1. Moo tsɔɔ nɔ́ nɛ ha nɛ bɔfo ko ba plɛ Satan.

BE KO NƐ BE Ɔ, huɛ bɔmi kpakpa ngɛ e kɛ Yehowa a kpɛti. Se pee se ɔ, bɔfo nɛ ɔ suɔ kaa adesahi nɛ ja lɛ. Jinɛ e sa kaa e ko je e juɛmi kɛ je akɔnɔ yaya nɛ ɔ nɔ, se e pee we jã, mohu ɔ, e ha nɛ akɔnɔ yaya nɛ ɔ wa ngɛ e mi kɛ ya si benɛ e pee yayami. (Yakobo 1:14, 15) Wa li e biɛ nitsɛnitsɛ, se amlɔ nɛ ɔ lɛɛ, wa le kaa a tsɛɛ lɛ ke Satan. E “kɛ anɔkuale yi gblegbleegble.” E tsɔ Yehowa hɛ mi atua nɛ e ba plɛ “lakpatsɛ kpanaku.”—Yohane 8:44.

2, 3. Biɛhi nɛ nyɛɛ se nɛ ɔ nɛ a kɛ tsɛɛ Yehowa he nyɛlɔ kpanaku ɔ sisi ji mɛni? “Satan,” “Abosiami,” “sinɔ,” kɛ “sinɔ nguaa.”

² Kɛ je benɛ Satan tsɔ Yehowa hɛ mi atua a, e ba pee Yehowa kɛ adesahi tsuo a he nyɛlɔ kpanaku. Ke wa kane bɔ nɛ Baiblo ɔ tu Satan he munyu ha a, lɔ ɔ haa nɛ wa naa su yayahi nɛ Satan ngɛ. Satan sisi ji “Nɔ Nɛ Teɔ Si Kɛ Woɔ Nɔ.” Enɛ ɔ tsɔɔ kaa bɔfo yiwutsotsɛ nɛ ɔ sume Mawu nɔ yemi ɔ, nɛ e ngɛ mɔde bɔe kaa e maa hwu kɛ si Mawu nɔ yemi ɔ.  Satan ngɛ hlae kaa Yehowa nɔ yemi ɔ nɛ ba nya gbe.

³ Ngɛ Kpojemi 12:9 ɔ, a tsɛɛ Satan ke Abosiami. Biɛ nɛ ɔ sisi ji, “Nɔ He Guɛ Gbelɔ.” Satan gbe Mawu he guɛ nɛ e tsɛ lɛ ke lakpatsɛ. Munyu nɛ ji “blema sinɔ nguaa” a ha nɛ wa kai kaa Satan gu sinɔ ko nɔ kɛ sisi Hawa. E da blɔ kaa a tsɛɛ Satan ke “sinɔ nguaa.” E he ngɛ gbeye, e yi mi wa, nɛ e peeɔ nɔ́ yaya. E suɔ kaa e maa tsi Yehowa yi mi tomi nya konɛ e ko ba mi, nɛ e suɔ hu kaa e ma kpata Mawu we bi a hɛ mi.

4. Mɛni he wa ma susu ngɛ munyu nɛ ɔ mi?

⁴ E ngɛ heii kaa Satan sume kulaa kaa waa ye Yehowa anɔkuale. Enɛ ɔ he je nɛ Baiblo ɔ bɔ wɔ kɔkɔ ke: “Nyɛ hɛ nɛ ka si; nyɛɛ pee klaalo! Nyɛ he nyɛlɔ, Abosiami ɔ ngɛ nyɛɛe kɛ ngɛ yae kɛ ngɛ bae kaa jata nɛ ngɛ huae, nɛ ngɛ nɔ ko hlae nɛ e tsɔtslɔɔ e mi.” (1 Petro 5:8) Satan ji Yehowa kɛ Yehowa we bi tsuo a he nyɛlɔ nɛ yi mi wa. Enɛ ɔ he ɔ, ngɛ munyu nɛ wa ngɛ kasee nɛ ɔ mi ɔ, wa ma susu suhi etɛ nɛ Satan ngɛ nɛ lɔ ɔ he ɔ, e sa kaa waa po wa he piɛ ngɛ e he ɔ he.

5, 6. (a) Mo ha nɔ hyɛmi ní komɛ nɛ tsɔɔ kaa bɔfohi ji “katsɛmɛ.” (b) Ke a ke Satan hɛɛ “gbenɔ he wami” ɔ, mɛni lɔ ɔ tsɔɔ?

⁵ Bɔfohi ngɛ “he wami wawɛɛ nitsɛ.” (La 103:20, NW) A ngɛ nile kɛ he wami kulaa pe adesahi. Ngɛ anɔkuale mi ɔ, bɔfo anɔkualetsɛmɛ ngɔɔ he wami nɛ a ngɛ ɔ kɛ tsuɔ ní kpakpahi. Kaa nɔ hyɛmi nɔ́ ɔ, Yehowa bɔfo kake gbe Asiria ta buli 185,000. Adesa ko be nyɛe ma tsu nɔ́ ko kaa kikɛ, nɛ e he maa wa kaa ta buli nɛ a he hiɛ po maa pee nɔ́ ko kaa jã. (2 Matsɛmɛ 19:35) Be ko hu ɔ, a wo Yesu bɔfo ɔmɛ tsu nɛ bɔfo ko gu ga blɔ nɔ nɛ e kɛ he wami nɛ e ngɛ ɔ je mɛ ngɛ tsu ɔ mi. E ngɛ mi kaa buli ngɛ lejɛ ɔ mohu lɛɛ, se a li kaa bɔfo ɔ ba bli sinya amɛ nɛ e ha nɛ Yesu bɔfo ɔmɛ je kpo nɛ e nga sinya amɛ ekohu.—Bɔfo Ɔmɛ A Ní Tsumi 5:18-23.

⁶ Bɔfo anɔkualetsɛmɛ ngɔɔ he wami nɛ a ngɛ ɔ kɛ tsuɔ ní kpakpahi, se Satan lɛɛ e kɛ e he wami ɔ tsuɔ ní yayahi. Satan ngɛ he wami wawɛɛ, nɛ e náa nihi a nɔ he wami hulɔ. Baiblo ɔ tu e he munyu kaa lɛ nɛ e “ngɛ je ɔ nɔ matsɛ yee,” nɛ lɛ ji “je nɛ ɔ mi Mawu.” (Yohane 12:31; 2 Korinto Bi 4:4) Satan hɛɛ “gbenɔ he wami” po. (Hebri Bi 2:14) Enɛ ɔ tsɔɔ we kaa nɔ tsuaa nɔ nɛ ma gbo ɔ, Satan nitsɛ nɛ gbe lɛ. Ke jã a, lɛɛ mɛni lɔ ɔ tsɔɔ mɔ? Kekleekle ɔ, Satan suhi nɛ ji ninyɛ kɛ yi wu tso ní peepeehi hyi je ɔ tɔ. Nɔ́ nɛ ji enyɔ ɔ, akɛnɛ Hawa he Satan lakpa munyu ɔ ye, nɛ Adam hu gbo Mawu tue he je ɔ, adesahi tsuo ba plɛ yayami peeli nɛ a gboɔ. (Roma Bi 5:12) Satan ji “nɔmlɔ gbelɔ” kaa bɔ nɛ Yesu tu e he munyu ɔ. (Yohane 8:44) E ji he nyɛlɔ nɛ ngɛ he wami nitsɛnitsɛ.

7. Mɛni daimonio ɔmɛ peeɔ kɛ tsɔɔ kaa a ngɛ he wami?

⁷ Ke wa teɔ si kɛ woɔ Satan ɔ, lɔ ɔ tsɔɔ kaa wa teɔ si kɛ woɔ nihi tsuo nɛ fĩ e se nɛ a tsɔ Mawu nɔ yemi ɔ hɛ mi atua a. Nihi nɛ a piɛɛ jamɛatsɛmɛ ɔmɛ a he ji  bɔfohi fuu nɛ a tsɔ Mawu hɛ mi atua nɛ a tsɛɛ mɛ ke daimoniohi ɔ. (Kpojemi 12:3, 4) Behi fuu ɔ, a tsɔɔ kaa a ngɛ he wami kulaa pe adesahi, nɛ a kɛ haomi nguanguahi baa adesahi a nɔ. (Mateo 8:28-32; Marko 5:1-5) O hɛ nɛ ko je nɔ kɔkɔɔkɔ kaa daimonio ɔmɛ kɛ a nyatsɛ ɔ ngɛ he wami. (Mateo 9:34) Ke Yehowa yi bua wɔ ɔ, wa be nyɛe maa ye Satan nɔ kunimi kɔkɔɔkɔ.

8. (a) Mɛni oti nɛ Satan kɛ ma e hɛ mi? (Moo hyɛ foni nɛ ngɛ ní kasemi ɔ sisije ɔ.) (b) Mɛni ji ní komɛ nɛ ngɛ nɔ yae ngɛ je ɔ mi nɛ tsɔɔ kaa Satan yi mi wa wawɛɛ nitsɛ?

⁸ Bɔfo Petro ngɔ Satan kɛ to ‘jata nɛ ngɛ huae’ he. Níhi a mi hlami womi ko tsɔɔ kaa a ngɔɔ Hela munyu nɛ a tsɔɔ sisi ke “ngɛ huae” ɔ kɛ tsuɔ ní ke “hwɔ ngɛ lohwe awi yelɔ ko yee nɛ e ngɛ pɛe wawɛɛ.” E da blɔ kaa a kale Satan jã, ejakaa e yi mi wa nɛ e nɛ nɔ mɔbɔ! Lɛ nɛ e ngɛ je ɔ tsuo kudɔe, se kɛ̃ ɔ, e tsui nɔɛ e mi. Satan ngɛ kaa jata nɛ hwɔ ngɛ lɛ yee nɛ e ngɛ lohwehi hlae nɛ e nu mɛ. (1 Yohane 5:19) Nihi nɛ e je e hɛ ngɔ pi titli ji nihi nɛ a pɔ mɛ nu ɔ a ti nihi nɛ piɛ ngɛ zugba a nɔ ɔ, kɛ “to kpa” amɛ hu nɛ a ba piɛɛ a he ɔ. (Yohane 10:16; Kpojemi 12:17) Oti nɛ Satan kɛ ma e hɛ mi ji kaa e ma kpata Yehowa we bi a hɛ mi. Ke wa hyɛ bɔ nɛ a wa anɔkuale Kristofohi a yi mi ngɛ kaseli ɔmɛ a be ɔ mi, kɛ bɔ nɛ a ngɛ mɛ yi mi wae kɛ ba si mwɔnɛ ɔ, wa naa kaa Satan ji yiwutsotsɛ nitsɛnitsɛ.

9, 10. (a) Mɛni blɔ nɔ Satan gu kɛ tua Israel bi ɔmɛ? (Mo ha enɛ ɔ he nɔ hyɛmi níhi.) (b) Mɛni yi mi tomi titli he je nɛ Satan je e hɛ kɛ pi blema Israel bi ɔmɛ ɔ? (d) Mwɔnɛ ɔ, ke Yehowa sɔmɔli ɔmɛ a kpɛti nɔ ko pee yayami ngua ko ɔ, kɛ o susu kaa Abosiami peeɔ e ní ha kɛɛ?

 ⁹ Satan tsɔɔ kaa e yi mi wa ngɛ blɔ kpa ko hu nɔ. Ke hwɔ ngɛ jata ko yee ɔ, e nɛ lohwe ko lohwe ko mɔbɔ. Ke e maa gbe lohwe ko ɔ, lohwe ɔ he mɔbɔ pee we lɛ, nɛ ke e gbe lɛ ta hu ɔ, e pia we e he. Jã kɛ̃ nɛ Satan hu nɛ nihi nɛ e tuaa mɛ ɔ mɔbɔ. Kaa nɔ hyɛmi nɔ́ ɔ, ke Israel bi ɔmɛ ngɔ a he ya wo yayami komɛ kaa ajuama bɔmi kɛ hɛ tsumi mi ɔ, kɛ o susu kaa Satan nuɔ he ha kɛɛ? Benɛ Zimri kɛ e he wo ajuama bɔmi mi, nɛ Gehazi hu kɛ hɛ tsumi ya pee yayami ɔ, kɛ o susu kaa Satan pee e ní ha kɛɛ?—4 Mose 25:6-8, 14, 15; 2 Matsɛmɛ 5:20-27.

¹⁰ Yi mi tomi pɔtɛɛ ko he je nɛ Satan je e hɛ kɛ pi blema Israel bi ɔmɛ ɔ nɛ. Mo kai kaa a ma fɔ Mesia a ngɛ Israel. Lɛ nɛ e maa fia Satan yi nɔ́, nɛ e maa tsɔɔ hu kaa Yehowa nɔ yemi ɔ da. (1 Mose 3:15) Satan sume kaa Mawu bua nɛ jɔ Israel bi ɔmɛ a he, enɛ ɔ he ɔ, e bɔ mɔde wawɛɛ kaa e maa sisi mɛ konɛ a pee yayami. Ko susu kaa benɛ David puɛ gba a, e gba Satan nya. Nɛ ko susu hu kaa Mose he mɔbɔ pee lɛ benɛ e nyɛ we nɛ e ya su Si Womi Zugba a nɔ ɔ. Ke Satan na nɛ Mawu sɔmɔli ɔmɛ a ti nɔ ko pee yayami ngua ko ɔ, e bua jɔɔ wawɛɛ nitsɛ. Ngɛ anɔkuale mi ɔ, Abosiami daa lɔ ɔ nɔ kɛ bɔɔ Yehowa ahlua.—Abɛ 27:11.

11. Mɛni he je nɛ eko ɔ, Satan je e hɛ pi Sara a?

¹¹ Nihi nɛ Satan je e hɛ kɛ pi titli ji weku nɛ a ma fɔ Mesia a ngɛ mi ɔ. Kaa nɔ hyɛmi nɔ́ ɔ, benɛ Yehowa de Abraham kaa e ma plɛ “ma agbo” ɔ, mo susu nɔ́ nɛ ba ngɛ lɔ ɔ se ɔ he nɛ o hyɛ. (1 Mose 12:1-3) Benɛ Abraham kɛ Sara ngɛ Egipt ɔ, Farao ngɔ Sara kɛ ho e we mi ya konɛ e ya pee e yo. Se Yehowa bu Sara he, nɛ e je lɛ kɛ je si himi nɛ mi wa nɛ ɔ mi. (Kane 1 Mose 12:14-20.) Nɔ́ ko kaa jã ya nɔ ngɛ Gerar ma a mi loko a fɔ Isak. (1 Mose 20:1-7) Anɛ e ma nyɛ maa ba kaa Satan ji nɔ nɛ ha nɛ ní nɛ ɔmɛ tsuo ya nɔ ɔ lo? Mo kai kaa Sara hia kɛ je sika ma nɛ ji Ur mi kɛ ya hi bo tsuhi a mi. Lɔ ɔ he ɔ, anɛ Satan susu kaa ke e ngɔ Farao kɛ Abimelek a matsɛ we ɔmɛ a mi ní kpakpa amɛ kɛ ka lɛ ɔ, e nine maa su e nɔ lo? Anɛ Satan susu kaa Sara maa je e huno ɔ kɛ Yehowa a se nɛ e ma ya gba matsɛmɛ nɛ ɔmɛ lo? Baiblo ɔ de we nɔ́ ko ngɛ lɔ ɔ he mohu lɛɛ, se ke he blɔ nɛ Sara ma ná kaa a ma fɔ Mesia a ngɛ e weku ɔ mi ɔ bɔ lɛ ɔ, atsinyɛ jemi ko be he kaa Abosiami bua ko jɔ wawɛɛ. Kaa Sara gba a puɛ, nɛ biɛ kpakpa nɛ e ná, kɛ huɛ bɔmi kpakpa nɛ ngɛ e kɛ Yehowa a kpɛti ɔ puɛ ɔ, e he mɔbɔ ko pee we Satan fɛɛ. Satan ji yiwutsotsɛ nɛ mɔbɔ nami ko be e mi!

12, 13. (a) Benɛ a fɔ Yesu se ɔ, mɛni Satan pee kɛ tsɔɔ kaa e yi mi wa? (b) Kɛ o susu kaa Satan buu nihewi kɛ yihewi nɛ a suɔ Yehowa nɛ a ngɛ mɔde bɔe kaa a ma sɔmɔ lɛ ɔ ha kɛɛ?

¹² A fɔ Yesu ngɛ Abraham gbenɔ se jeha lafahi abɔ. Ko susu kaa bimwɔyo nɛ ɔ muɔ Satan hɛ. Satan le kaa bimwɔyo nɛ ɔ ma ba wa nɛ e ma ba plɛ  Mesia nɛ a wo e he si ɔ. Yesu ji Abraham nina titli ɔ nɛ. Nɛ pee se ɔ, “níhi nɛ Abosiami tsu ɔ, e ma ba kpata lɛ tsuo hɛ mi.” (1 Yohane 3:8) Anɛ Satan ma susu kaa ke e gbe jokuɛ ko ɔ, e ji yi wu tso ní peepee lo? Dɛbi. Pi Satan kɔmɔ ji nɔ́ nɛ da kɛ nɔ́ nɛ dɛ. E kɛ oya yemi bɔ mɔde kaa e maa gbe Yesu ngɛ e jokuɛ mi. Kɛ gu mɛni blɔ nɔ?

¹³ Benɛ dodoe mi hyɛli ɔmɛ ha nɛ Matsɛ Herode nu kaa a fɔ ‘nɔ nɛ ma ba ye Yuda bi ɔmɛ a nɔ matsɛ ɔ,’ e mi mi fu wawɛɛ, nɛ e suɔ kaa e maa gbe bimwɔyo ɔ. (Mateo 2:1-3, 13) Lɔ ɔ he ɔ, e fã ke a gbe jokuɛ nyumuwi tsuo ngɛ Betlehem kɛ lejɛ ɔ ní ɔmɛ a mi. E tsɔɔ kaa a gbe kɛ je muɔloku nɔ kɛ ya si ni nɛmɛ nɛ ye jeha enyɔɔnyɔ a nɔ. (Kane Mateo 2:13-18.) E ngɛ mi kaa Herode nine sui Yesu nɔ mohu lɛɛ, se mɛni enɛ ɔ deɔ wɔ ngɛ wa he nyɛlɔ Satan he? Abosiami bui adesa wami kulaa. E susuu we jokuɛwi po a he. Satan ji “jata nɛ ngɛ huae” niinɛ. O hɛ nɛ ko je nɔ kɔkɔɔkɔ kaa e ji yiwutsotsɛ!

14, 15. Mɛni Satan pee kɛ ‘yu nihi nɛ a he we yi ɔ a mumi mi hɛngmɛ’?

¹⁴ Blɔ pɛ nɛ Satan ma nyɛ maa gu nɔ kɛ ha nɛ nihi nɛ a tsɔ wa Mawu nɛ ji Yehowa nɛ ngɛ suɔmi ɔ hɛ mi atua ji kaa e maa sisi mɛ. (1 Yohane 4:8) Satan sisiɔ nihi konɛ a ko “le kaa mumi mi ohiatsɛmɛ ji mɛ,” aloo e he hia nɛ a dla a kɛ Mawu a kpɛti. (Mateo 5:3) Abosiami ‘yu nihi nɛ a he we yi ɔ a mumi mi hɛngmɛ’ konɛ a ko le anɔkuale nɛ kɔɔ Yehowa he ɔ.—2 Korinto Bi 4:4.

¹⁵ Lakpa jami ji blɔ titli nɛ Satan guu nɔ kɛ sisiɔ nihi. E le kaa Yehowa ji nɔ ko nɛ ‘a kɛ lɛ plee we nɔ́ he.’ (2 Mose 20:5) Lɔ ɔ he ɔ, ke Satan na kaa nihi ja we Yehowa, se mohu a ngɛ a nimeli nɛ a gbo, adebɔ nɔ́ ko, lohwehi, aloo nɔ́ kpa ko jae ɔ, e bua jɔɔ wawɛɛ. Dɔmi sane ji kaa nihi fuu nɛ a kɛ a he woɔ lakpa hemi kɛ yemi kɛ kusumi ní peepeehi a mi ɔ po susu kaa Mawu kplɛɛɔ a jami nɔ. Israel bi nɛ a hi si ngɛ Yesaya be ɔ mi ɔ hu pee jã. Yehowa bi mɛ ke: “Mɛni he je nɛ nyɛ puɛɔ sika kɛ heɔ nɔ́ nɛ be nyɛ tɔe? Mɛni he je nyɛ ngɔɔ nyɛ ní tsumi mi hiɔwo kɛ heɔ nɔ́ nɛ tɔɛ nɔ? Nyɛɛ bu mi tue saminya nɛ nyɛɛ pee nɔ́ nɛ i ngɛ dee ɔ; kɛkɛ nyɛ maa ye ní kpakpahi, nɛ nyɛ bua maa jɔ nyɛ he.”—Yesaya 55:2.

16, 17. (a) Mɛni he je nɛ Yesu de Petro ke: “Jee ye nɔ kɛ ya se Satan ɔ”? (b) Mɛni blɔ nɔ Satan ma nyɛ maa gu kɛ sisi wɔ konɛ wa kpa hwɔɔmi?

¹⁶ Satan ma nyɛ maa sisi Yehowa sɔmɔli nɛ a ngɛ kã po. Kaa nɔ hyɛmi nɔ́ ɔ, mo susu nɔ́ nɛ ba benɛ Yesu de e kaseli ɔmɛ kaa e be kɛe nɛ a maa gbe lɛ ɔ he nɛ o hyɛ. Bɔfo Petro suɔ Yesu, enɛ ɔ he ɔ e de lɛ ke: “Nyɔmtsɛ, enɛ ɔ ya je ngɛ se lokoo! Mawu ko ha nɛ nɔ́ nɛ ɔ nɛ ba o nɔ kɔkɔɔkɔ!” Yesu de Petro ke: “Jee ye nɔ kɛ ya se Satan!” (Mateo 16:22, 23) Mɛni he je nɛ Yesu tsɛ Petro ke “Satan” ɔ? Ejakaa Yesu le nɔ́ nɛ e be kɛe kulaa nɛ maa ba e nɔ. E be kɛe kulaa nɛ Yesu ma gbo. E gbenɔ ɔ maa pee kpɔmi afɔle  sami nɔ́, nɛ lɔ ɔ hu maa ma nɔ mi kaa Abosiami ji lakpatsɛ. Enɛ ɔ ji nɔ́ ko nɛ he hia wawɛɛ ngɛ adesahi a si himi mi. Tsa pi be nɛ ɔ nɛ e sa kaa Yesu nɛ de ke ‘Mawu nɛ ko ha enɛ ɔ nɛ ba e nɔ.’ Kaa Yesu hɛ je e he nɔ ɔ, jinɛ Satan bua ko jɔ nitsɛ.

¹⁷ Je nɛ ɔ nyagbe su si ta, enɛ ɔ he ɔ, wɔ hu wa ngɛ be nɛ mi wa mi. Satan ngɛ hlae nɛ waa na wa he mɔbɔ aloo wa de ke wa sume kaa ‘nɔ́ ko nɛ ba wa nɔ.’ E suɔ nɛ waa kɛ wa juɛmi nɛ ma bɔ nɛ wa ma plɛ kɛ ye manye ngɛ je nɛ ɔ mi ɔ nɔ mohu. E suɔ nɛ wa hɛ nɛ je nɔ kaa wa ngɛ nyagbe ligbi ɔmɛ a mi, konɛ wa kpa hwɔɔmi. Ko ha nɛ e ba jã ngɛ o blɔ fa mi kɔkɔɔkɔ! Mohu ɔ, o ‘hɛ nɛ hi o he nɔ.’ (Mateo 24:42) Satan ngɛ tsɔɔe kaa nyagbe ɔ ná we nɛ e ba lolo, aloo e be bae kulaa. Ko he Satan lakpa munyu nɛ ɔ nɛ o ye kɔkɔɔkɔ.

18, 19. (a) Mɛni blɔ nɔ Satan ma nyɛ maa gu kɛ sisi wɔ nɛ wa susu kaa Yehowa sume wɔ? (b) Mɛni blɔ nɔ Yehowa guɔ kɛ yeɔ bua wɔ konɛ wa hɛ nɛ hi wa he nɔ?

¹⁸ Satan bɔɔ mɔde kaa e maa gu blɔ kpa ko hu nɔ kɛ sisi wɔ. E suɔ nɛ wa susu kaa Yehowa sume wɔ, nɛ e kɛ wa yayamihi hu be wɔ pae gblegbleegble. Se enɛ ɔmɛ tsuo ji Satan lakpa munyuhi. Mo susu he nɛ o hyɛ. Mɛnɔ tutuutu nɛ Yehowa sume e sane? Lɛ ji Satan. Mɛnɔ lɛ Mawu kɛ e he yayami be lɛ pae gblegbleegble? Lɛ ji Satan. Se wɔɔ lɛɛ Baiblo ɔ de wɔ ke: “Mawu yi tue gbogboe sane. Ní nɛ nyɛ tsu, kɛ suɔmi nɛ nyɛ je kpo ha lɛ ɔ, e hɛ be nɔ jee gblegbleegble.” (Hebri Bi 6:10) Yehowa bua jɔɔ nɔ́ tsuaa nɔ́ nɛ wa peeɔ konɛ waa sa e hɛ mi ɔ he, nɛ sɔmɔmi nɛ wa ngɛ lɛ sɔmɔe ɔ be yaka pee kɔkɔɔkɔ. (Kane 1 Korinto Bi 15:58.) Lɔ ɔ he ɔ, ko ha nɛ Satan nɛ ngɔ e lakpa munyu ɔmɛ kɛ sisi mo.

¹⁹ Kaa bɔ nɛ wa susu he ɔ, Satan ngɛ he wami, e yi mi wa, nɛ e sisiɔ nɔ. Kɛ wa ma plɛ kɛ ye he nyɛlɔ ko kaa kikɛ ɔ nɔ kunimi ha kɛɛ? Yehowa yeɔ bua wɔ. E Munyu ɔ tsɔɔ wɔ blɔhi a nɔ nɛ Satan guɔ kɛ tsuɔ ní, enɛ ɔ he ɔ, “wa le gahi nɛ e to ɔ.” (2 Korinto Bi 2:11) Ke wa le blɔ slɔɔtohi a nɔ nɛ Satan guɔ kɛ tuaa wɔ ɔ, e be yee ha wɔ kaa wa maa hwɔɔ daa. Se blɔhi a nɔ nɛ Satan guɔ kɛ sisiɔ wɔ nɛ wa maa le ɔ kɛkɛ pi. Baiblo ɔ de ke: ‘Nyɛɛ te si kɛ wo Abosiami, nɛ e maa tu nyɛ nya fo.’ (Yakobo 4:7) Wa ma susu blɔ etɛ a nɔ nɛ wa maa gu kɛ ye Satan nɔ kunimi ɔ he ngɛ munyu nɛ nyɛɛ se ɔ mi.