1, 2. (a) Mɛni Yesu de kɛ kɔ nyagbe ligbi ɔmɛ a he? (b) Mɛni sane bimihi a he wa ma susu?

MOO po he foni ngɛ o juɛmi mi nɛ o hyɛ. Yesu hii si ngɛ Oliv Yoku ɔ nɔ nɛ e ngɛ Yerusalem sɔlemi we ɔ hyɛe jee. E kɛ e kaseli ɔmɛ a kpɛti nihi eywiɛ nɛ ji Petro, Andrea, Yakobo, kɛ Yohane nɛ ngɛ lejɛ ɔ. Yesu ngɛ mɛ ní komɛ nɛ a he hia nɛ maa ba hwɔɔ se ɔ dee, nɛ a ngɛ lɛ tue bue saminya. Níhi nɛ e de to ɔ maa ba mi ngɛ je yaya nɛ ɔ nyagbe ligbi ɔmɛ a mi ke Yesu bɔni nɔ yemi kaa Mawu Matsɛ Yemi ɔ nya Matsɛ. Yesu de mɛ kaa ngɛ jamɛ a be ɔ mi ɔ, “tsɔlɔ anɔkualetsɛ kɛ ní lelɔ ɔ” nɛ e hla a, maa da e nane mi ngɛ zugba a nɔ nɛ e ma ha e se nyɛɛli ɔmɛ mumi mi niye ní ngɛ be nɛ sa mi.—Mateo 24:45-47.

² Ngɛ jamɛ a gbami ɔ nɔuu mi ɔ, Yesu kɛ nɔ́ hetomi nɔ́ nɛ kɔɔ yihewi nyɔngma amɛ a he ɔ tsu ní. (Kane Mateo 25: 1-13.) Ngɛ munyu nɛ ɔ nɛ wa maa kase ɔ mi ɔ, wa ma susu sane bimi etɛ nɛ nyɛɛ se nɛ ɔmɛ a he: (1) Mɛni ji nɔ́ hetomi nɔ́ ɔ sisi tutuutu? (2) Kɛ anɔkualetsɛmɛ nɛ a pɔ mɛ nu ɔ ngɔɔ ga womi nɛ ngɛ nɔ́ hetomi nɔ́ ɔ mi ɔ kɛ tsuɔ ní ha kɛɛ, nɛ mɛni jeɔ mi kɛ baa? (3) Kɛ wa ti nɔ tsuaa nɔ ma plɛ kɛ ná nɔ́ hetomi nɔ́ ɔ he se ha kɛɛ?

3. Be ko nɛ be ɔ, kɛ a tsɔɔ nɔ́ hetomi nɔ́ nɛ kɔɔ yihewi nyɔngma amɛ a he ɔ mi ngɛ wa womi ɔmɛ a mi ha kɛɛ, nɛ mɛni je mi kɛ ba?

³ Ngɛ munyu nɛ wa kase kɛ sɛ hlami ɔ mi ɔ, wa kase kaa ligbi etɛ nɛ ɔ, tsɔlɔ anɔkualetsɛ ɔ pee tsakemi ngɛ bɔ nɛ e tsɔɔ Baiblo mi munyu komɛ a sisi ha a he. Amlɔ nɛ ɔ, tsɔlɔ anɔkualetsɛ ɔ tuɔ su kpakpahi nɛ wa ma nyɛ maa kase ngɛ Baiblo mi munyuhi a mi ɔ he munyu titli. Tsɔlɔ ɔ pɔɛ demi hu kaa Baiblo mi munyuhi daa si kɛ ha nɔ́ ko aloo a hɛɛ gbami sisi numi ko. Kaa nɔ hyɛmi nɔ́ ɔ, nyɛ ha wa susu nɔ́ hetomi nɔ́ nɛ Yesu kɛ tsu ní nɛ kɔɔ yihewi nyɔngma amɛ a he ɔ he nɛ waa hyɛ. Be ko nɛ be ɔ, wa tsɔɔ nya ngɛ wa womi ɔmɛ a mi kaa kane ɔmɛ, nu ɔ, kɛ tɔ ɔmɛ daa si kɛ ha nɔ́ ko aloo nɔ ko. Anɛ wa juɛmi nɛ waa kɛ ma nɔ́ nɛ ní nɛ ɔmɛ eko tsuaa eko daa si kɛ ha a nɔ ɔ, je we wa juɛmi ngɛ níhi nɛ a he hia nɛ wa ma nyɛ maa kase ngɛ nɔ́ hetomi nɔ́ ɔ mi ɔ nɔ lo? Sane bimi nɛ ɔ heto ɔ he hia.

4. Ngɛ nɔ́ hetomi nɔ́ ɔ mi ɔ, kɛ wa plɛ kɛ le (a) nɔ nɛ ji ayɛflo huno ɔ ha kɛɛ? (b) nihi nɛ a ji yihewi ɔmɛ ɔ ha kɛɛ?

⁴ Mɛni ji Yesu nɔ́ hetomi nɔ́ nɛ kɔɔ yihewi nyɔngma amɛ a he ɔ sisi tutuutu? Nyɛ ha nɛ wa susu he nɛ waa hyɛ. Kekleekle ɔ, mo susu nihi nɛ a tu a he munyu ngɛ nɔ́ hetomi nɔ́ ɔ mi ɔ he. Mɛnɔ ji ayɛflo huno ɔ? Lɛ ji Yesu. Bɔ nɛ wa plɛ kɛ le enɛ ɔ ji kaa Yesu nitsɛ sɛ hlami nɛ e de ke, lɛ ji ayɛflo huno ɔ nɛ. (Luka 5:34, 35) Mɛnɔmɛ ji yihewi ɔmɛ? Mɛ ji “kuu nyafii,” aloo Kristofohi nɛ a pɔ mɛ nu ɔ nɛ. Kɛ wa plɛ kɛ le enɛ ɔ ha kɛɛ? Ngɛ nɔ́ hetomi nɔ́ ɔ mi ɔ, e sa nɛ yihewi ɔmɛ nɛ a pee klaalo nɛ a kane ɔmɛ nɛ hi tsoe kɛ ya si benɛ ayɛflo huno ɔ maa ba. Amlɔ nɛ ɔ, mo kadi munyu nɛ Yesu tu e se nyɛɛli ɔmɛ ɔ. E de mɛ ke: “Nyɛɛ mia, nɛ nyɛɛ pee klaalo; nɛ nyɛ kane ɔmɛ nɛ a hi tsoe kaa nihi nɛ a nyɔmtsɛ ho yo kpeemi ya, nɛ a ngɛ lɛ blɔ hyɛe.” (Luka 12:32, 35, 36) Jehanɛ se hu ɔ, bɔfo Paulo kɛ bɔfo Yohane tsuo tu Kristo se nyɛɛli nɛ a pɔ mɛ nu ɔ a he munyu kaa a ji yihewi aloo yihi nɛ a li nyumu. (2 Korinto Bi 11:2; Kpojemi 14:4) Enɛ ɔ he ɔ, wa na kaa ga womi kɛ kɔkɔ bɔmi nɛ ngɛ Mateo 25:1-13 ɔ kɔɔ Yesu se nyɛɛli nɛ a pɔ mɛ nu ɔ a he.

5. Kɛ Yesu plɛ kɛ tsɔɔ be nɛ e nɔ́ hetomi nɔ́ ɔ maa ba mi ha kɛɛ?

⁵ Jehanɛ ɔ, mɛni be e he maa hia kaa a kɛ Yesu ga womi ɔ nɛ tsu ní? Nɔ́ nɛ Yesu de kɛ mwɔ e nɔ́ hetomi nɔ́ ɔ nya a maa ye bua wɔ konɛ waa le be ɔ. E de ke: ‘Ayɛflo huno ɔ ba.’ (Mateo 25:10) Wa kase ngɛ July 1, 2013, Hwɔɔmi Mɔ ɔ  mi kaa a tu bami nɛ Yesu maa “ba” a he munyu si kakaaka kpaanyɔ ngɛ gbami nɛ e gba kɛ fɔ si ngɛ Mateo yi 24 kɛ 25 ɔ mi. Ke Yesu tu bami nɛ e maa “ba” a he munyu ɔ, e ngɛ be nɛ e maa ba ngɛ haomi ngua a mi, nɛ e ma ba kojo je yaya nɛ ɔ nɛ e ma kpata hɛ mi ɔ he munyu tue. Enɛ ɔ he ɔ, wa ma nyɛ maa ma nya si kaa nɔ́ hetomi nɔ́ nɛ Yesu kɛ tsu ní ɔ kɔɔ nyagbe ligbi ɔmɛ a he, se e maa “ba” ngɛ haomi ngua a mi.

6. Mɛni ji nɔ́ hetomi nɔ́ ɔ sisi tutuutu?

⁶ Mɛni ji nɔ́ hetomi nɔ́ ɔ sisi tutuutu? Mo kai níhi nɛ Yesu tu a he munyu ngɛ Baiblo ɔ mi loko e kɛ nɔ́ hetomi nɔ́ ɔ tsu ní ɔ. Yesu tu “tsɔlɔ anɔkualetsɛ kɛ ní lelɔ ɔ” he munyu ngɛ Mateo yi 24 ɔ mi. Jamɛ a tsɔlɔ ɔ ji nihi nɛ a pɔ mɛ nu ɔ a kpɛti nihi bɔɔ ko nɛ a maa nyɛɛ Kristo se nyɛɛli ɔmɛ a hɛ mi ngɛ nyagbe ligbi ɔmɛ a mi ɔ nɛ. Yesu bɔ mɛ kɔkɔ kaa e sa nɛ a ya nɔ nɛ a ye anɔkuale. Ngɛ Mateo yi 25 ɔ mi ɔ, Yesu ngɔ nɔ́ hetomi nɔ́ nɛ kɔɔ yihewi nyɔngma amɛ a he ɔ kɛ tsu ní kɛ bɔ e se nyɛɛli tsuo nɛ a pɔ mɛ nu nɛ a ngɛ nyagbe ligbi ɔmɛ a mi ɔ kɔkɔ. E de mɛ ke a ‘hyɛ a he nɔ saminya,’ aloo a ya nɔ nɛ a hwɔɔ konɛ hiɔwo nɛ a ma ná ngɛ hiɔwe ɔ, nɛ ko bɔ mɛ. (Mateo 25:13) Amlɔ nɛ ɔ, nyɛ ha wa susu nɔ́ hetomi nɔ́ nɛ ɔ he konɛ waa hyɛ bɔ nɛ nihi nɛ a pɔ mɛ nu ɔ ngɔ e mi ga womi ɔ kɛ tsu ní ha.

7, 8. (a) Mɛni he je nɛ yihewi ní leli ɔmɛ pee klaalo ɔ? (b) Ngɛ mɛni blɔ nɔ nɛ nihi nɛ a pɔ mɛ nu ɔ dla a he kɛ to?

⁷ Ngɛ nɔ́ hetomi nɔ́ ɔ mi ɔ, Yesu tsɔɔ kaa benɛ ayɛflo huno ɔ ba a, yihewi kuasia amɛ pee we klaalo, se yihewi ní leli ɔmɛ lɛɛ a pee klaalo. Mɛni he je? Ejakaa a dla a he kɛ to, nɛ a ngɛ hwɔɔe hulɔ. E sa nɛ yihewi nyɔngma amɛ tsuo a hɛ nɛ hi a he nɔ konɛ a kane ɔmɛ nɛ ko gbo. Yihewi ní leli ɔmɛ dla a he kɛ to, ejakaa a hɛɛ nu fuu kɛ piɛɛ nu nɛ ngɛ a kane ɔmɛ a mi ɔ he, se yihewi kuasia amɛ lɛɛ a pee we jã. Ngɛ mɛni blɔ nɔ Kristofohi anɔkualetsɛmɛ nɛ a pɔ mɛ nu ɔ dla a he kɛ to Yesu bami ɔ?

⁸ Nihi nɛ a pɔ mɛ nu ɔ dla a he kaa a ma tsu ní tsumi nɛ a kɛ wo a dɛ ɔ hluu kɛ ya si benɛ nyagbe ɔ maa ba. A yɔse kaa loko a ma nyɛ maa pee Mawu suɔmi nya ní ɔ, e sɛ nɛ a di he lo nya níhi nɛ ngɛ Satan je nɛ ɔ mi ɔ se, nɛ a suɔ kaa a maa pee jã hulɔ. A fia a pɛɛ si kaa a ma sɔmɔ Yehowa ngɛ anɔkuale mi, pi kaa nyagbe ɔ nɛ su si ta a he je, mohu ɔ, akɛnɛ a suɔ Yehowa kɛ e Bi ɔ he je. A hɛɛ a hemi kɛ yemi ɔ mi, nɛ a ha we nɛ he lo nya níhi kɛ je mi bami yaya ní peepeehi nɛ nihi nɛ a ngɛ je ɔ mi ɔ kɛ a he woɔ mi ɔ nɛ ná a nɔ he wami, nɛ a fo we mɛ pɛ a nɔ́ mi hulɔ. Kaa bɔ nɛ yihewi ní leli ɔmɛ pee klaalo nɛ a ha nɛ a kane ɔmɛ ngɛ tsoe daa a, jã kɛ̃ nɛ nihi nɛ a pɔ mɛ nu ɔ hu kpɛɔ daa. A to a tsui si kɛ ngɛ Ayɛflo Huno ɔ mlɛe, ke e maa kpɛ se kɛ ba po.—Filipi Bi 2:15.

9. (a) Mɛni kɔkɔ bɔmi Yesu kɛ ha ngɛ kɔnɛɛ demi he? (b) Benɛ nihi nɛ a pɔ mɛ nu ɔ nu nɛ ngmlaa pɛ ke: “Ayɛflo huno ɔ ma oo!” ɔ, mɛni a pee? (Hyɛ sisi ningma a hulɔ.)

 ⁹ Nɔ́ kpa ko hu nɛ ha yihewi ní leli ɔmɛ pee klaalo benɛ ayɛflo huno ɔ ba a ji, hwɔɔmi nɛ a hwɔɔ ɔ. Se ngɛ nɔ́ hetomi nɔ́ ɔ mi ɔ, a tsɔɔ kaa ‘kɔnɛɛ de yihewi nyɔngma amɛ tsuo, nɛ a hwɔ mahe’ benɛ a ngɛ ayɛflo huno ɔ mlɛe nɛ e ya bɛ mla a. Anɛ enɛ ɔ tsɔɔ kaa Kristofohi nɛ a pɔ mɛ nu nɛ a ngɛ mwɔnɛ ɔ ma nyɛ maa “hwɔ mahe,” aloo nɔ́ ko ma nyɛ ma je a juɛmi ngɛ Kristo bami ɔ nɔ be mi nɛ a ngɛ mlɛe ɔ lo? Ee. Yesu le kaa ke nɔ ko suɔ wawɛɛ kaa e maa mlɛ po ɔ, jamɛatsɛ ɔ ma nyɛ ma gbɔjɔ, nɛ níhi ma nyɛ ma je e juɛmi kɛ je e bami ɔ nɔ. Enɛ ɔ he ɔ, Kristofohi anɔkualetsɛmɛ nɛ a pɔ mɛ nu ɔ bɔ mɔde wawɛɛ nɛ a ngɛ hwɔɔe. Ngɛ mɛni blɔ nɔ? Ngɛ nɔ́ hetomi nɔ́ ɔ mi ɔ, benɛ yihewi nyɔngma amɛ tsuo nu nɛ huhui pɛ ke: “Ayɛflo huno ɔ ma oo!” ɔ, mɛ tsuo a te si. Se yihewi ní leli ɔmɛ pɛ nɛ a pee klaalo. (Mateo 25:5, 6; 26:41) Jã kɛ̃ nɛ ngɛ nyagbe ligbi ɔmɛ a mi hu ɔ, Kristofohi anɔkualetsɛmɛ nɛ a pɔ mɛ nu ɔ hu te si benɛ a nu nɛ ngmlaa pɛ ke: “Ayɛflo huno ɔ ma oo!” ɔ. A ngɛ nɔ mi mami wawɛɛ kaa Yesu ba, nɛ a pee klaalo kɛ ha e bami ɔ. * (Hyɛ sisi ningma.) Nyɛ ha nɛ wa susu bɔ nɛ Yesu mwɔ e nɔ́ hetomi nɔ́ nɛ kɔɔ be pɔtɛɛ ko he ɔ nya ha a he nɛ waa hyɛ.

10. Eko ɔ, mɛni sane wa ma bi ngɛ ní sɛɛmi nɛ ya nɔ ngɛ yihewi ní leli kɛ yihewi kuasia amɛ a kpɛti ɔ he?

¹⁰ Benɛ e piɛɛ bɔɔ nɛ Yesu maa gbe e nɔ́ hetomi nɔ́ ɔ nya a, e tsɔɔ kaa yihewi kuasia amɛ kpa yihewi ní leli ɔmɛ pɛɛ kaa a ha mɛ nu nɛ a kɛ wo a kane ɔmɛ a mi. Se yihewi ní leli ɔmɛ ha we mɛ. (Kane Mateo 25:8, 9.) Se mɛni be nɔ ko hia yemi kɛ buami nɛ Kristofohi anɔkualetsɛmɛ nɛ a pɔ mɛ nu ɔ kua ke a be lɛ ye buae? Mo kai be nɛ nɔ́ hetomi nɔ́ ɔ maa ba mi ɔ. Yesu nɛ ji Ayɛflo Huno ɔ ma ba kojo nihi be mi nɛ haomi ngua a miɔ nɛ e maa ba nyagbe ɔ. Lɔ ɔ he ɔ, eko ɔ, ní sɛɛmi nɛ ya nɔ ngɛ yihewi ɔmɛ a kpɛti ɔ daa si kɛ ha nɔ́ nɛ maa ya nɔ ke e piɛɛ bɔɔ nɛ haomi ngua a maa ba nyagbe. Mɛni he je nɛ wa ngɛ dee jã a? Ejakaa ke e ke e suu jamɛ a be ɔ mi ɔ, nihi nɛ a pɔ mɛ nu ɔ ma ná a nyagbe nya sɔumi ɔ.

11. (a) Ke e piɛ bɔɔ nɛ haomi ngua a maa je sisi ɔ, mɛni maa ba? (b) Mɛni yihewi ní leli ɔmɛ ngɛ tsɔɔe benɛ a de yihewi kuasia amɛ kaa a ya nɛ a ya he nu ɔ eko ɔ?

¹¹ Ke jã a, lɛɛ loko haomi ngua a maa je sisi ɔ, nihi tsuo nɛ a ngɛ a zugba a nɔ nɛ a pɔ mɛ nu ɔ ma ná a nyagbe nya sɔumi. (Kpojemi 7:1-4) Kɛ je jamɛ a be ɔ mi kɛ yaa a, a ma nyɛ maa ngɔ mɛ kɛ ho hiɔwe ya. Se mo susu níhi nɛ maa ya nɔ loko haomi ngua a maa ba a he nɛ o hyɛ. Mɛni maa ba nihi nɛ a pɔ mɛ nu nɛ a hɛ je a he nɔ nɛ a kpa anɔkuale yemi ɔ a nɔ? A be nyagbe nya sɔumi ɔ eko náe. Jamɛ a be ɔ mi ɔ, a maa pɔ Kristofohi anɔkualetsɛmɛ kpahi nu. Ke haomi ngua a je sisi pɛ ɔ, eko ɔ, e maa pee a ti nihi nɛ  a ji kuasiahi ɔ nyakpɛ kaa a kpata Babilon Ngua a hɛ mi. Eko ɔ, jamɛ a be ɔ mi nɛ a ma yɔse kaa a dla we a he kɛ ha Yesu bami ɔ. Jamɛ a be ɔ mi ɔ, ke a kpa nɔ ko pɛɛ kaa e ye bua mɛ ɔ, mɛni maa ba? Heto ɔ ngɛ nɔ́ hetomi nɔ́ ɔ mi. Yihewi ní lelɔ ɔmɛ ha we yihewi kuasia amɛ a nu ɔ eko, mohu ɔ, a de mɛ ke a ya nɛ a ya he eko. Akɛnɛ jamɛ a be ɔ mi ji “nyɔ mi kpɛti” he je ɔ, a nɛ nɔ ko nɛ jua nu ɔ eko ha mɛ. Be be!

12. (a) Ngɛ haomi ngua a mi ɔ, mɛni maa ba nihi nɛ be ko nɛ be ɔ, a pɔ mɛ nu se a yi anɔkuale hu nɛ a ná we nyagbe nya sɔumi ɔ a nɔ? (b) Mɛni maa ba nihi nɛ a ngɛ kaa yihewi kuasia amɛ ɔ a nɔ?

¹² Ngɛ haomi ngua a mi ɔ, anɔkualetsɛmɛ nɛ a pɔ mɛ nu ɔ be nyɛe maa ye bua nihi nɛ a yi anɔkuale hu ɔ. Jamɛ a be ɔ mi ɔ, fɔmi su gbongu mi momo. Ke e ba jã a, mɛni maa ba nihi nɛ a yi anɔkuale ɔ a nɔ? Mo kai nɔ́ nɛ ba yihewi kuasia amɛ a nɔ benɛ a ho nu ɔ hemi ya a. Yesu de ke: “Ayɛflo huno ɔ ba, nɛ ni nɛmɛ nɛ dla a he to lɛ ɔ, a kɛ lɛ ho yo kpeemi he ɔ ya. Nɛ a nga sinya a.” Ke Yesu ba kaa matsɛ be mi nɛ haomi ngua a maa ho nyagbe bami ya a, e ma bua anɔkualetsɛmɛ nɛ a pɔ mɛ nu ɔ a nya kɛ ho hiɔwe ya. (Mateo 24:31; 25:10; Yohane 14:1-3; 1 Tesalonika Bi 4:17) Se Yesu ma kua ni nɛmɛ nɛ yi anɔkuale ɔ. Kaa bɔ nɛ yihewi kuasia amɛ de ɔ, mɛ hu a ma de ke: “Nyɔmtsɛ! Nyɔmtsɛ! Bli wɔ!” Se mɛni Yesu ma de mɛ? Aywilɛho sane ji kaa Yesu ma ha mɛ heto kaa bɔ nɛ e ma ha nihi fuu nɛ a maa pee a ní kaa apletsihi ɔ heto ɔ. E ma de mɛ ke: “Niinɛ i ngɛ nyɛ dee ke i li nyɛ.”—Mateo 7:21-23; 25:11, 12.

13. (a) Mɛni he je nɛ e sɛ kaa waa ma nya si kaa Kristo se nyɛɛli nɛ a pɔ mɛ nu ɔ a ti nihi fuu be nyɛe maa ye anɔkuale ɔ? (b) Mɛni he je wa ma nyɛ ma de ke Yesu nɔ́ hetomi nɔ́ ɔ tsɔɔ kaa e ngɛ hemi kɛ yemi ngɛ Kristofohi nɛ a pɔ mɛ nu ɔ a mi ɔ? (Moo hyɛ foni nɛ ngɛ ní kasemi ɔ sisije ɔ.)

¹³ Anɛ Yesu ngɛ tsɔɔe kaa nihi nɛ a pɔ mɛ nu ɔ a kpɛti nihi fuu be anɔkuale yee, nɛ e he maa hia kaa a hla nihi kɛ da a nane mi lo? Dɛbi. Ngɛ Mateo yi 24 ɔ mi ɔ, Yesu bɔ tsɔlɔ anɔkualetsɛ kɛ ní lelɔ ɔ kɔkɔ kaa e hyɛ nɛ hi nɛ e ko pee tsɔlɔ yaya. Enɛ ɔ tsɔɔ we kaa Yesu ngɛ blɔ hyɛe kaa tsɔlɔ anɔkualetsɛ kɛ ní lelɔ ɔ maa pee tsɔlɔ yaya. Jã kɛ̃ nɛ nɔ́ hetomi nɔ́ nɛ kɔɔ yihewi ɔmɛ a he ɔ hu ji kɔkɔ bɔmi. Kaa bɔ nɛ yihewi ɔmɛ a kpɛti nihi enuɔ ji kuasiahi, nɛ nihi enuɔ hu ji ní leli ɔ, Kristofohi nɛ a pɔ mɛ nu ɔ a kpɛti nɔ tsuaa nɔ ma nyɛ maa hla kaa e ma dla e he kɛ to nɛ e hwɔɔ aloo e be jã pee. A ti nihi nɛ a pee we jã a, ma nyɛ maa pee kuasiahi, aloo nihi nɛ a yi anɔkuale. Paulo kɛ kɔkɔ bɔmi kaa jã nɔuu ha e nyɛmimɛ nyumuhi kɛ yihi nɛ a pɔ mɛ nu ɔ. (Kane Hebri Bi 6:4-9; kɛ to 5 Mose 30:19 ɔ he.) Kɔkɔ bɔmi nɛ Paulo kɛ ha mɛ ɔ ngɛ tɛ̃ɛ, se e ngɛ hemi kɛ yemi ngɛ e nyɛmimɛ nɛ ɔmɛ a mi kaa a nine maa su a hiɔwo ɔ nɔ. Kɔkɔ bɔmi nɛ Yesu kɛ ha yihewi nyɔngma amɛ ɔ hu  tsɔɔ kaa lɛ hu e ngɛ hemi kɛ yemi ngɛ nihi nɛ a pɔ mɛ nu ɔ a mi. E le kaa nihi nɛ a pɔ mɛ nu ɔ a ti nɔ tsuaa nɔ maa ya nɔ maa ye anɔkuale nɛ e nine maa su hiɔwo nɛ se be ɔ nɔ!

14. Mɛni he je nɛ “to kpa” amɛ hu ma nyɛ ma ná nɔ́ hetomi nɔ́ nɛ kɔɔ yihewi nyɔngma amɛ ɔ he ɔ he se ɔ?

¹⁴ Kristofohi nɛ a pɔ mɛ nuɔ a he munyu nɛ Yesu ngɛ tue ngɛ e nɔ́ hetomi nɔ́ ɔ mi ɔ nɛ. Se anɛ “to kpa” amɛ hu ma nyɛ ma ná Yesu nɔ́ hetomi nɔ́ ɔ he se lo? (Yohane 10:16) Ee! Ga womi nɛ ngɛ nɔ́ hetomi nɔ́ ɔ mi ɔ ji: “Nyɛɛ ya nɔ nɛ nyɛɛ hwɔɔ.” Be ko ɔ, Yesu de ke: ‘Nɔ́ nɛ i ngɛ nyɛ dee ɔ, nihi tsuo i ngɛ dee ɔ nɛ. Nyɛɛ hwɔɔ!’ (Marko 13:37) Yesu ngɛ hlae nɛ e kaseli ɔmɛ tsuo nɛ a dla a he kɛ to nɛ a hwɔɔ. Kristofohi tsuo ma nyɛ maa kase nihi nɛ a pɔ mɛ nu ɔ, konɛ mɛ hu a kɛ fiɛɛmi ní tsumi ɔ nɛ pee nɔ́ titli ngɛ a si himi mi. Mo kai kaa yihewi kuasia amɛ ya bi yihewi ní leli ɔmɛ konɛ a ha mɛ a nu ɔ eko. Se a ha we mɛ. Enɛ ɔ kaiɔ wɔ kaa wa ti nɔ tsuaa nɔ ma nyɛ maa ya nɔ maa ye Mawu anɔkuale, nɛ e dla e he kɛ to, nɛ e hwɔɔ hulɔ. Nɔ ko be nyɛe maa pee jã kɛ ha wɔ. Wa ti nɔ tsuaa nɔ maa bu akɔtaa kɛ ha Yesu Kristo nɛ ji Kojolɔ nɛ yeɔ dami sane ɔ. E be kɛe kulaa nɛ e maa ba. Enɛ ɔ he ɔ, e sa nɛ waa pee klaalo!

15. Mɛni he je nɛ anɔkuale Kristofohi tsuo a bua jɔ Kristo yo kpeemi ɔ he ɔ?

¹⁵ Kristofohi tsuo bua jɔ yo kpeemi nɛ Yesu wo ta ngɛ e nɔ́ hetomi nɔ́ ɔ mi ɔ he. Hwɔɔ se ɔ, ke a hwu Harmagedon ta a ta a, Kristofohi nɛ a pɔ mɛ nu ɔ ma ba pee Kristo we ayɛflo. (Kpojemi 19:7-9) Nɔ tsuaa nɔ nɛ ngɛ zugba a nɔ ɔ ma ná yo kpeemi nɛ maa ya nɔ ngɛ hiɔwe ɔ he se. Mɛni he je? Ejakaa adesahi tsuo ma ná nɔ yemi nɛ hi kɛ pi si. Wa hɛ nɔ kami ji kaa wa maa ya hiɔwe jio, wa maa hi zugba a nɔ kɛ ya neneene jio, nyɛ ha wɔ tsuo waa fia wa pɛɛ si kaa wa ma dla wa he kɛ to konɛ waa ya nɔ nɛ waa hwɔɔ. Ke wa pee jã a, wa nine maa su jɔɔmi ngua nɛ Yehowa dla kɛ to wɔ hwɔɔ se ɔ nɔ!