anɔkuale mi ɔ.” Jehanɛ hu ɔ, wa bɔɔ mɔde kaa waa kɛ nɔ́ nɛ Baiblo ɔ de ɔ ma tsu ní ngɛ wa si himi mi.—Kane 1 Tɛsalonika Bi 2:13.
16. Mɛni maa ye bua wɔ konɛ waa pee Munyu ɔ nɔ yeli?
16 Pi be fɛɛ be nɛ e ngɛ gbɔjɔɔ kaa wa maa kane Baiblo ɔ nɛ waa kɛ e mi munyu ɔ nɛ tsu ní. Be komɛ ɔ, e he ma nyɛ maa wa kaa wa ma ná be kɛ kane Baiblo ɔ. Aloo eko ɔ, wa kaneɔ Baiblo ɔ kɛfokɛfo, enɛ ɔ he ɔ, wa nyɛ we nɛ wa susuɔ nɔ́ nɛ wa kaneɔ ɔ he. Aloo ke wa kane Baiblo ɔ nɛ wa yɔse kaa e sa nɛ waa pee tsakemihi fuu ɔ, wa kɔni mi ma nyɛ ma jɔ̃. Bɔ fɛɛ bɔ nɛ e ji ngɛ o blɔ fa mi ɔ, o ma nyɛ maa ye manye. Yehowa ma nyɛ maa ye bua mo konɛ o ye o gbɔjɔmi ɔ nɔ. Nyɛ ha nɛ wɔ tsuo waa fia wa pɛɛ si kaa wa maa kplɛɛ Yehowa yemi kɛ buami nɔ konɛ wa nyɛ nɛ waa pee Munyu ɔ nɔ yeli, se pi nihi nɛ a nuɔ nɛ a hɛ jeɔ nɔ ɔ. Ngɛ anɔkuale mi ɔ, ke wa ya nɔ nɛ wa kane Mawu Munyu ɔ nɛ waa kɛ tsu ní ɔ, wa bua maa jɔ saminya.—Yak. 1:25.
LA 94 Wa Bua Jɔ Mawu Munyu ɔ He
a Yaa jw.org ɔ nɔ nɛ o hyɛ video nɛ ji, Nɔ́ Nɛ O Juami Bi De—Baiblo Kanemi
