GUY HOLLIS PIERCE nɛ ji Yehowa Odasefohi a Blɔ Tsɔɔmi Ajla Toli ɔmɛ a kpɛti nɔ kake ɔ gbe e zugba a nɔ ní tsumi ɔ nya Pɛplɛgbi, March 18, 2014. E ye jeha 79. Akɛnɛ e ji Kristo nyɛmimɛ ɔmɛ a kpɛti nɔ kake he je ɔ, a tle lɛ si kɛ ho hiɔwe ya.—Hebri Bi 2:10-12; 1 Petro 3:18.

A fɔ Guy Pierce ngɛ Auburn, ngɛ California, U.S.A., ngɛ November 6, 1934. A baptisi lɛ ngɛ jeha 1955 ɔ mi. E ngɔ e yo nɛ e suɔ lɛ saminya nɛ ji Penny ɔ, ngɛ jeha 1977 ɔ mi, nɛ e kɛ lɛ fɔ bimɛ. E ngɛ kaa tsɛ kɛ ha ni kpahi fuu hulɔ. E kɛ Penny tsuo je blɔ gbami ní tsumi ɔ sisi ngɛ jeha 1982 ɔ mi. E kɛ jeha 11 sɔmɔ kaa kpɔmi nɔ hyɛlɔ ngɛ United States. E je sisi ngɛ jeha 1986 mi.

Ngɛ jeha 1997 ɔ mi ɔ, Guy Pierce kɛ e yo Penny ya bɔni sɔmɔmi ngɛ United States Betel ɔ. Nyɛminyumu Pierce tsu ní ngɛ Ní Tsumi He Nɛ Hyɛɛ Sɔmɔmi Ní Tsumi ɔ Nɔ ɔ, nɛ ngɛ jeha 1998 ɔ mi ɔ, a hla lɛ kaa Ajla Toli Nɛ A Hyɛɛ Betel Ní Tsuli A Nɔ ɔ a walɔ. Ajla toli nɛ ɔmɛ tsuɔ ní ngɛ Blɔ Tsɔɔmi Ajla Toli ɔmɛ a sisi. Ngɛ kpe nɛ a peeɔ daa jeha nɛ a pee ngɛ October 2, 1999 ɔ sisi ɔ, a fia adafi kaa a hla Nyɛminyumu Guy Pierce kaa Blɔ Tsɔɔmi Ajla Toli ɔmɛ a kpɛti nɔ kake. Be saii ji nɛ ɔ, e kɛ Ajla Toli Nɛ A Hyɛɛ Betel Ní Tsuli A Nɔ, kɛ Ajla Toli Nɛ A Hyɛɛ Womihi A Ngmami Nɔ, kɛ Ajla Toli Nɛ A Hyɛɛ Womi Fiami Nɔ, kɛ Ajla Toli Nɛ A Tsuɔ Sanehi A He Ní ɔ tsuo tsu ní ngɛ be munomunohi a mi.

Nyɛminyumu Pierce he ngɛ bua jɔmi wawɛɛ nitsɛ. Nihi nɛ a je hehi slɔɔtohi a bua jɔ e he, nɛ a suɔ e sane. Se nɔ́ titli nɛ ha nɛ nihi nyɛɔ suɔ e he ji, e suɔ nɔmlɔ, e baa e he si, e buu Mawu mlaahi kɛ e sisi tomi mlaahi, nɛ e ngɛ hemi kɛ yemi nɛ mi wa ngɛ Yehowa mi. Nɔ́ ko nɛ Guy Pierce pɔɔ demi nɛ e suɔ kaa adesahi tsuo nɛ a le ji, ke nɔ́ ko ma nyɛ maa tsi pu nya nɛ e be jee po ɔ, Yehowa si womihi lɛɛ, nɔ́ ko nɔ́ ko be nyɛe maa tsi nya nɛ e be mi bae.

Nyɛminyumu Pierce tsu ní wawɛɛ ha Yehowa. E jeɔ ní tsumi sisi mɔtu mla, nɛ behi fuu ɔ, e tsuɔ ní hluu kɛ ya siɔ nyɔ mi. E hia blɔ kɛ ya hehi fuu ngɛ je ɔ mi ya wo nyɛmimɛ Kristofohi he wami. E ngɛ nihi nɛ a hia yemi kɛ buami, aloo ga womi ɔ a he deka. Jehahi babauu a se po ɔ, e nyɛmimɛ Kristofohi kaiɔ bɔ nɛ e peeɔ nihi nibwɔ nɛ́ e kɛ nihi bɔɔ huɛ ha a, nɛ a kaiɔ bɔ nɛ e daa Ngmami ɔ nɔ kɛ woɔ mɛ he wami ha a hulɔ.

Wa nyɛminyumu kɛ wa huɛ nɛ wa fiɛ we e he ɔ, gbo je e yo, e bimɛ ekpa, e bibimɛ, kɛ e bibi mi bimɛ a he. E ngɛ mumi mi bimɛ babauu hulɔ. Mark Sanderson, nɛ lɛ hu e piɛɛ Blɔ Tsɔɔmi Ajla Toli ɔmɛ a he ɔ nɛ tu munyu ngɛ Nyɛminyumu Pierce ya a sisi, Hɔ, March 22, 2014 ngɛ Brooklyn Betel ɔ. E tu hɛ nɔ kami nɛ Nyɛminyumu Pierce ngɛ kaa e maa ya hiɔwe ɔ he munyu, nɛ e kane Yesu munyu nɛ e nyɛɛ se nɛ ɔ: ‘Sihi hehi babauu ngɛ Tsaatsɛ we ɔ. Ke i ya nɛ i ya dla he ko kɛ to nyɛ se ɔ, ma kpale kɛ ba, nɛ ma ba ngɔ nyɛ kɛ ya hi imi nitsɛ ye ngɔ, konɛ he nɛ i ngɛ ɔ, nyɛ hu nyɛɛ hi lejɛ ɔ. Nyɛ le he nɛ i yaa, nɛ blɔ ɔ hu nyɛ le.’—Yohane 14:2-4.

Wa hɛ ma ja ngɛ Nyɛminyumu Pierce he wawɛɛ nitsɛ. Se wa bua jɔ kaa e ‘le blɔ’ kɛ yaa he nɛ e maa ‘hi’ daa a.