Rosie de ke, “I kɛ ye juɛmi maa nyagba komɛ a nɔ nɛ i susuɔ a he wawɛɛ, be mi nɛ ngɛ anɔkuale mi ɔ, nyagba a pi nyagba ko tsɔ.” Mɛni Baiblo ngmamihi lɛ ye bua lɛ? Kake ji Mateo 6:34: “Nyɛ ko pee yeyeeye kɔkɔɔkɔ ngɛ hwɔɔ he, ejakaa hwɔɔ hu ma ná lɛ nitsɛ e yeyeeye peemi. Ligbi fɛɛ ligbi haomihi hiɛ ha lɛ.” Amlɔ nɛ ɔ, Rosie tsɔɔ kaa Yesu munyu ɔ ye bua lɛ nɛ e kpa e he haomi ngɛ nɔ́ nɛ maa ba hwɔɔ he. E kɛ piɛ he ke, “I ngɛ haomihi fuu momo, lɔ ɔ he ɔ, e sɛ nɛ ma hi si fɔfɔɛ komɛ nɛ i susu kaa a ma nyɛ maa pe nyagba, pohu a bɛ lolo, nɛ eko po ɔ, a be mi bae ɔ he susue.”

Yasmine hu ba na kaa yeyeeye peemi ha nɛ e pee basaa. E de ke, “Ngɛ otsi ɔ mi ɔ, be komɛ i foɔ ya si enyɔ loo si etɛ, nɛ nyɔ mi hu be komɛ ngɛ nɛ i nɛ́ mahe. Susumi yayami nɛ ɔmɛ ha nɛ i nu he kaa i be mumi wo he.” Mɛni Baiblo ngmamihi lɛ ye bua lɛ? E tsɔɔ kaa 1 Petro 5:7 ɔ. Lejɛ ɔ de ke “Nɛ nyɛ sake nyɛ yeyeeye peemi ɔmɛ tsuo ngɔ fɔ e nɔ, ejakaa e susuɔ nyɛ he.” Yasmine kɛ piɛ he ke: “Be nɛ je ngɛ jɔe nɛ je ngɛ nae ɔ, imi hu i sɔleɔ daa kɛ haa Yehowa, nɛ e haa ye sɔlemi ɔmɛ a heto. Enɛ ɔ ha nɛ i nu he kaa a je tlomi ngua ko ngɛ ye konɔ. E ngɛ mi kaa ngɛ be kɛ behi a mi ɔ, yi mi susumi yaya nɛ ɔmɛ baa mohu lɛɛ, se jehanɛ lɛɛ, i le bɔ nɛ ma tsu a he ní ha.”

Zangmayo ko nɛ a tsɛɛ lɛ ke Isabella a de ke: “I susu kaa nɔ́ tsɛ̃ mi kɛ to ɔ ji su ko nɛ a kɛ fɔ mi, ejakaa e ngɛ ye papaa hu he. I tsɛ̃ɔ níhi nɛ a he hia kɛ to ɔ, konɛ ma jɔɔ ye he aloo ma hyɛ TV mohu. E ji su yaya ejakaa e haa nɛ pɔ tɔɔ nɔ he, nɛ o nyɛ we nɛ o pee níhi saminya.” Sisi tomi mlaa nɛ ye bua lɛ ɔ ngɛ 2 Timoteo 2:15, nɛ deɔ ke: “Bɔɔ mɔde wawɛɛ nitsɛ konɛ o ngɔ o he kɛ ha kaa nɔ nɛ Mawu bua jɔ e he, ní tsulɔ nɛ nɔ́ ko be nɛ zo maa gbe lɛ ngɛ he.” Isabella de ke, “I sume nɛ zo nɛ gbe Yehowa ngɛ ye ní tsumi he akɛnɛ i tsɛ̃ ye ní tsumi ɔ kɛ to he je.” E pee tsakemihi nɛ sa kadimi wawɛɛ.

Jã kɛ̃ nɛ yiheyo ko hu nɛ a tsɛɛ le ke Kelsey ɔ de: “I tsɛ̃ɔ ní tsumihi nɛ a he hia a kɛ toɔ nɛ ja fɔmi su gbongu mi loko i peeɔ. I foɔ ya, i nɛ́ mahe nɛ i haoɔ. Su nɛ ɔ gba ye nya.” Munyu nɛ ngɛ Abɛ 13:16 a ye bua Kelsey. Lejɛ ɔ de ke: “Ní lelɔ peeɔ e ní kɛ juɛmi, se kuasia lɛɛ e jeɔ e biɛmi kpo ngɛ ma hɛ mi.” E tsɔɔ nɔ́ nɛ e kase benɛ e pue e yi mi tɛ ngɛ ngmami nɛ ɔ he ɔ: “Nile ngɛ mi kaa o maa sɛ hlami kɛ to níhi a he blɔ nya. Piɔ ɔ, i ngɛ womi ko ngɛ ye okplɔɔ ɔ nɔ, nɛ i ngma ní tsumihi tsuo nɛ e sa kaa maa tsu ɔ kɛ wo mi. Enɛ ɔ haa nɛ i tsuɔ ní ɔ ngɛ be nya. Amlɔ nɛ ɔ, fɔmi sui gbongu mi loko i tsuɔ ye ní tsumihi.”

Yo ko nɛ a tsɛɛ lɛ ke Kirsten ɔ de ke: “Ye huno ɔ je bimɛ eywiɛ nɛ i kɛ lɛ wa fɔ ɔ he puɛ ye nɔ́ nɛ e kua mi.” Mɛni Baiblo sisi tomi mlaa nɛ ye bua lɛ? Abɛ 17:17 ɔ, e de ke: “Huɛmɛ suɔ a he be tsuaa be, se nyɛmimɛ lɛɛ haomi be mi tete po a si we a sibi.” Kirsten sɔmɔɔ Yehowa, enɛ ɔ he ɔ e kɛ nihi nɛ a jaa Yehowa a lɛ bɔ. Kɛ e ná he se ha kɛɛ? E de ke: “Ye huɛmɛ ɔmɛ ye bua mi ngɛ blɔ slɔɔtohi fuu a nɔ! A kpɛti ni komɛ ya yeɔ jua nɛ a heɔ mɔmɔhi kɛ ba fɔɔ ye sinya a nya. Huɛmɛ nɛ a he hiɛ saii ye bua wɔ nɛ wa hia loo wa klɛ̃ kɛ je he kake kɛ ya he kpa si etɛ sɔuu. A ti nɔ kake ye bua mi nɛ i ná ní tsumi. Ngɛ anɔkuale mi ɔ, ye huɛmɛ ɔmɛ si we mi kɔkɔɔkɔ.”

Delphine nɛ wa wo e ta kɛ sɛ hlami ɔ hu kɛ hɛ ja si himi kpe. E kai kaa benɛ e nɔ́ fɛɛ nɔ́ bɔ lɛ se ɔ, i de ke: “e pee mi kaa nɔ́ nɛ i ya fiɛɛmi he ko nɛ nɔ fɛɛ nɔ bua jɔ, se imi lɛɛ i be mi nɛ a yaa. Ye hɛ ja wawɛɛ.” Ngmami kake nɛ ye bua lɛ ji La 68:6. E de ke: “Nihi nɛ nɔ ko be mɛ ɔ, Mawu haa mɛ we nɛ a hii mi.” E tsɔɔ mi kaa: “I le kaa pi he lo nya we pɛ he munyu nɛ ngmami ɔ ngɛ tue. Mohu ɔ, i ba nu sisi kaa Mawu ha wɔ mumi mi we ko nɛ tue mi jɔmi, suɔmi kɛ kake peemi ngɛ mi. Nɛ nihi nɛ a ngɛ we nɛ ɔ mi ɔ suɔ Yehowa, nɛ waa kɛ mɛ ma nyɛ maa nu huɛ. Se i le kaa loko ma nyɛ ma hɛ kɛ su ni kpahi a he ɔ, ja i hɛ lɛ kɛ su Yehowa he kekle. Lɔ he ɔ, ngmami nɛ ngɛ La 37:4 ɔ ye bua mi ngɛ enɛ ɔ blɔ fa mi. Lejɛ ɔ de ke: ‘Mo na Yehowa he bua jɔmi, nɛ e ma ha mo níhi nɛ o tsui suɔ.’”

E mwɔ e munyu ɔ nya ke: “I ba na kaa e sa nɛ ma mɛtɛ Yehowa he wawɛɛ pe be ko nɛ be ɔ. Ejakaa lɛɛ e se ɔ, nɔ ko be. Kɛkɛ nɛ i ngma níhi nɛ i kɛ ni kpahi ma nyɛ maa pee nɛ ma ha mi bua jɔmi. Enɛ ɔ ma ha nɛ i kɛ nihi nɛ mɛ hu a suɔ Yehowa a maa bɔ. I kase bɔ nɛ ma nyɛ ma yɔse su kpakpahi nɛ ni kpahi ngɛ, nɛ i kɛ mɛ nɛ ye kaa ye huɛmɛ nitsɛnitsɛmɛ.”

E ji anɔkuale kaa loloolo ɔ, nihi nɛ a sɔmɔɔ Yehowa a yi mluku. Yehowa Odasefohi kɛ nyagbahi kpeɔ kaa ni kpahi nɔuu. Se Baiblo ɔ mi tsɔsemi woɔ nihi he wami kaa be fɛɛ be nɛ a ma nyɛ ɔ, a ye bua ni kpahi. Nile ngɛ mi kaa waa kɛ nihi kaa kikɛ maa bɔ huɛ. Se, anɛ Baiblo sisi tomi mlaahi ma nyɛ maa ye bua wɔ konɛ waa da haomi komɛ kaa hiɔ kɛ aywilɛho yemi nɛ ji níhi nɛ wa be nyɛe maa pee a he nɔ́ ko piɔ ɔ nya lo?