JULIAN kai bɔ nɛ e nu he ha benɛ a fia adafi kaa tsa pi Yehowa Odasefo no ji e binyumu ɔ hu ɔ. E de ke, “E pee mi kaa i gbe nya ngɛ je mi. Lɛ ji ye bi nɔkɔtɔma, nɛ i suɔ e sane wawɛɛ nitsɛ. Wa peeɔ níhi fuu kɛ blaa.” Julian tsɔɔ kaa jinɛ e binyumu ɔ baa e je mi saminya, se pee se ɔ, e ba tsake nɛ e bɔni ní yayamihi peemi. Julian yo ɔ fo ya si abɔ, nɛ Julian li bɔ nɛ e maa pee kɛ wo e bua ha. Julian tsɔɔ kaa daa nɛ ɔ, a biɔ a he ke, “Anɛ wɔ lɛ wa tsɔse we lɛ saminya lo?”

Mɛni yi mi tomi he je nɛ Baiblo ɔ tsɔɔ kaa e sa nɛ a fie nɔ ko kɛ je asafo ɔ mi ɔ? Ke a fie nɔ ko kɛ je asafo ɔ mi ɔ, e dɔɔ wɔ wawɛɛ nitsɛ. Ke jã a, lɛɛ mɛni he je mɔ nɛ wa ma nyɛ ma de ke e ji blɔ nya tomi nɛ suɔmi ngɛ mi ɔ?

Ke Yehowa Odasefo no ko nɛ a baptisi lɛ pee yayami ngua ko, nɛ e pia we e he ɔ, a fieɔ lɛ kɛ jeɔ asafo ɔ mi.

Yehowa hyɛ we blɔ kaa waa pee wa ní kaa nihi nɛ a ye mluku, se e hyɛɔ blɔ kaa e sɔmɔli nɛ a ye e mlaahi a nɔ nɛ a pee a he klɔuklɔu. Kaa nɔ hyɛmi nɔ́ ɔ, Yehowa wo e sɔmɔli mlaa kaa a yu a he ngɛ yayami nguanguahi kaa ajuama bɔmi, wɔ jami, jumi, amimi yemi, nɔ gbemi, kɛ mumi yayamihi kɛ ní tsumi he.—1 Korinto Bi 6:9, 10; Kpojemi 21:8.

Nile ngɛ nɔ́ nɛ Yehowa ngɛ blɔ hyɛe kaa waa pee ɔ mi, nɛ ke wa pee jã a, lɔ ɔ maa po wa he piɛ. Kaa nɔ hyɛmi nɔ́ ɔ, wɔ tsuo wa suɔ kaa waa kɛ nihi nɛ a he jɔ, nɛ a baa  a je mi saminya, nɛ a yeɔ anɔkuale nɛ bɔ. Jã ji bɔ nɛ wa nyɛmimɛ nyumuhi kɛ yihi ngɛ. Mɛni he je nɛ a ngɛ jã a? Ejakaa a jɔɔ a he nɔ ha Yehowa, nɛ a wo lɛ si kaa a kɛ níhi nɛ e de ngɛ Baiblo ɔ mi ɔ ma tsu ní.

Se ke adesa gbɔjɔmi ha nɛ Kristofo no ko nɛ a baptisi lɛ pee yayami ngua ko hu nɛɛ? Enɛ ɔ ba Yehowa sɔmɔli komɛ a nɔ ngɛ blema be ɔ mi, se Yehowa kua we mɛ. Kaa nɔ hyɛmi nɔ́ ɔ, e ngɛ mi kaa Matsɛ David puɛ gba, nɛ e gbe nɔmlɔ mohu lɛɛ, se gbalɔ Natan de David kaa Yehowa kɛ e yayami ɔ pa lɛ.—2 Samuel 12:13.

Mɛni he je nɛ Yehowa ngɔ David yayami ɔ kɛ pa lɛ ɔ? Ejakaa Yehowa na kaa David pia e he kɛ je e tsui mi. (La 32:1-5) Mwɔnɛ ɔ hu ɔ, ke nɔ ko pee yayami nɛ e pia e he kɛ je e tsui mi, nɛ e kpa yayami ɔ peemi ɔ, a kɛ maa pa lɛ. (Bɔfo Ɔmɛ A Ní Tsumi 3:19; 26:20) Ke asafo mi nikɔtɔmahi nɛ a ji sane yemi ajla toli ɔ nɛ kaa yayami peelɔ ɔ pia e he kɛ je e tsui mi ɔ, e sa nɛ a fie lɛ kɛ je asafo ɔ mi.

Ke a fie o weku no ko, aloo o huɛ ko nɛ o suɔ e sane saminya kɛ je asafo ɔ mi ɔ, eko ɔ, e he maa wa ha mo kaa o maa nu sisi. Eko ɔ, o ma susu kaa e ji yi mi wami ní peepee. Se Yehowa Munyu ɔ tsɔɔ heii kaa nɔ fiemi kɛ je asafo ɔ mi ɔ ji nɔ́ ko nɛ suɔmi ngɛ mi.

Yesu tsɔɔ kaa “Mawu nile ɔ lɛɛ, níhi nɛ e tsu ɔ, lɔ ɔmɛ a kɛ woɔ lɛ nguɔ.” (Mateo 11:19) Nyɛ ha nɛ wa susu yi mi tomi etɛ a he je nɛ e da blɔ kaa ke nɔ ko pee yayami nɛ e pia we e he ɔ, e sa kaa a fie lɛ kɛ je asafo ɔ mi ɔ he nɛ waa hyɛ.

Ke a fie nɔ ko kɛ je asafo ɔ mi ɔ, lɔ ɔ ha we nɛ nihi gbeɔ Yehowa biɛ ɔ he guɛ. Akɛnɛ wa ji Yehowa we Odasefohi nɛ e kɛ e biɛ wo wɔ he je ɔ, níhi nɛ wa peeɔ ɔ ma nyɛ maa wo e hɛ mi nyami, nɛ e ma nyɛ maa gbe e he guɛ hulɔ. (Yesaya 43:10) Kaa bɔ nɛ bi ko ní peepee ma nyɛ maa wo e fɔli a hɛ mi nyami aloo e ma nyɛ ma pue e fɔli a hɛ mi si ɔ, jã kɛ̃ nɛ Yehowa sɔmɔli hu ma nyɛ maa wo e hɛ mi nyami loo a pue e hɛ mi si. Ngɛ Ezekiel be ɔ mi ɔ, nihi ngɔɔ Yehowa biɛ kɛ tsɛɛ Yuda bi ɔmɛ. (Ezekiel 36:19-23) Jã kɛ̃ nɛ mwɔnɛ ɔ hu ɔ, nihi kɛ Yehowa biɛ tsɛɛ Yehowa Odasefohi. Enɛ ɔ he ɔ, ke waa kɛ Yehowa mlaahi tsuɔ ní ɔ, lɔ ɔ woɔ e hɛ mi nyami.

Bɔfo Petro wo Kristofohi ga ke: “Nyɛɛ bu Mawu tue. Akɔnɔhi nɛ hao nyɛ benɛ nyɛ li anɔkuale ɔ lolo ɔ, nyɛ ko ya nyɛɛ se hu. Se mohu ɔ, nyɛ ha nɛ nyɛ je mi bami he nɛ tsɔ kaa bɔ nɛ nɔ nɛ tsɛ nyɛ ɔ ngɛ klɔuklɔu ɔ. Ngmami ɔ ke, ‘Nyɛɛ pee nyɛ he klɔuklɔu, ejakaa i ngɛ klɔuklɔu.’” (1 Petro 1:14-16) Kaa nɔ hyɛmi nɔ́ ɔ, ke waa kɛ wa he woɔ ajuama bɔmi mi ɔ, wa maa gbe Mawu biɛ ɔ he guɛ. Se ke wa ha nɛ wa je mi bami he tsɔ ɔ, lɔ ɔ maa wo Yehowa hɛ mi nyami.

Ke Yehowa Odasefo no ko peeɔ nɔ́ yayami ɔ, eko ɔ, nihi nɛ a le lɛ ɔ maa le nɔ́ nɛ e ngɛ pee ɔ. Lɔ ɔ he ɔ, ke a ná le kaa pi Yehowa Odasefo no ji lɛ hu ɔ, a maa na kaa Yehowa we bi kɛ níhi nɛ Baiblo ɔ de ɔ tsuɔ ní, nɛ enɛ ɔ ma ha asafo ɔ he ma tsɔ. Kaa nɔ hyɛmi nɔ́ ɔ, ngɛ Switzerland ɔ, nyumu ko ya asafo mi kpe nɛ e de ke, e suɔ kaa e maa pee Odasefo no. E nyɛmiyo ko ya bɔ ajuama nɛ a fie lɛ kɛ je asafo ɔ mi, enɛ ɔ he ɔ, e ma e juɛmi nya si kaa e kɛ asafo ko nɛ “kplɛɛ we je mi bami yaya nɔ ɔ maa bɔ.”

Ke a fie nɔ ko kɛ je asafo ɔ mi ɔ, lɔ ɔ haa Kristofohi asafo ɔ he tsɔɔ. Bɔfo Paulo bɔ Korinto bi ɔmɛ kɔkɔ nɛ e de mɛ kaa oslaa ngɛ he kaa a maa ngmɛ yayami peelɔ ko nɛ e pia we e he ɔ blɔ nɛ e hi asafo ɔ mi. E ngɔ bɔ nɛ yayami peeli nɛ ɔmɛ ma ná nyɛmimɛ ɔmɛ a nɔ he wami ngɛ asafo ɔ mi ha a kɛ to masa  bɔbɔyoo nɛ haa nɛ ma tsuo saa a he. Paulo de ke: “Masa bɔbɔyoo haa nɛ ma a tsuo fuɔ.” Lɔ ɔ he ɔ, e de mɛ ke: “Nyɛ je nɔmlɔ yayami ɔ kɛ je nyɛ kpɛti.”—1 Korinto Bi 5:6, 11-13.

E pee we “nɔmlɔ yayami” nɛ ɔ zo kaa e ngɛ ajuama bɔe. Ni komɛ nɛ a kɛ lɛ ngɛ asafo ɔ mi ɔ po nɛ tɔmi ko ngɛ e ní peepee ɔ he. (1 Korinto Bi 5:1, 2) Enɛ ɔ ngɛ oslaa, ejakaa e ma nyɛ ma ha nɛ ni kpahi hu nɛ a ji Kristofohi maa ngɔ a he kɛ wo ajuama bɔmi ní peepeehi nɛ pɔ he ngɛ Korinto ma a mi ɔ mi. Jã kɛ̃ nɛ mwɔnɛ ɔ hu ɔ, ke asafo ɔ maa hɛ kɛ fɔɔ yayami nguanguahi a nɔ ɔ, ni komɛ ma nyɛ maa na Yehowa mlaa amɛ kaa a he hia we. (Fiɛlɔ 8:11) Kaa bɔ nɛ ke “tɛ sa ngɛ nyu sisi” nɛ e ma nyɛ ma butu lɛ ko ɔ, jã kɛ̃ nɛ yayami peeli nɛ a pia we a he ɔ hu ma nyɛ ma puɛ ni kpahi a hemi kɛ yemi ngɛ asafo ɔ mi.—Yuda 4, 12, NW.

Ke a fie nɔ ko kɛ je asafo ɔ mi ɔ, lɔ ɔ maa ye bua lɛ nɛ e maa na kaa nɔ́ nɛ e pee ɔ dɛ. Yesu ngɔ nɔ́ hetomi nɔ́ ko kɛ tsu ní. E tsɔɔ kaa niheyo ko hia kɛ je e papaa we mi nɛ e ya kpata e weto ní hɛ mi, nɛ e kɛ e he ya wo ajuama bɔmi ní peepeehi a mi. Nyagbe ɔ, niheyo ɔ ba yɔse kaa se nami ko hiami nɛ e hia kɛ je e papaa we ɔ mi ɔ he. Lɔ ɔ he ɔ, e tsake e tsui, nɛ e pee e juɛmi kaa e maa kpale kɛ ho we ya. Benɛ e tsɛ ɔ na kaa e bi ɔ tsake e je mi bami ɔ, e bua jɔ, nɛ e ha lɛ baba hee kɛ ba we ɔ mi. (Luka 15:11-24) Nɔ́ hetomi nɔ́ nɛ ɔ ha nɛ wa na bɔ nɛ Yehowa peeɔ e ní ha ke yayami peelɔ ko tsake e tsui. Yehowa de ke: “I ná we yayami peelɔ gbenɔ he bua jɔmi, se mohu i suɔ kaa e kpa yayami peemi, konɛ e yi nɛ ná wami.”—Ezekiel 33:11.

Kristofohi asafo ɔ ji wa mumi mi weku. Ke a fie nɔ ko kɛ je asafo ɔ mi ɔ, e piɛɛ we weku nɛ ɔ he hu. Ke e na yayami nɛ e pee ɔ mi nɔ́ ɔ, eko ɔ, e ma yɔse kaa e tɔ̃, nɛ e ma kai kaa benɛ e ngɛ asafo ɔ mi ɔ, e ngɛ bua jɔmi, nɛ huɛ bɔmi kpakpa hu ngɛ e kɛ Yehowa a kpɛti. Enɛ ɔ ma nyɛ maa wo lɛ he wami konɛ e kpale kɛ ba piɛɛ e mumi mi weku ɔ he.

Loko wa maa ye bua nɔ ko nɛ a fie lɛ konɛ e kpale kɛ ba asafo ɔ mi ɔ, e he hia nɛ wa je suɔmi kpo kɛ ha lɛ kɛ gu Yehowa mlaa a nɛ waa kɛ ma tsu ní ɔ nɔ. Kaa nɔ hyɛmi nɔ́ ɔ, ngɔɔ lɛ kaa de yali enyɔ komɛ ya de ngɛ huetso ko mi nɛ a ya laa. Benɛ a nyɛɛ ngmlɛfiahi fuu ɔ, pɔ tɔ nɔ kake he, nɛ e ya kpasa tso ko nɛ e bɔni mahe hwɔmi. Se ke a ngmɛɛ e he nɛ e hwɔ lejɛ ɔ, lohwe awi yelɔ ko ma nyɛ maa nu lɛ. Enɛ ɔ he ɔ, e nyɛmi ɔ gba e hɛ mi ma wawɛɛ nitsɛ, nɛ e hɛ mi tsɔ lɛ. E ngɛ mi kaa ma a nɛ a gba lɛ ɔ ye lɛ mohu lɛɛ, se lɔ ɔ he e yi wami. David de nɔ́ ko kaa jã. E de ke: “Ha nɛ dalɔ nɛ gba mi ma, nɛ e ngɔ e mi mi himi ɔ kɛ kã ye hɛ mi.” (La 141:5) David le kaa ke a gbla e tue ɔ, e maa ye lɛ mohu lɛɛ, se e le kaa lɔ ɔ maa ye bua lɛ.

Kaa bɔ nɛ ma nɛ a gba detsɛ ɔ ha nɛ e hɛ mi tsɔ lɛ ɔ, jã kɛ̃ nɛ ke a fie nɔ ko kɛ je asafo ɔ mi ɔ, lɔ ɔ haa nɛ nɔ ɔ hɛliɔ si nɛ e kpaleɔ kɛ baa Yehowa ngɔ. Julian binyumu ɔ nɛ wa wo e ta kɛ sɛ hlami ɔ tsake e je mi bami, nɛ ngɛ jeha nyɔngma se ɔ, e kpale kɛ ba asafo ɔ mi. Amlɔ nɛ ɔ, e ji asafo mi nɔkɔtɔma. E de ke: “Fiemi nɛ a fie mi kɛ je asafo ɔ mi ɔ ha nɛ i na kaa i tsake ye je mi bami. Tsɔsemi nɛ ɔ ye bua mi saminya.”—Hebri Bi 12:7-11.

Ke a fie nɔ ko kɛ je asafo ɔ mi ɔ, e yeɔ nɔ wawɛɛ nitsɛ. Se lɔ ɔ tsɔɔ we kaa e be nyɛe maa kpale kɛ ba Yehowa ngɔ hu. E he hia kaa wɔ tsuo waa ngmɛ blɔ nɛ tsɔsemi ɔ nɛ tsu ní. Kɛ wa ma plɛ kɛ pee jã kɛɛ?

Asafo mi nikɔtɔmahi bɔɔ mɔde be tsuaa be kaa a maa kase Yehowa suɔmi ɔ, titli ɔ, ke  e he hia kaa a de nɔ ko kaa pi Yehowa Odasefo no ji lɛ hu. A laa we nɔ ɔ nɔ́ ko nɔ, mohu ɔ, a jeɔ mi mi jɔmi mi nɛ a tsɔɔ nɔ ɔ níhi nɛ e he hia kaa e pee konɛ e nyɛ nɛ e kpale kɛ ba Yehowa ngɔ nɛ e ba piɛɛ asafo ɔ he ekohu. Ke nɔ ko nɛ a fie lɛ kɛ je asafo ɔ mi ɔ tsɔɔ kaa e suɔ nɛ e kpale kɛ ba asafo ɔ mi ɔ, be komɛ ɔ, asafo mi nikɔtɔma amɛ ma nyɛ ma ya slaa lɛ, konɛ a kai lɛ níhi nɛ e ma nyɛ maa pee konɛ e kpale kɛ ba Yehowa ngɔ. *—Hyɛ sisi ningma.

Weku mi bimɛ tsɔɔ kaa a suɔ asafo ɔ kɛ nɔ nɛ a fie lɛ ɔ tsuo ke a fĩ juɛmi nɛ nikɔtɔma amɛ pee ɔ se. Julian de ke, “Loloolo ɔ, ye bi ji lɛ, se e je mi bami ɔ ha nɛ blɔ ba waa kɛ lɛ wa kpɛti.”

Nihi tsuo nɛ a ngɛ asafo ɔ mi ɔ tsɔɔ kaa a suɔ nɔ nɛ a fie lɛ ɔ kɛ gu tsɔsemi nɛ Yehowa gu asafo mi nikɔtɔma amɛ a nɔ kɛ ha lɛ ɔ se nɛ a fĩɔ nɔ. Enɛ ɔ tsɔɔ kaa e sɛ nɛ a kɛ lɛ nɛ bɔ loo a kɛ lɛ nɛ tu munyu po. (1 Korinto Bi 5:11; 2 Yohane 10, 11) Jehanɛ se hu ɔ, e sa nɛ asafo ɔ nɛ je suɔmi nɛ mi wa kpo kɛ ha nɔ nɛ a fie lɛ ɔ weku mi bimɛ ɔmɛ nɛ a ye bua mɛ. Ke e ba jã ngɛ weku ko mi ɔ, weku ɔ mi bimɛ haoɔ wawɛɛ. E sɛ nɛ wa ha nɛ a nu he kɔkɔɔkɔ kaa mɛ hu a piɛɛ we asafo ɔ he hu.—Roma Bi 12:13, 15.

Julian ma e munyu ɔ nya si ke: “Nɔ fiemi blɔ nya tomi ɔ ji blɔ nya tomi ko nɛ wa hia. E yeɔ bua wɔ nɛ waa kɛ Yehowa mlaahi tsuɔ ní. E ngɛ mi kaa e yeɔ nɔ mohu lɛɛ, se nyagbenyagbe ɔ, e woɔ yiblii kpakpa. Kaa i kplɛɛ ye binyumu ɔ je mi bami yayami ɔ nɔ ɔ, jinɛ e ko tsakee we gblegbleegble.”