Mawu hyɛ we nɔ hɛ mi nɛ e suɔ kaa e maa jɔɔ adesahi tsuo.

Mawu wo gbalɔ Abraham si nɛ e de lɛ ke, “o nɔ ma gu kɛ gbaa je ma amɛ tsuo.”​—1 Mose 12:3.

Mɛni enɛ ɔ tsɔɔ wɔ? Mawu suɔ wɔ saminya, nɛ e suɔ kaa e maa jɔɔ nɔ fɛɛ nɔ nɛ buɔ lɛ tue ɔ, nyumu jio, yo jio, jokuɛyo jio.

Mawu ji mɔbɔ nalɔ, nɛ e jɔɔ nihi nɛ a bɔɔ mɔde kaa a maa le lɛ ɔ.

Mawu Ope ɔ ha gbalɔ Mose he wami nɛ e kɛ pee nyakpɛ ní nguahi. Se kɛ̃ ɔ, Mose sɔle ke: “Moo tsɔɔ mi o blɔ ɔ, konɛ ma le mo saminya, nɛ ma pee o suɔmi nya ní.” (2 Mose 33:13) Mawu bua jɔ Mose ní bimi ɔ he nɛ e jɔɔ lɛ kɛ nile kɛ níhi a sisi numi, nɛ Mose ba le e blɔ ɔmɛ kɛ e su ɔmɛ saminya. Kaa nɔ hyɛmi nɔ́ ɔ, Mose ba le kaa wa Bɔlɔ ɔ ji “Mawu mɔbɔ nalɔ, kɛ dloolɔ.”​—2 Mose 34:6, 7.

Mɛni enɛ ɔ tsɔɔ wɔ? Mawu suɔ kaa e maa jɔɔ nyumuhi, yihi kɛ jokuɛwi tsuo ke a bɔ mɔde nɛ a le lɛ saminya. E tsɔɔ wɔ bɔ nɛ e sa nɛ wa ja lɛ ha ngɛ Ngmami Klɔuklɔu ɔmɛ a mi, nɛ e tsɔɔ wɔ hu kaa e suɔ nɛ e maa jɔɔ wɔ.

Ke wa kase níhi nɛ Yesu pee kɛ níhi nɛ e tsɔɔ ɔmɛ a he ní ɔ, wa ma nyɛ ma ná Mawu dɛ mi jɔɔmihi kɛ ya neneene.

Wa ma nyɛ maa kase Yesu si himi kɛ níhi nɛ e tsɔɔ ɔmɛ a he ní ngɛ Ngmami Klɔuklɔu ɔmɛ a mi. Mawu ha Yesu he wami nɛ e kɛ pee nyakpɛ níhi fuu. Nyakpɛ níhi nɛ Yesu pee ɔ ekomɛ ji; e tsa hɛ yuyuili, nihi nɛ a tue nui nɔ́, kɛ glɔtsɛmɛ. E tle gbogboehi po si. Nyakpɛ níhi nɛ Yesu pee ɔmɛ tsɔɔ jɔɔmihi nɛ Mawu maa ngɔ kɛ ba ha adesahi tsuo hwɔɔ se. Nɛ e tsɔɔ nɔ́ nɛ e sa kaa waa pee konɛ wa nine nɛ su jɔɔmi nɛ ɔmɛ a nɔ. E de ke: “Enɛ ɔ ji neneene wami ɔ nɛ, kaa a maa hi mo anɔkuale Mawu kake pɛ ɔ lee, kɛ nɔ nɛ o tsɔ ɔ, Yesu Kristo.”​—Yohane 17:3.

Yesu ngɛ mi mi sami, e nuɔ nɔ́ he ha nɔ, nɛ e mi mi jɔ. Nyumuhi kɛ yihi, jokuɛwi kɛ nikɔtɔmahi babauu ba Yesu ngɔ ejakaa Yesu de ke: “Nyɛɛ kase mi, ejakaa ye he jɔ, nɛ i baa ye he si kɛ jeɔ ye tsui mi, nɛ nyɛ he mi maa jɔ nyɛ.” (Mateo 11:29) Yesu pee we e ní kaa nihi nɛ a hi si ngɛ e be ɔ mi nɛ a bui yihi ɔ, mohu ɔ, e je mi mi jɔmi kɛ bumi kpo kɛ tsɔɔ yihi, nɛ bɔ nɛ e kɛ mɛ hi si ha a ha nɛ a nu he kaa a he hia.

Mɛni enɛ ɔ tsɔɔ wɔ? Yesu je suɔmi nɛ mi kuɔ kpo kɛ tsɔɔ nihi, nɛ enɛ ɔ ji nɔ hyɛmi nɔ́ kpakpa nɛ e pee kɛ tsɔɔ bɔ nɛ e sa nɛ waa kɛ ni kpahi nɛ hi si ha.

Ngmami Klɔuklɔu ɔmɛ de ke, “ngɛ anɔkuale mi ɔ, Mawu kake lɛ ngɛ” nɛ Yesu Kristo ji Mawu tsɔlɔ nɛ baa e he si. (1 Korinto Bi 8:6) Yesu de heii kaa Mawu nɔ kuɔ pe lɛ, nɛ Mawu nɛ tsɔ lɛ kɛ ba zugba a nɔ.​—Yohane 11:41, 42; 14:28. *