NÍ TSUMI nɛ he hia pe kulaa nɛ a ngɛ tsue ngɛ zugba a nɔ mwɔnɛ ɔ ji sane kpakpa fiɛɛmi ní tsumi ɔ. E ji he blɔ nɛ wa ná kaa wa da Yehowa nane mi kɛ ngɛ fiɛɛe ha nihi. Se be komɛ ɔ, e yee ha blɔ gbali kɛ fiɛɛli kaa a maa ya nɔ maa fiɛɛ kɛ kã. Mɛni he je?

Fiɛɛli komɛ na kaa ke a ngɛ fiɛɛe ngɛ wehi a mi ɔ, a pɔɛ nihi nami. Nɛ ke a ya ná nihi ngɛ we mi po ɔ, eko ɔ, ni ɔmɛ a bua be Matsɛ Yemi sɛ gbi ɔ he jɔe, nɛ a mi mi ma fu. Fiɛɛli komɛ hu a zugba kpɔ ɔ kle wawɛɛ nɛ nihi buɔ mɛ tue, se e peeɔ mɛ kaa a be nyɛe maa fiɛɛ kɛ ha nɔ tsuaa nɔ nɛ ngɛ zugba kpɔ ɔ mi. Ni komɛ hu ngɛ fiɛɛe jehahi babauu ji nɛ ɔ, se akɛnɛ nyagbe ɔ bɛ lolo he je ɔ, a kɔni mi jɔ̃.

Waa kɛ kahi maa kpe ngɛ fiɛɛmi ní tsumi ɔ mi, nɛ lɔ ɔ ma nyɛ maa ba kã nɛ wa ngɛ ɔ si. Satan “Abosiami” lɛ ngɛ je nɛ wa ngɛ mi ɔ nɔ yee, enɛ ɔ he ɔ, wa le kaa sane kpakpa fiɛɛmi ní tsumi ɔ he maa wa ha wɔ.—1 Yohane 5:19.

Ngɛ haomihi nɛ o ma kɛ kpe ngɛ o fiɛɛmi ní tsumi ɔ mi tsuo se ɔ, mo ná nɔ mi mami kaa Yehowa maa ye bua mo nɛ o da nya. Se mɛni o maa pee konɛ kã nɛ o kɛ fiɛɛɔ ɔ mi nɛ wa? Ha wa susu ga womihi nɛ nyɛɛ se nɛ ɔ a he nɛ waa hyɛ.

Daa jeha a, a baptisiɔ nimli akpehi abɔ nɛ a ba peeɔ Yehowa Odasefohi. Ke o ji nɔ he nɛ a baptisi mo ɔ, o ma nyɛ maa kase nɔ́ ko kɛ je nihi nɛ a ngɛ fiɛɛe jehahi babauu ji nɛ ɔ a ngɔ. Nɛ ke o ji fiɛɛlɔ nɛ e se kɛ ngɛ asafo ɔ mi ɔ, anɛ o ma nyɛ maa ye bua kɛ tsɔse ni hehi lo? Ke o pee jã a, o ma ná bua jɔmi wawɛɛ.

Yesu le kaa loko e kaseli ɔmɛ maa pee tsɔɔli nɛ a le nihi ní tsɔɔmi saminya a, e he maa hia nɛ e tsɔse mɛ, enɛ ɔ he ɔ, e pee jã. (Luka 8:1) Mwɔnɛ ɔ, e he hia nɛ a tsɔse ni hehi hu jã nɔuu, konɛ a nyɛ nɛ a fiɛɛ kɛ tsɔɔ nihi saminya.

E sɛ nɛ wa susu kaa ke fiɛɛlɔ he ko ngɛ fiɛɛmi yae ɔ, lɔ ɔ tsɔɔ kaa e maa le bɔ nɛ a fiɛɛɔ ha. E he hia nɛ nɔ ko nɛ e mi mi jɔ, nɛ e ngɛ suɔmi nɛ ye bua jamɛatsɛ ɔ. E he hia nɛ fiɛɛlɔ nɛ ngɛ níhi a si kpami ɔ nɛ tsɔɔ fiɛɛlɔ he ɔ bɔ nɛ (1) e ma plɛ kɛ  kase nɔ́ nɛ e ma ya de wetsɛ ɔ ha, konɛ e pee nɛ e hyɛ, kɛ (2) bɔ nɛ a kɛ nihi sɛɛɔ ní, nɛ (3) a haa womi, nɛ (4) a kpaleɔ kɛ ya slaa nihi nɛ a ngɛ munyu ɔ he bua jɔmi ɔ ha, kɛ (5) bɔ nɛ a jeɔ Baiblo mi ní kasemi sisi ha. Ke fiɛɛlɔ he ɔ toɔ bɔ nɛ fiɛɛlɔ nɛ ngɛ níhi a si kpami ɔ plɛɔ kɛ tsɔɔ nihi ní ha a he hɛ, nɛ e kase lɛ ɔ, lɛ hu e he maa be ngɛ fiɛɛmi ní tsumi ɔ mi. (Luka 6:40) Ke fiɛɛlɔ he ɔ na kaa ke yemi kɛ buami he hia lɛ ɔ, nɔ ko ngɛ nɛ maa ye bua lɛ ɔ, e ma ná kã kɛ fiɛɛ. Ke fiɛɛlɔ nɛ ngɛ níhi a si kpami ɔ jeɔ fiɛɛlɔ he ɔ yi, nɛ e woɔ lɛ ga a, lɔ ɔ hu maa ye bua fiɛɛlɔ he ɔ.—Fiɛlɔ 4:9, 10.

Be komɛ ɔ, o maa nyɛɛ hluu se o be nɔ ko náe ngɛ we mi nɛ o maa fiɛɛ ha lɛ. Nɔ nɛ o kɛ lɛ ngɛ fiɛɛe ɔ pɛ nɛ o kɛ lɛ maa sɛɛ ní. Mo kai kaa Yesu tsɔ e kaseli ɔmɛ “enyɔɔnyɔ” konɛ a ya fiɛɛ. (Luka 10:1) A pee kake kɛ tsu ní, enɛ ɔ he ɔ, a nyɛ wo a sibi he wami. Ke waa kɛ wa nyɛmimɛ nyumuhi kɛ yihi ngɛ fiɛɛe ɔ, e ji he blɔ nɛ wa ná kaa wa maa “wo wa sibi he wami.”—Roma Bi 1:12.

Mɛni ji ní komɛ nɛ nyɛ ma nyɛ maa sɛɛ? Anɛ nyɛ ti nɔ ko ná níhi a si kpami ko lingmi nɛ ɔ nɛ woɔ nɔ he wami lo? Anɛ o kase nɔ́ ko nɛ ngɛ bua jɔmi benɛ o ngɛ o dɛhe ní kasemi pee, aloo benɛ nyɛ ngɛ weku ní kasemi pee ɔ lo? Anɛ nɔ ko tu munyu ko be mi nɛ o ya asafo mi kpe nɛ lɔ ɔ wo mo he wami lo? Be komɛ ɔ, e ma nyɛ maa ba kaa nɔ nɛ o kɛ lɛ ya fiɛɛmi ɔ, o kɛ lɛ pɔɛ fiɛɛmi yami. O ma nyɛ ma bi lɛ konɛ e de mo bɔ nɛ e plɛ kɛ na anɔkuale ɔ ha. Mɛni ha nɛ e ná nɔ mi mami kaa asafo nɛ ɔ ji Yehowa asafo? Mɛni níhi a si kpamihi loo he blɔhi e ná hyɛ? O ma nyɛ ma de lɛ níhi a si kpami komɛ nɛ o ná. Nihi nɛ a ngɛ nyɛ zugba kpɔ ɔ mi ɔ buɔ munyu ɔ tue jio, a bui tue jio, ke o kɛ nɔ ko ya fiɛɛmi ɔ, e ji he blɔ kpakpa nɛ nyɛ ni enyɔ ɔmɛ tsuo nyɛ ná kaa nyɛ maa “ye bua nyɛ sibi.”—1 Tesalonika Bi 5:11.

Loko wa maa ya nɔ maa fiɛɛ kɛ kã a, e he hia nɛ wa ha nɛ wa dɛhe ní kasemi nɛ nu tso. “Tsɔlɔ anɔkualetsɛ kɛ ní lelɔ ɔ” ngma munyu slɔɔtoslɔɔtohi fuu nɛ wa ma nyɛ maa kase. (Mateo 24:45) Nyɛ ha nɛ wa susu munyu ko nɛ wa ma nyɛ maa kase ngɛ wa dɛhe ɔ he nɛ waa hyɛ: Mɛni he je nɛ fiɛɛmi ní tsumi ɔ he hia wawɛɛ ɔ? A tsɔɔ yi mi tomi ɔmɛ ekomɛ ngɛ daka nɛ e yi ji, “ Mɛni He Je Nɛ E Sa Kaa O Ya Nɔ Nɛ O Fiɛɛ Kɛ Kã?” a mi.

Ke o susuɔ otihi nɛ ngɛ daka nɛ ɔ mi ɔ a he ɔ, lɔ ɔ ma nyɛ maa wo mo he wami konɛ o ya nɔ nɛ o fiɛɛ kɛ kã. Ke o ngɛ ní kasee ɔ, bɔɔ mɔde nɛ  o da Ngmami ɔ nɔ kɛ ngma yi mi tomi kpahi hu a he je nɛ e sa kaa waa fiɛɛ kɛ kã a. Lɔ ɔ se ɔ, mo pue o yi mi tɛ ngɛ yi mi tomi nɛ ɔmɛ a he. Ke o pee jã a, kã nɛ o kɛ fiɛɛɔ ɔ, nya maa wa.

Daa nɛ ɔ, Yehowa asafo ɔ tsɔɔ wɔ blɔ slɔɔtohi a nɔ nɛ ke wa gu kɛ fiɛɛ ɔ, wa fiɛɛmi ɔ maa nu tso. Kaa nɔ hyɛmi nɔ́ ɔ, ngɛ wehi a mi fiɛɛmi ní tsumi ɔ se ɔ, wa ma nyɛ maa ngma sɛ womi ya ha nihi, wa ma nyɛ maa fiɛɛ ha nihi ngɛ tɛlifoo nɔ, gbɛjegbɛ he, aloo magbɛ nɔ. Wa ma nyɛ maa fiɛɛ ha nihi ngɛ a ní tsumi hehi, aloo be mi nɛ wa be fiɛɛmi tso mi. Eko ɔ, wa ma nyɛ maa to blɔ nya konɛ wa ya fiɛɛ ngɛ hehi nɛ Odasefo no ko be aloo hehi nɛ Odasefohi bɔɔ ko pɛ nɛ a ngɛ.

Anɛ o maa suɔ kaa o maa gu blɔ kpahi a nɔ kɛ fiɛɛ lo? Nihi fuu nɛ a kɛ ga womi nɛ ɔmɛ tsu ní ɔ ye manye. Mo susu nɔ hyɛmi ní etɛ komɛ a he nɛ o hyɛ.

Nyɛmiyo ko nɛ a tsɛɛ lɛ ke April ɔ ma e juɛmi nya si kaa e kɛ ga womi ko nɛ ngɛ Wa Matsɛ Yemi Sɔmɔmi ɔ mi nɛ tsɔɔ bɔ nɛ wa ma plɛ kɛ je Baiblo mi ní kasemi sisi ha a ma tsu ní. E de nihi etɛ nɛ e kɛ mɛ tsuɔ ní ɔ kaa e suɔ kaa e kɛ mɛ maa kase Baiblo ɔ. E pee April nyakpɛ kaa nihi etɛ ɔmɛ tsuo kplɛɛ nɔ nɛ e kɛ mɛ ngɛ ní kasee, nɛ a bɔni asafo mi kpehi hu yami.

A ngɛ wɔ he wami woe hu kaa wa hla nihi nɛ a bua ma nyɛ maa jɔ munyu pɔtɛɛ komɛ nɛ a ngma ngɛ wa womi tɛtlɛɛ ɔmɛ a mi ɔ he. Kpɔ mi nɔ hyɛlɔ ko ngɛ United States ɔ tsɔɔ kaa e gba Awake! ko nɛ e tu lɔle tai he munyu ɔ kɛ ha nikɔtɔmahi tsuo nɛ a ngɛ lɔle tai tsuapohi a nya ngɛ kpɔ ko mi. E kɛ e yo ɔ ngɔ Awake! nɛ e yi ji, “Understanding Your Doctor” a kɛ ha dɔkitahi nɛ hiɛ pe 100.  E tsɔɔ kaa jã nɛ a pee ɔ ha nɛ nihi le wa fiɛɛmi ní tsumi ɔ kɛ wa womi ɔmɛ a he ní. Benɛ kpɔ mi nɔ hyɛlɔ ɔ kɛ e yo ɔ ba le nihi fuu ngɛ zugba kpɔ ɔ mi ɔ, a nyɛɔ nɛ a kpaleɔ ya slaa nihi nɛ a ngɛ munyu ɔ he bua jɔmi ɔ.

Nyɛmiyo ko nɛ a tsɛɛ lɛ ke Judy ɔ ngma kɛ ya asafo ɔ ní tsumi yi ɔ, nɛ e tsɔɔ kaa e bua jɔ wawɛɛ kaa a wo wɔ he wami nɛ waa ye odase ngɛ tɛlifoo nɔ. E tsɔɔ kaa e yayo ye jeha 86, nɛ e be nɔmlɔ tso mi he wami kpakpa ko, se e pɔɔ nihi odase yemi ngɛ tɛlifoo nɔ. Enɛ ɔ ha e kɛ yomoyo ko nɛ e ye jeha 92 je Baiblo mi ní kasemi sisi!

Ga womihi nɛ a kɛ ha ngɛ wa womi ɔmɛ a mi ɔ hi saminya. Moo ka eko nɛ o hyɛ! E maa ye bua mo nɛ o ma ná bua jɔmi, nɛ o maa fiɛɛ kɛ kã daa.

Mɛni haa nɛ wa yeɔ manye ngɛ wa fiɛɛmi ní tsumi ɔ mi? Pi womihi abɔ nɛ wa haa nihi, loo nihi abɔ nɛ waa kɛ mɛ kaseɔ Baiblo ɔ, aloo nihi abɔ nɛ wa ye bua nɛ a ba plɛ Yehowa Odasefohi ɔ nɛ tsɔɔ kaa wa ye manye ngɛ wa fiɛɛmi ní tsumi ɔ mi. Mo susu Noa he nɛ o hyɛ. Ngɛ e weku ɔ se ɔ, nihi enyɛmɛ nɛ e ye bua mɛ nɛ a ba pee Yehowa jali? Se kɛ̃ ɔ, e ji fiɛɛlɔ nɛ ye manye. Nɔ́ nɛ he hia ji kaa wa ma sɔmɔ Yehowa ngɛ anɔkuale yemi mi.—1 Korinto Bi 4:2.

Fiɛɛli fuu yɔse kaa ja a kɛ otihi nɛ a ma nyɛ maa su he ma a hɛ mi loko a bua ma nyɛ maa jɔ fiɛɛmi ní tsumi ɔ he. Mɛni ji oti nɛ ɔmɛ ekomɛ? A tsɔɔ ekomɛ ngɛ daka nɛ e yi ji, “ Ngɔɔ Otihi Nɛ O Ma Nyɛ Maa Su He Kɛ Ma O Hɛ Mi” ɔ mi.

Mo bi Yehowa nɛ e ye bua mo konɛ o ye manye ngɛ fiɛɛmi ní tsumi ɔ mi. Ke o su otihi nɛ o kɛ ma o hɛ mi ɔ a he ɔ, o tsui maa nɔ o mi, ejakaa o le kaa o ngɛ mɔde bɔe konɛ o fiɛɛ sane kpakpa a.

Ngɛ anɔkuale mi ɔ, sane kpakpa fiɛɛmi ní tsumi ɔ he ma nyɛ maa wa. Se ní komɛ ngɛ nɛ o ma nyɛ maa pee konɛ o nyɛ nɛ o fiɛɛ kɛ kã. Ke o kɛ nɔ ko ya fiɛɛmi ɔ, nyɛɛ sɛɛ níhi nɛ woɔ nɔ he wami, moo pee dɛhe ní kasemi nɛ nu tso daa, nɛ o kɛ ga womihi nɛ tsɔlɔ anɔkualetsɛ kɛ ní lelɔ ɔ kɛ ha wɔ ɔ nɛ tsu ní, nɛ o ngɔ otihi nɛ o ma nyɛ maa su a he ɔ kɛ ma o hɛ mi. Nɔ́ nɛ he hia pe kulaa ji, mo kai kaa Yehowa Mawu wo o hɛ mi nyami nɛ e kɛ sane kpakpa fiɛɛmi ní tsumi wo o dɛ kaa e we Odasefohi a kpɛti nɔ kake. (Yesaya 43:10) Niinɛ, ke o ya nɔ nɛ o fiɛɛ kɛ kã a, o ma ná bua jɔmi wawɛɛ nitsɛ!