KE A ngɔ oliv tso nɛ e kɔ, nɛ e gɔ̃dɔ̃ kɛ to seda tso nɛ ngɛ fɛu nɛ ngɛ Lebanon ɔ he ɔ, oliv tso ɔ be o hɛ muɔe. Se ke pu ngɛ tsoe nɛ hiɔmi nɛ́ be kɛkɛɛ po ɔ, oliv tsohi gbo we. Ekomɛ ye maa pee jeha 1,000 sɔuu. Oliv sipokuhi yaa zu mi tsitsaa, nɛ ke a po tso ɔ nɔ po ɔ, e nyɛɔ tsɛ̃ɔ ekohu. Ke e sipoku ɔ gbli we ɔ, e ma tsɛ̃ ekohu.

Anɔkualetsɛ Hiob ngɛ nɔ mi mami kaa ke e gbo po ɔ, a ma tle lɛ si ekohu. (Hiob 14:13-15) Eko ɔ, e ngɔ oliv tso kɛ pee enɛ ɔ he nɔ hyɛmi nɔ́ kɛ tsɔɔ kaa e ngɛ hemi kɛ yemi kaa Mawu ma nyɛ ma tle lɛ si kɛ je gbeje. Hiob de ke: “Ke a po tso ngɔ fɔ si ɔ, hɛ nɔ kami ngɛ kaa e ma tsɛ̃ ekohu.” Ke sapu jɔɔ yemi nɛ hiɔmi bɔni nɛmi ɔ, oliv tso ku gbigbli ɔ ma nyɛ ma tsɛ̃ ekohu, nɛ e ma “gba kɔni kaa tso nɛ a du ehe.”—Hiob 14:7-9.

Kaa bɔ nɛ ngmɔ hulɔ suɔ wawɛɛ kaa oliv tso nɛ a po nɔ ɔ nɛ tsɛ̃ ekohu ɔ, jã kɛ̃ nɛ Yehowa Mawu hu suɔ wawɛɛ kaa e ma tle e sɔmɔli kɛ nihi fuu nɛ a gbo ɔ hu si. (Mateo 22:31, 32; Yohane 5:28, 29; Bɔfo Ɔmɛ A Ní Tsumi 24:15) Moo hyɛ bɔ nɛ wa bua maa jɔ ha ke a tle gbogbohi a si nɛ waa kɛ mɛ kpe ekohu!