Yehowa Ji Mawu Nɛ E Sa Kaa A Le Lɛ

ANƐ o susu kaa nɔ́ ko ngɛ nɛ ma ha nɛ o si himi nɛ pee kpakpa lo? Nihi fuu ba na kaa ke a kase Mawu he ní nɛ a le lɛ saminya a, e haa nɛ a si himi peeɔ kpakpa. Ke o kase Mawu he ní ɔ, o ma ná he se kɛ je amlɔ nɛ ɔ, kɛ ya neneene.

Yehowa Mawu, nɔ nɛ e ha nɛ a ngma Baiblo ɔ suɔ nɛ o le lɛ. La polɔ ɔ ngma ke: ‘Konɛ a le kaa mo Yehowa, mo nɔ kake too lɛ o ngɛ he wami pe nɔ tsuaa nɔ ngɛ je ɔ mi tsuo.’ Mawu le kaa ke wa le lɛ ɔ, wɔ nɔuu lɛ wa ma ná he se. Mawu de ke: ‘Imi ji Yehowa, nyɛ Mawu ɔ nɛ. I suɔ kaa ma tsɔse nyɛ, konɛ e hi ha nyɛ nitsɛmɛ.’ Ke wa le Yehowa Mawu, nɔ nɛ e ngɛ he wami pe nɔ tsuaa nɔ ɔ, kɛ wa ma ná he se ha kɛɛ?​—La 83:18; Yesaya 48:17.

Ke wa le Mawu ɔ, e yeɔ bua wɔ nɛ wa náa nyagbahi nɛ waa kɛ kpeɔ daa ligbi ngɛ wa si himi mi ɔ a nya tsaba. Jehanɛ se hu ɔ, e yeɔ bua wɔ nɛ wa náa hwɔɔ se he hɛ kɛ nɔ fɔmi, nɛ wa náa tue mi jɔmi hulɔ. Ke wa le Yehowa saminya a, wa náa sanehi nɛ nihi fuu biɔ ngɛ si himi mi ɔ hu a heto. Mɛni ji sane bimi nɛ ɔmɛ ekomɛ?

Mɛni He Je Nɛ O Ngɛ Wami Mi?

Klama he nile ya hɛ mi wawɛɛ mohu lɛɛ, se loloolo ɔ, nihi biɔ sane komɛ kaa: ‘Mɛni he je nɛ i ngɛ wami mi? Ke i gbo ɔ, mɛni si fɔfɔɛ mi ma ya je? Mɛni yi mi tomi lɛ ngɛ si himi he?’ Ke nɔ ko ná we sane bimi nɛ ɔmɛ a heto nɛ ma ha nɛ e tsui nɛ nɔ e mi ɔ, e be bua jɔmi náe. Jã ji bɔ nɛ nihi fuu nuɔ he. Ngɛ jeha 1997 ɔ mi ɔ, a bi nihi fuu nɛ a ngɛ Germany ɔ munyu kɛ kɔ yi mi tomi he je nɛ wa ngɛ si himi mi ɔ he. Nihi nɛ a bi mɛ munyu ɔ fã tsɔɔ kaa yi mi tomi ko be si himi he. Eko ɔ, nihi nɛ a ngɛ o kpɔ ɔ mi ɔ hu susu jã.

Ke wa susuɔ kaa yi mi tomi ko be wa wami he ɔ, lɛɛ e ma ha nɛ wa susu kaa se nami be wa wami he, nɛ waa kɛ oti ko be wa hɛ mi mae. Enɛ ɔ haa nɛ nihi fuu bɔɔ mɔde kaa a ma hla ní tsumi nɛ ma ha nɛ a ná sika fuu nɛ a tsu. Se ngɛ enɛ ɔ tsuo se ɔ, a kpɛti nihi fuu be bua jɔmi ngɛ a si himi mi. Nihi nɛ a be yi mi tomi ko ngɛ si himi mi ɔ haoɔ wawɛɛ, nɛ a suɔ kaa a maa gbe a he po. Jã ji bɔ nɛ e ba ngɛ yiheyo ko blɔ fa mi. International Herald Tribune amaniɛ bɔmi womi ɔ de kaa “e fɔli ngɛ sika wawɛɛ, nɛ e ngɛ he blɔhi fuu hulɔ.” E ngɛ mi kaa nɔ́ ko hia we lɛ mohu lɛɛ, se be fɛɛ be nɛ ɔ, e pee dii nɛ e bua hu jɔɛ ngɛ si himi mi, nɛ e nu he kaa se nami ko be e wami he. E nu mahe hwɔmi tsopa, nɛ pee se ɔ, a ya na lɛ nɛ e gbo. Eko ɔ, o le ni komɛ nɛ a be bua jɔmi, nɛ lɔ ɔ ha nɛ a gbe a he.

Ni komɛ deɔ ke je mi si kpami ma nyɛ ma ha sanehi nɛ wa biɔ ngɛ wa si himi mi ɔ tsuo a heto. Germany amaniɛ bɔmi womi ko nɛ a tsɛɛ ke Die Woche ɔ de ke: “E ngɛ mi kaa je mi si kpami ha nɛ wa le níhi fuu mohu lɛɛ, se e be nyɛe maa ye bua wɔ ngɛ Mawu jami kɛ je mi bami blɔ fa mi. Bilemi tsɔɔmi ɔ kɛ je mi si kpami tsɔɔmi komɛ nɛ a ngɛ hwanyaa a hu be nyɛe ma ha wɔ bua jɔmi kɛ slɔkee si himi.” Je mi si kpali bɔ mɔde nɛ a hla níhi a mi kɛ kɔ wami kɛ adebɔ níhi a he. Se je mi si kpami be nyɛe maa tsɔɔ wɔ nɔ́ he je nɛ wa ngɛ wami mi, kɛ si fɔfɔɛ mi nɛ wa ma ya je ke wa gbo. Ke wa ngɔ wa hɛ kɛ fɔ je mi si kpami pɛ nɔ ɔ, wa be wa sane bimi nɛ kɔɔ nɔ́ he je nɛ wa ngɛ wami mi ɔ heto náe. Enɛ ɔ he ɔ, Germany amaniɛ bɔmi womi nɛ ji Süddeutsche Zeitung ɔ tsɔɔ kaa lɔ ɔ ha nɛ “nihi hia blɔ tsɔɔmi wawɛɛ pe be ko nɛ be ɔ.”

Bɔlɔ ɔ pɛ ji nɔ nɛ e ma nyɛ ma ha wɔ blɔ tsɔɔmi nɛ ɔ. Akɛnɛ lɛ nɛ e bɔ wɔ he je ɔ, e le yi mi tomi he je nɛ e bɔ wɔ. Baiblo ɔ tsɔɔ kaa e bɔ adesahi konɛ a fɔ nɛ a hyi zugba a nɔ, nɛ a hyɛ nɔ. Mawu bɔ wɔ konɛ waa kase e su kpakpa komɛ kaa dami sane yemi, nile, kɛ suɔmi. Ke wa le nɔ́ he je nɛ Yehowa bɔ wɔ ɔ, wa maa le nɔ́ he je nɛ wa ngɛ wami mi.​—1 Mose 1:26-28.

Mɛni O Ma Nyɛ Maa Pee?

Eko ɔ, be ko nɛ be ɔ, o nɛ heto kɛ ha sane bimihi kaa: ‘Mɛni he je nɛ i ngɛ wami mi? Ke i gbo ɔ, mɛni si fɔfɔɛ mi ma ya je? Mɛni yi mi tomi lɛ ngɛ si himi he?’ Baiblo ɔ tsɔɔ kaa ke o kase Yehowa he ní ɔ, o ma ba le lɛ saminya. Ngɛ anɔkuale mi ɔ, Yesu de ke: “Enɛ ɔ ji neneene wami ɔ nɛ, kaa a maa hi mo anɔkuale Mawu kake pɛ ɔ lee, kɛ nɔ nɛ o tsɔ ɔ, Yesu Kristo.” Baiblo ɔ ngɛ mo he wami woe hu kaa o kase Mawu su ɔmɛ, titli ɔ, suɔmi, nɛ́ o ngɔ o ní peepee hu kɛ tsɔɔ kaa o suɔ nɛ o hi Mawu Matsɛ Yemi nɛ e be kɛe nɛ e maa ba a sisi. Ke o pee jã a, o maa le yi mi tomi he je nɛ o ngɛ wami mi, nɛ o ma ná hwɔɔ se he hɛ nɔ kami. Nɛ jehanɛ se hu ɔ, o ma ná sane bimihi nɛ a gbaa o nya wawɛɛ ɔmɛ a heto hulɔ.​—Yohane 17:3; Fiɛlɔ 12:13.

Kɛ Baiblo ɔ nɛ o maa kase ɔ maa ye bua mo ha kɛɛ? Ha nɛ waa hyɛ bɔ nɛ enɛ ɔ ye bua nyumu ko nɛ a tsɛɛ lɛ ke Hans ɔ ha. * Be ko nɛ be ɔ, Hans he ye kaa Mawu ngɛ, se lɔ ɔ ná we e si himi nɔ he wami. Hans bua jɔ tsopa yaya kɛ ní tsumi he, e kɛ yihi fuu hu náa bɔmi, e juɔ, nɛ e bua jɔ moto nɔ himi he wawɛɛ. Ngɛ enɛ ɔmɛ tsuo a se ɔ, Hans de ke, “I be bua jɔmi ko kulaa ngɛ ye si himi mi.” Benɛ e ye maa pee jeha 25 ɔ, e ma e juɛmi nya si kaa e maa kase Baiblo ɔ konɛ e le Mawu saminya. Benɛ e ba le Yehowa saminya, nɛ́ e ba le yi mi tomi he je nɛ wa ngɛ wami mi ɔ, lɔ ɔ wo lɛ he wami nɛ e tsake e je mi bami, nɛ e ha nɛ a baptisi lɛ kaa Yehowa Odasefo no. E ngɛ sɔmɔe kaa be tsuo sɔmɔlɔ maa pee jeha nyɔngma sɔuu ji nɛ ɔ. E de kɛ nɔ mi mami ke: “Yehowa sɔmɔmi se be. Nɔ́ ko nɔ́ ko be nɛ waa kɛ ma nyɛ maa to he. Yehowa nɛ i ba le ɔ ha nɛ i ba le yi mi tomi he je nɛ i ngɛ wami mi.”

Ngɛ anɔkuale mi ɔ, pi yi mi tomi he je nɛ wa ngɛ wami mi ɔ pɛ ji sane nɛ gbaa nihi a nya. Akɛnɛ je ɔ mi si fɔfɔɛ ɔ ngɛ puɛe he je ɔ, e sa nɛ nihi babauu nɛ a le sane bimi ko nɛ he hia a hu heto.

Mɛni He Je Nɛ Ní Yayamihi Ngɛ Nɔ Yae ɔ?

Ke nɔ́ yayami ko ba a, nihi pɔɔ bimi ke: Mɛni he je nɛ nɔ́ yayami nɛ ɔ ba? Ke o le nɔ́ he je nɛ ní yayamihi ngɛ nɔ yae ɔ, e maa ye bua mo nɛ ke o kɛ nyagba ko kpe ɔ, o ma nyɛ maa da nya, nɛ o be haoe tsɔ. Ha nɛ wa susu yo ko nɛ a tsɛɛ lɛ ke Bruni ɔ nɔ hyɛmi nɔ́ ɔ he nɛ waa hyɛ.

Bruni de ke: “Jeha komɛ nɛ be ɔ, ye bi gbo. Ye bi ɔ gbenɔ ɔ dɔ mi wawɛɛ nitsɛ. Akɛnɛ i he Mawu ye he je ɔ, i ya wa we osɔfo ɔ ngɔ konɛ e ya wo ye bua. E de mi ke Mawu lɛ ba ngɔ Susanne kɛ ho hiɔwe ya, nɛ amlɔ nɛ ɔ, e ji bɔfo ngɛ hiɔwe. Nɔ́ nɛ e de ɔ ha nɛ i ná Mawu he ninyɛ.” Bruni hao nɛ e ye aywilɛho jehahi babauu. E de ke: “Ligbi ko ɔ, Yehowa Odasefo no ko ba ye bua mi nɛ i na ngɛ Baiblo ɔ mi kaa e sɛ nɛ ma ná Mawu he ninyɛ. Yehowa ngɔɛ Susanne kɛ yɛ hiɔwe, nɛ e ya pee we bɔfo hulɔ. Mluku nɛ adesahi yi ɔ lɛ ha nɛ e nu hiɔ ɔ nɛ. Amlɔ nɛ ɔ, Susanne ngɛ mlɛe ngɛ yɔkɔ ɔ mi kɛ yaa si be nɛ Yehowa ma tle lɛ si. I kase hu kaa Yehowa suɔ kaa adesahi nɛ a hi si kɛ ya neneene ngɛ paradeiso mi ngɛ zugba a nɔ, nɛ e be kɛe nɛ e si womi nɛ ɔ maa ba mi. Benɛ i bɔni nɔ tutuutu nɛ Yehowa ji ɔ lemi ɔ, e ha nɛ i hɛ kɛ su e he, nɛ ye haomi ɔ nya bɔni si bami.”​—La 37:29; Ní Tsumi 24:15; Roma Bi 5:12.

Nyagbahi nɛ nimli ayɔhi abɔ kɛ kpeɔ ɔ haa nɛ a naa nɔ́. Ekomɛ ji ta, hwɔ, adebɔ mi oslaahi, kɛ nyagba kpahi nɛ wa ti nɔ fɛɛ nɔ kɛ kpeɔ ngɛ e si himi mi. Baiblo ɔ nɛ Bruni ba kase ɔ ha nɛ e bua jɔ wawɛɛ, ejakaa e ba na kaa pi Yehowa nɛ e kɛ nyagba nɛ ɔmɛ baa, nɛ pi lɛ nɛ e ha nɛ adesahi ngɛ nɔ́ nae. E ba na hu kaa e be kɛe nɛ Mawu maa po ní nɛ ɔmɛ tsuo a se. Ní yayamihi nɛ a ngɛ nɔ yae wawɛɛ ɔ tsɔɔ kaa wa ngɛ “nyagbe ligbi ɔmɛ” a mi. E be kɛe nɛ si himi ɔ ma tsake, nɛ́ níhi maa ya nɔ saminya kaa bɔ nɛ wa ngɛ blɔ hyɛe ɔ.​—2 Timoteo 3:1-5; Mateo 24:7, 8.

Blɔ Nɔ Nɛ O Maa Gu Kɛ Le Mawu

Hans kɛ Bruni he Mawu ye, se a li lɛ tutuutu. Benɛ a bɔ mɔde nɛ a kase Mawu he ní, nɛ́ a ba le lɛ saminya a, lɔ ɔ ye bua mɛ nɛ a ná a sane bimi ɔmɛ a heto. Enɛ ɔ ha nɛ a ná tue mi jɔmi, nɛ a ná hwɔɔ se he hɛ kɛ nɔ fɔmi hulɔ. Jã nɛ e ba lɛ ngɛ Yehowa Odasefohi fuu a blɔ fa mi.

Ke wa ngɛ hlae nɛ waa le Yehowa a, lɛɛ e sa nɛ waa kase Baiblo ɔ. Baiblo ɔ tsɔɔ wɔ e he ní, kɛ nɔ́ nɛ e suɔ nɛ waa pee. Ni komɛ nɛ a hi si maa pee jeha akpe enyɔ nɛ be ɔ pee jã. Luka ngma kaa nihi nɛ a ngɛ asafo nɛ ngɛ Beroea a mi ɔ “kɛ a juɛmi tsuo pɛtɛ munyu ɔ [nɛ Paulo kɛ Silas tsɔɔ mɛ ɔ] he, nɛ daa ligbi ɔ, a kpaa Ngmami ɔ mi saminya konɛ a hyɛ kaa ní nɛ ɔmɛ ngɛ mi jã niinɛ lo.”​—Ní Tsumi 17:10, 11.

Kristofohi nɛ a hi si ngɛ kaseli ɔmɛ a be ɔ mi ɔ hu buaa a he nya ngɛ asafohi a mi. (Ní Tsumi 2:41, 42, 46; 1 Korinto Bi 1:1, 2; Galatia Bi 1:1, 2; 2 Tɛsalonika Bi 1:1) Jã nɔuu nɛ e ngɛ mwɔnɛ ɔ. Yehowa Odasefohi a we asafohi buaa a he nya ngɛ kpe klɛdɛɛhi a sisi. Kpe nɛ ɔmɛ yeɔ bua nihi konɛ a pee Yehowa huɛmɛ, nɛ́ a kɛ bua jɔmi nɛ sɔmɔ lɛ. Yehowa Odasefohi nɛ o kɛ maa bɔ ɔ maa ye bua mo ngɛ blɔ kpa ko hu nɔ. Akɛnɛ ke nihi ngɛ nɔ ko jae ɔ, bɔɔbɔɔbɔɔ ɔ, a ba kaseɔ lɛ he je ɔ, Yehowa Odasefohi jeɔ su kpakpahi nɛ Yehowa ngɛ ɔ kpo. Enɛ ɔ he ɔ, ke o kɛ mɛ bɔɔ ɔ, e maa ye bua mo nɛ o maa le Yehowa saminya.​—Hebri Bi 10:24, 25.

Eko ɔ, o ma de ke níhi nɛ e biɔ nɛ o pee konɛ o le Mawu ɔ hiɛ tsɔ. Ngɛ anɔkuale mi ɔ, enɛ ɔ peemi biɔ mɔde bɔmi wawɛɛ. Jã nɛ e ji ngɛ níhi nɛ wa suɔ kaa wa maa pee ɔ a blɔ fa mi. Loko wa ma nyɛ ma tsu nɔ́ ko he ní ɔ, ja wa bɔ he mɔde wawɛɛ. Mo susu mɔde nɛ fo tuli bɔɔ kɛ dlaa a he ɔ he nɛ o hyɛ. Kaa nɔ hyɛmi nɔ́ ɔ, fo tulɔ kpanaa ko nɛ e ngɛ France nɛ a tsɛɛ lɛ ke Jean-Claude Killy nɛ e bɔɔ mɔde wawɛɛ ngɛ Olympic fo tumi ɔ mi ɔ de ke: “E sa nɛ o je o he dlami sisi jeha 10 loko e su be ɔ nitsɛ. E biɔ nɛ o tsɔse o nɔmlɔ tso ɔ, kɛ o juɛmi daa ligbi.” E ma bi nɛ nɔ ɔ nɛ bɔ mɔde nɛ ɔmɛ tsuo bɔ nɛ pee nɛ e nyɛ nɛ e ya tu fo nɛ maa ye hɛngmɛfia nyɔngma pɛ ɔ! Enɛ ɔ ha nɛ wa naa kaa se nami ngɛ he kaa wa ma puɛ be kɛ le Yehowa, ejakaa huɛ bɔmi nɛ maa hi waa kɛ lɛ wa kpɛti ɔ maa hi si kɛ ya neneene.

Yehowa He Ní Nɛ O Maa Kase ɔ Ma Ha Nɛ́ O Hɛ Kɛ Su E He

Mɛnɔ lɛ e suɔ kaa nɔ́ ko nɛ he hia nɛ bɔ lɛ ngɛ e si himi mi? Nɔ ko be. Enɛ ɔ he ɔ, ke o nu he kaa o li yi mi tomi he je nɛ o ngɛ si himi mi, aloo ke o suɔ nɛ o le nɔ́ he je nɛ ní yayamihi baa wa nɔ ɔ, lɛɛ bɔɔ mɔde nɛ o kase Yehowa he ní. E he ní nɛ o maa kase ɔ ma nyɛ ma ha nɛ o ná si himi kpakpa kɛ je amlɔ nɛ ɔ, kɛ ya neneene.

Anɛ be ko maa su nɛ́ wa ma kpa Yehowa he ní kasemi lo? Nihi nɛ a ngɛ Yehowa sɔmɔe jehahi babauu ji nɛ ɔ po yaa nɔ nɛ a kaseɔ ní ehehi. Ní nɛ ɔmɛ nɛ wa kaseɔ ɔ haa nɛ wa bua jɔɔ, nɛ lɔ ɔ haa nɛ huɛ bɔmi nɛ ngɛ waa kɛ lɛ wa kpɛti ɔ mi waa. E ngɛ heii kaa o kɛ bɔfo Paulo ma kpa gbi. E de ke: “Oo ní babauu nɛ Mawu ngɛ ɔ, kɛ e juɛmi ɔ, kɛ e nile ɔ mi kuɔ wawɛɛ nitsɛ! A be nyɛe ma hla e kojomi ɔmɛ a mi, nɛ e blɔ ɔmɛ hu, a be nyɛe hiɔmi! Ejakaa ‘mɛnɔ ba le Yehowa juɛmi ɔ, aloo e ba plɛ e ga wolɔ?’”​—Roma Bi 11:33, 34.

[Sisi ningma]

[Munyu nɛ a ma nɔ mi]

Loloolo ɔ, nihi biɔ sane komɛ kaa: ‘Mɛni he je nɛ i ngɛ wami mi? Ke i gbo ɔ, mɛni si fɔfɔɛ mi ma ya je? Mɛni yi mi tomi lɛ ngɛ si himi he?’

[Munyu nɛ a ma nɔ mi]

“Benɛ i bɔni nɔ tutuutu nɛ Yehowa ji ɔ lemi ɔ, e ha nɛ i hɛ kɛ su e he”

[Munyu nɛ a ma nɔ mi]

“Yehowa sɔmɔmi se be. Nɔ́ ko nɔ́ ko be nɛ waa kɛ ma nyɛ maa to he. Yehowa nɛ i ba le ɔ ha nɛ i ba le yi mi tomi he je nɛ i ngɛ wami mi”