Wa Be Nyɛe Maa Tu Gbenɔ Nya Fo
NGƆƆ lɛ kaa o ngɛ video ko hyɛe kɛ kɔ nɔ ko nɛ e he biɛ wawɛɛ ngɛ si himi mi ɔ he. E ma nyɛ maa pee la fialɔ ko nɛ o suɔ e sane wawɛɛ. Video ɔ je sisi kɛ níhi nɛ ya nɔ ngɛ e jokuɛwi a si, benɛ e bɔni la fiami, kɛ bɔ nɛ e dlaa e he ha si abɔ kɛ ha ní peemi ɔ. Lɔ ɔ se ɔ, e bɔni lami ngɛ ní peemihi a sisi, e hiaa blɔ kɛ yaa he slɔɔtohi, nɛ e bɔni biɛ hemi. Ngɛ video ɔ nyagbe ɔ, e ba bwɔ, nɛ nyagbenyagbe ɔ, e gbo.
Video nɛ ɔ ji nɔ́ nɛ ya nɔ nitsɛnitsɛ ngɛ nɔ ko si himi mi. Ke sane nɛ ɔ kɔɔ la fialɔ ko he jio, je mi si kpalɔ ko he jio, fo tulɔ ko he jio, loo nɔ kpa ko nɛ e he biɛ ngɛ je ɔ mi ɔ he jio, sane ɔ nyagbe be tsakee. Eko ɔ, nɔ ɔ bɔ e he mɔde wawɛɛ ngɛ si himi mi, se ke pi nɛ nɔ ɔ bwɔ nɛ e gbo ɔ, anɛ o susuu we kaa e ko nyɛ pee babauu pe jã lo?
Ke wa susu sanehi kaa kikɛ nɛ ɔmɛ a he ɔ, e haoɔ wɔ wawɛɛ, se e maa ba wɔ tsuo wa nɔ. (Fiɛlɔ 9:5) Ke wa bɔ wa he mɔde kaa mɛni po, wa be nyɛe maa tu bwɔmi kɛ gbenɔ nya fo. Se pi lɔ ɔ pɛ, oslaahi loo hiɔhi hu haa nɛ wa gboɔ mla. Kaa bɔ nɛ Baiblo ɔ tsɔɔ ɔ, wa ngɛ kaa “afua nɛ e woɔ be bɔɔ ko, kɛkɛ lɔ ɔ se ɔ, e laa.”—Yakobo 4:14.
Akɛnɛ wa gboɔ tlukaa he je ɔ, ni komɛ kplɛɔ susumi nɛ ji, “nyɛ ha nɛ waa ye ní nɛ waa nu ní, ejakaa hwɔɔ wa ma gbo” ɔ nɔ. (1 Korinto Bi 15:32) Nihi baa a je mi jã, ejakaa a le kaa a ma nyɛ ma gbo be fɛɛ be ko, nɛ a be hwɔɔ se he hɛ nɔ kami hulɔ. Enɛ ɔ he ɔ, ke waa kɛ si himi ko nɛ mi wa ngɛ kpee ɔ, wa biɔ wa he ke, ‘Anɛ si himi ɔ tsuo ji nɛ ɔ lo?’ Jije wa ma nyɛ maa na heto ɔ ngɛ?
Nihi fuu susu kaa je mi si kpami ma nyɛ ma ha wɔ heto. Je mi si kpami kɛ tsopa peemi nɛ ya hɛ mi ɔ ha nɛ wa na kaa wa se ma nyɛ maa kɛ ngɛ je mi. Je mi si kpali komɛ ngɛ mɔde bɔe kaa a ma ha nɛ wa se nɛ kɛ ngɛ je mi wawɛɛ. Ke a maa ye manye jio, a be manye yee jio, sane bimi ɔ ji: Mɛni he je nɛ wa bwɔɔ nɛ wa gboɔ? Anɛ gbenɔ se maa po ligbi ko lo? Wa maa na sane bimi nɛ ɔmɛ kɛ sane bimi nɛ ji, Anɛ si himi ɔ tsuo ji nɛ ɔ lo? ɔ heto ngɛ munyuhi nɛ nyɛɛ se ɔ mi.