Mawu de Adam ke, “ligbi nɛ o maa ye [tso ɔ yiblii ɔ], o ma gbo.” (1 Mose 2:17) Kaa Mawu bɔ Adam nɛ e bwɔ nɛ e gbo ɔ, jinɛ nile be mi kaa Mawu ko wo lɛ mlaa nɛ ɔ. Adam le kaa ke e yi tso yiblii ɔ, e be gboe.

E he hia we nɛ Adam kɛ Hawa nɛ a ye jamɛ a tso ɔ yiblii ɔ loko a hi wami mi, ejakaa tsohi fuu ngɛ abɔɔ ɔ mi. (1 Mose 2:9) Kaa Adam kɛ Hawa yi jamɛ a tso ɔ yiblii ɔ, jinɛ lɔ ɔ ko tsɔɔ kaa a buɔ Nɔ nɛ ha mɛ wami ɔ tue. Nɛ lɔ ɔ hu ko tsɔɔ kaa a yɔse he blɔ nɛ Mawu ngɛ kaa e tsɔɔ mɛ blɔ ɔ.

Bɔ nɛ pee nɛ waa le nɔ́ he je nɛ Adam kɛ Hawa gbo ɔ, e sa nɛ wa susu ní sɛɛmi ko nɛ ya nɔ nɛ sa wɔ tsuo wa he ɔ he. Satan Abosiami gu sinɔ nɔ kɛ ye lakpa ko nɛ ngɛ hɛdɔ. Baiblo ɔ de ke: ‘Nga mi lohwehi tsuo nɛ Yehowa Mawu pee ɔ, sinɔ ji gatsɛ pe mɛ tsuo. Sinɔ ɔ bi yo ɔ ke, “Anɛ Mawu de nyɛ niinɛ ke tso ɔmɛ nɛ ngɛ ngmɔ ɔ mi ɔ, nyɛ ko ye ekoeko nɔ yiblii lo?”’​—1 Mose 3:1.

Hawa ha lɛ heto ke: “Wa ma nyɛ maa ye tso yiblii tsuaa tso yiblii, ja tso ɔ nɛ ngɛ ngmɔ ɔ kpɛti tutuutu ɔ pɛ. Mawu ke wa ko ye jamɛ a tso ɔ yiblii, nɛ wa ko ta he hulɔ; ke wa pee ja a, wa ma gbo.” Lɔ ɔ se ɔ, sinɔ ɔ de yo ɔ ke: “Oo, nyɛ be gboe! Mawu de ja, ejakaa e le kaa ke nyɛ ye jamɛ a tso ɔ yiblii ɔ, nyɛ hɛngmɛ ma bli, nɛ nyɛ maa hi kaa lɛ Mawu ɔ nitsɛ; nyɛ maa le kpakpa kɛ yayami.” Lɔ ɔ he ɔ, Satan ngɛ tsɔɔe kaa Yehowa ji lakpatsɛ nɛ e ngɔ ní kpakpahi kɛ laa wa kekle fɔli ɔmɛ.​—1 Mose 3:2-5.

Hawa he nɔ́ nɛ e nu ɔ ye. E hyɛ tso ɔ yiblii ɔ totooto, nɛ e na kaa e ngɛ akɔnɔ, nɛ e maa ngɔ! E kpa e nine mi nɛ e tsɔ tso ɔ yiblii ɔ eko nɛ e bɔni yemi. Lɔ ɔ se ɔ, Baiblo ɔ de ke: “Nɛ e ha e huno ɔ hu eko nɛ e ye.”​—1 Mose 3:6.

Hyɛ bɔ nɛ e maa dɔ Mawu ha benɛ e na kaa e bimɛ nɛ e suɔ mɛ ɔ je blɔ nɛ a gbo e nɔ tue ɔ! Se mɛni e pee? Yehowa de Adam ke: ‘O maa kpale kɛ ya zu ɔ nɛ i tĩ kɛ puɛ mo ɔ mi. Zu ji mo, nɛ o maa kpale kɛ ya zu mi ekohu.’ (1 Mose 3:17-19) Enɛ ɔ he ɔ, “Adam ye jeha 930 nɛ e gbo.” (1 Mose 5:5) Benɛ Adam gbo ɔ, e yɛ hiɔwe loo mumi a je ko. Loko Yehowa maa ti zugba zu kɛ bɔ Adam ɔ, e be wami mi. Benɛ e gbo ɔ, e be wami mi hu kaa bɔ nɛ zu nɛ a ti kɛ bɔ lɛ ɔ ngɛ ɔ. E be si himi mi hu. Hyɛ bɔ nɛ e ngɛ aywilɛho ha!

Akɛnɛ Adam kɛ Hawa je blɔ nɛ a gbo tue he je ɔ, a yi mluku hu, nɛ hɛ nɔ kami nɛ a ngɛ kaa a maa hi si kɛ ya neneene ɔ hu bɔ mɛ. A nɔmlɔ tso ɔ tsake; a yi mluku hu nɛ yayami ngɛ a he. Se yayami nɛ a pee kɛ gu Mawu tue nɛ a gbo ɔ nɔ ɔ sɛ mɛ pɛ a he. A ngɔ yayami nɛ ɔ kɛ sã a nina. Roma Bi 5:12 ɔ de ke: “Kaa bɔ nɛ kɛ gu adesa kake [Adam] nɔ ɔ, yayami ba je ɔ mi, nɛ gbenɔ gu yayami nɔ kɛ ba, nɛ lɔ ɔ he ɔ, gbenɔ sã adesahi tsuo, ejakaa mɛ tsuo a pee yayami.”

Baiblo ɔ kale yayami kɛ gbenɔ kaa ‘bo nɛ a ngɔ kɛ ha je ma amɛ a nɔ.’ (Yesaya 25:7) Jamɛ a bo ɔ nɛ ha adesahi a nɔ ɔ ngɛ kaa duɔ ngɛ kɔɔhiɔ mi, nɛ a be nyɛe maa tu nya fo. Ngɛ anɔkuale mi ɔ, “nihi tsuo ngɛ gboe ngɛ Adam mi.” (1 Korinto Bi 15:22) Sane nɛ bɔfo Paulo bi ji nɛ ɔ nɛ: “Mɛnɔ ma kpɔ̃ mi kɛ je nɔmlɔ tso nɛ e kɛ mi ngɛ gbenɔ nɛ ɔ mi woe ɔ dɛ mi?” Nɔ ko ma nyɛ lo?​—Roma Bi 7:24.