Anɛ E Sa Nɛ O Tsake O Juɛmi Lo?
NIHEWI kɛ zangmawi komɛ nɛ a ji Odasefohi pee a juɛmi kaa a ma ya hyɛ sini ko. A sukuu bi ɔmɛ tsuo ngɛ jamɛ a sini ɔ he munyu tue kaa e ngɔɔ. A ya he nɛ a ma je sini ɔ ngɛ ɔ. Benɛ a hyɛ sini ɔ he womihi nɛ a kɛ mɛtɛ si ngɛ gbogbo ɔ he ɔ, o ba nɛ ta hwumi ní nguanguahi kɛ yihi nɛ a wo ajuama bɔli a tadehi ngɛ nɔ. Mɛni nihewi kɛ zangmawi nɛ ɔmɛ nɛ a ji Odasefohi ɔ maa pee? Anɛ a ma ya hyɛ sini ɔ lo?
Daa ligbi ɔ, e he hia nɛ waa mwɔ wa yi mi kpɔ ngɛ níhi a he, nɛ bɔ nɛ wa maa mwɔ wa yi mi kpɔ ha a ma nyɛ ma ha nɛ huɛ bɔmi nɛ ngɛ waa kɛ Yehowa wa kpɛti ɔ mi maa wa aloo e mi ma gbɔjɔ. O ma nyɛ maa mwɔ o yi mi kpɔ kaa o maa pee nɔ́ ko, se ke o susu he saminya a, o ma nyɛ ma tsake o juɛmi nɛ o maa pee nɔ́ kpa. Ke o pee jã a, anɛ e da blɔ lo, aloo lɔ ɔ tsɔɔ kaa o yi mi peeɔ mo enyɔɔnyɔ ngɛ níhi a he?
Benɛ E Sɛ Kaa O Tsake O Juɛmi
Akɛnɛ wa suɔ Yehowa saminya he je ɔ, wa jɔɔ wa wami nɔ ha lɛ nɛ wa ha nɛ a baptisi wɔ. Wa wo lɛ si kaa wa maa ye lɛ anɔkuale, nɛ wa suɔ wawɛɛ kaa wa maa ye wa si womi ɔ nɔ. Se wa he nyɛlɔ Satan Abosiami ngɛ mɔde bɔe wawɛɛ kaa e ma ha nɛ waa je Yehowa se. (Kpojemi 12:17) Wa mwɔ wa yi mi kpɔ kaa wa ma sɔmɔ Yehowa nɛ wa maa bu lɛ tue. Ke wa tsake wa juɛmi ɔ, eko ɔ, wa be wami náe.
Jeha 2,600 kɛ se ji nɛ ɔ, Babilonia Matsɛ Nebukadnezar puɛ sika tsu amaga gojoo ko kɛ ma si, nɛ e fã kaa nɔ tsuaa nɔ nɛ ja amaga a. Nɔ tsuaa nɔ nɛ ma kua ke e be amaga a jae ɔ, a ma sake lɛ kɛ wo flɔnɔɔ kɛ mi la mi. Nihewi etɛ nɛ ɔmɛ nɛ ji Shadrak, Meshak, kɛ Abednego jaa Yehowa, nɛ a sume kaa a ma tɔ̃ e nɔ. Enɛ ɔ he ɔ, a bui matsɛ ɔ tue, nɛ matsɛ ɔ ha nɛ a sake mɛ kɛ wo flɔnɔɔ ɔ mi. Yehowa gu nyakpɛ blɔ nɔ kɛ he a yi wami. A suɔ kaa a ma gbo mohu pe nɛ a ma gbo Mawu tue.
Pee se ɔ, gbalɔ Daniel hu ná le kaa ke nihi na nɛ e ngɛ sɔlee ha Mawu ɔ, a ma sake lɛ kɛ wo jatahi a muɔ mi nɛ e ma gbo gbenɔ yeyee. Se e yaa nɔ nɛ e sɔleɔ si etɛ daa ligbi. E tsakee we juɛmi nɛ e pee kaa e ma ja anɔkuale Mawu ɔ, enɛ ɔ he ɔ, Yehowa “je Daniel kɛ je jatahi a dɛ mi, nɛ a nyɛ we nɛ a gbe lɛ.”
Mawu sɔmɔli nɛ a ngɛ mwɔnɛ ɔ hu yeɔ si nɛ a wo Yehowa benɛ a jɔɔ a wami nɔ ha lɛ ɔ nɔ. Nihewi kɛ zangmawi komɛ nɛ a ji Odasefohi nɛ a ngɛ Afrika a kua ke a be ma okadi ko ngae ngɛ sukuu, enɛ ɔ he ɔ, a wo a he gbeye kaa a maa fie mɛ ngɛ sukuu ɔ. Pee se ɔ, sukuu nɔkɔtɔma a kɛ sukuu bi nɛ ɔmɛ nɛ a ji Odasefohi ɔ ya tu munyu. A yi gbeye, mohu ɔ, a je bumi mi nɛ a tsɔɔ sukuu nɔkɔtɔma a nɔ́ he je nɛ a ke a be jã pee ɔ. Kɛ je jamɛ a ligbi ɔ kɛ yaa a, nɔ ko gba we a nya hu. Nɔ ko nyɛ we a nɔ ngɛ sukuu kaa a gbo Yehowa nɔ tue hu.
Joseph hu kɛ ka kpe benɛ e yo gbo tlukaa a. Joseph weku li be nyagba ko ngɛ bɔ nɛ Joseph suɔ kaa e maa pee ya a ha a he. Se e yo ɔ weku li ɔmɛ be anɔkuale ɔ mi. Enɛ ɔ he ɔ, a suɔ kaa a kɛ ya peemi kusumi komɛ nɛ Mawu bua jɔɛ he ɔ maa wo ya a peemi mi. Joseph de ke: “Benɛ a na kaa i kplɛɛ we nɔ ɔ, a kɛ ya gu ye bimɛ ɔmɛ a nɔ. Se ye bimɛ ɔmɛ hu fĩ si kpɛii. Weku li ɔmɛ bɔ mɔde kaa a maa fɔ nyɔ ngɛ ye we ɔ mi kaa a pɔɔ peemi ɔ. Se i de mɛ ke, ke a ke doo a maa fɔ nyɔ ɔ, lɛɛ tsa pi ngɛ we ɔ mi. A le kaa ye hemi kɛ yemi ɔ kɛ hemi kɛ yemi nɛ ye yo ɔ hɛɛ loko e gbo ɔ he je ɔ, wa fɔɛ nyɔ. Enɛ ɔ he ɔ, benɛ wa sɛsɛ níhi a he saii ɔ, a ya fɔ nyɔ ɔ ngɛ he kpa.
“Be mi nɛ wa ngɛ aywilɛho ɔ yee ɔ, i kpa Yehowa pɛɛ kaa e ye bua wɔ konɛ wa weku li ɔmɛ nɛ a ko ha nɛ wa tɔ̃ e mlaahi a nɔ. E bu ye sɔlemi ɔ tue, nɛ e ye bua wɔ nɛ wa fĩ si ngɛ nɔ nyɛmi nɛ a kɛ ba wa nɔ ɔ tsuo se.” E bɛ Joseph kɛ e bimɛ ɔmɛ a yi mi hyɛ po kaa a ma tsake a juɛmi nɛ a pee kaa a maa bu Yehowa tue ɔ.
Benɛ O Ma Nyɛ Ma Tsake O Juɛmi
Ngɛ jeha 32 ɔ mi ɔ, yo ko nɛ e pi Israel no ɔ de Yesu ke e hia daimonio ngɛ e biyo mi ha lɛ. E de Yesu si abɔ, se Yesu pui e nya mi. Yesu de e kaseli ɔmɛ ke: “Israel ma nɛ ngɛ kaa to nɛ laa a, mɛ pɛ a ngɔ nɛ a tsɔ mi.” Yo ɔ kpa we Yesu nya doomi, enɛ ɔ he ɔ, Yesu de lɛ ke: “E dɛ kaa a ngɔɔ bimɛ ɔmɛ a niye ní ɔ nɛ a sakee ngɔ fɔɔ si ha gbehi.” Yo ɔ tsɔɔ kaa e ngɛ hemi kɛ yemi, lɔ ɔ he ɔ, e de Yesu ke: “Nyɔmtsɛ, e ngɛ mi mohu, se tse gbe ɔmɛ hu yeɔ ní bibliwi nɛ jeɔ a nyɔmtsɛmɛ ɔmɛ a we okplɔɔ ɔ nɔ pueɔ si ɔ eko!” Yesu tsake e juɛmi nɛ e hia daimonio ɔ ngɛ yo ɔ biyo ɔ mi.
Yesu kase Yehowa, enɛ ɔ he je nɛ ke e na kaa e he hia nɛ e tsake e juɛmi ɔ, e peeɔ jã a nɛ. Kaa nɔ hyɛmi nɔ́ ɔ, benɛ Israel bi ɔmɛ gbo tue nɛ a ja sika tsu na bi ɔ, Yehowa ma e juɛmi nya si kaa e ma kpata a hɛ mi. Se
Kaa bɔ nɛ Yehowa kɛ Yesu pee ɔ, bɔfo Paulo hu suɔ kaa e ma tsake e juɛmi ngɛ ní komɛ a he. Ngɛ kekleekle ma se sane kpakpa fiɛɛmi blɔ nɛ Paulo kɛ Marko hia a mi ɔ, Marko ya si Paulo ngɛ blɔ kpɛ. Enɛ ɔ he ɔ, Paulo sume kaa e kɛ Marko maa ya he ko hu. Se pee se ɔ, eko ɔ Paulo na kaa Marko nane pi ngɛ Mawu jami mi, enɛ ɔ he ɔ, Marko ma nyɛ ma ba ye bua lɛ. Lɔ ɔ he ɔ, Paulo de Timoteo ke: “Hla Marko nɛ o kɛ lɛ nɛ ba, ejakaa e he hia saminya ngɛ sɔmɔmi ní tsumi ɔ he.”
Mɛni wa kaseɔ ngɛ enɛ ɔ mi? E ngɛ mi kaa Yehowa ye mluku mohu lɛɛ, se akɛnɛ e naa nɔ mɔbɔ, nɛ e toɔ e tsui si, nɛ e ngɛ suɔmi he je ɔ, e suɔ kaa e ma tsake e juɛmi ngɛ níhi a he. Wa yi mluku, enɛ ɔ he ɔ, pi be tsuaa be nɛ wa juɛmi kpeɔ níhi a he. Enɛ ɔ po tsɔɔ kaa e he hia nɛ be komɛ ɔ, wa tsake wa juɛmi ngɛ ní komɛ a he. Kaa nɔ hyɛmi nɔ́ ɔ, ke wa le si fɔfɔɛ mi nɛ nihi ngɛ ɔ, wa ma nyɛ ma tsake juɛmi nɛ wa hɛɛ ngɛ a he ɔ.
Be komɛ ɔ, ke waa kɛ Mawu jami mi otihi ma wa hɛ mi ɔ, eko ɔ, e he maa hia nɛ wa tsake wa juɛmi. Eko ɔ, a kɛ wɔ kaseɔ Baiblo ɔ nɛ wa yaa asafo mi kpehi, se wa ha we nɛ a baptisi wɔ. Aloo eko ɔ, wa ma nyɛ ma tsu blɔ gbami ní tsumi ɔ, se wa ngɛ wa nane si gblae. Eko ɔ, nyɛminyumu ko sume kaa e ma sɔmɔ kaa asafo mi nɔkɔtɔma aloo asafo mi sɔmɔlɔ ngɛ asafo ɔ mi. (1 Timoteo 3:1) Anɛ jã nɛ e ji ngɛ o blɔ fa mi lo? Anɛ o ma nyɛ ma tsake o juɛmi lo? Yehowa suɔ kaa o ná sɔmɔmi he blɔ nɛ ɔmɛ konɛ o nyɛ nɛ o sɔmɔ lɛ kɛ ni kpahi.
O juɛmi nɛ o ma tsake ɔ ma nyɛ ma ha nɛ o ná jɔɔmi
Ella ji nɔ ko nɛ e sɔmɔɔ ngɛ Afrika Betel ko. E de ke: “Benɛ i ba Betel pɛ ɔ, i li kaa ma
nyɛ ma hi si be kɛkɛɛ. I suɔ kaa ma sɔmɔ Yehowa kɛ ye tsui tsuo, se i sume kaa ma je ye weku ɔ he. Sisije ɔ, ye hɛ ja ngɛ ye weku ɔ he wawɛɛ! Se nyɛmiyo ko nɛ i kɛ lɛ hi tsu kake mi ɔ wo mi he wami nɛ i hi si. Benɛ i ye jeha nyɔngma ngɛ Betel ɔ, i na kaa e sa nɛ ma tsa nɔ nɛ ma sɔmɔ ngɛ Betel konɛ ma ye bua nyɛmimɛ nyumuhi kɛ yihi.”Benɛ E Sa Kaa O Tsake O Juɛmi
Be komɛ ngɛ nɛ e sa kaa wa tsake wa juɛmi ngɛ níhi a he. Kaa nɔ hyɛmi nɔ́ ɔ, Kain hɛ kɔ̃ e nyɛminyumu ɔ nɔ, enɛ ɔ ha nɛ Kain “mi mi fu wawɛɛ nitsɛ.” Mawu na kaa Kain yaa pee nɔ́ yayami, enɛ ɔ he ɔ, e bɔ lɛ kɔkɔ kaa e ye e he nɔ. Mawu de lɛ ke ‘yayami buu si ngɛ e sinya nya.’ Jinɛ e sa kaa Kain ko tsake e juɛmi, se e bui kɔkɔ bɔmi nɛ Mawu kɛ ha lɛ ɔ tue. Aywilɛho sane ji kaa Kain gbe e nyɛminyumu ɔ!
Kaa Kain tsake e juɛmi ɔ, mɛni ko ba?
Wa ma nyɛ maa kase nɔ́ ko hu kɛ je nɔ́ nɛ Matsɛ Uzia pee ɔ mi. Sisije ɔ, e buɔ Yehowa tue, nɛ huɛ bɔmi kpakpa hi e kɛ lɛ a kpɛti. Se dɔmi sane ji kaa e ba wo e he nɔ. E ya sã tsopa kɛ he via ngɛ sɔlemi we ɔ. Osɔfohi pɛ nɛ a ngɛ he blɔ kaa a tsuɔ ní tsumi nɛ ɔ. Osɔfo ɔmɛ bɔ lɛ kɔkɔ kaa e ko ya sã tsopa kɛ he via a, se e nui. Uzia “mi mi fu” nɛ e bui kɔkɔ bɔmi ɔ tue. Enɛ ɔ he ɔ, Yehowa ha he womi nɔ hiɔ yaya pue e he.
Ni komɛ hu pee nɔ hyɛmi nɔ́ kpakpa ngɛ wa be nɛ ɔ mi. A ti nɔ kake ji Joachim. A baptisi lɛ ngɛ jeha 1955 ɔ mi, se a fie lɛ kɛ je asafo ɔ mi ngɛ jeha 1978 ɔ mi. Jeha 20 se ɔ, e tsake e je mi bami, nɛ e pia e he, nɛ e kpale kɛ ba anɔkuale ɔ mi. Benɛ asafo mi nɔkɔtɔma ko bi Joachim nɔ́ he je nɛ e se ya kɛ ngɛ je ɔ mi ɔ, Joachim de ke: “Abofu kɛ he nɔ womi lɛ ha nɛ e ba jã. E dɔ mi wawɛɛ kaa i kpale we kɛ bɛ asafo ɔ mi mla. Benɛ a fie mi kɛ je asafo ɔ mi tsuo ɔ, i le kaa Yehowa Odasefohi nɛ a tsɔɔ nihi anɔkuale ɔ nɛ.”
Be komɛ ɔ, wɔ hu wa ma nyɛ ma tsake wa juɛmi kɛ wa ní peepeehi. Ke wa jeɔ wa tsui mi nɛ wa peeɔ jã a, Yehowa bua maa jɔ wa he.