Anɛ Nyumu Kɛ Yo Ma Nyɛ Maa Suɔ A Sibi Daa Lo?
‘Suɔmi tsoɔ gegeege kaa la, Yah la lilɛ.’
1, 2. Mɛnɔmɛ ma nyɛ ma ná Lahi A Mi La a he se, nɛ mɛni he je? (Moo hyɛ foni nɛ ngɛ ní kasemi ɔ sisije ɔ.)
AYƐFLO ɔ kɛ ayɛflo huno ɔ hyɛ a sibi a hɛ mi nɛ a muɔ hɛlii ngɛ a nya he. Nihi tsuo nɛ a ya yo kpeemi ɔ na kaa a suɔ a he. Nyɛminyumu nɛ e tu munyu ngɛ a yo kpeemi ɔ sisi ɔ na bɔ nɛ a hɛɛ a sibi dɔdɔɔdɔ ha a, nɛ e bi e he ke: ‘Kɛ yaa kɛ yaa a, anɛ suɔmi nɛ ngɛ a kpɛti ɔ mi maa wa pe kikɛ lo? Aloo e mi ma ba gbɔjɔ?’ Ke nɔ ko kɛ e yo suɔ a he nitsɛnitsɛ nɛ a kɛ haomihi nɛ a mi wa wawɛɛ kpe po ɔ, a ma nyɛ maa da nya. Se aywilɛho sane ji kaa bua jɔmi be nihi fuu kɛ a yihi a kpɛti, nɛ enɛ ɔ puɛɔ a gba a. Enɛ ɔ he ɔ, eko ɔ, o ma bi ke, ‘Anɛ suɔmi ma nyɛ maa hi nyumu kɛ yo a kpɛti daa lo?’
2 Ngɛ Matsɛ Salomo be ɔ mi po ɔ, suɔmi nitsɛnitsɛ pɔɛ he. Mɛni he je? Salomo de ke: ‘Ngɛ nyumuhi akpe a kpɛti ɔ, i na dalɔ kake, se yihi akpe a kpɛti lɛɛ i nɛ nɔ ko kaa jã. Nɔ́ nɛ i na kɛkɛ ji kaa Mawu bɔ nɔmlɔ adesa nɛ e hi si saminya, se nɔmlɔ ba kase gɔdɔgɔdɔ si himi.’ (Fiɛlɔ 7:26-29) Jamɛ a be ɔ mi ɔ, ma se yihi nɛ a je mi bami puɛ nɛ a jaa Baal ɔ futu Israel bi ɔmɛ a kpɛti. Enɛ ɔ ha nɛ nyumuhi kɛ yihi fuu nɛ a ji Israel bi ɔ hu a je mi bami ba puɛ. * (Hyɛ sisi ningma.) Se Matsɛ Salomo ngma asilɛ ko maa pee jeha 20 se loko e ngma munyu nɛ ngɛ Fiɛlɔ womi ɔ mi. Asilɛ nɛ ɔ kɔɔ nyumu ko kɛ yo ko nɛ a suɔ a he saminya a, a he. Wa sɛ gba si himi mi jio, wa sɛ we gba si himi mi jio, Lahi A Mi La a ma nyɛ maa ye bua wɔ tsuo konɛ waa le nɔ́ nɛ ji suɔmi nitsɛnitsɛ, kɛ bɔ nɛ wa ma plɛ kɛ je jamɛ a suɔmi ɔ kpo kɛ tsɔɔ nihi ha.
SUƆMI NITSƐNITSƐ MA NYƐ MAA HI NYUMU KƐ YO A KPƐTI!
3. Mɛni he je nɛ nyumu kɛ yo ma nyɛ ma ná suɔmi nitsɛnitsɛ kɛ ha a sibi ɔ?
3 Kane Lahi A Mi La 8:6. Baiblo sisi tsɔɔmi komɛ kɛ munyu nɛ ji “Yah la lilɛ” tsu ní. Mɛni he je? Ejakaa suɔmi ngɛ he wami wawɛɛ nitsɛ, nɛ Yehowa su nɛ pe kulaa ji suɔmi. Yehowa bɔ wɔ konɛ wa nyɛ nɛ waa kase lɛ nɛ wɔ hu wa je suɔmi kpo kɛ ha nihi. (1 Mose 1:26, 27) Benɛ Yehowa bɔ Adam ɔ, e ha lɛ yo ko nɛ e he ngɛ fɛu saminya. Benɛ Adam na Hawa pɛ ɔ, e bua jɔ hluu nɛ e li bɔ nɛ e maa pee e he ha, kɛkɛ nɛ e po asilɛ. Hawa hu suɔ e huno ɔ saminya. E be nyakpɛ, ejakaa Adam mi nɛ Yehowa je lɛ kɛ je. (1 Mose 2:21-23) Kɛ je sisije tɔɔ nɛ Yehowa bɔ nyumu kɛ yo kaa a nyɛ nɛ a ná suɔmi nitsɛnitsɛ kɛ ha a sibi daa.
4, 5. Mɛni munyu lɛ ngɛ Lahi A Mi La a mi?
4 Lahi A Mi La a tu suɔmi nɛ nyumu kɛ yo ma nyɛ ma ná kɛ ha a sibi ɔ he munyu. Bɔ nɛ e tu he munyu ha a ngɛ bua jɔmi kɛkɛ. La a kɔɔ suɔmi nɛ ngɛ yoyo ko kɛ niheyo to hyɛlɔ ko a kpɛti ɔ he. Yoyo ɔ je kɔpe ko nɛ a tsɛɛ ke Shunem, aloo Shulem ɔ mi. Bɔ nɛ a sane ɔ ya nɔ ha ji nɛ ɔ nɛ: Yoyo ɔ ngɛ ní tsue ngɛ e nyɛminyumu ɔmɛ a wai ngmɔhi a mi ngɛ Matsɛ Salomo kɛ e ta buli ɔmɛ a sito he ɔ kasa nya. Matsɛ Salomo to yoyo ɔ he hɛ nɛ e tsɔ e tsɔli ɔmɛ nɛ a ya ngɔ lɛ kɛ ba sito he ɔ. Benɛ a ngɔ lɛ kɛ ba a, Salomo de lɛ ke e he ngɛ fɛu saminya, nɛ e de lɛ hu kaa e maa ke lɛ níhi fuu. Se yoyo ɔ ná suɔmi kɛ ha to hyɛlɔ ko momo, nɛ e suɔ kaa e kɛ jamɛ a to hyɛlɔ ɔ maa hi si. (Lahi A Mi La 1:4-14) To hyɛlɔ ɔ hla yoyo ɔ hluu kɛ ya su sito he ɔ. Benɛ e na yoyo ɔ, mɛ tsuo a tu munyu ngɔngɔɛhi kɛ tsɔɔ a sibi kɛ tsɔɔ kaa a suɔ a he wawɛɛ nitsɛ.
5 Benɛ Salomo kpale kɛ ho Yerusalem ya a, e kɛ zangmayo ɔ ho. To hyɛlɔ ɔ hu nyɛɛ a se kɛ ho. (Lahi A Mi La 4:1-5, 8, 9) Salomo pee nɔ́ ko hluu se e nyɛ we nɛ e tsake yoyo ɔ juɛmi ngɛ to hyɛlɔ ɔ he fɛɛ. (Lahi A Mi La 6:4-7; 7:1-10) Lɔ ɔ he ɔ, Salomo ha nɛ yoyo ɔ kpale kɛ ho e we mi ya. Nyagbenyagbe ɔ, Shulam yoyo ɔ tsɛ e suɔlɔ ɔ nɛ e de lɛ ke e tuu “kaa batslɔɔ” kɛ ba e ngɔ.
6. Mɛni he je nɛ ke nɔ ko ngɛ munyu tue ngɛ Lahi A Mi La a mi ɔ, e ma nyɛ maa ye kaa wa maa le nɔ ɔ mi tso ɔ?
6 Munyuhi nɛ ngɛ Lahi A Mi La a mi ɔ ngɛ bua jɔmi wawɛɛ nitsɛ. Ngɛ anɔkuale mi ɔ, lɔ ɔ he je nɛ a tsɛɛ lɛ “lahi a mi la” a nɛ. (Lahi A Mi La 1:1, NW) Se Salomo wui nihi nɛ a tu munyu ngɛ la a mi ɔ a biɛ ta. Salomo pee jã, ejakaa e sume nɛ nɔ́ ko nɛ je nihi a juɛmi kɛ je munyu ngɔngɔɛhi nɛ ngɛ la a mi ɔ nɔ. E ngɛ mi kaa a wui nihi nɛ a tu munyu ngɛ la a mi ɔ a ta mohu lɛɛ, se ke nɔ ko ngɛ munyu tue ngɛ la a mi ɔ, nɔ ɔ nya mi munyu nɛ o kɛ maa le kaa e ji nyumu aloo e ji yo.
“O SUƆMI Ɔ NGƆƆ PE WAI DƆKƆDƆKƆ”
7, 8. Kɛ to hyɛlɔ ɔ kɛ yoyo ɔ plɛ kɛ je suɔmi kpo kɛ tsɔɔ a he ha kɛɛ? Mo ha enɛ ɔ he nɔ hyɛmi nɔ́.
7 Yiheyo ɔ kɛ to hyɛlɔ ɔ tu munyu ngɔngɔɛhi kɛ tsɔɔ a sibi kɛ tsɔɔ kaa a suɔ a he. Eko ɔ, níhi nɛ a pee kɛ je “suɔmi” kpo kɛ ha a he ɔ maa pee wɔ nyakpɛ, ejakaa a ngma munyu nɛ ɔmɛ pe jeha 3,000 ji nɛ ɔ. (Lahi A Mi La 1:2) E slo bɔ nɛ nihi nɛ a hi si ngɛ jamɛ a be ɔ mi ɔ peeɔ a ní ha ngɛ bɔ nɛ wɔɔ wa peeɔ wa ní ha mwɔnɛ ɔ he lɛɛ, se wa ma nyɛ maa nu suɔmi nɛ a je kpo kɛ tsɔɔ a he ɔ sisi. Kaa nɔ hyɛmi nɔ́ ɔ, to hyɛlɔ ɔ tsɔɔ kaa yoyo ɔ hɛngmɛ ngɛ “dɔkɔɔ kaa lahuɛ hɛngmɛ.” Enɛ ɔ tsɔɔ kaa ke e na yoyo ɔ hɛngmɛ ɔ, e naa kaa yoyo ɔ mi mi jɔ nɛ e ngɛ kpoo, enɛ ɔ he ɔ, e suɔ lɛ. (Lahi A Mi La 1:15) Yoyo ɔ hu de ke to hyɛlɔ ɔ hɛngmɛhi ngɛ fɛu kaa lahuɛhi. (Kane Lahi A Mi La 5:12.) To hyɛlɔ ɔ hɛngmɛhi muɔ e hɛ nɛ a ngɛ fɛu kaa lahuɛhi nɛ a ngɛ a he due.
8 To hyɛlɔ ɔ tsɔɔ kaa zangmayo ɔ he ngɛ fɛu, nɛ zangmayo ɔ hu tsɔɔ kaa to hyɛlɔ ɔ he ngɛ fɛu. Se tsa pi lɔ ɔ pɛ. Kaa nɔ hyɛmi nɔ́ ɔ, to hyɛlɔ bua jɔ mi mi jɔmi mi nɛ zangmayo ɔ jeɔ nɛ e kɛ nihi tuɔ munyu ɔ he. (Kane Lahi A Mi La 4:7, 11.) Enɛ ɔ he ɔ, e de yoyo ɔ ke: “Ye we ayɛflo nɛ i suɔ, ke a fiɔ o nya he ɔ, e ngɔɔ kaa hwo, o lilɛ ngɛ kaa nyɔ nyu kɛ hwo ha mi.” Yoyo ɔ nya mi munyu ngɔɔ ha to hyɛlɔ ɔ kaa nyɔ nyu kɛ hwo. Benɛ to hyɛlɔ ɔ de yoyo ɔ ke, “ye afɛu yo, o he ngɛ fɛu tsɔ; o he ngɛ fɛu kɛ pi si” ɔ, tsa pi e he nɛ ngɛ fɛu ɔ pɛ he munyu nɛ e ngɛ tue, mohu ɔ, e ngɛ su kpakpahi nɛ yoyo ɔ ngɛ ɔ hu a he munyu tue.
Huno kɛ e munyu tumi kɛ e ní peepee ma nyɛ maa ma nɔ mi kɛ ha e yo kaa e suɔ lɛ, nɛ yo ɔ hu ma nyɛ maa pee jã
9. (a) Mɛni suɔmi slɔɔtoslɔɔtohi lɛ e sa kaa e hi nɔ kɛ e yo a kpɛti? (b) Mɛni he je nɛ e he hia kaa nɔ kɛ e yo nɛ a je suɔmi kpo kɛ ha a sibi ɔ?
9 Mwɔnɛ ɔ, nihi kɛ a yihi nɛ a ngɛ Yehowa sɔmɔe ɔ bui gba si himi kaa somi nɛ mɛ ni enyɔ ɔmɛ a so kɛkɛ. Mohu ɔ, suɔmi nitsɛnitsɛ nɛ a ngɛ ha a sibi ɔ he je nɛ a sɛ gba si himi mi ɔ nɛ. Se mɛni suɔmi lɛ e sa kaa e hi nɔ kɛ e yo a kpɛti? Anɛ lɔ ɔ ji suɔmi nɛ ha we nɛ nɔ foɔ lɛ pɛ e nɔ́ mi nɛ Baiblo ɔ tsɔɔ kaa e sa nɛ wa je kpo kɛ tsɔɔ nihi tsuo ɔ lo? (1 Yohane 4:8) Anɛ lɔ ɔ ji suɔmi nɛ wa ngɛ kɛ ha wa weku ɔ lo? Anɛ lɔ ɔ ji suɔmi nɛ huɛmɛ nɛ nyu bi ngɛ a kpɛti ɔ ngɛ kɛ ha a sibi ɔ lo? (Yohane 11:3) Aloo lɔ ɔ ji suɔmi nɛ hii nyumu kɛ yo a kpɛti ɔ? (Abɛ 5:15-20) Ngɛ anɔkuale mi ɔ, e sa nɛ nɔ kɛ e yo nɛ a je suɔmi slɔɔtoslɔɔto nɛ ɔmɛ nɛ wa wo a ta a tsuo kpo kɛ tsɔɔ a sibi. Ke a pee jã a, lɔ ɔ tsɔɔ kaa a ngɛ suɔmi nitsɛnitsɛ kɛ ha a he. O kɛ o munyu tumi kɛ o ní peepee ma nyɛ maa ma nɔ mi kɛ ha o huno aloo o yo kaa o suɔ lɛ, nɛ lɔ ɔ ma ha nɛ bua jɔmi maa hi nyɛ gba si himi ɔ mi. Niinɛ, ke o be deka po ɔ, e he hia wawɛɛ nɛ o pee jã. Ngɛ ma komɛ a nɔ ɔ, ni kpahi lɛ a toɔ gba si himi ɔ he blɔ nya kɛ haa nyumu ɔ kɛ yo ɔ. Ngɛ hehi kaa jã a, eko ɔ, yo kpeemi ligbi ɔ nɔ loko nyumu ɔ kɛ yo ɔ leɔ a he. Enɛ ɔ he ɔ, benɛ a ngɛ a sibi lee nɛ suɔmi nɛ ngɛ a kpɛti ɔ hu mi ngɛ wae ɔ, e he hia nɛ a ngɔ a munyu tutui kɛ tsɔɔ kaa a suɔ a sibi. Jã nɛ a maa pee ɔ ma ha nɛ suɔmi nɛ ngɛ a kpɛti ɔ mi maa wa wawɛɛ.
10. Mɛni he je nɛ e he hia nɛ nihi kɛ a yihi nɛ a je suɔmi kpo kɛ ha a sibi ɔ?
10 Ke nɔ kɛ e yo jeɔ suɔmi kpo kɛ haa a sibi ɔ, lɔ ɔ woɔ gba si himi ɔ mi he wami ngɛ blɔ kpa ko hu nɔ. Ngɛ la a mi ɔ, Matsɛ Salomo tsɔɔ kaa e “maa pee sika tsu ga kɛ e he sika hiɔ níhi ha” yoyo ɔ. Salomo kɔ yoyo ɔ, nɛ e de lɛ ke, e he “ngɛ fɛu kaa nyɔhiɔ, nɛ e ngɛ kpɛe kaa pu.” (Lahi A Mi La 1:9-11; 6:10) Se yiheyo ɔ ná suɔmi nitsɛnitsɛ kɛ ha nɔ ko momo. Mɛni ha nɛ loloolo ɔ, e juɛmi ngɛ to hyɛlɔ ɔ nɔ ɔ? Mɛni wo e bua benɛ e be to hyɛlɔ ɔ kasa mi ɔ? (Kane Lahi A Mi La 1:2, 3.) E kai suɔmi munyuhi nɛ to hyɛlɔ ɔ tu kɛ tsɔɔ lɛ ɔ. To hyɛlɔ ɔ suɔmi ɔ ngɔ ha lɛ pe “wai dɔkɔkɔdɔ,” nɛ lɔ ɔ wo e bua ngɛ matsɛ we ɔ kaa ‘nu kɛ e he via’ ngɛ e yi mi. (La 23:5; 104:15) E he hia nɛ nihi kɛ a yihi nɛ a je suɔmi kpo kɛ ha a sibi, ejakaa lɔ ɔ ma ha nɛ suɔmi nɛ ngɛ a kpɛti ɔ mi maa wa. Suɔmi nɛ a jeɔ kpo kɛ haa a sibi nɛ a maa hi kaie ɔ ma ha nɛ suɔmi nɛ ngɛ a kpɛti ɔ mi maa wa daa.
NYƐ KO “TLE SUƆMI SI NGƐ YE MI KƐ YA SI BENƐ SUƆMI Ɔ NITSƐ MAA TE SI”
11. Mɛni wa ma nyɛ maa kase ngɛ nɔ́ nɛ Shulam yoyo ɔ de yi ɔmɛ nɛ a ngɛ Matsɛ Salomo we ɔ mi ɔ mi?
11 Ke e ngɛ o juɛmi mi kaa o maa sɛ gba si himi mi ɔ, mɛni o ma nyɛ maa kase ngɛ Shulam yoyo ɔ he? E sume Matsɛ Salomo. E wo yi ɔmɛ nɛ a ngɛ matsɛ we ɔ si ke: “Nyɛ ko bɔ mɔde kaa nyɛ ma tle suɔmi si ngɛ ye mi kɛ ya si benɛ suɔmi ɔ nitsɛ maa te si.” (Lahi A Mi La 2:7, NW; 3:5) Ke jã a, anɛ e da blɔ kaa nɔ ko ma ná suɔmi nɛ hii nyumu kɛ yo a kpɛti ɔ kɛ ha nɔ saisaa ko kɛkɛ lo? Dɛbi, nile ngɛ mi kaa o maa to o tsui si kɛ ya si benɛ o ma ná nɔ ko nɛ o ma nyɛ ma ná suɔmi nitsɛnitsɛ kɛ ha lɛ.
Nile ngɛ mi kaa o maa to o tsui si kɛ ya si benɛ o ma ná nɔ ko nɛ o ma nyɛ ma ná suɔmi nitsɛnitsɛ kɛ ha lɛ
12. Mɛni he je nɛ Shulam yoyo ɔ suɔ to hyɛlɔ ɔ?
12 Mɛni he je nɛ Shulam yoyo ɔ suɔ to hyɛlɔ ɔ? To hyɛlɔ ɔ he ngɛ fɛu ha lɛ kaa “odabɔ.” To hyɛlɔ ɔ ninehi a mi wa kaa “sika tsu gahi,” nɛ e nane tsohi ngɛ fɛu nɛ a he wa kaa “tɛ hiɔ titimahi.” Se tsa pi kaa to hyɛlɔ ɔ he wa nɛ e he ngɛ fɛu kɛkɛ. Yoyo ɔ le kaa to hyɛlɔ ɔ suɔ Yehowa, nɛ e ngɛ su kpakpahi hulɔ. Enɛ ɔ he ɔ, e naa to hyɛlɔ ɔ kaa e nɔ be, nɛ e tsɔɔ kaa e ngɛ kaa “tso nɛ yiblii ngɔɔ saminya ngɛ pú mi tsohi a kpɛti.”
13. Mɛni he je nɛ to hyɛlɔ ɔ suɔ Shulam yoyo ɔ?
13 Shulam yoyo ɔ he ngɛ fɛu saminya. E ngɛ mi kaa jamɛ a be ɔ mi ɔ, Matsɛ Salomo ngɛ “yihi nyingmi ekpa, plãhi nyingmi kpaanyɔ, kɛ yihewi nɛ a li a yibɔ” mohu lɛɛ, se e ná yoyo ɔ he suɔmi. Anɛ yoyo ɔ he fɛu ɔ pɛ he je nɛ to hyɛlɔ ɔ suɔ lɛ ɔ lo? Ohoo. Yoyo ɔ suɔ Yehowa nɛ e ngɛ su kpakpahi hulɔ. Kaa nɔ hyɛmi nɔ́ ɔ, yoyo ɔ baa e he si, nɛ e kɛ e he to “sharon pú mi mɔmɔ” kɛkɛ he. Se to hyɛlɔ ɔ lɛɛ e naa yoyo ɔ kaa e nɔ be. E naa yoyo ɔ kaa ‘nga nɔ mɔmɔ ngɛ miohi a mi.’14. Ke wa suɔ kaa wa maa sɛ gba si himi mi ɔ, mɛni wa ma nyɛ maa kase ngɛ to hyɛlɔ ɔ kɛ Shulam yoyo ɔ a he?
14 Yehowa wo e sɔmɔli mlaa kaa ‘a kɛ nihi nɛ le Nyɔmtsɛ ɔ pɛ’ nɛ sɛ gba si himi mi. (1 Korinto Bi 7:39) Enɛ ɔ tsɔɔ kaa ke waa kɛ nɔ ko maa nyɛɛ, aloo maa sɛ gba si himi mi ɔ, e sa nɛ nɔ ɔ nɛ pee Yehowa sɔmɔlɔ nɛ a baptisi lɛ. Kɛ enɛ ɔ maa ye bua gba si himi ha kɛɛ? Nɔ kɛ e yo kɛ haomihi maa kpe ngɛ a si himi mi. Se ke huɛ bɔmi kpakpa ngɛ mɛ ni enyɔ ɔmɛ tsuo kɛ Yehowa a kpɛti ɔ, tue mi jɔmi kɛ bua jɔmi maa hi a gba si himi ɔ mi. Lɔ ɔ he ɔ, ke o suɔ kaa o maa sɛ gba si himi mi ɔ, moo kase to hyɛlɔ ɔ kɛ Shulam yoyo ɔ. Mo hla nɔ ko nɛ e ngɛ su kpakpahi nɛ e suɔ Yehowa wawɛɛ.
Kristofohi kɛ nɔ ko nɛ pi Yehowa sɔmɔlɔ nɛ a baptisi lɛ bɔɛ, nɛ a sɛ we gba si himi mi hulɔ (Hyɛ kuku 14)
YE WE AYƐFLO Ɔ “NGƐ KAA ABƆƆ NƐ A NGMƐ NYA”
15. Mɛni nyumuhi kɛ yihi nɛ a ji Kristofohi nɛ a sɛ we gba si himi mi ɔ ma nyɛ maa kase ngɛ anɔkuale nɛ Shulam yoyo ɔ ye ɔ he?
15 Kane Lahi A Mi La 4:12. Mɛni he je nɛ to hyɛlɔ ɔ de ke Shulam yoyo ɔ ngɛ kaa “abɔɔ nɛ a ngmɛ nya” a? Ke a ngmɛ abɔɔ ko nya a, nihi nyɛ we mi sɛmi. Yoyo ɔ ngɛ kaa abɔɔ nɛ a ngmɛ nya, ejakaa e suɔ to hyɛlɔ ɔ pɛ. E to e yi mi kaa e maa gba to hyɛlɔ ɔ, enɛ ɔ he ɔ, matsɛ ɔ nɔ́ ko si we lɛ kpu. Yoyo ɔ tsakee we e juɛmi. Yoyo ɔ ngɛ kaa “gbogbo.” E be kaa “agbo” nɛ nihi ma nyɛ ma bli faa. (Lahi A Mi La 8:8-10) Jã kɛ̃ nɛ ke nyumu ko kɛ yo ko nɛ a ji Kristofohi ngɛ blɔ nya toe kaa a maa sɛ gba si himi mi ɔ, e sa kaa a ye a sibi anɔkuale. E sɛ nɛ a ná nɔ kpa ko he suɔmi.
16. Ke o kɛ nɔ ko ngɛ bɔe konɛ nyɛɛ sɛ gba si himi mi ɔ, mɛni o ma nyɛ maa kase ngɛ Lahi A Mi La a mi?
Lahi A Mi La 1:6; 2:10-15) Ke o kɛ nɔ ko ngɛ bɔe konɛ nyɛɛ sɛ gba si himi mi ɔ, kɛ nyɛ ma plɛ kɛ yu nyɛ he ngɛ ajuama bɔmi ní peepeehi a he ha kɛɛ? Nyɛɛ sɛ hlami nɛ nyɛɛ tsɔɔ ní komɛ nɛ nyɛ be pee bɔ nɛ pee nɛ nyɛ huɛ bɔmi ɔ he nɛ tsɔ. Nyɛ pɛ nyɛ ko ya hi he ko banee nɛ nɔ ko be nyɛ nae. Níhi nɛ nyɛ maa pee kɛ je suɔmi kpo kɛ ha nyɛ he ɔ he nɛ tsɔ.
16 Benɛ to hyɛlɔ ɔ de yoyo ɔ kaa e kɛ lɛ nɛ ya slaa si ɔ, yoyo ɔ nyɛminyumu ɔmɛ ngmɛ́ yoyo ɔ blɔ. Mohu ɔ, a tsɔ lɛ kɛ ho konɛ e ya bu a wai ngmɔ ɔmɛ a he ha mɛ. Anɛ a he we a nyɛmiyo ɔ yi lo? Anɛ a susu kaa a nyɛmiyo ɔ kɛ to hyɛlɔ ɔ ngɛ hlae maa ngɔ a he ya wo ajuama bɔmi ní peepee ko mi lo? Dɛbi. A suɔ kaa a maa po a nyɛmiyo ɔ he piɛ konɛ e ko ngɔ e he kɛ wo si himi yaya ko mi. (17, 18. Mɛni o kase ngɛ Lahi A Mi La a nɛ wa susu he ɔ mi?
17 Yehowa sume kaa gbahi nɛ a puɛ. E suɔ nɛ nɔ kɛ e yo nɛ a suɔ a he. Ke nyumu ko kɛ yo ko sɛ gba si himi mi ɔ, lɔ ɔ tsɔɔ kaa a suɔ a sibi. Se loko a gba a be puɛe ɔ, e sa nɛ a ha nɛ suɔmi nɛ ngɛ a kpɛti ɔ mi nɛ wa kaa la nɛ ngɛ tsoe daa.
18 Ke o suɔ kaa o maa sɛ gba si himi mi ɔ, mo hla nɔ ko nɛ o ma nyɛ ma ná suɔmi nitsɛnitsɛ kɛ ha lɛ. Ke o na nɔ ko kaa jã a, nyɛ ni enyɔ ɔmɛ tsuo nyɛɛ bɔ mɔde nɛ nyɛ ha suɔmi nɛ ngɛ nyɛ kpɛti ɔ mi nɛ wa daa. Kaa bɔ nɛ wa kase ngɛ Lahi A Mi La a mi ɔ, nyumu kɛ yo ma nyɛ maa suɔ a sibi daa, ejakaa suɔmi ji “Yah la lilɛ.”
^ kk. 2 Hyɛ January 15, 2007 Blɛfo gbi Hwɔɔmi Mɔ ɔ ba fa 31.