NGƐ April 28, 2013 ɔ nɔ ɔ, a pee kpe klɛdɛɛ ko ngɛ Nagoya, ngɛ Japan. Ngɛ jamɛ a kpe ɔ sisi ɔ, Anthony Morris, nɛ e piɛɛ Blɔ Tsɔɔmi Ajla Toli ɔmɛ a he ɔ fia adafi ko nɛ ngɛ bua jɔmi. Adafi fiami ɔ ji: a je womi ehe ko kpo ngɛ Japan gbi ɔ mi nɛ e yi ji, The Bible—The Gospel According to Matthew (Baiblo ɔ—Mateo Sane Kpakpa a). Nihi nɛ a ya kpe ɔ kɛ nihi nɛ a hyɛ nɔ́ nɛ ya nɔ ɔ ngɛ video nɔ ɔ tsuo a yibɔ hiɛ pe 210,000. Benɛ a nu adafi fiami ɔ, a bua jɔ, nɛ a gbɔ a dɛ mi be kɛkɛɛ.

A je Mateo Sane kpakpa nɛ ɔ kɛ je New World Translation ɔ mi. Womi nɛ ɔ hɛɛ ba fa 128, nɛ e ngɛ slɔɔto kulaa. Nyɛminyumu Morris tsɔɔ kaa a pee womi nɛ ɔ konɛ a kɛ ye bua Japan bi. Mɛni he je nɛ womi nɛ ɔ ngɛ slɔɔto ɔ? Mɛni he je nɛ e he hia kaa a pee womi ko kaa jã? Nɛ kɛ nihi nɛ a nine su womi nɛ ɔ eko nɔ ɔ pee a ní ha kɛɛ?

Bɔ nɛ a ngma Matthew womi nɛ ɔ ha a pee nihi fuu nyakpɛ. A ma nyɛ maa ngma Japan gbi ɔ tlalatlala kɛ je hiɔwe kɛ ba zugba, aloo kɛ je muɔ nɔ kɛ ya hiɔ nɔ. Womihi kɛ womihi nɛ asafo ɔ pee ngɛ Japan gbi ɔ mi ɔ, a ngma fuu kɛ je muɔ nɔ kɔ ya hiɔ nɔ. Se ngɛ womi ehe nɛ ɔ mi lɛɛ, a ngma ní ɔ tlalatlala kɛ je hiɔwe kɛ ba zugba, kaa bɔ nɛ a ngmaa Japan adafi fiami womihi, kɛ womi kpahi ɔ. Ningma nɛ ɔ kanemi yi ha Japan bi fuu. Ngɛ Japan bi a womihi a mi hu ɔ, behi fuu ɔ, a ngmaa munyuyihi ngɛ ba fa a yi nɔ, se ngɛ womi ehe nɛ ɔ mi ɔ, a ngma munyuyi ɔmɛ kaa munyuyi nyafinyafihi ngɛ ningma a mi konɛ nihi nɛ a maa kane ɔ, e ko ye ha mɛ kaa a maa na munyu oti ɔmɛ.

Nyɛmimɛ nyumuhi kɛ yihi nɛ a ngɛ Japan ɔ bɔni womi nɛ ji Matthew ɔ kanemi amlɔ nɔuu. Nyɛmiyo ko nɛ e ye jeha 80 kɛ se ɔ de ke: “I kane Mateo womi ɔ si abɔ, se bɔ nɛ a ngma ní ɔ tlalatlala kɛ je hiɔwe kɛ ba zugba ngɛ womi ehe nɛ ɔ mi ha a, ye bua mi nɛ i nu Yoku ɔ Nɔ Fiɛɛmi ɔ sisi saminya.” Nyɛmiyo wayoo ko ngma ke: “I kane Matthew womi ɔ kɛ je sisije kɛ ya si nyagbe amlɔ nɔuu. Ngɛ womihi fuu nɛ i kaneɔ ɔ mi ɔ, a ngmaa ní ɔ kɛ jeɔ muɔ nɔ kɛ yaa hiɔ nɔ, se Japan bi fuu suɔ womihi nɛ a ngmaa ní ɔ tlalatlala kɛ jeɔ hiɔwe kɛ baa zugba.”

Mɛni he je nɛ Baiblo ɔ mi womi kake nɛ ɔ ji womi titli nɛ maa ye bua Japan bi ɔ? E ngɛ mi kaa Japan bi fuu li nɔ́ ko tsɔ ngɛ Baiblo ɔ he mohu lɛɛ, se a suɔ kaa a maa kane Baiblo ɔ. Amlɔ nɛ ɔ, nihi nɛ a nɛ Baiblo ɔ hyɛ ɔ, ma nyɛ ma ná Baiblo ɔ fã ko nɛ a kane.

Mɛni he je nɛ Mateo womi ɔ pɛ nɛ a pee ha mɛ ɔ? Ke Japan bi fuu nu nɛ a tsɛ “Baiblo” ɔ biɛ ɔ, nɔ́ nɛ baa a juɛmi mi ji Yesu Kristo. Lɔ ɔ he ɔ, a pee Mateo womi ɔ kɛ ha mɛ, ejakaa munyuhi nɛ ngɛ mi ɔ ekomɛ kɔɔ weku mi nɛ Yesu je, e fɔmi, e Yoku ɔ Nɔ Fiɛɛmi ɔ nɛ nihi fuu le ɔ, kɛ gbamihi nɛ kɔɔ nyagbe  ligbi ɔmɛ a he ɔ he. Japan bi fuu nyaa munyu nɛ ɔmɛ a he.

Fiɛɛli nɛ a ngɛ Japan ɔ a hɛ dɔ kɛ ngɛ womi ehe nɛ ɔ gbae ngɛ wehi a mi, nɛ ke a kpale ya slaa nihi hu ɔ, a gbaa ha nihi. Nyɛmiyo ko ngma ke: “Amlɔ nɛ ɔ, i ná he blɔ nɛ ma kɛ gba Mawu Munyu ɔ kɛ ha nihi nɛ a ngɛ wa zugba kpɔ ɔ mi ɔ. Ngɛ anɔkuale mi ɔ, ligbi nɛ a pee kpe klɛdɛɛ ɔ we piani ɔ, i nyɛ nɛ i ha nɔ ko Matthew womi ɔ kake!”

Mɛni blɔ nɔ fiɛɛli guɔ kɛ haa nihi womi ehe nɛ ɔ? Japan bi fuu le munyu komɛ kaa “agbo tokofii ɔ,” “nyɛ ko sake nyɛ june ngɔ pue kpotoohi a blɔ mi,” kɛ “nyɛ ko hao nyɛ he ha hwɔɔ.” (Mateo 6:34; 7:6, 13) Ke a ná le kaa Yesu Kristo nɛ tu munyu nɛ ɔmɛ ɔ, e peeɔ mɛ nyakpɛ. Ke a ti nihi fuu na munyu nɛ ɔmɛ ngɛ Matthew womi ɔ mi ɔ, a deɔ ke: “I suɔ kaa ke e hí kulaa a, ma kane Baiblo ɔ si kake.”

Ke fiɛɛli kpale ya slaa nihi nɛ́ a ha mɛ Matthew womi ɔ eko ɔ, ni ɔmɛ pɔɔ demi ke benɛ a ha mɛ womi ɔ, a kane eko amlɔ nɔuu, loo a kane tsuo. Nyumu ko nɛ e ye jeha 60 kɛ se ɔ de ke: “I kane womi ɔ si abɔ, nɛ munyu nɛ ngɛ mi ɔ wo ye bua. I kpa nyɛ pɛɛ, nyɛɛ tsɔɔ mi níhi fuu ngɛ Baiblo ɔ mi.”

A kɛ Matthew womi ɔ tsuɔ ní ngɛ ma nɔ odase yemi mi hulɔ. Benɛ nyɛmiyo Odasefo no ko ngɛ fiɛɛe ɔ, e kɛ e e-mail adrɛs ha zangmayo ko nɛ́ e ha lɛ womi ɔ eko ɔ. Ngmlɛfia kake se ɔ, zangmayo ɔ mane nyɛmiyo ɔ sɛ gbi, nɛ e de lɛ ke e kane womi ɔ he ko, nɛ e suɔ kaa e maa le níhi babauu. Otsi kake se ɔ, a kɛ zangmayo ɔ pee kekleekle Baiblo mi ní kasemi, nɛ be bɔɔ se ɔ, e bɔni asafo mi kpehi yami.

A kɛ Matthew womi ɔ nɛ hiɛ pe 1,600,000 mane asafohi nɛ ngɛ Japan. Daa nyɔhiɔ ɔ, Odasefohi nɛ a ngɛ lejɛ ɔ haa nihi womi ɔ akpe nyɔngmahi abɔ. Nihi nɛ a pee womi nɛ ɔ de ngɛ nya tsɔɔmi munyu ɔ mi ke: “Wa he ye kaa nɔ tsuaa nɔ nɛ maa kane womi nɛ ɔ bua maa jɔ Baiblo ɔ he wawɛɛ nitsɛ.”