BENƐ Anita ba pee Yehowa Odasefo no ɔ, e huno ɔ mi mi fu wawɛɛ. * (Hyɛ sisi ningma.) E bɔ mɔde kaa e maa tsi Anita nya nɛ e ko ya asafo mi kpehi, nɛ e wo lɛ si kaa e ko wo Mawu biɛ ɔ ta kɔkɔɔkɔ. Be tsuaa be nɛ e maa nu nɛ Anita maa wo Yehowa biɛ ɔ ta a, e mi mi fuɔ wawɛɛ.

Jehanɛ se hu ɔ, Anita huno ɔ sume nɛ Anita nɛ tsɔɔ a bimɛ ɔmɛ Yehowa he ní, aloo e kɛ mɛ nɛ ya asafo mi kpehi. Enɛ ɔ he wa ha Anita wawɛɛ nitsɛ, ejakaa e sa nɛ e bɔ mɔde nɛ e ye bua a bimɛ ɔmɛ nɛ e huno ɔ nɛ ko le he nɔ́ ko.

Kaa bɔ nɛ e ji ngɛ Anita blɔ fa mi ɔ, eko ɔ, mo hu o weku no ko bɔɔ mɔde kaa e maa tsi o nya konɛ o ko sɔmɔ Yehowa. Aloo eko ɔ, o kɛ haomi kpa ko ngɛ kpee. Eko ɔ, o ngɛ hiɔ nue be kɛkɛɛ ji nɛ ɔ. E ma nyɛ maa ba kaa o bi, o huno, aloo o yo gbo. Aloo eko ɔ, o weku no ko nɛ o suɔ e sane ɔ jɔɔ Yehowa sɔmɔmi. Ke e ba jã ngɛ o blɔ fa mi ɔ, mɛni o ma nyɛ maa pee konɛ o nyɛ nɛ o ye Yehowa anɔkuale?

Bɔfo Paulo de ke: “E hia kaa nyɛɛ to nyɛ tsui si.” (Hebri Bi 10:36) Ke jã a, mɛni maa ye bua mo konɛ o nyɛ nɛ o to o tsui si?

Ke o kɛ haomi ngɛ kpee ɔ, mo kai kaa e he hia nɛ o kɛ o hɛ nɛ fɔ Yehowa nɔ konɛ e ye bua mo nɛ o to o tsui si. Moo sɔle ha lɛ konɛ e ye bua mo. Jã ji bɔ nɛ Ana pee benɛ e huno gbo tlukaa a. E kɛ e huno ɔ hi si jeha 30. Ana de ke: “Nɛ ye huno ɔ ho ní tsumi ya a, e bɛ we mi hu. E ye jeha 52 pɛ.”

Ana ní tsumi ha nɛ e be deka kulaa mohu lɛɛ, se kɛ̃ ɔ, e yeɔ aywilɛho. Mɛni e pee? E de ke: “I je ye tsui mi nɛ i sɔle ha Yehowa nɛ i kpa lɛ pɛɛ kaa e ye bua mi.” E na kaa Yehowa ye bua lɛ, ejakaa be tsuaa be nɛ e maa sɔle ha Yehowa a, e tsui nɔɔ e mi. E de ke: “I ngɛ nɔ mi mami kaa Yehowa ma tle ye huno ɔ si.”—Filipi Bi 4:6, 7.

Yehowa wo e sɔmɔli si kaa e maa bu a sɔlemihi tue. (La 65:2) Nɛ e ma ha mɛ nɔ́ tsuaa nɔ́ nɛ he hia mɛ konɛ a nyɛ nɛ a ya nɔ nɛ a sɔmɔ lɛ. Yehowa maa ye bua mo konɛ o nyɛ nɛ o ye lɛ anɔkuale ngɛ si himihi nɛ mi wa po a mi.

Blɔ kpa ko hu ngɛ nɛ Yehowa guu nɔ kɛ yeɔ bua wɔ. E ha wɔ nyɛmimɛ nyumuhi kɛ yihi ngɛ asafo ɔ mi. Wa ma nyɛ maa kase nɔ́ ko kɛ je nyɛmimɛ nɛ a hi Tesalonika a a he. Benɛ a kɛ yi mi wami ko nɛ nya wa kpe ɔ, a ye bua a sibi. Jamɛ a be ɔ mi ji be titli nɛ e he hia kaa a ya nɔ nɛ a wo a sibi he wami. (1 Tesalonika Bi 2:14; 5:11) A kɛ nyɛmimɛ nyumuhi kɛ yihi kpeɔ nɛ a bɔɔ gbagbanii. Enɛ ɔ ye bua mɛ nɛ a nyɛ ye Yehowa anɔkuale. Mɛni wa ma nyɛ maa pee konɛ wɔ hu waa ya nɔ nɛ waa ye anɔkuale kaa Tesalonika bi ɔmɛ?

E he hia nɛ waa kɛ nihi nɛ bɔ gbagbanii ngɛ asafo ɔ mi, nɛ waa wo wa sibi he wami, titli ɔ, ngɛ be nɛ mi wa mi. (Roma Bi 14:19) Bɔfo Paulo na nɔ́ ngɛ yi mi wami kɛ haomi kpahi a dɛ mi. Se Yehowa ha lɛ he wami nɛ e nyɛ to e tsui si. Kaa nɔ hyɛmi nɔ́ ɔ, Yehowa ha nɛ nyɛmimɛ nyumuhi kɛ yihi wo Paulo he wami. Bɔfo Paulo tu e huɛmɛ ɔmɛ a he munyu ke: “A ngɛ mi wae wawɛɛ nitsɛ.” (Kolose Bi 4:10, 11) Nyɛmimɛ ɔmɛ suɔ Paulo sane. Enɛ ɔ he ɔ, benɛ e hia yemi kɛ buami ɔ, a wo e bua, nɛ a wo lɛ he wami hulɔ. Eko ɔ, o ma kai be ko nɛ nyɛmimɛ nyumuhi kɛ yihi nɛ o kɛ mɛ ngɛ asafo kake mi ɔ de nɔ́ ko loo a pee nɔ́ ko nɛ wo mo he wami.

Yehowa ha wɔ asafo mi nikɔtɔmahi hu konɛ a ye bua mo. Nyɛmimɛ nyumu nɛ ɔmɛ ma nyɛ maa da Baiblo ɔ nɔ kɛ wo mo he wami nɛ a wo mo ga kpakpa. A ngɛ “kaa wesa he ngɛ kɔɔhiɔ kɛ ahumi nya, kaa pa nɛ ywia nga ngɛ zugba kpataa nɔ, aloo kaa zugba kplanaa nɔ tɛ sa sisi hɔ̃.” (Yesaya 32:2) Lemi nɛ wa le kaa nyɛmimɛ nyumu nɛ ɔmɛ maa ye bua wɔ ɔ woɔ wa bua. Enɛ ɔ he ɔ, ke níhi a mi wa ha mo ɔ, moo su asafo mi nikɔtɔma amɛ a he. A ma nyɛ maa ye bua mo konɛ o ya nɔ nɛ o sɔmɔ Yehowa.

Ngɛ anɔkuale mi ɔ, asafo mi nikɔtɔma amɛ be nyɛe ma tsu o nyagba amɛ tsuo a he ní ha mo. Nɛ a yi mluku kaa bɔ nɛ mo hu o yi mluku ɔ. (Bɔfo Ɔmɛ A Ní Tsumi 14:15) Se ke o ya asafo mi nɔkɔtɔma ko ngɔ nɛ e kɛ mo sɔle konɛ Yehowa nɛ ye bua mo kɛ tsu o nyagba a he ní ɔ, o tsui ma nyɛ maa nɔ o mi. (Yakobo 5:14, 15) Kaa nɔ hyɛmi nɔ́ ɔ, ngɛ Italy ɔ, asafo mi nikɔtɔma amɛ wo nyɛminyumu ko nɛ e be he wami wawɛɛ jehahi babauu ɔ he wami. Ngɛ anɔkuale mi ɔ, nyɛminyumu ɔ de ke: “Suɔmi nɛ nyɛmimɛ nyumu nɛ ɔmɛ je kpo ha mi, kɛ slaami nɛ a pɔɔ mi slaa mi ɔ, ha nɛ i nyɛ to ye tsui si.” Enɛ ɔ he ɔ, ke o kɛ haomi ko ngɛ kpee ɔ, Yehowa suɔ nɛ o bi yemi kɛ buami kɛ je asafo mi nikɔtɔma amɛ a dɛ.

Ke waa kɛ wa juɛmi ma Yehowa sɔmɔmi nɔ ɔ, wa maa na bɔ nɛ Yehowa yeɔ bua wɔ ha. Jã pɛpɛɛpɛ ji bɔ nɛ John pee. Benɛ e ye jeha 39 ɔ, e ná kansa. E nu he kaa e sɛ nɛ e nuɔ hiɔ ko kaa jã, ejakaa e wɛ kulaa. E susuɔ e yo kɛ a binyumu nɛ e ye jeha etɛ pɛ ɔ a he. E de ke: “E he ba hia nɛ ye yo ɔ nɛ hyɛ ye nɔ, nɛ e hyɛ wa bi ɔ hu nɔ, nɛ e kɛ mi nɛ ya hiɔtsami he be tsuaa be nɛ e he hia kaa ma ya.” Tsopa nɛ a peeɔ ha lɛ ɔ haa nɛ e nuɔ pɔtɔtɔɛ he, nɛ e peeɔ lɛ kaa e vie. Pi lɔ ɔ pɛ. John na kaa e tsɛ ngɛ gbenɔ muɔ nya nɛ e he hia kaa nɔ ko nɛ e hyɛ lɛ.

Mɛni ye bua John kɛ e weku ɔ ngɛ be nɛ mi wa nɛ ɔ mi? E ngɛ mi kaa John pɔɔ pɔtɔtɔɛ he numi mohu lɛɛ, se e bɔ mɔde nɛ e ha e weku ɔ ngɔ Yehowa sɔmɔmi kɛ pee oti ngɛ a si himi mi. E de ke: “Wa yaa asafo mi kpehi tsuo, wa yaa fiɛɛmi daa otsi, nɛ wa peeɔ wa weku jami ɔ daa ke si himi ɔ mi wa po.” John le kaa e he hia nɛ e ha nɛ huɛ bɔmi nɛ ngɛ e kɛ Yehowa a kpɛti ɔ mi nɛ wa. E ngɛ mi kaa sisije ɔ, e hɛ mi pee lɛ yaa nɛ e pee yeyeeye mohu lɛɛ, se pee se ɔ, e yeyeeye peemi ɔ nya ba si. E le kaa Yehowa suɔ lɛ nɛ e ha lɛ he wami nɛ e hia. Ke mo hu o ya je si himi ko kaa jã mi, nɛ o hao aloo o tsui po ɔ, Yehowa ma nyɛ maa ye bua mo. John de ke: “Yehowa maa waje mo kaa bɔ nɛ e waje mi ɔ.”

Ke o kɛ haomi ngɛ kpee ɔ, mo kai munyu nɛ Paulo tu nɛ nyɛɛ se nɛ ɔ: “E he hia kaa nyɛɛ to nyɛ tsui si.” Moo ngɔ o hɛ kɛ fɔ Yehowa nɔ kɛ gu sɔlemi nɛ o maa sɔle ha lɛ ɔ nɔ. O kɛ nyɛmimɛ nɛ a ngɛ asafo ɔ mi ɔ nɛ bɔ gbagbanii, ha nɛ asafo mi nikɔtɔma amɛ nɛ a ye bua mo, nɛ o kɛ o juɛmi nɛ ma Yehowa sɔmɔmi nɔ. Ke o pee jã a, e maa ye bua mo konɛ o nyɛ nɛ o da haomi nɛ eko ɔ, o kɛ ngɛ kpee amlɔ nɛ ɔ aloo haomi nɛ o kɛ maa kpe hwɔɔ se ɔ nya.