Ke a ke nɔ ko kɛ otihi ma e hɛ mi ɔ, pi nɔ́ ko nɛ e ná nɛ e nine su nɔ kɛkɛ. Mohu ɔ, e biɔ blɔ nya tomi, tsakemi peemi, kɛ mɔde bɔmi konɛ o nyɛ nɛ o su he.

Wa ngɛ oti slɔɔtohi etɛ. Lɔ ɔ mɛ ji: be kpiti nɔ́ (o ma nyɛ maa ngɔ ligbi bɔɔ loo otsi bɔɔ ko kɛ su he), nɔ́ nɛ maa kɛ bɔɔ (o ma nyɛ maa ngɔ nyɔhiɔhi kɛ su he), kɛ be gagaa nɔ́ (o ma nyɛ maa ngɔ jeha kake loo nɔ́ nɛ pe jã kɛ su he.) Loko o ma nyɛ su nyagbe oti ɔ he ɔ, ja o su oti enyɔ nɛ sɛ hlami ɔmɛ a he.

Ke o su otihi nɛ o kɛ ma o hɛ mi ɔ he ɔ, e haa nɛ o nɔ gbagba tee, nɛ huɛ bɔmi nɛ ngɛ o kɛ ni kpahi nyɛ kpɛti ɔ mi waa, nɛ o náa bua jɔmi wawɛɛ.

O ma ná o mi hemi kɛ yemi: Ke o ngɔ oti nyafinyafihi kɛ ma o hɛ mi nɛ o nyɛ nɛ o su a he ɔ, lɔ ɔ haa nɛ o náa hemi kɛ yemi kaa o ma nyɛ maa su oti nguahi hu a he. Lɔ ɔ hu haa nɛ o kɛ kã daa nyagbahi nɛ o kɛ kpeɔ daa ligbi ɔmɛ a nya. Kaa nɔ hyɛmi nɔ́ ɔ, o ma nyɛ maa da juami bi a nɔ nyɛmi nya.

O ma ná huɛmɛ: Nihi a bua jɔɔ kaa a kɛ nɔ ko nɛ e kɛ otihi maa e hɛ mi, nɛ e bɔɔ mɔde kaa e maa su a he ɔ maa bɔ. Ke o kɛ nɔ ko nɛ otihi nɛ o kɛ ma o hɛ mi ɔ nɔuu nɛ lɛ hu e kɛ ma e hɛ mi ngɛ bɔe ɔ, e haa nɛ nyɛ huɛ bɔmi ɔ mi waa, ejakaa nyɛ bɔɔ mɔde kaa nyɛ maa pee kake kɛ tsu otihi nɛ nyɛɛ kɛ ma nyɛ hɛ mi ɔ he ní.

O ma ná bua jɔmi: Ke o kɛ otihi ma o hɛ mi nɛ o su a he ɔ, e haa nɛ o tsui nɔɔ o mi.

“I suɔ kaa i kɛ otihi maa ma ye hɛ mi. Jã nɛ i peeɔ ɔ haa nɛ i kɛ ye juɛmi maa nɔ́ ko peemi nɔ be fɛɛ be, nɛ i bɔɔ mɔde kaa ma su he. Nɛ ke o nyɛ nɛ o su oti ko he ɔ, e haa nɛ o bua jɔɔ nɛ o tsui nɔɔ o mi, nɛ o nyɛɔ deɔ ke, ‘Ei, i nyɛ nɛ i tsu he ní! I nyɛ nɛ i pee nɔ́ nɛ i to kaa ma pee ɔ.’”​—Christopher.

BAIBLO SISI TOMI MLAA: “Nɔ nɛ slaa kɔɔhiɔ ɔ, e du we ní; nɔ nɛ hyɛɛ bɔku mi ɔ, e kpa we ní.”​—Fiɛlɔ 11:4.

Moo pee níhi nɛ nyɛɛ se nɛ ɔmɛ konɛ o nyɛ nɛ o su otihi nɛ o kɛ ma o hɛ mi ɔ he.

Moo ngma otihi nɛ o kɛ ma o hɛ mi ɔmɛ. Moo ngma otihi nɛ o suɔ kaa o maa su a he ɔmɛ, nɛ o kadi ní nɛmɛ nɛ o suɔ kaa o maa su a he kekle ɔ.

Moo to blɔ nya. Ngɛ oti ɔ eko fɛɛ eko blɔ fa mi ɔ, moo:

• To be nɛ o suɔ nɛ o maa su he.

• Ngmaa níhi nɛ o maa pee konɛ o nyɛ nɛ o su he.

• Hyɛ blɔ kaa o kɛ blɔ tsimi níhi maa kpe, nɛ́ o hla blɔ nɔ nɛ o maa gu kɛ tsu a he ní.

Pee he nɔ́ ko. Koo mlɛ kaa níhi a mi nɛ hi ha mo loko o je oti nɛ o kɛ ma o hɛ mi ɔ he ní tsumi sisi. Mo bi o he ke, ‘Mɛni ji kekleekle nɔ́ nɛ e sa kaa ma pee konɛ ma nyɛ nɛ ma su oti nɛ ɔ he?’ Nɛ́ o je e peemi sisi. Mo kadi bɔ nɛ o ngɛ o hɛ mi yae ha a kɛ fɔ si.

BAIBLO SISI TOMI MLAA: “Nɔ nɛ bɔɔ mɔde kɛ toɔ níhi a he blɔ nya saminya a, e náa ní babauu.”​—Abɛ 21:5.