Anɛ E He Hia Nɛ O Nu Baiblo ɔ Sisi Lo?
Jokuɛ yoyo ko nɛ e ye maa pee jeha eywiɛ ɔ na la su ku nɛ ngɛ kpo jee ngɛ ní tsumi he ko yi mi kɛ ngɛ kɔɔhiɔ mi yae. La su ku ɔ mi ti kaa bɔku. Benɛ e na jã a, e susu kaa ní tsumi he ɔ peeɔ bɔku. Bɔ nɛ jokuɛ ɔ nu nɔ́ nɛ e na a sisi ha a ngɛ muɔ nitsɛ. Se ní komɛ ngɛ nɛ ke wa nui sisi saminya a, e ma nyɛ ma sa wa wami he. Kaa nɔ hyɛmi nɔ́ ɔ, ke nɔ ko kane we níhi nɛ a ngma kɛ fɔ tsopa tɔ ko he saminya nɛ e kɛ tsu ní ɔ, oslaa ma nyɛ maa je mi kɛ ba.
Ngɛ Mawu jami mi ɔ, ke wa nui níhi a sisi saminya a, e maa ye wɔ awi nitsɛ. Kaa nɔ hyɛmi nɔ́ ɔ, ni komɛ nui níhi nɛ Yesu tsɔɔ mɛ ɔ sisi saminya. (Yohane 6:48-68) Jinɛ e sa nɛ a ko tsa ní kasemi ɔ nɔ bɔ nɛ pee nɛ a le níhi fuu, se a kua. Nɔ́ ngua ko nitsɛ bɔ mɛ!
Anɛ o kaneɔ Baiblo ɔ konɛ o na blɔ tsɔɔmihi nɛ o kɛ ma tsu ní lo? Ke jã a, lɛɛ o sa yi jemi. Se e ma nyɛ maa ba kaa o maa kane nɔ́ ko ngɛ Baiblo ɔ mi nɛ o be sisi nue. E baa jã ngɛ nihi fuu a blɔ fami. Ha nɛ wa susu ngmamihi etɛ komɛ nɛ nihi nui sisi saminya a he nɛ waa hyɛ.
-
Ni komɛ nui fami nɛ Baiblo ɔ kɛ ha nɛ ji “ye Mawu gbeye” ɔ sisi saminya. A susu kaa munyu nɛ ɔ tsɔɔ kaa Mawu he ngɛ gbeye nɛ a be nyɛe ma hɛ kɛ su e he. (Fiɛlɔ 12:13) Se Mawu sume kaa e sɔmɔli nɛ a susu jã ngɛ e he. Mawu nitsɛ de ke: “Koo ye gbeye. I kɛ mo ngɛ! Ko ha nɛ nɔ́ ko nɛ wo o he gbeye. Imi ji o Mawu ɔ nɛ! Ma wo mo he wami; ma piɛ o he; Ma bu o he, nɛ ma baa o yi.” (Yesaya 41:10) Nɔ́ nɛ Mawu gbeye yemi tsɔɔ kɛkɛ ji kaa, wa ma je bumi nɛ mi kuɔ kpo kɛ ha lɛ.
-
Anɛ a kɛ la maa sã zugba a lo?
Nihi fuu nui ngmami nɛ nyɛɛ se nɛ ɔ sisi saminya: “Nɔ́ tsuaa nɔ́ nɛ ngɛ je nɛ ɔ mi ɔ ngɛ e be. Fɔmi be ngɛ, nɛ gbenɔ be ngɛ.” A susuɔ kaa Mawu to be kɛ fɔ si nɛ adesa fɛɛ adesa kɛ ma gbo. (Fiɛlɔ 3:1, 2) Se ngmami nɛ ɔ ngɛ bɔ nɛ adesahi a wami si himi nitsɛ ngɛ ha a he munyu tue, kɛ je a fɔmi be kɛ ya si a gbenɔ be. E ha nɛ wa le hu kaa gbenɔ fɔɔ si ha wɔ tsuo. Mawu Munyu ɔ hu tsɔɔ kaa bɔ nɛ wa baa wa jemi ha a ma nyɛ maa sa wa wami se kɛmi he. Kaa nɔ hyɛmi nɔ́ ɔ, Baiblo ɔ de ke: ‘Yehowa gbeye yemi haa nɔ wami se kɛɔ.’ (Abɛ 10:27; La 90:10; Yesaya 55:3) Ngɛ mɛni blɔ nɔ? Kaa nɔ hyɛmi nɔ́ ɔ, ke waa kɛ Mawu Munyu ɔ tsuɔ ní ɔ, e ma ha nɛ wa ma kua níhi nɛ a kɛ wa wami maa wo oslaa mi, kaa dã demi kɛ ajuama bɔmi ní peepeehi.
—1 Korinto Bi 6:9, 10. -
Behi fuu ɔ, ke nihi kane Baiblo mi munyu nɛ de ke Mawu kɛ ‘la ma kpata’ hiɔwe kɛ zugba a hɛ mi ɔ, a susuɔ kaa zugba nɛ wa ngɛ nɔ nɛ ɔ hɛ mi nɛ Mawu ma kpata. (2 Petro 3:7) Se Mawu wo si kaa e be blɔ ngmɛe nɛ zugba nɛ wa ngɛ nɔ nɛ ɔ hɛ mi nɛ kpata. Baiblo ɔ de ke, Mawu “ngɔ je ɔ ngɔ ma e sisi tomi ɔ nɔ kpɛii, nɛ a be jee ngɛ lejɛ ɔ gblegbleegble.” (La 104:5; Yesaya 45:18) Enɛ ɔ he ɔ, adesahi a blɔ nya tomi yaya nɛ ngɛ je ɔ mi ɔ hɛ mi nɛ Mawu ma kpata kɛ ya neneene kaa nɔ́ nɛ a kɛ la nɛ puɛ lɛ. Se pi zugba nɛ wa ngɛ nɔ nɛ ɔ. Ke a tu hiɔwe he munyu ɔ, e daa si kɛ ha he nɛ bɔku kɛ dodoe ɔmɛ ngɛ, loo Mawu hi he. A be ní nɛ ɔmɛ a hɛ mi kpatae.
MƐNI HE JE NƐ BE KOMƐ Ɔ, NIHI FUU NUI BAIBLO Ɔ SISI Ɔ?
Ngmamihi nɛ wa sɛ hlami susu a he ɔ ha nɛ wa na kaa, behi fuu ɔ, ni komɛ nui Baiblo mi munyuhi nɛ a kaneɔ ɔ sisi. Se mɛni he je nɛ Mawu ngmɛ blɔ nɛ e ba jã a? Eko ɔ ni komɛ ma susu kaa: ‘Ke Mawu nile mi kuɔ pe nɔ tsuaa nɔ, nɛ e le nɔ́ tsuaa nɔ́ ɔ, jinɛ e ko ha wɔ womi nɛ ke nɔ fɛɛ nɔ kane ɔ, e maa nu sisi. Mɛni he je nɛ e pee we jã a?’ Mo susu yi mi tomi etɛ komɛ a he je nɛ ke nihi kane Baiblo ɔ, a nui sisi ɔ he nɛ o hyɛ.
-
Luka 10:21) Nihi nɛ a ngɛ tsui kpakpa a nɛ a ma nyɛ maa nu Baiblo ɔ sisi. Se nihi nɛ woɔ a he nɔ lɛɛ, a be nyɛe maa nu Baiblo ɔ sisi. “Ní leli” komɛ woɔ a he nɔ, enɛ ɔ he ɔ, behi fuu ɔ, a nui Baiblo ɔ sisi. Se nihi nɛ baa a he si kaa “jokuɛ tsɔwi” nɛ a suɔ kaa a maa kase ní ɔ, mɛ ji nihi nɛ Mawu yeɔ bua mɛ nɛ a nuɔ Baiblo mi sɛ gbi ɔ sisi. Ngɛ anɔkuale mi ɔ Mawu to Baiblo ɔ he blɔ nya saminya.
He si bali nɛ a suɔ kaa a pee tsakemi ngɛ a si himi mi ɔ lɛ nuɔ Baiblo ɔ sisi. Yesu de e-Tsɛ ɔ ke: ‘Tsaatsɛ, hiɔwe kɛ zugba Nyɔmtsɛ, i naa mo si kaa níhi nɛ o ngɔ kɛ laa ní leli ɔ, o je tsɔɔ jokuɛ tsɔwi.’ ( -
Nihi nɛ biɔ Mawu yemi kɛ buami konɛ a nu Baiblo ɔ sisi ɔ lɛ nuɔ sisi. Yesu tsɔɔ kaa nihi maa hia yemi kɛ buami konɛ a nyɛ nɛ a nu e tsɔɔmi ɔmɛ a sisi. Kɛ a maa pee kɛɛ kɛ ná yemi kɛ buami nɛ ɔ? Yesu de ke: ‘Tsɛ ɔ maa wo Mumi Klɔuklɔu ɔ blɔ kɛ ba nyɛ ngɔ. Yemi kɛ bualɔ nɛ ɔ maa ba ngɛ ye biɛ mi, nɛ nɔ́ tsuaa nɔ́ nɛ hia kaa nyɛɛ le ɔ, e maa tsɔɔ nyɛ.’ (Yohane 14:26) Mawu haa wɔ e mumi klɔuklɔu ɔ, nɛ ji he wami nɛ e kɛ tsu ɔ ní ɔ konɛ e ye bua wɔ nɛ waa nu níhi nɛ wa kaneɔ ngɛ Baiblo ɔ mi ɔ a sisi. Se Mawu kɛ e mumi klɔuklɔu ɔ ha we nihi nɛ a kɛ a hɛ fɔɛ e nɔ ɔ. Lɔ ɔ he je nɛ behi fuu ɔ, e yee ha mɛ kaa a maa nu Baiblo sisi ɔ nɛ. Mumi klɔuklɔu ɔ hu woɔ Kristofohi nɛ a nu Baiblo ɔ sisi saminya a he wami nɛ a ya yeɔ bua nihi nɛ suɔ nɛ a nu Baiblo ɔ sisi ɔ.
—Bɔfo Ɔmɛ A Ní Tsumi 8:26-35. -
Baiblo ɔ mi munyu komɛ ngɛ nɛ adesahi maa nu sisi saminya ngɛ be nɛ sa mi. Kaa nɔ hyɛmi nɔ́ ɔ, bɔfo ko de gbalɔ Daniel ke e ngma sɛ gbi ko nɛ maa ba mi hwɔɔ se ɔ kɛ fɔ si. Bɔfo ɔ de lɛ ke: “Daniel, jehanɛ nga womi ɔ nya, nɛ o sɔu nya kɛ yaa si je mi nyagbe.” Maa pee jeha lafahi nɛ be ɔ, nihi fuu kane Daniel womi ɔ se a nui sisi saminya. Ngɛ anɔkuale mi ɔ, Daniel nitsɛ po nui níhi nɛ e ngma a ekomɛ a sisi. E je he si bami mi kɛ de ke: “I nu nɔ́ nɛ e de ɔ lɛɛ, se i nui sisi.” Bɔɔbɔɔbɔɔ ɔ, nihi ma ba nu gbami nɛ Mawu ha nɛ Daniel ngma a sisi ngɛ be nɛ Mawu nitsɛ to ɔ mi. Bɔfo ɔ ya nɔ nɛ e de lɛ ke: “Daniel, amlɔ nɛ ɔ, yaa. Ejakaa munyu nɛ ɔmɛ ɔ, a kɛ maa to, nɛ a maa laa nɔ kɛ yaa si nyagbe be ɔ.” Mɛnɔmɛ lɛ a maa nu Mawu sɛ gbi ɔ sisi? “Yiwutsotsɛmɛ be sisi nue; a maa ya nɔ maa pee yayami, ní leli ɔmɛ lɛɛ a maa nu sisi.” (Daniel 12:4, 8-10) Enɛ ɔ tsɔɔ kaa Mawu haa nɛ wa nuɔ ngmami komɛ a sisi ngɛ be nɛ sa mi.
Anɛ be ko nɛ be ɔ jinɛ Yehowa Odasefohi nui Baiblo mi munyu komɛ a sisi saminya lo? Ee. Se benɛ Mawu ha nɛ ngmami komɛ a mi ba tɛ̃ heii ɔ, Odasefo ɔmɛ pee tsakemi. Be fɛɛ be nɛ Yesu ma dla e kaseli ɔmɛ a juɛmi ngɛ nɔ́ ko he ɔ, a jeɔ he si bami mi nɛ a kɛ tsuɔ ní. Enɛ ɔ ha nɛ Yehowa Odasefohi he ye kaa a ngɛ Kristo kaseli ɔmɛ a nɔ hyɛmi nɔ́ ɔ kasee niinɛ.
Jokuɛ yoyo ɔ nɛ wa tu e he munyu kɛ sɛ hlami ɔ nui bɔ nɛ bɔku plɛɔ kɛ baa ha a sisi, se lɔ ɔ puɛ we nɔ́ ko tsɔ. Se Baiblo ɔ tsɔɔmi ɔmɛ lɛɛ a he hia nitsɛnitsɛ. Koo kane Baiblo ɔ kɛkɛ. Mo hla yemi kɛ buami konɛ o nu nɔ́ nɛ o kaneɔ ngɛ Baiblo ɔ mi ɔ sisi. Mo hla nihi nɛ a kɛ he si bami kaseɔ Baiblo ɔ, nihi nɛ a kɛ a hɛ fɔɔ Mawu nɔ konɛ e ngɔ e mumi klɔuklɔu ɔ kɛ ye bua mɛ nɛ a nu Baiblo ɔ sisi, nihi nɛ a ngɛ nɔ mi mami kaa wa ngɛ be nɛ Mawu to kaa e ma ha nɛ waa nu Baiblo ɔ sisi saminya a mi ɔ a se blɔ. O kɛ Yehowa Odasefohi ma nyɛ maa sɛɛ ni faa. O ma nyɛ maa kane níhi a mi hlamihi nɛ a pee nɛ a kɛ fɔ jw.org/ada wɛbsaiti ɔ nɔ ɔ eko. Baiblo ɔ wo si ke: ‘Ke o kpa pɛɛ nɛ a ha mo nɔ́ sisi numi ɔ . . . , o ma ná Mawu he nile.’