Kɛ A Tsɛɛ Mawu Kɛɛ? Mawu nitsɛ de ke: ‘Ye biɛ ji Yehowa, imi pɛ ji Mawu.’ (Yesaya 42:8) Mawu biɛ ɔ je kpo ngɛ Baiblo ɔ mi maa pee si 7,000 sɔuu. Se kɛ̃ ɔ, a je biɛ nɛ ɔ kɛ je Baiblo sisi tsɔɔmihi fuu a mi, nɛ a ngɔ sablai nɛ ji “Nyɔmtsɛ” kɛ to nane mi. Mawu suɔ kaa o pee e huɛ, enɛ ɔ he je nɛ e ngɛ mo he wami woe nɛ o “wo e biɛ ta” a nɛ.​—La 105:1.

Yehowa Sablai Ɔmɛ. Ngɛ Baiblo ɔ mi ɔ, a kɛ sablaihi kaa “Mawu,” “Ope,” “Bɔlɔ,” “Tsɛ,” “Nyɔmtsɛ,” kɛ “Je ɔ Tsuo Nɔ Yelɔ” ɔ tsɛɛ Yehowa. A ngma sɔlemihi fuu ngɛ Baiblo ɔ mi nɛ́ a kɛ Mawu sablai ɔ kake kɛ e biɛ, nɛ ji Yehowa a tsuo tsu ní.​—Daniel 9:4.

 Bɔ Nɛ Mawu Ngɛ Ha. Mawu ji mumi, nɛ nɔ ko be nyɛe maa na lɛ kɛ e hɛngmɛ. (Yohane 4:24) Baiblo ɔ tsɔɔ kaa “adesa ko nɛ Mawu hyɛ.” (Yohane 1:18) Baiblo ɔ haa nɛ wa naa bɔ nɛ Mawu nuɔ nɔ́ he ha. Nihi a ní peepee ma nyɛ maa hao lɛ loo e ma nyɛ ma ha nɛ e “ná bua jɔmi.”​—Abɛ 27:11; La 78:40, 41.

Mawu Suhi Nɛ A Ngɛ Nyakpɛ ɔ. Mawu hlɛ nɔ mi, nɛ e hyɛ we ma loo wɛtso nɛ nɔ ko je mi. (Ní Tsumi 10:34, 35) Jehanɛ hu ɔ, ‘mɔbɔ nalɔ, kɛ dloolɔ ji lɛ; e mi mi fu we mla, nɛ e suɔmi kɛ anɔkuale yemi hiɛ babauu.’ (2 Mose 34:6, 7) Se kɛ̃ ɔ, Mawu ngɛ su eywiɛ komɛ nɛ a sa kadimi wawɛɛ.

He Wami. Akɛnɛ lɛ ji “Mawu Ope” he je ɔ, e ngɛ he wami nɛ e kɛ maa pee níhi tsuo nɛ e wo a he si ɔ.​—1 Mose 17:1.

Juɛmi. Mawu juɛmi ɔ mi kuɔ pe adesahi a nɔ́ ɔ. Enɛ ɔ he je nɛ Baiblo ɔ de ke, lɛ “nɔ kake too pɛ ji juɛmitsɛ” ɔ nɛ.​—Roma Bi 16:27.

Dami Sane Yemi. Mawu peeɔ nɔ́ nɛ da be fɛɛ be. E ní peepeehi tsuo “hi kɛ pi si,” nɛ e “da ngɛ blɔ tsuaa blɔ nɔ.”​—5 Mose 32:4.

Suɔmi. Baiblo ɔ de ke, “Mawu ji suɔmi.” (1 Yohane 4:8) Pi suɔmi pɛ nɛ Mawu jeɔ kpo, mohu ɔ, e peeɔ suɔmi he nɔ hyɛmi nɔ́ nɛ pe kulaa. E suɔmi nɛ se be ɔ lɛ kudɔɔ níhi tsuo nɛ e peeɔ ɔ nɛ, nɛ wa náa he se ngɛ blɔ slɔɔtohi a nɔ.

Huɛ Bɔmi Nɛ Ngɛ Mawu Kɛ Adesahi A Kpɛti. Mawu ji wa hiɔwe Tsɛ nɛ ngɛ suɔmi. (Mateo 6:9) Wa ma nyɛ maa pee e huɛmɛ ke wa ná hemi kɛ yemi ngɛ e mi. (La 25:14) Ngɛ anɔkuale mi ɔ, Mawu ngɛ mo nine fɔe kaa o hɛ mo kɛ su e he kɛ gu sɔlemi nɔ nɛ o ‘sake o yeyeeye peemi ɔmɛ tsuo ngɔ fɔ e nɔ, ejakaa e susuɔ o he.’​—1 Petro 5:7; Yakobo 4:8.

Pi Yesu Ji Mawu. Yesu ngɛ slɔɔto ejakaa lɛ pɛ ji nɔ nɛ Mawu bɔ tɛ̃ɛ. Enɛ ɔ he je nɛ Baiblo ɔ tsɛɛ lɛ ke Mawu Bi ɔ nɛ. (Yohane 1:14) Benɛ Yehowa bɔ Yesu se ɔ, e kɛ e bitɛte ɔ tsu ní kaa “ga ní tsulɔ kpanaa” kɛ bɔ nimli adesahi kɛ ní kpahi tsuo.​—Abɛ 8:30, 31; Kolose Bi 1:15, 16.

 Yesu Kristo de we gblee kaa lɛ ji Mawu. Mohu ɔ, e de ke: “I ba kaa [Mawu] nane mi dalɔ, nɛ jamɛ a Nɔ ɔ lɛ e tsɔ mi.” (Yohane 7:29) Benɛ Yesu kɛ e kaseli ɔmɛ a ti nɔ kake ngɛ munyu tue ɔ, e tsɛ Yehowa ke, “ye Tsɛ ɔ kɛ nyɛ hu nyɛ Tsɛ ɔ” kɛ “ye Mawu ɔ kɛ nyɛ hu nyɛ Mawu ɔ.” (Yohane 20:17) Benɛ Yesu gbo se ɔ, Yehowa tle lɛ si kɛ ho hiɔwe ya nɛ e ha lɛ blɔ nya ngua ngɛ e hiɔ nɔ.​—Mateo 28:18; Ní Tsumi 2:32, 33.

Yesu Kristo Ma Nyɛ Maa Ye Bua Mo Konɛ O Hɛ Kɛ Su Mawu He

Yesu ba zugba a nɔ konɛ e ba tsɔɔ wɔ e Tsɛ ɔ he ní. Yehowa nitsɛ de ngɛ Yesu he ke: “Ye Bi nɛ i suɔ lɛ, nɛ ye bua jɔ e he ji nɛ ɔ nɛ. Nyɛɛ bu lɛ tue.” (Maako 9:7) Yesu le Mawu saminya pe nɔ fɛɛ nɔ. E de ke: “Nɔ ko be nɛ e le nɔ nɛ Tsɛ ɔ ji, kaa ja Bi ɔ kɛ nɔ fɛɛ nɔ nɛ Bi ɔ suɔ kaa e ma ha nɛ e le Tsɛ ɔ pɛ.”​—Luka 10:22.

Yesu je Mawu su ɔmɛ kpo pɛpɛɛpɛ. Yesu kase e Tsɛ ɔ su ɔmɛ pɛpɛɛpɛ nɛ lɔ ɔ he je nɛ e nyɛ nɛ e de ke: “Nɔ fɛɛ nɔ nɛ e na mi ɔ, e na Tsɛ ɔ hulɔ” ɔ nɛ. (Yohane 14:9) Yesu gbla nihi kɛ ba Mawu ngɔ kɛ gu e Tsɛ ɔ suɔmi ɔ nɛ e je kpo kɛ tsɔɔ nihi ngɛ bɔ nɛ e tu munyu kɛ bɔ nɛ e pee e ní ha a nɔ. E de ke: “Imi ji blɔ ɔ kɛ anɔkuale ɔ kɛ wami ɔ nɛ. Nɔ ko bɛ Tsɛ ɔ ngɔ kaa ja e gu ye nɔ.” (Yohane 14:6) E de hu ke: “Anɔkuale jali kɛ mumi kɛ anɔkuale ma ja Tsɛ ɔ, ejakaa niinɛ, Tsɛ ɔ ngɛ nihi kaa kikɛ nɛ ɔ hlae nɛ a ja lɛ.” (Yohane 4:23) Mo susu he nɛ o hyɛ! Yehowa ngɛ nihi nɛ a ngɛ kaa mo nɛ a suɔ kaa a maa le anɔkuale nɛ kɔɔ e he ɔ hlae.