Baiblo ɔ tsɔɔ kaa bɔfohi bu anɔkuale jali a he be komɛ bɔ nɛ pee nɛ Mawu yi mi tomi nɛ ba mi. (La 34:7) Kaa nɔ hyɛmi nɔ́ ɔ:

• Sodom kɛ Gomora ji mahi nɛ a peeɔ yi wu tso ní ngɛ mi wawɛɛ. Loko Yehowa ma kpata ma nɛ ɔmɛ a hɛ mi ɔ, bɔfohi ye bua anɔkualetsɛ Lot kɛ e weku ɔ nɛ a je ma a mi.​—1 Mose 19:1, 15-26.

• Be ko ngɛ blema Babilon ɔ, a bu Hebri nihewi etɛ komɛ fɔ nɛ a kɛ mɛ ya wo flɔɔnɔɔ kɛ e mi la mi, se Mawu “tsɔ e bɔfo ɔ kɛ ba je nimli nɛ ɔmɛ nɛ a sɔmɔɔ lɛ” ɔ.​—Daniel 3:19-28.

• Benɛ a nu Daniel kɛ wo jatahi a muɔ mi se jata amɛ pee we lɛ nɔ́ ko ɔ, e tsɔɔ nya kaa, e yi ná wami ejakaa e “Mawu ɔ tsɔ e bɔfo ɔ, nɛ e ba má jata amɛ a nya.”​—Daniel 6:16, 22.

Mawu bɔfohi ye bua Kristofohi nɛ a hi si ngɛ kekleekle jeha lafa a mi ɔ. Titli ke a ngɛ sane ko nɛ ma ha nɛ Mawu yi mi tomi maa ba mi ɔ he ní tsue. Kaa nɔ hyɛmi nɔ́ ɔ:

• Mawu bɔfo ko ya bli tsu womi he ko sinya amɛ nɛ e je Yesu kaseli ɔmɛ nɛ a wo mɛ tsu ɔ nɛ e de mɛ ke a ya sɔlemi we ɔ nɛ a ya fiɛɛ.​—Bɔfo Ɔmɛ A Ní Tsumi 5:17-21.

• Bɔfo ko kɛ blɔ tsɔɔmi ha sane kpakpa fiɛɛlɔ Filipo kaa e ya blɔ ko nɛ a nyɛɛ we nɔ hu nɛ je Yerusalem kɛ yaa Gaza a nɔ konɛ e ya fiɛɛ ha Etiopia no ko nɛ e ya ja Mawu ngɛ Yerusalem ɔ.​—Bɔfo Ɔmɛ A Ní Tsumi 8:26-33.

• Benɛ Mawu be nɛ e to kaa ma je li nɛ a ba plɛ Kristofohi ɔ su ɔ, Mawu bɔfo ko ba je e he kpo kɛ tsɔɔ Roma tabo ɔ we asafoatsɛ nɛ a tsɛɛ lɛ ke Kornelio ɔ ngɛ nina mi, nɛ e de lɛ ke e tsɔ nɛ a ya tsɛ bɔfo Petro kɛ ba e we ɔ mi.​—Bɔfo Ɔmɛ A Ní Tsumi 10:3-5.

• Benɛ a wo Petro tsu ɔ, Mawu bɔfo ko ba e ngɔ nɛ e ba je lɛ kɛ je tsu ɔ mi.​—Bɔfo Ɔmɛ A Ní Tsumi 12:1-11.

Odase ko be nɛ tsɔɔ kaa mwɔnɛ ɔ, Mawu guu bɔfohi a nɔ kɛ tsuɔ nyakpɛ níhi kaa bɔ nɛ e pee blema nɛ Baiblo ɔ tu he munyu ɔ. Se Yesu de ngɛ wa be nɛ ɔ he ke: “Sane kpakpa nɛ ɔ nɛ kɔɔ matsɛ yemi ɔ he ɔ, a maa fiɛ kɛ kpa je ɔ mi tsuo, bɔ nɛ pee nɛ je ma amɛ tsuo nɛ a nu; nɛ lɔ ɔ se loko nyagbe ɔ maa ba.” (Mateo 24:14) Anɛ o le kaa Mawu bɔfohi ngɛ Kristo kaseli ɔmɛ ye buae kɛ ngɛ ní tsumi nɛ ɔ tsue lo?

Kpojemi womi ɔ tsɔɔ kaa bɔfohi maa ye bua nihi ngɛ zugba a nɔ he tsuaa he nɛ a kase Yehowa Mawu kɛ e yi mi tomi kɛ ha adesahi ɔ he ní. Yohane ngma ke: “I na bɔfo kpa nɛ te ngɛ hiɔwe lokoo kɛ bee. E hɛɛ sɛ gbi ko nɛ ngɛ kɛ yaa neneene. Sɛ gbi ɔ kɔɔ sane kpakpa a he, nɛ e yaa nɛ e ya fiɛ sɛ gbi nɛ ɔ ha nihi tsuo nɛ ngɛ je ɔ mi, mahi kɛ wɛtsohi, kɛ gbihi kɛ nimli tsuo. Bɔfo ɔ de kɛ gbi nɛ wa ke, ‘Nyɛɛ ye Mawu gbeye, nɛ nyɛɛ wo e hɛ mi nyami! Ejakaa be ɔ su nɛ e maa kojo nihi tsuo nɛ ngɛ je ɔ mi. Nyɛ ja nɔ nɛ pee hiɔwe kɛ zugba, kɛ wo kɛ nyu hɛngmɛhi nɛ baa a!’” (Kpojemi 14:6, 7) Níhi a si kpamihi fuu ngɛ mwɔnɛ ɔ nɛ maa nɔ mi kaa bɔfohi yeɔ bua ngɛ Matsɛ Yemi he sane kpakpa nɛ a ngɛ fiɛɛe ngɛ je kɛ wɛ ɔ mi. Ngɛ anɔkuale mi ɔ, ke yayami peelɔ kake tsake e tsui nɛ e kpale kɛ ba Yehowa ngɔ ɔ, ‘Mawu bɔfohi nyaa.’​—Luka 15:10.

Mɛni maa ba ke a gbe fiɛɛmi ní tsumi ɔ nya? Bɔfohi nɛ a ji “hiɔwe ta buli” ɔ ma fĩ Yesu Kristo, Matsɛmɛ a matsɛ ɔ se kɛ hwu Harmagedon “ta nɛ maa ba ligbi nguaa a nɛ Mawu Ope ɔ maa kojo je ɔ.” (Kpojemi 16:14-16; 19:14-16) Bɔfo katsɛmɛ nɛ ɔmɛ maa piɛɛ Nyɔmtsɛ Yesu he nɛ a kɛ ‘nihi nɛ . . . bui Nyɔmtsɛ Yesu sane kpakpa a tue ɔ maa to ní.’​—2 Tesalonika Bi 1:7, 8.

Mo ná nɔ mi mami kaa, bɔfohi suɔ kaa a maa ye bua mo. A susuɔ nihi nɛ a suɔ kaa a ma sɔmɔ Mawu ɔ a he. Yehowa kɛ mɛ tsu ní si abɔ nɛ e ha nɛ a wo e sɔmɔli anɔkualetsɛmɛ nɛ a ngɛ zugba a nɔ ɔ he wami, nɛ a bu a he.​—Hebri Bi 1:14.

Enɛ ɔ he ɔ, e sa nɛ wɔ tsuo waa mwɔ yi mi kpɔ ko nɛ he hia. Anɛ wa maa bu sane kpakpa nɛ a ngɛ fiɛɛe ngɛ je kɛ wɛ ɔ tue nɛ wa kɛ ma tsu ní lo? Yehowa Odasefohi nɛ a ngɛ o kpɔ ɔ mi ɔ a bua maa jɔ kaa a maa ye bua mo konɛ o ná yemi kɛ buami nɛ suɔmi ngɛ mi nɛ Yehowa kɛ haa wɔ kɛ guu e bɔfo ɔmɛ a nɔ ɔ he se.