1, 2. (a) Mɛni he je nɛ e he hia wawɛɛ kaa Kristofohi nɛ a fĩ Yehowa se ɔ, nɛ kɛ enɛ ɔ kɔɔ wa he nɛ waa kɛ wui ma sanehi a mi ɔ he ha kɛɛ? (Moo hyɛ foni nɛ ngɛ ní kasemi ɔ sisije ɔ.) (b) Mɛni se nihi babauu fĩɔ, nɛ mɛni jeɔ mi kɛ baa?

YEHOWA sɔmɔli kɛ a he wui níhi nɛ ngɔɔ mi gbami kɛ baa a mi. Ní nɛ ɔmɛ ekomɛ ji ma he suɔmi, nihi a hɛ mi hyɛmi, kɛ nihi a ní peepee kpahi. Mɛni he je? Ejakaa wa suɔ Yehowa, wa yeɔ lɛ anɔkuale, nɛ wa buɔ lɛ tue. (1 Yohane 5:3) Ngɛ he saisaa nɛ wa je, kɛ he saisaa nɛ wa ngɛ ɔ tsuo se ɔ, wa suɔ kaa waa kɛ Mawu mlaahi ma tsu ní. Yehowa kɛ e Matsɛ Yemi ɔ se nɛ wa ma fĩ ɔ he hia pe nɔ́ tsuaa nɔ́. (Mateo 6:33) Enɛ ɔ he ɔ, wa ma nyɛ ma de ke, ‘pi je ɔ mi bi ji wɔ.’—Kane Yohane 17:11, 15, 16; Yesaya 2:4.

² Nihi babauu ngɛ je kɛ wɛ ɔ kɛ anɔkuale yemi fĩɔ ma, wɛtso, kusumihi, aloo a ma mi bɔɔlu fiami kuuhi po a se. Aywilɛho sane ji kaa enɛ ɔ ha nɛ nihi fuu kɛ a he siɔ koli, a nyɛɔ nihi, nɛ be komɛ ɔ, a gbeɔ nihi nɛ a fĩ ma kpahi a se ɔ po. E ngɛ mi kaa waa kɛ wa he wui ní nɛ ɔmɛ a mi mohu lɛɛ, se e ma nyɛ maa sa waa kɛ wa weku mi bimɛ a he. Enɛ ɔ ma  ha nɛ eko ɔ, nihi maa pee wɔ ní yayahi. Bɔ nɛ Mawu bɔ wɔ ha he je ɔ, wa le níhi nɛ hi kɛ níhi nɛ hí. Enɛ ɔ he ɔ, ke amlaalo ɔ pee nɔ́ ko nɛ dɛ ɔ, e be yee ha wɔ kaa wa maa tu munyu kɛ si. (1 Mose 1:27; 5 Mose 32:4) Ke nɔ́ ko ngɛ nɔ yae nɛ dɛ ɔ, kɛ o peeɔ o ní ha kɛɛ? Anɛ o kɛ o he woɔ ma sanehi a mi, aloo o yuɔ o he ngɛ níhi kaa jã a a he?

3, 4. (a) Mɛni he je nɛ waa kɛ wa he wui kunɔ kɛ pɛhi nɛ yaa nɔ ngɛ je ɔ mi ɔ a mi ɔ? (b) Mɛni he wa ma susu ngɛ ní kasemi nɛ ɔ mi?

³ Ke ma ko te si kɛ wo ma ko ɔ, nihi fuu kɛ a he woɔ mi, ejakaa amlaalo ɔ deɔ mɛ kaa ke a pee jã a, lɔ ɔ tsɔɔ kaa a ji ma bi kpakpahi. Se wɔɔ lɛɛ wa kaseɔ Yesu. Enɛ ɔ he ɔ, waa kɛ wa he wui ma kudɔmi sanehi kɛ ta hwumi mi. (Mateo 26:52) Anɔkuale Kristofohi susuu we kaa Satan je ɔ fã ko hi pe eko. (2 Korinto Bi 2:11) Waa kɛ wa he wui kunɔ kɛ pɛhi nɛ yaa nɔ ngɛ je ɔ mi ɔ a mi.—Kane Yohane 15:18, 19.

⁴ Akɛnɛ wa yi mluku he je ɔ, eko ɔ, loloolo ɔ, wa ti ni komɛ hɛɛ nihi nɛ a je ma kpahi a nɔ ɔ a he juɛmi yaya. (Yeremia 17:9; Efeso Bi 4:22-24) Ngɛ munyu nɛ ɔ nɛ wa ngɛ kasee ɔ mi ɔ, wa maa kase sisi tomi mlaahi nɛ maa ye bua wɔ konɛ waa yu wa he ngɛ níhi nɛ ngɔɔ mi gbami kɛ baa nihi a kpɛti ɔ a he. Jehanɛ hu ɔ, wa ma susu bɔ nɛ wa maa pee kɛ tsɔse wa he konɛ wa susu níhi a he kaa bɔ nɛ Yehowa kɛ Yesu hu peeɔ ɔ, nɛ wa fĩ Matsɛ Yemi ɔ se.

5, 6. Benɛ Yesu ngɛ zugba a nɔ ɔ, kɛ e buu nimli slɔɔtoslɔɔtohi ha kɛɛ, nɛ mɛni he je?

⁵ Ke e yee ha mo kaa o maa yu o he ngɛ ma kudɔmi sanehi a he ɔ, mo bi o he ke, ‘Kɛ Yesu maa pee e ní ngɛ si himi ko kaa kikɛ ɔ he ha kɛɛ?’ Benɛ Yesu ngɛ zugba a nɔ ɔ, nihi nɛ a je Yudea, Galilea, kɛ Samaria a kɛ a he yi. Mo susu nɔ hyɛmi ní komɛ a he nɛ o hyɛ. Yuda bi kɛ Samaria bi yi. (Yohane 4:9) Farisi bi kɛ Saduki bi kɛ a he kpa we gbi ngɛ níhi fuu a mi. (Bɔfo Ɔmɛ A Ní Tsumi 23:6-9) Yuda bi nɛ a kase Mlaa a susu kaa a nɔ kuɔ pe nihi nɛ a kase we Mlaa a. (Yohane 7:49) Nɛ nihi fuu sume tó tsuli kɛ Roma bi ɔmɛ a sane kulaa. (Mateo 9:11) Se Yesu kɛ e he wui pɛ nɛ ɔmɛ a mi. E ngɛ mi kaa Yesu fãa anɔkuale nɛ kɔɔ Yehowa he ɔ he, nɛ e le hu kaa Israel ma a ji Mawu ma titli mohu lɛɛ, se e tsɔɔ we e kaseli ɔmɛ kaa a nɔ kuɔ pe ni kpahi. (Yohane 4:22) Mohu ɔ, e tsɔɔ mɛ kaa e sa nɛ a suɔ adesahi tsuo.—Luka 10:27.

⁶ Mɛni he je nɛ Yesu bui ni komɛ kaa a nɔ kuɔ pe ni komɛ? Ejakaa e kɛ e Tsɛ ɔ tsuo susuu we kaa nɔ ko nɔ kuɔ pe nɔ ko. Yehowa bɔ adesahi konɛ a nyɛ nɛ a fɔ nimli slɔɔtoslɔɔtohi nɛ a hyi zugba a nɔ tsuo. (1 Mose 1:27, 28) Enɛ ɔ he ɔ, Yehowa kɛ Yesu susuu we kaa nɔ ko nɔ kuɔ pe nɔ ko, aloo ma ko nɔ kuɔ pe ma ko, aloo gbi ko nɔ kuɔ pe gbi ko. (Bɔfo Ɔmɛ A Ní Tsumi 10:34, 35; Kpojemi 7:9, 13, 14) Enɛ ɔ ji nɔ hyɛmi nɔ́ kpakpa nɛ e sa kaa waa kase.—Mateo 5:43-48.

7, 8. (a) Mɛnɔ se wa fĩ, nɛ mɛni he je? (b) Mɛni ma nyɛ ma tsu adesahi a haomihi a he ní ha mɛ?

 ⁷ Mɛni he je nɛ wa fĩ we adesa nɔ yelɔ ko aloo ma nɔ yemi blɔ nya tomi ko se ɔ? Ejakaa wa fĩ Yehowa se. Lɛ ji wa Nɔ Yelɔ. Ngɛ Eden abɔɔ ɔ mi ɔ, Satan tsɔɔ kaa Yehowa ji nɔ yelɔ yaya. Satan suɔ kaa adesahi nɛ a he ye kaa bɔ nɛ e peeɔ e ní ha a hi pe bɔ nɛ Mawu peeɔ e ní. Yehowa suɔ nɛ wɔ nitsɛmɛ waa tsɔɔ nɔ nɛ se nɛ wa fĩ. Ke jã a, lɛɛ mɛnɔ se o fĩ? Anɛ o buɔ Yehowa tue akɛnɛ o he ye kaa bɔ nɛ e peeɔ e ní ha a hi pe bɔ nɛ moo o peeɔ o ní ɔ lo? Anɛ o he ye kaa e Matsɛ Yemi ɔ pɛ nɛ ma tsu adesahi a nyagbahi a he ní ha mɛ lo? Aloo o susu kaa adesahi ma nyɛ maa ye mɛ nitsɛmɛ a nɔ nɛ a be Mawu yemi kɛ buami hiae lo?—1 Mose 3:4, 5.

⁸ Kaa nɔ hyɛmi nɔ́ ɔ, ke nɔ ko bi mo o susumi ngɛ ma kudɔmi kuu ko, aloo atua tsɔli a kuu, aloo kuu kpa ko kaa jã he ɔ, mɛni heto o ma ha nɔ ɔ? Eko ɔ, kuu nɛ ɔmɛ ekomɛ yeɔ anɔkuale nɛ a suɔ nɛ a ye bua nihi. Se wa yɔse kaa Yehowa Matsɛ Yemi ɔ pɛ nɛ ma nyɛ ma tsu adesahi a haomihi a he ní kɛ ha mɛ, nɛ e ma ha nɛ nihi maa ye dami sane. Wa buɔ blɔ tsɔɔmihi nɛ Yehowa kɛ haa wɔ ngɛ asafo ɔ mi ɔ hu tue mohu pe nɛ wa ti nɔ tsuaa nɔ maa pee nɔ́ nɛ e suɔ. Enɛ ɔ he je nɛ kake peemi ngɛ asafo ɔ mi ɔ nɛ.

9. Mɛni haomi te si ngɛ Kristofohi nɛ a hi si ngɛ kaseli ɔmɛ a be ɔ mi ɔ a ti ni komɛ a kpɛti, nɛ mɛni e sa kaa a ko pee?

⁹ Ngɛ kaseli ɔmɛ a be ɔ mi ɔ, Kristofohi nɛ a ngɛ Korinto ɔ a ti ni komɛ kɛ a sibi sã nya. “Nɔ ko ke, ‘Paulo nɔ́ ji mi,’ nɛ nɔ ko hu ke ‘Imi lɛɛ Apolo nɔ́ ji mi’; nɔ kpa ke, ‘Imi lɛɛ Kefa nɔ́ ji mi’; nɛ nɔ kpa hu ke, ‘Oo, imi lɛɛ Kristo nitsɛ se nyɛɛlɔ ji mi.’” Benɛ Paulo ná le enɛ ɔ, e he mi po. Nɔ́ nɛ ngɛ nɔ yae ɔ ngɛ hɛdɔ, ejakaa lɔ ɔ ma nyɛ maa ngɔ mi gbami kɛ ba asafo ɔ mi. Enɛ ɔ he ɔ, e bi nyɛmimɛ ɔmɛ nɛ ngɛ asafo ɔ mi ɔ ke: “Anɛ a gba Kristo mi lo?” Paulo wo mɛ ga ke: “Nyɛmimɛ, i ngɛ nyɛ pɛɛ kpae ngɛ Nyɔmtsɛ Yesu Kristo biɛ mi kaa nyɛ tsuo nyɛ nya nɛ pee kake, nɛ mi gbami kó ba nyɛ kpɛti. Nyɛ yi mi, kɛ nyɛ juɛmi nɛ pee kake.” Mwɔnɛ ɔ hu ɔ, e sɛ nɛ mi gbami ko kulaa nɛ hi asafo ɔ mi.—1 Korinto Bi 1:10-13; kane Roma Bi 16:17, 18.

10. Mɛni he Paulo tsɛ Kristofohi a tue se ngɛ, nɛ mɛni wa kaseɔ ngɛ mi?

¹⁰ Paulo kai Kristofohi nɛ a pɔ mɛ nu ɔ kaa a ma ngɛ hiɔwe, enɛ ɔ he ɔ, e sɛ kaa a susu ‘zugba a nɔ níhi’ a he. (Filipi Bi 3:17-20) * (Hyɛ sisi ningma.) Nihi nɛ a pɔ mɛ nu ɔ daa si ngɛ Mawu kɛ Kristo a nane mi. Ke ma nane mi dalɔ ko ngɛ ma se ma ko nɔ ɔ, e kɛ e he wui jamɛ a ma a mi ma kudɔmi sanehi a mi. Jã kɛ̃ nɛ e sɛ kaa nihi nɛ a pɔ mɛ nu ɔ nɛ a kɛ a he nɛ wo ma kudɔmi sanehi a mi ngɛ je ɔ mi. (2 Korinto  Bi 5:20) Nihi nɛ a hɛ nɔ kami ji kaa a maa hi si ngɛ zugba a nɔ kɛ ya neneene ɔ fĩɔ Matsɛ Yemi ɔ se, nɛ a kɛ a he wui kunɔ kɛ pɛhi nɛ yaa nɔ ngɛ je ɔ mi ɔ mi.

11, 12. (a) Mɛni su nɛ e sa kaa waa yu wa he ngɛ he ke wa suɔ nɛ wa fĩ Matsɛ Yemi ɔ se? (b) Kɛ nyɛmiyo ko buu ni komɛ ha kɛɛ, se mɛni ye bua lɛ nɛ e nyɛ tsake e susumi?

¹¹ Ngɛ je ɔ mi hehi fuu ɔ, nihi suɔ nihi nɛ a kɛ mɛ je he kake, aloo a kɛ mɛ hɛɛ kusumi kake, aloo a kɛ mɛ tuɔ gbi kake ɔ. A suɔ ma nɛ a je mi ɔ wawɛɛ. Se e sɛ nɛ waa kase su nɛ ɔmɛ. Mohu ɔ, e sa nɛ wa tsake bɔ nɛ wa susuɔ níhi a he ha a, nɛ e he hu hia nɛ wa tsɔse wa he nile konɛ wa nyɛ nɛ waa yu wa he kulaa ngɛ ma kudɔmi sanehi a he. Mɛni blɔ nɔ wa maa gu kɛ pee jã?

¹² Kaa nɔ hyɛmi nɔ́ ɔ, a fɔ Mirjeta * (Hyɛ sisi ningma) ngɛ ma ko nɛ be ko nɛ be ɔ a tsɛɛ ke Yugoslavia a mi. Ngɛ he nɛ e hi kɛ wa a, nihi sume Serbia bi a sane kulaa. Benɛ e ba kase Yehowa he ní ɔ, e na kaa Yehowa bui ni komɛ kaa a nɔ kuɔ pe ni komɛ, mohu ɔ, Satan ji nɔ nɛ haa nɛ nihi náa ninyɛ kɛ haa nihi. Enɛ ɔ he ɔ, e bɔ mɔde wawɛɛ kaa e ma tsake e susumi ngɛ nihi a he. Se benɛ wɛtso komɛ kɛ a he bɔni ta hwumi ngɛ he nɛ Mirjeta ngɛ ɔ, e ná Serbia bi a he juɛmi yaya ekohu. E sume kaa e maa fiɛɛ ha mɛ po. E le kaa e sɛ nɛ e pee jã, enɛ ɔ he ɔ, e kpa Yehowa pɛɛ nɛ́ e ye bua lɛ konɛ e nyɛ nɛ e ngmɛɛ su yaya nɛ ɔ he. E de Yehowa hu kaa e ye bua lɛ konɛ e tsu blɔ gbami ní tsumi ɔ. Mirjeta de ke: “I ba yɔse kaa ye he nɛ i kɛ woɔ sɔmɔmi ní tsumi ɔ mi ɔ yeɔ bua mi wawɛɛ nitsɛ. Ke i ya fiɛɛmi ɔ, i bɔɔ mɔde kaa ma kase Yehowa konɛ ma je suɔmi kpo kɛ ha nihi. Enɛ ɔ nɛ i peeɔ ɔ, ha nɛ i ná we nihi a he juɛmi yaya hu.”

13. (a) Mɛni ba Zoila nɔ, nɛ kɛ e pee e ní ha kɛɛ? (b) Mɛni wa ma nyɛ maa kase ngɛ Zoila níhi a si kpami ɔ mi?

¹³ Nyɛmiyo ko nɛ a tsɛɛ lɛ ke Zoila je Mexico kɛ ho Yuropa ya. E kɛ nyɛmimɛ nyumuhi kɛ yihi nɛ a je Latin Amerika ma kpahi a mi lɛ ngɛ asafo mi. Zoila tsɔɔ kaa ni komɛ yeɔ e he fɛu ngɛ ma nɛ e je mi ɔ, kɛ a kusumihi, kɛ lahi nɛ a la a he. E mi mi fuɔ, enɛ ɔ he ɔ, e sɔle konɛ Yehowa nɛ ye bua lɛ nɛ e ko ná a he juɛmi yaya. Ke wɔ lɛ wa ya je si fɔfɔɛ nɛ ɔ mi ɔ, kɛ wa ko pee wa ní ha kɛɛ? Loloolo ɔ, wa nyɛmimɛ nyumuhi kɛ yihi fuu ngɛ mɔde bɔe wawɛɛ kaa ke nihi tu munyu kɛ si mɛ ngɛ ma nɛ a je mi ɔ he je ɔ, a muklii mi be mɛ fue. Enɛ ɔ he ɔ, e sɛ kaa wa de nɔ́ ko aloo waa pee nɔ́ ko nɛ maa tsɔɔ kaa ni komɛ a nɔ kuɔ pe ni komɛ. Wa sume kaa wa maa ngɔ mi gbami kɛ ba asafo ɔ mi aloo ni kpahi a kpɛti.—Roma Bi 14:19; 2 Korinto Bi 6:3.

14. Mɛni ma nyɛ maa ye bua mo konɛ o nyɛ nɛ o susu níhi a he kaa bɔ nɛ Yehowa hu susuɔ níhi a he ɔ?

¹⁴ Wɔ tsuo wa le kaa kake peemi ngɛ Yehowa sɔmɔli a kpɛti, enɛ ɔ he ɔ, e sɛ nɛ wa susu kaa ma ko nɔ kuɔ pe ma ko. Se eko ɔ, o weku ɔ kɛ nihi nɛ o kɛ mɛ hi he kake ɔ a ní peepee ma nyɛ ma ná o nɔ he wami nɛ o ma ná suɔmi kɛ ha ma nɛ o je mi ɔ. Se eko ɔ, loloolo ɔ, be komɛ ɔ, o náa nihi nɛ a je ma kpahi a nɔ, aloo nihi nɛ e slo a ní peepee, kɛ nihi nɛ a tuɔ  gbi kpa a a he juɛmi yaya. Mɛni ma nyɛ maa ye bua mo konɛ o tsake o susumi? Mo susu bɔ nɛ Yehowa naa nihi nɛ a woɔ a he nɔ ngɛ ma nɛ a je mi, aloo a susu kaa a hi pe ni kpahi ha a he. Mo hla níhi a mi kɛ kɔ munyu nɛ ɔ he ngɛ o dɛ he ní kasemi aloo nyɛ weku Mawu jami ɔ mi. Lɔ ɔ se ɔ, mo de Yehowa nɛ e ye bua mo konɛ o nyɛ nɛ o susu níhi a he kaa bɔ nɛ lɛ hu e susuɔ níhi a he ɔ.—Kane Roma Bi 12:2.

15, 16. (a) Akɛnɛ wa je ekpa kulaa he je ɔ, kɛ nihi maa pee a ní ngɛ wa he ha kɛɛ? (b) Mɛni blɔ nɔ fɔli maa gu kɛ ye bua a bimɛ konɛ a ye Yehowa anɔkuale?

¹⁵ Wa suɔ nɛ waa kɛ he nile kpakpa nɛ sɔmɔ Yehowa. Enɛ ɔ he ɔ, be komɛ ɔ, nihi nɛ waa kɛ mɛ tsuɔ ní, nihi nɛ waa kɛ mɛ yaa sukuu, nihi nɛ waa kɛ mɛ ngɛ kpɔ mi, aloo wa weku li ma susu kaa wa je muno kulaa tsɔ. (1 Petro 2:19) Yesu bɔ wɔ kɔkɔ kaa akɛnɛ wa je ekpa kulaa he je ɔ, nihi maa nyɛ wɔ. Mo kai kaa nihi nɛ a teɔ si kɛ woɔ mo ɔ a kpɛti nihi fuu li Mawu Matsɛ Yemi ɔ he nɔ́ ko. Enɛ ɔ he ɔ, a li nɔ́ he je nɛ wa fĩ Matsɛ Yemi ɔ se nɛ wa fĩ we adesa nɔ yemi mohu se ɔ.

¹⁶ Loko wa ma nyɛ maa ye anɔkuale ɔ, e sa nɛ waa bu lɛ tue ngɛ níhi nɛ nihi maa pee aloo a ma de ɔ tsuo se. (Daniel 3:16-18) Nihewi kɛ zangmawi titli ji nihi nɛ e ma nyɛ maa ye ha mɛ kaa a maa je  muno. Fɔli, nyɛɛ ye bua nyɛ bimɛ ɔmɛ konɛ a nyɛ nɛ a pee kã ngɛ sukuu. Eko ɔ, gbeye ma ha nɛ nyɛ bimɛ ɔmɛ be a he yue ngɛ aflangaa ngami, aloo ma he suɔmi gbijlɔhi a he. Ke nyɛ ngɛ weku Mawu jami pee ɔ, nyɛ ma nyɛ maa kase bɔ nɛ Yehowa susuɔ ngɛ níhi kaa jã a he ha. Nyɛɛ tsɔɔ mɛ bɔ nɛ a ma plɛ kɛ tsɔɔ nihi a hemi kɛ yemi ɔ nya heii ha ngɛ bumi mi. (Roma Bi 1:16) Jehanɛ hu ɔ, ke e maa hi ɔ, nyɛɛ kɛ nyɛ bimɛ ɔmɛ a tsɔɔli ɔmɛ nɛ sɛɛ ní konɛ nyɛɛ tsɔɔ mɛ wa hemi kɛ yemi ɔ nya.

17. Mɛni susumi e sa kaa waa yu wa he ngɛ he, nɛ mɛni he je?

¹⁷ Behi fuu ɔ, wa bua jɔɔ níhi nɛ ngɛ he nɛ wa wa ngɛ ɔ a he. Ní nɛ ɔmɛ ekomɛ ji, niye ní, gbi, bɔ nɛ lejɛ ɔ ngɛ ha, kɛ bɔ nɛ nihi nɛ a ngɛ lejɛ ɔ peeɔ a ní ha. Se anɛ wa susuɔ kaa níhi nɛ wa bua jɔ he ɔ hi pe níhi nɛ ni kpahi a bua jɔ he ɔ lo? Yehowa suɔ nɛ wa bua nɛ jɔ ní slɔɔtoslɔɔtohi nɛ e bɔ ɔ a he. (La 104:24; Kpojemi 4:11) Ke jã a, lɛɛ mɛni he je nɛ o deɔ veveeve kaa blɔ ko nɛ a guu nɔ kɛ peeɔ nɔ́ ko ɔ hi pe blɔ kpa ko ɔ?

18. Mɛni he je nɛ e sa nɛ waa na nihi kaa bɔ nɛ Yehowa naa mɛ ɔ?

¹⁸ Yehowa suɔ kaa nimli tsuo nɛ kase e he ní, nɛ a ja lɛ konɛ a ná neneene wami. (Yohane 3:16; 1 Timoteo 2:3, 4) Enɛ ɔ he ɔ, ke wa nyɛmimɛ ngɛ juɛmi kpa ko tsɔɔe ngɛ nɔ́ ko he ɔ, wa suɔ kaa wa maa bu tue ke wa na kaa e sa Yehowa hɛ mi. Ke wa pee jã a, wa ma ná bua jɔmi, nɛ kake peemi maa hi waa kɛ wa nyɛmimɛ nyumuhi kɛ yihi wa kpɛti. Kaa bɔ nɛ wa kase ɔ, akɛnɛ wa fĩ Yehowa kɛ e Matsɛ Yemi ɔ se he je ɔ, waa kɛ wa he wui pɛhi nɛ yaa nɔ ngɛ je ɔ mi ɔ a mi. Wa yuɔ wa he ngɛ he nɔ womi kɛ koli simi nɛ yaa nɔ ngɛ Satan je ɔ mi ɔ a he. Wa bua jɔ kaa Yehowa tsɔɔ wɔ kaa waa suɔ tue mi jɔmi nɛ waa ba wa he si! Wa peeɔ wa ní kaa la polɔ ɔ. E de ke: “Hyɛ bɔ nɛ e hi, bɔ nɛ e ngɛ fɛu, ke nyɛmimɛ pee kake kɛ hi si!”—La 133:1.