1-2. (a) Benɛ bɔfo Paulo ngma sɛ womi kɛ ya ha Kristofohi nɛ a ngɛ Yudea a, mɛni si fɔfɔɛ mi a ngɛ? (b) Mɛni he je nɛ sɛ womi nɛ ɔ ba ngɛ be nya a?

 NGƐ Yesu gbenɔ se ɔ, Kristofohi nɛ a ji Hebribi nɛ a ngɛ Yerusalem kɛ Yudea a kɛ haomihi fuu kpe. Benɛ a to Kristofohi asafo ɔ sisi pɛ ɔ, a wa nyɛmimɛ ɔmɛ yi mi wawɛɛ nitsɛ. (Níts. 8:1) Jeha 20 se ɔ, Kristo se nyɛɛli ɔmɛ kɛ sika he nyagba kpe wawɛɛ. E ma nyɛ maa ba kaa hwɔ ko nɛ nya wa nɛ ba zugba a nɔ ɔ lɛ ha nɛ a kɛ sika he nyagba nɛ ɔ kpe ɔ nɛ. (Níts. 11:27-30) Se maa pee jeha 61 ɔ mi ɔ, yi mi wami nɛ Kristofo ɔmɛ kɛ kpe ɔ nya wɛ kaa nɔ́ nɛ a kɛ kpe pee se ɔ. Jamɛ a be ɔ mi ɔ, Yehowa ha nɛ Paulo ngma mɛ sɛ womi ko. Ga womi nɛ ngɛ jamɛ a sɛ womi ɔ mi ɔ dla mɛ kɛ ha kahi nɛ a kɛ kpe pee se ɔ.

² Ngɛ anɔkuale mi ɔ, sɛ womi nɛ Paulo ngma kɛ ya ha Hebribi ɔmɛ ɔ ba ngɛ be nya wawɛɛ nitsɛ, ejakaa e be kɛe nɛ tue mi jɔmi nɛ a ngɛ ngɛ jamɛ a be ɔ mi ɔ se maa po. Paulo wo Kristofo ɔmɛ ga ko nɛ maa ye bua mɛ konɛ a nyɛ nɛ a fĩ si ngɛ nyagbahi nɛ e be kɛe nɛ a kɛ maa kpe ɔ mi. E be kɛe nɛ gbami nɛ Yesu gba kɛ fɔ si kaa a ma kpata Yerusalem kɛ sɔlemi we ɔ hɛ mi ɔ maa ba mi. (Luka 21:20) Ngɛ anɔkuale mi ɔ, Paulo kɛ Kristofohi tsuo nɛ a ngɛ Yudea li be tutuutu nɛ hɛ mi kpatami nɛ ɔ maa je sisi. Se kɛ̃ ɔ, Kristofo ɔmɛ ngɔ be nɛ piɛ ɔ kɛ dla a he, nɛ a wo a hemi kɛ yemi ɔ mi he wami nɛ a fĩ si.—Heb. 10:25; 12:1, 2.

3. Mɛni he je nɛ e sa nɛ Kristofohi nɛ a ngɛ mwɔnɛ ɔ nɛ a susu sɛ womi nɛ Paulo ngma kɛ ya ha Hebribi ɔmɛ ɔ he wawɛɛ ɔ?

 ³ E be kɛe nɛ waa kɛ haomi nɛ nya wa pe nɔ́ nɛ Kristofohi nɛ a ji Hebribi ɔmɛ kɛ kpe ɔ maa kpe. (Mat. 24:21; Kpoj. 16:14, 16) Enɛ ɔ he ɔ, nyɛ ha nɛ wa susu ga womi komɛ nɛ Yehowa kɛ ha Kristofo ɔmɛ a he, kɛ bɔ nɛ wɔ hu wa ma ná he se ha.

NYƐ HA NƐ “WAA YA WA HƐ MI KONƐ WAA WA”

4. Mɛni nyagbahi nɛ Yudabi nɛ ji Kristofohi ɔ kɛ kpe? (Hyɛ foni ɔ hulɔ.)

⁴ E sa nɛ Yudabi nɛ a ba pee Kristofohi ɔ nɛ a pee tsakemihi nɛ a he hia wawɛɛ, se a ná we jã peemi gbɔjɔɔ. Be ko nɛ be ɔ, Yehowa hla Yudabi ɔmɛ kɛ pee e ma. Yerusalem ji he nɛ nihi nɛ Yehowa hla mɛ kaa a da e nane mi ɔ yeɔ matsɛ ngɛ, nɛ nihi nɛ a suɔ kaa a ja Yehowa a ya jaa lɛ ngɛ sɔlemi we ɔ nɛ ngɛ Yerusalem ɔ. Yudabi anɔkualetsɛmɛ ɔmɛ tsuo ngɔɔ Mose Mlaa a kɛ tsuɔ ní kaa bɔ nɛ jami hɛ mi nyɛɛli ɔmɛ tsɔɔ mɛ ɔ. A wo mlaa ngɛ niye ní he, nɔ pomi he, kɛ bɔ nɛ e sa nɛ a kɛ Ma Jeli nɛ hi si ha a he. Se ngɛ Yesu gbenɔ se ɔ, Yehowa kplɛɛ we afɔlehi nɛ Yudabi ɔmɛ sãa ngɛ sɔlemi we ɔ nɔ hu. Enɛ ɔ ba pee nyagba kɛ ha Yudabi nɛ a ba pee Kristofohi nɛ a kɛ Mlaa nɛ ɔ tsu ní jehahi babauu ɔ. (Heb. 10:1, 4, 10) Kristofohi nɛ a wa ngɛ mumi mi kaa bɔfo Petro po ná we lɛ gbɔjɔɔ kaa a maa kplɛɛ tsakemi nɛ ɔmɛ a nɔ. (Níts. 10:9-14; Gal. 2:11-14) Ngɛ anɔkuale mi ɔ, Yuda jami hɛ mi nyɛɛli ɔmɛ wa Yudabi nɛ a ba pee Kristofohi ɔ yi mi wawɛɛ ngɛ a hemi kɛ yemi ɔ he je.

5. Mɛni nɛ e sa kaa Kristofo ɔmɛ nɛ a hyɛ a he nɛ hi ngɛ he?

⁵ Kuu slɔɔtohi enyɔ te si kɛ wo Hebribi nɛ a ba pee Kristofohi ɔ. Kekleekle ɔ, Yuda jami hɛ mi nyɛɛli ɔmɛ na Yudabi nɛ a ba pee Kristofohi ɔ kaa a ji hemi kɛ yemi kuali. Jehanɛ hu ɔ, ni komɛ nɛ a ngɛ asafo ɔ mi ɔ tsɔɔ kaa e sa nɛ Kristofo ɔmɛ nɛ a ya nɔ nɛ a ngɔ Mose Mlaa a kɛ tsu ní. Eko ɔ, a de jã bɔ nɛ pee nɛ a ko wa mɛ yi mi. (Gal. 6:12) Mɛni maa ye bua Kristofo ɔmɛ konɛ a ya nɔ nɛ a ye Yehowa anɔkuale?

6. Mɛni nɛ Paulo wo e nyɛmimɛ Kristofo ɔmɛ he wami kaa a pee? (Hebri Bi 5:14–6:1)

 ⁶ Ngɛ sɛ womi nɛ Paulo ngma kɛ ya ha Hebribi nɛ a ji Kristofohi ɔ mi ɔ, e wo mɛ he wami nɛ a kase Mawu Munyu ɔ nɛ a pue a yi mi tɛ ngɛ he. (Kane Hebri Bi 5:14–6:1.) Paulo tsɛ ngmamihi a se kɛ je Hebri Ngmami ɔmɛ a mi, nɛ e tsɔɔ mɛ nɔ́ he je nɛ bɔ nɛ Kristofo ɔmɛ jaa Yehowa ha a hi kulaa pe bɔ nɛ Yudabi ɔmɛ ja lɛ ha a. a Paulo wo Kristofo ɔmɛ he wami konɛ a le anɔkualehi nɛ ngɛ Ngmami ɔ mi nɛ a nu sisi saminya, bɔ nɛ pee nɛ a nyɛ nɛ a yɔse lakpa tsɔɔmihi nɛ a yu a he ngɛ he.

7. Mɛni nyagbahi waa kɛ kpeɔ mwɔnɛ ɔ?

⁷ Mwɔnɛ ɔ hu ɔ, nihi gbɛɔ lakpa munyuhi kɛ fĩaa, nɛ níhi nɛ a deɔ ɔ kɛ Yehowa je mi bami he mlaahi kɔ we. Akɛnɛ Yehowa Odasefohi ngɔɔ nɔ́ nɛ Baiblo ɔ de ngɛ bɔmi nami he ɔ kɛ tsuɔ ní he je ɔ, nihi teɔ si kɛ woɔ wɔ nɛ a deɔ ke wa yi mi wa. Bɔ nɛ nihi susuɔ níhi a he ha a je ekpa kulaa ngɛ bɔ nɛ Yehowa susuɔ níhi a he ha a he. (Abɛ 17:15) Enɛ ɔ he ɔ, e sa nɛ wa yɔse susumihi nɛ dɛ nɛ nihi hɛɛ ɔ, nɛ waa yu wa he kɛ je he. E sɛ nɛ waa ngmɛ blɔ nɛ nihi nɛ a teɔ si kɛ woɔ wɔ ɔ nɛ a jɔ̃ wa kɔni mi nɛ wa kpa Yehowa sɔmɔmi.—Heb. 13:9.

8. Mɛni maa ye bua wɔ konɛ waa ya nɔ nɛ waa wa ngɛ mumi mi?

⁸ E sa nɛ waa ngɔ ga nɛ Paulo wo Hebribi nɛ a ji Kristofohi ɔ kaa a ya nɔ nɛ a wa ngɛ mumi mi ɔ kɛ tsu ní. Loko wa ma nyɛ maa wa ngɛ mumi mi ɔ, e sa nɛ waa kase Baiblo ɔ, nɛ waa le Yehowa saminya, nɛ waa le e susumi ngɛ níhi a he. Ke wa jɔɔ wa he nɔ nɛ a baptisi wɔ po ɔ, e sa nɛ waa ya nɔ nɛ waa pee jã. Wa ba asafo ɔ mi kɛ jio, lingmi nɛ ɔ nɛ wa ba mi jio, e he hia nɛ wɔ tsuo waa kane Mawu Munyu ɔ daa, nɛ waa kase hulɔ. (La 1:2) Ke wa kaseɔ ní be fɛɛ be ɔ, lɔ ɔ maa ye bua wɔ nɛ wa hemi kɛ yemi ɔ mi maa wa. Enɛ ɔ ji su nɛ Paulo de Hebribi ɔmɛ kaa e he hia nɛ a ná.—Heb. 11:1, 6.

E SA NƐ WA NÁ “HEMI KƐ YEMI KƐ HA WA WAMI YI BAAMI”

9. Mɛni he je nɛ e he hia nɛ Hebribi nɛ a ji Kristofohi ɔ nɛ a ná hemi kɛ yemi nɛ mi wa a?

⁹ E he hia nɛ Hebribi nɛ a ji Kristofohi ɔ nɛ a ná hemi kɛ yemi nɛ mi wa, bɔ nɛ pee nɛ a baa a yi ngɛ haomi nɛ maa ba Yudea a mi. (Heb. 10:37-39) Yesu bɔ e se nyɛɛli ɔmɛ kɔkɔ kaa ke a na nɛ ta buli bɔle Yerusalem ma a pɛ ɔ, a tu fo kɛ je ma a mi kɛ ho yoku ɔmɛ a nɔ ya. E biɔ nɛ Kristofohi nɛ a ngɛ Yerusalem ma a mi kɛ ni nɛmɛ nɛ a ngɛ kɔpe ɔmɛ a mi ɔ tsuo nɛ a ngɔ ga womi nɛ ɔ kɛ tsu ní. (Luka 21:20-24) Jamɛ a be ɔ mi ɔ, ke he nyɛli ya tua ma ko ɔ, nihi nɛ a ngɛ kɔpe ɔmɛ a mi ɔ ya saa we ngɛ mahi nɛ a po gbogbo kɛ wo a he ɔ mi konɛ a kɛ po a he piɛ. Ngɛ anɔkuale mi ɔ, ni komɛ ma susu kaa nile be mi kaa nɔ ko maa tu fo kɛ ya yoku ɔmɛ a nɔ kɛ ha he piɛ pomi. Enɛ ɔ he ɔ, ja a ná hemi kɛ yemi nɛ mi wa loko a ma nyɛ maa pee jã.

10. Ke Kristofohi ngɛ hemi kɛ yemi nɛ mi wa a, kɛ e maa ye bua mɛ ha kɛɛ? (Hebri Bi 13:17)

¹⁰ Jehanɛ ɔ hu ɔ, e he hia nɛ Kristofohi nɛ a ji Hebribi ɔ nɛ a ná hemi kɛ yemi ngɛ nihi nɛ Yesu guɔ a nɔ kɛ tsɔɔ asafo ɔ blɔ ɔ a mi. Eko ɔ, nihi nɛ a nyɛɛ asafo ɔ hɛ mi ɔ ngɔ blɔ tsɔɔmi pɔtɛɛ komɛ kɛ ha Kristofo ɔmɛ, nɛ a tsɔɔ mɛ be nɛ e sa nɛ a tu fo, kɛ blɔ nɔ nɛ a maa gu kɛ pee jã. (Kane Hebri Bi 13:17.) Hela munyungu nɛ a tsɔɔ sisi ngɛ Hebri Bi 13:17 ɔ ke ‘bu tue’ ɔ, nɔ́ nɛ e tsɔɔ ji kaa nɔ ko maa bu blɔ  tsɔɔmi nɛ nɔ ko kɛ ha lɛ ɔ tue, pi nɛ e sa nɛ e pee jã a he je, se mohu ɔ, akɛnɛ e heɔ nɔ ɔ yeɔ ɔ he je. Enɛ ɔ he ɔ, e sa nɛ Kristofohi nɛ a ji Hebribi ɔmɛ ɔ nɛ a ná hɛ kɛ nɔ fɔmi ngɛ asafo mi nikɔtɔma amɛ a mi loko haomi be ɔ nɛ su. Ke Kristofo ɔmɛ ngɔ asafo mi nikɔtɔma amɛ a blɔ tsɔɔmi kɛ tsu ní be mi nɛ haomi ko bɛ lolo ɔ, e he be wae ha mɛ kaa a maa pee jã ngɛ haomi behi a mi hulɔ.

11. Mɛni he je nɛ e he hia kaa Kristofohi nɛ a ná hemi kɛ yemi nɛ mi wa mwɔnɛ ɔ?

¹¹ Mwɔnɛ ɔ, wɔ hu wa hia hemi kɛ yemi kaa bɔ nɛ e ji ngɛ Hebribi nɛ a ji Kristofohi ɔ a blɔ fa mi ɔ. Nihi fuu he we yi kaa wa ngɛ nyagbe ligbi ɔmɛ a mi, nɛ akɛnɛ wa he ye kaa wa ngɛ nyagbe ligbi ɔmɛ a mi he je ɔ, a yeɔ wa he fɛu. (2 Petro 3:3, 4) Jehanɛ ɔ hu ɔ, e ngɛ mi kaa Baiblo ɔ de wɔ ní komɛ nɛ maa ya nɔ ngɛ amanehlu ngua a mi mohu lɛɛ, se níhi fuu ngɛ nɛ wa li. E sa nɛ wa ná hemi kɛ yemi nɛ mi wa kaa je nɛ ɔ maa ba nyagbe ngɛ be nɛ Yehowa to ɔ nya pɛpɛɛpɛ, nɛ Yehowa maa hyɛ wa nɔ ngɛ jamɛ a be ɔ mi hulɔ.—Hab. 2:3.

12. Mɛni maa ye bua wɔ konɛ waa hi slɔkee ngɛ amanehlu ngua a mi?

¹² E sa nɛ wa ná hemi kɛ yemi nɛ mi wa kaa Yehowa guɔ “tsɔlɔ anɔkualetsɛ kɛ ní lelɔ ɔ” nɔ kɛ tsɔɔ e we asafo ɔ blɔ. (Mat. 24:45) Ke amanehlu ngua a je sisi ɔ, eko ɔ, a ma ha wɔ blɔ tsɔɔmi pɔtɛɛ komɛ nɛ ma he wa yi wami. Jã kɛ̃ nɛ benɛ Romabi ɔmɛ ba tua Hebribi nɛ a ji Kristofohi ɔ, eko ɔ, a ha mɛ hu blɔ tsɔɔmihi nɛ he a yi wami. Mwɔnɛ ɔ, e he hia wawɛɛ nɛ wa ná hemi kɛ yemi nɛ mi wa ngɛ nihi nɛ a ngɛ Yehowa asafo ɔ hɛ mi nyɛɛe ɔ a mi. Ke wa ná we nɔ mi mami ngɛ a mi, nɛ waa kɛ a blɔ tsɔɔmi ɔmɛ tsu we ní amlɔ nɛ ɔ, e he maa wa ha wɔ kaa waa kɛ blɔ tsɔɔmihi nɛ wa nine maa su nɔ ngɛ amanehlu ngua a mi ɔ ma tsu ní.

13. Mɛni he je nɛ ga womi nɛ ngɛ Hebri Bi 13:5 ɔ he hia wawɛɛ ɔ?

¹³ Be mi nɛ Hebribi nɛ a ji Kristofohi ɔ ngɛ mlɛe nɛ a tu fo kɛ je ma a mi ɔ, e ma bi nɛ a pee a si himi kpokploo, nɛ ‘a ko ha nɛ sika suɔmi nɛ hi a si himi mi.’ (Kane Hebri Bi 13:5.) A ti ni komɛ gblee hwɔ nɛ nya wa kɛ o hia si himi mi. (Heb. 10:32-34) E ngɛ mi kaa be ko nɛ be ɔ, a pee klaalo kaa a ma fĩ si ngɛ haomi behi a mi ngɛ sane kpakpa a he je mohu lɛɛ, se a ti ni komɛ bɔni sika se dimi kɛ susumi ɔ kaa a ma ná sika fuu kɛ po a he piɛ. Se sika nɛ a ngɛ ɔ be nyɛe ma he a yi wami ke a kpata Yerusalem ma a hɛ mi. (Yak. 5:3) Ngɛ anɔkuale mi ɔ, e he ma nyɛ maa wa ha nɔ ko nɛ e diɔ he lo nya níhi a se ɔ kaa e maa tu fo kɛ je e we kɛ e weto níhi a he.

14. Ke wa ná hemi kɛ yemi nɛ mi wa a, kɛ e maa sa yi mi kpɔhi nɛ wa mwɔɔ kɛ kɔɔ he lo nya níhi a he ɔ ha kɛɛ?

¹⁴ Ke wa ngɛ hemi kɛ yemi nɛ mi wa kaa nyagbe ɔ su si ta a, wa be he lo nya níhi a se die. Ngɛ anɔkuale mi ɔ, nihi “ma sake a sika tsu, kɛ sika hiɔ ngɔ pue gbɛjegbɛ ɔmɛ” a nɔ, ejakaa a ma yɔse kaa ‘ligbi ɔ nɛ Yehowa we abofu maa ba a, a sika hiɔ, kɛ a sika tsu ɔ be nyɛe ma he a yi wami.’ (Eze. 7:19) E sɛ nɛ waa ngɔ wa juɛmi kɛ ma sika fuu nɛ wa ma ná a nɔ, mohu ɔ, e sa nɛ waa mwɔ yi mi kpɔhi nɛ maa ye bua wɔ nɛ waa pee wa si himi kpokploo konɛ wa nyɛ nɛ waa hyɛ wɔ nitsɛmɛ kɛ wa weku mi bimɛ a nɔ, nɛ wa nyɛ nɛ wa sɔmɔ Yehowa. Enɛ ɔ tsɔɔ kaa e sa nɛ waa bɔ mɔde nɛ wa ko ye hiɔhi nɛ a he hia we loo wa puɛ be fuu kɛ hi wa he lo nya níhi a nɔ hyɛe. Jehanɛ ɔ hu ɔ, e sa nɛ waa hyɛ nɛ hi konɛ he lo nya níhi nɛ wa ngɛ ɔ nɛ ko pee nɔ́ titli ngɛ wa si himi mi. (Mat. 6:19, 24) Be mi nɛ nyagbe ɔ ngɛ sue nɛ ɔ, yi mi kpɔhi nɛ wa mwɔɔ ɔ lɛ maa tsɔɔ ke ji wa ngɔɔ wa hɛ kɛ fɔɔ Yehowa nɔ loo he lo nya níhi nɛ wa ngɛ ɔ nɔ.

 “NYƐ HIA SI FIMI”

15. Mɛni he je nɛ e sa kaa Hebribi nɛ a ji Kristofohi ɔ nɛ a fĩ si wawɛɛ ɔ?

¹⁵ E sa nɛ Hebribi nɛ a ji Kristofohi ɔ nɛ a fĩ si wawɛɛ, ejakaa e be kɛe nɛ a kɛ amanehlu maa kpe ngɛ Yudea. (Heb. 10:36) E ngɛ mi kaa a wa Kristofohi komɛ nɛ a ji Hebribi ɔ yi mi wawɛɛ mohu lɛɛ, se a kpɛti nihi fuu ngɛ nɛ a wɛ mɛ yi mi be mi nɛ a ba na anɔkuale ɔ. Enɛ ɔ he ɔ, Paulo de mɛ kaa e sa nɛ a dla a he kɛ ha yi mi wami nɛ maa ba a nɔ pee se ɔ, nɛ a pee klaalo kaa a maa ye anɔkuale kɛ ya si gbenɔ mi kaa bɔ nɛ Yesu pee ɔ. (Heb. 12:4) Akɛnɛ nihi fuu ngɛ Kristofohi asafo ɔ mi bae he je ɔ, Yudabi ɔmɛ a kpɛti nihi fuu a mi mi fu wawɛɛ nɛ a te si kɛ wo Kristofo ɔmɛ. Jehahi bɔɔ komɛ nɛ be ɔ, basabasa peeli komɛ ba tua Paulo benɛ e ngɛ fiɛɛe ngɛ Yerusalem ɔ. Yudabi nɛ a hiɛ pe 40 ɔ “kã a he kita kaa a be nɔ́ ko yee, nɛ a be nɔ́ ko hu nue kɛ yaa si be nɛ a maa gbe Paulo.” (Níts. 22:22; 23:12-14) E ngɛ mi kaa a wa Kristofo ɔmɛ yi mi mohu lɛɛ, se a ya nɔ nɛ a bua a he nya kɛ sɔmɔ Mawu, a fiɛɛ sane kpakpa a, nɛ a ha nɛ a hemi kɛ yemi ɔ mi wa wawɛɛ.

16. Mɛni blɔ nɔ nɛ sɛ womi nɛ Paulo ngma kɛ ya ha Hebribi ɔmɛ ɔ maa ye bua wɔ konɛ wa ná juɛmi nɛ da ngɛ yi mi wami he? (Hebri Bi 12:7)

¹⁶ Mɛni ye bua Hebribi nɛ a ji Kristofohi ɔ nɛ a ya nɔ nɛ a fĩ si ngɛ si temi kɛ womi nɛ a kɛ kpe ɔ tsuo se? Paulo le kaa e sa nɛ a ná juɛmi nɛ da ngɛ kahi nɛ a kɛ ngɛ kpee ɔ he. Enɛ ɔ he ɔ, e tsɔɔ kaa ke Kristofohi kɛ kahi ngɛ kpee ɔ, Mawu ma nyɛ maa gu ka nɛ ɔmɛ a nɔ kɛ tsɔse mɛ. (Kane Hebri Bi 12:7.) Tsɔsemi nɛ ɔ maa ye bua wɔ konɛ waa ya nɔ nɛ wa je Kristofohi a su kpakpahi kpo. Ke Hebribi nɛ a ji Kristofohi ɔ ngɔ a juɛmi kɛ ma ní kpakpahi nɛ ma nyɛ maa je ka nɛ ɔmɛ a mi kɛ ba a nɔ ɔ, e he be wae ha mɛ kaa a ma fĩ si.—Heb. 12:11.

17. Mɛni Paulo kase ngɛ bɔ nɛ a fĩɔ si ngɛ yi mi wami mi ha a mi?

¹⁷ Paulo wo Hebribi nɛ a ji Kristofohi ɔ he wami kaa e sa nɛ a pee kã nɛ a kɔni mi nɛ ko jɔ̃ ke a kɛ kahi ngɛ kpee. Ngɛ anɔkuale mi ɔ,  loko Paulo ma ba pee Kristofono ɔ, e wa Kristofo ɔmɛ yi mi wawɛɛ, nɛ e na bɔ nɛ nihi kɛ mɛ ye ha. Enɛ ɔ he ɔ, e da blɔ kaa Paulo tsɔɔ nyɛmimɛ ɔmɛ bɔ nɛ a ma plɛ kɛ fĩ si ngɛ yi mi wami mi ha. Jehanɛ ɔ hu ɔ, lɛ nitsɛ hu e le bɔ nɛ a fĩɔ si ngɛ yi mi wami mi ha. Ke e hi kulaa a, benɛ e ba pee Kristofono ɔ, a wa lɛ yi mi si abɔ. (2 Kor. 11:23-25) Enɛ ɔ he ɔ, Paulo nyɛ nɛ e tu munyu kɛ nɔ mi mami kɛ kɔ bɔ nɛ wa ma plɛ kɛ fĩ si ngɛ kahi a mi ha a he. E kai Kristofo ɔmɛ kaa ke a kɛ kahi ngɛ kpee ɔ, e sɛ nɛ a ngɔ a hɛ kɛ fɔ mɛ nitsɛmɛ a nɔ, mohu ɔ, e sa kaa a ngɔ a hɛ kɛ fɔ Yehowa nɔ. Enɛ ɔ wo Paulo he wami nɛ e kɛ nɔ mi mami de ke: “Yehowa ji ye yemi kɛ bualɔ; i be gbeye yee.”—Heb. 13:6.

18. Mɛni nɛ ke wa le kɛ kɔ hwɔɔ se he ɔ, e maa ye bua wɔ nɛ wa fĩ si ke a ngɛ wɔ yi mi wae?

¹⁸ Amlɔ nɛ ɔ, a ngɛ wa nyɛmimɛ komɛ yi mi wae. Enɛ ɔ he ɔ, wa ma nyɛ maa sɔle kɛ ha mɛ nɛ waa pee ní komɛ kɛ ye bua mɛ kɛ tsɔɔ kaa wa suɔ mɛ wawɛɛ. (Heb. 10:33) Baiblo ɔ ha nɛ e pee heii kaa “nihi tsuo nɛ a suɔ wawɛɛ kaa a maa hi si ngɛ Mawu gbeye yemi nya ngɛ Kristo Yesu mi ɔ, mɛ hu a maa wa mɛ yi mi.” (2 Tim. 3:12) Enɛ ɔ he ɔ, e sa nɛ wɔ tsuo wa dla wa he kɛ ha behi nɛ a mi wa nɛ ngɛ wa hɛ mi haa a. Nyɛ ha nɛ waa ya nɔ nɛ wa ná hɛ kɛ nɔ fɔmi nɛ mi wa ngɛ Yehowa mi, nɛ wa ná nɔ mi mami kaa e maa ye bua wɔ nɛ wa fĩ si ngɛ kahi tsuo nɛ waa kɛ maa kpe ɔ mi. Ngɛ be nɛ sa mi ɔ, e ma ha nɛ e sɔmɔli tsuo nɛ a yeɔ lɛ anɔkuale ɔ a he maa jɔ mɛ.—2 Tɛs. 1:7, 8.

19. Mɛni ji ní komɛ nɛ wa ma nyɛ maa pee kɛ dla wa he kɛ ha amanehlu ngua a? (Hyɛ foni ɔ hulɔ.)

¹⁹ Ngɛ anɔkuale mi ɔ, sɛ womi nɛ Paulo ngma kɛ ya ha Hebribi ɔmɛ ɔ ye bua mɛ nɛ a dla a he kɛ ha haomihi nɛ e be kɛe nɛ a kɛ maa kpe ɔ. Paulo wo e nyɛmimɛ ɔmɛ he wami kaa e sa nɛ a kase Mawu Munyu ɔ nɛ a nu sisi saminya. Ke a pee jã a, e maa ye bua mɛ konɛ a kua tsɔɔmihi nɛ ma nyɛ ma gbɔjɔ a hemi kɛ yemi ɔ. E wo mɛ he wami kaa a ná hemi kɛ yemi nɛ mi wa konɛ a nyɛ nɛ a ngɔ blɔ tsɔɔmi nɛ je Yesu kɛ nihi nɛ a ngɛ asafo ɔ hɛ mi nyɛɛe ɔ a ngɔ ɔ kɛ tsu ní oya nɔuu. Jehanɛ ɔ hu ɔ, e ye bua mɛ nɛ a na kaa ke a kɛ kahi ngɛ kpee ɔ, a Tsɛ nɛ ngɛ suɔmi ɔ ma nyɛ maa gu jamɛ a ka amɛ a nɔ kɛ tsɔse mɛ. Enɛ ɔ nɛ e pee ɔ ye bua mɛ nɛ a nyɛ nɛ a fĩ si wawɛɛ. Ngɛ anɔkuale mi ɔ, e sa nɛ wɔ hu waa kɛ Baiblo mi ga womi nɛ ɔ nɛ tsu ní. Ke wa pee jã a, e maa ye bua wɔ konɛ waa kɛ anɔkuale yemi nɛ fĩ si kɛ ya si nyagbe.—Heb. 3:14.