MUNYUHI NƐ wa susu a he kɛ sɛ hlami ɔ tsɔɔ bɔ nɛ nyagba slɔɔtohi nɛ waa kɛ kpeɔ ɔ haa nɛ wa si himi peeɔ basaa ha. Be mi nɛ o ngɛ mɔde bɔe kɛ ngɛ o haomi ɔmɛ a nya dae ɔ, eko ɔ, o ma bi ke ji wami he ngɛ se nami, aloo kaa nɔ ko susuɔ o he lo. Se mo ná nɔ mi mami kaa Mawu susuɔ o nɔ́ nami ɔ he. O he jua wa kɛ ha lɛ.

Nɔ nɛ ngma La 86 a kɛ nɔ mi mami de ngɛ Mawu he ke: “Ligbi nɔ nɛ e ma fi mi ɔ, ma tsɛ mo; ejakaa i le kaa o maa pee ye hiami ní ɔmɛ ha mi.” (La 86:7) Se eko ɔ, o ma bi ke, ‘Mɛni blɔ nɔ Mawu maa gu kɛ “pee ye hiami ní ɔmɛ ha mi”?’

E ngɛ mi kaa eko ɔ, Mawu be o nyagba amɛ jee kɛ je amlɔ nɔuu mohu lɛɛ, se e Munyu ɔ nɛ ji Baiblo ɔ ngɛ mo nɔ mi mami hae kaa e ma nyɛ ma ha mo tue mi jɔmi konɛ o kɛ da nya: “Nyɛ ko pee yeyeeye ngɛ nɔ́ ko nɔ́ ko he, se mohu ngɛ nɔ́ fɛɛ nɔ́ mi ɔ, nyɛɛ gu sɔlemi kɛ pɛɛ kpami nɛ mi wa kɛ sina nɔ kɛ ha nɛ Mawu nɛ e le nyɛ ní bimi ɔmɛ; nɛ Mawu tue mi jɔmi ɔ nɛ pã níhi a sisi numi tsuo ɔ maa bu nyɛ tsui kɛ nyɛ juɛmi he.” (Filipi Bi 4:6, 7) Mo susu bɔ nɛ Baiblo ngmamihi nɛ nyɛɛ se ɔ ha wɔ nɔ mi mami kaa Mawu susuɔ wa he haa he nɛ o hyɛ.

‘Mawu hɛ ji otoklii kake po nɔ. Nyɛ he jua wa kulaa pe otokliihi babauu.’​—Luka 12:6, 7, sisi ningma.

MO SUSU HE NƐ O HYƐ: Nihi buu lohwe pɛlitsɛmɛ nyafinyafihi kaa a he be se nami, se Mawu susuɔ a he. Mawu hɛ ngmɛ ngɛ otoklii tsɔwitsɔwi nɛ ɔmɛ a he. Nɔ́ fɛɛ nɔ́ nɛ wami ngɛ mi ɔ he jua wa kɛ ha lɛ. Nimli adesahi a he jua wa kɛ ha Mawu kulaa pe otoklii. Ngɛ Mawu nibɔ níhi nɛ a ngɛ zugba a nɔ ɔ tsuo a kpɛti ɔ, adesahi pɛ nɛ a se be. Mawu bɔ adesahi “kaa bɔ nɛ lɛ nitsɛ e ngɛ ɔ.” A ma nyɛ ma je Mawu suhi nɛ a nɔ kuɔ ɔmɛ kpo.​—1 Mose 1:26, 27.

‘Yehowa, o hyɛ ye mi tsuo, nɛ o le bɔ nɛ i ngɛ. Ye yi mi tomi tsuo pɛpɛɛpɛ, o le momo. Kaa mi nɛ o hyɛ, nɛ o na níhi nɛ ngɛ ye juɛmi mi.’—La 139:1, 2, 23.

MO SUSU HE NƐ O HYƐ. Mawu le mo saminya. E le haomihi nɛ o kɛ ngɛ kpee kɛ bɔ nɛ o nuɔ he ha a tsuo. E ngɛ mi kaa be komɛ ɔ, ni kpahi be o haomi kɛ o si fɔfɔɛ ɔ sisi nue mohu lɛɛ, se Mawu lɛɛ e susuɔ o he nɛ e suɔ kaa e maa ye bua mo. Enɛ ɔ maa nɔ mi kaa se nami ngɛ o wami he.

‘Yehowa, i ngɛ mo tsɛe nɛ o ba piɛ ye he. Moo bu ye kue fami ɔ tue koo! Ke i tsɛ mo ɔ, he nɔ esɔ, nɛ o pee ye hiami ní ɔmɛ ha mi. E maa bu e nihi nɛ e kua mɛ ɔ a kue fami ɔ tue.’—La 102:1, 2, 17.

MO SUSU HE NƐ O HYƐ: E ngɛ kaa nɔ́ nɛ kɛ je benɛ adesahi bɔni nɔ́ nami ɔ, Yehowa hɛ ji vo nyu fɛɛ vo nyu nɛ adesahi wɔleɔ ngɛ a nɔ́ nami ɔmɛ a he ɔ nɔ. (La 56:8) Mo hu o vo nyu ɔ piɛɛ he. Mawu hɛ ji kahi nɛ o kɛ ngɛ kpee, kɛ o ya fomi ɔ nɔ, ejakaa o he jua wa kɛ ha lɛ.

‘Ko ha nɛ nɔ́ ko nɛ wo o he gbeye. Imi ji o Mawu ɔ nɛ! Ma wo mo he wami; ma piɛ o he. Imi ji Yehowa, o Mawu ɔ nɛ; imi lɛ i ngɛ mo he wami woe ɔ nɛ, i ngɛ mo dee ke, “koo ye gbeye! Ma piɛ o he!”’​—Yesaya 41:10, 13.

MO SUSU HE NƐ O HYƐ: Mawu pee klaalo kaa e maa ye bua mo. Ke o nɔ si ɔ, e ma wo o nɔ.

“Ejakaa Mawu suɔ je ɔ saminya, nɛ lɔ ɔ he ɔ, e ngɔ e Bi kake too ɔ kɛ ha, konɛ nɔ fɛɛ nɔ nɛ e heɔ lɛ yeɔ ɔ, a ko kpata e hɛ mi, mohu ɔ, e ná neneene wami.”​—Yohane 3:16.

MO SUSU HE NƐ O HYƐ: O he jua wa kɛ ha Mawu hluu kaa e je e suɔmi mi nɛ e ngɔ e Bi, nɛ ji Yesu kɛ sã afɔle ngɛ o he. Afɔle sami nɛ ɔ ha nɛ o ná hɛ kɛ nɔ fɔmi kaa o ma ná si himi nɛ bua jɔmi ngɛ mi, kɛ wami nɛ se be kɛ maa ya neneene. a