Baiblo ga womi: “Nyɛ ko ha nɛ sika suɔmi nɛ hi nyɛ si himi mi, be mi nɛ níhi nɛ nyɛ ngɛ amlɔ nɛ ɔ hiɛ kɛ ha nyɛ ɔ.”—Hebri Bi 13:5.

Mwɔnɛ ɔ, nihi woɔ wɔ he wami kaa wa ná níhi fuu. Se kɛ̃ ɔ, Baiblo ɔ tsɔɔ kaa wa ma nyɛ ma ha nɛ ‘níhi nɛ wa ngɛ amlɔ nɛ ɔ nɛ hiɛ ha wɔ.’ Ngɛ mɛni blɔ nɔ?

Nyɛ kua “sika suɔmi.” Nihi ngɔɔ a nɔmlɔ tso mi he wami nami, weku, huɛmɛ, je mi bami kpakpa, kɛ hɛ mi nyami kɛ sãa afɔle ngɛ “sika suɔmi” he je. (1 Timoteo 6:10) Se se nami ko kulaa be he! Ngɛ anɔkuale mi ɔ, nɔ nɛ suɔ sika a, “sika tɔɛ lɛ.”​—Fiɛlɔ 5:10.

Moo bu nimli, se pi níhi. Niinɛ, he lo nya níhi a he hia. Se níhi be nyɛe maa suɔ wɔ; nimli pɛ nɛ a ma nyɛ maa pee jã. “Huɛmɛ” kpakpahi nɛ wa ma ná a maa ye bua wɔ konɛ wa bua nɛ jɔ níhi nɛ wa ngɛ ɔ a he.​—Abɛ 17:17.

Baiblo ga womi: “Ke nɔ ko bua jɔ e he be tsuaa be ɔ, e ngɛ kaa tsopa nɛ haa nɔ he wami.”​—Abɛ 17:22.

Kaa bɔ nɛ “tsopa” kpakpa ngɛ ɔ, bua jɔmi ma nyɛ maa ye bua wɔ ke wa be he wami. Se kɛ wa ma plɛ kɛ ná bua jɔmi ha kɛɛ ke wa be nɔmlɔ tso mi he wami kpakpa?

Mo je hɛ sa kpo. Ke wa susuɔ wa nyagba amɛ pɛ a he ɔ, wa “wami be tsuo” maa pee haomi sɔuu. (Abɛ 15:15) Se Baiblo ɔ de ke, “nyɛɛ pee nyɛ he nihi nɛ a le sina.” (Kolose Bi 3:15) O hɛ nɛ sa ní nyafinyafihi po nɛ o náa ngɛ si himi mi ɔ a he. Kaa nɔ hyɛmi nɔ́ ɔ, ke wa na benɛ pu nɔ si, benɛ kɔɔhiɔ nganii ko ngɛ fiae, loo benɛ wa suɔlɔ ko muɔ hɛlii ɔ, anɛ lɔ ɔmɛ ha we nɛ wa bua jɔɔ ngɛ si himi mi lo?

Moo ye bua ni kpahi. Ke wa be he wami po ɔ, wa kai kaa “bua jɔmi babauu ngɛ nɔ́ hami mi pe nɔ́ ngɔmi.” (Ní Tsumi 20:35) Ke ni kpahi je hɛ sa kpo ngɛ níhi nɛ wa pee kɛ ha mɛ ɔ he ɔ, lɔ ɔ haa nɛ wa tsui nɔɔ wa mi wawɛɛ, nɛ lɔ ɔ jeɔ wa juɛmi ngɛ wa haomi ɔmɛ a nɔ. Ke wa yeɔ bua ni kpahi konɛ a si himi nɛ pee kpakpa a, wɔ hu wa si himi peeɔ kpakpa.

Baiblo ga womi: “Nyɛɛ le níhi nɛ a he hia wawɛɛ ɔ.”​—Filipi Bi 1:10.

Ke nɔ kɛ e yo ná we be kɛ ha a sibi ɔ, a gba a ma nyɛ ma puɛ. E sa nɛ hunomɛ kɛ yigbayihi nɛ a na a gba a kaa e ji nɔ́ ko nɛ he hia wawɛɛ ngɛ a si himi mi.

Nyɛ bla kɛ pee níhi. Nyɛɛ to blɔ nya konɛ nyɛɛ pee níhi kɛ bla. Baiblo ɔ de ke, “Ke ni enyɔ bua kɛ tsu ní ɔ, e hi pe nɔ kake nɛ ma tsu ní.” (Fiɛlɔ 4:9) Nyɛ ma nyɛ ma bla kɛ hoo ní, nyɛ ma nyɛ ma bla kɛ gbɔle nyɛ kpɔ mi, nyɛ ma nyɛ ma bla kɛ ya ngmɔ mi.

Nyɛɛ pee níhi kɛ tsɔɔ kaa nyɛ suɔ nyɛ sibi. Baiblo ɔ woɔ hunomɛ kɛ a yihi he wami kaa a suɔ a sibi nɛ a je bumi kpo kɛ tsɔɔ a sibi. (Efeso Bi 5:28, 33) Ke a muɔɔ hɛlii, a fuaa a sibi, aloo a keɔ a sibi ní ɔ, lɔ ɔ ma nyɛ ma ha nɛ a gba si himi ɔ mi nɛ wa. Ngɛ anɔkuale mi ɔ, e sa nɛ nɔ kɛ e yo pɛ nɛ a sɛɛ níhi nɛ kɔɔ bɔmi nami he.​—Hebri Bi 13:4.